رواية بيوت الصفيح الفصل العاشر 10 بقلم زهراء السراي

.

.

"ليست كل النهايات خسائر

ففي بعض الانكسارات تولد أجمل البدايات

حين يتبدل الحال 

وتصفو الروح وتدرك النفس ما تستحق

.

مُنى

_______

"أحياناً ينكسر الشي القديم بداخلنا 

مو حتى ينتهي بس حتى يفسح مجال 

لشي أجمل يولد من رماده

لأن البدايات الجديدة

ما تجي إلا بعد وجع 

يشبه النهاية لكنها بالحقيقة

بداية عمر جديد بحال أجمل

عارفين شعور التمزق والأنقسام

والحيرة بين عالمين هذا أحساسي

من لحظات وعيي الأولى أنولدت

ببيت فقير واحياناً تحت خط الفقر

لكن خالتي ماخلتني أعيش هالشعور

اللي اطلبه تحاول توفره بشتى الطرق

من كبرت اكثر وصرت أشوف نفسي

عايشة بطريقة أحسن من اخواتي

رغم أحنه عايشين بذات البيت

بديت أتغير وأقلل من أنانيتي ناحية

الماديات بس بقت بيه لمحة تشتت

بين امي اللي هي خالتي

وبين امي اللي ولدتني 

لكني ممتنة أشد الأمتنان الها ربتني واهتمت بأدق

تفاصيلي واني كذلك ماعرفت ام غيرها

رغم هالشي بس بقت بداخلي نقطة

ظلمة عميقة بداخلي تتمنى تشوف امي الحقيقية

وبالخصوص من جنت أسمع أخواني يحجون

بيهة وبدفوها وحنيتها بس تعودت وبديت

أجتاز هالاشتياق بأشتياق أعمق وحقيقي اكثر

واحساسة مضاعف بعد وفاة فرقد

هواية امور تغيرت ومن ضمنها آني

كأن دورة الحياة المؤلمة استدارت

حتى تعلمني أن الحياة بيها أشياء

اعمق من مجرد احساسي بالأختلاف

عن اخوتي فقدان فرقد كان النقطة الفاصلة

بين أنتقالي من مرحلة الطفولة لمرحلة الوعي

الكامل وهاياني مقبلة على مرحلة الشباب

بعمر ال١٦ سنة ببداية جديدة أصابني

الخوف من فكرة الأنتقال أول مرة

لكن قررت المجازفة بعد ماگالو البنات

انهم ينقلوني من مدرستي

جنت خايفة فصديقاتي ومدرساتي

ومنطقتي وكل شي راح يبقى ورايه

گاعدة ساندة نفسي على كتف صِبى

لمن مرت سيارتنا اللي تحمل اغراضنا من جانب

المدرسة باوعتلها وشهگة صغيرة فلتت من بين أضلاعي

احتضتني غِنى وضحكت

-والله بس تشوفين البيت والمنطقة وجمالها

حتى اني تبيعيني لچ المنطقة تجنن بيها متنزهات

وحدايق ترحين تفترين عصريات

-صديقاتي

-تكونين صداقات جديدة

-وفرقد

وگعت ايدها الي جانت تطبطب على كتفي وابتسمت

-فرقد مو بالبيت ولا المكان فرقد بگلوبنا

دگت على گلبها ووگعت دموعها

مسحتهن وكفحتني ممازحة

-اووووي شگد دراااااما زايدة

صِبى جانت صافنة ولازمة بيدها الصندوگ الصغير

اللي يحتوي أغراض فرقد وكأنه كنز عثرت علي

ومتمسكة بي بقوة

مشت السيارة مسافة طويلة فالمنطقة اللي رايحيلها

بمنتصف بغداد منطقة راقية مرتبة بعيدة عن

صخب الحياة المعتاد بمنطقتنا

دخلنا المنطقة والمفتاح عند غِنى نزلنا

وفتحت الباب الرئيسي فتحت شفافي

وعيوني بتعجب بيت صغير يجنن

دخلنة اغراضنا للگراج باوعت عالجانب

حديقة صغيرة بمرجوحة ركضت تاركتهم

گعدت عليها

ركضتلي غِنى شمرت نفسها عليه

-شفتي مو گتلج بدااااية جديدة

-يجنننننننن 

-دگووومي گومي شغلنا هوووايه خل نرتب غراضنا

دخلت البيت افتر مو مصدگة سقف طبيعي

وأثاث حلو صاحت خالتي من الغرفة

-مناوي تعاي

-ها يمه

ركضتلها البنات مخلياتها بالغرفة الجبيرة

اخشاب مرتبة وانارة تخبل

-ولجن جبيرة الغرفة انطني الصغيرة

ردت عليهة غِنى

-مرت ابوي الحية عشتي طول عمرج بغرفة بگد العش

مال العصفور عيدي ايام شبابج بهالغرفة ذيج

كافي علينا

-راح اخلي منونة وياي

حضنتها موافقتها الرأي

وكعدت رتبت كل شي بالكنتور طلعت ورة ساعة

كل شي صار بمكانه

أباوع حواليه حيطان مرتبة ماكو تراب ينكت

ولا حشرات تفتر وتدخل بملابسك فجأة

ولا هوا حار بالصيف ولا مطر ورطوبة بالشتاء

امشي ايدي عالحايط اتحسسه وأضحك

وصلت يم الدرج بلحظة طفولة بست الحايط

مرة ومرتين وثلاثة

اجاني صوت صِبى الدافي

-ها مناوووي تخبلتي 

التفتت ركضتلها اضحك

-حايط حقيقي صباوي 

عيونها الحلوة افترت بيها الدموع

-يارب هالضحكة متفارگ وجهج ومتشوفين بحياتج

بس السعادة والهنا

اباوع لغِنى واگفة وتغم بينا

-درررراما دراما ودموع وسوائل اييييييع

تقربتلي تسحبني من ضفيرتي

-سمعي ولج بت الحباب هناك حايط ملطخ ونص طين ونص اسمنت وتنك وتشخبطين وتراجعين دروسج عالحايط

هنا تحترمين نفسج اشتريلج سبورة وراجعي

-اووووي قابل همج آني

كفختني وطلعت تغني بره

صِبى هادئة كالعادة راحت للمطبخ رحت وراها

-أگلج صباوي يعني هو أيمن مياخذ البيت بعد 

-سمعتي من حاجاني اني وخالتي واحنة نعرفه من سنين ثقة وأخلاق ومامرة نخينا ماوگفلنا گال هالبيت

