رواية بنات الملا الفصل الحادي عشر بقلم رغد الموالي
جواهر...
عمه حليمه جابت ولد صار الولد السابع لعمي عبد الودود الفرحه كانت ترتسم على وجه ابويه اكثر من عمي نفسه
ابويه وهو يكلمنه عن ابن عمنه الجديد جان كله فرحه وحب وصل امي للبيت وهو راح للعطاره
لكن امي اباوعلها وهي مختنكه والحسره تارسه صدرها وكأنها تريد من يكللها شبيج حتى تبجي مباشرة
لكن من دون سؤال هي نزلت دموعها ومسحتها بسرعه لكن كانت تفضحه وتنزل لا إراديا
جواهر... يمه شبيج ليش تبجين
تكلمت بفضفضه كانت اول مره تحجي عن الي بداخلها وتفتحلنه گلبها... تكلمت والغصه والحسره واضحه من نبرة صوتها... جان طول عمري بنفسي أجيبله الولد لاأبوكم
جنت دوم اتمنه اسعده من كل گلبي لكن الله ماكان قاسملي
رفعت راسها للسماء وتكلمت... يارب لايصعد كلامي هذا ثكيل لكن حزت بخاطري وتكلمت استغفر الله العظيم
زمرد... ماما هو شنو جان ميفرح بابا بينه
بسعاد... بله يوم يفرح شلون مايفرح
لكن اليوم لما شاله لاابن اخوه وقربه لعنده فضحته دمعته ونزلت لكن من خجلته تحجج انها دموع فرح وقبله اني ادري بي هو اتمنه لو كان عنده ابن هم تمنه ان يكون عنده ولد لكن الحمد لله على كل حال.
جواهر ... حقه ابويه اني دااشوفه يتعب ويشتغل وحده جتف واحد واحنه كوم نسوان يعني لاسامح الله لو تمرض هم يبين علينه ونحتاج من يكللنه شلونكم
بسعاد... الله كريم يابنتي الله كريم كلها ارزاق وكلها بيد رب العالمين... صفنت وتكلمت
ايام ماجانت الحرب
حرب ايران والعراق جانت جيرانه راسها وراس رجلها الله سبحانه وتعالى مارزقهم بالضنه يتحسرون على الطفل وريحته
جانت جيرانه هذه اسمها لطفيه
عايشه وي عيالها وعيالها ناس فقراء الحال الى أبعد الحدود
لدرجة جانو يلبسون ملابس خفيفه بالصيف متدفيهم هواي ولما نسألهم جانو يكولون ان جسمهم متعلم على هيج جو
متبرد الهم
المنطقه كلها مصدكه بهذا الكلام
لكن للأسف اكتشفت أن هم كانو يتحججون
وان كانو يتحملون برودت الجو القاسيه لأن ماعدهم يلبسون ويتدفون
عدا اللهم اطفالهم الصغار يمكن جانو يوفرون لاطفالهم الصغار من مصروفهم اليومي
لكن لطيفه بالاساس ماعدها اطفال
جواهر... يمه وليش جانو يتحججون خوب يكولون ماعدنه وناس تساعدهم
بسعاد... بسم الله الرحمن الرحيم.. يحسبهم الجاهل أغنياء من التعفف
عزة النفس يابنتي عزة نفسهم هي الي تمنعهم ان يطلبون من الناس والا محد يكدر يتحمل هذه برودة الجو
لطيفه عاشت على حال زوجها الفقير وصبرت وياه جان ابوه لرجلها رجال جبير حنت ظهره السنين وكوم نسوان بالبيت واخوه ثنين وثنينهم جانو يشتغلون باللبن يبيعون لبن عرب وهاي على الي يطلعلهم
جان رجل لطيفه هم وياهم
مهم شاءت الاقدار بعد سنييييين من زواجهم ان تحبل لطيفه رجلها مالمته الدنيا من الفرحه بقه يخاف على لطيفه حيل
ويداريها لحد ما يوم الولد اجه وجانت البشاره ان لطيفه جابت توأم
الدنيا مالمته لرجلها من الفرحه طار طار من الفرح
مرت الايام وصارو يربون اولادهم كبرو شويه توهم مفرفحين ولد ال6 اشهر تقريبا ابوهم راح للجيش ك العاده لكن هذه الروحه روحه...
