رواية اغفري لي كامله جميع الفصول بقلم أوتار حزينة
لا زلت أتساءل،،،، رغم السنين التي مرت،
هل أحببتني يوما؟
هل لامست روحي، أم كنت أنا وحدي أُحلق في وهم جميل؟
هل كنا روحا واحدة، أم كنت أعيش حلمًا لا يعرف اليقظة؟
كل شيءٍ كان يشبه الحكايات،
كل لحظة كانت تنبض بالحياة،
ثم تبخر،،،،،كما يتبخر الضباب مع أول
شعاع شمس
أبحث عنك بين الذكريات،
أفتش عن أثرك في تفاصيل قلبي،
لكن كل ما أراه الآن
هو أطياف من حب مضى…
وصدى سؤال لا يهدأ
هل كنت هنا حقا؟ أم كنت أضغاث أحلام؟
،،،،،،
وبدأت قصتنا بتاريخ 2025/519
قائد
فتحت عيوني بصعوبه وجع يدك براسي بقوه
نزلت رجلي بالكاع فركت وجهي
اريد اصحى كمت لحيلي رفعت ايدي
لفوك حتى احرك عضلاتي
انتبهت السما تذب
ثلج
مشيت للجامه وكفت يمها ،،مثل
كل سنه الثلج يغطي السطوح والشوارع
ويخلي المدينه تلبس ثوب
ابيض هالجو خلاني اسمع صوتها بأذني
«،،،،تعرف قائد اني احب الشتا واموت علي
واحب المطر والثلج مااعرف شلون البعض ماتحبه
وهو جو يخبل
غمضت عيوني ورغم الظلام الي جنت بي
بس شفت وجهها كدامي يضحك
اليه وايدها تحاول تلمس
وجهي
روحي اختنكت ردت اشم الهوه
فتحت الباب وطلعت بره وكفت جوه الثلج
ورفعت راسي للسما واني مغمض
ردت بروده الجوه تطفي ناري الي ماطفت ابدا
من صار الصار واني احس صار بداخلي
نار مشتعله كلت بصوت
مخنوك
«،،،حسبي الله عليج دمرتيني وخليتني اصير
انسان ثاني
درت وجهي للغرفه اذكر شلون جنت عنيف وقاسي وي البنيه الجبتها من
الملهى بسهره البارحه جنت اتعاملها وياها
واشوفها بيها
رجعت لجوه وكفت وصفنت عليها ،،،،بيضه والشعر اسود ليل والعيون لونها مقارب لعيونها
تشبه الي احتلت روحي
واخذت گلبي من زمان بس البرائه منزوعه
منها
شفت جهاز يدك جان صامت رحت اخذته
صديقي حسين يتصل
«،،،،الو
«،،،،ووولك ووينك انت مااتجي عااد مو الشغل
واااكف من وره حظرة جنابك الكسيف
«،،،جاي شكو لتصيح
«،،،ووينك اانت بالطريق لو بالبيت
«،،،بالبيت
«،،،خرررب بيك وخرب صفحه اهلك ولك شلون وياااك اظل اني امشي والزك وراك وولك فض روحك بسرعه وتعال تره الشغله مليوصه والحجي
كل ساع يسأل عليك وشكله
صاير بارود
«،،،طالع،،،روح عاد شكد لغيت
«،،،من طلعت روحك كول امين
«،،،،امين
سديت الخط اخذت هدوم وطبيت
للحمام سبحت من طلعت البنيه كاعده
ومبدله ابتسمت من شافتني
وكالت بالالماني
«،،،صباح الخير
رديت واني البس بالستره
«،،،لقد تاخرت عن عملي يجب ان اذهب الان
«،،«اوه انا ايضا يجب ان اذهب ولكن تعرف ماااريد
عرفتها شتريد حالها حال غيرها رحت طلعت محفظتي من الجراره طلعت مبلغ زين
مديت ايدي وكلت
«،،،تفضلي
اخذته مني وهي فرحانه حجت بابتسامه
«،،،هل تريد ان نلتقي مره ثانيه
رديت بدون اهتمام
«،،،دعيها للظروف
هزت راسها وجاوبت
«،،،اوكي يجب ان اذهب الان
من تقدمت عليه ماتحركت خلت ايدها على صدري
وكالت باعجاب
«،،،اريدك ان تعرف اني قد اعجبت بك جدا واتمنى
ان نلتقي اكثر
ماجاوبت جهازها دك التهت بي اشرت اليه باي
وطلعت من يمي ،،، مشيت لبره شغلت سيارتي
صعدت وحركت لان تاخرت
كلش على شغلي
وكفت يم الاشاره الضوئيه من صارت حمرة لفت انتباهي ولد وبنيه بعمر المراهقه عبرو وهم يضحكون من صارو بالجهه الثانيه وكفت تفرك بجتفها هو من شافها بردانه ذب سترته وخلاه على جتف يحميها من البرد والثلج