صارلة سنين مقفول گعدو بي انتو

-وايجار

-ميقبل شگد حاولت اني وخالتي ويا رفض

-ربي يوفقه انقذنا والله

-ربي يرحم أهله ويوفقه

تركتها ورحت طالعة للحديقة

بسيطة ومرتبة رغم الخضار ميت تقريباً

بس تترتب وينسقي يرجع مثل قبل

غِنى بالمرجوحة والتلفون على اذنها تحجي

بعصبية بس تضحك

-والله ولا أنساها الك وأرجعها بدون متحس

مرتاحين والله استقرينا لأن بس الملابس جبناها

تركتهة تحجي ورجعت للبيت صِبى گاعدة عالميز بالمطبخ گعدت بصفها

-ها صباوي صافنة

-جاي تتعدل حياتنا بس هو ماكو كل شي

جاي يتحقق بس فرقد غايب

حضنتها من أكتافها

-هم يجي يوم تنسين الصار

يعني بعد هالسنين كلها محد فهمني

شلون أشرح شعور الغصة اللي يمر بگلبي

كل ما أشوف مكانه فارغ 

عضت على شفتها تحاول تخفي غصتها

تباوع بعيد كأنه گدامها

كملت وشهگت بحزن 

-الناس تفكر إنه الواحد ينسى

لأن ما يدرون شنو يعني شخص يملأ البيت روح

والله هيج جان من مات حسيت

حتى حيطان البيت القديمة تبچي

فرقد مو بس أخوي جان حضني

وسندي وضحكتي

نزلت دموعها مستحها بسرعة 

أبتسمت تخفي ألمها بس صوتها ظل مرتجف

-ريحة غيابه بعدها بصدري 

كل شي تغير بس ضحكتة صوته ذكرياته حتى 

سوالفة التافهة ظلت مثل ما هي 

-وانتِ

-اني صرت أكبر من عمري مو لأن الزمن مشى 

بس لأن فراگه خلاني أكبر قبل أواني 

صفنت وعينها عالفراغ عبالك تحاجي

طلعت تاركتها غاطة بذكرياتها سحبت نفس

أحاول أهدي گلبي اللي يدگ حزن بكل مرة

نذكر فرقد بيهة ارتب بكتبي وخالتي متمددة وغافية

طلعت راكضة بعد مانسيت

-صباوووووي

-فززتيني

التفتتلي تمسح دموعها

-خل نتمشى حتى نندل المدرسة مالتي

-باجر لاحگين عليها اخذج نكمل اوراقج

-هسسسه هسه حبابة

-ولج تعبانة

-لخاطررررري

-تمام گومي لبسي وصيحي غِنى

لبسنة ثلاثتنا وخالتي نايمة

المنطقة تجنن هدوء وناس مرتبة

طلعنا بالشارع الورانا حسب ماوصفلنا ولد شاب

اندليتها قريبة وحلوة اشترتلنا غِنى عصير وافترينا شويه ورجعنه للبيت مر هاليوم سريع ثاني يوم صِبى استأذنت من مديرها تتأخر شوية كملت اوراقي 

والتحقت بالمدرسة جو جديد ناس جديدة

ماتقربت لأي وحدة لمدة أسبوع لحد مابيوم يصادف خميس صاحت المدرسة واني صافنة

-انت مو اسمج مُنى

-نعم ست

-حبيبتي روحي صيحي بنتي بصف الثالث (ب) أسمها

قمر گليلها تطلع لخالها منتظرها بره

طلعت للصف الثالث استأذنت من المدرسة

وگلت كلامي دفعة وحدة

طلعت بنية ناعمة بيضة لابسة نظارات طبية ثگيلة

مبين نظرها هووايه ضعيف

-شكرا حبيبتي

گالتها ومشت خطوات اباوعلها وتوقفت

نزلت للگاع عبالي ييها شي

-يبنية بيج شي

ضحكت محرجة 

-نظارتي فدوووة شوفيها وگعت 

باوعت النظارة متجزأة عدساتها

اخذتهة انطيتها الها

-هاي تكسرت

مشيت خطوتين واجاني صوتها

-شسمممج يبنية تعاي حبابة

رجعتلها

-ها حبيبتي محتاجة شي

-حبابة وصليني لخالو مااشوف گدامي شي

خاف اعثر

ابتسمت بخجل مديت ايدي لزمت كفها

-يلا ياقمر أسمج يجنن

-وانت

-اني اسمي اسم عجوز اسمي مُنى 

-ههههههههههه شبي والله يخبل

مشيت وياها لحد باب المدرسة

-باوعي سيارة رياضية عالية سودة

-مااعرف بالسيارات

بس شوفي اي سيارة سودة موجودة

-اي ذيج بالاخير

-امشي وياية هذا خالو عصبي اذا اتأخر يرزلني

مشيت وياها خطوات لباب السيارة مقفولة

وشخص مسنود عالستيرن دگيت الجامة

رفع راسه رافع حاجبه فتح الباب

-ليييييش تأخرتي

-آسفة خالو والله

-بلا اعذار صعدي فضيني متأخر

ارتبكت قمر صعدت رجلها وتراجعت عثرت وگعت

بحضني وعدلت وگفتها

-العفو بس مو صوجها وگعت نظارتها تكسرت يعني ماكو داعي للصياح

-محد موجهلج كلام

گالها وهو يدخل قمر للسيارة ويسد الباب حيل

بعدني مساحبة كفي خارج السيارة 

ارتفع صوت صرختي ويا أرتباكه

وصياح قمر دفع الباب فاتحة وركض ناحيتي

-شصااااااار شووو

اصبعي السبابة ممرود ومااگدر أحركه

-خل نشووووف القنادر وخري ايدج

-وخرررررر رجاءاً اترررركني 

سحبت ايدي واني ابجي ودخلت راكضة للصف

لفيت اصبعي بكليكنس المدرسة اول مشافتني

بقت تستفسر وحان موعد الدرس الاخير طلعت من الصف دگ الجرس للحلة طلعت احس يريد يغمى عليه

