رواية جراح قلبي الفصل التاسع 9 بقلم جوهرة

خنكتها بيدي وعيني بعينها فكتها بخوف ونفسها بدى يضيك جنت متحلف بيها بعد السوته دفعتها وكعت بالكاع كامت تكح وتشهك تطلب النفس

دنكت عليها وأيدي قفلت فكها / ادبسزز هي منو الي تنهزم من رجلها الا العدها شي طلعتي حجة بمروة مو ؟!!!! .. خوش تخططين حيوانة !!!!!

لينا /

قهرني وهو يتهمني هذا كل عقله عندي شي 

لعد شنو قصده ؟؟؟!!!

خليت أيدي بصدره ودفعته بقوة ما تزحزح

لينا / الله لا يوفقك شلون هيج تتهمني يا حقيررر

سحب أيدية اثنينهن وضغطهن بقوة وقرب راسه ونفسه يلفح وجهي / منووو الحقير ولج ، هاااا احجي شتردين لعد اخذج بحظني

نترت واني عيني بعينه / اييي جان تحتويني وتهتم بية مو ركنتني سنين مثل أي غرض زايد اني بشر شتريد يصير بية وكل هذا الإهمال الاني بي مايوم حسيت بحنيتك رجال بس بالاسم محسوب علية 

ايهم خازرها / والله وطلع صوتج لينا تردين رجال ينام وياج مو كووولي ؟!!!

زمخ بقوة وهو بعده مسيطر على أيدية الي الالم بيهن زاد

بقيت مفهية بوجهه شكد مايستحي بكيفه يفسر كلامي 

سحب راسي بسرعة بتك ايد وأيده الثانيه ضاغط على رسغي دنك باسني بقوة وعض شفتي الجوة ورجع دفعني كام بسرعه وكف فوك راسي وهو يمسح شفايفه بلسانه ..

ايهم / هاي اول دفعة وحسابي وياج ما خلصان المفروض من اول افهم شتردين

لينا / 

تخبلت من سمعته هيج حجى وكفت وهجمت عليه اريد اضربه الحقير يعاملني مثل أي وحدة ساقطة

ضربت صدره بيدي وبعصبية ودموعي على خدي وگلبي مليان جروح منه / انت واحد همجي ولا تستحي شلون هيج تحجي وياي بكيفك تتهمني وبكيفك تحجي علية

حظنتها بقوة واني أشوفها راح تنفجر من العصبية والقهر لأن هيج حجيت وياها اول مرة اكتشف هالبركان هذا جانت باردة ولا مبين عليها ،

بست راسها اريدها تهدى / اششش اهدي كعدتي ابني شبيج

من سمعت طاري ابنا هدأت ودفعتني راحت ليوسف الي كعد يبجي يمكن راسه يوجعه 

انقهرت عليه من شفت راسه ملفوف بضماد 

ادحك عليها مسحت دموعها وأخذته بحظنها باسته ودنكت تسولف وياه

يمكن حجت علية لأن التفت لجهتي ومد أيده الي

تقربت نزعت حذائي وكعدت على جهة من الفراش سحبت أيده الناعمه وبستها وعضيتها خفيف واني احجي وياه / ها بابا حبيبي

التفت براسه مبتسم وبقى صافن بوجهي 

دنكت بوسته بخده ورفعت راسي على لينا وعيني على شفتها هي حست ضمت شفتها ولمتها للداخل

ارتاحيت عالمخده ومددت لأن حيل تعبان الايام الراحت منايم بيها ايدي بيد يوسف 

غفيت عالفراش بعد ما ادري بشي الصبح كعدت يوسف نايم بصفي ومتغطين بنفس الغطا رفعت جسمي والتفت بالغرفه لينا نايمه عالسرير اللي بصف سريرنا

نزلت من الفراش ورحت طلعت منشفة وفتت للحمام

كملت ولبست ملابسي وصليت ونزلت جوا اوصي على ريوك 

مريت لغرفه صعب جان كاعد ومتحضر لأن قررنا نرجع لديالى خبرته نتريك وراها نطلع

لينا / 

السواه بية ممتوقعته اذاني بكلامه وبتصرفه أسلوبه وياي ماحبيته ماحجيت وياه بعد الصار لأن يوسف كعد اجى يمنا وكعد يبوس بيوسف وراقبته جان غافي مبين شكله تعبان غطيتهم من رجع يوسف نام ونزلت رحت نمت عالسرير الثاني كعدت الفجر صليت ورجعت نمت ماحسيت الا على حركه بالغرفة وصوت يوسف يحاجيه بفرحه وبيده علبه حليب بالكاكاو يشرب ويتمطك 

