رواية سواد القلوب الفصل التاسع بقلم ام سامان
براء
مرت شهر وآني شاهين نحجي سوه ....كلي عادي نكون اصدقاء رغم اثنينا جذابين البينا مستحيل يكون صداقة عاديه بقى ببيتنا جم يوم....تفاجأت من بابا عمي مخابره يريدنا بسالفة ...خابرت شاهين ...
ماقبل يكول كال شغلة تخص ابوه...
كاعدين ورا العشاء عمو كال
_ خويه أركان احنا اليوم جاين بصفتك ولي امر بنيتنا براء ...فتحت عيوني مصدومة وكبل باوعت لشاهين اليباوعلي بابتسامة ....وباوعت لفهد هو هم مبتسم عبالك يعرف اليردوه
_ جاين نخطب براء لأبنا شاهين
حجت ماما باستغراب
_ ليش شاهين مو متزوج بنت عمه
_ لا ياام فهد ...منفصلين...
باوعتلي امي وهي تخزرني
_ على حد علمي لحد آخر روحتهم مجان منفصل ...شنو يبو شاهين تريد تعيد مأساتي وبنتي تعيش العشته ...مو مكفي لليوم اخوانك وزوجاتهم معتبريني بواكة زلم وخرابة بيوت تريد تخرب حياة بنتي هم حجت امه
_ وضعج انتي والمرحوم مو مثل وضع شاهين...شاهين انجبر يخطب بنت عمه وخلي يحجي ابوه هو جبره لان جانت خطيبة صاحبه واستشهد ....حتى أنا مااعرف ليش جبروه
_ سالفه وراحت يامرة ....ام فهد اليحجي عليها يلاكيني كدامه ...
سكتو بابا كال
_ انطوها مجال تفكر ...
عمو كال....نقرا الفاتحة بنية التوفيق .....مااعرف اوافق او أرفض ....
بقو بالليل ثاني يوم راحو ....
جنت متمدده ماما فاتت بتهجم كومي فزززي وجاوبيني
_ شون تقبلين تخربين حياة غيرج
_ ماما ماخربت حياة احد صدكيني ولاالي دخل
_ وعبالج الناس راح تصدك هالكلام ....
_ ميهمني كلام الناس ...ماحسيت غير ضربتني راشدي ....شهكت ممصدكة ...
_ مااااماا شبيج ...هاااي حياتتتي
_ حياااتج مو حياتج الانا وابوج تعبنا بيها لماوصلناج هنااا
_ نزلت دموعي ....مجبووورة قابل تخلفينا وتذبينا بالشارع ...ضربتني راشدي ثاني فاتو أياد وشاد طلعوها...سديت الباب بقوة بعد ماقفلتها....وكعت يم الفراش...
نزلت دموعي وشهكت أول مرة تقسى عليه ..أول مرة آني اقلل احترامي الها
ساعات واندك باب غرفتي
_ مااريد احد عوووفوني
اجاني صوت بابا وفهد
_ باباتي فتحي الباب
_ مااريد صحت ماااررريد اشووف احد كااافي مليت مليت عوووفوني الله ياخذني واخلص من هالحياةةةة
_ انجبي لججج صاح فهد ..فتحي الباب لاتخليني اكسره
كمت بالكوه...فتحت الباب بابا باوعلي بعتب ...ذبيت روحي بحضنه..وفهد يمسح بدموعي ...
_ شش هدي بابا ...
_ اسفه بابا اسفه ضوجت ماما وقللت احترامها
_ ماكو شي بابا ..خلي نفوت ونحجي بهدوء
كعدت بنصهم ...بابا اشر لفهد يعوفنا طلع وعافنا
_ أفهم انتي موافقة على ابن عمج
_ ماموافقة بعدني بابا بس انقهرت من ماما وحجيت هيج...
_فكري براحتج ..وعوفي أمج عليه بس اتأكدي تصرفاتها نابع عن حبها الج ...هي مو عدوتج
_ لاتكمل بابا ...مستحيل ازعل منها ...أصلا اني الغلطانة....
باس رأسي وطلع فات فهد...
_ باعي كلبي انا اشوف شاهين خوش رجال يعني إذا تقبلين بي مراح تتندمين
_مااعرف كلبي حايرة...
