رواية ارحموني ولو رحمة مرة الفصل التاسع 9 بقلم فراقد حسن علي

فرح/من كام مخلد يريد يطلع شاورني 

-بليل أجيج ،،لا تنزعين الفستان

غمزلي وطلع 

-يمه كلبي صار يوجعني من كثر الخجل 

صفنت شنو قصده من يكول بليل أجيج ؟؟

وشيريد جاي علينا مره ثانية ؟؟

وليش غمزلي؟؟

-بعد ماخلصت الحفلة والهوسة 

البنات لملمن البيت ورجعن كل الغراض بمكانها

-اني اخذتلي دشداشة جديدة تفصال وخياط ايدي

-ودخلت للحمام غسلت ،،

يمه شعري أحسه ملثك وصاير عظم من كثر البخاخ ام الصالون تجيب وتبخ 

-وجهي من غسلته وجلفته بصابونة الركي

حسيت كل جسمي تنفس مو بس وجهي

-طلعت مشطت سويت جذيلة وحده

نزلت على ظهري 

-يادوب شربتلي كلاص جاي وياه قطعة كيكة 

اجت مريم كالت /مخلد بالباب وأبويه دخله للديوانية وكالي روحي نادي على أختج فرح تجي تسلم على رجلها

-لا ياربي صدك جذب ،،شبي هذا أجى درب الركض

-صعدت فوك على عمه هناء 

-عمه فدوة الحكيلي أجى مخلد واستحي من عنده شلون راح أكعد وياه وحدنه

هناء/اول شي تعالي أخليلج كحلة حجرية توسع عيونج

-شوفي اني امج قبل لا أكون مرت عمج

-اول شي لفي المشمر على راسج وستري نفسج

لان الواحد ميعرف شضامتله الدنيا 

-ثاني شي لا تكعدين وياه وحدج ،،

اخذي خواتج مريم وفطوم وكعديهن يمكم

-خاف يكلج طلعيهن أريد اسولف وياج

كوليله أبويه مايقبل ،،

وخليهن يبقن كاعدات

لان أخاف من تروح أترزل 

هسه ينحرج ويسكت 

-ولا هسه ولا بعدين تسمحيله 

يمد لا أيد ،،ولا رجل ،،

ولا حتى لزمه ،،ولا طخه

كل ماتثكلين عليه يكوم يموت عليج 

-عود بيوم الدخلة هاي السوالف من حقه

-وخلي يسولف براحته بس بدون تجاوز

واخذي وانطي وياه بالحجي

-وهسه عيونج صارت تمرعد أتمرعد 

-لفي المشمر زين على راسج وانزلي سلمي عليه

ولا تنسين الوصيتج عليه

فرح/عمه هناء كلش حبابة وهواي تنصحنا وتعلمنا 

-نفذت كلامها ونزلت أخذت مريم وفاطمه

وكتلهن// تبقن كاعدات يمي ممنوع تطلعن

حتى لو مخلد كاللجن روحن 

كلله أبويه مايقبل وأبقن كاعدات

فرح/ان شاء الله بويه،،

تركنا أبويه وطلع غلق باب الديوانية وراه

-يالله أريد أمشي واكعد بصفه ما اكدر احس رجليه ماتن ،،ذبحني الخجل 

-كعدت مو بأراتي لا بس بعد مابيه قوة وابقى واكفه على طولي الخجل ذبحني

كعدت مسافة عنه مو قريبة عليه

-باوعت عليه لابس دشداشه لونها شكري

وبيده سبحة خرزها كبار لونها جوزي 

ولابس ساعة ذهبية ومحبس ذهبي

ويحرك خرز السبحة بين أصابيعه بهدوء 

وعطره واصل لبيت عمي محمد 

-مخلد ملامحه وشخصيته

رجل بمعنى كلمة الرجولة 

مخلد/يابه شنو سالفة راح يوكف كلبج من الخجل والخوف تراني هسه زوجج شرعاًً امام الله ورسوله وامام جميع الوادم 

-تعالي تكلطي جاي ،،أسولف وياج شوي

خاف البنوات يسمعن خطيه أخرب مسامعهن

فرح/يالله شلون يسلوف حلو 

وصوته يرعد بي بحه خشنه

-تحركت بالجذب من مكاني 

يمكن مازحفت سانتيمات

-أحنه ديوانيتا مفروشة فراش عرب ((يعني ديوان عربي ))

