رواية بنت الكهوجي ( كاملة جميع الفصول ) بقلم احمد

 

1- القصة راح تكون باللهجة العامية لان عندي متابعين ما يفهمون لهجة اهل الغربية او الوسط 

2- التنزيل راح يكون حسب فراغي من الشغل بس إن شاء الله ما يتأخر هواي البارت 

3- راح يكون اكو تغيير ببعض اسماء المناطق حفاظا لخصوصية اصحاب القصة 

استمتعوا........ 

بسم الله الرحمن الرحيم 

وياكم ياقوت من بغداد خلي اخذكم بجولة عن حياتي قبل بداية القصة علمود تتعرفون علي 

انولدت عالدنيا لاب وام مقطوعين من شجرة ما الي لا عمام ولا خوال لان ابوي جان الوحيد لجدي وجانو من عائلة فقيرة 

بعد ما توفو جدي وجدتي بحادث سيارة بقى بابا عايش لحالو واشتغل عند جدي ابو ماما باسواق جان جدي مأجرها 

بقى وياه فترة الى ان صار حريق بيها وحاولو يطفوها بس ما گدرو ومن حرگة گلب جدي دخل للمحل علمود يحاول يطفي النار 

بس لسوء الحظ وگع عليه رف وبقى يومين بالمستشفى بعدها توفى وجان اخر كلامو هو انو رزان (ماما) امانة عندك يا ادم (بابا) 

بذاك الوقت جانت ماما الوحيدة لجدي وجدتي المتوفية من قبل وشاء القدر انو ينجمعون هي وبابا بعد وفاة جدي ويتزوجون 

بس للاسف صاحب العمارة الي جان مأجرها جدي قرر يبيعها والي اشتراها ما قبل يأجرها لبابا وبنفس الوقت تحتاج هواي ترميم 

ولان بابا ما عندو راس مال قوي اعتمد على الاعمال الحرة وجانت ماما قنوعة ومساندة الو بكل ضرف مر على بابا 

بعد زواجهم نشأت بينهم علاقة حب قوية بكل ما تعنيه الكلمة من معنى وصارلهم اول طفل والي هو اخوي الجبير باسم بس جان من مصابين بملازمة داون او مثل ما جانو يسموه اهل المنطقة (منغولي) 

بعدها اضطرت ماما انو تاخذ علاج علمود اصيرلهم اني بشكل طبيعي ومن فتحت عيني عالدنيا جان باسم روحي من الدنيا وبالنسبة لاسم ياقوت جان اختيار ماما مثل ما اختارت اسم باسم 

سبب اختيار اسم باسم هو انو اخوي مصاب بمتلازمة داون وذول الاشخاص يكونون قلوبهم كلش طيبة والضحكة ما تفارق وجوههم لذلك جان اسم باسم متطابق وياه كلش 

واني سمتني ياقوت نسبة لجمالي اول ما اجيت للدنيا وبابا جان كلش معجب باختيار ماما للاسماء لان ذوقها كلش حلو 

تربيت بوسط عائلة مليئة بالحب والحنان وجان باسم احن مخلوق علي بحيث يتخبل اذا يشوفني ابجي او ضايجة ويبقى وياي الى ان اضحك ولهذا السبب صرت اموت عليه 

وبسبب حالتو المرضية بابا وماما سجلوه بالمدرسة لمدة يومين وبطلوه لان الاطفال جانو يأذوه ويضحكون عليه ويرجع للبيت يبقى يبجي لحد ما ينام 

شگد جنت احاول اراضيه بس خطية يرجع مكسور خاطرو وحتى غدا ما يتغدى ويتمدد بالفراش ويبقى يبجي الى ان تاخذو النومة ويگعد ناسي كلشي ويرجع يلعب ويضحك 

وبقى على هالحالة الى ان كبرت اني وصرت بالاول ابتدائي وگمت كل ما اروح للمدرسة يبقى گاعد بالحوش الى ان ارجع واول ما يشوفني يضحكلي ويفرح برجعتي 

