رواية ارحموني ولو رحمة مرة الفصل الثامن بقلم فراقد حسن علي
-يابه الله يساعدكم على محمود موع أذاناتكم من كثر السوالف
-دواه بس اركان هو يعرف كل مفاتيح شخصيته
-وياليتكم كنتم جوارين اركان !!! (بعدين تعرفون شقصد)
-محمود أخذ أنظاركم الكريمة بس الشخصه حتى ما نطانه مجال نتعرف على بعض
-هو عرفكم عليه سابقاً ،،وشرحلكم كل تفاصيل حياتي وحجالكم شلون قشمرني
-الصراحة اني اتذكر الحادثة
وأتذكر كل تفاصيلها
بس ما اعرف شنو عواقبها
-الى ان أجى اليوم الوكع بي الفاس بالراس......
-بهذيج السنة بعد ماطلع اليوم السابع من وفاة جديتي الله يرحمها
وشالوا بيت أبويه عادل لبغداد
-هذاك اليوم أنصب عزه جديد بالبيت عماتي هلكثر بجن ونعن وحتى كامن يلطمن
-وامي سهام ،،وعمه هناء وياهن يبجن ويلطمن
-بس عمه رجاء ولا يمها الموضوع
-جان يوم دوامي ظهري
وماجنت حافظة أملاء
محد فارغ ويقريني ويكتبني
درس الاملاء مال (ماء ،،بناء،،أمين بناء)
-بدت معلمتنا أسمها ست أخلاص
واختها هم معلمة أسمها ست رجاء
حتى شكلهن يشبه الرجال
-وهاي ست أخلاص من أهل بغداد
وحتى تسوق سيارة ،،
ورجلها عسكري يمكن ضابط
ومسؤول الفرقة الحزبية هنا بالديرة
-يالله هلكد مكروهه وابد ماكو بكلبها رحمة اذا مانحفظ الدرس
لو ناخذ درجة قليلة
تشلفط أيدينا بالمسطرة
-بدت ترد الكلمات بس اني ما افتهم عليها لان تحجي بسرعة
و ما ألحك اكتب وياها
-واني اصلا محافظة الدرس تركت القلم بنص الدفتر وكمت أبجي بصوت عالي
-هي من شافتني أبجي أجتي عليه
كالت /ليش تبجين
باوعت وشافت دفتري فارغ
واني ما جاوبتها لان أخاف منها
-كالت /كومي أوكفي وره الباب يم الزبالة انتي كسولة وحرامات ماخذة مكان من الرحلة وحرامات اهلج مسجليج بالمدرسة
-كمت من مكاني ورحت وكفت وره الباب
-انوب لزمت أثنين بنات
وحده تغش على الثانية هم وكفتهن يمي
-دك الجرس للساحة ،،و صارت الفرصة هي جمعت دفاتر الصف وخلتهن على اول رحلة
-أجتي وضربت البنات بالمسطرة على أيديهن وصلت يمي
جان تكول /يلا افتحي أيديج خلصيني اريد اطلع
-أني خفت وكمت أبجي مافتحت أيديه
-جان اجرني من شعري وأدك كصتي بالسبورة من قوة الدكة حسيت راسي صارت بي رنة
واذاني كامت توشوش
دخت وكعدت بالكاع
-هي عدها شي عادي من شافتني وكعت وكعدت بالكاع ،، أخذت الدفاتر وطلعت
-البنات أجمعن عليه
واني دخت بعد ما اكدر أكوم أنجطلت بالكاع وهدومي صارن كلهن تراب وبقيت أبجي بصوت عالي
-البنات كامن وشالني ناس من جتافي وناس ومن رجليه
وناس من بطني وصدريتي
أنرفعت وشورتي طلع
-ودني للادارة ويصيحن ست
ست هاي فرح خربت
-من دخلني البنات جان موجود مشرفين جاين للمدرسة
-المعلمات طفرن عليه سون نفسهن حبابات كدام المشرفين
-هي بس ام الدين حبابة مراه جبيرة بالعمر وحتى تلبس العباية نفس امي فاطمة