راح وطول حيل حيل طول هنا أهله صارو يدورون عليه يسألون عليه ربعه الي وياه يابه وينه محد شافه تاليها عرفو إن هو بالأسر
العيشه زادت مرارتها لطيفه معرفت شلون تدبر امرها وي هالاطفال الاثنين الي كلشي يحتاجون ويوم على يوم يكبرون وملابسهم تصغر عليهم ويحتاجون على طول ملابس وعنايه تامه خصوصا وهم توأم واول اطفالها
.... (سرحت شويه وبعدين تبسمت) وكملت
... أهلنا قبل يكولون الله مايغلق باب إلا مايفتح أبواب فرج ورحمه وهذا الي صار وي لطفيه بالذات
جواهر... ليش شنو صار وياها
... جواهر بدت تعتمد على نفسها وتشتغل اشتغلت بالحفافه والخبز صارت تخبز للناس وتحف للنسوان صارت تطلع مو بس مصرف عيشتها هي وجهالها لا صارت تطلع مصرف لعيالها هم تخيلي ياجواهر الناس تعلك صوبه بالشتاء هم منقله يعلكون فحمات ويتدفون عليها لكن لطفيه اشترت صوبه وبوكتها علاء الدين من هاي الضخمات العائليه تخبل
جواهر... وانتي شلون عرفتي ماما اذا هم جانو ميقبلون يحجون
بسعاد.. تجيج السالفه... صارت كل مره تعزل فلوس على صفحه تضمها تشتري بيها شغله للبيت وهم الي وياها من عيالها يساعدوها اذا بفلوس او شغل
صارت تصبغ شعر للنسوان وحنه للعجايز
العجايز جانو يخلوها للحنه شعرهم يصير برتقالي هي صارت تخلطها بمكونات تخليها للحنه تصيغ لون جوزي وهذا الشي خله الرزق يزيد عد لطيفه يعني صارو هواي يجوها ويردون من هاي الحنه تصبغلهم
والفلس فوك الفلس يجمع
تخيلي فجأه فتت لعدهم لكيت ام زوجها لابسه ذيج جاكيته الي تخبل والفوطه ( شيله) الي من هاي الغاليه مبين عليه جان سوادها فاحم وخامتها ثكيله
بدينه نعرف ان هم ماكانو متعودين كانو من الفقر يتعالون ويكولون منحتاج
لطيفه لمن كمت اترددلهم سولفتلي عنهم
خطيه صارت تذبها حسرات على زوجها
جابت الولد منا ورجلها تأسر منا
يعني هم رجعت نحرمت ولعيشه صارت كلها براسها وهي المسؤوله عنها..
فيا أمي اني صح اريد ولد يشيل أبوج بكبرته لكن اني هم أؤمن أن بعض الامور لما يحرمنا منها رب العالمين مو كرهاً بينا أبداً
ف الحمد لله رب العالمين على كل حال
صح اتحسر مرات لكن اني عندي قناعه وسعيده بهذه قناعتي وإيماني
خليها بالج ياجواهر يمه
انتي كبرتي هسه وعلى ابواب زواج باجر عكبه الحياة تقسى عليج تنحرمين من شغلات ماتصير الا بتدبير من الله واحنه كل امورنه بتدبير من الله لكن احيانا تحتاج الى قدر
خليها بالج ياجواهر كوني راضيه برزقج ابد ابد لاتعترضين ابد لاتتذمرين من عطاء الله الج جواهر حتى وان كان قليل
شوفي الله يحب الساعين يحب الي يدك بابه ويطلب منه فهمتي يايمه
جواهر.. شلون يعني
بسعاد.. يعني رب العالمين يحب الي يسعى بالحياة يعمل ويطلب من الله
الله سبحانه وتعالى بكتابه يكول
