رواية ليتك لا تعرف سري الفصل الثامن بقلم اسماء الطبلاوي
(في الوقت ده في مكتب سامح كان بيتصل على رانيا يطمن على صحتها لانها كانت فضلت فتره طويله في غيبوبه وما فقتش منها الا بفضله بعد ربنا طبعا.
(فلاش باك) راح سامح اوضه رانيا لما عرف انها اتصابت في حادثه وقعد جنبها وهي في غيبوبه مفصوله عن العالم.
سامح: رانيا انا عارف انك هتكوني سمعاني دلوقتي وبالذات انا.. ارجوكى لو انتى سمعاني حاولي ترجعي حاولي تفوقي دوري على صوتي وتعالي وراه انا عارف ان عمري ما قلت لك كلمه حلوه اربع سنين وانت رايحه جايه على المستشفى وبتعملي حاجات مجنونه عشان تشوفيني وانا عمري ما حسيت بيكي بس صدقيني لو فوقتي دلوقتي في حاجات كتير جدا هتتغير هحبك وهموت فيك كمان وده هيحصل اكيد مع الوقت والعشره لاني مش هسيبك ثاني انا كنت بحلم بحب مش من حقي علشان كده ما كنتش شايفك بس دلوقتي خلاص اوعدك انك لو قمتى وخفيتي هدي لحبك ليا ده فرصه وهفتح لك الف باب بيوصل لقلبي ومش هقصر في اي حاجه معاكي وهنتجوز بس انت قومي انا عندي احساس رهيب بالذنب ناحيتك بس صدقيني مش ده سبب الكلام اللي بقوله بالعكس احساسي ان انت مسؤوله مني وجزء كبير في حياتي هو اللي خلاني اقول لك كده انا هستناكى ومش هياس.
( باك) ردت رانيا على التليفون بفرحه.
سامح: الو ايه يا حبيبتي عامله ايه دلوقتي فطرتي ولا لسه.
رانيا: الحمد لله يا حبيبي ما اتحرمش منك ولا من سؤالك انا فطرت الحمد لله من شويه هو لسه ما حدش عارف حاجه عن فرح.
سامح: لا والدنيا مقلوبه عليها وكله بيدور وما فيش حد ساكت.
رانيا: ربنا يستر ده زمان مامتها ميته من القلق عليها يا عيني.
سامح: انتى بتقولي فيها كلهم حالتهم صعبه ودلوقتي جاسر هيفوق واول ما هيسال هيكون عليها وما حدش عارف هيقول له ايه.. انا بس خايف عليه من التوتر
رانيا: معلش يا حبيبي حاول تساعدهم على قد ما تقدر وهون عليهم وما تخافش عليا انا كويسه
( واخيرا فاق جاسر وحواليه ابوه واخوه ورحمه وسامح ونصره حتى نوال رغم وضعها الا انها جت تطمن عليه فتح عينيه ببطء شديد وبتعب وفضل يدور عليها في الاوضه ما لقاهاش
جاسر بتعب: امال فين فرح يا بابا انا مش شايفها وسطكم يعني.
صفوت: حمد لله على السلامه يا حبيبي ما تتكلمش كثير انت تعبان ولسه خارج من عمليه خطيره.
فادي: الحمد لله انك بخير يا جاسر انا مش عارف اقول لك انت وحشتني قد ايه وما كنتش اعرف اني بحبك قوي كده
جاسر: الله يسلمكم كلكم يا رب فين فرح يا رحمه.
رحمه: في الحجيجه يا جاسر فرح تعبانه جوي بعد ما عملت لك العمليه مع دكتور سامح خرجت وهي بتترعش وعرجانه واعصابها كانت تعبانه جدا وجالت انها لازم ترتاح فتره اكده بعيد عن الشغل علشان تفوج وجالت لنا نجول لك انك تعتبر فتره شفاك وبعدها عنك اختبار لجوة ارادتك علشان تتعافى في اسرع وجت ولوحدك بدل ما انت معتمد عليها.
