رواية كريات الدم السوداء الفصل العاشر بقلم زحل
_سلاسل .
_صار الصبح وجويسم ماكو سليمه
ماخلت واحد بالمنطقه ماوصته وابوي مل.
سليمه:من الله ينتقم من نجيه
عله هل خلفه .
راضي:خاف صاير بي شي ولج ماخليت مكان يعتب عليه .
_ضليت محتارة شلون اروح للشغل قبل ماطمن عليه ويمكن حست بيه .
سليمه:وانتي ليش لهسه ماوليتي لشغلج؟
_جا شلون اروح وهو ماجاي خاف
بي شي؟.
سليمه:كل شي مابي هسه يجي بالف عذر تلكينه يم ربع سويكه شوف وين غطو روحي لاتتاخرين ويبطلونج.
_طلعت وكل ماشوف واحد من ولد شارعنا اسأله لاكاني حيدر كفه ردت اتجاهله بس وكفني بحجت يسالني عن جويسم.
كفه:هاا مالكيتو؟
_لا ماكو رديت وعيني لصوله الي
تباوع بفضول .
كفه:خاف رايح ويه سويكه ترى
يطلعون محافظات.
_عفته ومشيت عود مسوي روحه شريف
هو احنه مثل هذا الي يكول الاكرع يعير ابو حبه يبيع مخدرات ويحجي عله اليركص وصلت للمحل لكيت مفتوح استغربت لان البنيه تجي العصر وابو المحل كال انه موضف دخلت لكيته كاعد صباح الخير.
!!صباح الخير عبالي ماتجين؟
_اسفه تاخرت .
!!لا عادي بس ضل بالي يمج صدك انه ماسالتج ابوج و امج عايشين ؟
_اي .
!!الله يحفظهم زين هم عندج اخوان خوات؟
_رديت حسب توصيات سليمه اي عندي خوان ٣ كبار يدرسون وهم يشتغلون بعد الدوام .
_لأن امي مريضه وبس انه بنيه والتهيت بخواني وهم مو كلش احب المدرسه.
!!تمام المهم انه لحد الان ما متريكي راح اجيب شي حته ناكل سوى بين ماارجع سويلنه جاي .
_انه متريكه مااهتم لكلامي وطلع
خليت ماي بالغلايه وحضرتله كوب جاب الريوك ضل يلح استحيت منه سويتلي لفه وابتعدت المحل زغير اتقيدت بوجوده طلعت برا بحجت اعدل الملكانات للظهر وهو كاعد ملل وهاي الساعات السوك تقل حركته .
!!لا تصفنين اشغلي نفسج بتلفونج اذ ماعندج نت جيبي اكنكلج من يمي.
_ماعندي تلفون.
!!ترى ماراح اجبرج تنطيني رقمج ولو المفروض اعرفه حته اذا بيوم صار عندج شي متكدرين داومين تنطيني خبر.
!!انه راح اجيبلج واحد حته مستعمل .
_لا لا انه من ارجع اكول لاخوي
جيبيلي؟
!!يابه اعتبري بالقسط عود اخصم
من يوميتج؟
_سكتت مالي خلك اجادله وبالي يم جويسم خلصت ساعات عملي لحد ما اجت البنيه بدالي طلعت مستعجله اريد بس اوصل كون الكاه كدامي اله اكفخه وانه بالطارمه اسمع ابوي يصيح .
راضي:ماروح للمركز خلي حته يتوب .
_دخلت للصاله لكيت
سليمه لازمه صايتها واكفه وبعدني
ماكاعده صاح ابوي .
راضي:لفيتي خاتون اخوج بالتوفيق لازمينه ويه جماعة سويكه سويتولكم اتفاقيه واشتغلتو ماعاجبكم العيشه وياي جابركم عله شغل قصرت وياكم .
_كعدت مهدود حيلي تقربت وانه اتوسل
شلون اذا ماطلعو بويه فدوى اروحلك
بعدني مامكمله صرخ .
راضي:انعل ابوكم لابو امكم.
_ابتعدت خفت يكفخني غمزتلي سليمه بمعنى
اسكتي ولبست صايتها وطلعت بدون ماترد عله سؤاله .
راضي:وين رايحه .
