رواية اسميته زين الفصل الاول
(الفصل الاول)
_بت يخربيتك إنتِ واقفة في الضلمة كده بتعملي إيه!
=ب ب ب
_إيه إنتِ علقتي ولا إيه؟إنطقي.
=بسمع صوت الآذان ياماما في حاجة!
_طب ماتسمعيه من أوضتك ياقلب أمك ،، هو صوت الآذان مبيتسمعش غير من ورا الشبابيك!
رديت بلا مُبالاه=أه ،، هو صوت الآذان مبيتسمعش غير من ورا الشبابيك.
_طب يلا يا اختي الفجر أذن روحي صلي يا مؤمنة.
"أمي دي دايماً كده بتهدم اللذات ،، الواحد ميعرفش يشوف حب عُمره فالبيت ده أبداً ،، كُل ما أجي أشوفه لازم حد ينُطلي ،، ياه لو أعرف مين إبن ال .. اللي باصصلي فالحوار ده!! إيدا حوار إيه؟ هو حد يعرف إني بحبه أصلاً ؟ "
=إنتِ بتكلمي مين يابنت إنتِ؟
إتفزعت _ إيه ياماما هو إنتِ كل شوية هتدخلي تخضيني كده؟
=أخضك ليه ياقلب أمك شوفتي عفريت ولا شـ ..
_بااااس إحنا الفجر مافيش داعي حد يسمع بينا ،، إنتِ ست قمرز وجدعة ومافيش منك في الكوكب كُله ،، ها حلوة الصيغة دي؟
=طب بمُناسبة الجدعنة ،، جايلك عريس .
_إنتِ حتى الفجر مش عتقاني؟ أهرب منك بالنهار تقفشيني الفجر! إيه ياماما صباح الخير بقى ما انتِ فاهمه اللي فيها .
=لأ أنا مش فاهمه حاجة غير إنك الوحيدة في صحابك اللي متخطبتيش ،، هو أنا ماليش نِفس أفرح بيكي زي باقي الناس؟
_ياماما إفهميني الجواز مش جالك عريس طب موافقة هوب خطوبة هوب عَقدنا هوب بنتجوز يومين حلوين وبعد كده إنتَ أكلت الشيبسي بتاعي ليه؟ وإنتِ إزاي تضيعي فردة شرابي! قومي إكويلي القميص ،، قومي فطريني ،، قومي دوريلي على بنطلوني الحُمُصي ،، أنا حد يقولي بنطلوني الحُمُصي ياماما ؟ أنا يتقالي كده ! راضي زمتك ده ينفع؟
=لا يابنتي ونبي ماينفع .
_وبعدين ما إنتِ متجوزة أهو أخدتي إيه من الجواز يعني!
=والله يابنتي عندك حق ،، ده الواحدة قبل ما تتجوز كانت جمال إيه ولبس إيه وراحة بال إيه لكن دلوقت البيت وعيالي اللي ربنا ينتقم منها دول تاعبني يابنتي والله .
_إستهدي بالله ياست الكل.
=أومال إنتِ مين؟
_أهي بدأت تفقد الذاكرة وهتتعبنا ،، أنا ياماما عيالك اللي ربنا ينتقم منهم .
=يعني إنتِ يابنتي مش موافقة على العريس؟ لو مش موافقة خلاص ياحبيبتي مش هضغط عليكي ..
رديت بفرحة_ أيوة ياماما أنا مش موافقة فعلاً .
=روحي يا أميرة يابنت بطني منك لله زي ما إنتِ دايماً كاسرة فرحتي كده وواجعة قلبي ..
_قومي ياماما إتكلي من هنا علشان المود مش طالبك!
تاني يوم في الكُلية مسكت الـ Note بتاعتي وبكُل هدوء العالم بدأت أكتب عن شخص وسَرحت في التفاصيل مفوقتش غير على إيد ريم وهي بتخبط على إيدي ..
بغمزة=اللي واخد عقلك!
قفلت الـ Note بسرعة وحطيتها في الشنطة _آ لا لا مافيش حاجة هيكون في إيه يعني!
=طب ركزي معايا ممكن!
بصيتلها بإهتمام_ معاكِ.
=بُصي ياستي في واحد عاوز يتقدملك و
_مش موافقة.
=طب مش لما تسمعي ده مين ومواصفاته إيه وبعدين تقرري!
_وأنا من إمتى بسمع يعني؟
=ماهو إنتِ يامجنونة وناوية تجننيني يا بتحبي واحد ومخبيه عليا ولو كانت شكوكي دي صح هتبقى أيامك سوده.
بدأت أتوتر _ و و واحد! هو أنا بتاعة كده؟ عيب عليكي.
بصتلي بشك= هصدقك مع إني مش حساكي ،، همشي دلوقت علشان عندي مُحاضرة ولينا كلام تاني بعدين .