هالمشهد خلاني
أذكر ذاك اليوم،،،، چنت ناسي الجاكيت وفجأه
بردت وهي من شافتني بردان لفت شالها
الصوف على رگبتي وكالت بضحك
«،،خاف تموت من البرد،،،،،، وأني بعدني
ما مليت من حچيك
ونيت بصوت مخنوك واني اشوف صورتها بجامه
السياره
«،،،،،وومليتي مني ليلى وبعتيني برخص ليش يولي
ليش جازيتي حبي الج بالغدر والخيانه
الشفته مر جدام عيوني مثل كل يوم
حسيت مراره صارت بحلكي وراسي ثكل
لزمت ستيرن السياره بقوه وجسمي كام ينتفض من الغضب والقهر الي،،، خلوه بيه ورغم السنين المرت عليه ماكدرت انسى لحظه الغدر الشفتها بعيوني
صوت الهورن طلعني من افكاري السوده حركت
والذكريات ماعافتني ظلت وياي تعذب
بي وتخليني اسال بيها وبروحي
«،،،،بشنو قصرت وياج حبيتج حب ماحبه بشر
لبشر ولج وكفت بوجهه الكل حتى اخذج عاركت
اهلي وصوتي طلع عليهم وكرهتهم من وراج لان جانو يحجون عليج جنت اشتغل ليل ونهار
حتى اسويلج الشي الي يرفع
راسج بين الناس
جنت اكول قائد هاي بنت عز ومدلله ابوها وامها
لاتقصر وياها بشي سويلها احسن عرس
وجيبلها اغلى الذهب واحسن
سياگ لان هاي حبيبه گلبك واميره
روحك
بس ااخ ولج طلعتي ماتستاهلين هذا كله طلعتي
وحده جذابه تلعبين على الحبلين
وحده ساقطه كلبج دكان وخالتني
احتياط
جهازي دك وطلعني من افكاري فتحت الاتصال
جاوبت
«،،،وصلت
«،،،يرادلك هلهوله
«،،، هلهل من اطب
جاوبته بضوجه رد
«،،،هاا يابه عبالك كابات عندك
مارديت وكفت سيارتي بالكراج مال المصنع
وكلت
«،،،جااي حضرلي قهوه ساده
«،،،،اي مو اني اشتغل عندك من خفت هالخلقه بس
يله راح اجيبلك واكسب بيك ثواب لان اعرف
شنو البيك
سديت الخط خليت الباج مالتي برگبتي وصلت للاستعلامات اريد اخلي كارتي بالجهاز يقره مرفوض لان تاخرت الموظف جان عنده علم وخلاني اطب رحت گبل للقسم الي واكفه بي المكينه صايره هوسه يمها والحجي
شخصيا واكف يمهم من شافني عكد حواجبه بس ماحجه شي بس اشرلي الها هزيت راسي
باي سوالي مجال فحصتها حسين اجه شايل الگهوه افتريت عليها واحد اسمه
يوناس كال
«،،،اعتقد انها قد اصبحت قديمه ويجب
تغيرها
رديت علي
«،،،،لا انها تستطيع ان تعمل عشر سنوات اخرى
ابتسم بأستهزء ورد
«،،،هذا اذا استطعت ان تشغلها الان
«،،،سوف تعمل انتظر وسترى
نزلت لجوة وتمددت بالكاع عرفت الخلل بس ماحجيت شي اشتغلت بصمت ماطولت بايدي نص ساعه وصلحتها كمت اشرت للعامل يشغلها ومن اول طكه اشتغلت الحجي ابتسم
وكال
«،،،عاشت ايدك بس
سكت وبعدين اشر بايده عليه وكمل
«،،،،بس هالشي ماراح يشفع تاخرك على الدوام
«،،،،بعد مايسويها
حسين جاوبه كملت
«،،،،،،اسف استاذ ان شاء الله بعد ماتكرر
اشرلي امشي وياي اني وحسين مشينا ويا الشغل
رجع لوضعه كال
«،،،،قائد انت جاي تشوف اني شلون اتعامل وياك
انت وابن اخويه يعني الكل كاعد يشوف
معاملتي الكم خاصه وهالشي تره كام
يسبب توتر بين العمال والموظفين لان انت تعرف
اهنا ماكو محسوبيه وخواطر للاقرباء والمدير لان
صديقي ويعرفني كاعد يسكت عن تأخيرك
وكف وركز بعيونه عليه وكمل من اشر
بخط مستقيم بايده
«،،،،هنا كلها تمشي سيده يعني عدل ماكو واحد احسن من واحد الا بعمله وتميزه بي