_ضل يغلط ويصيح ماكو مسبه ماحجاها عله امي انسحبت من يمه بحذر دخلت للغرفه قفلت الباب بحجت ابدل ركضت للكنتور طلعت الصندوك حاولت
اكسر القفل ماكدرت مدري شلون اجت عيني للطابوكه الي نخليها حته تلزم الباب لاينسد شلتها وطكيت القفل انفتح من الصدمه ماعرف شسوي ضليت افتر بالغرفه
وين اضمهن خاف الحكومه تجي تفتش لو ابوي يشوفهن رجعتهن الصندوك وكعدت حايرة اباوعلهن وباوع للباب صاح عليه.
راضي:وين وليتي تعاي اطيني لكمه الله ياخذكم.
_بسرعه رجعت الصندوك للكنتور وخليت عليه الملابس طلعت بخوف ها بويه جنت ابدل مابوعتله دخلت المطبخ وهو بعده يحجي .
راضي:حته ماكالت اخابر اطمن عله ابني ميت عدل ويكولون شلون تزوجت سليمه من الصبح لهسه تركض دور وتسأل .
_يقصد عله امي وكلامه صح المفروض تجي مو تتصل خليت الصينيه يمه وهو مستمر يحجي نقذتني سليمه بدخولها.
راضي:هااا بشري.
_باوعتله وهزت ايدها شمرت الصايه والشال وكعدت بتعب ركضت جبتلها ماي شربته واطتني الكلاص عيوني عليها اريدها تحجي بس اخاف اسال وتكلي مايطلع همزين هيه سولفت .
سليمه:ماخليت واحد ماترجيته وتوسلت بي آخر شي لكيت عرف همزين دخلني شفته .
_نزلت دموعي تخيلت كاتلينه لو جوعان اكيد محد ينطيهم اكل .
سليمه:عبالك خريج سجون كلت هسه الكاه يبجي يتوسل شو مكيف عرفت قارين براسه وهاي سوالف جماعة سويكه اطيته الاكل وبوجهي للضابط كتله أريدك اتوبه .
راضي:زين تسوين بس خاف ياخذونه القاضي وبعد مايطلع؟
_فزيت بخوف وتواسيل لا سليمه بروح امج ليش خليتهم يكتلونه فدوى رحتلج خابريهم لا يأذونه والله بعد ماخلي يعتب الباب.
سليمه:ولج اذا ما يخاف راح يسوي مصايب وهذا بفترة مراهقه ويندفع ويروح بالرجلين ترى لا أكرهه ولا الي مصلحه .
_خلصت اليل بجي واعتب عله امي ثاني يوم ماكدرت اروح للشغل لأن سليمه وابوي راحو يشوفون جويسم للظهر اجو ركضت شبكته ضحك.
جويسم:هههههه شبيج تبجين.
_تفاجئت شلون مامهتم
التفت لسليمه الي تباوع بنضرة وكأنو تكلي شفتي شلون ماخايف صاح ابوي.
راضي:شوف ولك ممنوع منعا باتا توصل للباب تكعد وتنجب شوكت ماجاني شغل تطلع وياي .
_وماتوقعت يرد وكلت يسكت
لأن يشوفه معصب .
جويسم:ترى مامسوي شي بس همه
شالوني وياهم .
راضي:مسوي مامسوي بعد ماكو طلعه.
جويسم:لا والله مابطل انه مابايك واشتغل حالي حال الولد وياك ماروح .
_ماحسيت اله ابوي طفر مالحك جويسم يشرد جرة للغرفه وهذا متخبل توسلت بي بس يعوفه .
راضي:وخري لا طبكج ويا انعل
ابوكم لابو امكم.
_ولأن يحجي بعناد ابوي تخبل جرة للشباك وصاح عله سليمه جيبي الحبل وهيه ماكالت لا ايدت الفكرة .
جويسم:بوييييه هدني والله اذا تربطني اطلع ومارجع بعد؟
راضي:اذا انته زلمه سويها .
_ركضت عليها لاتطينه الحبل فدوه رحتلج كليله يعوفه ولا جنها تسمعني دفعتني وتقدمت لابوي اطته الحبل .
راضي:بس لزمي الي اذا ماخليته
مربوط مثل الجلب .
