رواية الرجل لاينسى حبه الأول الفصل العاشر بقلم سهير رائد
ابـد ما نزلت علمودهم
ولا شفتهم شوفة خاصه
انزل لدوامي واصعد منه .
صعدتلي زهراء ليل
بقت واكفه
ها زهورة شرايده تعالي اكعدي
خاله خالو مريض ليش متنزلين تشوفية
لاحبيبتي خليني بمكاني مرتاحه وخالج يومين ويصير زين
زهراء خاله بس هو صارله فوك الخمسة ايام كلش مريض بشكل والله ويباوع على الدرج يتمنى تجيله وماما حيل مقهور ة وهيا كالت روحي لخالتج بلكي گلبها يحن عليه
لاحبيبتي گلبي ميحن گولي لماما
نزلت البنيه وهو صدك
كلش مريض . وميهون علية بس هم مانزلت
شسويله يعني دكتورة اني قابل وانطي علاج وصارلي شهرين مشمورة ماسأل عني والمعاملة بالمثل افضل من المعاملة بالاصل ..
عمي خطيه ما عافني كام يصعد الخبز من يخبزون اليه ويجي من اجي من الدوام وشطابخين يجيبلي بحافظات صغار . ويشوف شناقصني .
ويتوسل بيه احجي وي زوجج وعمتج مااقبل ..
خضر الافلاونزا دكته دكه سبعة ايام هو بس نايم وابر ولامرة نزلتله شعليه اعرفه يعرفني . عمي بوية ثاريج چوية وبيج كل البلا ويضحك .
حتى من نتلاكه مانسلم على بعض اني حيل انقهر هذا زوجي الكتل روحه عليه كتل حتى نرجع هو هذا الجان يتمناني امنيه
هسه عبالك غربة .
اتعجب من اسمع النسوان يسولفن على ريحة رجولتهن على انفاسه على صوته اني مشاعري تجاهه ماتت نهائيآ ليش ماعرف .
رغم اني حبيته بعشق اجت فترة اباوع على طوله لو من يدخل عليه وينام على التخم افرح
بس بدخولة علية
اريد الايام تمشي ولاشهر واخلص من الدوام واروح لااهلي اللي صدك مزاعلتهم ومااحجي وياهم بس امي احجي وياها.
يخابرون راح نجيج اكلها لاامي اذا يجون الا احرك روحي لو انهزم وافضحهم . امي يا يمه استهدي بالرحمن .شنو اول وحدة زوجها يتعارك وياها ..
محد يفهم البيه محد يفهم اني من شنو اعاني حاسديني على رجال بس بالاسم ..
كام يصعد خضر ومن يصعد امه تكوم تصررررح وينزل راح اموت الحك يمه خضير امك ماتتت هيا لوحدها تصرخ احس بيها مثل الجاي تتخبل .
ينزل هو حتى قبل لايكول شلونج ..
صعد يوم من الايام
شنو بشائر شلونج
الحمدلله زينة وبخير
خضر الحمدلله عساج دوم بخير
يكعد يفتح موبايلة بية انترنيت عدهم بالبيت ابن عطور عندة حاسبة وخضر على موبايله وبس احنة ماعدنا
اني ماعرف شي للموبايلات الجديدة.
يوم صعد يمي وخلى موبايله على الشحن طبعا هو موبايله يعني حديث اني بدون كاميرا قديم ممجددته بس ماعرف كلشي.
اشوفه مندمج بالموبايل ؟
بالمدرسة معلمة نفس موبايلة
كتلها علميني عليه خاف اشتري .
علمتني على اللمس رسائل فايبر واتساب فيس هيج شغلات الصور الكاميرا..
عجبني اشتري ..
هم صعد كعد بالهول بيدة موبايله عندة 3موبايلات اثنين بدون كاميرا وهذا اللي لمس
..
اللمس هواي يستخدمه ويضحك ..
اتمنى اعرف على شنو يضحك
من يعوفة مرات اجي بالسر افتحه بس شنو ارتبك بسرعة اسدة
كمت اشوف من يكعد اباوع شلونه هذا الشي او البرنامج اليضحك بيه !!
طلبت اشتري موبايل جديد
هو وافق واجبلي واحد بس طلبت
منه نزل الية فايبر واتساب
ورتبة كلش سهرتين علي ليلتين حتى اتعلم بيه وهم اسأل
صعد
خلاه على الشحن هو مطمأن مني لان لا اجي يمه ولا امد ايدس على شغلاته دخل للتواليت .