حسين جاوبه مبتسم
«،،،وقائد متميز بعمله واحسن من اكبر فني
بهذا المصنع
«،،،،،اعرف ابني هو احسن واحد يعرف بالمكاين
بس هذا مو معناه اتجاوز عن تاخيره
واسكت عنه
حسين سكت اني رديت
«،،،،،استاذ اعرف شتريد ادكول ووعد مني بعد
ماتاخر اني هم ماانسى السويته اليه ولا شلون وكفت وياي الما كدرت اوكف على رجلي
عم مهدي ابتسم ورد
«،،،،لاتحجي هيج ابني تره انت غلاتك بغلاه حسين
والسويته الك ماسويته لغريب انت ابنا وابن بلدي
والواحد بالغربه يشد ظهره باخوه
مو هيج الحجي لو لا
«،،،،،اي حجي
جاوبته كمل
«،،،،،هسه اترخص ارجع لمكتبي لان عفت شغلي
واجيت اشوف الوضع شلونه
من مشى من يمنا حسين كال
«،،،،،ولك نسيت الكهوه يم المكينة
«،،،بدلها هسه بردت
مشيت من يمه لحكني وكال بضوجه
«،،،،مو اني الخدامه مالتك من خفت هالخلقه
رحت لمكتبنا اني ويا كعدت ورثت جكاره شغلت الحاسبه اجه كعد اكبالي وسال
«،،،،،جنت سهران وي وحده مو
ماجاوبت كمل
«،،،،،انت تالي وياك صغير واعلمك تره الجاي تسوي حرام بحرام ولك مو جاي ااحجي وياك مااترد
رفعت عيوني من الشاشه وجاوبته من فكيت
دكم القميص
«،،،،حرام عليك لو عليه
صفن على ركبتي ورد
«،،،،اكلك انت مقتنع بالجاي تسوي
«،،،،اي مقتنع ومتونس وهاي رديت عليك ارتاح گلبك هسه
«،،،،لا والله لان اخويه وصاحبي طامس بالحرام
لهامته
سكتت هو كمل بجديه
«،،،،قائد بطل هالسوالف وحاول تنسى الصار بيك
ورثت جكاره اخذت نفس طويل وذبيته كمل
«،،،يول كافي اتعذب بروحك انسى وعيش حياتك
صح
ابتسمت بس ابتسامه باهته مال واحد تعبان
من الجاي يحس بي
«،،،،شلون انسى حسين كلي انت انطيني علاج شي
اسوي حتى اكدر اتجاوز الصار بيه
خمس سنين صارلي هنا وماكدرت انسى
الشفته
ذبيت حسره وكملت
اانت عبالك اني من جاي اسوي هيج مرتاح لا والله كلما اسوي هيج ثاني يوم اكره روحي ومااطيق اشوف نفسي بالمرايه من الكاعد اسوي بروحي
احلف ابطل شرب
ونسوان ومن يجيني الليل مااعرف شيصير بيه
اختنك واريد انهزم من هاي الافكار والذكريات
الي بس افتح عيوني تهجم عليه وتخليني اكره النهار وضوه الشمس
سكتت للحظه وبعدين كملت
«،،،،،تعرف شجنت اتمنى
«،،،شنو قائد
دحكت للجامه اشوف نفسي بلم جبير
الموج يلعب بينا والموت فاتح جناحه علينا وباي لحظه نروح بيها ونغرك بهل البحر الغميج
جاوبته
«،،،،جنت اتمنى اموت بالبحر مااوصل اليونان
دحكت اله وكملت
«،،،،جنت اتمنى اكدر اقتل روحي حتى اخلص من عذابي ومن القهر الي ترس گلبي بس ااااخ
سكتت نزلت راسي ردددت
«،،،بس جنت جبان وماكدرت اخطوه هاي الخطوه
«،،،،اسكت وكافي تحجي هالكلام
«،،،،،ولك حسين والله مو مرتاح وحگ هو الله جاي
اموت باليوم الف موته مرات اسأل روحي شلون مامتت بعد الشفته
«،،،،كافي يمعود اني حجيت اريد مصلحتك مو افتح جروح قديمه
«،،،،ماطابت جروحي حتى انت تفتحها بعدها مفتوحه ولا عمرها راح تطيب لان الصار
بيه مو شويه
ليلى
طلعت من الدوام اني وماريا صعدت يم بابا
بسته من خده وكلت
«،،،تاخرنا عليك مو
«،،،خير يابه عبالك لود عليكم
«،،،لا عمو بس الشفت الثاني تاخرو علينا
«،،،ها خير شبيهم
ماريا ردت
«،،،،كل واحد عنده ظرف وظلينا ساعه الما اجوي