_ضليت محتارة شسوي
بجيت توسلت ونوب هذا يرد عليهم بعناد ولا مهتم ربطه بشباك الغرفه وطلع لليل واحنه هوسه دخلو لغرفتهم كفيت البيت وأجيت يمه كعدت اقنع بي بس اسكت هو بعد شوي يفكك ترى السويته غلط ولك دور عليك المنطقه كلها .
جويسم:دكومي جيبي الصندوك شوفي شلون تكسرينه لأن الفتاح ضاع مني .
_شسوي بي يولي خل احجي وياك سايسهم ولا ترد عليه هسه اخلي سليمه تفكك.
جويسم :لا تحاجينها تولي بس كومي.
_ولك لو ما هيه ماطلعت وامي حته ماخابرت ولا سالت خلي نرتب وضعنا ونطلع منا ليش تخلي يحبسنه ثنينه.
جويسم: شكد تحجين اكلج كومي فضيها قبل مايكعدون.
_عله طاري الصندوك منيلك كل
هاي الفلوس؟ ولك انه ماحجيت
كدامهم بس سالفتك مو خاليه.
جويسم:خرب فتحتي هاا .
_اي خفت عبالي الشرطه تجي تفتش لأن لزموك مثل بيت سويكه مو كل مرة ياخذونه ينفشون بيتهم نفش.
جويسم:دفكيني هسه .
_باوعت عليه خفت يشرد وبنفس الوقت ماهان عليه اخلي مربط رديت عليه شوف مافكك هسه لأن ابوي يربطني بمكانك .
جويسم:ولج وين اشرد بس
اريد اروح للحمام.
:_يمعود هسه نامو اذا دكيت الباب
عليهم غير ابوي يكلب الدنيا عليه.
_باوعتله مسوي نفسه متضايق
كمت بتردد تقربت لغرفتهم ماكو صوت والضوى طافي كلت اجرب دكيت بطرف اصابيعي طرقات خفيفه ماكو رد درت وجهي اريد ارجع ونفتح الباب كمزت ايدي عله كلبي .
سليمه:ومرض شكو واكفه بالباب؟
_لا دكيته بس عله كيف جويسم يريد يروح للحمام وماكدرت افتح الحبل خاف ابوي مايقبل اجيت اكلج .
سليمه:دفتحي معوده بس ها بالج يطلع وانه راح انتضرج هنا ودي للحمام ويرجع بمكانه بين مايكعد ابوج واحجي ويا.
_رجعت فتحت الحبل وانه احجي دير بالك تفكر تطلع ترى سليمه بالصاله همه الصبح يفكونك يله روح للحمام انتضرك بالطارمه.
جويسم:دجيبي الصندوك بسرعه.
_هزيت ايدي شبيك ترى ماخذت منهن وضميته بالملابس امي انه احجي وهو متوجهه للكنتور ينزع غير بنطلونه دنك عدل الكفه نزل الصندوك
وطلعهن بدون مايحسب خله بجيوبه نزع البدي
شمره واخذ واحد ثاني وطلع وانه امشي ورا باوع
لسليمه الي كاعده تكلب بنقالها فات للحمام شويه وطلع و بدون مايلتفت ركض فتح السركي وطلع
مالحكت الزمه ضليت اتلفت والظاهر هيه سمعت صوت الباب اجت تركض باوعتلي بدون مقدمات بجيت وانه أحلف الها مادري بي يشرد .
سليمه:قفلي الباب ادخلي.
_شلون اذا ابوي كعد مالكاع وهو وين راح والدنيا بعدها ضلمه؟
سليمه:تعلم عله شارع بعد ماينلزم دخلي وين يروح اول وتالي يتعب ويجي .
_عافتني ودخلت لغرفتها وانه مانمت ولا كدرت أستقر لحد كعدو اسمعها تحجي .
سليمه:حته اذا لزمته خو ماتبقه العمر كله رابطه بالشباك عوفه خلي يجرب الشارع ينطك وينسحل ويطيح حظه ويرجع.
راضي:كتلج خلي ارجع امهم جانت مسيطرة عليه ويخاف منها عاندتي وراح الولد ليش هيج؟.
سليمه:هااا صرت انه السبب؟
ولا عله عينك شر اذا امهم ماترجع
اله بطلعتي تدلل .
راضي:أوووو مو هيج .