من سوالي موبايل كال خلي مواليدج الرقم السري حتى ماتنسينه اني مخليه مواليدي
ردت افتح جهازه اني هم خليت مواليده انفتح بسرعه ..
رحت للفايبر لكيت وي بنية مراسله وسوالف وضحك وسوالف يعني فوك 18+
كمت ارجف من المستحى رجف وخفت حيل طلع لكاني لازمته ومصدومة بصراحة صدمه موطبيعية مصدومة من الكلام لان عيب يعني اني مرته اتمنى يحجي وياي هيج او ردة فعل وياي من اشهر حتى نسيتهت
ولا اني احجي هيج وياه ولاافكر هيج .
اخذة مني بسرعه وحاول ينزل .
بصوت عالي صحت كتلها تدري بيك انت مو رجال ومرتك نايم وياها مرة وحدة من اشهر لو ماتدري .
رجع علينه ضربني ضربة
كال اني رجال غصبآ ماعليج بس اني وجه الجلب من اشوفج حتى نفسي
تنسد عبالك جلبه كدامي بس تبح !!
ونزل ..
كمت ابجي . شوية ورجع
بشائر ترا هاي المراسله صاحبي يراسلها مو اني صدكيني . اني مامقهورة من مراسلاته وكلامهم القذر مقهورة من كلامه وضربته اليه
اني مو حيوانه كلمرة تضربني اذا انت تشوف نفسك حيوان اني لا فااااهم
خضر:بشائر كافي عمي ساعة سودة اللي تزوجت بيها ما اجاني من هذا الزواج بس المرض والقهر والذل من يوم ما دخلتج لهذا البيت ذلتيني ذل
عاااد كمت بكل قوتي شبعته ضرب والله ايدي تعبت من الضرب واغلط اشكال الحجي الحجيت عليه .. لزمني موتني ضرب ملخني تملخ بس جنت مااصرخ استحي والله .صوتي يطلع حتى من احجي بصوت عالي انصي صوتي ماريد احد يسمعني ويكول هيا السبب ولسانه طويل ..
فقدت بالضرب بيه يكلي اكرررررهج اكررررررهج
طلكني خضر طلكني
ماطلكج ماطلكج ماعوووووفج!
تناقض بكلامه علية
بقيت اعالج بروحي وبالضربات وادعي كسر بيدك خضر الله يشل ايدك على السويته بية
ثاني يوم بالدوام كلها كالت روحي اشتكي عليه واقل شي حبس ست اشهر ..شلون اشتكي عليه كلها راح تلومني ومحد ينصفني لان هذا واقعنه بالعراق محد يوكف وي المريه ضد رجلها.
من رجعت بنت عطور شايفتني
وخابرت امها وخالاتها
عطور وابتهال خطيه البنات صعد فوك
هنا مايكدرن يحجن على اخوهن
اخوهن اني متأكدة انتن تعرفن اخوجن مو انسان عادي لهيج ماكو كلام مقنع بحلوكجن
اتفرجتن علية شفتوا شلون اخوجن الرجال شمسوي بيه يلا روحن انزلن احجن لامجن حتى ترتاح وتبطل تسويلنه سحورة تهدم حياتنا أكثر ..
صعدن عمي ومرته احجي كولي
اني مااحجي شحجي وشكول والله حتى عيب ..
صعدت ابتهال
كالتلي ابتهال اكلج بيني وبينج خاف ماتقبلين ينام يمج ويضربج هيج لان الرجال اذا يريد نومته ويعاند يتخبل عبالك يتحول وحش .
ضحكت من كل گلبي
كتلها اي خطيه مو كله رجولة حتى ماخلي !! والله يالله عود مثل الزلم خضر !!
اخوج مريض يحتاجله علاج نفسي وروحاني يطلع السحر البيه
هيا سكتت ..
واني سكتت وگلبي وجعني لان حجيت هيج كدام اخته وعلى امها ..