-عاد هو تقرب أكثر وكعد بصفي لطش

-شنو غير تخموني ما تلكوني 

دخلت بنص أهدومي 

مخلد/يابه شبيج،، بسج خوف ورجيف

مااكل بشر والنبي

-بس أرفعي راسج أريد أوچد عيونج السبني 

وأخذن عقلي من أول يوم شفتج بي

-الصراحة اني كتله أكيد تطلع ملحه على باسم مدكولي منين جابت كل هذا الجمال 

-بس من أجن أمي واختي وشافنج 

وأجن وصفنج اليه طابقت 

وصفهن ويه حجي عمي سلمان

-وصار عندي فضول أشوفج 

وأرضي فضول عيوني بشوفتج

-يبنت الناس من شفتج بيوم الرؤيه

ولهسه كلبي وعقلي سبيتيهن وبقن عندج

-زين هسه بس أحجي شي 

سمعيني صوتج 

فرح/ما اعرف شكول لان ما اعرف اسولف ويه ولد

مخلد/هههههه يول اني مو ولد عادي

اني رجلج 

فرح/اي اعرف بس قصدت 

مامسولفه قبل ويه رجال غير أبويه وعمامي

مخلد/والله هذا من حسن حظي

مااعرف أمي شكثر راضيه عليه

وشكثر داعيتلي حتى ربي يرزقني بيج

-اكلج ترى أني مستعجل على العرس

-لان جماعتي وياي أثنين بالدوام 

هم خاطبين ،،

-وأتفقنه نزوج ثلاثتنه بنفس اليوم

على راس السنه

- ونطلع للشمال نتونس هناك وأسبوعين ونرجع شدكولين 

فرح/يعني بعد شهر وشويه قصدك 

مخلد/اي بنهاية شهر ١٢

هم فرحة العرس ،،

وهم وفرحة السنة الجديدة 

فرح/بكيفك بعد انت وأبويه أتفقوا

مخلد/اااخ يول يمه صبريه شكثر داعيتلي

-تقبلين ألزم ايدج لو هم تخافين ؟؟

فرح/باوعت بوجهه وأستحيت أرد عليه 

-قابل أكوله أي الزم ايدي 

شنو ما مصدكة مخطوبة وكاعد يمي الرجال 

بقيت ساكتة 

-هو مد أيديه بكل هدوء ولزم جف أيدي

وأسمع بلعة ريكه يدفعها لصدره بقوه

-بس هن حايرات يلعبن 

بلعاباتهن القماش امي خيطتهن الهن

-أني جمدت لا تحركت ولا بديت 

اي ردت فعل 

-شو هذا تماده زايد رفع أيده 

وبصبعه الجبير مسح على شفايفي

-يبووو من كثر الخجل والارتباك ردت فعلي صارت عنيفة دفعت أيده بقوة 

وزحفت ليورة خوف على مستحى على أرتباك

مخلد/يابه أسف مو بالقصد أحرجج

-أعذريني مااتحمل كل هذا الجمال

كبالي وماالزم شي منه

فرح/عفية مخلد الله يخليك بعد لا تمد أيدك وتلزمني ميصير عمه كالت ليوم الدخلة كلشي يصير حقه (( طبعا من كتله هذا الكلام ما اعرف شنو معناه عبالي نفس هسه لمسة ايد ويسمعني كلمات حلوة ))