{وَأَن لَّيْسَ لِلإنسَانِ إلاَّ مَا سَعَى}
يعني الانسان ياخذ على كد مايسعى ويقدم
ان كان خير او شر ان كان لدنياه او لااخرته
يعني الفقير الي يسعى ويكد اكيد الله حيرزقه بالنهايه العداله الالهيه موجوده
لكن لو هو كعد وخله ايده على خده وكال هذا اني وهذا شغلي ورزقي حيتغير حاله ياجواهر؟
جواهر... لا
بسعاد... اذن هو يكدر يغير من حاله لكن هو مدايسعى ولو يسعى راح يتغير حاله
جواهر.. مرات الحظ يمه يعني انسان حظه قليل بهذه الحياة
بسعاد.. لا ياجواهر لاتكولين هيج حاشى لله ان يخلي حظ زين لانسان فاشل وحظ تعيس لاانسان طموح هذا الشي مايصير تكولينه
صح اكو ناس الحياة وياهم جايه بالسهل بس صدكيني ماحاسين بلذتها لانها سهله
بعكس الي يتعب ويجيبها
وركزي على كلامي الي يتعب يجيبها
يعني مو مراح يجيبها
جواهر بنتي اني مااريدج تكونين انسانه تفكيرها وعقليتها محدوده
اريد جواهر تصير جوهره بالثقافه بالتصرف
ياجواهر اريدج قدوه لخواتج
جواهر.. ان شاء الله ياأمي
الايام تمشي وبأخر كل يوم الليل يغطي السماء ويحتضن كل المتعوبين
كان من المفترض انو مع حلول الليل الانسان ينام مرتاح وباله صافي لكن الي خايف من المجهول يبقه يتگلب بليله
من حسرات بسعاد على الولد لانها ماكدرت تفرح عبد المجيب بولد
ونعيمه الي فقدت ابنها وبقت هي الي تنحب على ابنها عبد الودود الله عوضه بولد من زوجته الثانيه لكن نعيمه بقت تتحسر على ابنها الي نفجعت بي
نعيمه كانت تتمنى لو مامخلفته لاابنها اصلا ولامربيته وراح من ايديها
وبسعاد تتمنه بس تشتم ريحة الولد
جمله تناقض جمله وخلف هالمناقضه قصه طويله كلش وامنيات وعبرر!
بيوم اجت شيماء لبيت عبد المجيب جانت دموعها عشره عشره تصب
بسعاد... شبيج شيماء شصاير
شيماء.. عبد المجيب وينه
بسعاد... طالع
شيماء.. امشي نروحله للمحل اريد احجي وياه
بسعاد... شكو احجي
شيماء.. الا يجي ويشوفلي حل شلون اريد يجي عبد المجيب
بسعاد.. ياستار والله قلقتيني هسه حدز حيدر ابن جيرانه دقيقه يطير على البايسكل يصيحه ويجي كعدي ارتاحي كعدي
شيماء.. كعدت وصارت تمسح بدموعها
بسعاد.. يمه جواهر سويلها كلاص شربت لمرت عمج
سمعت هالكلمتين شيماء ولطمت على وجهها ودموعها تصب عشره عشره
بلهفه امي.. وج شصاير شيماء لاتخبليني
وجان تنتر بقهر.. وج اهلييييييي اااااااااخ
يااأأهلي اااااخ يردون يظوجوني لهذا الكلببببب اهليييييي
بسعاد... دكت على صدرها وج شتحجيييين
اجه عبد المجيب بخرعه... شكو شبيكم شصاير
بسعاد... تعال اسمع
شيماء.. كامت ونزلت على ايد عبد المجيب ابوس ايدك عمي ابو جواهر الله يحفضلك بناتك دخيل الله ودخيلتك اريدك تساعدني
عبدالمجيب.. بشنو اساعدج
شيماء... اخويه يريد يزوجني لفهد ابن شيخ نعمان وحاسم الموضوع وياه