من الألم

مشيت خطوات وصوت هورن دگ يمي

التفتت نفسه خال قمر نزل الجامة

-اوووگفي

مشيت تاركتة ورايه أريد بس أوصل

للبيت

تحرك بسرعة اسمع خطواته جاي ناحيتي 

-اووووگفي مو جاي احاجيج لج

التفتت گوة صابرة وواگفة على طولي

-نعم حضرتك

-تأذيتي مو

-لا مابية شي عن اذنك

درت وجهي اجاني صوته

-صووووجي اني المنزل نفسي للزعاطيط

التفتت راجعة

-فعلا انك أنسان وقح وبلا ذوق

-ملسووووووونة 

قبل ليكمل كلامة مشيت راجعة للبيت

ومر هاليوم بالمرار بسبب الألم

بالليل بحدود ال١١ گوة نمت 

جمعة وسبت عرفنا السبب الاصبع مكسور

اضطرو يجبسون نص كفي ويا

الأحد داومت امشي بهدوء بشارع المدرسة

الهوا يخبل وصلت باب المدرسة

بعد وقت محد جاي وگفت السيارة

ونزلت قمر اشو فاتت ومخليتني وراها

مسلمت صحت 

-قمرر قمررررر 

عالصوت رجعتلي باوعت بوجهي شويه مناظرها جديدة

-عزززززة والله عيب هاي انت مُنى والله نظارتي جديدة شصار على ايدج

بعدني اريد أرد وتوقف خالها ورانا

-الحمد لله عالسلامة

-شكرا

دخلت واسمعه يحجي بعصبية

-هيج بشر مو مال تتنازللهم شگتلج مو گتلج هاي صلفة

-خالو ترى انت كاسر ايدها

ركضت ورايه سحبتني

-وييين فدوة

-تعاي خالو يحاجيج

-نعم حضرتك

-شبيج لج

-جاي احجي وياك بأحترام ماكو داعي للفضاضة وشوفة الحال

-شگد صرفتو على ايدج

-عفواً

-ايدج مو انكسرت شگد صرفتوا على علاجها

-وانت حضرتك راح تعوضني الفلوس

-اكيد

-شكرا ممحتاجين اخواتي سوو اللازم عن أذنكم

واني أحجي واريد التفت

شفت صِبى ماشية سريع ناحيتي

-لج نسيتي الاحياء والرياضيات بالمطبخ هاج

باوعت لخال قمر وهي خازرتة وهو باوعلها هز أيدة

مستهزء وگال جملة غريبة

منها انطلقت برحلة غريبة بحياتي مااعرف

نهايتها شنو گال الجملة وتحرك ماشي 

-العبببب ربطت الدووومنه

.

.

غِنى

______

الصداقة هالكلمة العظيمة اللي تحمل بطياتها

الاف المعاني والتفاسير

هي مو بس علاقة أنسانية

هي فسحة عمر نضحك بيها من گلبنا

وننسى الدنيا وهمومها 

هذا أحساسي بالضبط بكل مرة

نتقابل ونحجي اني وأيمن اجمع كلام

شهر وأنتظر جيته حتى القي كل سوالفي

بحجرة مرة وحدة وأرتاح

نمشي بالسيارة عالشارع واني احجي

وأحجي وهو يستمعلي بلا ملل

وصلنا وگفنا عالشارع العام اللي يودي للبيت

باوعلي وبعيونه كلام متردد يگوله

صفن ثواني ونطقها تحت صدمتي

وتعجبي وعدم تصديقي 

-اگلج غنوة 

-ها يمناي

-تتزوجيني

بلعت ريقي بصعوبة ونسيت حتى الحازوقة اللي صابتني من دقايق واني احجي

-شنوووو

گلتهة وروحي بهتانة

-ووجع صرعتيني صرع هئ وهئ صار ساعة

-مافهمت

اباوعلة وهو گوة مسيطر حتى ميضحك

-الحازووقة يا مهندسة راحت لو لا

-اي راحت

-ديلة نزلي من طيح الله حظج

ثواني يلة أستوعبت كلامه صدمني كذب

علية حتى تروح مني

درت وجهي علي ضربتة بالجنطة على كتفه

-يمممممممه ردت انجلط

-عليمن تنجلطين شو شاب أشگ شگتين

-خليني ساكتة غير عبالك قوطية معجون معقوجة

شنوووو وجه لو تنكة دهن قديمة

نزلت شبه راكضة نزل من جهة الباب مالته

ولحگني مسرع خطواته

درت وجهي لعبلي حواجبة 

-متگدر تسوي شي الشارع منا

-بسيييييطة ارجعلجياها اني وجهي تنكة

جاوبتهة بخبث -yes

- متأكدة من كلامج

-قابل اخاف

-هييييييين غنيوة اتصلي بصِبى خل ادخل

أحاجيها هي وخالتج

-تمام

واحنة نمشي اتصلت بيهم فتحو الباب ودخل

وياية سلم عليهم بايس خالتي من راسها

-جايكم بطلب خالة

-تؤمر عيوني

-اني طالبج واريدج تگولين تم

-غالي والطلب رخيص

-اني صرت ابنكم ومو اليوم لو البارحة تعرفوني

الله شاهد البنات اخواتي من يوم اللي عرفت

غِنى من الجامعة وهي صارت اخت من اخواتي

-والنعم وماقصرت ابد بوفاة الحجي

تحمحم أيمن وكمل

-خالة طالبكم تجون ببيتي تگعدون ببيتي الخاص

صارلة سنوات مسدود وخسارة الاثاث الزين

ياكله التراب وصراحة مااجرته حتى مايخربه

المؤجر من حجتلي غِنى تردون بيت گلتلها بيتي

موجود ليش تأجرون

-بس ياخالة حلال حرام بدون ايجار

-اكو واحد ياخذ من امه وخواته آجار

مااطلب منكم بس تذكرون أهلي بالصدقة

وتطلعوها كل شهر بأسمهم وهيج اكون ممنون الكم

-أبو حمادة مااعرف شگول

التفت لصِبى من گد مااحجيله عنها يحبهه

هوووايا ويحترمها

-لتگولين شي بس گولي خويه تم والبيت جاهز دزيت عاملات خدمة نظفو من باجر لتاخذون غير ملابسكم كل شي موجود وجاهز