طبعا حسيت ام خضر فد مرتاحه ومكيفه والله هيا صايرة عبالك وجهه الشيطان ضعفانه وكبرانه ومجلدة وعيونها صغار تترسهن كحلة وجهه اصفر سنونها صفر وجنها حيه صفرة كلها حيل تفتر عدها حيل مال بليس
اتذكرني بالشيطان اللي يطلع بكارتون سندباد اعوذ بالله من اشوفها گلبي رجع ينقبض
رجعت اقراء البقرة وقران . اخاف من النوم وحدي اشغل التلفزيون على القران على قناة المجد وانام ..
اجه ابوي وغسان وامي بالجمعة يشوفوني ابد ما حجيت وياهم بس سلام هما ماصعدوا يمي سلمت وكلت لامي تجين فوك كالت لا ماكدر اصعد رجليه توجعني كتلها براحتج .
صعدت فوك شعليه . كلساع عطور تودي عليه تعاي عيب شيكولون اهلج .
صعد خضر كال انزلي عيب اهلج احترميهم .
كتله معليك لاتصير خيير هسة
ماانزل من رادوا يطلعون نزلت سلمت عليهم امي ماتت قهر يعني صدك انقهرت خطيه دمعتها بعينها عليه ..
خابرني جهاد يكلي امي وابوي كلش مقهورين رادوج بس تحجين شبيج كدام عيالج وشنو المشكلة البينج وبين رجلج حتى يكدرون يحجون وياخذوج اني عايفتهم وخضر بس يمدح بيج وامه هم كلها تمدح بيج ولاجايبن طاريج وانتي صاعدة وعايفتهم .
كتله هما ميردوني كل مرة احجي ابوي يكول تحملي .
جهاد اذا وي عمتج اتحملي مرة جبيرة اذا وي زوجج كولي شنو البينكم حتى نعرف ندخل بينكم انتي متهونين علينه من تزوجتي لليوم احنه ممرتاحين عليج
لا تتدخلون كلشي ينحل ويخلص..
جهاد بكيفج بس خابري اهلج راح يموتون عليج.
مشت الايام بهدوء واجت عطلة نصف السنه والراحت لااهلها واللي سافرت واللي راحت زيارة الا اني كاعده وساكته ..
خضر كلي حضري نفسج نروح لاهلج تبقين يمهم جم يوم عيب ابوج وامج يخابرون عليه .
كتله ماروح ولا تلح ولاتسمعني صوتك .؟
صدك خضر شلونها صاحبتك !
خزرني زينه تسلم عليج ..
يا الله يسلمها والله يا ترى كدرت تحقق التريدة واللي اشتهته بالمسجات .
وكف يضحك بااستهزاء واكثر واكثر شبعتها هم !!
احس استفزني حيل وقهرني ؟
اجيت اكوم اضربةوواغلط واسب وافشر هديت نفسي..
ايي الجذب قابل بلاش على الاساس اني ماعرف انت شنو وضحكت بااعلى صوتي وكملت
هم كمت ترجف وتخاف من وصلتلها ههههه
لو تعرك وتكلها لا اني رجال اي رجاال وعوزك تبجي وانتي اصغر جاهل بالشارع ارجل منك بالفراش هههه ..
خضر . ادبسسز ياقندرة يا قليلة التربية وضربني بالشحاطة اكو وحدة هيج تحجي لزوجها بس انتي وحدة وجهه وجه الجلب بس ينبح ومقرف ..
ايي احسن منك
اضرب هو انت رجال بس بالضرب والباقي ههههه وكل كلمه ضحك ..
خضر . ترحين لااهلج واطلكج واخلص منج ..
اتحداك تطلكني افضحك
فضيحة اشهرك بين العشيرة وجماعتك بالدوام
خضر . مارد عليج لان انتي صايرة قبيحة لسان وماريد امد ايدي عليج ..
مشى ينزل
ايي انزل يم ماما خلي تنومك بحضنها ابنها المدلل الرجال الهيبة ..
نزل طبك الباب .
قفلته وراه كمت ابجي
الحقير عبالة اسكتله من يكلي نمت وي غيرج ويتباهى برحولته اني الك ..
رجع علية ورا ثلث ساعه دفر الباب دفر.
اسمعي ممنوع تحجين وي اي واحد اسمه رجال بالعالم غيري .
وممنوع تباوعين بلا على منو تباوعين وتشوفينهم رجولتهم بالفراش .
راح يباوع من شباك الغرف على الشارع فتح السطح
دخل للغرفة
كعدت على الجرباية..