_ فكري براحتج محد راح يضغط عليج ...
اتشكرت منه وطلع...
اخذت نفس وطلعت للمطبخ...ماما كاعدة وبابا لازم ايدها ويحاجيها مبين يهدي بيها....
رحت كعدت يمها باوعتلي بدموع ...ماتحملت ذبيت روحي بحضنها ...
_ ماما اسفة موقصدي احجي الحجيته وموقصدي اقلل من احترامج...ماما حيل مضغوطه هالفترة الفاتت يعني خلال شهور خسرت صديقي الوحيد وخطيبي وانتي اكثر شخص يعرف آني ماجنت أحب سيروان الحب اليتمناها ...ومن حبيت شاهين ماجنت ادري متزوج و الله ...وانفصاله آني مالي دخل بي ماما تتخيلين اثبت كلامهم ويكولون هاي نفس امها...و الله حتى الشهر الفات كتله مستحيل اقبل بيك بس حتى يبطل مني شنو ذنبي إذا هو مامتقبل فكرة آني ماموافقة عليه
_ يعني مراح تقبلين
_ التردينه انتي آني موافقة عليه....
_ براحتج ماما إذا انتي تردينه آني مراح امنعج منه....بس تتحملين اليصير بيج
_ اخذت نفس ماادري ماما صدكيني حتى اني مااعرف شريد ...من رخصتكم...
ايام مرت وآني افكر وافكر وافكر ....شفت روحي مو حمل أخسر شخص ثاني ...رزكار عزمنا على خطوبته ...خطب بنت خالته...
وهاي آني لبست زي كردي مثلهم...نيلي وفاله شعري الجوزي وبيها خصل مميشته...بس مكياج خفيف .....
ولبست اكسسوارات الزي الكردي ورحنا ويه ماما وخنده نفس ملابس ونفس اللون ...
كعدت شفت رزكار يدور مدري على منو لحد مالاحظني بعد منزل عيونه مني ..ماهتميت إذا هو محترم خطيبته اني شكو ....ماكمت من مكاني وهمه ماسوو احتفال وركص لخاطر سيروان عمه مااجت بس البنات اجو كعدو يمي كالت ليندا
_ هسه لو سيروان عايش جنتو راح تعرسون....
ابتسمت ودمعت وآني اتذكره...تذكرت خطوبتنا ذب طن لحم يركص ويصيح مامصدك صرتي الي...
رجعت للبيت ...عمة حجت وياي وقنعتني اقبل بشاهين وانسى سيروان لان وصيته اكمل حياتي ...وتشكرتني لان ماكسرت بكلب ابنها لحد مامات مابينت آني ما أحبه
انطيت موافقتي ... بس شواختفو ...شاهين ولايخابرني ..ولاعمو ...حاجيت عمو عبدالله بدون لاابينله ....
_ ها عمو ...
_ شونكم عمو ...الجهال وداده...
_ بخير كلبي يسلمون عليج وهياته عمج عبده هم يسلم عليج..
وسئلت على عمامي
_ كلهم بخير بس عمج هادي واكع بالفراش
خفت عليه بلغت فهد
_ كال عيب باجر نروحله وبابا كال أنا هم أحب عيب منه راح تصير نسايب
دخلت وسلمت عمه باوعتلي ودمعت ..حضنتها كتلها
_ راح يكوم بسلامة عمه لاتخافين ابتسمتلها وانصدمت بوجود سرى ...باوعت لرنا وتخرب بعيونها مني كان أكيد لان عمها ...خلت ايدها على بطنها عمه بطني وجعتني حفيدج طيح حظي أروح اتمدد ..باوعت لعمه
_ شنو هالكلام عمه...
نزلت راسها
_ هاي سبب وكعة عمج يمه
_ مافهمت لان سرى حامل ..
هزت براسها اي
فتت عالديوان ماهتميت بالموجودين همزين ماكو غريب باوعت لشاهين
_ ليمتى ردت تضم عليه
كامو فهد وبابا واجوني
_ شكو بابا
تقربت منه وصحت
_ جاووبني يمتى جنت ناوي تكولي رديت سرى وهي حامل..
حجه عمو فلاح
_ قابل يذب بزرته لخاطرج..
