رواية جراح قلبي الفصل الثامن بقلم جوهرة
دخل عمر لبيت عمته وصاح لينا وجان وجهه ميتفسر
من شفت وجه خالو گلبي وجعني جان رأسا يكول / كاشفين السايق الوصلج ومحققين وياه توى خابرني
لينا / عزااا بعيني /؛خالو شنسوي هسة يعني راح يجون لهنا
عمر / لج بابا اهدي شبيج كمتي ترجفين محد يندل البيت لا تخافين
سكتت ورحت كعدت عالقنفه بالمطبخ اجى يوسف يركض جان يلعب وية الجهال بالحديقة / ماما دوعان
كمت صبيتله تمن وخبطت وياه مرك من مالت الظهر خليته كدامه عالميز وكعدت كباله أيدي على خدي محتارة
جريت الخاشوكه من ايد يوسف كام يخربط كمت اوكله بس شنو بالي مو يمي كله يم ايهم حيل خفت منه وبداخلي احساس مراح تعدي هاي السالفة
خالو دخل جوا يم الحجية وام دلير
انوب الندم كتلني لأن خليت خالو عمر بالسالفة خاف يسووله مشكلة مو زين منه أجاني عالسريع بس خابرته عايف زوجته وولده ياربي والله محتارة ياربي فرجها من عندك
كمل يوسف وأخذته غسلتله ورجع يلعب شلت الماعون غسلته ومسحت الميز رحت يمهم كاعدين يحجون على ولد خالو عمر
خالو عنده ولدين كبار بعمر 15 و12 وبنية
10سنوات
بقيت ساكته افكر بوضعي وكل الاحتمالات خليتها كدامي لدرجة راسي كام يوجعني
ـــــــــــــــــــــ
ايهم /
بقينا بالسيطرة ميخلونا ندخل الا تفتيش وإجراءات ، طفرت روحي ردت اتعارك لوما صعب المهم دخلنا سليمانية ساعة تسعه بالليل وسألنا عالفندق دلونه عليه من دخلنا بقيت اسال بالموظف المسؤل عالحجوزات بالبداية ماقبل بس انطيته فلوس قبل يحجي مسجل اسمائهم يعني لينا جانت هنا هي ويوسف ومنوو الرجال الي راحت وياه خالها بتركيا شيجيبه
رجعت سالت الموظف على شكله الي افتهمته رجال عمره بالاربعين ماكو الا خالها
بسيطه لينا هيج تفرينه فرة خل الكفج واني اعلمج
حجزنا غرفه اني وصعب صعدنا فوك ارتاحينا وسبحنا صعب كال خل نروح مطعم ونفكر بعدها شنسوي
كملنا عشا بالمطعم وصعب وصى على نركيله اني مالي واهس لكولشي حتى العشا اكلت جم لكمة حكيت خدي وسألته / نسأل منو واحنا مانعرف أحد هنا
جر نفس من النركيلة وذبه / نروح نسال يم المختارية على خالها واكيد راح نوصل اني اعرف اسمه وعشيرته
ايهم / ااخ لو الكفها الا اطلع قهري بيها
صعب / اششش أهدى ماريد اي عصبية ماريد ندخل بمشاكل هنا خلي ابالك احنا مو بديالى
ايهم / صعب شلون تنهزم شنو هالجرأة منين جابتها ، ماجانت هيج !!!!!!
صعب ضيك عيونه ورد / وانت وين عرفتها حتى تعرف شبيها وشنو طبعها ايهم عمرك ماتقربتلها ولا حاولت تحتويها عندك علم بهاي السنوات الراحت ماتختلط بينا يادوب تسلم علينا ترى انت أذيتها بأهمالك والخلاها تنهزم هاي الجايبها وياك على أساس مرتك
ايهم بضيق / يمعود لزكتولي بيها بنت صاحب الشركة الي تعاقدت وياهم وخلاص لغيت الفكرة وراحت لا اخطبها ولا راح اشارك ابوها
صعب / اي احسن والله ... صلفة لسانها يلوط اذانها
ايهم / انت تذب الصوج علية واني حالي حالها انغصبت عليها من ورى أبوية وسوالفه خايف أحد يتزوجها ويأخذ ورثها هن بيتين ومحلات قابل وارثة عمارات
صعب / بعد أبوية وعقليته ترى للعلم السبب مو بس الورث لا والله أبوية ميريدها تطلع للغريب لأن يتيمه رادك تتزوجها حتى تبقى بحماية العمام
بس للأسف ولا تزعل من اخوك الجبير انت ذليتها وظلمتها وحوبتها ماتتخطاك
فك عينه على صعب ماحجى شي لأن كلامه صحيح
ـــــــــــــــــــــ
لينا /
يومين اني عشتهن برعب اخاف يندلون طريقي خالو عمر هم خطية ماقصر وياي جابني هنا هو هم عنده شغل بتركيا والبارحه خابرو عليه من الشغل لازم يرجع وصاني ما أضعف لأن اني صاحبة حق وهم وصى الحجية وام دلير علية كال ماا اطول أرتب وضعي هناك ويرجع حتى يأخذني لديالى علمود الورث وجواز السفر اللي قررت أطلعه مناك