اصبغ الشباك ابيض مثل ابوك من صبغه من جانت امك تراقب بينه قبل وانت تسوي روحك رجاا وياي هههههههههههه تذكر من جنت تهز بالجرباية هههههه تذكر من جنت تعضني واني اصرخ حتى يكولون خضر رجال وامك تراقب بيك بعد اخذها من تروح لصاحبتك خل تشوف رجولة ابنها جم حصان كمت اضحك واصفك بيدي هو واكف صافن عليه ويخزر ..
خضر . شكد احاول اتقرب منج بس انتي حقيرة تردين بس هاي الشغلة شما اسوي وياج مو بعينج لان ادبسزز .
عيوني اي اني ادبسسزز لعد ليش تزوجنه اباوع علة طولك لو على شاربك .
صدك لو تزين شاربك لان ماكو فرق عن النسوان والبس شيلت امك يجوز فد يوم اخليك تتندم على كل كلمة وكل ضربة وكل شي سويته بيه والبسك الشيلة واخليك مرة مابين الزلم ياخضر اني اعلمك ..
هجم علية خنگني يضرب بوكسات بقوة جرني من شعري ركعمي بالكنتور كال اليوم الا اكتلج موووت اليوم اخلص منج للأبد .. اني قاومته ضربته بقوة بمكان حساس يلا كدرت اشرد وتنزل جوا اريد اطلع بالشارع لزمتني عطور مرعوبة بالمطبخ
عوفيني اشرد اشوف العالم همجية خضررر عباية بالمطبخ اخذته وركضت بس هو اقوى واسرع لزمني ودخلني سد حلكي وعطور وابنها وبتها يحاولون يفكوني مني يكلهم خلوني اكتلها اليوم وارتاح خلوني ..
صعدني فوك يضرب واني كمت اضرب ..
وام خضر تصيح وتغلط !عليه .
طلعته عطور كامت تضرب وتغلط عليه وطلع سديت الباب غسلت لبست هدومي خليت كطنه بخشمي ينزف ..
اخذت جنطة صغيرة كلما ازعل احضر المهمات بيهن ..
نزلت تسحبت اخذت السيارة واني بعدني بحرارتي طلعت لاهلي ولاأول مرة اصعد على الشارع العام شلون طلعت من البيت ماعرف اسوق وماشوف من البجي خايفه لا يجي وراي خايفه تعبانه مهضومة
التلفون احترك ماكدر اطلعه من السيارة وصلت لسيطرة يعني بعد ساعه واوصل لاهلي وكفني رجال جبير بالسيطرة شاف وضعي مو طبيعي فتحت الشباك وابجي .
شبيج منو وياج .
عوفني عمو اريد اروح لاهلي .
ايي مااكدر شنو متعرضة لتسليب
لا بس تعاركت وي زوجي وانهزمت واريد اوصل لاهلي بهيج ولايه قبل الليل ..
ماحس الا كلها التمت السيطرة عليه .
يكولون الا نوصلج كتلهم لا بس اني اول مرة اصعد شارع عااام وخايفة من الطريق ..اريد اطلع وطلعوا وراي السيارات خصوصا الكبار.
كالو لا ناخذ سيارتج ونوصلج ماقبلت.
طلعني الضابط كال طلعي وراج بخمسة
دقايق اطلع بقية السيارات ..وهذا رقمي اي شي بالطريق اتصلي عليه خاف يلحكج رجلج
طلعت منهم على السريع بس صدك تقويت وصلت للناحية البيها اهلي ولكيت ابوي واخواني بالباب منتظريني .
تلكاني ابوي يركض شافني .شكوووو .
ماكو شي اذا تكلولي شكو وشنو وتكومون تحجون هسة ارجع ..
دخلت امي كاعده بالطرمه تدك علة رجليها شافتني كامت تصرررخ واني ابجي ..
جهاد . اني اعرفهم عارات بس ااااخ .
ابوي اششش لحد يحجي دخلي بوية جوا ارتاحي ويصير خير ..
اشرب مي وارجف وابجي ..
اندك الباب حيل .
فتحت بنت غسان كالت عمو خضر .؟
دخل يصيح عمي عمي ..
جهاد شكو شبيك تصيح
ابوي اشششش لحد يحجي ابد ..
تعال عمي .
خضر . عمي تقببلها تطلع من بيتي وتجيكم وتسوق بدون مادري دورت عليها مثل المسودن تقبلها ويصيح ..