«،،،،هاهيه بنتي واحد يشيل اللخ بالدوام
«،،،،اي عمو بس والله تعبنا ومتنا جوووع
«،،،،يخسى الجوع بعد عمج هسه نوصل وتعالي يمنا تغدي خالتج ندى مسويه شلون تبسي يخبل
«،،،،الله واني شلوني اموت على التبسي مالتها راح اضرب اهلي بوري واجي اتغده يمكم لان قبل
شويه خابرت ماما وكالت مسوي
باجه لبابا ومعاذ واني شلوني
اتخبل منها ومن ريحتها
بابا ضحك ورد
«،،،،هههه تعالي يمنا بس ها تره اعرفها هسه دزتلي ماعون لان تعرفني احبها بس يله راح اكلها
وحدي بالهول وانتن تغدن بالمطبخ
«،،،لا عمو شلون تتغده وحدك اعرف ليلى تضوج
اذا ماتكعد وياها
بابا مال عليه وسالني بوجهه يضحك
«،،،ها ست الكل اكعد وياكم لو لاا
«،،،لا بابا اكعد مااكدر بلياك احس الاكل ماله طعم
اذا انت مو موجود
«،،،والله اني هم مااكدر اكل لكمه اذا مو انتي وياي
على الاكل
ماريا كامت تتعنوص وادكول
«،،،شوكت نوصل والله عصافير بطني كلمت تزقزق
«،،،ههه مابقى شي ونوصل الحمد لله بيتنا قريب
من المستشفى الي تشتغلن بيها
كف سيارته يم بيتنا نزلت وهي وياي
كالت من طبينا
«،،،راح اخابر ماما واكول الها اني يمكم حتى
لايظل بالها
هزيت راسي باي بابا كال
«،،،،عبالك راح تمطر
وكفت يم باب المطبخ باوعت للسما ماريا طبت
تحجي وي خاله سوسن من كملت صاحت
«،،،،،خاله ندى اااانقذيني تره ميته جوع
«،،،ااي هسه اصب الاكل كله جاهز بس ليلى تروح تبدل وتجي تساعدني
ماريا اجت ليمي ادفع بيه
«،،،ااني اساعدج ،،، انتي روحي بدلي وتعالي بسرعه مااريد تاخير يله تره راح يغمى عليه من الجوع
«،،،راايحه بس لادفعين
عفتها تضحك وي ماما وصعدت لغرفتي ذبيت
جنطتي بدلت ملابسي ونزلت
سمعت ماريا تصيح جاوبت
«،،،ااجيت
نزلت لجوه الكل كاعدين بالمطبخ اشرت اليه
بصفها كعدت كالت
«،،،،شلون اكل يفتح النفس وينتضر الواحد بس
يهجم
«،،،ههه اهجمي واكلي بالف عافيه
ماما ردت بضحك بدينا ناكل ونحجي على يومنا
وشصار بالمستشفى وراها غسلنا المواعين اني وياها من طلعت لبيتهم مشيت وياها للباب
المطر وكف
سالت
«،،،راح تنامين مو
«،،،،اي ليش عندج شي
«،،،لا بس ردت احجي وياج بسالفه هناك بالدوام من وره الهوسه ماكدرت احجي اي كلمه
وكفنا يم الباب سالت
«،،،خير صاير شي
الخجل بين بملامحها جاوبت
«،،،،يعني انتي تعرفين ابن خالي معتصم
«،،،،اي اعرفه شبي
صديقتي ترددت شويه بعدين ردت
«،،،،،هو صارله فتره من يجي علينا اشوفه يصفن عليه بنظرات تخليني ارتبك واخجل يعني من اجي اسلم علي اشوفه يفرح ويظل بس يباوع عليه وهالشي خلاني احس هو معجب بيه
«،،،زين وانتي
«،،،اني شنو
«،،،انتي معجبه بي
ماكو رد وتجنبت تخلي عيونها بعيوني تنهدت
وكملت
«،،،الصمت دليل اعجابج بي
«،،،ليلو هو مابي شي يتعيب يعني هو موظف وشايل اخلاق عاليه واخوه ماجد ماخذ اختي مريم وانتي تعرفين شلون مرتاحه ويا
هو وبيت خالي
«،،،هي ماحجت وياج باي شي
«،،،لاا بس حسيت اكو شي بينها وبين ماما
بس ماحجن شي والصراحه اني خايفه
من نفسي
«،،،ليش خايفه ومنو شنو
«،،،وج خايفه من رده فعلي من يحجون وياي
خايفه لا هو يجي يحجي ويايه وافشله
«،،،،وليش تفشلي وانتي معجبه بي
«،،،،مو تعرفيني ثوله واجفص بالحجي يعني من
ارتبك احجي شيش بيش
ابتسمت وجاوبتها
«،،،من يحجي وياج عدي للعشره حتى تنطين