صحت بي جاااوب
باوعلي وحجه ببرود
_ هذا الموجود آني طلكتها بس القدر جان إله راي ثاني ...وماجنت حضم عليج بس ابويه وكع بالفراش ...همزين اجيتي وعرفتي وراح اخيرج بين ننفصل وبين توافقين تكونين زوجة ثانية بالنهاية هذا شي مو غريب عليج أمج جانت زوجة ثانيه لو ضاربني طلقه ولاهالكلام ...نزلت دمعتي تقدم فهد ضربه بوكس عمامي وولده صارو بينهم بابا لزمني باوعتله مامصدكة وكعت بحضنه بس أسمع صوتهم مااكدر لااجاوب ولاافتح عيوني...
""٫٫٫٫٫""""""“"
فهد
الدكتورة كتبتلها علاج .....ومن ضمنها علاج للاكتئاب ..كالت من تغلط بين لها زعلت بدون ماتكوولها حتى لاتكره الشخص المقابل ولاتسكت حتى ماتتمادى بتصرفاتها...
كعدنا عالعشاء لان آني ماارجع عالغده
شفتها لازمه ايدي قوي وماتريد تهدني ...خنده اجت لحظني عمرها 10سنوات وسالم آخر العنقود8سنوات
احنا بالبيت نحجي كردي لخاطر ابويه والأطفال لان ميفتهمون عربي...خنده تحجي وتباوع لفرح تسألني هي ليش هنا
_ هاي مرت اخوج حسيت بفرح تضغط على ايدي شفتها تخزر بخنده الخافت من نظراتها ضمت وجهها بصدري....ابويه حس صاح لخنده راحتله ركض ...كعدت بحضنه...باوعتله ماحجيت بس بينتلها انزعجت من تصرفها ..اشرتلها اكلي ..عافت ايدي صارت تاكل وتباوعلي هملتها ....أكلت شويه وترخصت راحت اخذت نفس وزفرته بتعب...ابويه وآني اشرولي الحكها مقبلت ....أريد تحس تصرفها غلط ...ضليت آكل وبالي يمها مااعرف من فترة واخذتها لخاطر ابوها...احس بروحي صرت ابوها ...
خنده راحت شويه وسمعت ضحكاتها.. رحت شفتها كاعدة يم فرح وهي ادغدغ بيها..ابتسمت رفعت راسها شافتني ...كلت لخنده تطلع ...رحت كعدت يمها زحفت وخلت راسها على رجلي كالت بدموع
_ من يزعجك تصرفي كولي بس لاتزعل وتقاطعني ...امسح على حجابها
_ بشرط ...كعدت كبالي
_ موافقة ...
ابتسمت غير تسمعين ...
_ مو مهم المهم متزعل مني
جريت خشمها على كيف
_ أريد تجين نروح للسوك لاواني اجيبلج ملابس حلوة على ذوقي
_ حجت بزعل يعني أنا موحلوة ملابسي
ابتسمت
_ أكيد لا طالعة قمر فروحة بس بعدج صغيرة اريدج تعيشين حياتج وتقتنعين بالشي اللابسته مو لابستيها لان خايفة ومدري شنو
_ تمام ..بس جيبلي على ذوقك
_ زين اجيبلج جبب لو بناطيل لو تنانير
_ لا لا مااحب البنطلون...جيبلي فساتين لو جبب
_ براحتج كلبي .. يلا تعاي ننام
_ بعد وكت
_ ليش تردين تشوفين شي ...هزت براسها اي
_ البارحة شفت براء تباوع مسلسل تركي مدري حبيت اشوفها بس استحيت
_ باعي كلبي هذا هم بيتج..وبراء اختج وآمي أمج لاتستحين منهم كلبي تمام
_ اي ...
_ هسه شجان اسم المسلسل رفعت جتفها دلالة متعرف
_ صحت براء بعد مانتجيت بظهري على تاج الجربايه وهي كاعدة بصفي نفس كعدتي
_ اندك الباب... فوتي بروئة
_ البارحة متابعة يامسلسل ...
ابتسمت وهي تباوع لفرح
_ و الله شو عجبني ارجع اتابع مسلسل أسمر
_ ها قصدج أسمر وغزل مو
_ اي حبيبي
_ تمام ادعبلي ...
غمتنا وطلعت
_ حيل تحبها ..