سافر خالو الصبح واني گلبي انغز حسيت بغربة بدونه كمت ما أنزل من الغرفة حتى يوسف ما اخلي سودة علية يضوج لأن تعلم عالولد بس شسوي اخاف عليه اخاف يطلع برى
اندكت الباب ام دلير صاحتني عالغدا نزلت اني ويوسف الي فرح لأن نزلته جوة
تغدينا واني الغسلت المواعين ما قبلت اقلها اساعدهم رغم اعتراض ام دلير
سويت جاي وصبيتلهم وكعدنا نسولف شوي وعلا الصريخ اني فزيت لأن صوت يوسف ركضت للكراج واشوفه واكع من البايسكل على راسة عطت واني اشوف الدم نازل على وجهه حظنته وبقيت ابجي وجسمي يرجف
ام دلير بسرعه اخذته ولفت راسه بمنشفة وعاطت بابنها حجت ويا بالكردي طلع يركض برا البيت
التفتت وهي تسكت بيوسف الي فغر من البجي يخاف من الدم واكيد متاذي من الوكعه
لأن بايسكل دلير عالي مدري شلون صعده
دقائق اندكت الباب رجال حجى وية ام دلير من برى التفتلي / جيرانه هذا ناخذ يوسف للمضمد
ركضت واني احاول استعجل صعدت جبت عباتي لبستها عالدرج ولفيت شالي وطلعنا اني وام دلير ويه جيرانهم بسيارته
يم المضمد الحمدلله ضمد جرحه بس اكل راسه نفذتين رجعنا للبيت وتشكرت منهم
دخلت شايلة يوسف بحظني تلكتني الحجية والجهال الي جانو خايفين خطية تحمدت ليوسف بالسلامة وباسته
صعدت فوك بالغرفة نومته عالفراش وانطرحت بصفه جريته بحظني وبدت دموعي تجري على خدي ياربي شنو راح يصير وياي اني وحيدة بالدنيا كلها
عضيت شفتي بقوة وإحساس ندم بدى يتغلغل جوا روحي يعني اليوم لوما جيرانهم
ركض بيوسف اني جان شسويت وحدي
ــــــــــــــــــــ
رانيا / ماكال صعب شي
ايمان / شيكول صارلهم تلث ايام يفترون عالمختارية وماكو أحد دلاهم وإحتمال باجر عكبة يرجعون
رانيا / والله عمة ما ادري شأحجي ايهم اخوي ولينا مثل اختي الصغيرة بس ايهم غلط لأن هواي اهملها هي هم حقها شابه صغيرة وحلوة هيج يعاملها
ام حذيفه / رانيا سدي حلكج ترى البينة مكفينة مو وكت هذا الحجي
رانيا / يمة هذا حق وحرام نسكت عنه
ام حذيفة متريدهن يسولفن لأن روحها طفرت من الصار تخاف من كلام الناس إذا سمعو لأن لحد الان متكتمين عالخبر محد يدري بس العمام بيناتهم والولد حذرو نسوانهم ميحجن اي شي هذا مصطفى ابن عمهم صالح واياد
متزوجين غريبات
كعدت علا وسالت /؛ عمة عليج الله صعب ماكال شي
ايمان / لا والله بس مبين من صوته حيل ضايج
علا / يارب يلكونهم ويرجعون سوى
،،،،،،
ايهم /
بالليل مسدوح عالفراش / راح اتخبل وين راحت هاي
بداخله بدى يشك إذا عدها شي ليش شردت معقولة عدها علاقة لا لا ايهم لا تروح بعيد لو عدها شي ما بقت تنتظر
انتبه لصوت صعب الي دك موبايله فتح خط وحجى شوية وسده
صعب / الولد الي جنا يمه المغرب انطيته رقمي حتى يخبرني إذا عرف شي
كمز ايهم من الفراش / اي وشنو كال
صعب / يمكن يعرف خالها ممتاكد فباجر نروح عليه
ايهم / ياباجر شيصبرني اني امشي هسة
صعب / شبيك بابا ساعة تسعه ونص خلها باجر
ايهم / صعب اني رايح وحدي
حسيت شوية امل من حجى صعب وضغطت عليه حتى نروح وخلال نص ساعه احنا عنده بالباب واكفين والتكسي الاجينا بيها تنتظرنه
بهذه الايام نفتر بتكسي عفنا سيارة صعب بالكراج ابوالتكسي يندل احسن ما نبقى نسأل كل شوية عن المناطق
الولد ماقصر خبرنا بمكان أهل زوجة عمر طلعو قريبين
بالمنطقه هذا اذا هو نفسه الاسم الي انطيناه
تشكرت منه وصعدنا تكسي دليناه بالعنوان
وكفت التكسي يم باب الحوش بعدما سألنا شباب بالشارع عن البيت
من جاي انزل جرني صعب / ماريدك تتهور اضبط اعصابك ايهم
ايهم / نار مشتعلة بداخلي لا تكلي الزم اعصابك
صعب / ايهم اني راح اكون بوجهك إذا اذيتها
يحجي صعب واني كوة لازم روحي دكيت الجرس شوية وطلعت مرة بعدها شابة سالت بلهجه كردية
جاوبها صعب سلم / السلام عليكم
ردت بعربية واضحه / وعليكم السلام تفضل
صعب / نسيبكم عمر ال ...