-والله مااعرف شلون اشكرك

-الشكر لله مو اليه

يلة يابه اني أرفع الزحمة المفتاح هذا

طلعة خلا بيد خالتي

-والعنوان السايق اللي راح يجيكم

يدليكم بي

-بس خالة مو باجر

-براحتكم رقم السايق يم غِنى شوكت متحبون اتصلو يجيكم واجرته واصلة

طلع بعد دعاء خالتي الة بالتوفيق ووصلته

اني للباب

باوعلي

-الحجي الله يرحمه جان ميرتاح الا يكاسر العرگ ببطل سفن

-كاااااافي ابوووويه هذا

-ايييييه ايه غنيوة القردة تدافع عن الملحوم

-هههههههههه كاااافي

-شفتي الحركة خدامات نظفو البيت

لعبلي حواجبه وطلع وگف بالباب

-يلة ميري روحي كملي شغل

وسكن العافية

سويتلة قلب بايدي ضحك وودعني ماشي 

طلع للشارع ودخلت خالتي تسولف ويايه

-والله هالوليد وليد حلال وادمي

بقت تمدح بي هي بعد مااجانا بوفاة ابويه

اضطرينا اني و صِبى نكذب كذبة بيضة

ونگلها موظف وياية بالجامعة

بهاليومين ركضنة اني و صِبى خلصنة شغل

مُنى بالمدرسة واخيراً انتقلنا

بيت مريح وهادئ والمنطقة مرتبة

رتبنا وضعنا وداومنا صِبى تقربت للشركة التشتغل

بيها هوووايه

واني جامعتي صارت أقرب

كيا وحدة وأوصل

بس السنة الثالثة جانت تحمل تحديات أكبر

أشتغل وأداوم وأحياناً هواية أحتاج

مواد وشغلات وأخجل افاتح صِبى بهالموضوع

هالشي خلاني أطلع صبحية من الجامعة 

أبحث عن شغل ثاني وأثناء مجاي أفتر اجاني

أتصال أيمن

-ها يمناي

-اطلعيلي برة الجامعة منتظرج

-هااا

-منتظرج تعاي 

-يمتى اجيت

-لتطوليها فضيني

-جايتك هاي جاي امشي بالقسم

صوتة تغير وفلتت منة صيحة

-غِنى ستووووني جنت بقسمج گالو غايبة

ويييينج بالضبط

سكتت شوية وصاح

-فضيييني 

-اني بالمنصور

-شعندج

-تجيني وافهمك

-وينج الضبط

-بالأميرات

-ابقي وياية عالخط

طول الأتصال ساكت ومااسمع بس صوت السيارات

وهوستها

-يمناي

-ها غِنى

مدام گال غِنى معناها وصل آخر مراحل العصبية

گعدت على مسطبة أنتظره

ورة فترة اجاني صوته

-وينج

-هنا عالشارع تشوف اللافتة الصفرة الجبيرة

اني جواها

غلق الخط عرفت وصل 

وگفت عالرصيف وطبگت سيارته بصفي

فتحت الباب صعدت اباوع علي وجهة ميتفسر

-شلونك 

رد ببرود

-الحمد لله أشوفج طالعة من الصبح

-امشي نگعدلنا بمكان

تحرك ماشي لكوفي هادئ

-وهاي كعدنا شعندج برة ووقت دوام

-ادور شغل

مسح وجهه اكثر من مرة وباوعلي مثبت وجهة بأيدي اثنينهن عالطاولة

-ليش اني مقتنع بشغلتج الاولى حتى تدورين الثانية

-محتاجة شغل ضروري

-محتاجة فلوس

-اكيد والا منو يدور التعب اذا ممحتاج فلوس

-ومنيلج الوقت حتى توفقين بين الدوامين

-الشغل بالكوفي مجاي يجيب دخل يفيدني اجرة أسبوعية

احتاج دخل ثابت

-واني متت 

-اسم الله عليك بس انت اللي سويته لحد الآن مااعرف اوفيك حقة لو طول عمري اشكرك

-واني مااطالبج توفيني بشي ولا حتى بشكر شمحتاجة احجيلي

-سلامتك والله

-الغي لتتعبيني

-شبيك أيمن

-ويييين تشتغلين بمجمع بمحل ملابس

بمطعم وين فهميني شغل الكوفي شگد بقيتي وياهم قبل لاتجي بنية وياج مكان بس زلم هي هاي الشغلة وگوة بلعتها لتكفريني 

-بأي مكااااان بأي مكان جامعتي تحتاج صرف

وحملي ثگيل حتى على اختي 

-محد مشتكيلج ومستثقلج غِنى لتلعبين نفسي

-حتى لو اني اريد اكفي نفسي

مااريد منية من أحد سواء انت او اختي او أي بشر ثاني 

استوعبت كلمتي بعد ماخلصت جملتي وهو گاعد

صافن بوجهي مانطق شي بس اشرلي

وگف عدل ملابسه خلة فلوس الگهوة الشربناها

عالميز ومشى گدامي متحرك دخلنا السيارة وبقة يفتر

ماحجة أي شي وهذا الوجه أول مرة

أشوفه من أيمن وبدت مدخنة الجگاير وحدة براس

اللخ ساعة ضبط شمر باكيت ومد ايدة للجكمجة

طلع الباكيت الثاني وعطت بي

-مووووت نفسك بعد شعندددددك غرگانة السفن

-جيبي 

گالها ببرود وهو يسحب الباكيت

-أيمن

ساكت ولا يرد

-يمناي

ابد ولا عبالك احجي

افتر شويه وصل المنطقة نزلني بالباب

وسحب باب السيارة طبگه قبل لااني اطبگه

نزل فتح الجنطة طلع صندوگ أبيض

جبير خلا بيدي باوعلي ببرود

-عيد ميلاد سعيد

مشى بسرعة صعد السيارة تاركني تحت

الصدمة

دخلت البيت خالتي گاعدة بالمطبخ

تفاجأت برجعتي

-صباح الخير زوجة أبي الدنغوزة

-ها ولج راجعة من وقت

-ماعدنا شي ورجعت

-شنو هذا الصندوگ

-هدية صديقاتي لعيد ميلادي

-بت عامر هم تحتفل بعيد ميلادها

ضحكت واني داخلة جوه

فتحت الصندوگ شكو شي حاجيه

عنه ذيج الفترة موجود رواية ارض زيكولا

اللي شيرت ويا فيديو يحجي عنها

دبدوب صغير يفتح عينه ويسدها

حجيتله عنة اتشاقه وگتله هذا حلم الطفولة

عباية راس دزيتله مقطع فيديو بنية لابسة

عباية وگال اتمنى اشوفج لابستها

وكارتونة صغيرة فتحتها تلفون سامسونج احدث أصدار بوقته

صابتني قشعريرة حزن شمسوي ومتذكر كل

تفصيلة گلتها واني شلون قابلت حرصه

علية من الشغل برة بعصبية واطلقت سهام

كلمتي الجارحة بدون قصدي ناحية

گلبه

رفعت التلفون اتصل صدمني صوت

الاتصال انرفض بنفس الثانية

رجعت اتصلت مرة واثنين وثلاثة

تنرفض المكالمة ذاتيا تركت الاتصال

دخلت عالفيس على محادثتنا لگيته مستخدم فيس بوك الواتساب فايبر محظورة من كل مكان

غطاني غمام الحزن وبجيت هووووايه

لحد الاختناق الا هو ميهون عليه ازعلة بحرف

بس مايفهم صراعي ويا نفسي

كافي هو حملني جميل طول عمري

بگعدتنا ببيته اللي متهنى بي ويا عائلته

وبالمجان كافي وگفاته على مر الثلث سنوات الفاتو 

غطيت بالنوم بعد البكاء ومشى هاليوم

وتلى يوم ثاني وثالث ورابع والايام صارت

أسابيع والأسابيع صارت شهر

حتى رهام حاظرتني هالشي أثر على

روحي سلباً صرت أحس أني فقدت

اخوتي مرتين وبالمرتين ممعبرتلهم عن

حبي الهم فرقد غاب واني حتى كلمة شكر

مموجهتله وهو قرر يغيب واني جارحته

بكلمة

اتصل من رقم صِبى ميرد ومن رقم خالتي كذلك 

اكتب كل يوم رسالة لخطه

-لو معاتبني لو متعاركين مثل كل مرة

ولا هذا سكوتك وصمتك تعرف

ميخالف لو باقين متعاركين بس خطك

مفتوح بس اعرف اخبارك هووووايه عليه

اشهر غياب گلبي اللي تشوفو قوي

طلع أضعف مما أتصور

ختمت الرسالة وغلقت التلفون

وامتدت الأيام ماخذه مني رفيق عمري

واجت الصيفية ويا أقتراب موعد الفاينل

وبعد مالگيت شغل ثاني بمجمع ملابس

عصرية ماشية مكملة شغلي بمحل العصائر

وراجعة لمجمع الملابس

اصعد مواصلات حتى اوصل المنطقة الثانية

مستلمة راتبي ومقررة افاجئهم بطلعة بعد موجه الكآبة اللي خليتهم بيها وبالي سارح لازمة التلفون اكتب رسالة لخطه عسى ولعل يجاوبني 

كملت وخليت التلفون بجيبي

ضحكت بقهر كل سنة بالفاينل يفاجئني

بقرطاسية كأني طفلة سجلات ملونة

واقلام اشكالها حلوة ابتسمت على

هالذكرى لكن ابتسامتي أختفت

ويا صوت الدراجة المسرعة

والحركة المفاجئة والشباب اللي عليها

يسحبوني اني وجنطتي من جهة الرصيف

ويمشون ساحليني مسافة طويلة

ياخذون الجنطة ويدفعوني برجليهم

بلا أي أعتبار لضعفي كبنية ولا لأنسانيتي 

شمروني بعيد بعد ماطخ راسي بحافة الرصيف

وطفة بعيني نور الحياة

.