-كعدني على الكرويتة وانطني كلاص مي
-وحده من المعلمات ما اعرفها كامت تمسد على راسي وتكول//شبيج ،،ليش خربتي شنو اليوجعج
-باوعت على الرجال المشرف يباوع عليها شلون تعاملني
-كمت أبجي بصوت بعد أقوة من سألتني
كتلها /ست أخلاص دكت كصتي بالسبورة
ودخت وهسه راسي يوجعني
وخرت كذلتي وشوفتها ،،
شوفي ست هاي منا توجعني
-الرجال المشرف صاح عليه
وسألني شنو؟؟ وليش ؟؟
واني سولفتله كلشي
-رجعتني هاي المعلمة الحبابة للصف
وهي تكول /عيب تنقلين الحجي والسوالف
ترى يكولون عليج مو حبابة
ويسموج الفتانة
-لنهاية الدروس ،،دخلت ست أخلاص للصف
أجتي جرتني من شعري
تكول /جان المفروض أخلص عليج
بس اني ما اخلي عقلي ويه زعطوطة غبية مثلج
-رجعت للبيت شبعانة بجي
-وكعدت سولفت لامي شنو صار ويايه وامي أبد ماهتمت حايرة بالخياطة
بقيت أبجي بالزايد
-شافتني عمه هناء وكالت// تعاي يمي وسألتني ليش أبجي
سولفتلها كلشي
-كالت /ما اعرف أقره واكتب جان قريتج
-بس أنتي صيري شاطرة وابقي أقري واكتبي لا تبقين أميه نفس حالي كلشي ما اعرف
-وبعد لا تغيبين ،،يومية روحي للمدرسة أتعلمي
-من داومت ثاني يوم جان تجينا هاي المعلمة الحبابة اسمها ست ثريا كلش كلش حبابة
عاد كمت ما أخاف ويومية أحب اروح للمدرسة علمود اقرأ واكتب
-بهاي الايام بيت عمي محمد عزلوا لوحدهم بالبيت الفوك ،، أخذوا ويه غرفتهم غرفة أبويه عادل ، والمخزن ، والحمام
وفصل بيتهم عن باقي البيت
ببناء الحياطين ونزل درج على الحديقة الورة البيت وصار باب بيتهم وحدهم
-وبقت غرفتنا الفوك أبويه نطاها لعمي أحمد ويه غرفتهم وكاله// اني أنزل جوه أستقر
وانت رتب وضعك فوك
-عمي أحمد رتب مكان بيتهم
قسم غرفتهم بالنص وبنا بيها حايط بالنص يعني صارن غرفتين صغاروحده اله هو وعمه هناء
وحده للجهال وهم رتبوا بيها غراضهم
وسوى غرفتنا نص مطبخ
ونص مكان للكعدة
وبنا حمام صغير
بس بقى ويانه بنفس الدرج ينزلون جوه ويطلعون من نفس باب الحوش مال بيت اجدادي
-واحنا أخذنه غرفتين من الغرف الجوه وحده صارت لامي وابويه
والثانية صارت النا احنا البنات وبيها أغراض اهلنا ،،
والغرفة الثالثة بقت لعمة شمس
يعني البيت الجوه بقى على حاله ماتغير بي شي وبقى بيت اجدادي وبيت عماتي
-من نزلنا جوه عمه شمس أهتمت بينا اني وخواتي لان امي حايرة بالخياطة
-تشجعنا نروح للمدرسة
وتعلمنا على شغلات البيت
يعني شلون صارت هي امنا الثانية
واني كمت احب المدرسة وصرت شاطرة وصرت اخذ ٧- ٨ بالاملاء
واحب الرسم والتلوين
حتى رسمت صورتي اني ومحمود
-نجحت من الاول،، للصف الثاني
للصف الثالث وبهاي السنة صرت صدك شاطرة اخذ درجات زينة
-بس أجذب اذا كلت نسيت بيت أبويه عادل وبالذات محمود هواي أشتاقله