/ اي ليش ؟!!!
اني ماتحملت دفعت الباب / وين لينا ويوسف
خنزرت بوجهي مبين عرفتنا
/ منو هاي ماعدنا هيج اسم
ايهم / اكول امشي صيحيها لا أدخل اني اطلعها
ام دلير / انت شلون هيج تحجي وياي ماتستحي
تدخل صعب وهو يسحب ايهم/ اختي بدون زحمه بنتنا عدكم ونريدها وإذا رفضتي راح نضطر نتصل بالشرطه
المرة مبينه خافت رجعت للبيت بسرعه شوي وطلعت وياها مرة جبيرة بالعمر كامت تحجي ولهجتها عربي مكسرة
الحجية / بنت عندي ماينطي تجي عمر تفاهم وياها
صعب / حجية اترجاج خل ناخذ بنتنا ونروح
الحجية / ابد ما يقبل اني
صعب بكل هدوء حتى يقنعها / حجية زين اتصلي على عمر خل نحجي وياه
هذا الحجي كله واحنا بالشارع متقبل تخلينا ندخل
جابت المرة موبايل واتصلت حجت وياه لعمر ورجعت انطتني الموبايل
اخذته وحجيت وياه جان عصبي وهددنا إذا نأخذها يقدم شكوى بينا للشرطه
اني شكد جنت احاول اضبط اعصابي واوصي ايهم ميتهور بس من سمعت خالها يهددنا حيل ضجت خاصة من يكول اسحلكم من ارجع ،،
سديته بوجهه وانطيته للمرة واشرتلها بيدي روحي صيحيها لا أدخل للبيت لو تردون اجيب الشرطه عليكم المرة رجلها يريدها انتم شدخلكم ،، رجعت نترت بيها امشي صيحيها
التفتت الحجية على بنتها / يلة مابية دوخة ولكلكلك صيحي بنت
لينا /
اندكت الباب ودخلت ام دلير وجهها مخطوف اني جنت توني دا اغفى / عيني زوجج بالباب يصيحج انزلي شوفي
شهكت بخوف / صخاااام بوجهي شلون اندل البيت
ام دلير / فدوة تعاي فضحنا بالشارع والدنيا ليل
سحبت موبايلي اتصل على خالو رأسا فتح خط عصبي نار صاير
لينا / خالو شسوي
عمر / ولج خالو واكفين بالباب مدري شلون اندلوا البيت انوب اني بعيد عليج بنتي بقت يمج هاي تردين تبقين اتصلي بالشرطه تجيج لو تردين ترجعين وياهم
سديته منه وگلبي وجعني اني مو حمل اتصل بالشرطه واجرجرهم هذا مو طبعي لعد شلون خوما ارجع والله يدري شنو منتظرني
جريت حسرة وذبيتها ورحت لملمت ملابسي وملابس يوسف وشغلاتي حطيتهن بالجنطه لبست عباتي ولفيت الشال ودموعي تصب شلت يوسف الجان راسه ملفوف لأن البارحه تعور
ام دلير شالت الجنطه وهي تتعذر لأن ماكدرو يحموني
ماحجيت شي وياها نزلت من فوك وطلعت للكراج وعيني اجت بعينه واكف بالباب وياه صعب
من شافني دفع الباب واجى سريع علية اني جسمي كزبر وحظنت يوسف بقوة
كز سنونه وهو يسحبني من جتفي بقوة واصابيعه تحفر بلحمي / عبالج ما راح الكاج،، شردتي مو بسيطه حسابج مو هنا بالبيت
جيبي ابني سحب يوسف من حظني كام يبجي يمكن عوره براسه من شافه مضبضب فك عينه ونتر شبي الولد
مارديت رجع زمخ / مو وياااج احجي لج
إم دلير فهمته سكت ماحجى طلع للشارع واني وراه بوست الحجية وام دلير صعب صار بوجهي عاكد حاجبه سلمت عليه بصوت ناصي ولحكتهم من صعدو تكسي
صعب بالصدر وأيهم بصفي ويوسف بحظنه
التفتت لصوت يوسف بجى .. ماما
لينا / تعال ماما
انطاني يوسف خليته بحظني رجع غفى دنكت خليت خشمي بشعره وعيون ايهم تريد تاكلني
بالفندق حجزولنا غرفة وصعب راح لغرفته واني وأيهم بغرفه جان شايل يوسف من نزلنا ذبه عالفراش وعدل نومته والتفت علية رافع تك حاجب بدى يتقرب واني متت بدمي حيل خفت يضربني ويهيني لأن كولشي اتوقع منه
سحبني من رگبتي وأيده تضغط عليها كطعت النفس زمخ بية / حقيرة تنهزمين بالليل وتاخذين ابني مافكرتي إذا الكفج شأسوي
شكرا لزيارتكم عالم روايات سكيرهوم