مخلد/من غديت فدوة لهل حلك 

غير يجي راس الشهر وادخل 

يول بس كولي شيصبرني لهذاك الوكت

-عندي أتفاق أني وياج شدكولين

كل ماانزل مجاز نطلع نتمشى شوي 

بالبساتين هم نغير جو 

وهو تتعلمين عليه واتعلم عليج

فرح/بكيفك كول لابويه واتفق وياه

مخلد/يول أمي شكثر داعيتلي

وانتي هلكثر مطيعة وكلساع كايله بكيفك

فرح/الصراحة عجبتني شخصيته 

وأسلوبه بالحجي كلش حلو

-سلم عليه حتى يروح 

ونطاني فلوس أستحيت أمد أيدي وأخذهن

مخلد/ اخذي هاي مصرفج خاف تحتاجين شي بعد لا تاخذين من أبوج 

من اليوم صرتي ملزومة مني

-فرح /أخذت منه ،،سلم عليه وعلى الجميع 

وطلع ،،زته أبويه لباب الحوش

صعد سيارته وراح

-ثاني يوم مر عادي مابي شي مميز

-بس أبويه للعصر راح هو وعمي أحمد 

أشتروا الهم نقال يسمونه صرصور أبو الضوة 

يكولون//نحتاجه علمود شغل بالعلوه 

هناك الفلح كلهم شايلن هذا الجهاز يسهل عليهم الشغل 

-مرت الايام عادية 

ومخلد اليوم ينزل مجاز ويمر عليه

هو أسبوع يلتحق للدوام يداوم بديالى

وينزل أسبوع 

هذا الاسبوع يومين من عنده أجه عليه للبيت

وكعدنه بالديوانية ويانه البنات 

بس أبد مايتقرب مني لو يلزمني

-يكول /البنات خطية نخرب نظرهن ومسامعهن

-وكالي// باجر نطلع نفتر بين 

بالبساتين والكياعين الخضرة

-اول طلعة جان حباب بس لزم ايدي 

وبقينه نتمشى ويحجيلي عن دوامه

-بس ثاني طلعة بقينا نمشي وأخذتنا السوالف وأبتعدنا هواي ودخلنا بين الزرع والاشجار

-شو هذا لزم جف أيدي بقوة ودارني عليه 

ورجعني على جذع النخله

وبقى يباوع بعيوني 

-اني من الثول بقيت مصكوكه ماتحركت

-تقرب عليه بهدوء ،،يمكن يخاف 

اشرد لو أصرخ يريد يشوف ردت فعلي

-بوسني ،،وأني الفاهية تخردلت 

-هو حظني يكمن حس بيه راح أوكع بالكاع

وبقى يبوس بيه ،،

-بس أني كولشي ماسويت لان ما أعرف شلون يبوسون وأستحيت هواي لان شي غريب وجديد عليه 

-أبتعد عني وبقى يباوع بعيوني

وصوت نفسه عالي

مخلد/يول يابه شكثر ترفه انتي

-خرب حظ صبريه أمي الماشافتج من كبل 

-شوكت يجي راس الشهر وأعررررس

-يولي أذا بوسه وهل شكل ذبتي

لو غير شي شلون بحالج

فرح/مخلد عفية لا تكول هيج استحي

-وحباب بعد لا تبوسني الله يخليك

مخلد/يولي الله لا يخليني اذا تركتج بعد

-يول غير خبلتيني واخذتي عكلي بالزايد

-يمكن راح اعرس الاسبوع الجاي

واخرب صفاح جماعتي 

فرح/وثول اليثول روحي شبيه ماصدكت 

هسه شيكول عليه الرجال 

-يالثوله عمه هناء مو كالتلج 

لا تخلي يلزمج لو يطخج 

شبيج أنثولتي ومعتي بيده 

-رجعني للبيت وأني أدردم ويه روحي 

بس أبد مارفعت راسي وباوعت بوجهه

-وهو بقى يشاقيني ويذكرني بالموقف

واني ياكاع أنشكي وبلعيني 

ضميت روحي بنص عبايتي 

-رجعني للبيت وأبويه جلب بي 

وبقى تعشى ويانه وشرب جاي وبعد السوالف 

ترخص بليل متاخر وراح 

-أكو مرات الواحد بس يخلي راسه على المخدة يشوف حلم ،،بس هو متأك بعده صاحي ومن يفز يبقى محتار هو جان نايم لو صاحي 

-بس غمضت عيوني شفت 

((أني لابسه بدله عرس كلش حلوه 

ومودليها راقي وتصميها حلو هوووايه

-ردت أنزعها وابدل ملابس بيت 

بس لزمتها من جتفها اريد أنزعها 

شو أتمزقت على طولها

وصار بيها نقاط مال دم 

كمت أبجي أنقهرت عليها حلوه 

-شفت أختي مريم فتحت عليه باب الغرفه

ومحاوطها شلون النور الخفيف ،،

كل ماتتقرب عليه يتغير شكلها 

وتصير بعد اكبر واحلى 

-وصلت يمي ولزمت البدله 

شفتها عود تخيطها

شو صارت بيدها بدله جديده 

وغير تصميم بعد أحلى من البدله التمزقت 

-ومن كملتها لبستها اليه 

وانطتني لعابتها من لزمتها بيدي 

صارن ٣ لعابات ضحكت بوجهي وراحت ))

