رواية بنت الكهوجي الفصل التاسع بقلم احمد
ادم : صدگ ترا معتصم مو شايفج
ياقوت : شعرفج
- لان سمعتو يحجي ويا صاحبو عن وحدة وجان يقصدها من گال شايفها
- الله يريح گلبك مثل ما ريحت گلبي بس ليش اجى عند بيتنا علمود يحجي
- والله ماعرف .. يلا بوية غسلي المواعين علمود تنامين
- تمام
اخذت المواعين غسلتهن ورجعت عند بابا شربنا ماي قبل وقت الاذان وتوضينا ومن صار الاذان صلينا الفجر ونمنا
طبعا بالمكان الي جنا عايشين بيه ماكو جامع قريب فاوقات الصلاة حافظيهن حفظ ما ننتظر الجامع يأذن علمود نعرف وقتها
بس بالنسبة للفطور والسحور قبل رمضان دائما عائلة الشيخ عندهم تقويم بورقة مكتوب بيه ايام الشهر واوقات الصلوات كلهن
فبابا اخذ نسخة من التقويم وصرنا قبل الاذان ب 5 دقائق نتوقف عن الاكل والشرب وورا الاذان ب 5 دقايق نصلي علمود نتأكد ان دخل وقت الصلاة
( هذا توضيح للي يفكر بهالشي )
ثاني يوم گعدت من وقت لان تعودت على هالشي جان بابا بعدو نايم بقيت بفراشي متكاسلة اگوم والغرفة باردة والضو طافي
تقريبا 10 دقايق ورجعت غفيت مرة ثانية وگعدت الساعة تقريبا 10 گمت اخذتلي فرة بالبيت ماكو شي اسويه رجعت توضيت واخذت قراني وبلشت اقرا
من صار وقت اذان الضهر گعدت بابا علمود يصلي الضهر وبعد الصلاة رجعت اقرا قران لحد صلاة العصر وبعد صلاة العصر بلشت بالفطور
سويت شوربة للفطور والعشى جان عندنا قواطي لانشون صغار سويت نص واحد ويا تمن ومرگ شجر ومن صارت الدنيا مغرب اخذتهن عالغرفة
اول شي فطرنا عالشوربة والماي وصلينا المغرب ورجعنا تعشينا العشى الاساسي وبعد صلاة العشاء راح بابا عالمضيف
ممكن البعض يفكر انو شلون احنا صايمين ونفطر على هيج فطور ممكن ما يشبعنا بالاخص انو جنا نصوم بالصيف والنهار طويل
الجواب بكل بساطة ما عندنا غير شي جان كل الي عندنا دجاجتين واخذت منهن لسحور اول يوم ولازم ادبر بيهن لنهاية رمضان
واذا احنا تعشينا هالعشى الي ما يعجب بعض الناس فاكو ناس ما عدها شي تفطر عليه والحمدلله ما فد يوم تبطرنا على النعمة
اكو اكلات ما نحبهن حالنا حال باقي البشر بس من تسوي اكلة ماما قبل ناكل كلنا منها او تسوي فد شي مختلف للشخص الي ما يحب هالاكلة
اني وبابا ذوقنا بالاكل مثل بعض نحب كل الاكلات بس البامية ما ناكلها سبحان الله اكثر اكلة يحبوها العراقيين احنا ما نحبها ولا نسويها
بعد ما راح بابا عالمضيف بقيت لحالي وماعندي شي اسويه ومو جايني نوم وما عندنا تلفزيون اتابعو تلفزيونا بقيناه بالبيت
اخير شي فتحت قراني وبلشت اكمل الي قريتو بالنهار مر الوقت واني مندمجة بالقران واقلب صفحة ورا صفحة وجزء ورا جزء
ما حسيت على نفسي الا اني اريد ابلش بدعاء الختمة صفنت ويا نفسي معقولة ختمت القران كلو بيوم واحد مستحيل
الصبح قريت ساعتين للضهر والضهر 4 ساعات للعصر وهسا من ال 9 بالليل لل 2 قبل السحور ختمتو يعني مجموع 11 ساعة ختمت القران كامل
قريت الدعاء وضميت القران وتمددت بالغرفة واني افكر شگد راحت اوقات من حياتي ضيعتها بدون اي فايدة وجنت اگدر اقرا بيها قران
بذيج الفترة ماعندي لا تيلفون التهي بيه لا تيكتوك ولا غيرو فجنت اضيع الوقت بالصفنات بالاخص بعد وفاة ماما وباسم بس الحمدلله صحيت على نفسي واني متمددة طب بابا للغرفة