جاسر بشك: انتى بتكذبي يا رحمه صح ولا انا غلطان.
فادي: طيب هي هتستفاد ايه لو كذبت عليك يعني مش فاهم.
صفوت: وبعدين يا سيدي خف انت بسرعه وانت تعرف اننا ما بنكذبش عليك صح يا مدام نوال
نوال: اكيد طبعا ربنا يعافيك يا ابني ويردك لبيتك واهلك بسرعه وترجع تنور شغلك وحياتك ثاني.
نصره: يلا يا جماعه نسيبه يرتاح شويه بجى ده لسه في النقاهه.
وتعبان.
سامح: فعلا والله هو لازم يرتاح شويه وكمان في شويه فحوصات روتينيه لازم نعملها علشان نتاكد من ان كل حاجه ماشيه تمام.
( وفعلا ما شكش جاسر في كلام حد منهم وعزم امره على انه يلتزم بالادويه ويعمل المطلوب علشان يفوق ويرجع لحياته بسرعه.
سامح: عاوزك تاخذ نفس عميق يا جاسر وتقولي حاسس بايه.
( اخذ جاسر نفس عميق.
جاسر: مش حاسس بحاجه اكثر من وجع بسيط مكان الجرح.
سامح: طب عايزك تقوم تتمشى قدامي كده دقيقتين اتنين بالعدد علشان اشوف هتحس بنهجان ولا لا.
(قام جاسر واتمشى شويه ورجع قعد.
جاسر: برده اكثر من وجع الجراحه نفسه وان المخدر لسه في جسمي ما فيش مش حاسس ان انا هبطان زي الاول.
سامح: طيب الحمد لله كده اقدر اقولك ان الموضوع ماشي تمام وان شاء الله الشهرين دول يخلصوا على خير وهتبقى زي الفل.
( وفعلا التزم جاسر بكل حاجه وما خرجش من المستشفى لحد ما الشهرين خلصوا ورجع بيته بعدها
جاسر: طيب اديني عملت العمليه وخرجت وخفيت واللي انتم ما كنتوش قادرين تقولوهولي وانا راقد تعبان تقدروا تقولوه دلوقتي بس يا ريت يكون الصراحه
فادي: بصراحه احنا ما نعرفش فرح فين يا جاسر وما حدش خالص عنده اي فكره عن مكانها حتى البوليس مش قادر يوصل لها خالص.
جاسر: انا كنت حاسس ان في كارثه انتم مخبيينها عني انت ليه يا بابا ما قلتليش عن الموضوع ده او ليه حتى ما لمحتليش اني هخرج مش هلاقيها
فادي: احنا برده مش ساكتين يا جاسر وقالبين الدنيا عليها احسن تكون فاكرنا طنشنا ولا حاجه
صفوت: بصراحه احنا شاكين ان ابن عمها يكون خطفها علشان يتجوزها غصب عنها
جاسر: ايوه انا عندي علم بالموضوع ده وهتصرف فيه انما دلوقتي انا عايزه اقوم اروح بيتها الاول قوم يا فادي وديني عند والدتها.
(وهناك في سوهاج كان رابح قاعد على الكرسي بيكلم نفسه بغضب وحاسس بقلق.
رابح: يا ترى جرالك ايه يا فرح ولا فين اراضيكى حتى رجالتي مش عارفين يعتروا فيكى ومش لاجيينلك اثر انا اول مره احس اني جلجان عليها اكده كبف اختي مش علشان عايز اتجوزها... والله في سماه لو حد مسها ولا اذاها بحاجه لاكون دفنه في ارضه طوالي.. كلهم دلوك شاكين فيا اني اكون خطفتها ومخبيها عندي وبصراحه عندهم حج يفكروا فيا بالطريجه العفشه دي ما انا اللي حطيت حالي في الموجف ده وبعدين يا فرح رحتى فين.