-فزيت بين الخايفة وبين المستغربة 

وبين قلقانه من الحلم ،،

-اللهم أجلعه منام خير وأبعد عني شره بجاه الرسول الكريم

-كمت من الصبح نفس جدول يوميه

بين تنظيف وترتيب 

وعجين وخبز وتركيب وخياطه

-بس لا حظت كوثر مو على طبيعتها

توصل يمي تريد تحجي شي وتسكت 

-كوثر شبيج شعندج سولفيلي

كوثر /ماكو شي بس من هسه راح أضوج 

على فراكج ،،لا يبقى بالج مابيه شي

فرح/هاي شبيها اليوم تركتني 

أسولف وحدي وصعدت فوك 

-أجى أبويه وياه عمي أحمد من العلوه 

وجايبين وياهم ( دش ) وياهم ولد من اهل منطقتنه

رتب هذا الجهاز على تلفزيون بيت عمي احمد 

وعلى تلفزيونه

-يالله شكد حلو هذا الدش هواي بي مسلسلات

وافلام مصريه واغاني 

هواي بي محطات مختلفه

-اول مادخل للبيت كان عدنه عجبه

وشكد تعاركنه على جهاز التحكم 

كل وحده من عدنه تريد تبقي على محطه تعجبها

تعرفون بعد بيت البنات شكد تصير بي عركات

-وبهذيج السرعة كضى الشهر ماباقي غير 

أسبوع على عرسي 

-بديت أرتب ملابسي وغراضي 

وخاله صبريه ام مخلد وعمه شمس 

أخذني للسوك أشترالي جهاز 

-وخطية عمه شمس هواي تعبت كلساع 

كاعدة بالسوك بطنها تمشي كدامها

حبلى وعليها ٧ أشهر 

-وعمو سلمان طاير بيها وهواي مداريها

طه ،،وهارون ،،ومروان ،،جهاله بجفة 

وعمه شمس عنده بجفة ثانية 

-واني من هسه خايفه وافكر بيوم العرس 

وشلون مخلد يبوسني 

والله أستحي من عنده 

يلا الله كريم منا لهذاك الوكت

هي بوسه نفس هذيج المره 

ويخلص الموضوع ........

محمود/السلام عليكم 

-رجعتلكم مرة ثانية أكيد أشتاقيتولي 

-بعناد فرح (فارة النضد 😜😜) بعدين تعرفون شنو سالفه لقبها

-جنه نسولف بسنه اللي خلصت بيها السادس ونجحت بمعدل عالي الحمد لله 

ودخلت كلية طب أسنان باأختياري

-وأركان نجح من ثالث متوسط 

وراح للرابع عام 

-بهذاك يوم الجمعة وكلنا كاعدين عطلة 

أجيت على أمي لغرفتها لكيتها تصلي 

-عندي موضوع وياها 

-كعدت على جربايتها بين متخلص صلاتها

-ورجع بيه الوكت والذكريات سنين ليوره 

بسنة ماكعدنا بهذا بيتنا 

فاطمة /يمه أنت كبرت وصرت تفتهم الصح من الخطأ لازم عليك هسه تبدا تصلي

محمود/يمه ميخالف أصلي بس شلون ؟؟

شو أبويه يجتف أيديه ويصلي على سجاده

وأنتي تسبلين أيدج وتصلين على التربه

-اني أتبعج لو أتبع أبويه؟؟

فاطمة/يمه اول شي الولد مرجعه لابوه 

-وثاني شي ترى الصلاة هي وحده 

أهم شي بيها صفاء النية 

وتكون خالصة لوجه الله وحده 

من دون لا رياء ولا تباهي 

-وبعدين كل احنا مسلمين وعلى دين 

النبي محمد(عليه افضل الصلاه والسلام) 

-وصلاتنا هي وحده ونتوجه بيها لرب العباد 

-فقط اكو أختلاف بسيط بيها 

وهذا الاختلاف مو واجب

لا يمه مستحب ،،

هو بالاذان فقط ،،مو بالصلاه 

ركز بالاذان احنه نكول أشهد ان علياً ولي الله

أهلك ما يكولون

-وهذا مو معناه ان أهلك مايحبون أل بيت النبي لا بالعكس كلش يحبوهم ويحترموهم 

لان محبتهم من محبة رسول الله 

-الي أكوله الك يايمه الدين والمذهب يجي بالقناعة مو بالعركة وفرض عليك ولازم تتبع بالغصب