ادم : ها شو بعدج گاعدة
ياقوت : ما اجاني نوم
- گعد قريب مني .. ها تسحرينا اليوم لو لا
- لا عزلنا اليوم
- بس اني زبون خاص
- هئ ماكو زبون خاص وزبون عام
- لعد راح اعوفكم واشوفلي غير مطعم
- ههههههههههه ومنو هالمطعم ابو باسام اعترف
- اكو هواي مطاعم
- هنا الحجي اعترف اعترف منو هالمطعم الي حاط عينك عليه
- افه عليج شنو شايفة ابوج مراهق ويحط عينو عالنسوان
- امانة الله بابا حبيت وحدة وانت صغير
- ما حبيت غير امج واخوج وانتي فسالفة الحب قبل الزواج هاي من اكبر الاخطأ الي ممكن يوگع بيها الانسان وبالاخص المقبل عالزواج
- خلي اسوي السحور وارجعلك علمود تشرحيلي بالتفصيل
- تمام واني انتظرج
- گمت حميت الي بقى من الفطور ورجعت عليه حطيتو وبلشنا نتسحر کلتلو اشرحلي عن خطأ الحب
- شوفي اي شاب او بنت من يشوف شخص من الجنس الاخر مهتم بشكلو واناقتو ونظافتو راح يشوف نفسو يركز عليه بدون ما يدري بنفسو
ويا الوقت هذا الشي يصير اعجاب وهنا تبدا المشكلة لان راح يباوع لمحاسن هذا الشخص ويتجاهل او ما يدرك عيوبو
ومن يوصل لهالمرحلة تبدي مرحلة الحب وهنا يصير يشوف هالشخص مميز عن باقي البشر كلهم بصفاتو بشكلو بكلامو بكلشي يختلف
فمن يصير موضوع الزواج يبدا هذا الشخص يتعرف عالشخص الثاني كشريك حياة مو حبيب وراح يعرف عنو كل التفاصيل
راح يدرك العيوب الي ما جان يدري بيهن راح تتغير تصرفات الشخصين بسبب المسؤولية مثلا يقل الاهتمام يقل الغزل يقل الكلام بينهم
هنا تبدي المشكلة لان الطرفين يحسون بالاهمال من بعضهم وتبدي المشاكل لاسباب جدا تافهة وهالشي 99% راح يقود للطلاگ او الانفصال
- زين والحب بعد الزواج شيختلف
- الحب بعد الزواج يبدي بداية جديدة وبطريقة مختلفة كلش عن الاولى
- شلون يعني
- من يتزوجون الشاب والبنت بدون ما يعرفون بعض راح يبدون يتعودون على الشخص وهو بوقت المسؤولية راح يحبوه على طبيعتو
على سبيل المثال الشاب ماراح يكون منطي زوجتو اهتمام زايد قبل الزواج فمهما كانت نسبة الاهتمام بعد الزواج راح تعتبرها الزوجة طبيعية
وبالوقت الي لازم الحبيبة تكتشف عيوب حبيبتو راح تبدي الزوجة تتجاهل عيوب زوجها وتتقبل انو هذا شريك حياة وهاي مو فترة حب مؤقت
هنا راح تنبني بينهم رابطة كلش قوية ويصير الحب بينهم قوي بكل ما تعنيه الكلمة من معنى وراح ربنا يبارك بحبهم لان حبهم جان بعد الزواج
- ليش انت هيج حلو بالشرح وما امل من شرحك مهما يطول
- لان انتي حلوة فتشوفيني حلو وبالمناسبة حب البنت لابوها يعتبر من الحب القوي
- اي وربي صحيح لان مدا اشوف انو عندك عيوب نهائيا
- ماكو انسان كامل الكمال لله وحدو بس من حبج الي ما تشوفين عيوبي ومن حبي الج ما اشوف عيوبج
- ايوا هسا فهمت
- يلا كملي سحورج وغسلي المواعين علمود نصلي وننام
- تمام
من خلصت سحوري مثل البارحة كملت شغلي عالسريع وبعد صلاة الفجر نمنا بس لان انام بعد صلاة الفجر صرت ما اگعد للضهر
برمضان سويت روتين بالبيت جنت يومين اخلي وقتي كلو لقراءة القران ويوم لتنظيف البيت ولان بس اني وبابا فما جان يتوسخ
والمواعين لان شخصين بدقايق اخلصهن والي ساعدني اكثر بقراءة القران ان بابا يروح للمضيف واني ما انام ابقى اقرا الى ان يجي