( في الوقت ده كان جاسر وفادي وصلوا لبيت فرح لما فتحتلهم رحمه الباب ودخلوا قعدوا في الصالون وخرجت لهم نصره ونوال
نوال: اهلا وسهلا يا ابني الف حمد لله على سلامتك ايه اللي خلاك تسيب سريرك وانت تعبان
( وقتها قام جاسر وقعد على ركبه جنب رجلين نوال ومسك ايدها وبسها
جاسر: انا اوعدك ان فرح هتبقى في حضنك في اقرب وقت مش ههدى ولا هرتاح الا لما ارجعها لك تاني بالف خير ومش عاوزك تخافي
نوال بدموع: وانا مصدقاك يا ابني ومستنياها والله رجعهالي يا جاسر عشان وحشتني
جاسر: هرجعها لك والله بس انا بعد اذنك كنت عايز ادخل اوضه فرح شويه لو ما فيهاش مشكله
نوال:ابدا يا ابنى معاه يا رحمه وصليه
رحمه: اكيد يا خالتي اتفضل معايا يا جاسر.
( وبالفعل دخل جاسر أوضة فرح واول ما دخل حس بوجع في صدره وكانه حاسس بوجودها في المكان فضل يبص على كل حاجه بدموع.
جاسر: كانها موجوده في الاوضه ما سابتهاش ريحتها في كل حته وحاسس ان انا سامع صوتها في وداني انتى رحتى فين بس يا فرح.
( راح قعد جاسر على السرير وحط ايده على المخده حس انها عاليه شويه حط ايده تحتها لقى اجنده مكتوب عليها مذكراتي العزيزه خدوا الفضول وفتحها وبدا يقرا في صفحاتها.
جاسر: بسم الله الرحمن الرحيم بصي يا مذكراتي النهارده اول يوم شغل ليا بعد التخرج انا بدعي اكون قد المسؤوليه وربنا معايا انا النهارده اخذت بالي ان سامح زميلي في المستشفى معجب بيا بس انا بحس انه زي اخويا هو انسان محترم واتمنى يبقى صديقي دايما.
( قلب جاسر في الورق كمان شويه وجاب ورقه مكتوب عليها اول دقه قلب.
جاسر: اااه عمري ما فكرت قلبي هيحب وبالشكل ده دي اول دقه قلبي ليا انا شفته في المستشفى النهارده كان جاي عايز حد يكتبله على مسكن عشان بيحس بهبوط وعملت نفسي مش واخده بالي يا رب يكون كويس وما يكونش عيان بجد.... يا مذكراتي ماما تعبت النهارده ولما وقعت مني فجاه حسيت انى زي القشه اللي في مهب الريح انا قويه بيها بس.
( قلب جاسر كمان في الورق.
جاسر: النهارده ثاني دقه قلبي ليا يا مذكراتي شفته في الجرنال وعرفت اسمه طلع اسمه جاسر الشافعي حتى اسمه كله رجوله حاسه اني بحبه بجد مش مجرد اعجاب طيب انا هعمل اختبار لو شفته ثالث مره يبقى انا بحبه وهيبقى نصيبي.
( جاسر ما كانش قادر يستوعب اللي بيقراه وان فرح بتحبه من ثلاث سنين حسب التواريخ اللي في الاجنده وكان حاسس انه هو وهو بيقرا كانه بيعيش معاها لحظات حبها ليه
جاسر: مش عايزه اتشائم بس انا خايفه اخسر رهاني مع نفسي وما اشوفهوش ثاني انا حاسه اني بحبه.
( قلب شويه ورق.
جاسر: اخيرا اخيرا شفته ثاني دا طلع طيب قوي زيي بالظبط النهارده جه المستشفى ومعاه واحده ست غلبانه ومعاها ابنها مريض وامر انه يتعالج وكل حساب المستشفى عليه كان زي القمر قوي النهارده انا كسبت الرهان مع نفسي بس يا ترى هو ممكن يحبني.