هزيت راسي بشرود " ماهي مينفعش تعرف إني بحبه ،، مينفعش تعرف أبداً إني بستناه في البلكونة كُل فرض وهو رايح يأذن في المسجد علشان أشوفه وهو نازل من بيته مستعجل جداً علشان يوصل المسجد أول واحد ويأذن بصوته اللي فيه كُل هدوء العالم وبعد دقايق يبدأ يصلي بالناس وأنا مبعملش حاجة غير واقفة سرحانه في صوته اللي دايماً خاطفني ،، مينفعش تعرف إني من أول مادخلت ثانوي وعرفت يعني إيه حُب حبيته هو ،، حبيته بدون أسباب ،، ده حتى عُمره ماوجهلي كلمة ولا نظرة من باب الصدفة ،، أنا حبيته علشان هو زين مش علشان حاجة مُعينة فيه ،، أنا لو دورت في تفاصيله هلاقي كُل حاجة حلوة وأنا مُتأكدة "
مر ساعتين من غير ما أحس نهائي في الساعتين دول دماغي موقفتش تفكير فيه حتى القهوة سقعت من غير ما أخد بالي ،، لاقيت ريم جاية عليا وقعدت تاني ..
=ممكن أفهم سبب رفضك للعرسان.
رديت بلا مُبالاة _أنا مبرفضش حد لشخصُه أنا رفضي كُله للإرتباط بشكل عام!
=وحضرتك رافضة الإرتباط بشكل عام ليه إن شاء الله؟
رديت بسخرية: من جمال العلاقات حواليا ..
=ملكيش دعوة بحد مش كُل الناس وحشة .
_ ومش كُل الناس حلوة برضو ،، الجواز مش واحد جه اتقدم واتوافق عليه ونتجوز ونخلف وبس ،، الجواز ده حياة تانية ،، حياة بتقوم على التفاهُم قبل الحب ،، حياة بتقوم على الراحة النفسية ،، بتقوم على التفكير في مستقبلي مع الشخص ده ،، عيلنا هيبقو إزاي؟ هل هو ينفع أب فعلاً! هل هو شخص صالح؟ هل هيقدر يصاحب أولادة ويحتوي بناتُه ويحتويني أولهُم؟ هل هيكون شخص نقي ،، شخص يستحمل زعلي قبل فَرحي ،، شخص يشوف مني كُل الوحش وبرضو يفضل شايفني حلوة ،، أنا عاوزة حد يشوفني بعين الحُب!
=وده هنلاقيه فين بقى إن شاء الله؟
بشرود_موجود ،، أكيد موجود.
=طب قومي بينا نمشي ياست المُتفائلة.
"رجعت البيت عملت قهوتي وخرجت أقعد في البلكونة شوية ،، لسه بقعد لاقيت بوكس هدايا" .
_إيه ده؟ مين اللي جاب ده هنا؟
"بدأت أفتحه بهدوء لاقيت مُصحف لونه روز 'اللون الأقرب لقلبي' فتحت أول صفحة لاقيت مكتوب فيها ' بأمنك أمام الله وبيدكِ كِتابُه أن تحفظيه عن ظهر قلب' "
_طب والله فِكرة حلوة أنا كان نفسي أوي أكمل حفظ قرآن ،، لعل دي رسالة ربنا ليا ،، بس ياترى مين اللي جاب البوكس ده!
"أخدت البوكس شيلتُه في دولابي وغطيته بالهدوم ألا ماما لو شافته هتفتحلي س و ج وهي مابتصدق أصلاً" ورجعت البلكونة مسكت المُصحف وبدأت أراجع اللي كُنت حفظاه زمان لقيتني حافظة 5 أجزاء ،، لا بأس بدأت أحدد كم لنفسي وأحفظ وإستمريت عالحال ده شهرين كُل يوم أحدد كم وأحفظه وأروح لماما تسمعهولي لحد ما بالفعل ختمت المُصحف حفظ ،، مش فاهمة اللي بيحصلي بس كإن المُصحف ده جه في وقت أنا كنت محتاجاه فيه ومحتاجة حد ينبهني إني أحفظه أياً كان الحد ده مين "
فضلت واقفة في البلكونة شوية مستنيه ريم تظهر في البلكونة اللي جمبي علشان أفاجئها بإني ختمت المصحف مرت دقايق قليلة ولقيتها خرجت فعلاً ..
=إيه يازفتة إنتِ مصحياني الساعة 2 بالليل ليه؟ عملتي مُصيبة إيه!
ببراءة_ ختمت القُرآن.
=إحلفي!
_وحياتك عندي .
بهزار وعدم تصديق=لا لا إنتِ بتتمنيلي الموت أصلاً ،، بصي إحلفي بالله .
بنبرة صوت عالية جداً من فرحتي اللي مكانتش سيعاني _ ختمت المُصحف والله العظيم ختمتهههه.