.

صِبى

_______

الصدمات جزء جبير من واقعنا

الواقع بالشكل الشمولي 

والواقع بالشكل الخاص

اني أنسانة ماتظهر علية الصدمات في

وقتها أقاومها واجاهد حتى تسير

حياتي بشكل طبيعي ابين عادية

وكأني أعيش يوم أعتيادي هانئ

بلا منغصات بس بعدين يبين الموضوع

كمرض كخوف وحزن عميق يبتلعني بالكامل

گاعدة مقابلة الة وكلمتة ترن براسي

بعد ماحجيتله عن قصة قدومي قبل سنوات

للشركة وعن تخاذل اخو حمزة وتقاعسه عن

مساعدتي وبعد عرضه اليه بتغيير المسمى الوظيفي

اتعييني كموظفة بمكتبة

-مافهمتك أستاذ

-شنو الصعب بكلامي

-كُله

گلتها وأبتسامته لاحت على وجهه

-كل كلامي مافهمتي

ارتبكت وتمتمت

-يعني شلون أستاذ عيد صياغة الجملة اللي گلتها

-سهلة راح تكونين موظفة داخل مكتبي

-اني. -لا. -لعد

-اميييي امييي صِبى شنوووو هاي يابه بعدنا

مابدينا وتهكرتي وانضرب السوفت وير

-شلون

-هذا اللون گومي يابه ورانا شغل قيامة 

گام عدل سترته وباوعلي

-الكمامة هايه تختفي من حياتي

مااريد أشوفها أبداااااا

-تمام أستاذ

مشيت بالممرات وهو يمشي يحاجي هذا

ويوجه ذاك لحد مارجعنا للمكتب 

-صِبى باجر عندي قضية ومصير أنسان

مظلوم متعلگ برگبتي ترتبيلي الملفات

شنطيج تخلي بمغلف اريد كل شي كامل

-تمام

-باوعي وراج هذا اللوكر مال الملفات اكو ملف

مكتوب علي قضايا مجانية

طلعته ملف جبير وجهني للأسم اللي يريده

وانكفيت على مكتب جانبي ارتب واخلي

اللي يريده لحد نهاية الدوام يلا تحركت من مكاني

وهو لابس نظارته وگفت يمه

-خلصت أستاذ

سحب الملف وبدأ يراجع وراية لحد ماضبط كل شي

رتبه بجنطته

باوعلي

-صِبى من باجر كل شي يصير على ايدج

وسويلي ركن هنا للمشروبات القضايا الجاية مهمة

جداً يرادلها تفرغ تام واني راسي مايصفى الا

چاي مخدر وثگيل وحالي 

-أن شاء الله

-خلص وقت دوامج توجهي للگراج السيارة هسه

بأنتظاركم

-أن شاء الله أستاذ

تحركت ماشية ورجع صاحلي

-صِبى محتاجين شي بأنتقالتكم

-لا أستاذ تسلم

رفضت أن أفشي سر الكارثة

اللي اوقعنا بيها أبويه بعد موته

وتوجهت للبيت

بس تخطيط الانسان شي وتخطيط رب العالمين شي

ثاني أنحلت المشكلة على أيد أيمن

اللي مااتذكر مرة قصر بطلب لغِنى

وانتقلنا بدون عناء للبيت

هالأنتقالة جانت سبب بفتح كل جرح قديم

أباوع للبيت للحيطان الغرف المنطقة وهدوئها

كل شي حلمنا بي

رغم البيت مو النا بس هذا حلمه هو بيت

صالح للعيش

غرفة لكل واحد من عدنا

منطقة خالية من المخلفات والملوثات

كل شي جان موجود الا هو

طلعت التلفون القديم والصور الفيديوات

واخذتني روحي لحديث سري بيني وبينة

وكأنه گاعد گبالي بذاك عمره لابس ذات الملابس اللي

انقتل بيها 

-شفت تحققت هوايه أحلام وانت غايب 

البيت الآدمي مثل ماجنت تسمي

الشغل المرتب اللي يحترم آدميتنا

كل شي موجود وتحقق فرقد الا انت 

تمر ببالي بالثواني واجزاء الثواني

بنومي وصحوتي اكل اشرب أنام

من بعدك ماهنتلي عيشة ولا استلذيت

بشي 

ما نسيتك وما راح أنساك

يمكن العمر يركض ويمكن الناس تنسى

بس أني كل ما أگعد الصبح

أحچي وياك

وأنتظرك ترد وتگلي ها صبيوة منتظرتني

كل شي تغير فرقد الناس والاماكن

والشخصيات وحتى أنفاسنا التعبانة

كل شي تغير بس وجودك داخل گلبي

وعيوني مثل مااهو

ابوية مات فرقد بس گلي تلاگيتو

عاتبته على تعب أديك وسهرك بالايام حتى

توفرلنا لگمة حلال

زين امييي امي شافتك حضنتك مثل

ماجانت تريد قبل لا تموت

يشوفوني أمشي فرقد واكل وأشرب

وأحجي عبالهم نسيت مايدرون

جادر حزنك بگلبي لازال قائم

وعزائك بعدة منصوب

فززتني غِنى واخذتني بحضنها

-تدرين جنتي تحجين ويا الفراغ

-جنت احجي ويا

-ترحميله صِبى أخونا روح حلال شاب ببداية

عمرة راح بلا ذنب

-الحمد لله ربي ينزل على روحه البرد

والسكون

باوعتلها كبرانة غِنى ومتغيرة هوووواية عن قبل

-غناوي راح احجيلج شي

-گولي

-أستاذ أسد خلاني موظفة داخل مكتبه

فتحت عيونها مصدومة

-تكذبييييين-وداعة فرقد

-شلون يعنيييي فهميني

بديت اسردلها اللي صار وهي عيونها

صارت تطير بداخلها فراشات

-الحممممممد لله شوفي رب العالمين

كاتبلج الأحسن واجت من خلال اخو المكروه

-ماتوقعت والله

-تستاهلين ولج تستااااهلين

باستني وگامت ومنها بديت كل يوم

صبحية اجهز ترمز الجاي بزاوية المكتب

ويا كوبين يدخل يصبح عليه ونبدي

