رواية بنات الملا الفصل العاشر بقلم رغد الموالي
هل كان ينبغي أن يكون اول ألم لي في صغر سني؟
#بنات الملا....
#رغد_الموالي...
بصباح كان المفروض يكون مثل كل صباح لكن هذا الصباح وهذا اليوم خلاني ابد ماانساه
صحيت على صوت صراخ امي
فزيت من فراشي شفتها تلطم على وجهها وهي كاعده يم جدي وابوي مدنك يمه ويبجي
رحت تقربت منهم مااعرف ليش البجي وشنو السبب
تسائلت... ماما شبيج شبي جدوو
بدموع وصوت متعوب... مات جدج مات
بقيت متحجره بمكاني واباوعله كانت اول مره اشوف وجه انسان ميت
كان وجهه نوراني بي صفره
صفرة موت مغمض العين ومدد كأنه نايم
للحضات تذكرته وهو يكلمني وهو يعلمني
حجي شعبان... بويه جواهر اريدج تديرين بالج على ابوج
تبقين طول عمرج انتي وخواتج رافعين راس ابوكم
..... وتذكرته بسوالفه الحلوه وقصصه ايام ماكنا بيت جدي الكبير
كانت الطرمه جبيره وهو يفرش الحصيره يوميه بالليل ويلمنه داير مدايره
ايام الصيف الحاره جنه نتحمل نهارها واحنه نصبر نفسنه من يجي الليل شوكت نفرش المغربيه ونجي للفراش بالليل نلكاه بارد
ونلتم على سوالف جدي الحلوه وايام ماكان طفل صغير
سولفلنه مره لما هو كان طفل...
... جنت طفل صغير اروح وي ابويه يوميه للبستان اكعد وياه وي صلاة الفجر نكعد نصلي ونلكه امي مسويتلنه خاثر نوبات جبن
ونتريك هاي تكعد تخبزلنه الخبز الحار والدبس الي هي مسويته والخاثر والجبن هم هي تسوي نتريك ونطلع نهّم للبستان
وكت الزرع ازرع وي ابويه جان يعلمني شعبان ازرع هنا
شعبان هيج سوي وهيج احفر وهيج ازرع
جنت افرح حيل من اساعد ابويه وازرع
وكت الحصاد جنت اعبي وياه
عمري جان 9 سنين واشيل سلة الخوص الجبيره واروح احطها بالعربانه وارد ارجع لاابويه وهم اساعده
ابد ماجنت اتكاسل ولا اضوج
جنت اتعب مرات اجوع امي تدري بينه اني واخوتي نجوع ف تخليلنه خبز دكللنه يمه من تجوعون حيشو خضره من البستان واكلو سووها لفه واكلوها
وصدك جنت اطلع خبز واحيش عضود بصل اخضر افشك طماطيه واسويها لفه واكلها واخوتي واخواتي هم نفس الشي
لما جنه نرجع من البستان بالصيف دنيا حاره نااااار ابويه ينقهر علينه لان بالحر
جان يسويلنه مثل الخيمه بأغصان الاشجار واحنه نفوت جواها نستضل بورق الاشجار واغصانها جان يخف علينه الحر وخطيه هو يبقه بالشمس يقود الحمار
لما يوصل للبيت يكون تعبان حيل يگوي عضمه بالغده الي مسويته امي
تثردلنه بالباميه نوبات تشريب نوبات فاصوليه هالقاسمه الله ويتغده
جنت اشوفه وهو يتمدد تعبان والحر متعبه اكثر
بحيث يتعرق وعرق جبينه نازل من عنده
اروح اجيب المهفه
مهفة الخوص واجي اهفيله هو ونايم
نبقه اني واخوتي واخواتي نتناوب عليه نهفيله لحد مايكعد
خطيه عود هو على الهوى ينام يغط بنومه ولمن يكعد ويلكانه نهفيله يحتضننا ويقبلنا ويتشكرنه وينقهر لانتعبنه احنه وهو نايم
جان فد حنينن
ربانه ونعم ماربانه
رجعت من ذاكرتي لصوت امي وهي دكلي ولج كومي فتحي الباب
رحت اركض وفتحتها للباب واجه عمي عبد الودود ونسوانه وجهالهم
وصراخ واللطم صار اكثر
هناك ونسوان المنطقه صارت تدك الباب
معودين شكووو
شصاييير افتحو الباب
رحت فتحتها وفاتو النسوان ولكوهم ملتمين على جدي
صارو يهدئون بينه لحد ما جروهم لاامي ونسوان عمي عنه
وصارت حجيه فتنه تكلم ابويه وعمي
... انا لله وانا اليه راجعون
هذه حال الدنيا يوم حلو ويوم مرّ
اصعب شي على بني ادم لما يفقد أحبائه
وناسه وأهله
الله يساعدكم ولدي ويكون بعونكم
اعرف حجم المصيبه والقهر لكن شنسوي شبدينه