كعدت بفراشي وسحبت شعري برمته كبوبه مسحت وجهي وعيني عليهم مخلين ريوك عالطبلة 

من شافني يوسف اجي وبيدة الحليب .. ماما طيب

جربته وبسته بخده واني اشم عطر ايهم بي 

لويت شفتي نزلت رتبت فراشي وفراشهم وفتت للحمام اخذت بنطرون كيلوت بيجي وقميص نفس اللون بدلت وطلعت اخذت الشال ولفيته ورحت كعدت على جهة انتظر يوسف يكمل ريوك حتى أبدل ملابسه 

اخذت موبايلي ودزيت رسالة لخالو عمر اعتذر منه لأن دوخته وياي وفهمته اني راجعه برضاتي

قفلت موبايلي وخليته بجنطتي رفعت راسي من حجى وياي / تعاي تريكي

رفعت تك حاجب وعيني بعينه بدون ما احجي شي ولا نفهتله بحرف

جر حسرة وذبها وهو يحجي وية يوسف ..

/ بابا يوسف اكو جماعه مراح يفيد وياهم الخشم العالي لأن اكسره

ابد مارديت بحرف وهالشي خلاه يضوج أكثر يريد يقهرني على أساس والله يا الله

ايهم ماتحمل سكوتها / مو ويااج تعاي هنا ولاتبقين بايعة بوزة ورانا طريق طويل تعاي تريكي

كمت من شفت يوسف يخربط بالاكل مبين شبع سحبته وفتت للحمام والافندي وجهه فرح عباله سمعت كلامه وراح اكعد اتريك وياه

كملت تبديل ليوسف الي ركض على ابوه يريد يلعب بالموبايل

يوسف ايده على موبايل أبوه / بابا العب

ايهم مسح على خد يوسف / لا بابا تروح تكسره هسة انزل اشتريلك ايباد

ليش مامشتريله ايباد !؟

كورت شفايفي وحظنت جسمي بأيدية ورفعت تك حاجب / والله يربي على أساس مهتم

حجيتها بصوت ناصي بس سمعني وكف واجى تقرب يفصل بيناتنا خطوتين دنك راسه علية .. 

ايهم / اسلوبج هذا تعدلينه

رفعت راسي ممهتمه وصحت / يوسف ماما تعال أخذ موبايلي

كمز يوسف واجى حظن رجلي فرحان /

يوسف / حبيبي ماما 

طلعتله موبايلي فتحتله لعبه يحبها وراح انسدح عالفراش يلعب

حسيت على تلت ذراعي وأيهم يكز سنونه الظاهر ما عجبه تصرفي لأن فشلته من انطيت موبايلي ليوسف وهو المفروض يتقربله مو يبعده

رغم شغله أشوفها عادية اني بس هو كبر السالفة مدري شيحس

ايهم / انتي شبيج شتردين توصليلي اني ما اهتم بابني

ابتسمت تك خد / هه بلة لا احد يسمعك ويموت ضحك علينا ، اسكت اسكت

ايهم / ترى جاي تجاوزين وهالشي ما يعجبني

وبكل تحدي واني مصممه اعذبه مثل ما تعذبت

لينا / ولا يعجبك شنو يعني هه انت اب فقط بالهوية ، لا تكعد هسة تفرض علية شي اني ممتعودة عليه

ايهم / غصبا عليج تتعودين منا ورايح ولسانج هذا ابلعي لا اخليج تسكتين وبطريقتي 

دفعته من تقرب أكثر

عافني من سمع الباب تندك راح فتحه ودخل صعب صبح علينا ويوسف راح يركض عليه 

/ بابا 

شاله بحظنه وباسه بخده / هلة بهالصباح هله بحبيبي

ادحك على ايهم عيونه تريد تطلع من سمع يوسف يصيح بابا لعمه صعب خلي يستاهل لعد شنو جان يتوقع عايفنه سنين 

خله أيديه بجيب البنطرون وسوى نفسه ممهتم / ها ولك حيال شو ماخذ عمامك فلاحه ملاجه كلهم بابا

ابتسم صعب وهو ينزل يوسف / روح على ابوك كام يبجي

ايهم بضحكة / هههه اي تعال بابا تعال خل اعيش الدور

شال ابنه وباسه والتفت على اخو / نطلع هسة شتكول

صعب / اي اجيت حتى اخبركم يلة اني راح انتظر سيارتي راح اخليها كبال الفندق

لينا حجت وية صعب / شنو اجيتو بسيارة لعد البارحه التكسي ..