شغلنة ننكفي بالساعات عالملفات والاوراق

ناخذ أستراحة بسيطة ونكمل

اعدل بالملفات المرتبتها والتفت منزل نظاراته

-صِبى اذا عدنا قضايا بالمحكمة بيها مجال

تجين ويايه

صفنت بوجهة للحظات

-اني أستاذ

-أكييد صِبى ليش دائما مستغربة انت موظفة كفوءة

واحتاجج بشغلي خارج الشركة

-تمام أستاذ

ابتسمت بخفة على خيالي الواسع

واني أتخيل نفسي بزي المحاماة الاسود

اجاني صوته الهامس بمقطع من اغنية

-ضلي اضحكي

ضلي اضحكي

عيونك ماخلقت للبكي

كمل يدندن وهو مخلي القلم 

خلف أذنه ويگلب بالملفات

استمريت أشتغل وهو يدندن

الى أن خلصت ووگفت بتعب مسحت جبيني

-أستاذ

-نعم صِبى 

-عادي اخذ دقايق اجيب علاج من الصيدلية اللي

عبور الشارع

وگف ومشة ناحيتي

-بيج شي

-لا أستاذ بس شقيقة وصداع نصفي لازم

اخذلي بنادول حتى اكمل شغلي

-ثواني

تمشى فتح درج المكتب وتقدملي

بيدة حبايتين

مديت ايدي ناحيته

-شربيهن واني طالع ظلمي المكتب مدة ربع ساعة سندي راسج على شي وارتاحي 

-لا أستاذ والله ماكو شي مرتاحة بس الصداع

يختفي اصحصح

-اني أريدج مصحصحة

طلع تاركني بمكاني بعد مااخذت الحبايات

ظلمت المكتب وگعدت على القنفة عالجانب

ساندة راسي هدوء وظلام

يبعث عالنعاس غمضت عيني ويا أغماضتي

دگ تلفوني رفعت راسي استغفرت

شغلت الأضوية

-الظاهر ممكتوبتلي الراحة

أسم فاطمة اخت رضا منور الشاشة

الوحيدة اللي بقيت على تواصل وياهة

-هلا فطووم

-حبيبتي صباوي شلونج

-الحمد لله انت شلونج بشريني

-هوووو جاي ابشرج حااااامل وأخيراً

-فدووووووة الحمد لله

-سكتي ممصدگة والله الحمد لله سكتهم وسد حلگهم

عني

-ربي يگومج بالسلامة انت والطفل

-وانتِ صِبى

-شبية آني

-ماحنيتي 

-لا فاطمة لا حنيت ولا راح أحن

اللي يطعنچ وانتي ظهرچ بأيده شلون ترجعين تحنين اله 

-تقنعيني مااشتاقيتي لرضا

-فاطمة الأشتياق يصير لشي نقي لذكرى صافية

مو لجروح تنلچم وية كل شهگة نفس أتنفسها 

-بس أحس گلبج بعده بيه شي يخص احساسج لرضا 

-اي گلبي بي أثر خيانته مو حبه

اللي يخون ما يخلي وراه إلا خراب

والخراب يافطوم ما ينزرع بيه ورد من جديد

مو صح

ضحكت محرجة وردت

-وصل اليوم يزورنا لمدة أسبوع وبعدها

يرجع 

-نور بلده ويارب يريح بال خالة 

برجعته

-معقول صِبى ابد ابد ماكو قطرة أشتياق وحنين

قبل جنتي تفزين بس لمجرد صوته 

-أحن فاطمة بس أحن لنفسي قبل لا يخون 

أشتاق لنفسي الواثقة البسيطة اللي چانت تحلم

مو لنقطة السقوط اللي دمرت الباقي من حياتي

ودعتني معتذرة وگعدت مخليه راسي

بين اديه هسة صار يگدر يرجع ويزورهم

بس سابقاً قفل كل الأبواب بوجه

علاقتنا

بعز تفكيري انفتحت الباب ودخل الأستاذ

خفف الاضاءة البيضة وخله الاضاءة الشمسية

الصفرة

-ليش ماسويتي اللي گتلج علي

رفعت راسي تقدم ناحيتي

-صِبى اليوم ماعدنا شي طلعي اذا تحبين

اوصلج

-لا أستاذ ماكو داعي

ركز بوجهي رمشت بسرعة وهاي عادتي

من أتوتر

-انت باچية

-هااااا

صفن بوجهي وحك جبينه

-مبينة دايخة صِبى

اگعدي اريد احجي وياج بموضوع

گعدت وهو مقابيلي عالكرسي

-راتبج السابق چان ٣٠٠

-نعم أستاذ

-راتبج الحالي ٦٥٠

-هوايه أستاذ

-اني الأقرر وهذا اقل من أستحقاقج

من تطلعين تمرين عالحسابات اليوم انطيتهم

خبر ينطوج راتبج

-بس أستاذ......

-مباقي لراس الشهر بس اسبوع اخذي

راتبج صِبى

گالها وراح للغلاية حمى الچاي جاب كوبين

-شربي وصحصحي وياي يلا

بديت اراجع ويا الاوراق والملفات

لحد وقت طلعتي هو طلع ويايه بنفس الوقت

اشرلي على غرفة الحسابات

ودخل ويايه بقى يحجي ويا

المحاسب همس طلع وتركني بعد

ماگال

-صِبى باچر عدنا طلعة للمحكمة فحسبي

حسابج نتأخر وبلغي الحجية

-تمام أستاذ

طلع والمحاسب رجال جبير أسمه ابو نعيم

اشرلي أگعد

گعدت عالكرسي ابتسملي

-شلونج بابا وخالتج شلونها

-الحمد لله عمو

طلع فلوس وبدأ يحسب

-هذا مليون ومية

فهيت وأني أباوعله

-شلووون عمو

-راتبج ويا مبلغ الاستاذ يگول هدية

اتصلي بي يفهمج

اخذت الفلوس وقعت وطلعت مشيت بسرعة

الكيا مال الخط منتظرتني

وسيارته واگفة وهو يفتح بيها ويحجي ويا الحراسات

تمشيتله

راحو الحرس ووگفت قريب منه

-أستاذ

-ها صِبى اشوفج مارحتي

-منتظريني أستاذ هسة اروحلهم

أستاذ مو هوايه هذا المبلغ

-راتبج نفسة ويا هدية إنتقالتكم

انت والحجية

-بس ............