_احس عيوني طفت من كثر مابجيت تمددت بمكاني وهمه صياحهم عالك سمعت الباب انطبك حيل كلت ابوي طلع مدري شلون غفيت كعدت ماكو صوت
وضلمه جا شكد نايمه طلعت للصاله محد كلت نايمين توني اعبر للمطبخ وسمعت الباب انفتح التفت ابوي كوى مثبت رجليه بالكاع اشرلي بمعنى تعاي سنديني .
راضي:اخوج مارجع؟
؟خليت ايده عله جتفي وامشي بي كلبت معدتي ريحته تكتل رديت عليه وانه كاطع النفس لا بويه .
راضي:سليمه وين؟
_ نايمه منهد ماعاركتها بعد ماطلعت من الغرفه للقنفه شمر روحه حته الكلمه مايكدر يجمعها.
راضي:غير بسببكم وهاي النذله امج شكد جنت مغشوش بيها .
_سكتت عنه لأن اذا بلش يحجي بعد مايسكت غفه بمكانه للصبح افتر بالبيت لوحدي وهو عبالك صار شهر
مانايم شخيرة يوصل لبيت نوشه بالي يم جويسم ونوب شغلي الي ماعرف ابو المحل جاب وحده بمكاني وبين تفكيري التفت عله صوت الطبه ثاري طاح ابوي من القنفه عدل نفسه وهو يسب باوعلي ..
راضي:هااا شبيج مخليتني ؟
هنا جا تكسرت.
_يريد يرجع ينام وعبالك تذكر رجع
باوعلي وكال.
راض:سليمه ماكعدت؟
_هزيت راسي بلا كام وهو يحجي راد يدخل للغرفه الظاهر سليمه قافله الباب هز ايده وراح غسل .
راضي:سويلي ريوك بسرعه.
_رديت عليه وانه متوجهه للمطبخ
ترى جويسم مااجه .
راضي:عسى بالمرض شسويله يولي بعد لا اروح ولا ادور .
_تريك وطلع مستعجل باوعت الساعه بعد وكت بدلت بسرعه وطلعت لشغلي امشي وكل شوي اخترعلي عذر جديد خاف ابو المحل يسألني ليش ماداومت وصدك بس وصلت تلكاني.
!!!بعد وكت يابه جان خذتيلج بعد يومين ليش،هيج.
_اعتذر بس امي مريضه وماكدرت اعوفها.
!!!هم لازم تبلغيني حته اجي بمكانج المهم شلون صارت .
_الحمد لله اليوم صارت زينه .
!!شوفي اني ليش كتلج لازم يكون عندج نقال مثل هيج ضرف جان بالغتيني.
_مارديت عليه التهيت اعدل بالصايات نضفت المحل شويه وطلع بدون مايحجي للعصر اجت البديله طلعت وبالي يم جويسم اباوع هاي الناس هم مثلنه عايشين لحد مادخلت شارعنا ليش هيج مختلفين عن الناس الي بغير منطقه نبهني صوت كفه.
كفه:سونه شلونج.
_درت وجهي عليه الحمد الله.
كفه:ترى جويسم جان هنا راد يشوفج بس تاخرتي كال باجر اجي.
_هااا شوكت جا ليش مارجع للبيت انته تندل وين يبات .
كفه:ايي يم سويكه لا تخافين الكراج امان جماعتنا كلهم هناك.
_هزيت راسي بمعنى اي ومشيت
بابنا فايض عرفت سليمه جاي اتنضف
دخلت التفتت عليه.
سليمه:غير تكعديني قبل ماطلعين؟
_كعدت عل التخم ورديت عليها انتي
قافله الباب عبالي نايمه ليش نضفتي
انه كلت من ارجع ونصفه.
سليمه:دكومي غيري ملابسج وتعاي وياي .
_تشتغل وتحجي سالتني عن ابو المحل.
سليمه:خو ماحجه عليج لو كطع من يوميتج؟
_لا بس يكول لازم تبلغيني اذا بيوم الماتجين
ونوب يلح اله اشتري نقال .
سليمه:صدك ولج انه ناسيه انتي شعجب
ماشتريتي ولا كلتي اريد نقال كل البنات عدها.
_شسوي بي اخابر منو لا امي عدها ولا جويسم .
1
سليمه:تتونسين بي وهسه مادام تشتغلين لازم تخليلج واحد عل الأقل اذا صار وياج شي تخابرينه ددفعي هاي الطبله هنا .