قاطعها ايهم / حتى نكدر نفتر براحتنا واحنا اندور عليج خاتون

قاطعه صعب / خيتي ابو التكسي يعرف المنطقه احسن يلة لا تاخرونا تعال يوسف تجي وياي

مدله أيده راح لعمه صعب صاحت لينا .. موبايلي ماما 

راحت اخذته ورجعته بجنطتها

بالطريق صعب حجى ويه ايهم نزل تسوك حلويات ولفات وعصائر للطريق

دك موبايل ايهم عكد حاجبه من عرف المتصل فتح خط وبقى يحجي وية ابو مروة جان ضايج لأن بنته حاجيتله الصار وهدد ايهم يفسخ العقد 

ايهم ضايج من كولشي نتر بي وكعد يقسم وفهمه بنته غلطت على ابوه 

اخر شي كاله طبكم ستين مرض ماباقي على شراكتك سد موبايله وهو يستغفر 

صعب / شكو هذا شريكك

ايهم / خل يولي يكلي اعتذر من مروة تهي بهي هي وحذائي على شنو اعتذر

صعب / لا بشرفك صدك تحجي

ايهم / والله

صعب / والله انعل والديه هو وبنته ألعوبة 

ايهم / اني هم ما عجبوني حتى الشراكه فسختها واحتمال انقل شغلي هنا

اسمعهم يحجون وبداخلي فرحت من سمعته هيج حجى يعني السربوتة بعد ولت

سكتو بعدما حجو شي والطريق كله ملتهين يسولفون وية يوسف اخر شي سحبه ابوه خلاه بحظنه يبوس بي 

يوسف سوالفه حلوة ينطلق من يسولف فدوة حبيبي شكد حلو

أراقب ايهم مد أيده عالضماد براسه / يوجعك حبيبي

يوسف / اسوية هسة لا

ايهم / هههه شنو لا قصدك بعد ميوجعك

يوسف / ايي

ايهم حظنه لصدره / الحمدلله

شوية وضاج يوسف يدور اكل طلعتله لفه وانطيته وبقى يأكل بيها وينطي منها لعمه صعب ويرجع ينطي لابوه وهم يعضون منها ويضحكون

ما سألتهم يردون لو لا بقيت ساكته واشوفهم فرحانين بيوسف

يوسف ضاج واجى يمي وبقى عينه عالطريق وكلما يشوف شي يسأل واني اكعد اشرحله 

وكضيتها وياه نسولف

رفعت راسي ايهم منتبه علينا داير وجهة ويراقبنا خزرته وحركت شفايفي بمعنى شكو بدون ما احجي هو عض شفته الجوة ورجع استعدل بكعدته 

ماعرفت قصده بهاي الحركه ولا اريد اعرف

وصلنا للبيت ورى الظهر والعرفته صعب متصل مخبرهم البارحه لأن الموبايل مابطل رنين كل شويه واحد متصل يتطمن اخر شي قفله

تلكونا بالكراج جان وصولنا ورى الظهر 

قويت روحي ماريد اكون بموقف ضعف كدامهم سلمت من بعيد وفتت اريد ادخل عمو عبدالله صاحني وهو فاتح حظنه ..

حجي عبدالله / شنو ما تسلمين على عمج

ردت عمتي وهي تخزرني .. 

ام حذيفه / والله خوش فوك سوايتها هاي بدل ما تكسر راسها تريد تحظنها .. 

صفنت على عمتي الإدري بي تحبني بس يمكن تصرفي ماحبته ومتريده يتكرر 

أشوفها خازرتني حتى ماردت السلام 

اني هم عنادا رحت على عمو الي حظني وباس راسي وهو يعاتبني / ماهكيتها منج ليونة هيج تسوين ؟!!!

تنهدت / اعتذر منك عمو لأن جنت مقهورة

حجي عبدالله / يلة فوتو جوا الصار بعدما يتكرر

سلمت عالبنات بالمطبخ وهن سحبني كامن يبوسني التفتت ادور يوسف شايلته عمتي وتبوس بي اخر شي كالت ..

ام حذيفة/ سودة بوجهج لينا شلون هيج متعور براسه

رديت عليها / وكع عمه

نزلته ويه الجهال الجانو فرحانين بي وهو حبيبي فرح بشوفتهم

اخذت جنطتي وصعدت لغرفتي والكل بقى جوا اسمع علا تسألهم عالغدا

رجعت ملابسي وحاجاتي بالكنتور وأخذت منشفه و ملابس وفتت للحمام كملت وطلعت ايهم صار بوجهي يريد يدخل بقى صافن علية اني لافه شعري بمنشفة جنت لابسة دشداشة ربع ردن خضرة عضيت شفتي متقصدة لأن كاعد يراقبني بلع ريك طخيته بصدره وفتت لغرفتي واني مسوية نفسي ممهتمه

سرحت شعري وتعطرت وكعدت عالجرباية اكلب بموبايلي ..