_ منو
_ براء
_ اي غير اختي ..ولان قريبة من عمري ...هسه شنو روحي جيبيلنا شامية وتعالي اسولفلج المسلسل ...راحت بحماس ...راح ينفجر رأسي بس مااريد أكسر بخاطرها...
بمرور الايام حسيتها تقبلت امي وبراء وخنده وحتى سالم ...
واجا الكسر لاختي للمرة الثانية..
منتظر كدام باب الطوارئ ...وعمامي عبدالله وعبد الرحمن وياي ...ابويه واكف يم الباب والدمع بعينه....شاهر ورضوان واكفين وخجلانين من تصرف شاهين....
ماحجيت وياهم كلمة. ....طلع الدكتور .....
_ ها دكتور ....
_ و الله ماادري شكول ....جان عدها انهيار عصبي وضغطها جان حيل عالي ..وغير كلبها الدكاته جانت موطبيعه زين ماصارت بيها جلطة...هسه انطيناها مهدء وعلكنالها مغذي ياريت تهتمون بحالتها ...حتى مايتكرر الصار سلامتها...
راح بس كلبي نار على اختي ....ردت أروح واكسره وكفو عمامي كدامي ...
_ اررجع فهد براء محتاجتك وعوف شاهين الناقص...باوعت لرضوان وخزرته اخذ نفس ودار وجهه...
رحت كعدت يم ابويه ...طلعوها كنت لحيلي ودوها للقاوش ...اخذتها لقسم الخاص حتى أكدر افوت أنا وابوي
دخلنا كلنا ... كعد ابوي ولزم ايدها
_ هيج بروئه تخوفين ابوج ...كلبي راد يوكف باباتي
حجه بالكردي عمامي ميفهمون كلامه
كان الحياه باوع لعمامي
_ يعرفون يعني شنو وحده بهيج عمر يصير بيها انهيار ولاسمح الله شويه ويصير بيها جلطة ..ياريتها مادورت عليكم ولاعاشرتكم .ماجبتولها غير القهر والغدروالدمار...
حجه عمي عبدالله
_ استغفر ربك خوية ...هذا امر الله...
استغفر ابويه...ماتحملت أنا كلت لعمامي
_ كولو لذلك الناقص ..مراح اعوفه راح اكسره نفس ماكسرها...
_ سكتو...كعدت يم رجليها افركلها من فوك الشرشف...دك موبايل ابويه تغير ملامحه...عرفت امي الداكه
طلع بره يجاوبها حجه عبدالله
_ بالله شراح يكول علينا هالرجال يوم اخوها غادرها يوم ابن عمها...
-وانتو شكو بافعال هالناقصين...
بالليل شفت ابويه غافي عالكرسي...طلعت شفت شاهين واكف يسولف ويه شاهر وعبدالرحمن ..اجيت و الله جابك ..رحت جربته من ياخته...مادافع عن نفسه...
لحد الحديقة الخلفية مابيها احد..ضربت بوكس وكع بالكاع ضليت ادفر بي مادافع ...صحت بي
_ كوم دافع لروحك ياناقصص...كوووم
لزموني عمي وشاهر
_ كاافي فهد شهرتنا ...
_ تفلت عليه...دير بالك أشوفك قريب منها...شفت عيونه بي خوف...راح اتخبل ليش لعد كسرها كدام الكل ..
ثاني يوم طلعنا ماقبلت الا نرجع للبيت...
امي استقبلتنا والعيون حمر...براء بس ساكته ..
_ ماما فوتي الحمام اسبحي حترتاحين..
كامت بدون كلام....
مامصدكة الشفته والسمعته...و الله الشفته اهون من الكلام الكاله...كعدت جوه الدوش بملابسي.. ماادري شكد مر...أسمع الدك والصياح عالباب مااكدر احجي شي...رفعت رأسي للسك...ويه كسر الباب...ركضولي كلهم ..ماما طلعتهم سدت الماي وجبات الخاولي تنشفلي وجابتلي ملابس...تجرني وآني مثل اللعبة بايدهم...كعدت عالفراش الكل يباوعولي بحزن وشفقة نزلت دمعتي وحجيت
_ بنظركم آني غبية مو؟..