روحج فرصه للتفكير
«،،،ياعشره كولي اعد للميه لان تفكيري بطيئه مثل
السلحفاه ويردلي وقت يله اجمع افكاري
«،،،بهاي اكلج صدك لعد عدي للميه وخلي الولد صافن بوجهج ياثوله
«،،،لا عفيه ليلى انطيني حل
فجأه كامت تمطر كالت
«،،،،اروح واخابرج بعدين
«،،،اوكي
فتحت الباب وطلعت لبيتهم وكفت اباوع الها
بيتهم بعد بيتين عنا من طبت سديت الباب
مشيت جوه السقيفه مال الكراج
اسمع صوت المطر من
يطخها
طلعت من جواها غمضت عيوني ورفعت راسي للسما احس بقطرات المطر
على وجهي
صوت اجه بأذني
«،،،اغار اذا ادكولين احب الشتا والمطر اريدج
بس تحبيني اليه
مثل كل مره من اذكره روحي تنقبض واحس
عبالك سجينه حاره تزرف گلبي
«،،،وحبيتك ووفيت الك وشحصلت منك غير
الاذيه والغدر جنت عبالي راح تصيرلي سند واحد اكدر امن على روحي يمه يحميني من غدر الناس والزمن بس انت اول واحد غدرني
وكسرلي ظهري
صدكت الكل وانت تعرفهم جانو خراب النا
وجذبتني اني الجنت ادكول عليه اجذب روحي
واصدكج الج
شكد توسلت بيك تسمعني تصدك بيه بس
انت سديت اذنك عن توسلاتي ودموعي وانهزمت
وخليتني بحلك اليسوه والمايسوه
ذاك اليوم اجه بين عيوني واني مو ناسيته عياط ماما وبابا وصراخهم،،،، ناس تركض بيه
ويصيحون ،،،،،،، ضباب صار على عيوني
الي غوركت،،، من تذكرت الصار
بيه او السويته بروحي من ورة بشر مايسوه
رفعت راسي شفت بابا واكف باب المطبخ وصافن عليه تذكرت كلامه بذاك اليوم وشلون
يتوسل بيه وهو يبجي
«،،،،بنتي صيري قويه لخاطري ااني ابوج والله اموت وراج اذا صارلج بيج شي ااني
مااقهرتج اامج ماقهرتج،،،شوفي حالنا راح
نموت من وراج
ابتسمت اله ملامح وجهه تغيرت مشيت اله وكلت
«،،،،الدنيا ربيع والجو شتوي
«،،،اي والله عبالك الشتا طالبنا دين كم يوم
رد مبتسم طبينا سوه كمل
«،،،اروح انام ساعه وراها اصلي واطلع لشغلي
«،،،بابا شكلت على سالفه السياره
«،،،بنتي والله اخاف عليج منها يعني ان كاعد اوديج واجيبج بعد شكو تاخذيها
«،،،ها حجي رجعت بكلامك
جاوبته وتخصرت كملت
«،،،ماعليه اريد سياره اروح واجي بيها اني وماريا
مااريد اظل معتمده عليك انت مو كلت
صيري رجال اتحزم بي
«،،،،هههه وين شواربك ياارجال
جاوبني يضحك اخذت طرف شعري وخليته
فوك شفتي وكلت
«،،،،هذني حجي شوفهن اطول من شواربك
خرب ضحك وكعد ماما طبت شافته ابتسمت
وكالت
«،،،خير اشو ابوج خربان ضحك
«،،،تريد سياره
«،،،اي انت مو كلت الها اجيبلج وخليتها براسها
وهاهي قفلت بعد وانت تعرف بنتك
من تقفل على شي الا تسوي يله
ترتاح
«،،،،يعني شدكولين اجيبلها
ماما،،،، باوعت عليه هزيت راسي
باي ترددت بعدين جاوبته
«،،،،اي جيبلها بس مو من هاي العاليه هيج،صغيرونه ونازكه مثلها
«،،،،هاهي ادللي انتي وياها هالاسبوع تجيج
احلى سياره
«،،،،بابا اريد هاي الدعسوقه والله نفسي بيها
«،،،،ههه قصدج فولكس فاجن ادللي اجيبها الج بس لازم تنطيني وعد ماتمشين سريع ولا
تتهورين
«،،،،وداعتك راح امشي مثل السلحفاه والا اخلي
طابور السيارات وراي سره ويدكون هورن
«،،،هههه اي يابه سوي قطار وراج واصدار جديد للشركه
رغم چنت أضحك وياهم وأشاقه، بس بداخلي جان أكو حزن جبير...حاولت أخفي، حاولت أنسى، بس جذب الواحد ينسى.