عبد المجيب.. شنو بكيفه
شيماء... فهد خلاه يطمع لسلام اخويه بالفلوس جان اخويه محله مصفر وجاه نطاه فلوس بضاعه واخويه مسوك بيها ومشتغل ومن متعدل بي الحال جاي ديرجعله من الفلوس يكله هذا مني لاام روح بحال توافقون اتزوجها وهذاك اخويه مامصدك بالحجايه كله كبع واخذ
عبد المجيب... شوكت هذا الحجي
شيماء.. هي قبل لاتصير المشاكل اني ماجنت ادري بكل هذا بس بعدين عرفت من مرت اخويه سامعتهم لاخوتي يحجون
عبد المجيب... يعني اهلج كلهم راضين على زواجج من فهد
شيماء... اي وسلام اخويه يكلي اخوه قتل رجلج وعبد الرحيم كتل اخوه هم ناس كتلت ناس وصارلها السنين السالفه
عبد المجيب.. واذااااا يعني ننسى لا ونرجعها وي منو وي الي دمرونه
شيماء... الله يخليك كلي شسوي شلون
عبد المجيب.. ماكو حل غير لازم احجي وي اخوتج
شيماء... اني اريد اسويها كعدة عشاير
عبد المجيب... ياعشاير تفضحين نفسج
شيماء... والله الي بقو اهلي معاندين على زواجي منه الا احركها لروحي والحك عبد الرحمن واخلص
عبد المجيب... استغفري الله شنو هالحجي هذا ميجوز
شيماء... لعد دبرلياها اريدها منك
عبد المجيب... كعدي هنا هسه اروح لااخوتج
ابويه طلع جان مقهور كلش وعمه شيماء دموعها مانشفت وامي تصبر عليها
جنه ننقهر عليها هوايه
دره... خطيه عمو عبد الرحمن مات وبعده عريس وعافها لعمه شيماء مشلوع گلبها وراه
جواهر... جان يحبها وتحبه بشكل فضيع وهي عايشه على ذكريات هذا الحب
دره... تبسمت بتأمل وتكلمت... جواهر
احساس الحب حلو مو؟
جواهر... يكولون
دره... صديقتي بالمدرسه محجوزه لاابن عمها تحجيلي تسولفلي عنهم واحد يحب الثاني ولج جواهر على طول يوكفلها يم المدرسه ويرجعون سويه يوصلها لباب البيت يله يروح ويشتريلها هدايه
جواهر... بس هالشي غلط شلون تمشي وياه دره يعني هالشي حرام وعيب
دره.. هو ابن عمها
جواهر... بله واذا يعني غلط حبيبتي يعني هسه انتي تكدرين تطلعين وي محمد ابن عمج
دره... لا اني ميعجبني محمد لو غيره جان اي
جواهر... باوعتلي يغضب وسكتت
دره... باوعت لرجليها ولوضعها وتكلمت بحزن... هه جنت اتشاقه وياج جواهر هو اني منو حيفكر بيه او يتزوجني بهذا وضعي
جواهر... لا لاتحجين هيج دره ولاتفكرين بهذه الطريقه
دره... هاي الحقيقه جواهر اني صح رب العالمين نطاني شكل جميل واي شاب يتمنى يرتبط بيه لكن لما يشوف وضعي يتراجع صديقاتي هذاك اليوم بالمدرسه حجو وياي بالشقه عود كالو دره انتي تفيدج الدراسه محد يفكر يتزوجج احنه نتزوج ونصير امهات بيوت
جواهر... وهاي كل عقليتهم انو بالزواج حيكملون لاتهتمين الهم وبعدين انتو شكبركم على هذا الحجي دره
دره... مرات ينفتح هيج حجي بسبب هاي المحجوزه لاابن عمها وتشوفلهم الهدايا الي يشتريها الها وهذوله يبقون يكمزون