-اتمنى بس يرجع للبيت والعب وياه وكل مااكعد أرسم أبقى أتذكره
واكوم ابجي
-وبيوم رجعت من المدرسة شفت نسوان يمناوامي وعمه هناء وعمه شمس كاعدات يمهن
-طلع سلمان معاون الدكتور
جاي خطابة على عمه شمس
شايفها بيوم التخربطت جديتي
-وبالفاتحة امه وخواته من أجن چيكن الوضع ونشدن عنها ،،
وعرفن كل تفاصيل حياتها
-وهو هسه تقدم يريد يعرف عمة تقبل بي لو لا ،، لان هو جان متزوج بس عنده مشاكل ويه مرته وهسه طلكها ،،
-وعنده بس ولد واحد أسمه (طه)
-بعد ماراحن النسوان وبليل أجمعوا عمام أبوي واولادهم وعمامي بعد ماشاروا عمتي وافقت عليه وكالت // حتلو عنده ولد هم خطية يعتبر يتيم لان أمه ماكو وان شاء الله اكدر احتوي واكسب بي اجر وثواب
-الحمد لله صارت الخطوبة
وعقدلهم الشيخ بنفس يوم الحفلة
وبعدها بشهر تزوجت عمة شمس
وجان يوم عرسها شي بسيط ومرتب
-من مرت الايام وعمة شمس تجي بيت جدي
وتجتمع ويه عماتي نجمة وكمرة
تمدح بعمو سلمان وترجع ليوره
اسمعها تسولف تكول يعشكني ويموت عليه
-بقيت صافنة شنو يعني كلمة يعشكني ؟؟ بقت هاي الكلمة ادور براسي
-وأبنها (طه)عمره سنتين تجيبه وياهاتموت عليه ،، وهو يصيحلها يمه
-مرت الايام والسنوات وفكدنا ذكر
ودرب بيت أبويه عادل كلشي مانعرف عنهم من شالوا لبغداد عبالك فص ملح وذاب
-كم مرة عمي احمد راح لبغداد يدور عليهم بس ما يندل بيتهم
-يكول حتى بيت أهل فاطمه مايندلون بيتهم ومايعرفون عنهم شي ،،
عادل مقاطع الجميع !!!!
-وحتى ابويه باسم توسل بعمر
أخو يمه فاطمة بس يدلينا على بيتهم
يحلف ويكول//ما اندل عنوانهم ولا واصل لبيتهم اروح لبغداد على لامي أشوفها واسلم عليها وارجع
-وصارت هذيج السنة وصرت بصف سادس أبتدائي وأمتحنت بكالوريا ونجحت من أول دور وشكد فرحت
-بس فرحتي ما تمت أبويه بطلني وكعدني بالبيت ماعدهم بنية تكمل مدرسة
-والحجة الثانية أمي رجعت حبلت وبالكوة تمشي وابويه يدعي بلكت تجيب ولد
-وجابت أمي توم بنات
سماهن ابويه ((ياسمين ،،ونسرين))
-سمعت أبويه يكول لامي// ترحين تراجعين بالمركز الصحي وتاخذين مانع بعد ما اريد جهال العيشة صعبة وصارن ٧ بنات
والبنات حملهن ثكيل
صدك صرنا ٧ بنات ( فرح ، منى ، هالة ، مريم ، فاطمة ، ياسمين ، نسرين )
-صفنت ياااا وين حملهن ثكيل
أشو الجهال ياسمين ونسرين وكعن براسيٍ اني اشيل واغسل وابدل وأحظن
-وأمي حايرة تخيط تكعد على مكينة الخياط من الصبح للظهر وقبل لا يجي أبويه من الشغل تكوم تسوي غده
-وانوب ترجع تخيط للمغرب
تسوي العشى وبعدها شويه تخيط وتنام
-وشغل البيت واكع براسي وبراس منى والله حتى هالة تخليها تشتغل
-واللي ماتشتغل زين وتنظف عدل
تضربها وتعاقبها ،،يعني كل شغل البيت علينا