كمت اييي يقبلها وليش ميقبلها طلعت انهزمت قبل لاتموتني مو تحلفت اليوم تكتلني
خضر . اييي كدامكم بتكم لاتحترم وتتجاوز وتغلط وكلما احجي وياها باادب هذا اسلوبها صياح بكل مكان وعدم احترام عليه وعلى امي واسكت واكول بنت عمي .
ابوي . غسان ام جهاد جهاد اطلعوا برا
جهاد شنو نطلع غير نعرف بدون سبب هيا تصيح وتحجي وتتجاوز عليه وعلى امه ..
ابوي اطلعوا ااا ..
طلعوا وكام قفل الباب
احجولي من الاخرين شنو البينكم الخلاكم هيج اعداء .
خضر ماكو شي عمي ماكو شي يعجبها تدك ليل ونهار
اطلع عوف امك عوف امك يعني ماعدها شغل وعمل ولا عدها سالفه غير امي شنو اني زمال وتركبني بشائر واعوف امي ..
انتي بشائر؟
والله جذاب لان هو لايحجي وياي ولاعايش وياي وكاعد يم امه ليل نهار اكل شرب نوم واني مركونه على الرف.
خضر . من لغوتج من حقدج من كلامج السم اللي كلما اكعد يمها بس تحجي على امي عمي تقبلها اتمرضت سبعة ايام اني وامي بالجذب ما اجت نزلت يمي تداريني بالجذب ماكالت حمد لله على سلامتك عمي بشائر ماتريدني بشائر اني تشوفني بالعين الصغيرة..
ايي خوش تحجي وخوش تصفط جذب بوية اني ماريدة لان خاين ومو رجال بيه حظ اسمي متزوجه ولا هو كلشي ماكو فارغ لافعل ولا هش ولاينش ..
رفع ابوي ايدة يريد يضربني .
بشايرررررر صاح شنو هذا الحجي .
خضر عمي شفت كلامها بوجودك هذا اسلوبها وكلامها وعود مخليه احترام الك
وبعد وياي تصغر بيه وتمشي وتكول انت مو رجال انت مابيك حظ واسكت وابلع لخاطرك ولان احبها ومن طفح الكيل استغفر الله يعني عمي اليوم تكلي جهال المنطقه عيب احجيها جهال المنطقه ارجل منك بالفراش .
ابوي صار عصبي صددددك ولج ..
اييي صدك لان هو صدك مو رجال بيه حظ ..
ابوي .. مع الاسف عليج وعلى تربيتي يلا يلا امشي وي رجلج اني ماعندي بنية هيج تحجي وي رجلها وتجي تتظلم وتتمسكن يلا بيتي يتعذرج ..
صحت بجية بوية تطردني تصدكة وتطبك وياااااه ..
من لسانك ومن كلامج اللي عيب ينحجي ماربيتج هيج وسفه .
خضر . عمي لاتضوج ولاتنقهر اني ماردت احجي الا انت جبرتني واني بشائر احبها واريدها والله بس هيا تستفزني اريد منها كلمه طيبه واحترام ماريد شي منها !.
ماريدة خلي يطلكني
خضر: عمي اذا تريد طلاك وهذا اللي يريحها يجرالكم بس اني بشائر ابيع عمري وأشتـريها
ابوي:لا ترجع وياك بيتي يتعذرها
لبست عباتي وطلعت عفت خضر يحجي وي ابوي
غسان برا .
شكووووووو
عفته ومشيت اعتبروني متت لاتسألون علية واذا ابوي مات لاتكلولي ابد .
صعدت بسيارته گبل حرك سيارته وهو المنتصرالطريق كلة ابجي وابجي .
وهو يحرك جكاير
من وصلت للسيطرة بعدهم كلهم اللي وكفولي لفيت وجهي بالعباية ..
وصلنه للبيت نزلت احس نفسي صار عمري 80سنه امتوني طاحت كوة امشي من القهر والكسرة
كسرة الاهل جبيرة اذا ميوكفون وياج واني من حجيت لابوي اعتبرني مو خوش بنية وغير مؤدبة وخضر اله حق بمعاقبتي على سوء تربيتي ..
دخلت ماشوف من البجي
ام خضر رجعت الحبابة ام المصايب .
خضر . كافي يمه كااااااافي صاح بصوت عالي هز البيت هزززز ..