وجنت احاول شگد ما اگدر ادبر بالاكل الي عندنا علمود لا يخلص قبل ما يجي الراتب مال بابا والحمدلله ربنا بارك هواي بيه
الدجاجتين جنت كل كم يوم اخذ 3 قطع منهن وحدة الي وثنين لبابا والتمن جان بابا جايب گونية 50 كيلو واحنا يوميا يمكن ربع كيلو ناكل
وجان مرات الشيخ يدز فطور لبابا ويا اولادهم الصغار فيروح بابا يدخلو والحمدلله ما جان ناقصنا شي نهائيا
جنت انتبه لبابا دائما يحاول يخليني اكل لحم هواي من الي يدزو الشيخ وجان عندو اهم شي ان اني اشبع حتى لو هو يبقى بدون اكل
رغم ان الاكل الي جان يدزو الشيخ جان يكفينا ودائما يزود منو ونحميه بالسحور لان حرام النعمة تنذب
جانت تصرفاتو هاي تحسسني شگد هو يحبني وشگد يهتم لامري وشگد ما اوصف حبو وحنيتو تجاهي مستحيل اوفيه حقو
صحيح ما جان عندنا لبن او عصير او حلويات مثل باقي الناس بس المهم عندنا اكل نسد بيه جوعنا ونحافظ بيه على صحتنا
بابا گضى رمضان كلو بالبيت بس ايام الجمعة يروح للصلاة ويا الشيخ على اقرب جامع ويرجع بعد الصلاة ويوميا بعد صلاة العصر يبلش يقرا قران للفطور
بدت تمر ايام رمضان يوم ورا يوم جنا هواي نفتقد وجود ماما وباسم وهواي مكسورين بسبب غيابهم بس نحاول نصمد علمود بعض
يا ما بجيت واني ساجدة ويا ما بجيت واني اقرا قران واتحسر على شوفتهم بس ما راح اشوفهم وزين كلش اذا زرت قبورهم
جنت ما ادعي اذا ما ادعيلهم ودائما اذكرهم بالدعاء بالسجود لان اقرب شي للعبد من ربو وقت السجود فدائما استغل هالوقت بالدعاء
خليت بابا يسأل اذا يصير اختم القران واهدي اجرو لماما بس جان الجواب ان ماكو دليل على اثبات هالشي لا من الرسول ﷺ ولا من ال بيته او صحابته
بس الشي الثابت هو الدعاء والصدقة والحج او العمرة بدالهم فما جنت اگدر اسوي اي شي من ذني سوا الدعاء لذلك ادعيلهم
بايام رمضان العادية جنت مرات واني اقرا قران اسهى او اتعب واعوف القران شوية بين ما ارتاح وارجع اقرا مرة ثانية
بس من صارت العشر الاواخر صرت بالاخص بالليل استغل كل ثانية بالقيام وصحيح ما جنت اصلي بس جنت اقرا قران باستمرار
وياريت اگدر اوصفلكم الراحة الي جنت احس بيها واني اقيم او اقرا بالنهار من صدگ جان القران افضل من البلسم لجروح القلب
جنت انسى كل همومي واحزاني واعيش بعالم ثاني ما بيه حزن ولا بيه فقدان مابيه سوا مواعض وحكمة وتدبير الهي لكل شيء
وصلنا لاخر يوم برمضان والي جان اخر يوم عند كل الناس الا اني وبابا جان مجرد يوم عادي لان الي مثل وضعنا ما يعتبر نفسو بعيد
صحيح هذا عيد المسلمين وما يصير الواحد يگضيه حزن بس مو بايدنا فقدنا ثنين مو واحد وما صارلنا هواي من فقدناهم
وفوگ هاي ماجان عندنا فلوس علمود نشتري ملابس او حلويات حرفيا ما جنا بعيد بس ما نگول غير الحمدلله على كل حال
قبل العيد بيوم بالليل بابا ما راح لان الشيخ وعيلتو دا يتجهزون للعيد واني وبابا من خلصت شغلي وقتنا المنبه على صلاة الفجر ونمنا
من گعد بابا صلى الفجر واخذ دوش وطلع جهز نفسو وراح لصلاة العيد واني اخذت دوش وطلعت جهزت نفسي بس مجرد تعبير عن فرحي بالعيد
جان عندي فستان بيجي لبستو وباوعت لنفسي بالمراية وضحكت على وضعي گلت شدا تسوين يا ياقوت كل عقلج مقتنعة بهالشي
لا احد حيشوفج ولا احد راح يجيج وحتى امج وباسم مو وياج على شنو كشختي وعلى شنو جهزتي نفسج بس فهميني