-أمي كلش قاسية علينا يعني بس بطلوني من المدرسة جبرتني أعجن وما اكدر أكلب العجين بالنجانة ايدي اطك بس ماكو رحمة بكلبها غصبا عليه تعلمت وهيجي تعلمت على كلشي وشلت الحمل والمسؤولية من الصغر
-عمه شمس خلال هاي الفترة جابت مرتين
بس تطلع الاربعين ترجع تحبل
صار عدها ((مروان ،، هارون))
-وعمه نجمة صار عدها ((رافد ،،عمر ،،أقبال ،،يونس))
-وعمة كمرة صار عدها
((نوال،،وعدنان،،وقحطان،،ونسمة،،وثناء)
-وعمي أحمد ((كوثر ،،عثمان ،،خالد))
-وعمي محمد ((رغد ،،هبة،،غدير ،،جاسم ))
-كمت اختنك من حبس البيت
وتعب الشغل ورعاية البنات التوم
أخلص شغلي واكعد يم أمي بقصدي اخلص من الضوجة بس عجبني شغلها وبقيت اراقبها
شلون تفصل وتخيط
-شو حبيت الشغلة وكمت أخلص شغل البيت بسرعة واكعد يمها
-وهي كيفت على واهسي شكو شي خياط بسيط تكولي// تعاي خيطيه مثلا كفة دشداشة
أخياط بجامة ،،شورت ،،فتوك ملابس هيج شي ،،اني أخيط
وهي تكعد تراقبني
-شوية شوية تقويت بالخياطة
وتشجعت وكمت أفصل بقطع القماش التعبانة العدنه ،،
لو قطع القماش الباقية
-وامي من تشوفني خلصت شغلي بالبيت
تكلي //تعاي خيطي بمكاني تعبت
بس لا تكولين للنسوان اني أخيط
لو أساعد امي وهي تبقى كاعدة يمي تراقبني
-دخلنا بهذيج السنة الكشرة
وسقطت بغداد وصارت الاوضاع تخوف بس احنا الحمد لله وضعنا نفسه ماتغير ولا تأثرنه بالحرب ولا بالفرهود
-صار عمري هنا ١٣ سنه بس بعدني
ماكملت مثل باقي البنات
-منى من العام كملت
-خلف الله على عمة هناء هي القريبة علينا وعلمتها
-ولان صارت الحرب أبويه
بعد ما خلاها تكمل مدرسة
خلصت خامس وكعدت بالبيت
-بس شنو صلوات على النبي
سبقتني بطول وبالجسم
وهي من الصغر بيضة
وشعرها بي لمحة شكار وثخين
وعيونها واسعات على عيون أبويه
وجسمها مليان الواحد من يشوفها ينطيها أكبر من عمرها
-أحنا البنات كلنا طلعنا كصار على أمي بس جسمنا من احنا صغار مليان
-وحتى هالة بهاي السنة كملت وصارت مراه
-بس اني كلشي ماكو ،، وعمه هناء دائما تسألني ماكو شي
أكلها // لا ماكو شي
-اني أعرف كلشي يخص هذا الموضوع لان عمه هناء خلف الله عليها شرحتلنا وعلمتنا على كل سالفة
-خطية كلبها ما انطاها تعوفني
اخذتني للمركز الصحي ودخلنا على الطبيبة النسائية وهي سولفتلها عن وضعي
-دكتورة كالت/ عادي لا تشيلن هم
ما تتأخر عن عمر ١٥ سنة وعادي تصير تجيها الشهرية وماكو شي يخوف وضعها طبيعي
وهاي عدت سنة جديدة بخير وسلامة واني وخواتي نكبر
وأبويه شايل حمل عيشتنا والصدك أنقهر عليه لان ماعنده ولد يساعده ويشيل وياه شويه من مسؤوليتنا ويخفف عنه من حملنا
-صح امي هم تساعده من أجرة الخياطة بس مو بهذاك الشي بس الحمدلله مستوره العيشة
واني صرت أشتغل بالخياطة أكثر من أمي هي تفصل واني أخيط
-بهاي الأيام شو ما ادري شيصير بيه واحاسيس ومشاعري مدري شلون صايرة وكلساع برأي