_شلت الطبله وانه احجي وياها هو كال
اجيبلج واحد حته مستعمل كتله لا ..
سليمه:ههههههههههاي.
_نزلت الطبله والتفتت عليها مستغربه يا ليش تضحكين هزت راسها ماكو شي .
سليمه:اصلا تاخر لأن مستحيل يكون شريف.
_مافهمت؟
بس هو كال اخصم من يوميتج.
سليمه:كليله لا لو اكلج عندي واحد قديم بس يشتغل مابي شي بس يحتاجلج شريحه دخلي نكمل وانه ارتبها الج.
_انتي عندج سهرة اليوم .
سليمه:اي وحايرة اجيبهم هنا لو لبيت ام طيبه لأن مكانه ميكفي وهذول يردون فرقه وهواي يتعيقلون يله خفي ايدج حته تاكلين لان بعد ماطلعين اذا اجو .
_بسرعه توجهت المطبخ باوعت اكيد ماطابخه كصيتلي طماطيه ورشتها ملح وشويه خضرة اكلت وانه واكفه اخذت بطلين ماي خاف اعطش كعدت انتضرها طلعت تتفحص لبسها وتسالني.
سليمه:ها حلوه هاي لو اغيرها
شو ماعاجبتني؟
_حلوه حلوه انتي شتلبسين يلوك عليج
مو مثلي تدرين اتمنه اسمن .
سليمه:لا ولج موحلو السمن تدرين من
جنت بعمرج جني خيزرانه .
_صدك نسيت اكلج اذا ابوي راح
لخالي وقبل ترجع خو .
سليمه:لا خو ولا مو امج ماترجع اخذيها مني لان خالج عرف يفر عقلها بدون متسأليني ليش وشلون راح اسولفلج .
_كعدت وهيه تمشط شعرها بحذر .
سليمه:جدج من سكان المنطقه القدامه
فماخذ اكثر من محل بالسوك القديم
وموقعهن زين عل شارع .
_امي شعليها؟
سليمه:صبري لا تتلاكفي مو جاي احجيلج
هاي الفترة سعرهن صعد لان التجار كامت تشتريهن تسويها مخازن هو مايكدر يبيع لان مال ورثه خالتج الي بالخارج ويمكن وحده ميته بس عدها ولد وخواتّ🍀
البقيه فجاي يقنع بيهم اما بالنسبه لامج اذا ذولاك ياخذون حصه كامله امج ينطيها ١٠ الالف تسكت هو مسيطر عليها بس يبيع ويكمل يطردها .
_زين اذا رجعت هيه ماتقبل احد يدخل بيتنا يعني شلون انتي وابوي تشتغلون ؟.
سليمه:ماترجع هنا لوقتها احنه مقررين
ناخذ بيت بغير منطقه نسكن بي .
_جا ليش ماانتي وابوي ترحون للبيت الجديد مو احسن مو جاي تكولين المكان مايكفي .
سليمه:هنا افضل لان بغير مكان الناس راح تشيلنه هاي منطقتنا يعني منو يتضايق نوشه لو ام دعدوش لو النصافات اصلا محد يفكر يروح يشتكي لان كلهم شغلهم غلط مايردون الحكومه تدخل .
_اندك الباب طفرت للغرفه .
سليمه:تعاي ثوله شبيج روحي
فتحي هاي ام طيبه.
_رغم سليمه مثل شغلها بس ماعرف ليش اكرها ابد ماحبيتها حته مارديت عليها السلام وهيه مانتبهت سديت الباب بوجهه ام دعدوش الي واكفه مثل الحرس.
ام طيبه:هلووووو .
سليمه:دفوتي ام هلو .
_كتلها انه راح انام تردين شي؟
سليمه:لا روحي .
_بعدني ماوصلت الغرفه صاحت التفتت عليها .
سليمه:خل اجيبلج النقال شحني ومن اطلعين الصبح اخذي جنسيتج اشتري بيها شريحه وخلي هذا ابو العبي يرتبه الج .
_رفعت راسها ام طيبه تباوع بفضول اجت سليمه جايبه النقال.