كومو ياولدي كومو وشيعو ابوكم وخلو يرتاح بگبره
من سمعو هالكلام نهارو بالبجي اكثر
باوعت حجيه فتنه للنسوان واشرتلها بعينها ان يجون وراها
راحو النسوان وراها بعدها شويه بدقائق تقريبا
فاتو الزلم وشيعو لعمي شعبان
لااله الا الله.... لا إله إلاّ الله
وهم يمشون وابوي وعمي شايلين الجنازه ويبجون
طلعو من البيت بعد مارفعو الجنازه ثلاث مرات ونزلوها للكاع وراها راحو
لحد الان مااعرف ليش رفعوها ونزلوها ؟
للحضات تحول البيت الى حزن
وصار مابي غير بس اصوات النعي والبجي ومواساة النسوان لاامي ونسوان عمي
ايام الحزن تمر بتثاقل متعب عكس ايام الفرح تماما
مرت الايام وصار مكان جدي فارغ
احس كل الاركان والحياطين تصيح وينه
واحس كل البيت اشتاق لسوالفه
رحت وكفت جوه شجرة التين وباوعتلها
لكن اخترقت عيوني اشعة الشمس من بين اوراقها
خليت ايدي حتى تحجب اشعة الشمس ورجعت باوعتلها
احسها تسألني مراح يرجع؟
جاوبتها واني اكلمها كأني أكلم انسان
لا مراح يرجع جدو مات بعد شيجيبه
انتي هم شتاقيتي لسوالفه وقصصه؟
هم جنتي تسمعين مثلنه قصصه مو؟
هم تتشوقين حتى تعرفين شنو حيصير بعد كل حدث
تعرفين ياتينه؟
اني حيل اشتاقيتله
فززني صوت دره وهي تتكلم... واني هم جواهر
يمه بسم الله شوكت جيتي
دره... هسه اجيت وي منو تحجين
جواهر... وي شجرة التين احسها اشتاقتله لجدو مثلنه
دره... اي والله اشتاقيناله وشتاقينه لقصصه الحلوه
جريت نفس بحسره وبقيت واكفه لدقائق بعدها سمعت صوت امي صاحت
جواهر... هاي امي تصيح مو؟
دره.. اي
يله امشي نروحلها... دفعتها بالكرسي مالتها ورحنه لاامي
بسعاد... وين جنتو
جواهر... بالحديقه
بسعاد... يمه جواهر تعالي عينج على اختج ماس بين مااسبح واطلع
جواهر... اي يمه ماشي
كعدت يم خواتي وطلعنه العابنه ك العاده وبقينه نلعب بيت بيوت لحد ماتطلع امي من الحمام
الايام صارت تجري مثل سرعة البرق
ابويه توسع شغله اكثر وصار معروف رسمي بالملا عبد
الناس صارت تجي للبيت احيانا من مايلكوه بالمحل
يداوي بالعطاره بالطب الاعشاب ويعالج روحانيا هم لهسبب كثرة الناس عليه
عشنه ايام هادئه تسودها محبة ابويه لاامي
وثنينهم قلب على قلب
واحد عينه على الثاني
ابويه جان فد حنين ويعامل امي مثل مايعاملنه واكثر
يحبهاحيل
جنه نشوف هذا الحب وهو يلمع بعيونهم
والابتسامه الي طالعه من القلب
عشنه مدللات بجال ابويه عبد المجيب
ماشفناه فد يوم ضاج لان بس بناتعنده ماعنده ولد حاله حال الناس جان انسان قنوع وراضي بلي الله رازقه اله
بالعكس كان سفره نه دوم بشغلات يشتريها النه
جان فرحان بينه وهو يباوعلنه شلون دانكبر كبال عيونه
بيوم ندكت الباب بالليل فتحها ابويه للباب واجت مره مبينه شابه بااول عمرها وبيدها طفل صغير وياها مره عجوز
المره العجوز... هذا هم بيت ملا عبد
عبد المجيب... وصلتي يمه كولي
المره العجوز... يمه عندي هذا ابن ابني لايهدأ ولايسكت ليل نهار يبجي متكللنه شبي
شو سألنه كالو لابسه جني
عبد المجيب... ضحك بأستهزاء.. كولي يالله حجيه وينه وين الجني يلبسه لهذا طفل ابن شهور خو ماكو شي
المره العجوز... والله ياابني ماادري غير يكولون
عبد المجيب... تفضلي حجيه خل نشوف شنو سالفة هالطفل
كعدو وصار يسأل ابويه... من شوكت هيج حالته
المره العجوز... من اسبوع
صار يحرك بعضلات جسمه لحد مااجه على ايده لزمها وصرخ الطفل
تبسم ابويه بمعنى عرف العله
باوعلي وتكلم... جواهر ياب جيبيلي الدهن مال الاوجاع تلكي بالرف يم الميز
رحت بسرعه جبته اله واجيت
هاك يابه...