••إنتِ ياحيوانة صوتك عالي ليه كده؟
_م م م ماما ؟
•• إيه هتمأمئي كتير؟ وبعدين صوتك عالي ليه الناس نايمة!
_بعبر عن فرحتي بإني ختمت القُرآن ياست ،، وبعدين هو أنا ليا غيركم أفرح معاه؟
•• عُقبال ماتفرحيني بقى!
بإستخفاف_ليه ياماما خير مالك إنتِ زعلانة ولا حاجة؟
••لا ربنا مايجيب زعل خالص ده حتى هنقرأ الفاتحة يوم الجمعة الجاية.
_طب مانقرأها دلوقت والنبي والنبي.
••نقرأها إزاي يابنتي من غير العريس ولا إيه ياريم؟
بصيت لريم بـ شر = لأ ويت كده؟ عريس! وريم تعرف؟ وإيه ده في قراءة فاتحة الجمعة الجاية؟ وأنا معرفش! إنتو كنتو ناووين تعملوهالي مفجأة ولا إيه وأدخل من باب الشقة وأنا راجعة من الشغل ألاقي البلالين في الشقة وهو جايب دبلة وواقف ورا الباب وهوب يشدني لحضنه ويقولي ياااه ياعبصمد و ..
••عبصمد!
_إيه ياماما هي دي اللي لفتت نظرك؟ ملفتش نظرك مثلاً إني مبشتغلش؟ أو إن لو حد فكر ياخدني في حضنة هندمه على حُضنه!
•• لا حول ولا قوة إلا بالله ،، دايماً كاسرة فرحتي كده منك لله ،، أنا داخلة أنام .
ريم بدأت تتلجلج= ل ل لأ ياطنط إستني متسيبينيش معاها!
_بقى كده ياريم؟ بتتفقوا عليا في ضهري إنتِ وأمي! صحيح الضربة مبتجيش غير من أقرب الناس ليك ،، ماشي ياصاحبي أو ياللي كنت فاكرك صاحبي.
=إنتِ يامجنونة إستني هنا! إنتِ يازفتة يخربيتك ..
"دخلت أوضتي وسيبتها بتكلم نفسها ،، أنا أخدت الموضوع بهزار لكن أنا للحظة حسيت قلبي واجعني ووجعني أكتر وأنا ببص ورا ريم وشوفت خيال حد واقف ورا الستارة ،، أكيد ده زين و كان بيطمن عليها ،، أنا مش عارفة إزاي أمي والزفتة ريم دي يحطوني قدام الأمر الواقع بالطريقة دي! ،، مكنش قدامي حلول غير ربنا طبعاً هو الملجأ الأول والأخير بدأت أصلي القيام وعلى لساني دعوة واحدة بس يارب راضي قلبي وإجبرني"
تاني يوم كان الخميس ،، حضَراتهم قايلينلي قبل ماحَضْرته يجي بيوم يُعتبر بس ماشي والله ماهعديهالهُم ،، في إحساس غريب جوايا أنا حاسة إني راضية ومرتاحة ،، مستغربة نفسي جداً ،، كنت فاكرة إني هنهار علشان هتخطب لشخص غير اللي قلبي إختارة بس أحياناً بيبقى للقدر رأي آخر"
نزلت إشتريت فُستان إسود تُل من تحت وخمار موڤ وتاني يوم لبست وكُله تمام ولاقيت ماما بتنادي عليا علشان أخرج بالصنية "
••إنتِ يانيلة ،، تعالي طلعي المشروبات دي للناس.
_إيه ياماما مشروبات إيه هو إحنا في قهوة؟ ماعنهم ماشربو على فكرة.
••لسانك ده لو قال كلمة غلط في القاعدة هحرمك منه ،، أمين؟ أمين إن شاء الله.
_إش إش إش ،، جيبتيها منين دي ؟
••من على الفيس بوك في جروب روشة وعاملة دوشة ،، عجبتك؟
_روشة وعاملة دوشة؟ إيه ياماما الطفولة المتأخرة دي؟
••إخرسي ياقليلة الأدب ويلا علشان إتأخرنا عالناس.
"خرجت وأنا بتأفأف وببرطم في سري و الزفتة ريم دي إتأخرت ليه هي كمان"
دخلت بهدوء وقولت _ السلام عليكم.
كُنت غاضة بصري بس أول ما قال = وعليكم السلام ورحمة الله وبركاته لاقيتني ببصله تلقائي كده ومتنحه .
ريم بمكر =ها ملكيش حجة أهو ،، بتحبيه من زمان وكلنا عارفين وهو بيحبك معرفش على إيه ،، نقرأ الفاتحة.
_لأ .
"لاقيتهم كُلهم بيبصولي بإستنكار اللي هو هبلة دي ولا إيه" .
_نكتب الكتاب على طول