كوثر بت عمي أحمد كلش قريبة عليه يعني حتى أقرب من خواتي عليه صح أصغر مني ب ٤ سنوات
بس عقلها جبير ،،وذكية ،،ونبهة
كلشي احجيلها وهي كلشي تحجيلي
-دخلنا بسنة جديدة
وهنا صار عمري ١٥ سنة 🌿
-وعلينا شهر شباط ،،والدنيا باردة تكص كص
خلصت عجين ودثرته وخليت جواه مي حارحتى يختمر بسرعة لان الجو مغيم
خاف تمطر عليه واني أخبز
-منى وهالة لملمن البيت بسرعة
وفاطمة ومريم كاعدات يلكطن التمن وينظفنه من الدنان
وياسمين ونسرين سبحتهن ونامن
-ركضت وشجرت تنور الطين
وخليت بي حطب زايد
علمود شجار واحد أخلص كل العجين
-شنكت العجين ولولكته
وطلعت الصينية يم التنور
بس بلشت أخبز ،،بدت الدنيا
تمطر خفيف
-خفيت أيدي وكمت اخبز على راكين والثالث انزل ايدي جوة توصل قريب الفحم
بس مايفيد المطر نكع هدومي
واني لابسه دشداشة قديفة صارت شثكلها عليه
-خلصت الخبز وغطيت التنور
وشلت الخبزات الضامتهن بطن نجانة ومغطية حلكها بالصينية وركضت جوه
ومنى أخذت الخبز من ايدي
نشرته على جرجف خاص مخلي بس للخبز علمود لا يصير عجين من نضمه بالثلاجة وهو حار ،،
ولو أحنه يومية نخبز بس هل خطوات لازم
-ركضت أخذت هدوم جديدة ودخلت للحمام
سبحت بمي شبه حار
ومن طلعت كعدت يم الصوبة
-وامي على كعدتها كاعد تخيط
-كعدت شويه وانوب كمنا اني ومنى نجهز العشه
-انوب انقهرت خطية ابويه هسه يجي ناكع من المطر ركضت حضرت ملابسه وخليتله الصوبة بالحمام
-والحمد لله أنجمعنا على نعمة من الله نص الاكل باقي من الغده
والنص الثاني تكلاه
-بعد ماشربنا الجاي
وكعدنا سولفنا هيج سوالف عاديه
-كامن مريم وفاطمة مدن الفراش
حتى هن ماخلصن من امي علمتهن على الشغل
-طفت الكهرباء كمت شعلت الفانوس وكل وحده من عدنه أنجطلت بفراشها
-للفجر وحسيت اكو شي نزل عليه
كمت للحمام وعرفت شنو السالفة
ورتبت أموري
-بس شنو ماعندي وجع !! يعني هيجي بطني تلويني وبيها وجع قليل اني أشوف منى وهالة شو كل ماتجيهن يشربن حب راس واعشاب وينامن بالفراش
-رحت أخذت حباية راس كلت خاف فد شوية توجعني وحميت كلاص جاي وشربته
رجعت تمددت بفراشي وغفيت
-الصبح صعدت وكلت لعمه هناء
أخذتني لمطبخهم وكالت /
تعاي غمسي ٣ أصابع من جف أيدج
بس الاطراف بكونيه الطحين
سويت نفس ماكالتلي
-خطية بوستني وأنطتني قطعة قماش
كالت// هاي هديتج هسه صرتي مراه
-أني أستحيت أكول لامي
هي نزلت وحجت وياها
وكالتلها على السالفة
-يمكن ثلاث شهور بعدها لو اكثر ما أتذكر زين ماكو شي لا نزلت الشهرية ولا شفتها وعندي عادي وما اعرف لان عبالي شي طبيعي
الشهر البعدها ياربي رحمتك
الوجع هالمرة قوي وما يرحم بنهاية بطني وبنهاية ظهري وحتى نزل على أفخاذي والدم ينزل فضيع وحتى صار عندي صداع
ولعبان نفس والدوخة جلبت بيه