-صِبى لتبسبسين وتأخريني ترى جوعان ومستعد هسة اكل بشر من الجوع عندج أستعداد تكونين وجبتي 

أبتسمت محرجة وهو يضحك بأريحية

-يلة لا تتأخرين مبروك الانتقالة ومسكن الخير 

سلامي للحجية ام فرقد

-شكراً أستاذ نردها الك بالأفراح

ودعتة ماشية للخط صعدت 

الخط بي ٥ بنات وشباب ثلاثة

اني اگعد يم الكرسي المتحرك كل مرة

اسمع بسبسة بينهم وضحك وهمسات

وصلني صوت وحدة

-الله اعلم من التنظيف والخدمة للسكرتارية

متنحزر حتى الكمامة ذابتها

صفنت واني التفت عليها باوعتلي رافعة حاجبها

هي واثقة اني سمعتها

وقفت السايق بنص الطريق گعدات النفاق

وهمساته ماتستهويني نزلت أتمشى

بمنطقة مرتبة وهدوء وتذكرت كلام فاطمة

أكتشفت أن جرحي لازال مفتوح

وقصتي اني ورضا ماانتهت ويحتاجلها

خاتمة حتى أنام بلا ماانتظر يم الشباك

واني أتخيل عيونه منتظرتني تلتهم ملامحي

بحب

باوعت لجنطتي حان وقت رد الدين

اخذت تكسي لبيتهم طلعت ٧٠٠ من الفلوس

وهذا بالضبط المبلغ اللي اخذته من امه طيلة

فترة سفرة الباقي جنت اجمعه يمها

طلبت التكسي المسافة وگفت ببابهم

صفنت عالباب السايق نبهني

-ها اختي تنزلين لو نتحرك

-تگدر تنتظرني مسافة عن الباب وترجعني

-تمام بس مو بنفس الكروة

-لا لا افهمك اجرة ثانية اكيد بس انتظرني

نزلت وهو تحرك براس الركن مالتهم

تشجعت ودگيت الجرس ثواني

وصوتة اجاني

-جاااااايك دقيقة

صرت بجانب الباب انفتح

وباوع بجانب الباب ذبلت عيونه على وجهي

وهو يتصفح ملامحي 

تقدم بقيت ثابتة بمكاني قويت نفسي ونطقت

-شلونك رضا

-صباوي

امتدت ايده بمحاولة حتى يلزم ايدي

تراجعت للخلف

-دخلي البنات جوه

-لا اني جاية علمودك

ابتسم وتقدم وگف بصفي

-نطلع بمكان نحجي

باوعت للسايق منتظرني

-التكسي منتظرتني

اشر للولد اجه وگف بالباب دخل هو بسرعة

دقايق ورجع مبدل ملابسه

بشي بسيط تيشرت وبنطرون 

صعدنة وانطه للسايق عنوان يروحله

اباوعلة محلوو زيادة جسمه مليان ومعضل

عيونه زايدة لمعتها وشعره الاشگر عالي ومرتب

التيشرت الزيتوني ضارب على عيونه

يباوعلي من جانب المراية التفتت للشارع

وگف يم مطعم وحاسب السايق انتظرته مشى ويايه

دخلنة قسم العوائل بزاوية هادئة يحيطها مثل

الخشب للخصوصية

گعدنة مقابلين بعض صفن لدقايق بوجهي

باوعتلة ورديت على كلامه

-مااعرف شلون أبدي 

ضحكت ضحكة احسها وجعت گلبي

-غريبة رضا انت اللي بلشت كل شي وهسه ما تعرف منين تبدي بس عادي عادي اني راح أبدي

-تتذكر آخر مرة شفتك

جنت أرتجف من سفرك من غيابك 

بس انت طمتني بنيتلي دنيا بيها انت وآني

صدگت بيك و ضحيت حتى نسيت نفسي 

رد علية بصوت مكسور 

-كلشي صار بسرعة وما چنت .........

قاطعتة بحدة موقفة تكملة حديثة 

- لا تكمل لا تحاول تبرر الخيانة 

الخيانة قرار رضا قراااااااار مو غلطة

-والله ماجان قصدي اقسم بروح فرقد

كل شي صار حتى اثبت نفسي هناك

وأرجعج جنت ناوي انفصل عنها والله

-مو جاية حتى أرجعلك رضا

ولا حتى أسمع تبريرك جاية أفرغ سنين وجع سنين سهر سنين جنت طفلة بيها

طفلة حبتك من گلبها وانتظرتك كل يوم يم شباك

بنيتلها يمه قصر من أحلام وخيال بس شنو النتيجة

رضا هدمت هالقصر وحولت ويا گلب هالطفلة لركام 

-ماجان بالنية والله بس شفت هالخطوة تسرع

طلب الجنسية

-وتسرع اجلي وتقتل گلبي رضا هالخطوة سرعت وعجلت بموتي

-بس والله ما جانت خيانة بالبداية اتفقنا بس

نعيش سويه وهذا الشي هناك عادي الاف الشباب

يتزوجون لأجل الجنسية البنات هناك يعتبرنه شغل

ياخذن علي فلوس

-لا رضا خيااااانة من البداية جانت خيانة

تدري شنو الأصعب من الخيانة 

من بديت تتغير أتصل مترد افتح الكاميرا تركض برة البيت ترد اذا جانت علاقة اعتيادية وزواج

كامل معناها تغار عليك وانت جنت تخاف على

مشاعرها

كل شي تغير الحچايه الباردة السوالف اللي قلت

رسايل الليل اللي اختفت ونفسك اللي صار يتثاوب واني أحچي 

نزل راسة وكأنه أستوعب اني چنت واعية لكل شي

-آني غلطت واعترف بس ما گدرت أنساچ

والله ما نسيتج ولا يوم ولا لحظة 

ضحكت منزلة راسي 

-أي تذكرتني بعد ما جربت غيري 

بعد ما گلبت الصفحة رجعت تفتش عنها

يباوعلي عاجز عن الرد حاولت أثبت صوتي بس للأسف أرتجف 

-أني ما إجيت حتى أسألك ليش

ولا حتى حتى أسمع تبرير

اجيت حتى اوفي دين قديم ياعشرة

عمري وياصديق اخويه ورفيقه

صفن بوجهي والندم انرسم على وجهة

-اي دين صِبى

-الدين اللي وگفت خالة تذكرني بي واللي أختك

اللي هي صديقتي وجيراني گالتها الية بصريح العبارة

اخوية صار سنين يخلي بحلگج فلوس

-والله ماادري بأي شي تگولي أقسم بالله

مسامع اللي صار

-انت گلتها صار وأنتهى يعني عفى عليه الزمن

-صِبى .........