دخل ايهم ما رفعت رأسي اكيد كاعد يراقبني غلست راح فتح الكنتور ونتر

ايهم / كووومي طلعيلي دشداشة

ذبيت موبايلي ورحت فتحت الكنتور ادور على دشداشة ملابسة الجابهم من الاردن معلكات على جهة يمكن علا لو عمتي مرتباتهم 

عكدت حاجبي لأن ماعندة جديدة كولهن قبل أربع سنوات وصايرات بنهاية الكنتور سحبت وحدة لون بيجي / هاية

اخذها ودفعني عالكنتور وتقرب عليه دنكت وشعري الناعم نزل على وجهي ..

ايهم / بعدني رجلج ترى

رفعت راسي اريد افهم قصده

جان رافع دشداشته وخازرني / امشي اكويها وعطريها

بوزت ماعاجبني هو رأسا خمطني بوسة شلعها لشفتي

فزيت بهلع ودفعته / اييي

ايهم / وجعي يلة بسرعه

ماعندي أوتي نزلت اريد اكويها بغرفة عمو لأن الاوتي موجود هناك

صاح بية / وووين غطي شعرج وزنودج 

رفعت تك حاجب والتفتت / لا عليك الله لعد البنت الاجت وياك ما خجلت من مشيت وياها 

اقلها اني مستورة الحمدلله مو مثل السرابيت اللي تعرفهن

فتت لبست حجاب الصلاه ونزلت نزل وراية وسحبني قبل ما اوصل الدرج / تحترمين نفسج ماريد كل شوي وحجيتي بالسالفة

تليت أيدي ونزلت بدون ما ارد عليه 

ماعافني اجى وراية واني اكوي بغرفة عمو جانت عمتي والجهال موجودين دخل كعد عالجرباية وعيونه تراقبني 

عمتي حست عليه / يمه ايهم الالك ميصير لغيرك 

ايهم / يمة ترى الي وعيونج انتي 

ام حذيفه / اي يمه كلمن يأخذ نصيبه 

عمتي قصدها على مروة لو شنو 

كملت وانطيته / كملت

ايهم / صعديها فوك جاي وراج

طلعت واسمع عمتي تحاجيه / الله يهديكم يمه

بالغرفة بدل ملابسه وأخذها لبسها اني جنت واكفة على جهة لأن الافندي ميقبل الا ابقى شايلتها والبسهيا عشتو هذا تطور جديد بي قصد اكيد !!!!!!!

صاحتنا ملاك عالغدا نزلنا جانت علا محظرة الغدا عالميز بالمطبخ وصعب كاعد حتى يتغدى

علا / يلة عيني اكيد جوعانين

لينا / تسلمين حبيبتي اني ما أشتهي

كعدو يتغدون واني صحت يوسف صبيتله تمن ومرك وكعدت بالكاع اوكل بي

يوسف / ماما لحم

لينا / لا حبيبي هذا اطيب

ايهم مد بيده قطعه لحم / هاك بابا

مدله ايهم بيده قطعه لحم قربتله الماعون ذبها فوك التمن

ضحك يوسف من شافها هههه ابو نفس من هسه يدور لحم وثريد 

وكلته وشبع اخذته يغسل رجعت اخدر جاي واسمع صوت عمة ايمان وياها رانيا وصفا سلمت علية وبقت تعاتبني سكتت ماحجيت وعمتي كعدت عالقنفه وياها البنات ادحك على صفا شوي وتأكل صعب هههه خرب حظي البنية مدري شبيها يمعودة والله ميفيدج هذا قافل عالزواج عمره. صار 35سنة

حتى أهله ملو كثرما حجو

ايمان / تعاي عندي حجي وياج

شاورتني عمة ايمان وطلعنا من المطبخ دخلنا بالاستقبال وبقت تحجي وياي وتنصحني شلون اكسب ايهم اني هم استمع لكلامها واتقبله لأن اعرفها تحبني و تريد مصلحتي

بالمطبخ كملو غدا / سوي جاي بينما اغسل ايدي

حجى صعب وية علا جان صفا تنط اني راح اسويلك ادلل 

ما التفت عليها ولا عبرها بنظره راحت خدرت جاي وبعدها اخذت المواعين من ايد علا تغسلهم وهي تغمز لأختها 

عافتها علا وتك ابتسامه على خدها تدري بخبالات اختها 

كملت وبعدها صبت جاي وزعتلهم وأخذت كوب ودته لصعب الي جان بغرفته 

اول ما دخلت سمعته يخابر خزرها وتقرب أخذ الكوب من أيدها وانطاها ظهره ...واكفة عينها عليه التفت فك عينه واشرلها بيده بمعنى اطلعي 