صعدت ارجف وراسي يوجعني ذبيت مي على وجهي ونزعت حجابي وكعدت واني العباية على جتفي
احس روحي مااتتت ..
اسمع جوا امه رجعت تحجي وصوتها اليرجف
وهوا يكلها كااافي ماتملين لخاطر الله هاااي رجعت بشائر وغصبا ماعليها واكسر راسها بس كافي حجي والله طلعتن روحي..
عفية بني غصبا ماعليها وعلى ابوها واخوها اللي مسوين روحهم زلم ؟
كلت ليش بس اني اسكت وامه تحجي .هيا كتله ومكتوله
وكفت بالباب الدرج كتلها اخواني زلم وسباع ويشكون الكاع الدور والباقي على ابنج رجال بس يم العالم ..
هو كاعد على كرسي بس امبين تعبان ومنهد هد
ام خضر:عاهر ام الزلم الا اخليج تزوعين دم
اني مو عاهر اشرف منج ام السحوره
خضر . صاح بشائر دخلي جوا وسدي بابج وكسري الشر ماريد اصعد اكتلج من جديد .
ام خضر اصعد أدبها هل الكحبة هاااااي ام الزلم !
انجبي واحترمي نفسج لو تستحين احترمي ابنج الليمج بس انتي تدرين بية مو رجال لهيج تصيحلي ام الزلم .
اطلعين نقص ابنج ونقصج بيه خضر سوا الدرج شبختين عليها
اني ردته يصعد يموتني واحرك گلبه وگلب ابوي وكفت بتحدي
كتله اذا انت رجال صدك موتني اني اريدك تموتني .
يخنك ويضرب والعياط مال عطور وبتها وابنها
اسمع صوت ابوي وغسان ؟
فوكنا وام خضر تكله بتكم كحبة ام الزلم يأدبها ماشوف الا ابوي نزع عگاله وطاح لام خضر بالعگال يا جلبه اني بنتي ام الزلم بنتي هاااي بشاير
ويغلط عليها كحبة ياعاهرة اني بنتي هيج تسون بيها .
ابوي شكد ماجبير بس قوي يعني خضر وعطور وغسان يردون يخلصوها ماكو ..
يعني خنكها ورفعها وعيونهت طكت انتهت
احس مي بارد نزل على گلبي .
امسح بوجهي الدم من خشمي بس فرحانة لازمه الحجاب على خشمي واشوف ابوي شلون ضرب خضر بعگال ووكفت بينهم عطور تصرخ وتتوسل كافي عليك الله عمي غسان ا نخاك غسان لاتخليهم يتكاتلون خضر
وابوي يضرب بخضر وامه لان بعدها عن ابوي..
بحلم لو بعلم اني انجر من الدرج بيد ابوي يهدد بيهك يكتلهم وخضر ينزل وراه يريد يسكت ابوي
ويكول عمي بس اذكر الله
ابوي تف عليك
اني الذاكر الله والاعرفه زين مو انتو ياعارات
واني صعدت السيارة .
شجابهم شلون اجوا شنو السبب كعدت ورا والشارع طالع على صياحهم وابوي يصيح اطلكها يا جلب لو اخلي الطلقة
براسك واكتلك اطلكها باجر يانذل يا ابن اللي ماتنعدل.......؟ تغريدات ..
اني لحظةادركت اني بغيبوبة بعدني جوا ايد خضر ويمكن متت وجانت امنيتي اهلي ينقذوني لو يشوفوني ميته .
بس من ابوي يكل لغسان اوكف جيبلها ماي اغسل وجهه اعيونها انعمت من الدم ويكلي بوية يابعد حيلي تسمعيني ..
لزمت جف ايدة بسته اي اسمعك .اني مابيه شي متعودة بس نعست تعبت من الطريق اليوم روحه رجعته وكتلتين وجوعانه اني بس اكل اصير زينه .
ابوي . يخسى الاكل والله لو ما حالج اطبكللج يم مطعم هسة ..
خابر امي اكلج طبخي دجاجه وسويلها مركة حامضة مالحة والدجاج گليها زين ولبن مالح جبت بشوره وياي ..
ضحكت .. كلساع اتخيلها شلون كتلها بالعكال وخنكها ورفهها بيد وحدة اضحك اكثر
اخخخخ ياراحتي النفسية اللي ماتنوصف .