مرة من المرات بابا اجى من الشغل من وقت ومرني للمدرسة ومن طلعت اخذني وياه واني طايرة من الفرح لان بابا اجى اخذني 

جنا دا نمشي وبابا يسولف وياي ويضحك ويضحكني وياه شو فجأة سكت ما اعرف شنو السبب كأنو صار شي وياه شوية ورجع طبيعي 

اني لان طفلة ما ركزت بالموضوع ومر اليوم طبيعي والمغرب اجى من السوگ جايبلي وياه حجاب ابيض وكلش فرحت بيه ورحت لبستو ورجعت 

قبل ما اوصلو هو وماما سمعتو يگوللها البنت حلوة واليوم شباب واحدهم بگد المطي سمعتهم يحجون عنها بس لان ماعندي دليل ما گدرت اسوي شي 

گالتلو هي لا تسوي كلشي ذول ماعدهم اخلاق اذا حتى طفلة ما تسلم من لسانهم حتى الحيوانات احسن منهم 

گاللها احنا نسوي الي علينا ونلبسها حجاب 

گالتلو هيج افضل لعد 

دخلت عليهم ومن شافوه گالو كلش حلو عليج طبعا بوقتها موضوع الشباب الي حجو هيج ما انطيتو ذيج الاهمية واصلا نسيتو من ثاني يوم 

بس بمرور الوقت تعودت عالحجاب بالمدرسة ومن ارجع انزعو واگضي يومي ويا باسم وبقى الوضع هادئ سنين طويلة بس كل ما اكبر يزيد جمالي (هذا حجي الي يشوفوني) 

جاراتنا دائما يگولن لامي اقري عليها قران والي ايمانهن ضعيف يگوللها سويلها حجاب او لبسيها فد شي يمنع العين عنها 

ماما جانت تقتنع بحجيهن ودائما تقرا قران علي بس ما تأمن بالحجاب وهاي الخرافات وتگول افضل شي القران لان كلام رب العالمين 

خلوني هسا اوصفلكم شكلي علمود تتخيلوني 

طولي 160 وزني 50 عيوني ملونات بيهن اكثر من لون العدسة مالت العين مرة تصير خضرة مرة زرقة مرة بيها صفار يعني حسب الاضاءة يتغير اللون 

شعري اسود وعندي غمازات وبشرتي حنطية وملامحي ناعمة كلش وعيوني من نوع الي كبار عكس ملامح وجهي البقية 

باول متوسط لبست النقاب الى درجة ان حتى عيوني جنت اغطيهن ورغم حر الجو ببداية الدوام ونهايتو بس جنت انفذ كلام بابا وماما بدون اي كلام زايد 

جانت اصعب لحظات حياتي ذيج من اگعد الصبح بالاخص ايام الاحد اول ما اگعد اصفن بيني وبين نفسي واگول يوووووه باقي شگد للخميس 

واحلى لحظات حياتي من ارجع الخميس بالاخص من يتلگاني باسم حبيب روحي وابقى وياه للسبت بالليل نگضيها لعب وضحك 

..............

تميم : السلام عليكم 

الحجية : كملت الصفحة الي بالقران .. هلا يمة عليكم السلام 

- شلونج يالغالية 

- الحمدلله وليدي انت شلونك 

- الحمدلله 

- ها شلون دوامك 

- ماكو جديد 

اية : ها تميم شلونك 

- هلا بيج 

- تتغدون 

- اي بس خليني ابدل وانزل 

- تمام 

خلال الغدا 

الحجية : خابرك عمك 

تميم : لا يمة بعد بس مصيرو يخابر 

- اني هم گلت لامها اذا مو مقتنعة تنطينا خبر خاف عمك يستحي منك ويحاول يجبرها 

- عاشت ايدج يمة هو هذا المطلوب 

- راح تروحون للگعدة الي بالسماوة 

- اي يمة باجر بأذن الله نتوكل 

- والله يا يمة لو تتعذر الناس وما تروح لان لا عاداتنا مثل عاداتهم ولا فصولنا مثل فصولهم 