ماكدرت أتحمل الوجع وتخربطت
-وامي وعمتي هناء أخذني للمركز الصحي وضربوني هناك أبرة مسكنة للوجع
-ودكتورة كالت /لا تخافون ترى حالتها عادية بس شويه تفرق عن باقي البنات ويسمون هاي الحالة عسر الطمث يعني الالام تكون شوية قوية وماتتحملها
بس تستقر هرموناتها ويتعود جسمها او تزوج تخف من عدها هاي الالام
-وبعدها كل شهر كمت أدخل انذار
اتخربط واكوم أبجي وجع فضيع أموت مايفيد لا حب راس
ولا شراب أعشاب ولا اي شي
-وأهلي ويايه يدخلون أنذار
وبهذاك اليوم شدوا روسكم ياكرعان الا ياخذوني للمركز صحي يضربوني أبرة مسكنة وارجع انام ،، ثاني يوم يلا شويه يخف عندي الوجع
- حتى كمت أستحي أباوع بوجه ابويه لان كام يعرف موعدها من أتخربط
-دخلنا بسنة جديدة وصار عمري ١٦ سنة
ما شاء الله شنو جسمي فار فور وصار مليان أكثر من قبل وكشف لونه صار أبيض بس مو بياض ناصع لا على كسره حنطية
واني من صغري شعري أسود
عكس خواتي شعرهن أشكر على جديتي بس اني طلع شعري أمي
واخذت لون عيونها الملونة مو
لون قوي بس حلوة ،، وماعندي سمن ابد الحمد لله جسمي مرتب من فوك ليجوه
-بيوم أجتنا عمه شمس وياها رجلها ولدها ،،أتغدوا يمنه وللمغرب وراحوا
-شو عمو سلمان بقى مركز عليه
-مر أسبوع على جيتهم
ولن جايه عمة شمس
وياها مرة حماها الجبير وبتها الجبيرة
-حجن ويه أمي يردن يخطبني لابنها أسمه (مخلد) عسكري ضابط
هل سنه متخرج وشايل نجمه
-امي من سمعت هيجي مواصفاته وضابط وافقت من يمها
-اني بقيت صافنة ،،و ما اعرف شسوي مو شغلة احب محمود
حب مال أحباب وعشاق على كولت عمتي شمس
ولا أحبه مثل أخويه
ولا أحبه مثل ماجنت اكوله انت صديقي ما اعرف شلون اوصف حالي !!
-بس بكل هاي المدة المضت اني ابد مانسيته ودائما اتذكره
-((عود الگلب ناسيك لا يشهد الله
بسمگ يسولف دوم من قدرة الله))
-ودائما أكعد ويه كوثر واسولف بطاريه وأتذكر سوالفه الحلوة ويايه وشلون جان يدافعلي ويدللني وابقى ابجي عليه مشتاقتله ورايده شوفته
-((لون دمعي بحر هم جان وشل
ولا ينفع بجرحي الروف والشل
شلي بالدار عكب الراح والشل
بعد عينه السلف يحرم عليه))
-امي اتفقت ويه أم مخلد
على يوم نتشاوف بي أني
ومخلد
يعني يوم الكعدة الشرعية
واكيد بوجود أهلي وأهله
-صار اليوم وعمه هناء نطتني كوستم من عدها لبسته كعد على جسمي مرتب وحلو بس بي شوية ضيق مو هواي ضيق
بس مرتب على جسمي
-وخلتلي بس كحلة حجرية بطن عيني امها جايبتها الها من مكة
-ولبست ربطة لونها سماكي وبيها حاشية حلوا الوانها قريبة للون الكوستم
-باوعت للمرايا شو شكلي تغير بالكحلةتكول عيوني كبرت ولونهن صار اكثر لمعةولون مال ربطه عكس على وجهي طلعه اكثر بياض عجبني شكلي الحمد لله على تمام الخلقة
-أجى مخلد وأمه وأخته
وعمه شمس وياهم وعمو سلمان
