رواية نقطة تحول الفصل الحادي عشر بقلم جمانه السعيدي
كنت احسب يوم يوم يمته ابدي الدوام
واصير موضفه الله شكد حلووو يكولون عبير توضفت
اشتريت ملابس جديده للدوام
اشياء رسميه تليق بلوضيفه
خصوصا اني راح اشتغل ويه عمو محسن
لازم اكون اخر شياكه واناقه
رحت للصالون قبلها بيوم سويت تنضيف بشره وحفافه
وعدلت حواجبي
بله شعري ايد ما اغير بي لان هو اسود مثل الفحم وسرح
وواصل نهاية ضهري
مرتين حاولت قبل اصبغه بس ما ياخذ لان سواده قوي
ام الصالون تكول اله تقصرينه
حرامات اخربه بالقصر
ثاني يوم كعدت الصبح كلي نشاط
مثل الطفل اذا اتسجلينه بلمدرسه شلون يبقى يحسب الاول يوم ويكعد من الصبح بس يريد يروح للمدرسه
هيج جان وضعي بلضبط
طلع عمو محسن بس شافني مبدله لابسه قاط ستره وبنطرون رصاصي وقميص اصفر
وجنطه ابيض وحذاء اسود ورافعه شعري كبايه
ومنزله كذله قصيره على عيوني وخصل رفيعه من الجوانب
وخاله النضاره على شعري
ولابسه كلاده زغيره فراشه وتراجي حلق
محسن الله الله شنو هلجمال عبالك مدير مو موضفه
عبير طبعا لازم اكشخ لان اني عمي محسن
قابل اني شويه
محسن لا يابه اليوم الدائره توكف تك رجل الهذا الجمال
عبير شكرا عمو خجلتني
طلعنا للدوام واني ما مصدكه نفسي طبعا عمو عندا سايق خاص ياخذه ويجيبه لان هو مدير عام مو شويه
وصلنا الباب الدائره اكو مجموعه من الجنود والضباط
واكفيين بلبوابه مكلفين بحماية الدائره
لان هاي دائره مهمه كلش
لازم تفوت السياره من يمهم بلاول حتى تدخل للدائره
رفعت عيني وشفت شي ما متوقعته ابد ولامتخيله اشوفه
شي صدمني وشل حركتي
السياره تمشي على كيف حتى تعبر من البوابه
واني اركز اكثر واكثر
وافتح عيوني حتى اشوف زين
واحد من الضباط واكف الطول والشخصية والنجمات تلمع على الجتف هذا الضابط منو
هذا الضابط قيس ابن خالي
جمانه السعيدي
اي قيس ولله هو صاير يخبل طول وشخصيه وجمال
والشوارب يوكف عليهن الصكر
سلم على عمو محسن واني لكيت نفسي ابتسمله
واني متوقعه عرفني ابتسمت واتوقعت راح يسلم عليه
بس هو شافني ودنك
ما عرفني ولله ماعرفني
معقوله اني الهلدرجه متغيره قيس ما عرفني
مشت بينا السياره ودخلت جوا
نزلنا ورجعنا فتنا من يمهم واني ما نزلت عيني من عندا
جيت اصيحله قيس معقوله ما عرفت عبوسي
عبوسي مرسال الحب
بعدين اذكرت الراشدي الي طير بي خدي
دخلت امشي ورا عمو محسن
رجليه يمشن بس عقلي بقه يمه رجعلي كل ذكريات الطفوله
اذكرت بيت خالي وحمودي وحسوني وميثم
وزوجت خالي شكد مشتاقه الها
دخلنا وعمو محسن كال هذا مكتبج اكعدي هنا وهاي ست ابتهال راح تعلمج على الشغل
ابتهال عمرها ٤٥ تقريبا بس حلوه وتضحك وتسولف
وبسرعه اندمجت وياي
وكامت تحجي وتتشاقه
بس اني اريد اركز وياها بلكلام ما اكدر عقلي بقه يم قيس
قررت اروح امشي يمهم يجوز هو ما انتبهلي لان كاعده بلسياره
طلعت المرايه من الجنطه وعدلت نفسي
اخذت جنطتي وطلعت
ابتهال وين اجي وياج خاف ماتندلين
عبير لا دقيقه وراجعه
طلعت برا جان يحجي ويه واحد جندي بعدين دزه على جاي واكو ثنيين جنود واكفين بلباب
هو كان الضابط المسول عنهم
باوعت بقه وحده اجيت امشي على كيف وكلي ثقه
وصلت يمه وكلت صباح الخير
قيس صباح الخير مثل الي تفاجئ ست محتاجه شي
عبير بس كال هيج اتاكدت هو ما عرفني ابد
بس عيونه يردن ياكلني
عبير من رخصتك محتاج اقلام واريد ورق اكو هنا استنساخ قريب أو محل اشتري منه
قيس انت جديده هنا يمكن اليوم اول يوم اداومين
عبير اي
قيس انتي بنت استاذ محسن
عبير هزيت راسي
قيس تفضلي جوه واني اخلي واحد من الجنود هسه يجيبلج
عبير كوه لازمه نفسي شلون يعاملني باحترام ولله لو يدري اني عبوسي جان نزع الحزام وضربني
طلعت فلوس
قيس لا ولله مايصير احنا واجب علينا انجيبلج اليوم انتي ضيفتنا وشطلبين اوامر
عبير شكرا ياااا
قيس اني الضابط قيس مسول عن هاي المجموعه
عبير شكرا مره ثانيه