جواهر... لاتماشيهم بعد مالج علاقه يولون
دره... لا يااختي هاهيه شلي علاقه بيهم
بهذه الاثناء اجه ابويه وفات للغرفه ضايج حيل لحكته امي وعمه شيماء تتسائل بردة فعلها شكو
شويه وطلعت امي خجلانه وتفرك ايد بإيد ومتعرف شتحجي سبقتها عمه شيماء بالكلام
شيماء... غثو بالحجي مو؟
بسعاد... خل يرتاح ويهدأ اعصابه واحجي وياه الزواج مو اجبار
شيماء... شكلوله؟
بسعاد... سكتت امي واباوعها بين الي تريد تتكلم وبين لا بعدين تكلمت
ياشيماء اخوتج من الناس مافسروها لخوف عبد المجيب عليكم لله باالله وخلو بيها إن فشلون العالم
شيماء... فتحت عينها بخرعه وتكلمت هاااااااااا فهمتج بسعاد فهمتج
باوعت لروح وكالت انطيني ايدك يمه امشي وياي نروح نعلم خوالك شلون يحجون عن اختهم حجي ماسخ
اخذت روح وراحت وبقينه احنه وحده تباوع للثانيه والكل متعرف شتحجي
مرت يومين وابوي مقهور كلش ومتكتم منعرف شنو الي دايصير بعد هاليومين اجت شيماء ودموعها تصب عشره عشره ووجها كدمات وحده من عيونها محمره اثر ضربه شافتها امي دكت على صدرها
بسعاد... شصاير بييييييييج ولج احجييييي
شيماء وكعت من طولها وصراخاتنه علت بلا وعي وابويه طلع مذعور
عبد المجيب... شكوووو شصايررر
بسعاد... الحك علينه البنيه حتموتتتت
شافها ابويه تلمس جبينها كال بسعاد طببيها جوه رايح للعطاره اني هسه اجي
جبنه احنه ماي وغسلنه وجهها وشممناها عجر حتى تصحى وتحس على نفسها فتحت عينها بصعوبه وكوه سندناها علينه وفاتت جوه مددت على دوشك
شويه وابويه اجه كال جواهر ياب هاج هاي عشبة الخبازه اريدج تخدريها مثل الجاي ماتسوي وصفي وصبي بكلاص وجيبي لمرت عمج ياب بسرعه
جواهر... تددلل يابه
رحت بسرعه سويته الها وجبته واجيت لكيت ابويه كاعد متكأ على الحايط ثاني وحده من رجلينه لصدره ساند ايده عليها والثانيه مدده ومدنك راسه وكأنه متحسف من الي صاير بيها
نطيت الشراب لأمي وابويه كال جواهر ياب روحي يم اخواتج
رحت يم خواتي لكيت روح يسولف وي دره ودره كلها اذان صاغيه لروح
اول مافتت صاحت وج تعالي تعالي
جواهر... شكو
دره... وج خطيه ضاربها لعمه شيماء ولروح هم
جواهر... شنوووو
دره.... اخوتها الله لايوفقهم ان شاء الله
بأثناء هذا الكلام صاح ابويه جواهر ياب
رحت بسرعه... كول يابه
عبد المجيب... شوفيلها لبس من عندج لمرت عمج
جواهر... بعيني يابه
رحت بسرعتي تسائلت ليش شبيها عمه شيماء...
.........
شيماء.... بدموع.... النذل مطلع عليه سيط ان هو عنده علاقه ويايه وان اني دااركض وراه بعد ماتركني هو
حاجي هالحجابه بالكهوه واحد من الي يعرف اخوتي اجه وكللهم واخوتي گلبوها للدنيه عليه
عبد المجيب... وليش انتي شنو ذنبج