-عمه هناء كالت //من عثمان يقدم الجاي والكعك انتي دخلي وياه سلمي وتعاي كعدي بصفي
-سويت نفس ماكالتلي ،،دخلت الديوانية بس شنو أحس كلبي يدك بقوة
-سلمت عبالي أكعد يم عمه هناء
بس ام مخلد صاحت عليه وبوستني وانوب بتها هم بوستني
-رفعت عيوني وصارت بعيون مخلد يمه مركز عليه وحسيت عيونه راح يوكعن هلكد ما مركز بالشوف
-مخلد طويل وأسمر
وشواربه ثخينة سودة
وعيونه دعجة وحواجبه ثخينة
وجناته عالية ملامحه رجولية باأمتياز وجسمه مرتب لا سمين ولا ضعيف وحتى نبرة صوته خشنة
يعني حيد وابن عرب من الاخير
وانوب ضابط اكيد التدريب العسكري صقل شخصيته وجسمه بالتمام والكمال
-كتلني الخجل ولا سولفت ولا حجيت كعدت يم عمه شمس وسكتت
-وعود لان احنا اهل ونسابة
كعدنا كل احنا بالديوانية
بس خواتي و كوثر مادخلن
يعني بس الكبار من الاهل كعدوا
-ثاني يوم ام مخلد هم اجتنا وكعدت تسولف ويه امي
-وتكول//مخلد عجبته البنية واذا موافقين هو مستعجل
-امي من يمها تصرح بالموافقة
وتكول//اي موافقين وين نلكي نسيب احسن من مخلد يصون بتنه ويدللها
اني بس ساكتة واتفرج
واكعد يم كوثر واشبع بجي
جنت أتمنى اصير زوجة محمود ابن عمي بس سبحان الله كلشي قسمة ونصيب
-ماكو أسبوع وكلموا كل التجهيزات
من تحديد الحاضر والغايب
ومشتراة الذهب وترتيب لحفلة الخطوبة وعقد شيخ
-اخذتني اخته وعمة شمس للصالون حفن وجهي وعدلن حواجبي ومكياج بسيط
وشعري سوته البنية تسريحة بسيطة
-ولبست فستان ماروني
أخت مخلد جايبته وياها
ولبست وياه حذاء أبيض
عمه شمس سألتني على قياس رجلي قبل يومين
-من كمل كلشي باوعت بالمرايا
ماعرفت روحي صرت وحده ثانية
-رجعنا للبيت وبعد ماقروا الفاتحة
عقدلنا الشيخ
-هنا فقدت كل ذرات الأمل ان أكون في يوم من الايام زوجة لمحمود
-دخل مخلد يلبسني الذهب من باب الهول وهو مركز عيونه عليه ،،
-كمت أرجف من المستحى
،،الخجل ذب حني أول مره بحياتي ولد يشوفني هيج
حتى مااعرف شلون أتصرف
-من بطلت من المدرسة ولهسة باب الحوش ما أوصلهاحتى ماكو رجال شايف شعري غير أبويه وعمي أحمد
-كعد بصفي مخلد وأحس بي يرجف أكثر مني
-بلش يلبسني بالذهب وأيديه ترجف وأسمع بلعة ريكه ترن باأذاني
-لبسته الحلقة الفضة بيده اليمنى
انتبهت يباوع على صدري ومركز من كل خاطره ،، وانوب الفستان فضيحة وصدره محفور والحفرة مغطيها بشيفون ماروني مزيد الفستان جمال
-هنا صدك تخربط وضعي أحتاريت
وين أضم روحي ذبحني المستحى
-بعد مشربنا الشربت واكلنا الكيك
الخطوات التقليدية المعروفة عند كل العراقيين
-هو سحب جكليتة فتحها من ورقها وخلاها بحلكي وغمزلي
البنات كامن يضحكن
-من كام يريد يطلع شاورني
-بليل أجيج ،،لا تنزعين الفستان
غمزلي وطلع .............
شكرا لزيارتكم عالم روايات سكيرهوم