عافته وراحت يم البنات وهو كمل مخابرة ويه معتصم سده وتنهد بقوة ضايج من كلام كاله معتصم مجان متوقعه هيج يتصرف 

معقوله صار اشهر محد حس والله معتصم كتوم 

أخذ الكوب يشرب شوي وذبه وكام يكح تشرحطت حنجرته دخل المطبخ ذبه عالسنك

صعب / شنو هذا الجاي دبس خوما دبس 

كمزت صفا / ليش عيني والله طيب 

خزرها وما حجى وياها / كومي رانيا صبيلي جاي ولا تكثرين شكر 

راحت رانيا غسلت الكوب ورجعت صبتله وانطته شكرها وبقى صافن عليها من أخذ الجاي ماتحمل طلع من البيت كله راح للمضيف الولد جانو موجودين منسدحين عالتبريد كلمن ماخذله ركن عالقنفات كعد يشرب وصاح بعصبية على ولد اخو / كاااافي لعب اطلعوا برا روحو للبيت يلة 

اياد جان عايف بيته ومنسدح يمهم / ترى وليداتي حساسين لا تصيح بيهم

صعب / ايباخ من شوكت اسد وأزل هيج صارو اكول كوم استعدل لا اجي امرغلك والله

اياد بلا اهتمام / خلني نايم هنا يمعود وراي روحه للمحلات العصر 

صعب / ترى إذن العصر كوم صلي وتوكل

اياد / بعد وكت الجو حار خلها فد ساعة انوب هسة العامل فتح المحل

صعب / صدك قبل ما انسى رايد فد قميصين لون حلو جيبهم من ترجع انت تعرف قياسي والسعر لاتهتم

اياد / خو تعال انت واختار بكيفك

صعب / مالي واهس والله وتعبان اصلا راح انتظر الليل اصلي العشا والف راسي وانام

اياد / يلة اجيبلك انت تدلل جم صعب عدنا

صعب / تسلم حبيبي 

دخل ايهم شايل يوسف الي جان مبدل بكلبية بيضه ولابس عرقجين من شافو عامه ضحكو

حذيفه اشرله / لك شنو هاي تعال تعال هاي لابس مالات الطهور ههههه

ايهم وبداخله احساس انو هالاشياء الحلوة 

جان مفتقدها وماحاس بيها 

نزل يوسف الي راح يركض بحظن عمه حذيفه وهو يصيح بابا

حظنه وباسه / لاتتعور بابا شنو هاي تعورك

يوسف / لا تابت

حذيفة / اي الحمدلله هاي منو خلالك لصقه جروح

يوسف / ماما

أنتجى ايهم عالقنفه وسحب دشداشته وثنى تك رجل / تعال بابا هنا 

حذيفة اشر ليوسف الجان منسدح بحظنه / روح بحظن بابا يصيحك

كمز يركض لابوه شاله حظنه وخلاه بحظنه

اياد كاله / شبيك شايله وبحظنك ترى اربع سنين عمره مو سنه

ايهم / هههه خلوني فرحان بوليدي شبيكم

حذيفة / اكول ابو ولد شخبار الشراكه وية ابو مروة ماخابرت بعد 

ايهم / لابوهم لابو شراكتهم اصلا كولشي لغيته وشهر الجاي اروح اصفي أعمالي وارجع 

استعدل صعب بكعدته ..

صعب / صدك تحجي لعد وشركتك حرامات وعمي سامي يقبل تعوفه

ايهم / ولده كبروا ماشاء الله وابنه الجبير يفتهم بهالسوالف تدرب على ايد عمي 

الصدك اني هم مليت وجاي احس هنا احسن خاصة بعدما شفت ابني ماريد اعوفه وارجع

صعب / وهالحجي وين جان لعد انت مو جنت تتصل وتفتح كاميرا وياه

ايهم / ما ادري من أشوفه يحظني لو ابوسه اصير بغير عالم

صعب / الله يهديك يارب

حذيفة / اي والله الحمدلله لعد احنا شنريد اهم شي وليدك يربى بحظنك ولو يوسف بمعزة جهالي شاهد علية الله

ايهم / اي شفت هالشي بعيني يركض يصيح بابا هسة انتم جهالكم وتعود وياهم صعب لا مرة لا جاهل ويصيحه بابا

دفرة صعب برجله جان قريب عليه / ايا هتلي مستخسرها بية ولك اني السوك كله نكلته لابنك ابو كرش

ايهم / هههههه ... الله يحفظكم والله انتم اخوتي حزام ظهري وادري بيكم متقصرون ومن سافرت مأمن ومطمن وراي زلم رفعة راس

ـــــــــــــــــ

لينا /

بالليل نايمه ويوسف بحظني لأن متعود ينام وياي 

دخل ايهم سويت روحي نايمه تقرب علينا وبقى يدردم ..