اتذكر خضر شلون طلع امه وشلون ابد ما جاوب ابوي .
خضر يحترم الاكبر منه ويحترم ابوي ..
غسان شلون هجم على خضر يخنك بيه احس ارتاحيت شوية غفيت منا لمن وصلنه للبيت دخلوا السيارة جوا ونزلت اني بس بالعباية حجاب ماكو واني امبين من صرخت امي ومرت غسان وجهاد وعصبيته حالتي يرثى لها امي كامت تدك على صدرها ..
دخلتني مرت غسان الحمام اغسل وجابتلي هدوم واسمع جهاد يحجي بحركه وابوي ساكت طلعت تمددت بالغرفة وغطوني شوية وجابلي الاكل ماكدرت اكل اختنك من خشمي ماكدر ابلع اللكمه .
جابلي غسان ابرة ومرته ضربته اليه ماحس الا نمت نومه كعدت بالخمسة الصبح على صوت الاذان الدنيا باردة ..
صليت ورجعت ارجف نمت يكعدوني امي وابوي .
كعدت امي
بس كسر بيده هل الجلب كسر بيده هل الجلب جميع
احس جسمي هسةبين بيه الضرب والتعب مكسر تكسر ..
سألت ابوي شجابك .
ابوي عفتي الجنطة والموبايل واني مامقتنع بكلامكم والسيارة مالتج يمنه گلبي ما طاني والله ودالي اشارة الحك بنتك كمت اسوق ماشوف دربي وصلت غسان كلي صريخ بيت عمي عرفتكم تتعاركون واني كلبي محمل عليهم ردتها من الله والله ربك مسدس ماشايل يمكن الا اكتله واكتل امه واخلصج ..
ضحكت احس انعس رجعت نمت .من الرضوض ..
الظهر اجه عمي وسلم عليه .
تلاثه الى خمسة ايام يلا تحسنت حالتي ..
خلصت العطلة واني ماكدر اداوم غسان سوالي احالة وسوالي اجازة وتقرير متعرضة لحادث واجازة28يوم ..
خلصت شهر ضبط اجه غسان بليل يمي بالغرفه
سد الباب وكعد وعندة حجايه امبين من ملامحه مو مستقر ؟
شبيك غسان عندك شي؟.
غسان : تدرين منو خابرني وطلعتله
منو
غسان .خضر.
اوي شعندة
غسان: اسكتي بشاير خضر خابرني ورحت وجانت حالته تكسر الخاطر ولج ليش مخبلات الولد موصلات مرحلة طالع من الدين كله ؟
لتصدك بية هو هيج يحجي يـم
العالم بس بالواقع خضر غير شي
غسان: بصوت ناصي خضر سكران وكلش مثكل. وبس يبجي
خضر .مايشرب ..
غسان .منتهي فاقد اكلج وهو گلي اني اشرب حتى اكدر اعيش بدون ما افكر بشاير اصلا ويريدج يبجي عليج بجي ولج حتى استحيت من كلامة عليج الولد يريدج والله وداعت جهالي بجيت عليه وحاولت اخفف من شربة جبتله كهوة وغسلت راسة وحجيت وياه كتله عيب عليك هيج تسوي واني اكول ماكو مثل ابن عمي يگلي بس خل بشاير ترجعلي اصير احسن واحد
وخابرت عمي غزاي واجوا اخذوة كوة وخفت لا ابوي يشوفه ؟
صدك .
غسان . اي والله ولج يكسر الخاطر شلون اجه شلون وصل اليه كوة اخذته بعيد وكعدته بشائر يبجي عليج ولج صوجي ما صورتة الج
يكلي احبها واريدها ومااطلكها حتى لو عمي يكتلني!
خل يولي لاتصدك بيه بارع بالتمثيل ..
غسان :ماعرف شكلج بس خضر تعبان وانتي وامه راح أدمرنه دمار ..
شسويله الحل يمه هو الطلاك يرتاح باله يخلص من وحدة .