عاشت ايدج ياب
باوعت المره العجوز اليه وردت باوعت لابويه الي جان يدلك لاايد الطفل ويقره عليه
حتى الطفل هدأ وسكت بعد ماجان يبجي
المره العجوز... ملاااا...
باوعلها بمعنى شنو..
وكملت كلامها... الجبيره هاي؟
عبد المجيب.. جواهر بنتي اي هي الجبيره وعندي بعد 4 بنات
المره العجوز.. وولد؟
عبد المجيب.. الله مارزقني بالولد
المره العجوز.. قل اعوذ برب الفلق.. صلي على النبي ملا وانت تدلك لحفيدي
عبد المجيب... جاوبها بأنزعاج.. اللهم صلِّ على محمد وآل محمد
المره العجوز... الله سبحانه وتعالى يرزق على النوايا ورزقه لاابني سلام بولد ثنين شحلات الولد تخلفي وتعوفي للكاع هي تربي اما البنيه همها للممات
مارد ابويه عليها وهي واصلت كلامها...
.. انت متزوجت على امهم
... وليش حتى اتزوج؟
... تجيبلك الولد لعد خو مييقون البنات ماعدهم اخوه باجر عكبه يكبرون وتكبر طلايبهم ومصايبهم اذا ماعدهم اخ يكسر عينهم ويعرف كل سوالف الشباب يمشوهن عليك كل سوالفهم
بقه لازم الصمت شويه ابويه بعدين شدد على كماط الطفل وسلمه بيد العجوز وتكلم
اذا بعائلتكم عدكم البنات عار والنسوان تمشي بدروب مو حلوه فهاي مشكلتج حجيه انتي ادره بيتج شكو لهسبب صايره بيج عقده من البنات وتكرهين البنات
واذا برأيج البنات مايضبهم غير اخ على راسهم فأولا اني بعدني بالوجود واعرف شلون أربي بناتي
وثانيا مو كل ولد من كبر صار رجال يسد عين الشمس تره يامكثرهم الي المره ارجل منه ومربيته ومعيشته هم
اكو رياجيل نفسها مكادره تعيشها واكو نسوان معيشه عوائل
منو هذا الي كال المره ماتتربه ولاتنستر الا
اذا رجال على راسها منو خله هالاحكام هاي ورسخها بدماغكم
كلشي خليتو بلي يعجبكم والي يناسب مزاجكم
المره لازم ماتشتغل وتعيش روحها وضيفتها بالحياة تخلف وتنضف وتطبخ وراها تكبر تنذل بالعيشه وتصير عاله على خلفتها الي كسرت ضهرها عليهم
المره لازم تصبر ولازم تتحمل ولازم تكدر وتخدم لانها مره
والرجال لازم يكون مستقبل وشرط لولده اهم شي لان بنته باجر عكبه عيشتها على الرجال
والرجال الله اعلم شيطلع ابن اوادم مو ابن اوادم يصونها لا مندري عود هي وحضها ومن تجي تشكي نكللها شتسوين يابنتي قسمتج هاي حظج ونصيبج
والله حسستيني بزمن الجاهليه انتي واساسا زايد مني هالكلمتين الحجيتها وياج توكلي على الله وروحي
ومره ثانيه صفيها لنيتج ونية ابنج لان الضاهر طالع عليج علمود الله يرزقكم
مو كلمن خلف ولد هو بار تره دور المسنين متروسه