( قلب كمان شويه ورق
جاسر: البنت رحمه النهارده مشيت من عندي وانا عيطت كتير كل مره تبقى هنا تيجي تمشي اعيط بحبها قوي
(قلب كمان شويه ورق.
جاسر: انا دلوقتي بقالي سنتين متابعه حبيبي بس في الجرايد من بعيد لبعيد وما شاء الله عليه راجل اعمال ناجح كل يوم صوره ماليه الجرايد اخباره تفرح يا رب دايما يبقى من نجاح لنجاح انا بحبه قوي.
( قلب كمان شويه ورق
جاسر: انا النهارده كسرت رجلي وقعت على سلم العماره هي بتوجعني بس انا قويه وسلامتي الف سلامه.
(وقلب كمان شويه ورق
جاسر: انا خلاص ما بقتش قادره ابص على جاسر من بعيد انا هروحله و اصارحه بحبي ليه هي فكره مجنونه غير شخصيتي خالص بس ما فيش قدامي غير كده بقى بكره هروحله شغله واقول له
( قلب كمان شويه ورق.
جاسر: النهارده سامح اصر اننا نروح نتغدى بره مع بعض الزملاء والمشوار بتاع جاسر اتاجل وبرغم اني زعلانه بس كانه جه نجده انا اصلي كنت خايفه قوي بس بجد بجد هروحله بكره.
(قلب كمان شويه ورق.
جاسر: انا النهارده اسوء يوم في حياتي رحت لجاسر الشركه ولقيته خارج وفي واحده معاه بس انا ما سمحتش للامل يختفي من حياتي والياس يتملك مني رحت تاني سالت بواب بيت جاسر اذا كان مرتبط قالي انه مش مرتبط بس يا خساره قال لي كمان انه بيكره الستات جدا يا ترى بيكرههم ليه ولما يعرفني هل هيكرهني انا كمان
( قلب كمان شويه ورق.
جاسر: النهارده عدى ثلاث سنين على حب من طرف واحد بس النهارده شفت جاسر في سرير المستشفى ما كنتش اتمنى اشوفه كده ومثلت اني ما اعرفوش ودخلت كشفت عليه يا رب يكون بخير.
(جاسر كان لسه بيقلب في مذكرات فرح وهو مش مدرك كميه الوقت اللي قضاها وهو بيعرف حاجات ما كانش متخيل انه يعرفها عن حب استمر ثلاث سنين بدون اي مقابل
جاسر: انا النهارده بموت من زعلي جاسر طلع مريض وقلبه تعبان يا ريته كان قلبي بس انا مش هسكت انا خدت التقارير ورحت قلت لاهله وجاسر النهارده اتكلم معايا وهزقني هههههه وبهدلني كمان وختمت بانه قلبني على الارض صحيح انا زعلت وخرجت من هناك منهاره وكنت بصرخ في العربيه زي المجانين بس دي كانت اول لمسه يلمسهالي انا مسامحاه وبرده مش هرتاح الا لما الاقي متبرع انا هعمل كل جهدي علشان يخف يا ريت يقدر يدخل قلبي عشان يعرف انا بحبه ازاي يلا خير ما تزعليش مني بقى يا مذكراتي علشان دي اخر حاجه هقولهالك علشان انا الفتره الجايه دي هبقى مشغوله اغلب الوقت مع جاسر حبيبي وكمان انتى فتانه وممكن تقعي في ايد اي حد ويعرف سري منك واللي جاي في حياتي انا مش ممكن اقوله لاي حد بس صدقيني انا هرجع احكيلك تاني لما جاسر يخف اطمن عليه بس وبعد كده كل حاجه ترجع طبيعيه في حياتي ما انتى عارفه انا اصلي ما ليش غيرك انت احكلها لاني لو قلت لاي حد ثاني هيعرف سري اللي مش عاوزه حد يعرفه.
شكرا لزيارتكم عالم روايات سكيرهوم