شيماء.. كالولي مراح يفك عنج الا يااخذج وهاي سمعتج شوها وحتى نلصم كل حلك يحجي عنج توفقين بي وتسدين حلكج متحجين كلمه بعد
عبد المجيب... اي وشكتيلهم
شيماء... مقبلت ك العاده وتخبلو عليه
عبد المجيب... شلون يعني... احجي شنو الي صلر وخلاهم هيج يضربوج
شيماء.. كتلهم اذا تزوجوني لفهد احركها لروحي نزل عليه ضرب سلام اخويه ونوب اني فقدت كمت اصرخ دفعني على الحايط ولزمني من رگبتي كالي اذا متقبلين بفهد اني اخنكج واخلص من عارج نوب سوده عليه هذا روح وكف بين خواله يكلهم عوفوها لاأمي لخمه على وجهها مصطفى وكعه بالكاع
والله ياعمي ابو جواهر دكيت ولطمت وشكيت ثوبي ومدايفيد نوب يكلي اذا اجيكم رجلي يكسرها وهاي انه اخذت روح واجيت لهنا كلي شلون شسوي
عبد المجيب... ابقي هنا شيماء والي يندك بيج رداده عندي ايقي هنا ولاتخافين من احد
شيماء... الله يخليك ويعزك يارب
بسعاد... لاتخافين شيماء طول ما انتي هنا مراح يصير شي لاتخافين
شويه وندكت الباب بسرعه
بسعاد.... هاي اكيد اخوتج فوتي فوتي جوه بغرفة البنات ولاتطلعون منها ابد
بمجرد فتحت الباب اعتلت الاصوات
سلام... شوف اذا سكتت هذاك اليوم ومشيتها حجي هالمره دم يابو حواهرررر دممممم
عبد المجيب... اي ارفع ايدك دشوف الضاهر عقل براسك ماكو سلااااااام
سلام... جيبها لااختي وخلينه حبايب احسن
عبد المجيب... وانت خليت حبايب بعد هذا كلامك.... اختك مو عدنه وراوينه عرض جتافك
سلام... لا عدكم وفهد شايفها وهي عدكم وكذب لاتكذب
عبد المجيب... تاليتك تريد تنطي اختك للي كتلو اخويه
ان انت قبلتها اختك تتزوج اخو جتال رجلها اني مااقبلها ابن اخويه بتربى عند الي كتلو ابوووووه
سلام... ومنو كلك تاخذ ابنها وياها خلو روح يمكم وخل تجي شيماء عدنه
عبد المجيب... ولك متخاف ربك تحرم ام من ابنها انت شنووووووو
سلام... اذا انت غيرتك تقبلها عرضك ينجاب بلسنة العالم احنه مانقبلها ابدددد
عبد المجيب.. وانت شلون تأمن على اختك تعيش وي واحد كتل رجلها ولطخ سمعتها شلوووووووون لكم ياناس ياعالم احد يفهمني انتو شصاير لعقلكممممم
سلام... هيبييي انت لاتتدخل وداكلك خل تجي اختيييييي
عبد المجيب... روحو هسه منا وبعدين اختكم تجي تعبانه هسه
سلام... رجلنه على جلها منطلع منا ولانتحرك
عبد المجيب.. كتلك روحو منا
سلام... جر عبد المجيب من ياخته بنتره تكلم.... روح صيح اختي
باوعله عبد المجيب ورده بكف قوي كلنه حسينه بوجع هالكف القوي
وهذاك نجن جنونه... انت تمد ايدك عليه
والله لااكسرها اليووووووم والله
مد ايده دايضرب ابويه
وابويه لزمها ولواها وخلاها وره ضهره تكلم بهمس غاضب... روح منا كتلك قصص وروايات عراقية كرار صلاح ودفعه ونتر
يلاااااا بررررره
راحو بدون كلام وابويه سد الباب وفات كعد على القنفه الي بره ويتأفف بغضب.