وعافها ومشى طلع وهي ضلت صافنه لكلامه
هناك انتبهت التفتت على جنتها
هذا شبي اكلنه وشربنه
مو انتي ياعمه كاعده وتذبيله بهذا الحجي نقهر الرجال منج
... وشكلنه عيني حجينه شي كذب
امشي عيني امشي ناس صارت متحب الي ينصحها
راحو وسديت الباب وراها
فتت جوه لكيت ابويه مخلي ياقوت وماس بحضنه وزمرد يمهم وكاعد ويكلمهم بكل حب
عبد المجيب... باجر الصبح تجيج طيب حلاوه مو تدلل زمرده حبيبة گلب أبوها
بسعاد... يله يمه روحو نامو عاد الوقت تأخر
عبد المجيب... بعدها توها التسعه
بسعاد.. مو حلوه يتعودون على السهر ودوامهم باجر
عبد المجيب... هم صحيح
مشت الايام والشهور والسنين كبرنه وصارت اصغر وحده بينه ماس عمرها مايقارب ال 5 سنوات
كبرنه وصار عمري 17 سنه
ودره اختي 15
وزمرد 12
وياقوت 9
وماس 4
ابويه خط الشيب براسه ولحيته
السنين من تمر تنسيك ألالام صارت بالماضي مثل فقدان أحبه
صح متنسه احبابك واهلك وناسك لكن تتعود وتصير ذكرى مؤلمه حزينه
ابويه صفه هو وعمي عبد الودود وصارو گلب على گلب وكلما يكبرون كلما يزيد واحد حبه للثاني وخوفه عليه
ولد وبنات عمي عبد الودود كبرو
وصارو من عمر اخواتي الاصغر مني
نسوانه صفو ومابقو على مشاكلهم اول ماتزوجو التهو بحياتهم واولادهم
شيماء مرت عمي عبد الرحمن كرست حياتها لاابنها روح كل أملها هو
رفضت كل شخص تقدملها بعد عمي عبد الرحمن
جانت حلوه بشكل جذاب ملامحها البريئه والهادئه تجذب الكل
ابنها روح ماخذ جمالها لكن دمه وشخصيته بالرغم من هو صغير مثل عمي عبد الرحمن بالضبط
ابويه على طول يروح يتفقدها هي وابنها وينطيهم مصرف كل شهر وعلى طول تجينه هي وابنها روح الي بعمر ماس اختي الصغيره...
شيماء... أهلي دايضغطون عليه حتى اتزوج يابسعاد والله العظيم حتى بيت اهلي كرهته من وره ملحتهم من اول مااجيتهم مترمله كتلهم الي بطني ولد او بنيه اني ابقه اربي وابقه على ذكرى عبد الرحمن كالولي هاهييه الي تردي يجرالج وره ماجبت روح ابني رادني ابن عمي على مرته ومرته من سمعت قومت الدنيا وماكعدتها كالت اتطلك
كتلها عيني اني ماريده لرجلج انتي شداتحجين اني صرت مره لرجال واحد وباقيه على ذكراه وباقيه اربي ابني روح لما الله ياخذ امانته ويجمعني بي بالجنه
يله كفت عني والا هم داتطلع عني حجي مو زين بالمنطقه
رد وراهاابن خالتي وهم امي لحت عليه شكثررر وكتلهم احركها لروحي يله جازو عني
وهاي كل بين فتره وفتره يجون خطابه اخر شي اجاني وسكتت...