ايهم / ادري محتلين الجرباية اني وين انام 

راح نزع دشداشته وبقى بالشورت وانسدح بصف يوسف 

جر حسرة وذبها وهو يلف جسمه لجهتهم مد أيده وجر يوسف خلاه بحظنه باس رأسه وبقى شفايفه يم كصته مكان الجرح 

تنفسه بقوة / افيش شلون ريحه طيبه هاي 

لينا / 

الجاي أشوفه بدى يتعود على يوسف خلال فترة قصيرة حتى يوسف فرحان بي يارب حنن گلبه على ابنه ، أما اني بحثا اخر لأن نازية اطين عيشته

كعدت الصبح صليت ورجعت مددت بصفهم بالبداية استحيت من شفته نازع ملابسه بعدها ما اهتميت وكلام عمة ايمان يرن بعقلي 

بدلت كلبية ليموني كولش تلوكلي وتعطرت وجريت عيني بكحلة بقيت بالغرفه اعدل بيها وصفنت يراد سرير ليوسف لأن ماعنده خل اوصي صعب يو لا عيب هسة أبوه موجود 

من يكعد احجي وياه 

والله عمة ايمان عدها سوالف بس توصي وتتحلف بية 

كعدو اثنينهم شال يوسف خلاه على بطنه .. ها حبيبي صباح الخير يلة شتكول لبابا يلة صبح علية

يوسف / سباح خير

حظنه وباس خده /؛صباحك عسل وكيمر 

خل اعضه هالخد اسوي همممية

تقربت وكعدت على حافة الفراش / صباح الخير 

رفع راسه وبقى مفهي بوجهي ممتوقع اصبح عليه واني تعمدت أرتب روحي / صباح النور 

لينا / يله حبيبي تعال اغسلك ونبدل حتى نتريك 

حجيت وعيني بعينه بس المقصود ابني 

حك راسه وابتسم / روح بابا روح 

اخذت يوسف واريد اطلع التفتت صافن علينا ، حجبت بكل برود / يوسف محتاج سرير لأن ماعنده

ايهم / معقوله ليش ما مشترين وين ينام

لينا / وياي لأن متعود بس هسة زدنا نفر والجرباية متكفي

ايهم / ها اي اليوم اشتريله إن شاء الله

عفته وطلعت والإبتسامة على خدي

ـــــــــــــــــــ

لينا / 

مر على رجعتنا من السليمانية اسبوعين خالي خابرني يطمن واني طمنته وخلاني احلف يلة تطمن وصاني اتصرف بعقل واصير قوية 

يوسف علاقته بابوه قوت كولش وصار وين ميطلع ياخذه وياه أما اني وياه ماكو ذاك التقارب بين زوج وزوجته بس مرات احس عليه بالليل حاظني ونايم ومن نكعد الصبح يتصرف عبالك ماكو شي

سرير يوسف من اول ماحجيت العصر جابه ونصبه بغرفتنا وكال راح يسويله الغرفه البصف غرفتنا محد مستغلها بس بيها غراض ممحتاجينها اني مادخلت روحي خل هو يتصرف 

وفعلا طلع الغراض بالسطح جوة الدرج يكفي اكو مجال وجاب صباغ صبغها ورتبها ونقل قريولة يوسف بيها وثاني يوم راح اشترى كنتور تلث ابواب والله وصارت ليوسف غرفة 

وعمتي تقشمر عليهم على هاكدوته ومكبرين راسه بغرفه

الفوك مستغلينه احنا وبيت ابو ملاك ماشاء الله جبير وبي اربع غرف نوم وحمامات اثنين 

فمرتاحين

،،،،،،

بالنسبة لشهادتي بعدما تخرجت 

جنت دوم اسال عالتعيينات بلكن يطلع اسمي واتعين فخابرتني صفا كالت لينا مفتوحه التعيينات قدمي اوراقج حجيت كدام بيت عمو جنا مجموعين بالهول جان وكت ليل 

حجيت وية علا لأن هم متخرجه وكاعدة اختصاصها علم نفس سمعنا عمو عبدالله كال شكو بيها بابا قدمن والله كريم حذيفة ما اعترض بس ايهم كال شتسوي بي لا تقدم ولا تخبصنا سكتت اني وعمو حجى عليه كاله خل تقدم 

بغرفتنا من صعدنا نومت يوسف الي ميريد ينام الا ويانة بالغرفه فرشتلة دوشك ونومته

بدلت بدشداشه نوم ناعمة لون جويتي ومددت بفراشي من صعد ايهم نام بقيت افكر احجي وياه لا إلى أن قررت 

عدلت كعدتي ودغيته بصدره بخفة ..ايهم 

أيهم نمت 

فتح عينه / شبيج

بصوت ناعم حجيت/ ايهم اكعد خل احجي وياك

تنهد وكعد صار كولش قريب علية عيني بعينه / ايهم خل اقدم لعد اني درست وتعبت خل استفاد

ايهم / لينا انتي ممحتاجه الوظيفه 

مديت أيدي ولمست ذراعه جان لابس تي شيرت نص ردن وبرمودا حسيته جلده جفل من لزمته حك لحيته وعينه بعيني كملت بنفس اللهجة الهادئة / حباب الله يخليك وافق

ايهم / افكر و ...

