رواية المجنون العاقل كامله جميع الفصول بقلم جمانه السعيدي
اني بكر محمد ضابط بلاستخبارات
يمكن لو النضام السابق باقي الحد هذا الوقت مستحيل
اكتب قصتي
اني من اهل بغداد تتكون عائلتي من إخوان ثنيين اكبر مني واني ازغر واحد
ابوي عقيد بلجيش العراقي
وامي مدرسة بلمتوسطه بنات
وضعنا المادي زين وعايشين احلى عيشه
اخواني ثنيينهم مزوجين الجبير مهندس معماري مزوج وطالع بيت وحده
والثاني مهندس ميكانيك يشتغل بمعاملة تصنيع الاسلحه
التصنيع العسكري يسموها قبل
بعد الثوره الشعبانيه الي صارت بعد احتلال الكويت سنه ٩١
ادهور وضع العراق حيل
حصار وتشدد من الحزب و٢٢ دوله ضدنا
انكسر العراق حيل بوقتها
رغم جنا نبين احنا اقويااااا
الحصار حيل اثر علينا الدوله بدت تخاف من الشعب
موقفها صار ضعيف
بدت تحاول تقبض قبضه من حديد على الناس
اي واحد يتنفس كبل للسجن مو بس سجن سجن وتعذيب من غير الاعدامات بوقتها
يردون يسيطرون على الناس
اكو مثل يكول اضرب المربوط يخاف السايب
هيج الدوله كامت تتعامل وياا الناس
الي تلزمه ماترحم حاله تريد تخوف الناس حتى كلمن
يكعد بمكانه ويسكت
تريد اسيطر على الناس بلحديد والنار
اني بوقتها صار سنتين من اتخرجت وجاي اداوم بدوائر الدوله
طلبو من عدنا دفعه ياخذوهم بمهمه خاصه
شنو هاي اامهمه مانعرف
اني اخذوني من ضمن ٣٥ واحد من هاي الدائره
اكيد اخذو مثلنا اعداد ما معروفه من غير اماكن
دخلونا بقاعه كالو اتصلو على أهلكم
كولو احنا طالعين مهمه مانعرف وين لو شكد راح نبقى
اني الصراحه خفت
شنو يعني مانعرف وين لو شكد راح نبقى
ايجوز هاي المهمه راح اطول
لو ووين يردون يدزونا ليش مايكلون شني هاي المهمه
معقوله حتى احنا مانعرف شنو هاي اامهمه
جمانه السعيدي
اتصلت على اهلي سلمت عليهم واحد واحد
وكتلهم طالعين مهمه بس وين لو شكد راح نبقى مااعرف
طبعا لان ابوي عسكري قديم وعقيد يعرف هاي السوالف
كان متقبل الموضوع بس امي اكلت كلبي
شلون مانعرف انت وين
شلون نطمن عليك اسئلهم يمتى ترجع
اذا توصل الاي مكان واكو تليفون اتصل طمنا عليك
شكد راح تبقى
ماعندي اي جواب على هاي الاسئله
ومدت المكالمه كانت متحدده بلنسبه للكل
مارديت على امي غير بكلمة حاضر وبس
خلونا بسيارات عسكريه ونطلقنا
مشت بينا السيارات هواي تقريبا ٣ ساعات اوكثر شويه
وصلنا معسكر منطقه صحراويه
كلشي مابيها بس هذا المعسكر
ماكو غير العاكول بلكاع اي بنايه قريبه ماكوو
دخلونا احنا وسياراتنا جوه
هذا الحجي كان ٩٣ بشهر التاسع
دخلنا جوا أنطوني ملابس غير هاي ملابسنا
تراكات عاديه
ودخلنا قاعه جبيره
دخل علينا واحد برتبة رائد
السلام عليكم
كلنا ردينا عليكم السلام
....اليوم الدوله راح تكلفكم بمهمة خاصه
كلنا كاعدين ومنتظرين نعرف شنو هاي المهمه
بذاك الوقت لو شتكول الحكومه محد يعترض
لو تكول اشمرو نفسكم بلنار نكول جاهزين