الضحكة جانت ستر والونه بگلبي جبيرة
ماجنت اريد يحسون باي شي ماردتهم يشيلون همي كافي الصار بيهم من ورايه اريد ابين كدامهم اني قويه او اتصنع هالشي حتى لو دست على روحي
جانو يكلون احجي طلعي الي بگلبج حتى ترتاحين
بس ماجنت احجي لان شفت
سهله تحجي البيك بس صعبه
اليسمعك يدوايك
قائد
ايام مرت عليه واني نفس حالي ماتغير شي بيه
طوال السنوات الخمسه العشتها بالمانيا شغل
بالنهار وسهر بليل
كاعد بنادي يمي كم ولد عراقيين
شربت كم كاس ،، نفس البنيه اجت
كعدت على رجلي الولد دحكو واحد للخ وهم مبتسمين كالت
«،،،،هل تريدني اذهب معك
صفنت بملامحها وشفت بيها،،،،،ذيج
نزلت راسها يم اذني وهمست
«،،،ساكون ليلى التي تريدها
اسمها بس كالته خله راسي يثكل كمت اشوفها
بكل الوجوه تضحك اليه
حسيت بضيق بصدري، ،،،والجو خنگني كمت
هي كامت وياي ولزمت ايدي ردت اسحبها
واحد جرها بقوه من يمي
وكال
«،،،،،يبدو اننا لانعجبك
جرت روحها منه بقوه وصاحت بي
«،،،،ااتركني
من سحبها مره اللخ وكفت بصدره وكلت
«،،،،ماذا تريد منها
«،،،،،اابتعد من هنا ولاتجعلني اريك شيئا لايعجبك
الولد سحبوني منه وكالو
«،،،قائد عوفه تره هذا مطوخ بالشرب كلش امشي خلي نطلع
«،،، خلي ااخذ السويج وجهازي
جاوبتهم وانداريت مااحس
غير يضربني بوكس اجه بحنجي
تخبلت ولزمت بطل نيمته براسه ووكعتله بوكسات اني بالعراكات مخبل افقد وبعد مااعرف منو الجدامي
مااعرف شلون طلعوني الولد من يمه اسمعهم
يصيحون
«،،،،ولك كااافي اجوي الشرطه
صعدوني بسيارتي افشر واغلط علي حجي مايلبس
علي ثوب حازم حرك سيارتي وطلعنا
مناك
«،،،كافي يمعود ماخليت غلطه بقاموس الفشار ماحجيتها
«،،،،ووولك عگبني علي الكواد الترس اخذني غدر
من انعل ابوه لا بو الجابه ابن ال،،،،،
هم رجعت افشر حازم رد
«،،،المن ترجع اكعد واسكت تره بصعوبه فلتنا من الشرطه والله اليستر بس الرجال صار بي
شي من وراك
«،،،من اجلعه لايطيب يكون يفطس فطسه الجلب
من انعل ابوه لا بو صفحه اهله
«،،،،مخبل انت مو عاقل ايدك والضرب وراح تبتلي
بواحد فد يوم كول حازم كال وصدك
ثاني يوم من دوامت حسين شاف حنجي ازرك
كال بضوجه
«،،،،انت ماتجوز الا يسفروك منا
مارديت كمل
«،،،،كوم لاتكعد
«،،،خير شتريد
«،،،،عمي يريدنا اني وياك
«،،،اامشي
جاوبته بنترة رد
«،،،لا بله هاي عود انت ابو الراهي
«،،،،لا ابو راهي ولا ابو نعال امشي خلي نشوف الحجي شيريد من عدنا
ظل يدردم عليه الما وصلنا للمكتب مالته طبينا
سوه جان كاعد ويحجي بالتليفون اشر
النا اكعدو
كعدنا واحد اكبال اللخ كمل كلام وسد جهازه
كال
«،،،شلونكم ياولد
«،،،الحمد حجي بخير
جاوبته صفن عليه بعدين سال
«،،،،هاي يابه شبيك متعارك وي احد
«،،،،لا ضربت روحي باب الكراج
حسين ماحجه شي الحجي هز راسه ورد
«،،،سلامتك ابني ماتشوف شر
«،،،،الله يسلمك
«،،،اليوم دزيت عليكم لان صارلي فتره احضر لمشروع جبير واريدكم اثنينكم تلزموه
«،،،شنو هذا المشروع
حسين ساله
«،،،قبل فتره واحد صديق اليه من زمان يشتغل
بالمواد الاحتياطي مال المصانع كلي اشارك ويا
بمخازن اني اسهل امر منا واصدرله
المواد وهو يبيعها بغداد واريدكم
اثنينكم تروحون لهناك حتى
تلزمون الشغل ويا
صفنت علي من حجه هالكلام بعدين على
صاحبي الي تفاجأ بالكلام سالته
«،،،اني حجي
«،،،اي ابني اني ماراح الكي احسن منك انت وابن
اخويه حتى امن على فلوسي يمهم
«،،،بس اني مااريد اروح للعراق
جاوبته وكملت
«،،حجي شوف واحد غيري
«،،ليش ابني تره هاي فرصه جبيره الك تبني نفسك
وهم حتى تشوف اهلك ويشوفوك
التزمت الصمت حسين ماحجه شي الحجي كمل
«،،،قائد اني املي بيكم يعني الصراحه اني مااريد
غيرك انت وحسين تلزمون الشغل صح هو صديقي ومن زمان اعرفه،،،، بس اني خايف لاانغدر