بسعاد... منو اجه عليج هسه
شيماء... جرت حسره وغوركت دمعتها ماتحملت بجت
بسعاد... احجي منو اجاج ليش تبجين
شيماء... فهد
بسعاد... بأستغراب يافهد
شيماء... فهد اخو شهاب ابن حجي ذياب
بسعاد.... شنوووووو شتحجيييين
شيماء... لزمتها من زندها بيدها الاثنين بتوسل امانة الله لاتحجين ولاتكلين لابو جواهر راح احجيلج واريدج تساعديني
بسعاد... ليش شصاير
شيماء.. باوعت الي بمعنى البنات ماكدر احجي وامي بسرعه فهمت كالت يمه جواهر سويلنه جاي وانتي دره اخذي خواتج وروحي بغرفتكم دنحجي اني ومرت عمج
رحت اسويلهم جاي وبقيت اتسائل شبيها عمه شيماء وليش هيج مقهوره وتبجي
وهذا عمو فهد شعنده يريدها وهو مو متزوج وعنده جهال
سويت الجاي وشلت الصينيه ورحت لكيت دره مخليه اذانها وره الباب تسنط اجيتها وضربتها على الخفيف على كتفها
ولج دره شتسوين
همست شششششش ودي الجاي وتعالي احجيلج
رحت فتت وديت الجاي باوعت لعمه شيماء جانت تمسح بدموعها وامي تهز راسها بتأسف ودكول حسبي الله ونعم الوكيل
طلعت من الاستقبال ورحت باوعت الدره كالت تعالي لحجيلج امشي وراي صارت تحرك بكرسيها بالعاده يكون أبطأ على عكس ما يدفعه شخص
دفعتها ورحنه كعدنه قريب على شجرة التين هزيت براسي بمعنى شنو احجي شصاير
دره... التفت يمنه يسره وتكلمت ولج عمو فهد مخلي عينه على عمه شيماء ومرتين لاحكها من طالعه من بيتنه
ويشمرلها كلام
جواهر... شنووو شيكللها
دره... يكللها هنيال الجان ماخذج
همزين سكنته الكبور لو ادري بي ماخذ هالحور العين جان من الخطوبه نيمته بالكبور وعمه شيماء ملتفته عليه وباصقه بالكاع وماشيه
جواهر.... عززززه وشلون
دره... ماادري دكللها تقدملي واهلي ممصدكين لان هم زناكين حيل كايلتلهم جتال قصص وروايات عراقية كرار صلاح رجلي هذا يكلولها اخوه مو هو واخوه ومات ورجلج ومات ومدايفيد
جواهر... خطيه عمه شيماء حقها تنقهر ومتقبل هو احنه وبيت شيخ نعمان عداوه بيا حق يجبروها
دره... اي والله
شويه وطلعت عمه شيماء ولما فتحت الباب داتطلع تفاجأت بفهد واكف براس الفرع وعينه على بابنه
تلكأت وكالت لاامي... شوفي بسعاد شوفي المضعوف البخت وين واكف
بسعاد... تجاهلي ولاتهتمين اله ميكدر يسوي شي المنطقه رايجه بالناس
شيماء... لا على بختج حهتم لواحد سكير مثل هذا تلكي المشروب ضارب براسه حتى ميدري بروحه وين يله اروح اني مع السلامه
راحت بقت تباوع امي لحد ماتخطته عمه شيماء لفهد وفهد مشى وراها مباشرة
امي راحت تركض خلت العبايه على راسها وكالت بأستعجال اذا جا ابوج كليله راحت وي عمه شيماء بشغله
طلعت وبقينه اني وخواتي بالبيت
تأخرت أمي ماأجت وره وين يله اجت وتنهت
كالت... ابوكم مااجه
جواهر... لا يوم مااجه بس انتي شبيج
تكلمت وعلى نفس التعب كالت جيبيلي كلاص ماي ابلل ريكي نشف ريكي من الله ينشف ريكهم ونسلهم الوسخ
رحت بسرعه جبت كلاص الماي توها تشرب الماي واجه ابويه وياه ابتسامته الي كلها حب وطمأنينه ومتفاركه ابد
عبد المجيب... هلا بالبنات وام البنات كاعدين هنا اليوم مو بالعاده
بسعاد... تعال ابو جواهر عندي كلمتين خل احجيهم الك
عبد المجيب... يالله كولي خير خو ماكو شي
بسعاد... ولد حجي نعمان شوكت ناوين يجفون شرهم عن العالم
