رواية نارا حيدره الفصل الحادي عشر بقلم نمارق رحيم
: وين الگاك ؟ واحچيلك
هضم روحي وسوالفها
واگلك روحي ماحبت
شخص غيرك يوالفها 💔!
____
حيدرة: شنـووو!!!
حسن :- آي اخطبها ترتاح من ابن خالها!
-لا شجاي تحچي شنوو اخطبها طبعًا لا
-ليش اكو سبب؟
-بگد بنتي ولزهرة
-شكو بيها كبرها على ايدك
- اي هوو بس عاوزني اكبر مخبلات شبيك حسسن
-لاا تقفلها بداعتي والله أخت صديقي شلون ما نساعدها سـالار صاحب وكفات عمري ما انساها تالي اخته من اطيح بمُشكلة و الحل كُله يمك، ما نساعدها ليش ؟
طيبه :- بابا حبيبي والله ناردين خوش بنية ورده مال الله وهواي اتمنى تكون زوجتك انه هم ملل بالبيت واريدها تجي والبنية كلش احبها
-باباتي اسكتي انتي طالعة عينچ شعرفچ بالزواج ومسؤوليتة!!
طيبة :- اسفة بابا بس والله اتمنى تصير مرتك
-مستحييل..
حسن :- انت هم كبرت إلى متى تبقى هيج ما ناوي تستقر وتزوج وتكون عائلة؟ ما نلگى احسن من بنت الحجي جاسم
-تدري بوضعي مو مال اتزوج وتكوين عائلة شبيك حساني نسيت؟ لو اذكرك؟
صفن بحيره.. آي هم صح بس إلى متى ياخوي؟
-عاجبتني هيچ حياتي ما راغب أرتبط
بـإنسانة واورطها وياي!!
-تحبك هي، فـ رح تتحَمل كُل شيء على كولن حويدر خصم الحچي اذا ما تخطبها انه اتقدم الها
-انجب حاط عينك عليها حيووواان
- يابـه خبلتني تخطبها لو لا ؟
تنهدت..ما مفكر بالموضوع ابدا ، تعباان رح انام والعصر گعديني طيبة والله كريم اشوف شلون تصفه
عفتهم ودخلت لغرفتي شمرت قميصي وگفت كبال المرايا صافن وافكر.. تذكرت يوم أمس
من اجت لعيادتي وگالتلي كلمة ما خلت لا حيل ولا عقل بيه!!
"اني احبـك"
أبد ما متخيل بيوم رح يصير وياي هيچ موقف غريب، بنية تعترف بحبها لرجال؟
صدگ گلبت القوانين الخبلة!! اخ يا ناري شلون بيه بجرأتچ
تختلف عن بيئتي،اطباعي وشخصيتي ما رح نتوالم ابداً، وإذا أفكر مجرد تفكير اخطبها وهلشيء مُستحييل طبعًا !! ما رح تصير مراسم الخطوبة الصحيحة وكُل شيء مو طبيعي بدون أب وأم
تنهدت ورجعت نمت علئ الچرباية وعيني على السگف..
انا مو بحاجه الهم بس!! أكيد من حقها
وحق عائلتها يسئلون عن عائلتي وينهم يا تُـرى؟
شنوو أجاوبهم؟ الأب سكير، والأم إلي عمرها ما اسميها أم النه، تركت عائلتها وبتها الصغيرة لأجه حُبها؟
زفرت من اتذكرهم تلعب نفسي من الحياة واكتئب فركت راسي بتفكير مُتشتّت
"نـااارديـن وما ادراااك ما نـاااارديـن! "
مبهور بيها و بتصرفاته و جرئتها اخ يا عيونج العذبتني الي كل يوم لون شكل..
رجعت غصبًا خليتها بعقلي ويا عقل يصفه من التفكير بيها؟ حاولت ابعدها من تفكيري اگعد الصبح والله كريم..
...
نـور"
-ها طيبة شصار ؟
طيبة: كلشي صار مثل ما نريد اليوم اذا مايجي يخطبها مايطلع اسمي طيبة وهو الممنون وين يلگه مثل ناردين
-عزه اليوووم؟ احلفي عزه والله انچ كفوو معبالي بهذه السهولة شلوون يوافق!! خرب
طيبة:- من نهيت الأتصال وياچ الفجر رحت طلقة لـ غرفة أخوي حسن گـعدته بعز نومه خليته يصلي ويخلص وتربعت وسولفتله.عن ناردين وحچيتله كلشي وكلت اله لاززم لازززم تقنع حيدرة وحيدرة مايرفض طلب لـ حسن مهما يكون الطلب يوافق عليه بس هذا مو أي طلب لان هاي تبقى حياتة الشخصية هو إلي راح يتزوجها مو احنه واله الحق يوافق لو يرفض احنه نسوي الي علينه هي خطبة مو لعبة وافق حسن وكال خوش بيها الخير ورحنه لحيدرة گعدنه نحجي بيها وحتى خليناه مايعرف يجاوبنه مانطيته مجال وشكله موافق بس جاي يفكر اخوي واعرفه
نور: هههههه فلك طلعتي موهينه والله عفية فرحتيني واخيرًا ناردين رح ترتاح من لؤي العار ، إذا صارت زوجة حيدرة
طيبة: آيي روحي فرحي ناردين هي الأهم
أمنيتها رح تصير حقيقة بشريها !!