- ما يصير يمة عيب بحقي اتعذرهم وثانيا هم طالبيني احكم بينهم واني من الانبار صحيح بس ماكو فرق بينا وبينهم وكلامي ما يتطبق الا يقتنعون بيه الطرفين 

- الله يوفقك يمة 

زيد : دخل مستعجل .. تميم 

تميم : ها شبيك 

- الگهوجي 

- شبيه 

- انطاك عمرو جان بالمضيف مابيه شي وفجأة وگع بمكانو 

گمزت من مكاني مثل المخبل وطلعنا ركض وصلنا المضيف حطيت ايدي على رگبتو ماكو نبض حاولت اسويلو انعاش وما فاد 

اجو الاسعاف واقرو وفاتو وماجان اكو اي فايدة من الانعاش خلص عمرو وانطينا خبر لاهلو وبلشنا بأجرائات الدفنة والعزا لان لازم احنا نسويلو عزا 

وبالليل خابرت الشيخ فاضل انطيتو خبر انو ماگدر احضر الفصل وگال راح نأجلو لحد ما يصير بيدك مجال واخذتلي اجازة من دوامي هم ........... 

ياقوت : حياتي بقت هادئة الى ان وصلت الخامس متوسط صارت ماما اغلب وقتها مريضة ومگضيتها علاجات ونوم وگوة تگدر تتحرك 

شگد طلبت منها ابطل وابقى اطبخ واشتغل بالبيت بس هي وبابا رفضو رفض قاطع انو ابطل وگالتلي خلصي السنة واشتغلي بالعطلة 

جانت تگعدني الصبح لان المنبه بغرفتها هي وبابا واگعد اجهز نفسي واروح ومن ارجع تكون هي مسوية الغدا ومن اوصل تگعد وما اخليها تشتغل كلشي 

باسم حبيبي جان يضوج لان ماگدر العب وياه مثل قبل وكلش انقهر عليه بس مابيدي شي اسويه لذلك اضغط على نفسي واحاول ما ابينلو اني ضايجة 

رزان : يلا ياقوت گومي 

ياقوت : يلا ماما گايمة 

- يلا بنيتي لا تتأخرين على مدرستج 

- بابا طلع للشغل 

- هسا يطلع محتاجة شي 

- لا ماما بس هيج اسأل 

- هسا يطلع يلا گومي كملي انتي هم 

- يلا ماما هسا اكمل 

- عود اخذذذذذذذ......... وفقدت الوعي 

- مامااااااااااااااا 

من شفتها وگعت وجهي صار اصفر من الخوف وصرخت بكل صوتي من خوفي عليها وعلى صوتي فز باسم وصار يصيح من الخوف 

اجى بابا يركض ومن شافها فاقدة شالها بايدو واخذها يريد يلگي تكسي ياخذها للمستشفى واني اركض وراه وابجي 

من وصلنا عند باب الحوش گالي ارجعي لاخوج وطلع واني من الخوف عليها گعدت بالگاع وحطيت ايديني على عيوني وانفجرت بالبجي 

شوية وسمعت صوت باسم يردد يوت يوت (يعني ياقوت بس اسمي ثگيل على لسانو) رحت ركض عليه جان بالغرفة ومفحط من البجي 

حضنتو وحطيت راسو بحضني وبقى هيج الى ان هدئ بس لزمتو الشهگة واخذتو گعدتو بالحوش عالشمس ورحت اسويلو ريوگ 

صحيح وضعنا وخوفنا على ماما ما يخلينا نشتهي شي بس هو خطية ما يعرف هالاشياء وحرام اعوفو جوعان وما اسويلو اكل 