سليمه؛هاي حته شاحنه هم
_ اخذته منها ودخلت للغرفه
خليته الشاحنه وعفته اريد الحك اغفه قبل
ماتبدي هوستهم ونوب اليوم فرقه
يمكن ساعتين او ٣ وفزيت وشكد حاولت ارجع
نومتي ماكو فايده لان الميت يفز عله صوتهم
طلعت الصندوك اتفقدت البي رجعته وانه احجي ويه روحي وين انته هسه نايم لو كاعد لازم اشوفه ايي
الصبح اخلي كفه يوديني اله جنه دوم نتعارك بس احبه وبالاخص من راحت امي حيل تعلقت بي صوت
ام طيبه الظاهر راح يرحون ايي همزين ماطلعت
رغم محتاجه حمام بس ماطلعت لان اذا شافتي
هسه تكول نضفي وانه نعسانه تمددت مو نومه تعلعل فزيت ب٧ ركض بس لميت الصاله وغسلت وطلعت
لحد ماوصلت للنجارين يله شفت ناس والله عجيب ناس عبالك نضام باليل الشارع النه وبالنهار لاهل السوك امشي واباوع بلكي اشوفه ماحسيت اله صار بوجهي كمزت .
جويسم:ههههههه كمزتج .
_مدري من الكمزه ماعرف من شوكي اله
بجيت وانه احظنه ليش هيج؟
جويسم:ام عطوب راح تلمين علينه الناس
امشي نكعد يم ذاك ابو الجاي .
_لزمته من ايده عبرنا لشارع الثاني
اكو واحد يبيع فلافل وبصفه جاي وكفني
عله صفحه وراح جاب لفات.
جويسم:هسه عليمن طالعه تشتغلين
مو كتلج انه الم .
_عضيت الفه ودرت عليه شوف مو عبالك سكتت ترى اذا تبقه ويه سويكه لا تصدك امي تجي ويانه وبعدين ليش ماتجي وين تنام؟
جويسم:ماضل ويا بس الم الي نحتاجه وابطل ولج شغل السوك مايكفينه يوم شوكت نلحك نلم .
_ميخالف بس تعال باليل لا تبقه بالكراج .
جويسم:مو بالكراج ترى ابات
بشارعنه يم كفه .
_شكد نذل وماكالي؟
جويسم:انه وصيته .
_ياكل بشهيه مبين جوعان باوعتله
سوالفه وحركاته عبالك عمرة ٢٠ استغربت من سمعت صوت نقال مد ايده لجيبه طلعه مالحك يفتحه سكت .
_اطيته الفه الزم الزم وفتحت جنطتي طلعت النقال وانه ااشرله مو بس انته شوف .
جويسم:ها منيلج؟
_سليمه اطتنيا بس مابي شريحه
كلت اليوم اخلي بي .
جويسم:خوش دسجلي رقمي يله تاخرت .
_اخذ نقالي سجل رقمه وقبل مايروح اشرلي وهو يتلفت .
جويسم:بسرعه فتحي جنطتج ضميهن ديري
بالج ابوي لو سليمه يحضون بيهن اشلع اعطوبج.
_باوعت للفلوس كلش هواي
سديت جنطتي وانه اسال
منيلك هلكد ولك لا تذب
روحك بمصيبه.
_راح بدون ماافهم منه تمشيت لشغلي همزين اليوم ماجاي ابو المحل خلص دوامي رجعت لكيت سليمه عله نومتها نضفت وسويت غده طلع ابوي يفرك بعيونه.
راضي:هااا اجيتي ؟
جا بيش الساعه هسه .
_مانتضر مني رد حجاهن وراح للحمام حضرتله غده ودخلت للغرفه ميته تعب وماشبعانه نوم غفيت لحد ماكعدتني .
سليمه:ولج كومي شينومج باليل .
_غسلت واجيت يمها ونومه بعدها بعيني .
سليمه:يااا شبيج؟
تغفين شو صحصحي خليتي شريحه.
_لا الصبح مالكيت محل مال تلفونات وهذا اليوم ماجاي .
سليمه:يحضي غير تحجين
هسه عليمن هل دوخه وادري ماراح ادبرينها خلي محابس يجيبلج وحده كلك.
_ شويه واندك الباب ومدري
شعجب كامت .
سليمه:دجيبي خل اركبها الج .
_اطيتها النقال ورحت اكل اجيت لكيتها مكمله وحافضه الرقم ومسجله رقمها ورقم ابوي اخذته
بفرح اكلب بي .