گمت نزعت الفستان ولبستلي دشداشة رصاصية غامقة ورحت سويت الريوگ بقى بس البيض گلت من يجي بابا احمسو
رجعت للغرفة انتظرو واتذكر ايام العيد قبل من جانو بابا وماما يروحون قبل العيد للسوگ يجيبولنا ملابس وحلويات للعيد
ومن نگعد اني وماما نسوي كليجة وباسم يضوج لان ما نخليه يساعدنا وماعندي وقت علمود ابقى العب وياه
جنت من اگعد اسمع تكبيرات العيد وبعدها الحنة بايدي واروح ركض اغسلها واسبح علمود اجهز نفسي قبل ما يرجع بابا من الصلاة
وجنا اني وباسم وماما نركض ركض على بابا من يجي كأننا نتسابق علمود نعايدو ونبوسو وهو كلش يفرح من يشوفنا وخلال ذكرياتي صارن دموعي يجرن
دخل للغرفة بابا وباوع علي شافني دا ابجي جر حسرة وبقى واگف وصافن واول ما فتحلي حضنو ركضت عليه حضنتو وانفجرت بالبجي
ادم : كافي يا بوية كافي
ياقوت : بابا مو گادرة انساهم شسوي
- ادعيلهم بنيتي ادعيلهم
- دائما ادعيلهم بس گلبي خلص من الهم مو گادرة اتحمل
- اني وياج وما اعوفج شمايصير
- خلي اروح اسويلك الريوگ قبل ما تروح للمضيف
- راح اتريگ هناك انتي تريگي لا تبقين بدون اكل
- ليش مو هنا
- الشيخ عزمني وگال ما اكل قبل ما تجي وگوة قنعتو ان اريد اتأكد من الابواب والشبابيك علمود اجي اسلم عليج وارجع
- تمام بالعافية مقدما
- الله يعافيج .. تريگي مثل ما وصيتج مو
- خوش
- وخاف يجون جهال يدگون الباب لا تفتحيه
- تمام
- باسني براسي .. يلا بوية لا تشغلين بالي عليج اهتمي بنفسج لخاطري
- صار من عيوني
- يسلملي عيونج الحلوات .. وگرصني بخفة من خشمي
من راح جنت مو مشتهية شي بس لخاطرو طگيتلي بيضة وشربت ستكانة جاي وما جان عندي شي ومن الملل رجعت نمت
گعدت قبل اذان الضهر بشوية وقبل ما ابلش بالغدا اجى بابا گال لا تحسبين حسابي بالغدا والعشى لازم ابقى هناك لان موجودين ناس هواي
رغم هواي تضايقت بس ما بينتلو لان مهما يكون هذا يعتبر شغلو واكيد لان شيخ يجون الناس عليه بايام العيد ويسويلهم غدا
واصلا لازم يبقى بابا عالغدا والعشى لان الاكل صاير صاير فبدال ما يجي يتغدا هناك ويكمل شغلو بوقت واحد احسن من التأخير
واني متأكدة لو الشيخ يعرف بي موجودة مع بابا جان دزلي اكل للبيت لان اعرفو شگد كريم وعينو مليانة وكلش يحب بابا
بقى بابا بالمضيف لل 10 بالليل لحد ما اجى بس اجى تعبان مجرد شرب ماي وراح لفراشو نام وبسرعة غط بالنوم من التعب
ثاني يوم نفس الروتين راح الصبح ورجع بالليل واليوم الثالث كذلك بس من رابع يوم رجع الوضع طبيعي والضهر محد اجى وبقى بابا بالبيت
ياقوت : بابا سؤال
ادم : اسألي
- ايمتى تحجي للشيخ عني
- ماعرف ليش محتاجة شي
- لا بس مو گلت بعدين احجيلو عنج
- بالوقت الحالي ماگدر احجيلو عنج
- راح تبدا المدارس بعد فترة قصيرة
- خليها لوقتها بنيتي
- تمام
حسيت انو مو حاب يحجي للشيخ عني وماعرف شنو سبب كل هالغموض وليش حريص لهالدرجة ان محد يعرف عني شي
بالعكس اذا يحجيلهم احسن يجوز اذا الشيخ عندو بنات يصيرن صديقاتي ويجن علي او اروح عليهن بدال ما ابقى لحالي دائما
وما اعتقد لمعتصم علاقة بالموضوع لان من البداية بابا اخفاني عنهم بس الا ما يجي يوم ويبين سبب تصرفات بابا هاي
شكرا لزيارتكم عالم روايات سكيرهوم