حطيتلو الاكل گدامو وبقيت انتظر على نار وبقيت متوترة وامشي بالحوش رايحة راجعة وما اعرف شنو صار وياهم 

اخيرا وبعد طول انتظار رجعت للبيت من شفتهم ركضت على ماما وسندتها ويا بابا وما جنت منتبهة للباب انو شايفني منو صاحب التكسي 

راح بابا انطاه الكروة واني دخلت ماما للغرفة وخليتها تتمدد واجى بابا گال سويلها ريوگ گلتلو من عيوني قبل ما اطلع صاحني 

ادم : ياقوت 

ياقوت : ها بابا 

- مرة ثانية انتبهي لباب الحوش 

- باستغراب .. شبيه 

- جنت مبينة منو وصاحب التكسي وراج مباشرة 

- بصدمة .. گول والله 

- المهم انتبهي مرة ثانية وروحي سوي ريوگ لامج 

- اسفة بابا والله مو قصدي 

- اعرف يا بوية لذلك دا اگولج مرة ثانية انتبهي 

- صار بابا اوعدك انتبه 

رحت للمطبخ واني خجلانة كلش من بابا لان حطيتو بموقف مو حلو گدام الرجال بس والله بدون قصد وهو شبيه يباوع عيب عليه وحرام هاي اعراض ناس صدگ ما يستحي ولا يخاف من الله 

كملت الريوگ هالسريع واخذتو للغرفة وحطيتو قريب من ماما وگعدنا يمها حتى باسم اجى گعد يمنا علمود يتريك 

ياقوت : باسم 

باسم : باوع علي 

- انت مو تريگت ليش گعدت ويانا 

- ضحك لان ماعندو جواب 

- ههههههههه ابو كرش 

صرت اتشاقة وياه وهو يضحك وماما وبابا يضحكون على ضحكتنا وبعدها عفتو علمود يتريگ واني هم اتريگ وياه 

بابا جان ياكل لگمة وينطي ماما لگمة وطلبت منو هي تاكل علمود يخلص بسرعة ويروح لشغلو وما وافق وبقى يوكلها الى ان شبعت 

من خلصنا ريوگ اخذت المواعين غسلتهن وبابا طلع ماعرف وين وجنت ضايجة ماعندي شي اسويه ومارحت للمدرسة 

رجعت لغرفة ماما وبابا جانت نايمة وتمددت بحضنها ومن حست بوجودي سحبتني عليها وشوية واجى باسم تمدد ويانا وصرت اني بالنص 

اخذتنا النومة ثلاثتنا وما حسيت الا الساعة صايرة 12 فتحت عيوني جان بابا واگف بباب الغرفة ويباوعلنا بابتسامة گال يلا گومي صلي 

ياقوت : مديتلو ايدي بابتسامة 

ادم : گعد ومد ايدو مسك كف ايدي .. شو ماكو غدا اليوم 

- استراحة 

- هههههههههه ومنو قرر هالقرار 

- مدري 

- وامج المسكينة تبقى هيج بدون لا اكل ولا علاج 

- فلا ينگدرلك تعرف شلون تسوي نفسك الصح 

- لان اني الصح يلا بنيتي گومي صلي وسويلنا فد شي ناكلو عالسريع 

- تمام يا روح بنيتك 

عصر خدي على كيفو وگمت رحت اصلي وهو گعد باسم وماما بعد ما صليت سويت بيض سلگ وبطبطة سلگ وگطعت وياهن طماطة 

صحيح ما يعتبر غدا بس قررت اسوي اي شي وبالليل اطبخلهم فد شي بدال الغدا وبالليل گعدت وياهم بعد ما خلصت عشى وغسلت المواعين 