سليمه:ابوج ماله جيه قفلي البوب ونامي انه هم نعسانه .
_مافرحت بالنقال بكد فرحتي من كالت نامي بسرعه قفلت الباب ولفراشي كعدت مرتاحه تذكرت جنطتي يبووو شكد ثوله انه نسيت اضمهن بسرعه فتحت
الصندوك وخليتهن ورجعته غسلت لبست صايتي
وطلعت وهيج استمر الحال يوم الي ماكو سهرة اشبع
سليمه:بله لاتسكتين شو اله تحجين دمشي لججج مو انه الي تهدين عليها لبيتها نسيتي نفسج لو شنو وبعدين الف مرة كتلج ماكو شي ولو اريد ماعرفتج عليه .
ام طيبه:خلص اذ هيج كفي عيونج عنه
ولا تلعبين وياي احرك الاخضر واليابس .
سليمه:ماخايفه من تهديدج بس لخاطرة راح اسكت وبعد ماتجين يمي عندج بيت وهناك احيي حفلاتكم .
_طلعت ام طيبه وهيه ماراضيه
وسليمه عيونها تجدح نار ضلت تاخذ اصاله وتجيبها لزمت نقالها ماعرف بيمن تتصل بس ماردو عليها ركضت للمطبخ لان ريحة التمن يمكن احترك طفيته اجت وراي.
سليمه:الله يحركج ام طيبه يله
مامحترك كلش .
_شغلت الطباخ وخلته يتهدر دك نقالها .
سليمه:ركضي جيبي بسرعه .
_انطيته الها فتحت خط وعافته عل ميز وركضت للسنك غسلت وجها حيل عبالي محترة عصرت خشمها وذاك يصيح الوو ردت عليه .
سليمه:باشا .
!!ها ام الحب .
_وتفاجئت بيها شلون تبجي خلت ايدها عله
حلكها ودموعها تنزل ضحك ورد عليها.
!!من زعلك من بجاك .
سليمه:انه لخاطرك ادخلها تالي تعاركني
وتهددني بيتي ترضاها .
!!لا ماراضاها تاليتي شيخ مال الراقصات سليمه خيالج واضح وهيه شافتج واكفه باب الغرفه .
سليمه:مو بيدي شسوي اغار عليك.
!!!لا تسوين يابه انه احلها الج بعد مانجي يمج
ولا التقي بيها وهيج كلمن يذكر صاحبه بخير والي انطيجيا بجيتنه يمج يوصل كل شهر وفوكه بوسه ام الحب انتي غاليه ع قلبي .
_تحجي وتمسح بدموعها باوعتلي بنضرة تفكير وردت عليه .
سليمه:وانه ماريد اخسرك تجي والك اليرضيك والي تتمنا وعوف ام طيبه .
_ضحك ضحكه طويله وهو يلعن
بيها لان ضل يكح.
!!! الله يقرضج لعبتي براسها وراح تجريها لدربج هسه عندي شغل انصرفي حاليا وبعدين نسولف .
(قدر )
_ماعرف ابجي عله نفسي لو عليها تسولف
بوجع وانه استمعلها بتركيز .
وداد: اتلفت بخوف من شكل المريه الي طلعت
والي رعبني منضر البيت عبالك نكرة ريحه
كريحهه رطوبه اشرت دخلتنه وهيه موجهه
نضراتها عليه وتحجي .
ام غايب:وهاي من يامصيبه جايبها .
وداد:رد عليها وهو يضحك .
!!لا لا مو الي بالج .
ام غايب:جا شعدك جايبها؟
وداد:سولف الها مختصر ردت سألته .
ام غايب:وشكد تبقه ؟
وداد:كام وهو يطلع فلوس من
جيبه قدمهن الها وهو يحجي.
!!يومين ٣ ان شاء الله بس تنحل الشغله نجي عليها يله عود ديري بالج مو تخلين احد يشوفها .
_احس جاي اسمع قصه رديت عليها يمه يعني ليش كل هذا خو راجعه لاهلج ومعتذره منهم اكيد يسامحوج .
وداد:غباء وخوف لان اعرف اهلي لو راجعه جان ذبحوني وتندمت لان مارحتلهم وهاي
دخلتي للجحيم.