بدون اي نقاش
بدا الرائد يشرح نوع المهمه
المهمه كل واحد يتقمص دور المجنون
ويزرعونه بمنطقه من مناطق العراق
الدوله هي الي تختار هاي المنطقه
كان التركيز الأكبر على مناطق الجنوب المناطق الشيعيه
لان هي المناطق الي كانت العين عليها بذاك الوقت
ولي النضام كان حذر منها
منها انطلقت الثوره الشعبانيه
المهم بدا التدريب من اللحظات الأولى الي وصلنا بيها
للمعسكر
يعلمونا شلون نكدر نتخفى وشلون نمثل دور المجنون
باتقان وشنو نوع المعلومات الي لازم نحصلها من الناس
لازم كل واحد منا يتقن دوره
حتى العالم تصدكه
شلون نمشي وشلون نحجي وشلون يكون وضعنا ووين
الأماكن الي نكعد بيها بلاضافه هم راح يحددولنا
اكثر البيوت الي شاكين بيهم
وشلون نكدر ندخل هاي البيوت ونسمع كلامهم
وكل شكد نسلم تقارير تخص الناس الي عايشه بهاي المناطق
اول شي من دخلنا هذا المعسكر انمنعنا نحلق شعرنا
ونفرج اسنانا
لان وين اكو مجنون اسنانه نضيفه لو حالق شعره
بقينا ست اشهر داخل هذا المعسكر
صرنا مجانيين بلفعل
الشعر طويل الأسنان تلعب النفس الشعر بلوجه وصل للعيون
اللحيه صارت شطولها
بعد عدت اختبارات وتاكدو من اتقان الشخصيات
قررو يوزعونه على مناطق بلمحافضات الجنوبيه
على فكره هذا النضام معتمد بكل الدول مو بس بلعراق
وخاصه الدول الي تدخل حروب
لو يحكمها نضام سياسي عسكري
وخاصه الدول الي تكون الدوله بيها مسيطره بنضام القوه
تكون عيون الدوله والجواسيس بكل مكان
هذا الشي يدل على ضعف الدوله مو قوتها
الدوله الي تجسس على شعبها دوله ضعيفه
الدوله القويه الي الشعب يحب القائد ويدعمه حتى يقوى
المهم اني ست اشهر ما حاجي وياا اهلي ولا يعرفون اي شي عني
طبعا ابوي محاول بكل الطرق يعرف اني وين
بس ابد مستحيل هاي المهمه سريه بحته محد يعرف احنا وين لو شكاعد نسوي
جمانه السعيدي
بعد انتهاء وقت التدريب والاستعداد
بدو يجهزونا حتى نغادر المعسكر وننطلق كل واحد المهمته
محد سمح النا نروح نشوف اهلنا
يخافون نضعف كدامهم ونحجي واذا حجينا المهمه كلها راح تخرب
انطو كل واحد منا عشر دقايق يحجي وياا اهله
قبل لا ننطلق بهاي المهمه
طبعا احجي بلتليفون واكو واحد واكف على راسك
والمكالمه جاي يسمعونها بغرفة القياده
خاف احجي كلمه منا منا
مجرد ماكلت الووو وامي سمعت صوتي نزلن دموعها
اني سمعتها تبجي كمت ابجي اكثر منها
كلبي طك عليها
اريد اشوفها واشوف اهلي بعمري ما مفاركهم هلكد
بكر...يمه فدوه اسكتي اريد اسمع صوتج ترا هنا عشر دقايق
امي...ولك يمه ماانام بليل عليك
ست اشهر ما تتصل وتخليني اسمع صوتك
بكر...انتي بخير ابوي شلونه
امي...ابوك بعد شويه ويتخبل عليك مابقى مكان ماسئل عنك بي
انت زين فدوه يمه كول انت وين اني اجي اشوفك
حتلو مكان بعيد
اذا ما يقبلون تطلع اني اجيك
بكر...ولله مااعرف اني وين صدكي مااعرف