-القران بعظمته يكول ((لا أكراه في الدين))

يعني الواحد بكيفه وبراحته واله حق الاختيار 

محمود/خوش حجي اني منا ورايح 

أصلي نفس أبويه،،

-وبكلبي وبروحي أحب وأحترم ال بيت النبي

أكثر من ألف واحد من أهلج 

فاطمة/هو هذا عين العقل يايمه 

ادعي ربي يهديك للصراط المستقيم 

ويبعد عنك كل سؤء 

-محمود/هاا يمه تقبل الله صلاتج

واعانج على عبادته

فاطمه/يتقبل مني ومنك ومن الجميع صالح الاعمال

وعسى يغفرلي ويغفرلك ويغفر لجميع أمة محمد

-سولف كول العندك ،،بلعومك حجي 

كول من الاخير محتاج فلوس

محمود/لا يمه محتاج أزوج !!!

فاطمه/صلوات على محمد وال محمد

يوم المبارك يمه ،،اي هذا خوش خبر

-منو البالك العصر اروح وامشيلك عليها

وياك بالكلية 

محمود/يمه البالي من اول مافتحت عيونها للدنيا هي أتسجلت بأسمي ،،

-يمه مرتي فرح روحي أخطبيها اليه

فاطمه/يااا يمه تصدك تجذب بعدها صغيره

شكد صار عمرها هسه يمكن ١٠ لو ١١ سنه

محمود/اي ميخالف اعقد عليها عقد شيخ 

وأجيبها هنا وانتي ربيها يمج 

فاطمه/يا يمه بعد مااعرف شكول وشحجي

هسه اشور أبوك وشوف شيكول

محمود/طلعت امي وراحت للهول تسولف 

ويه أبويه ،،

-ومااسمع الا ابويه يصرخ تكول طلقه وثارت

عادل/محموووود ،،محموووود 

وانت أللاخ أرررركان 

محمود/نزل اركان يركض من فوك 

//شبي ابوي شجاه وهيج كب وعصب

دخلنا للهول وهو استلمنا 

عادل/انت وياه ياولد الجلب 

الي أسمع بي واصل عمامه لو ملتقي بيهم 

أخلي چيله براسه

-وأنت محمود اذا فتحت طاري الخطوبة انوب ،،وتريد فرح 

أحط بيك صواب وأشمرك للجلاب

-وانت اركان دير بالك تفكر 

بيوم من الايام باأختها منى 

وروح اهلي أعدمكم 

-اني جدكم سليم وجديتكم صفيه

حذرتهم مايدلون أخوتي على بيتي

محمود/يابه اني رايد فرح وماأتروج غيرها

من يوم جدتي كالت هي الك 

وجدي كال ماتصير الغيرك

يابه اني قافل عليها لو تثالث الدنيا 

فرح اليه وما متصير الغيري

-مااحس الا سطرني براشدي فر راسي 

-الصراحة أنهضمت وأنقهرت كل عمري 

ابويه ماضاربني على وجهي راشدي 

صح من جنا صغار يجلدنا بالحزام 

ويصيح علينا ويرزلنا 

بس ابد ميضربني على وجهي

-ليش هسه يضربني

لان اريد ازوج واريد بت عمي 

//يابه اضربني بعد اذا ضربي يريح روحك 

من قهرك من عمامي 

-بس فرح مالها دخل بالموضوع 

فرح مرتي ،وتبقى مرتي 

وماتصير الغيري

-لا يالله أبويه ماصدك جاب العكال 

وجلدني نفس جلد بلال بفلم الرساله بعد بس شويه وأصيح هبل نفس عمار من كتلوا أمه وابوه كبال عيونه

فاطمه/على بختك عادل شبيك يمعودأدروشت على الولد 

-هسه هي فرح وينها أشو بعدها جاهلة وعمرها صغير حتى بعدها ما كملت وهو لان من صغير احنا نكوله هي الك ظلت باله وانزرعت بروحه

-دكول يالله يارجال لا يصعد ضغطك هسه الشيطان طفرك مدكولي فرح وينها وين الزواج 

-يمه محمود خلص كليتك وتعيين والله كريم اذا الله قاسملك فرح من نصيبك ماتروح الغيرك