وتروح فلوسي وانت تعرف ناس مستثمره
وياي وهاي امانه جبيره بركبتي
«،،حجي شتسوي بالشغل هناك،،، تره الدنيا هناك خربانه والعيشه صارت لاتطاق
انت طلعت من زمان،،،، من وره الحروب واني
وحسين طلعنا هم لنفس السبب نرجع ليش
واحنا نكدر نسوي بغير مكان
الحجي رجع ليوره سند روحه على كرسيه
وجاوب
«،،،صح اني تركت بلدي من زمان بس الجسد هنا
والروح هناك
سكت للحظه ودحك لوحات بغداديه معلكه بالحايط وكمل
«،،،اني اظل عراقي واحن لبلدي واذا اريد اسوي خير اسوي اله ولاهلي،،، ليش انفع الغريب
واني اكدر انفعهم الهم وبعدين
ياابني انت تعرف وسمعت مني اني مليت من
هنا وتعبت من الغربه واريد اروح لهناك
اگضي البقى من عمري هناك وبين
ناسي
«،،،احترم رأيك حجي بس انت تره جاي اجازف بفلوسك وروحك بمكان ماراح تشوف الخير منه
«،،،العراق كله خير وابو الخير ويظل هيج رغم
الصار بي
رد عليه وسكتت كمل
«،،،ابني خليك مفتخر بلدك حتى لو جان باسؤ حاله
لاتخلي الغير يشمت بيكم ويفرح بهل الكلام
الي ينزل من قدرك قبل قدر بلدك
اشر للصور وكال
«،،،شوف الجمال شوف الملويه وجنائن بابل المعلقه شوف ابو الجوادين سلام الله عليهم
ومرقد ابو حنيفه النعمان
هي الصور وغيرها تخليك تعرف انت ابن حضاره
عريقه تخلي راسك مرفوع بين الدول
كلامه جان حلو بس الواقع الجنت عايش بي خلاني مااشوف اي شي حلو بي ذبيت حسره وجاوبته
«،،،حجي اعتذر منك اني مااكدر ارجع لهناك
حسين رد بسرعه
«،،،عم خلي يفكر كم يوم وهو يرجعلك الجواب
الحجي هز راسه وكال
«،،،براحته بس اتمنى مااايجيني نفس الكلام
«،،،اترخص
كلت هالكلام وكمت طلعت حسين ورايه كال
«،،،اوكف يمعود شبيك تمشي بسرعه
وكفت بنص الممر وجاوبته بعصبيه
«،،،،جنت تدري مووو
«،،،،لا والله وروح امي وابويه ماادري
مشيت هو بصفي كال
«،،،،والله تفاجأت بكلامه مثلك وبعدين تعال كلي انت ليش رافض هالفكره
طبينا مكتبنا وجاوبته
«،،،تسالني يول وانت تعرف البيه
«،،،اعرف وصار ماضي شوكت تنساه ماادري
مارديت كمل
«،،،قائد لخاطري اقبل اريد اروح هناك وازوج
الي اريدها وصارلها سنين منتضرتني
«،،،،ماتروح منو لازمك
جاوبته بصياح سكت باوع عليه بعتب رد
«،،،،غير انت وياي مو تعرف ماعندي احد غيرك
منو راح يخطبلي منو راح يزفني منو يوكف وياي
هناك
«،،،يول كاعد تلوي ايدي بهل الكلام مو تعرف وضعي وتعرف اني مااكدر ارجع لهناك
اجه ليمي وكال بتوسل
«،،،،ماراح تشوف احد منهم هم بعقوبه
واحنا بغداد وبعدين انت سمعت عمي مايريد يظل
هنا واعرفه راح يصفي كلشي ويرجع
لهناك
«،،،حسين مااكدر مجرد ماجبت اسم بغداد روحي اختنكت افهم عليه رجعه لهناك مارجع
ماراح ارتاح وراح اتعب واتعبك
وياي واذا يريد يرجع خلي يروح اني باقي هنا
بنفس مكاني
«،،،،يعني شنو تعوفني واني محتاجك
سكتت هو هم ماحجه شي وخر مني وراح كعد بمكتبه بين علي ضاج
وانقهر كلت
«،،،يول لاتضوج مني ولا تزعل انت تعرف وضعي وشفتني شلون اجيت عليك خلصان واتمنى
بس الموت
«،،،براحتك قائد
رد هالرد وكام طلع من يمي صفنت علي من راح
وكلت بضوجه
«،،،ياربي هاي منين اجتني هالسالفه وشلون وي هذا الزعل
ليلى
مشكله الي يشتغلون بوزاره الصحه ماعدهم عطل
العاديه مثل الجمعه والسبت لازم يدامون بيها
وجان دوامي اني وماريا بيوم جمعه
بابا وصلنا للمستشفى نزلت وهي ورايه
تثاوب كلت
«،،،سدي حلكج راح تفوت بي ذبانه
خلت ايدها على حلكها وجاوبت
«،،،وج مانمت ولا شبعت نوم
«،،،،اكيد كاعده تقرين قصص
«،،،اي قريت قصه كلش حلوه ومااعرف شلون اخذني الوكت اني اقره بيها ومااسمع غير اذان الفجر اذن فزيت صليت ورجعت نمت
«،،،والله هالقصص راح تخبلج
«،،،ههه كولي خبلتني ومخلت عليه عقل