امي...اريد اشوفك منو القائد مالتك لازم ابوك يعرفه
كول منو واني اخلي ابوك يحجي ويااا
اريد بس اشوفك كلشي مااريد
بكر...مااعرف احد صدقيني مااعرف احد
اريد اكولج اني راح اروح مهمه ثانيه ويجوز اتأخر عليج
لا تخافين اني بمكان امين
بس مشتاق اشوفج انتي وابوي وخواني
سلمليلي عليهم
بس كلت هاي الكلمه العسكري الواكف على راسي قفل الخط واخذ التليفون مني
مو تكول رجال شكبرني
ماكدرت اسيطر على دموعي اكثر من ساعه كاعد وضام وجهي ابجي لان كلبي يريد يطك على اهلي
ثاني يوم لبسونا ملابس تعبانه
ووصخه واكو يجيبولهم ملابس ويشككووهن
يعني تطلع من المعسكر مجنون رسومي
قبل لا نطلع من المعسكر
كعدو اربع لجان كل لجنه بيها ٣ ضباط
كل واحد يدخل للجنه وياخذ المعلومات كامله عن المهمه
الي رايح بيها
بهاي منطقه شراح يكون اسمه
منو مسؤل عنه هناك
اني بلنسبه اليه
تحدد المكان الي راح انزل بي
بقضاء بمحافظه من محافظات الجنوب
يمكن مواليدالستينات السبعينات راح يذكرون اكو مجانيين
طلعو بهاي الفتره بعدين اختفو فجئه بدون سبب
اول مااوصل الهاي المنطقه
اكو واحد من المنطقه راح يروج عني كلام حتى الناس اصدك بيه
هذا الشخص تابع للحزب يشتغل لحاسب الدوله
بس محد يعرف بي
راح يكول هذا الشخص اسمه جمعه
انجن بلحرب بسبب صديقه مات كدام عينه
مااتحمل منضر صديقه وهو صاير قطع لحم كدامه
فقد عقله
اهله ماكدرو يسيطرون علي انهزم منهم
وهسه عايش بلشارع
الناس تتصدق علي هاي الاشاعه لازم تنتشر عليه
لان اكيد اني راح انزل غريب بهاي المنطقه
والناس راح تسئل هذا منيبن
احنا ما شايفينه بلمنطقه قبل
او يسئلون وين اهله
منيين اجا ما نعرفه
كلام هذا الشخص راح يخلي الناس اصدك اني مجنون
وما ادقق بوجودي
بس اني شنو لو تشوفون حالي مخبل مخبل
ثوب كله وصخ مشكك بجامه وصخه
الشعر كفشه
اسناني تلعب النفس اكثر شي جان مضوجني
مااكدر أفرج اسناني وريحة حلكي صارت تكتل
اني تلعب نفسي من نفسي
الشخص الي راح يحجي عني وشلون انجنيت اني مااعرفه
ولا راح يكون اليه لقاء بي بلبدايه حتى محد يشك بيه
واكو واحد ثاني يشتغل لحساب الدوله
بنفس المنطقه الي اني راح انزل بيها اني هم مااعرفه منو
هذا الشخص راح يراقب تصرفاتي
ويساعدني بحجة مخبل واساعده
حتى يكدر ينطي عني تقرير
جمانه السعيدي
واني اراقب الناس الي محددين اسمائهم
وانطي بيهم تقرير اسبوعي
واراقب اذا اكو ناس تشتغل ضد الدوله والدوله ما تعرف بيهم
هاي المهمه أصعب مهمه مرت عليه بحياتي
لبست ملابس المجنون وخربت شعري
اخذتني سياره مدنيه
ونزلتني بهاي المنطقه الساعه ٣ الفجر
بلبدايه التعليمات الي اجتني ابقه افتر حول المنطقه
ولمن الناس تتعود على وجودي
ابدي ادخل شويه شويه للسوك وللبيوت
منا لمن الناس بلمنطقه كلها تشوفني وتعرفني
وتتعود على وجودي
اسمي الحركي الجديد جمعه
شكد راح ابقى هناك مااعرف