نور: لا ولج وربي اذا اگلها يمكن ينغمي عليها مو بعيدة عليها خليها مفاجئه تنصدم مرتين الاولى بجيه حيدرة النا والثانية من يخطبها بس أنتي متأكدة يوافق ؟
طيبة: والله ما أدري هوو گال الله كريم
بس صدكي هو مفكر بيها أكيد ويمكن مو بعيدة عنهُ يطلع يحبها !! عندي احساس مخليها اباله
بس ساكت ما يريد يحچي ويعترف
ودليل مارفض رفض قاطع لا گال افكر هو اخوي مايگدر يعبر عن مشاعره بس عيونه فاضحته من جبت طاري اسمها صارت تلمع اكيد يوافق يعني بيها مجال ..
نور: اوف يلا الله كريم لعد رايحه اني اخذي راحتچ
طيبة: تمام الله وياج حبيبتي..
نـور.. سديته منها ورحت لغرفتنا شفتها گاعدة ملفلفه نفسها بالبطانية وتبچي ..
-شبيج حبيبتي؟ مو مساع چنتي تتغدين وكلشي طبيعي
نارديـن: ابجي على حظي ولج خااايفة من لـؤي لا صدك يسويها دم خاايفة والله!! ونوب أمـجد نهى علية عود يكحلها عماها..
-ليييش شنو صااار؟
ناردين :- غيرر امي المعدلة الي ماكوو منها رايحه لبيت عموو وسولفت لعمتي ام امجد وسوتها اطلابه حتئ عمتي توكف ويا امنه وتروح لامجد يفك النهوه وهيچ
بس صااار العـكس عمه ما ضاجت ولاشي
لاا بالعكس فررحت وحيييل ..
ورايحه گايله لأمجد يمته تخطبها
رسمي أريد افرح بيك ؟؟
- عززه صدگ انلاصت وانتي منين دريتي ؟
- عمه رقيه توها خابرتني وباركتلي كتلها علئ شنوو مبرووك جان ادكلي لاتستحين ياعمه ادري أمجد رح يخطبج الف مبروك تساهلينه ورايحه امبشره العشيره كلهاا
-ياا صخام ما حسبنا حساب لهل شيء!!
-شنوو يا حساب وي منو؟
-ها ماكو شيء المهم شنو الحل ؟
- ماادري ماادرري سالار بالسوگ من يجي اگوله حتئ بابا طالع والله اني معليه أمووت وما اتزوج غصب!!
ضحكت ..
- لا تخافيين الي ابالچ
رح يصير عن قريب
صفنت ..
-شقصدچ تعاليي شقصدچ؟!
عفتهاا ادردم عليه ورحت للكراج كعدت افكر إذا يجي يخطبها يمكن ابوي ما يقبل! لا يا ربي شلوون سالفة و حيره!!
اجه سالار دخل لازم العلاليك صاحلي ..
- تعالي ولچ أخذيهن انهد حيلي
رحت اخذتهم منه وصافنه بالكاع ..
سالار :- شبيج وجهه الدبس دا طبي جوه مضيعه وجهج بالكاع
دخلت وراح تمدد علئ القنفه ويمسح بجبينه شغلتله المكيف و گعدت ..
سالار :- شبيج؟ احسچ عندج حچي
مستحية مني قابل گولي!!
- ما عرفت شصار اليوم
- لا شنو ؟
- "سولفتله علئ أمي وام أمجد"
گام عدل گعدته وگال :- لا يمعوده گولي غيرها هسه شلوون نسد حلوگ عماتچ وهااي امچ ليش انلگفت وراحت لبيت عمي؟؟
- ما أدري!!
- وين أمي هسة ؟
- طالعة
- وين؟
- ما أدري لبست عبايتها بعد ماخلصنه
غدة وطلعت
- خل يجي أبوي ويصير خيرر
- اي ماشي
للعصر اجه بابا سولفلة سالار
اشوو بابا سكت!! وشكله قابل!!
تالي گـال:- وشبي أمجد خوش ولـد
ينشد بي الظهر يحافظ علئ بنيتي
- شنوو بابا تريد ناردين تزوج أمجد!!
- آي وين اكوو أحسن منه ؟
دخلت ناردين سمعت بالحچي ..
ناردين:- لاا بابا تحچي صدگ ما اتفقنه هيچ أنت گلتلي بس چذب لحتئ لؤي يبعد عني، شنوو تخليني اتزوج امجد!!
- بويه وشبي ابن عمج ماتلكين أحسن منه احچي سالار بوية انه غلطان بشيء ؟
سالار :- هوو صح امجد اخوي مايعبه شي رجال والنعم واتمنا لاختي بس ياابويه ياعيني ناردين ماتريده الشغله موغصب ، وامجد ماسمعته البارحه من كال اعتبرها اختي الصغيره
- يا بويه انه ما گلت الأ يتزوجها والا اجبرها اذا رايد يخطبها ويريدها انه ما عندي مشكلة
وموافق انطيها لان ماكو أحسن منه ..