بسعاد... على كيفك ياابو جواهر لايصير بيك شي ياعيني
عبد المجيب... داتشوفين هال .... كطعها وكملها ب استغفر الله
بسعاد... خطيه مابطلت بجي حاضنه ابنها وتبجي
... ضرب ابويه على فخده بقوه متحسف وصاح بصوته لك اااااااااااااخخخخخ
اخ ياوجع کلبي لك اخ ياخوتي شسويتو بيه ااااااااا خخخ
ذبحتوني ذبححححححح ياولد شعبان ذبببببح
ولك عبد الرحمن موتتك ذبحتني وكملتها بأبنك أاااااااخ
طلعت شيماء... عمي ابو جواهر لاتنقهر والله اذا هذا الشي حيوجعك ويهيج جروحك الاكي صرفه عمي اشوف شنو اسوي
تنهد ابويه وسكت بعدين تكلم... اذا ترديها تنسد بيدج انتي
شيماء... شلون
عبد المجيب.. تقبلين بعبد الودود ابويه من الاول راد يزوجج جان يعرف شكوو اثاري
شيماء... لا ابو جواهر انت شتحجي اخذ اخو عبد الرحمن مستحيييييل ابد
عبد المجيب... علمودج اني والا لافهد حيجوز عنج ولا اهلج
شيماء... بس مااكدر اخذ اخو زوجي ابد مستحيل
عبد المجيب... والحل؟
شيماء... دنكت وبجت
عبد المجيب... لج ياشيماء اني من يمج انتي بعدج صغيره واي رجال يتمنه يتزوجج مراح تخلص هاي شيماء اخوتج ناوين يزوجوج ف أقبلي بعبد الودود احسن للكل ولاابنج اول شي تردي يتربى عند رجال غريب
شيماء... ماكدر والله مااكدر عمي اخووووه ابد
بسعاد... اي حقها ياابو جواهر مالها نفس مو بيدها
شيماء... حبقه على كلامي وراح اشوف شنو تاليها
عبد المجيب... هاهيه ابقي هنا الباب متوايكيها ( متشوفيها)
شيماء... هاهيه مثل متريد
عبد المجيب... ابنج إياااااج يطلع الباب يرحون يلون ذراعنه بي تره فهد واحد مخبل وكلشي يطلع منه
شيماء... لا عمي على بختك ابد
عبد المجيب... هاهيه ياب من اليوم انتي حالج من حال بناتي هم خمسه وانتي سته
شيماء... الله يخليك ياعمي ابو جواهر ويحفظك لبناتك
عبد المجيب... تبسم بتودد وتنهد كال.. اني رايح عندي شغل
بسعاد... الله وياك ياابو جواهر
طلع عبد المجيب شويه واجت جميله وانصدمت بشوفة شيماء بهذا حالها
جميله... يمه شبيها شيماء ليش هيج وجهها
بسعاد... اخوتها تنكسر ايدهم ان شاء الله
جميله... وليييش
بسعاد... يردون يزوجوها لفهد ابن حجي نعمان
جميله... شنووووووووو تحجين صدك
بسعاد... اي والله
جميله... وشلون ولج هذوله كتالين رجلي ورجلها شلون يزوجوها شداتحجين لاتخبلينيييي
بسعاد... غروهم لخوتها بالفلوس والنذل يكللهم اسجللها بيت بأسمها
جميله... باوعت لشيماء واشرت بأصبعها شوفي شيماء اييييياااااج تقبلين اياااااج
شيماء... جايه تكليلي انيييي لو ماهذا حالييييي
جميله... والله مادري شكلج بس نصدمت مدااصدك
بسعاد... لا صدكي كلشي اكو كلشييييي طالما اكو فلوس
جميله... لا حول ولاقوة الا بالله
بسعاد... اي شخبار ضرايرج
جميله... نعيمه ك العاده حياتها عباره عن كعده منطويه وحزن ونادرا ماتتكلم والله هالانسانه هاي مااعرف شكول هم تقهر
بسعاد... بس اشوفها احسن تكوم تكعد تشتغل وياكم دايره بالها على جهالها
جميله... اي من هاي الناحيه احسن بس مو مثلنه اجتماعيه وتسولف ابد ماكو
بسعاد... ليش الي صار وياها قليل يا جميله هم الله يعينها
جميله.. صحيح اني وياج بس هم الرجال يريد يشوف وجه يضحك ملكه حلو سالفه حنيه هي ماكو
بسعاد... لا بهاي اني وياج وليش لهل الدرجه ماتعلموها انتو
جميله... شنعلمها يمعوده كل وحده ملتهيه بحالها
بسعاد... هم صحيح