عفته ومشيت واني اريد اطير من الفرح شلون يعاملني
ولله اله اطلع كلبك همزين ما عرفتني
رجعت للمكتب شويه واجا وراي واحد من الجنود جابلي اقلام وورق ست هاي كافي الضابط قيس يكول اذا تحتاج اكثر اجيبلها
عبير شكرا ممنونه منك ومن الضابط قيس
ابتهال هاي ليش اشتريتي اني عندي ورق واقلام وانطيج
عبير عبالي ماعندج
اول يوم كلشي ما افتهمت من الشغل كاعده وبالي يم قيس وبيت خالي
بس بشرفي صاير يخبل طول وجسم رشيق وشكله هيبه
اكيد هسه مزوج وعندا جهال
كمل الدوام وطلعنا اني وعمو بس فاتت السياره من يمه
اني رفعت ايدي بمعني شكرا
هو ابتسم ورفع ايده سلم وطلعنا
عمو محسن انتبه
محسن تعرفين قيس
عبير لو اكلك ما تصدك ابد
محسن كولي ليش ما اصدك
جمانه السعيدي
عبير راح اكولك بس يبقى سر بينا
محسن هههه سرج بير يكولي
عبير هذا السر بس الك راح اكوله وادري انت راح تحافظ علي قيس ابن خالي عدنان الي اني ربيت بيتهم
١٢ سنه وهسه هو شافني ومآ عرفني ابد
معقوله اني هلكد تغيرت
محسن اكيد تغيرت هواي شكلج كله تغير
عبير اني ما اريده يعرف اني عبير بت عمته ابد لمن الكه الوقت المناسب
محسن هذا السر راح يبقى بينا ومراح يطلع ابد
جمانه السعيدي
بس وصلت سولفت العمتي كلشي صار لان ما اكدر اضم عليها ابد
ثاني يوم لبست تنوره سوده وبدي اخضر وفتحت شعري
وخليت مكياج خفيف
وصلنا وهو جان واكف يسولف ويه واحد بس شافنا ابتسم
اني ابتسمت ابتسامه خفيفه
من نزلنا من السياره التفتت لكيته يباوع عليه بس شافني راسا دار وجه لان عمو محسن وياي
ضليت طول النهار افكر شلون اعرف معلومات عنه اريد اعرف كلشي عنه وعن بيت خالي
بس ما اريده يعرف اني عبوسي
خابرت على السايق مال عمو محسن لان هو من زمان يشتغل هنا ويكدر يعرف المعلومات الي اريدها
شويه واجاني هااا عمو كولي شتريدين
عبير باوع عمو اني عندي ثقه بيك هواي
...ممنون منج
عبير اني مشبه على هذا الضابط قيس اريدك اجيبلي معلومات عنه بس بدون ما يعرف اني دزيتك
يعني تشوفلك واحد من الجنود وتكعد تستدرجه بلحديث منا لمن تعرف كلش هااا اهم شي هذا سر بينا
....صار بس هاي بسيطه باجر كل المعلومات الي ترديها عندج
رجعت للمكتب وبنهاية الدوام من طلعنا ضل بس عينه عليه الهوا جان عالي واني فاتحه شعري و طار من الهوا
همزين التنوره ضيكه جان طارت ونفضحنا فضيحه
لزمت شعري وبديت اعدل بي كباله علما السايق راح يطلع السياره طلعت كماشه وقرصت شعري
بعدين صعدت بلسياره من مكان قريب علي وتعمدت اوكع المفاتيح
بس صعدت هو دنك شال المفاتيح ودك الجامه عليه
قيس مفاتيحج وكعن
عبير اخذتهن وكتله شكرا وابتسمت
قيس تدللين
مشت السياره واني اباوع بلجامه ضلت عينه على السياره
بس اني انتبهت ايده مابيها حلقه
جمانه السعيدي
ثاني يوم لبست بنطرون ثلجي وقميص ابيض وستره تور اسود وحذاء اسود وجنطه ابيض ورفعت شعري ذيل حصان
دخلنا وهو كأنما منتضرنا عينه ادور عليه
بس نزلنا السايق كال جبتلج المعلومات الي ترديها وكتبتها بهاي الورقه
دخلت للمكتب وفتحت الورقه
اهله بلمحافضه الفلانيه عندا اخوان ٣ ميثم ومحمد وحسن امه وأبو موجودين مزوج ومنفصل صار سنتين
وماعندا اطفال
عندا شقه ملك بغداد جان مزوج بيها وهسه قافله
بالاجازه ينزل الاهله
اخو ميثم مزوج ويه اهله وعندا ثنيين اطفال
ويشتغل موضف
عمرا ٣٠ سنه وماعندا علاقات ولا يدخن
عبير تمام هسه عرفت كلشي اريده
ولله كلبي طاك على بيت خالي
وعلى الايام الحلووووه
بس اروحلهم اخذ تراك حمودي والبسه واطلع العب بلشارع طوبه
داومت اسبوع واحنا مابينا بس النضرات
الاسبوع الثاني ماكو اجا ضابط بمكانه ثاني بس ما ارتاحيتله هذا الضابط عوينجي كلشي ومبين خفيف يتحرش بلرايحه والجايه
اني ابد ما انطيته مجال
وهو يخاف يتحرش بيه متوقع اني بت محسن ويخاف اشتكي علي
لذالك مبتعد عني
كمت افكر شلون اكدر اصادق قيس واخلي يثق بيه ويحجلي كلشي عنه وعن اهله
شكرا لزيارتكم عالم روايات سكيرهوم