قبل ميكمل بسته بخده متعمدة حتى اخلي يوافق .. شكرااا

كلتها بفرحه ورجعت مددت بصفه وغمضت عيني ماريد اشوف تأثيري عليه خلها الباجر راح تبين ، بسيطة الا اخليك تفتر على نفسك

لينا / 

وعيت من النوم واني بحظن ايهم ما انكر حبيت هالاحساس واني نايمه خدي على صدره ، لا لينا لاتضعفين مو هو ايهم اللي تركج اربع سنين ورجع يقهر بيج .. سحبت روحي بهدوء ماريده يحس رجع قفلني بحظنه وخلة راسه بشعري 

فكيت عيني واني اسمع نفسه العالي يضرب بشعري يتنفس بي وأيده تتحرك على جسمي گلبي كام يضرب بصدري من تجرأت لمسات أيده حاولت أبعده ما كدرت داعب گلبي احساس بقربه بس ما حبيت اكون مجرد جسد يشبع رغبته 

لحظات واني صرت جواه ..

لينا / ايهم مو وكتها ابعد شبيك !!!!!

نفسه يضرب خدي دنك باسني بقوة وعضه لخدي خفيف وهو يلهث / اووف ولج وكتها والله

تحججت بيوسف / لااا لااا فدوة يوسف يحس علينا

ايهم وهو فاقد كولش / راح اودي بغرفته وراجعلج 

رفع راسه وعيونه مركزهن بوجهي ذكرته بابني وبصوت كله دلع حجيته .. ااايهم الولد 

عضيت شفتي واني أشوفه فقد علية حظني وعصرني وهو يهمس بأذني .. خبلتيني 

دفعته بخده بخفه ومبتسمه / فقيرة والله

( وبداخلي اتوعده الا اخبلك يا ايهم)؛

عض خدي هالمرة بقوة ضجت / ايييي ايهم

ايهم / ااااخ خل اودي يوسف وراجعلج بعد ما اتحمل

نزل من الفراش وأخذ ويوسف بحظنه طلعه لغرفته واني كمزت بسرعة طلعت من الغرفة وبيدي سحبت حجاب الصلاه تحسبا لأي طارىء وبداخلي احس بنشوة انتصار بسيطة لأن علقته وعباله تفاعلت وياه بقيت لابدة بجهة الصحيات ، تأخر ما طلع من غرفة يوسف 

عكدت حاجبي من شفته دخل لغرفتنا شايل يوسف الي جان كاعد يفرك بعيونه ههههه احسن بعد ، رجعت للغرفة باوع علية /

ايهم / أخذي ابنج أنعل بليسه اول ماحطيته عالفراش كعد

حظنته / حبيبي ليش كعديتي

ايهم / ديله استفاد واني شلون هسة وين انطي وجهي

صدوك ضحكني هههههه ضحكت وية نفسي عليه عاكد حاجبه ويحجي متحملت ضحكت بصوت هو بسرعة رد

ايهم / تضحك ام حلك بسيطه اطلعها بيج بعدين والله لا اموتج

شهكت وبدلع متقصدته / يماااه خوفتني هههه 

تقرب من سمعني وانوب ضحكت جر راسي وشاورني

دفعته معترضه / اوووي شلون متوحش

ايهم / ههههه اني اعلمج

دحك على يوسف الي منسدح على ظهره وعينه علينا ..