ياقوت : بابا ترا بعد ما بيها مجال 

ادم : باستغراب .. ها بوية شكو 

- اريد اعوف المدرسة لا قدر الله لو ماما متخربطة واني بالمدرسة شحالها هي وباسم 

- بوية احنا مو اتفقنا انو تكملين هالسنة وبعدها نشوف 

- بابا انت دا تشوف الوضع بنفسك 

رزان : ياقوت سالفة تعوفين الدراسة ما اريد اسمعها لان مستحيل اوافق عليها 

- ماما الله يخليج هي هالسنة هاي 

- لعد كملي هالسنة شلون ما كان 

ادم : خلص ياقوت منا ورايح من اگعد عالشغل اگعدج ونطلع سوا وامج تبقى نايمة علمود ما تتعب 

- بانزعاج .. مو مقتنعة 

ادم : باوعي بنيتي خلي اشرحلج ليش مهتمين لدراستج وانتي قرري حجينا صح لو لا 

- تمام اشرحلي 

- انتي تشوفين اخوج شلون وضعيتو مايگدر يدبر نفسو وامج مريضة واني صرت جبير بالعمر وماعندج لا اخ ولا اخت غير باسم 

والموت حق علينا كلنا فما نريد اني وامج لا قدر الله نموت وانتو هيج حالكم يا بوية وقتها تضيعون ثنينكم والدنيا ما ترحمكم 

اذا كملتي دراستج ممكن الله يرزقج بوضيفة تعيشين نفسج واخوج بيها بس بدون وضيفة راح تتورطين بنفسج وبيه 

- بزعل .. بابا ليش تحجي عالموت وتزعلني 

- مسك وجهي بايديه .. بنيتي الموت حق علينا كلنا وكل واحد الو يوم يموت بيه وما يعلم بهاليوم بس ربنا عز وجل والكلام عنو لا يقدمو ولا يأخرو بس گليلي اهتمامنا اني وامج صح لو غلط 

- صحيح 

- يلا لعد روحي نامي علمود اگعدج باجر 

- تمام تصبحون على خير 

- وانتي بالف خير 

رحت للفراش وانا زعلانة لان مابيدي شي اسويه غير انو اوافق على كلامهم لان كلامهم صدگ ومن ذاك اليوم صرت اگعد ويا بابا عالدوام 

ومن ارجع الگي ماما مسوية الغدا وشگد اتعارك وياها لان تتعب نفسها بس ما يفيد بيها وگضيتها معارك وياها لحد ما خلصت السنة 

جانت دائما تضحك على عصبيتي واني اكون منفعلة كلش وضايجة بس من اشوفها تضحك كأنو ماي بارد ينزل على گلبي وفورا اهدئ 

بعد ما استلمت نتيجتي وطلعت ناجحة بدرجات عالية طرت من الفرح واجيت على ماما ركض شوفتها نتيجتي وهي فرحت كلش 

ياقوت : من باجر اريدج ترتاحين وبعد ما تشتغلين شي 

رزان : هههههههه هاي هي صار استاذة ياقوت 

- عفية بالشطورة .. لعد وين ادومي 

- ابوج طلع للسوگ 

- صدگ ليش ماعندو شغل اليوم 

- عندو شغل بس اخذ اجازة تعبان كلش گوة يحرك جسمو 

- تمام 

كلش انقهرت على بابا من سمعت كلام ماما وتمنيت اني شاب واعينو بالشغل بس مابيدي شي وخطية باسم ماعليه عتب لان عقلو مو كامل 

من اجى بابا شوفتو نتيجتي وفرح فرحة مو طبيعية وجانت احلى لحظة بحياتي من باوعت لعيونو وشفت بيهن لمعة الفرح 

مر اليوم بفرح تارس البيت بسبب نجاحي بس جان الهدوء الي يسبق العاصفة لان اول ما گعدت ثاني يوم وطلعت من غرفتنا اني وباسم شفت بابا گدام غرفتهم 

جانت حالتو مبهذلة وكأنو سكران باوعلي بعيون حمر مثل الدم وقبل ما اسألو شبيه وشنو صاير وياه وگع بالگاع وفقد الوعي 

............