«،،،هم حب
بصمت بالجهاز اني وياها جاوبت
«،،،،اي بس شنو تخبل البطل من الجنوب وهي
بنت بغداد هي تحجي لعد وهو
جا شلون
طبينا للصيدليه وجاوبت من ذبيت الجنطه
ولبست لابكوت
«،،،لاتصدكين اكو حب بهل الدنيا
ماردت كملت
«،،،الي ينكتب بالقصص بعيد كلش عن واقعنا الي
نعيشه كل يوم
«،،،لا ليلو مااتفق وياج بهل الشي اكو حب بهل الدنيا لان شفته عند بابا وماما وهم عمو فاروق
وخاله ندى ازوجو عن حب
سكتنا من طب دكتور جديد اجه يدوام يمنا
سلم
«،،،،صباح الخير
«،،،اهلا دكتور رواد
«،،،بلا زحمه اريد شريط براسيتول
رحت للادويه اخذت شريط وانطيته اله اخذه
مني باوع عليه وعلى ماريا سال
«،،،انتن خوات
«،،،لااا
ماريا جاوبته وكملت
«،،،مو بس انت سالت هالسؤال كلها عبالها
احنا خوات
«،،،اي لان تشابهن كلش بس الفرق لون العيون
من داره وجهه منها وخله عيونه بعيوني درت
روحي ولهيت نفسي ارتب بالادويه
«،،،شكرا الكم واعتذر عن الازعاج
«،،،،لا ماكو اي ازعاج دكتور
ماريا ردت علي من طلع اجت ليمي وكالت
بضحك
«،،،،اكلج هذا يارقم الي كال اني وياج خوات
ابتسمت وجاوبت
«،،،بطلت اعد
«،،،هههه اني هم
صدك جنت انا وماريا نشابه كلش بشرتنا بيضه
نفس الطول بس هي اسمن مني
لان تحب الاكل كلش وعيونها سود كبار
اني رصاصي طوخ،،، شعرها اسود مثلي
ونفس الطول لان كلنا من احنا صغار ماراح نكصه
ابد بس جنا نكص اطرافه كبرنا سوه
بنفس المنطقه امها اخت لماما وخواتها خواتي
ماجانو بالنسبه النا اغراب لا اهل وناس نشد ظهرنا بيهم عكس اهل ماما الي ماشفتهم
منهم غير الغدر والاذيه
هم الذكريات رجعت ادك براسي بقوه بس زحمه الشغل والمراجعين خلتني التهي وانسى
الجنت افكر بي
قبل الظهر الازدحام خف شويه ماريا جابت عصير
وكيك كعدنا كالت بضوجه
«،،،اوف عبالك اليوم مو جمعه المراجعين زادو
مانقصوا
«،،،اي هم لاحظت هالشي
«،،،هاج اكلي ولاتحجين بالدايت رحمه لجدج
السابع عشر
ضحكت واخذت منها العصير والكيك كلت
«،،،لا جيبي لان دخت من الجوع
«،،،،اكيد ما متريكه مثل كل يوم
«،،،تعرفيني مااشتهي
«،،،ماتنطيني شويه من قله شهيتج اشو اني اكعد
جوعانه وانام نفس الحاله
ابتسمت هي قربت مني وكملت
«،،،ليلو اني انتبهت دكتور رواد عينه منج لان كلما
يجي يمنا يظل صافن عليج
«،،،شخبار مريم ماااجتي هاي الجمعه
غيرت الموضوع وكمت هي افتهمت وجاوبتني
«،،،اي راح تجي اليوم هي ودانيه واريد افض الدوام حتى اروح والتم وياهن ماتجين يمنا
«،،،اشوف منا للعصر اذا ماطلعنا وي بابا اجي عليكم
«،،،،ها لازم عمو عازمكم اليوم
«،،،اي كال اخذكم واعشيكم بره
«،،،لاتنسيني ولج اريد بيتزا
ابتسمت ورديت
«،،،ادللي راح اجيبلج عائلي الج ولخواتج
«،،،يسلموو حب
قائد
الحجي ظل يلح عليه اسافر لبغداد والزم الشغل
وي حسين وخله العقده بالمنشار لو اني ويا
لو يزعل عليه هو جانت افضاله عليه جثيره وهم
صاحبي ياما وكف وياي وكفات حلوه
مااكدر انساها اضطريت
اوافق حتى ماازعلهم مني كلت ارتب الشغل هناك واذا الحجي رجع وصفى اموره اظل اشتغل وي
صديقه الالماني،،،،، جانت كل خطوه
اخطيها عبالك رايح للموت مو لبلدي الي عفته ورايه وحاولت انساه وانسى اهلي
والي عشته هناك
كعدت بالطياره يمي حسين يحجي مااسمعه
جان فرحان لان راح يلتقي بنت عمته
الجان يحبها من سنين
خليت سماعتي بأذني
شغلت اغاني مااسمع ولا افهم منو الجاي يغني
لان افكاري مشوشه بس هيج ردت يشوفني
ملتهي ويعوفني هو التهى بجهازه
درت وجهي على الجامه وكلت
اي ياقائد المكان الي انهزمت منه مكسور
ومغدور رجعت اله برجليك مثل واحد داس على جرحه بيهن ونسى الصار بي بهل
المكان
اني صافن طلعت اغنيه جي فاير ايامي
وياها وخلتني اذكر كلشي عشته
وياها ووي اهلي