ايهم / خرب حظي المدعبل متنام بابا 

هسة وكتك

رجعنا نمنا ويوسف بيناتنا أخذه ايهم بحظنه وهو يبوس بي ويوسف يضحك

لينا / يووو تالي خل انام يلة سوسو نام حبيبي

ايهم / نام بابا امك يمكنها تغار

لينا / على شنو اغار ، ججج متوهم

ايهم / لأن بحظني وانتي تغارين ادورين حظن

ردت ارد بكلام مراح يعجبه بس كلت لا خلي متأمل بية خير

الصبح كعدت على صوت يوسف يريد يتريك كلتله يرجع ينام بعد وكت ظل معاند نزلت من الفراش وياي يوسف طلعنا للحمام ، توضيت ورجعت للغرفة اصلي وبعدها نزلنا للمطبخ ايهم باقي نايم ، جهزت الريوك جان بس عمو كاعد صبحنا عليه وراح يوسف بحظنه كعد ظل يسولف وية يوسف ، كملت وخليت الصينية كدامهم كعدنا تريكنا وعمو يسالني شلونه ايهم وياية واني ارد زين وتمام وبقى يدعي الله يسعدنا ويريح بالنا ، طلع للحديقة كال أخذ يوسف وياية ، دخلت عمتي صبحت علينا وكعدت تتريك وبدوا ينجمعون بيت حذيفة الجهال وابوهم واجت علا كالت اني اكمل من شافتني وكفت اسويلهم بيض لأن يحبونه عفتهم وباوعت على يوسف يلعب يم عمو بالحديقة ، عمو يحب الصبحية يكعد بيها مخلين كراسي هناك ،

صعدت للغرفة اجهز اوراقي حتى من أقدمهم جاهزين واحتمال اكبر اخلي صعب يقدملي عالنت فاتحين رابط حسبما كالت صفا بس التقديم بالتربية وأجهزة الملف هناك اضمن ، صح اني توسلت بايهم يقبل اقدم بس مراح اطلب منه بعد لأن يبقى يتعيقل براسي ، اول ما فتت للغرفة صار بوجهي ابتسم وصبح علية رديت عليه وبداخلي اكول شوفي التغيير لعد وين جنت كبل لاخم الخلقة ومخنزر بوجهي طول اليوم ، مد ايده سحب ذراعي يريد يقربني عليه ابتعدت واني ابعد ايده ورحت أرتب السرير ، حسيته وراية وفعلا من رفعت جسمي طخيت بجسمه انخلع گلبي من حظني بقوة ودفن وجهه برگبتي 

لينا وهي تبعد / توضى صلي وانزل تريك اني وراية شغل

ايهم وهو يتلمس بجسمها بعدما رجعها لحظنه رد بصوت يهمسه همس / خليني مرتاح هنا

لينا رفعت المخدة وابتعدت وضربته جوة بطنة بالمخدة فززته صاح بيها وهو يفتح عيونه بغضب لأن وجعته

ايهم / ثووول شنو هالتصرف هذا ؟!!!

رفعت حاجبها وتخوصرت / شنو ماعجبك ، يلة تتعود

ضيك عيونه يريد يفهم سبب تصرفها شبيها هذه خبلة ليش البارحه ناعمة وياه واليوم تتعامل بخشونه 

ايهم من شافها تريد تطلع صاح عليها / اوكفي ، اريد احجي وياج

سندت ظهرها عالحايط بصف الباب وكتفت ايديها على صدرها / تفضل

ايهم / ليش هيج انكلبتي ؟!!!!!!!

لينا كورت شفتها / لا عبالك دكيت ناعم شوية يعني قبلت بسوالفك لا غلطان حبي ، ترى بعدني ما نسيت اللي سويته بية ، حتى من اجيت وراية السليمانية وانت تتهمني ليش انهزمت تتذكر مو ، هذني كلهن احاسبك عليهن

ايهم مصدوم منها ماتوقعها هالشكل كمز يريد يسطرها حتى يعيد ترتيب دماغها خبت أيدها بصدره وحلفت/

لينا بداخلها مرعوبة من ايهم لأن من يعصب يحير شيسوي بس بينت ممهتمة / قسم بالله العظيم هسة اصرخ والم البيت عليك اذا مديت ايدك علية

تنفس بقوة والغضب ملون ملامح وجهه زكح بيها / وليييي من وجهي حقيررررة 

ـــــــــــــــــــــ

قبل ثمانية اشهر

/ سيدي مرة وبنتها خبصتني هاي رابع مرة أشوفها عدها معامله مدري شكوى

معتصم/ شعدها هاي شنو ماكو مركز شرطه جاية للوزارة دخلها خل اشوف شبيها

شوي ودخلت مرة بالخمسينات عمرها تقريبا وياها بنية سبحان الخالقها 

عكدت حاجبي مستغرب لأن نهائي اي تشابه ماكو بيناتهم المرة مليانه وبشرتها سمرة والبنت نازكه وبيضا والوجه گمر

معتصم / تفضلي اختي شنو طلبج

/ سيدي اندارن عليك اريدك تنصف البت أنه مااچيت اطلب شي لرويحتي لا هو العباس بس اريدنك توكف وية البت عبنها مظلومة ويتيمة محمد الها

أشرتلها تكعد فكعدت هي والبنية الي راسها مارفعته

/ سيدي نجي جم مرة ومحد يشكينا لا مركز ولا هان بالوزارة

شكرا لزيارتكم عالم روايات سكيرهوم