عقد حاجبه بغضب شنو شبيهم وياكم شكو احجي
شيماء اليوم جانت عدنه والافندي جان واكف براس الفرع ولما فاتت شيماء من يمه مشى وراها
ضرب على فخده بغضب ابويه وكال ياابن ال
وسكت ماكملها احجي اي
اني لبست عباتي ورحت وراهم وبقه يمشي وراها اخر شي حتوصل للبيت يم الباب قبل لاتدكها جان فرعهم فارغ واني ماخليته يشوفني ردت اشوفه شحيسوي تالي
سمعته يحاجيها
اقبلي وليش حتى متقبلين وباقيه على ذكرى هذاك الفكر عيشج بنص اهله اني اكعدج بيت وحدج واعيشج ملكه
عبد المجيب.. دقيقه دقيقه على شنو تقبل
بسعاد... هو خاطبها من اهلها وهي رافضه
عبد المجيب... اي كملي
بسعاد... اي عاد شنو هي خطيه ماردت عليه وصارت تدك بالباب واهلها مافتحوها للباب جانو طالعين وهذاك كيف من شاف الفرصه صارت فرصتين داتدك الباب ولزم ايدها وجان تصرخ شيماء اني متحملت كبل اجيت ونزعت النعال تكرم وتهجمت عليه ماخليت
كبل وله وراح بس شنو بقت ترعش مثل السعفه خطيه شيماء توني داجيبها واجي واجت مرت اخوها وراحت عاد لبيتهم
عبد المجيب... بخرعه... شتحجييييين هذا الكلب تحارش بمرت اخويه والله اليوم لااكلب الدنيا على راسه
نهض ابويه بغضب وراح جر السلاح ومن شافته امي رادت تستوقفه
... دخيلك ياابو جواهر عوف السلاح والدم الله يخليك لاتفتح جروح كوه نلجمت
عبد المجيب... بغضب وخرررريييي تردين هذا النكس يدوس على عرضنه ونبقه بمكانه مثل النسوان منسوي شييييي وخررري
بسعاد... الله يخليك عوف السلاح
مارد ابويه ونتر ايدها عنه وطلع بغضب
امي بقت تلوب تضرب ايد بإيد وتروح وتجي اخر شي متحملت لبست عباتها وطلعت وره ابويه
بقينه احنه ننتظر بخوف ياربي شلون ياربي لايكتلون ابويه دخيلك ياربي تحميه
تذكرت جدي وكت ماجنه نمر بضيق جان
يكول... ياأبا الغيث أغثنا..
... ياعلي ياأبا الحسن أدركنا...
وبقيت اردد بخوف وخواتي وراي يردون فتحنه ايدنه للسماء ندعي يحميه لاابويه
سادنه صمت قليل وتكلمت ياقوت
يعني بابا راح يقتل عمو فهد بالسلاح
زمرد... اي لان هو يتحارش بعمه شيماء
جواهر..بتحذير غاضب... اشششش شنو هذا الكلام زمرد مو عيب تحجين هيج
والله اذا سمعتج تحجين هيج بعد لاأكلها لاامي عليج وتعرفين شتتصرف وياج
زمرد... اصلا اني سمعت امي تحجيله هذا الحجي لاابويه
جواهر... اي متحجين ديربالج
زمرد... اي
دره... هو ليش هيج ملاحكها لعمه شيماء وخاطبها هم مو متزوج شيريد بعد
جواهر... زلم بعد مايسد عينها الا التراب
بعدين عمه شيماء متشوفيها شلون جمال وبعدها صغيره
دره... والله خطيه عمه شيماء رغم هذا جمالها لاتلبس مثل النسوان لاتكشخ لحد الان بالاسود وحواجبها شثخنها
جواهر... حقها عمي عبد الرحمن بعده بأول شبابه ومات وعريس وفوك كل هذا والعالم ماعايفتها بحالها
دره... خطيه ياعمه شيماء
شويه وفاتت امي وتضرب على و جهها
كمنه بفزه... ها يمه احجي شكووو
ابوكم اخذته الشرطه لاااا وفوكاها هو وفهد
..... شنوووووو
.... بقت تتلفت فاتحه ايدها الاثنين وتحجي... شلون وين انطي وجهي ابوكم اخذته الشرطه شلووووووون
... شلون جتي الشرطه شدراها
... حظنه
حظنه جايه الدوريه على شحاذه الكصاب والعركه صارت كدامهم وجروهم ثنينهم وياه
جواهر... شلون هيج
... فهد تجاوز على الشرطه وجرتهم ثنينهم