-وحتى أطمنك واخذها مني حجايه بخت أزفك أنت واخوك بسلامه بيوم واحد اذا فرح تكون من نصيبك او لا حتى فرحتي تكمل بيكم 

-مشت الايام بس ما سكتت 

وكل ما افتح موضوع خطوبة 

فرح ابويه يكب ويتعارك ويايه 

وامي تسد الموضوع وتبرد السالفة 

-وشكد شفت بنات بالكلية ولا وحده دخلت براسي

-كل ماافكر أرتبط بوحده 

تجي اخر صورة لفرح بعيوني

أشوف صورتها الصغيرة من 

جانت بصف اول أبتدائي

بالمرحلة الثالثة من الكلية 

-صار السقوط واوضاع بغداد تخوف 

الصراحة احنه ماطلعنه من بيتنا 

ابوي//كال نبقى كاعدين وساكتين حالنا حال الناس ومحد يموت ناقص عمر 

-بيت جديتي صفية أجوي يمنا لان بيتهم قريب على ألاسواق خافوا تنقصف ويتاذون من قصفها

-الحمد لله عدت الايام سلامات 

بس بعد الهوسة والاوضاع مخربطة بغداد 

هنا اوضاع اركان كلها تخربطت 

هو دخل فرع الأدبي وخلص السادسجان يتحجج ويكولي //مالي خلك للدروس العلمية

والحمد لله نجح بمعدل زين 

بس عجبه يدخل للكلية العسكرية 

صديقه سيف خلى سالفه براسه 

وأثنينهم قدموا على الكلية وأنقبلوا 

ما مر على دوامهم شي قليل وصارت الاحداث وسقوط النظام وعمت الفوضى وانحلت الكليات العسكرية والدوائر الامنية 

تعبنا من الحجي وياه 

ول قدم على غير كلية 

عصلگ لو الكلية العسكرية لو ما اداوم بغيرهاولابد ما ترجع الاوضاع طبيعية وكلشي يرجع لمكانه 

وصدقت توقعاته تقريبا كامت ترجع الاوضاع المجراها السابق وتعود الحياة لشوارع بغداد

-والحمد لله عدت الايام والاشهر والسنوات بخير وسلامة 

اني حاير بدوامي بين التطبيق العملي والنظري ،،وتعب الدوام وأختبار الدكاتره

-سنة التطبيق والتدريب خلصتها 

بمستشفى الكاظمية التعليمي 

-الدكتورة المشرفة على تدريبي 

كيفت على شطارتي والتزامي بالشغل هي اللي توسطتلي 

وحصلتلي تعيين بنفس 

المستشفى بعقد 

ألف الحمد والشكر لله على كل الانعام تخرجنا أني واركان من الكليات 

اني طبيب أسنان الحمد لله 

أثبتت على ملاك وزارة الصحة

-وأركان الحمد لله ترفع وشال نجمة صار ضابط برتبة ملازم 

-وامي من فرحتها بس تبجي وتبوس بينا

تكول/ اي اني فاطمة العربية اللي بيوم عيرها حماها يكوللها ماعرفتي تربين وولدج فاسدين 

-ابوي من فرحته عزم كل جماعته اليعرفهم واليتعامل وياهم من خلال شغل السكلة ومواد البناء 