-تصدگ چنت من أسمع أسمي بصوتك گلبي يرتجف

عيونه امتدت تحتضن ملامحي

-وهسه

-هسة أحس أحد غريب جاي ينطق أسمي شخص مااعرفه

-غرباء صرنا صِبى

-ايييي للأسف كسرة الگلب تجلب الخراب للروح

-كل شي نسيتي صِبى حتى ذكرياتنا 

ضحكت بسخرية وكملت

-لا ليش بعدني اتذكر

زييين انت ياترى تتذكر من چنت اسند راسي بحضنك وأحچي عن زواجنا وبيتنا والراحة والسكينة بوجودي وياك للأبد

-ماناسي كل شي محفوووور داخل گلبي وذاكرتي

-هههههههه ماناسي صح بس انت قررت تغير إنت خليت راسك بحضن غيري ونسيت صِبى اللي چانت تحلم بيك حتى وهي حزينة وجوعانة وبعز فقرها واحتياجها جنت أباوعلك رضا مثل الشمعة منورة عتمة أيامي

-وهسة صِبى 

-هسة ضلام يكرب گلبي

-لهالدرجة

-ويمكن أكثر

-تتذكر بتركيا من چنت أحچي وياك عن الخيانة

چنت أضحك وأگلك إنه مستحيل أتحملها 

وچنت أنت ترد وتگلي مستحيل أسويها بيچ زين

ليش سويتها ليش خليت كسرة گلبي تكتمل بيك بعد موت فرقد 

بقى ساكت وعينه نزلها للگاع 

-للأسف چنتلي أمان بس كل شي تغير

طلعت غلطانة بعد ماصرت أنت سبب رعشتي

وخوفي 

انصدم ورفع عينه بسرعة ناحيتي

-كااااافي عتب صِبى مااستحق والله مااستحق

رعشة أيدج هايه ولا هالدمعة اللي جاي تفتر داخل عينج بس والله مو بس آني حتى أبوج وقع أوراق الطلاق مقابل مبلغ علما أرجعج لذمتي

أبتسمت بسخرية 

-ههههههههههه ماأستغرب رضا أبويه دمر حياتنا سابقاً فعادي ماأستغرب اي فعل منه لأن حتى بمماته وجهلنة آخر طعنة من طعناته عالعموم اني ما جاية أعاتبك لأن الخيانة ما تستحق عتاب

جاية أعتذر من نفسي لأن بقيت أحبك حتى بعد ما طعنتني جاي اختم آخر فصل من مسرحية الأخوة والصداقة والجورة والحب

وگعت الدمعة اللي چانت متشبثة بأجفاني

مسحتهة وضحكت

-بعدني ام دميعة على توافه الأمور أبجي

باوعلي بعتب

-توااافه صِبى

-لتستغرب حتى لهجتي تغيرت وصرت مااكبت مشاعري

فتحت الجنطة طلعت الفلوس دفعتهن ناحيته

-هاي الفلوس تنطيها لخالة وتسلملي على أختك

گللهم الدين رجع وماكو بينا أي شي بعد

نزل راسا مرجع الفلوس ناحيتي

-لتموتيني أكثر صِبى أقسم بالله ماكو يوم مر ما ندمت بس خفت أواجهج خفت أشوف بعينج اللي جاي أشوفه هسه ندمان ندم عمري والله لأن ضيعتج 

ضحكت بمرار على كلامه التقليدي فمثل هيج كلام يكررو الخونة كل يوم

-ضيعتني لا رضا انت ما ضيعتني انت شمرتني مثل الورقة اللي قريتها الاف المرات وتعبت ومليت منها وقررت تقرأ غيرها

أما اني بقيت أعيد بهالورقة كل يوم أدور بيها عن معنى وعن سبب خيانتك لكل وعد بينا

ادور عن تفسير عن نقطة رجعة بس ماكو مالگيت

لأن الخيانة مو غلط حتى اسامحك عليك الخيانة اختيار رضا وانت اختاريت تخون والتفيت وره

ظهري وطلگتني واني غافلة

مدلي ايده امسك اطراف اصابعي

سحبت ايدي 

نطق بصوت متكسر بحنجرته

-تعرفين اني غبي ما عرفت شكد أحبج الا بعد ماضيعتج

- انت مو غبي انت واعي بكل خطوة 

بس چنت تتوقع صِبى بنت الجيران الفقيرة البسيطة راح تقبل بكل شي عبالك ارجعلك و أحن

بس خل أگولك شغلة الوجع علمني

وهاي العيون اللي چنت تحلف بيها

بعد ما يدمعن بس لغياب فرقد

هاي جيتي مو حتى اعتب ولا احسسك بالندم

هاي جيتي حتى اخلي خاتمة لحزني

وأسد بابي بوجه كل أذية

مو حقد بس احترام لنفسي ولگلبي

رفع راسة عيونة دارت على ملامحي

-كبرتي هوووواية صِبى 

-كبرتني المواقف والضروف

وگفت اعدل ملابسي ورجعت الفلوس گدامه

باوعلي واگف

-يعني هاي النهاية صِبى

ابتسمت ووگعت دموعي تداركتهن وضحكت بوجهه

- لا هاي البداية

مشيت تاركته وراية أمشي وبكل خطوة أحس بنفسي

اتحرر من قيد من الذكريات من الصور

من الحب القديم من الخذلان 

اييييي هي هاي البداية بداية روحي وهي تتخلص من وجع الخيانة من حب قديم انكتبله أن مايكتمل 

مشيت والمنطقة مليانة أسواق حلوة ومحلات

تسوگت ورجعت للبيت

خفيفة روح تخلصت من حمل الذكريات

ومرت الأيام أداوم وبديت أتعود

على شغل الشركة وطلعتنا للمحكمة

أستهواني الموضوع وحبيت دراسة القانون

هووايه والأشهر انطوت بسرعة

بهالأشهر ذوت غِنى وعيونها تعبانة

دائماً

وبقت كما هي متشتكي وجعها

وتواجه مشاكلهة بنفسها

انغسمت بالشغل بين دوامين

يوم جمعة وسبت بمحل العصائر

وعصرية بعد الدوام لل٩ بمجمع الملابس

رغم گلتلها ان بعد مادياً منحتاج شي رفضت

تاخذ مني شي وهي مقررة نجمع بيني

وبينهة بقاصة بدل ايجار لأن زحمة

نگعد مجاناً هوايه حاولت أعرف شبيها

لكنها بكل مرة مترد علية غير بجملة وحدة

-گلبي يوجعني

بكل مرة تگولها تغص بحسرتها

واختفى صوت مشاكستها وضحكاتهة بالبيت

بعد ماسوت الغرفة الفوگ الها وصارت حابسة

نفسها اغلب الوقت فوگ

يوم خميس دوامها الصبح بمحل العصائر ومناك تطلع للمجمع

صارت ساعة تسعة ومراجعة أتصل بيهة مترد

اربع مرات خمسة انرفعت السماعة 

-ويييينج ليش تأخرتي

-تلفون البنية هذا انتِ منوووو

بلعت ريگي بخوف

-اني أختها فدووووة منو انت

-البنية مسوية حادث عالشارع نقلناهة لمستشفى.........

حاولنا نتصل بس تلفونها بي رمز تعالولها منتهية

گال الجملة ووگع التلفون من ايدي

بعد ماصدرت من گلبي صرخة

تعلن جزعي على أختي

وتبدي وياها رحلة حزن جديد

وغياب ثاني

الفصل الحادي عشر من هنا 

شكرا لزيارتكم عالم روايات سكيرهوم