... وشلون يمه شحنسوي
... ننتظر فرج الله شنسوي يعني
ثاني يوم لاحس ولاخبر عن ابويه امي لبست عباتها وطلعت
راحت لعمي عبد الودود تحجيله بلي صار
تأخرت امي كلش تأخرت يله اجت هي وابويه فرحنه حيل من شفناه لاابويه
... يااااابه همزين طلعت من السجن حمد لله على سلامتك يابه
... الله يسلمكم ياب
بسعاد... فوت جوه ابو جواهر ارتاح اكيد تعبان
عبد المجيب... هز براسه متحسف وتكلم.. ااااخ اااخ من هذا النذل فهد نوب حطونه وجه بوجه اني وياه بالسجن ويكلي انت مخلي عينك عليها وهيج صايرلي حماي العرض
بسعاد... لاتهتمله هم ذوله ولد حجي نعمان طول عمرهم جسرين ويتعدون على الناس وعبالك العالم ماوراها احد
عبد المجيب... اي مو علساس اني سكتتله
هالنذل هذا
بسعاد... عوفه هو وربه دائما ردد حسبي الله ونعم الوكيل
عبد المجيب... ونعم بالله
دخل ابويه لغرفته ينام ويرتاح جان مبين عليه التعب
بقينه كاعدين اني وخواتي بره بالطرمه نكمل دروسنه
شويه. اجت امي كعدت وصارت تضربها صفنات وتحجي وي روحها
عفناها براحتها شويه وتكلمت اكلج جواهر
هي جميله مرت عمج مسائلتج شي عن شيماء
جواهر... مثل شنو
بسعاد... مثل جياتها عدنه كلامنه سويه؟
جواهر.. لالا يوم اني اصلا أي شي يسألونه بي نكللهم مندري
بسعاد... اي عفيه بنتي ابد لاتحجين شي لااحد وخصوصا نسوان عمج التلاثه
هاي عندج بس شيماء تكدرون تعتبروها اختكم الجبيره
رجعت لحسباتها وكأنه صاير شي ثار فضولي اعرف شنو؟
ثاني يوم اجت عمه شيماء بعد ماوصلها اخوها جنه نفرح حيل ب روح ابنها نبقه نلعبه من يجي لحد مايطلع
كان طفل جميل و فقير وهادىء عمه شيماء تعبانه عليه بتربيته كلش ومهتمه بي لدرجه مو طبيعيه
بالصدفه واني اوديلهم الكيك والجاي سمعت امي تحجي
... سمعي ياشيماء الا هذول نسوان حماج ديريالج منهم ابد مايحبولج طرف ماصدكو سمعو هالمشكله هاي عنج ونزلو بيج كلام باطل
شيماء... مثل شنو هالكلام هذا
بسعاد... شوفي داده اني مااحب انقل كلام وودي وجيبي بس اني دااحذرج من هالمله هاي انتبهي على نفسج منهم
شيماء... هذني كل عقلهم راح اتزوج عبد الودود والله بطرانات ليش عبد الودود بعمري من جيلي حتى اتزوجه اني عندي ابو روح بالدنيا بالنسبه الي عايش واني زوجته وعلى ذمته عبد الودود منو غيره منو
هه والله وكت صارت النسوان تخاف على رجولتها مني والزلم عينها وكحه متنزل للكاع
... خلص لعد انتي ديري بالج على نفسج
هنا وصاحت امي جووااااهر وين الچاي
تفززت وانتبهت صار ساعه واكفه وره الباب شجاني هفففف هسه الچاي برد ارجع أحميه من جديد
اخذت الصينيه ورجعت حميته من جديد
وقدمته الهم وطلعت بسرعه
شويه وطلعت عمه شيماء كان السؤال الي يدور بعقلي شنو الي صاير حتى خلاها لاامي تحذر عمه شيماء من عمه حليمه وجميله ونعيمه شنو الي صاير؟
بيوم اجه ابويه على امي بلهفه وين امج
جواهر.. جوه هسه اصيحها الك
عبد ا.. كليلها خل تلبس وتجي لبيت اهلي كليلها حليمه داتولد خل تجي يمها
جواهر... اي اي صار
رحت بسرعه وصحت لاامي وامي بسرعتها خلت عباتها على راسها ولحكت ابويه اخذها وراحو
لما بدينه نكبر صارت امي تعتمد عليه اكثر شي تتركنه بالبيت وعيني على اخواتي
جانت دوم تعلمني.