-صديقه المقرب عليه حجي نافع 

تعرف عليه تقريباً من ١٠ سنوات 

اول ماشتغل بالسكلة رجال خيير 

وصاحب كلمة ،، ووجيه بين الناس 

اهل المنطقة شعدهم سالفة 

او موضوع خاص أو عام الحجي يركض بيها 

-بعد ماخلصت العزيمة وشرب الجايحجي نافع بده يخطب

 ولا تكول أبو عدي بزمانه

حجي نافع/يالله ،،الله بالخير جميعاً 

-يا جماعة الخير ،،أبو محمود أخوي 

وفرحتي بتخرج أولاده أكثر من فرحته هو شخصيا بالولد

-واني لا جبتلهم هدية ولا أسويلهم عزيمة بس أهديلهم أعز ما أملكم 

-بناتي الاثنين الكبار يكبعوهن وياخذوهن بعبيهن

-ومثل ماتعرفون أهلنا يكولون أخطب البتك ولا تخطب لابنك 

-واني أعرف أخوي عادل واولاده وتربيتهم الزينة والعدلة 

واذا هديتي قليلة يعذروني ويسامحوني 

عادل /كفوو منك أبو علاء ماقصرت ونعم منك ومن أصلك 

-هديتك مقبولة حجي 

والخميس جاي بوجود الوجوه الطيبة جاينك مشية الزلم 

محمود/لا ياربي رحمتك وعفوك ورضاك شنو هل المصيبة الوكعت على راسي

-شعلوني بنار وبانزين وين جانت مضمومتلي هاي السالفة 

-اريدهم بس يطلعون أعصابي ترجف

-يمكن هسه كلهم أطردهم وخلي أبويه يذب حني

-بس طلعوا وركبني جن 

// يااابه لو تذب حني لو تصلخ جلدي مااتزوج غير فرح

-اعتذر من صديقك وكوله الولد ماراضين 

عادل/أااانجب واكل تبن 

تزوج وتاخذ بنت ابو علاء 

ورجليك فوك راسك 

محمود/بويه هي غصب خو ماغصب ماازوج غير فرح 

-ليش مارديته من كام يوزع بناته في سبيل الله

-ومنو شاكيله وكايله اني رايدلي مراه

عادل /يالفهيم يالماتستحي شلون أرده وهو كاعد بيتي وبنص ديواني بعد

-يول اذا رديت هديته معناه أفشله 

واكله ما رايد نسابتك واطرده من بيتي

-وشغلة ثانية ما اكدر أعتذر من عنده بعد لان قبلت الهدية كبال الجميع واذا اعتذرت معناه ان بناتك معيوبات افتهمت يالمطي

 لو لا

-ومحد شاكيله وكايله حضرتك رايدلك مراه بس هو يعرف بكل خلافي ويه أخوتي 

واكيد لهذا السبب هدالكم بناته

-وهذا الشي يرفع من قيمتك وأحترامك يالغبي لان الرجال هدالك مثل ما يكول أعز ما يملك وهي بنته

-وانت أركان أفندي هم معترض وماتريد هدية ابو علاء

اركان/بويه أني لا معترض ولا شي

هسه لو تجيبولي وحده صخله 

وتلعب النفس اقبل بيها

عادل/هاي شنو القناعة العندك ماعرفتك

اركان/لا بويه مو قناعة 

والحجي بيناته اريد اشوف روحي 

بيه خير وأشتغل لو خربت

لان الكافور دمرني 

عادل/كووم من وجهي لا بارك الله بشيطانك

محمود/اي بويه انتوا أضحكوا 

واني النار شاعله بيه 

-بويه حل سالفتي ،،مااتزوج غير فرح

عادل /تزوج بنت ابو علاء وغصباً عنك ورجليك فوك راسك

محمود/بويه لا تجبرني 

واذا جربتني وزوجتها اليه 

بالغصب مااطخها وأوصلها لو تذب حني وتكطع مني لحم وأنت شوف شلون بعد تلملم الموضوع 

حلها من هسه افضل واحسن 

عادل/هسه أخطبها واعقد عليها 

ومن تعرسون عود بهذاك الوقت 

لا طخها ولا توصلها بس المهم لا تنزل كلمتي جدام العالم 

محمود/أحتركت ياااربي منو يطفي النار الشعلت بيه

-يمه ماتحجيلج كلمة شو ساكتة 

فاطمة/يا يمه بعد مايصير ابوك يتراجع بكلمته 

أول شي تنحسب عيب بحق أبوك ويصغر بعيون صاحبه

-وتنحسب من جانب اخر عيبه على الزلمه وشكلك بناتك معيوبات مانريدهن

محمود/هاااي هي يمه يعني أتفقتوا عليه يمه كلبي وعقلي يم فرح

-يمه لو ما أبوي يزعل مني 

ويكول اتبره منك بس توصل عمامك جان تلكيني هسه مكابل بيت عمي باسم وكاعد هناك

وياهذيج الايام وياهذاك الأسبوع الاكشر خلصتها بس عرك ومشاكل ويه امي وابوي وماكو كل فايدة اتفقوا على كلشي بيناتهم 

-واجى الخميس ويوم دفنتي مو يوم الخطوبة ....

شكرا لزيارتكم عالم روايات سكيرهوم