جميله... خو هاي حليمه كل سنه سنتين حامل تكول متحلفه على الخلفه سطرتهم درزن والله البيت صاير مينطاق من الهوسه مال الجهال
بسعاد... هم الله يساعدكم
جميله... تصوري كل وجبه نطبخها عبالك مال عزيمه ونكعد نسوي وعبد الودود جتف واحد شيسوي كوه مدبريها للعيشه والله على طول ابو جواهر ينطي ويا ويا هو هم مرات يطلع للعماله يشتغل محمد واخوه هم يشتغلون عماله مرات ودابره العيشه
بسعاد... الله يرزقكم ويحفظكم يارب
جميله... اشكرج
ساد صمت قليل بعدين تكلمت جميله
اي شيماء وانتي شنو حتبقين هنا بيت ام جواهر
شيماء... اي
جميله... اي ديربالج تبقين وحدج بالبيت فهودي بالمنطقه تره واني من يمج
شيماء... وشتقصدين جميله وضحي كلامج
جميله... علمودج اني والله مااقصد شي بس اني شفته والله مو قصدي شي
شيماء... يطبه طوب خل احد يتجرأ ويتجاوز عليه لو بكلمه والا مو يفكر يطولني واني اعلمه النسوان شتسوي
جميله... على كيفج عيني تره ماكلنه شي يلا اترخص اني
الكعده وياج حلوه ام جواهر
كامت امي وراها وصلتها للباب وبقو يسولفون شويه وبعدها راحت
شيماء... شحجت وياج جميله
بسعاد.. ماحجت شي لاتهتمين
شيماء... خايفه لاينضغط عليه واقبل بعبد الودود مووو
بسعاد... لاتهتمين يمعوده امشي خل نحضر عشه
شيماء.. لا خايفه واني ادري بيها جيتها مو لله بالله متأكده تدري بيه عدكم واجت
بسعاد... وان كان
شيماء... سمعت من عبد الودود وجايه تتأكد بنفسها وتجس نبض اذا اكو نيه لو لا
بسعاد... وانتي ماالج نيه بعد ليش مهتمه
شيماء... عشتووو انوب ماعليه غير عبد الودود لاعمري من عمره ولاقريب عليه ولا مناسب كل عقلها هذه
بسعاد... مو كلنه لاتهتمين ياشيماااااااء
فتنه جوه نحضر العشه وبعدها فرشنه بره بالطرمه بين مايجي ابويه جنت ادرس خواتي ودره تدرس روح
وامي وشيماء مخلين راس براس وسوالف مندمجين على اخر حبايه
شويه وندكت الباب راحو خواتي يتسابقون على الباب دايفتحوها
وتلكاهم ابويه بضحكته الحلوه قبلهم وضمهم اله
بالعاده احنه متعودين نتلكاه لاابويه وكأنه ماشايفيه من زمان رحنه كلنه عليه وكان ابويه يقبلنه ومبتسم بعدين توقف وبعدنه بيده بهدوء من انتبهنه عليه لكيناه يباوع لروح
كعد على ركبه وفتح ذراعه صاح تعال روح ياب ليش ماتجي عليه
روح جان مختنك ولما كله ابويه هيج فرح وراح عليه يركض وحضنه وشاله ابويه بحب وقبله وصار يكلمه
ولك اووووف بوستك شطيبه ياب يغالي ياريحة الغالي
وؤحع كلم امي... عشه ياام جواهر تره حيل جوعان
جواهر... اني احصر الصينيه كعدي يوم
رحت بسرعتي وبديت احضر الاكل واجت دره وراي تحضر
جواهر... روحي ارتاحي دره شداتسوين
دره... مو تعبانه والا حضايقج بالكرسي
جواهر... لا بس لاتعبين نفسج
دره... العوق عوق الروح مو الجسم جواهر
جواهر... مو قصدي و
دره... اشششش خليني اكمل كلامي
انه صح معوقه بس هذا مو معناه اخلي روحي هم تصير معوقه اني لازم اعتمد على نفسي بكلشي واتعلم كلشي
اطبخ واشتغل واروح واجي وكلشي اسوي حالي حالكم
جواهر... بحب وبعبره مخنوكه... والله مااحب اشوفج تعبانه وتشتغلين
دره... لاتخافين عليه وكتلج الضروف اذا خلتني اكون مقعده اني مراح اسمح للشغقه تخليني مقعده روحيا جواهر....
أن تتحدى المصاعب وتكن واثق الخطى قويا هو بحد ذاته انتصار انتصار على الضروف والكلام والألم
كن حراً طليقا طائرأ يطير في سماء الأمل
كن جميل الروح والعقل والمنطق
كن قوياً....
شكرا لزيارتكم عالم روايات سكيرهوم