غسان . الله يهديكم .. فكري بية خطيه اني هسه جسمي كله يرجف من القهر علية ولد مثل الورد راح يضيع بسبب امة وزوجتة ترا بعد يوميِّن كدام الله تتحاسبين انتي هم على ضياع خضر والله حاولي تلكين حل يرضيكم كلكم ،
غسان اني لو علي شعندي وياه بس لو نطلع وحدنا احنه اسعد ناس
صدكني اني مو السبب اللي يخلي خضر يوصل لهاي المرحله امة السبب غسان احنه مدمرين احنه وسكتت اني ماكدر احجي اكثر بس الله يدري اني شكد تحملت منه وعلموده وشكد تنازلت
غسان :يعني شمسوي
ماكدر احجي مهما كان تبقى اسرار بيني وبينة واشوف شلون تصفى اني بعد ما تحمل حجاية والثانية يتجاوز ويضرب اني مو حيوانه
غسان : ماكو شي ما يصفى بعد انتي وابوي بس ابقى اكلج الولد مدمر نهائيآ
....
بقيت افكر يشرب ؟ مايشرب وليش شرب؟ اكيد مرافق اصدقاء سوء جدد هوا هوااااااي متغير كلش مجان هيج ابد . شرب ونسوان ويامه حذرت عطور تنتبه لااخوها ما تصدكني ..
اني هم هواي أذيته وقللت من شأنه وشخصيته اني اتحمل جزء من اليصير بيه . اففف استغفر الله ليش كلهذا يصير ويانه .
ثاني يوم الظهر اندك الباب
اجت بت غسان كالت هواي ناس دخلوا علينه وبابا دخلهم ؟
خضر جايب مشية حتى يرجعني ابوي ما قبل وبسرعه طلعوا زعلوا على ابوي لان مامخليهم يكملون حجيهم رافض وبشدة وزعلانين وما مرجعهم مخليهم يطلعون.. وحتى جاي ماقدم الهم
ورا ايام هو خضر اجه بنفسة لابوي للمحل متوسل بابوي بس ارجع اله وابوي طاردة .
وهم رجع ورا يومين وهم طاردة .
الظهر اجه غسان .
كال وياي خضر وبوية لاطرده على الاقل يتغدى ويروح لاتفشله الله يخليك .
ابوي كله مااطلع يمكم
غدي وخل يروح لااهله ..
امي ماقبلت تجهز الغدا
كمت اني احضرة .
كسر خاطري خضر .لان اني اعرفه امرة مو بيدة اعرف عندة شخصيتين وحدة بالبيت شكل وبرا شكل ..
غسان :عفية بشورة خليج معدلة وهذا اعتبري خطار ودخيل عدنا وعندة مشكله عليج الله لا تزودين على نار امج وابوج ولاتحجين كلمة بيها مغثة وأذية على خضر
لا خضر ابن عمي ورجلي مراح احجي شي
اجه غسان باسني براسي
جاهز الغدة خلي ياكل
اخذة غسان واني خدرت جاااي ..
شوية واجه غسان المواعين ع حطتهن كال خضر ما قبل ياكل واني استحيت اكل هو مياكل .شسوي يابشائر يريد يحجي وي ابوي وابوي كال ما اجي يمكم ..
بشائر والله ماعرف روح شوف ابوي بلكي يقنع يدخل يمه
راح ورجع كاال نايم ..
لعد روح لخضر كلة بشائر تكول خل يروح ابوي بعده عصبي وشايل عليه ولايتعب نفسه يومية يجي ..
راح ورجع كاال يريد يحجي وياج؟
ماكدر اكسر كلمة ابوي غسان ابوي يلعب لعب بينه اني وياك اذا حجيت وي خضر.
غسان روحي كولي لابوي احجي وي خضر.
لاماروح والله يطيح حظي.
غسان بشائر ترا اني طالع من الخمسة للدوام وتعبان ودخت فضوها لو تجيبن فراشات خلونة انام اني وخضر لان هو الولد هم من الدوام واجه وحلكه مشكوك وكلساع يخابروة ..
ايي شسويلكم انت تصرف رحت اجيب بطانيات الهم ابوي كال بعده هنا .
ايي بوية بعده . تطلع تطردة لو شنو
لا خل يولي ماطلع اله .
زين خليني اني اطلع احجي وياه وافهمة لايجي بعد وكلشي انتهى .
ابوي لا انتي لسانج صاير انكس من لسان ام خضر أدوسين بالبطن عوفي هو يمل ويروح ..
لا بوية ما افتح حلكي بإي شي مو زين
ابوي :لا بوية خليج عزيزة نفس !
شكرا لزيارتكم عالم روايات سكيرهوم