جواهر يمه من اني طالعه وتندك الباب
لاتفتحيها لعبد بشر ديربالج يمه
جواهر وكتنه هذا مو حلو وكلشي وارد
جواهر... وان كانت فقيره وتريدني اساعدها
بسعاد... لا ياجواهر لااااا ايااااج خصوصا هالناس هاي لانها تخوف ماتعرفيها ماتدرين شنو وره جيتها هاي
هاي مرّه يمنه وحده جوارين اهلي جانو
هم هي بيتها وحدها راسها وراس رجلها فجأه ندكت الباب وجانت مره عجوز كالتلها اني اخذ خيره اذا تردين اخذلج خيره وهي كالتهلها اي حجيه فوتي وفوتتها بيتها وهذيج صارت تاخذلها خيره فجأه وجان تطلع وصله عليها مخدر وحطته على خشمها وخدرتهاااا وجانو اثاري نسوان وياها عصابه فوتتهم وباكو
ذهبها فلوس رجلها
لما كعدت وحست على نفسها وعلى الي صار كبل راحت لغرفتها دورت على الذهب على فلوسهم كلشي مالكت حتى لمن رجلها اجه وسمع بلي صار حلف يمين الا يطلكها وشيوخ وعشاير وكرابه يله قبل يرحعها
فيا بنتي واحد يأمن على نفسه وميفتح لباب لأحد أبداً
واني طالعه لا تفتحون الطباخ اخاف عليكم ولاتجون يم كهرباء عينج على اخواتج
جنه نطبق كلامها النه وكلامها النه بالحرف الواحد ودوم نشوف قراراتها وكلامها هو الصحيح
بدينه نكبر بوعي وفطنه وذكاء جنت دوم احس بالمسؤوليه وعيني على اخواتي وبيت اهلي خصوصا لما تكون امي ماموجوده
اصير اهتم أكثر وخصوصا دره اختي
جانت تلاكي صعوبات بهواي اشياء تريد تسويها وبسبب اعاقتها متكدر جنت اساعدها
رغم دره كانت تعتمد على نفسها بهواي امور الا انها احيانا تحتاح مساعده
دره اختي انسانه طموحه بشكل ابدا ماتسمح لإعاقتها إنها توقف أحلامها او تنكسر بالعكس جانت دوم تشجع نفسها بصنع المعجزات احيانا الكاها كدام المرايا وتحجي وي نفسها مثلا هي أشهر طبيبه جراحه بالعالم رغم اعاقتها
او أحيانا تتخيل نفسها أنها وزيرة الصحه
أو احيانا تتخيل نفسها أنها رئيسة شركات عالميه
أحلاااام جانت تخليني أضحك غصب عني لانها مستحيل تتحقق
أحنا وينه وين هالمناصب هذه فوووك فوك كلش شيجيب شيودي هو احنه بغداد ماشايفيها ولانعرفها شلونها كل الي نسمعه عنها حلوه وبيها اثريات وأشياء تاريخيه عريقه
جان يتولد عندي فضول ان ازور بغداد
وحتى اكون اكثر صراحه ومصداقيه جانت عندي رغبه بشغف ان ازور بغداد بالتاريخ لما ندرس عن بغداد كانو يسموها مدينة السلام كالت المعلمه ان بغداد بنيت بشكل دائري
لما بديت اجمع عنها المعلومات تولدت عندي رغبة الزياره لبغداد لكن ابويه رجال على كد حاله واحنه كوم بنات وعيشتنه على ابونه حتى ماكادرين نطلع ونشتغل ونعينه
احيانا كنت احس بثقل حملنه على ابونا كنت اخفف عن هذا الحمل بأن امتنع عن الطلبات صرت مااتطلب أي شي
ألبس كلشي الجان واكل اي شي واقبل بكلشي حتى كنت مصرف مااخذ مثل بعض البنات الي من العوائل المرموقه واشتري
لان هالشي ممكن يأذيه لاابويه
جنه اني واختي دره لما ابويه ينطينه مصرف كنه نضمه وثاني يوم نطي لااخواتي حتى مايرجعون يطلبون وابويه كان مايحب يرفض طلب ابداً
لعلنا أصبحنا نساء ونحن الطفولة مازالت تنادينا
لعلنا حملنا فوق اكتافنا مالم يكن مناسبا
شكرا لزيارتكم عالم روايات سكيرهوم