اجاني فهد
_ لا أكيد...اششش لاتحجين شي بس نامي...غمضت عيوني أريد أنام....
بعد مرور عدة أشهر
براء
بابا لكالي وظيفة بشركة اهليه...حتى يطلعني من حالتي النفسية... فرح الحمدلله تحسنت
عمو هادي خابرني اليوم يعتب لان طول هالاشهر المرت مازرناه....حجيت لفهد كال
_ كلامهم صح ...واعتقد خلاص تكدرين تسيطرين على روحج... وتكونين قوية وتثبتين لكل الغدروج انتي بنت ضياء واخت فهد ....
هزيت براسي اي ....
جهزنا ملابس ليومين...آني وفرح وفهد ماما ماراضية لروحتنا بس عافتنا براحتنا ماضغطت علينا . ..
وصلنا العصر عمو استقبلنا وبعيونه يعتذرلي ماحبيت احسسه بالذنب حضنته وهمستله
_ أنسى عمو الله يوفقه ويسعده ويدزلي العوض
_ امين بنيتي...فتت حوه سلمت على عمة وبيبي ...اجت رنا وخواتها البقية سلمت عليهم ...طلعت سرى وبايدها طفل رنا كالت حانبت ولد عمره حاليا 3شهور
باوعتلي واجتني
_ نورتي بروئه...هيج كاطعتينا وحتى مااجيتي تباركيلنا على هادي ..اصر شاهين نسميه هادي وأنا ماكدرت أكسر كلامه
ابتسمت لها
_ يتربى بعزكم كلبي حيل فرحت بس لان ماعندي مجال من ورا دوامي ماكدرت أجي هسه صارلي فرصة....
باوعتلي باستهزاء وراحت
كعدنا آني وفرح سوالف ويه البنات فات شاهر ابتسم من شافني
_ عاش من شافج يااميرة
_ تعيش ابن العم ..شونك شونها الام
_ ابتسم راح اخطبها نهاية الشهر
_ فرحتلك ربي يتمملك على خير على كلامي فات شاهين كتله ..بس كون كد كلمتك ولاتتراطع وتغدر وتطلع ناقص باوعلي خزرني ماهتميت باوعتله باستصغار...باوعلي أشهر بعتب وراح ...البنات ماحجو شي بس فرح فرحت بكلامي وغمزتلي .. ابتسمت على حركاتها الحمدلله تحسنت بس بعده مامتقدمين خطوه بزواجهم وعلاقتهم....وبعدها تراجع عند الدكتورة ...بس صايره تتقبل المقابل وتسولف وماتخاف من المقابل ومتحسنه علاقتها ويه شاد واياد....صايرين صحبه
كعدنا عالعشا.. طلعت سرى والطفل بايدها الزمه شاهين تعبت منها ..جمد ايدي من شفته آخذها منه ويباوعله وكأنو أعظم انتصاراته ...حسيت بشخص دغني شفتها فرح اشرتلي اهمله. ...عيوني راحت على سرى المبتسمة وتباوعلي وكأنما تكولي كتلج هو الي ...كملت اكلي وكل خاشوكة احسها نار وتفوت لمعدتي ...
ثاني يوم عمو عبدالله وعبدالرحمن وعائلاتهم اصرو نطلع وياهم آني وفهد وفرح .طلعة عائلية ورنا ورضوان واطفالهم هم اجو
بالبارك انصدمنا بوجود أدهم ووياه شاب بعمره.. طول مايسلم على عمامي مبين يعرفونه ماشال عيونه من عليه...ماهتميتله كنت ويه فرح ومرت عمو عبد الرحمن فتنا عالحمامات ....آخر وحدة طلعت شفته واكف ومنتجي على فد عمود وصافن عليه...رفعتله حاجبي ...مرينا من يمه ...
_ جميلتي....
ماهتميت عوجت حلكي وتصادمت ويه أحدهم. .رفعتله رأسي ...ابتسمت باستهزاء
_ أكيد فرحان بالمريت بي مو؟؟
باوعلي بجمود ومارد وعافني...
باوعت لظهره يمشي وكف قبل لايوصل لصاحبه اندارلي باوعلي بحزن ماادري شحجى بس شفته تحركت بدون صوت
شكرا لزيارتكم عالم روايات سكيرهوم