_كملي خليني افهم من يامصيبه انه.
وداد:يوم يجر يوم ومحد بين عليه المنطقه باليل تنقلب عالم ثاني والبنهار ماتسمعين صوت الي عرفته ام غايبه جده يعني تولد النساء وتشتغل بالمستشفى تطلع الصبح تقفل الباب عليه ومن احد يدخل عليها
تضمني الندم والخوف اخذ من حيلي والكارثه
من ردت اطلع صاحبت البيت ماخلتني وبليله
كشرة سودة ضلمه ماحسبت حسابها ولا فكرت
بيها جانت ام غايب عدها خفارة .
_قطعت كلامها وهيه تشهك
التفت عليها حايرة دموعها تجري
وتعضعض بااديها.
وداد:نايمه وحسيت حركه بالغرفه الي انه بيها فتحت عيوني وغمضتها من خوفي و رهبتي كتمت النفس عبالي جن شكله مرعب بس اسنانه تبين عيونه حمر ريحته كريهه جرني بقوة ويمكن اني من هول المنضر والصدمه ماعرفت شسوي ولا دافعت عن نفسي .
_من حلات روحي كمت افتر بالغرفه مثل المجنونه وانه اردد لا لا ماصار شي كولي احد نقذني منه اي اعتبريها فلم مسلسل روايه اكيد عمي فاروق هو الي ضهر بهذا الوقت وخلصج منه .
وداد:مثل ماتمنيتي اني هم هيج تمنيت هجم عليه
مثل الوحش ماعرف غبت عن الوعي لو شنو صار بيه فتحت عيوني النهار طالع كمت ادور وانه اتلمس بروحي وكل عقلي حلم لكن خاب امالي من درت وجهي وشفته نايم شكله يخوف جنه مجرم.
_كابوس ماعرف شنو اوصف الي انه بي عادي ويمكن الانسان يمر بضروف قاسيه يتحملها لانه مجبر مثل لكن بمرور الزمن يتقبل الامر لان الموت حق وحقيقه بس يصير كل هذا ماتخيلت ولا فكرت بيوم اواجهه شيء لا يتقبله عقل ولا منطق ايدي عله حلكي اباوعلها دموعها تنزل بغزارة دنكت وكلي امل ماسمع منها الكارثه شهكت وهيه تعض ايدها بقوة هزيت راسي لاااا .
وداد:اترجاج لا تسوين هيج انه اريدج تسنديني .
_هزيت راسي بمعنى كملي وبعد عندي امل انو ماكون نتيجه غلطه او ضحيه لاغتصاب.
وداد:ارحمي حالتي الكلام بهذا الشي يحرك روحي .
_احجييي يمه منو ابوي .
وداد:ماعرفه .
_احس ماعندي طاقه ولا حيل صحت بيها
بعدج تجذبين كااااااافيييي كافي كافي صوت
عمي وهو يدك الباب ويصيح.
فاروق:فتحي الباب موتيها الله لايوفقج
ياوداد .
وداد:لاتوجعين روحي اترجاج .
_هيه تحجي وانه توجهت للجربايه مال ابوي
سحبت الغطى وتمددت انته اي انته الاب الي عرفته حته لو متت تبقه ابوووووي والله ابوووووي انه احبك هواي هواي اسفه اذا انشغلت عنك بيوم ياريت يرجع بيه الزمن ماعوفك لحظه يابه يابه يابه اخذني وياك .
وداد:ولج ماما اموت اذا صار بيج شي فدوى لكلبج .
_القلب عضو يضخ الدم ويوزعه عله انحاء الجسم مو حمل كل هذا احس شي بصدري ياذيني حيل كامت فتحت الباب دخل عمي وهو ينضرلي بعطف اشر لامي انو تطلع كمت وانه احجي لا عمو بعدني ماعرف كل شيء ..
فاروق:اول وتالي تعرفين ياقدر بس هم اعذريها
ترى الصار مو اختيارها ارتاحي وبعدين نسولف .
!!!!لو قرأت الحدث بروايه لقلت الكاتب خياله واسع
لو شاهدته بفلم او مسلسل لشعرت بالملل من اوفر المشاهد .
من انا ؟
ومن اكون والى اي فصيله
شكرا لزيارتكم عالم روايات سكيرهوم