نور:- طلعت ناردين بدون ماتحچي وراحت تبچي لحگتها للغرفة قافله الباب هااي تخبلت!!
- أفتحيي البااب ناردين
ماكو ما ردت دخيلك يالله أخذت أيبادي ورحت گعدت لوحدي دگيت علئ طيبه ما ترد، لااا ما ناقص بس هاي!! فدوة ردي
شسوووي!! باوعت الساعه بـ 6
باقي نص ساعه ويٲذن
شلوون شراح يصير هسه ..الف مره دگيت عليها ماكوو تالي طلع مغلق يمكن قافلته لو علئ شحن
عفته ورحت اجت امي
سألها سالار:- وين چنتي يمه ؟
جاوبته ..
- ابيت أخوي
سالار :- هاا قصدچ رحتي لـ لؤي ؟
- اي رحت شعليك ؟
دخل ابوي وهو يگــول ..
- انه مو گلتلچ ما ترحين بعد لاخوانچ؟ وبين قوسين ما ترحين لهذاك العـاار لؤي ؟؟؟؟
-اشلوون يعني شلووون ، ابن اخوي اقطع علاقتي بي علمود اهذيج الجلبه
عاط بيها :- امشششي وووولي لغررررفتج اعلمچ شلوون تكسرين كلمتي واطلعين بعــد..
شمرت الطبلة گلبتها وراحت .. لحگها ابوي للغرفة و صارت عركة كل معتاد ..
ما اتدخلنه احنه لو مو امي چان گلت
تستاهل حيل بيها ..
انغث من اتصيح بوجه أبوي
وما اتريد يضربها ما تقبل
و دائما تخلق مشاكل مـن لا شيء
ورا الصلاة المغرب ..
صعدت للغرفة يا الله فاتحة الباب
يمكن فكن الطباگـات الظاهر ..
نارديـن:- أطلعي بررره
- اني شعلييه ؟
نارديـن:- ما اريد اشوف أحد!!
- أحد لو أثنين ؟
شمرت عليه المخدة رجعت عليها
الاثاث الغرفة كلة ..
گعدت عود الطف الجو
ونبراس التنبل نايمة ..
- گوومي نطبخ انجرب
- أمشي اطلعي برره داتضحكين علية!!
- زين أمشي انمكيج
- اي مو گالولچ عني عندي مكياج
- نركص ؟
- رقاصه گدامچ ؟ ما أرريد ولي شبيج!!
رحت بحثت على أغاني ساجدة عبيد
وسديت الباب ..
شغلتها حيل عليتها ..
گومتها واني أضحك گامت وهيه مغطيه بالبطانيه ما طالع حتئ وجها بس ايديها
گعدت نبراس علئ صوت الأغنية راحت
غسلت وكامن يركصن سوه بنص الغرفة
وحده لازمه بيد لخ ومتغطيات بالبطانية
فتح الباب سـالار هز ركبه و چتف وضحك
تالي وخر البطانية و گـال..
سالار :- لچن روحن سون عشه جوعاان الله وكيلجن ريوك مامتغدي
ضحكنه ورحنة للمطبخ كلنا ..
دخلنه راح گعد علئ كاونتر ياكل خيار
ونبراس تگلي..
-اني بالي يم طيبة وخطتنه
شلوون يا ربي الحل شنوو ؟
تعشينه وراحت نبراس ترجع لنومتها ، وناردين ماخذتلها ركن بالغرفه مسويته للصفنات والبجي
تخبلنه من وراها ..
كاعده بالمطبخ احچي وياا مصطفئ
و الساعة بـ8 ..
و چان يندگ الجرس ..
راح يفتحه واني حسيت رح يجي احد للبيت عدلت الهول بسرعه سرعه البرق ، شلت المخاد والبطانيه شمرتهم بغرفه سالار
وعدلت المطبخ ، ورجعت فتحت الشباك يصير بالمطبخ وشوف الطرمه وباب الشارع
سالار و مصطفئ واكفيين يسلمون ..واني مادة راسي ..أريد اشووف منووو اجه ؟
جان يدخل الدكتور واخو وطيبه
گلبيي راد يوگف ،، نسيت السالفة ما عبالي صدگ رح يجون اليوم عزه سوتها صدگ طيبة وقنعته،، صُـــدگ أجووو!
الله يساعد نارديـن ويعينها من راح تدري
حبَيب الگلب عدنه ، يمكن يصيبها الجلطة!!
فررحت رحت سديت الشباك وصعدت للغرفة تالي نزلت نسيت بابا ما يدري رحت للغرفة چان نايم متمدد ..گعدته
-بابا اجوو خطاار
-يا هلا منوو الاجه ؟
-ما ادري بابا ما شفتهم
لبس دشداشته وراح للديوان سمعته سلم عليهم رجعت اركض طلقة صعدت فوگ للغرفة فتحت الباب واني الهث علئ صوت اليده الباب فزت نبراس ..
-الله يطيح حضچ عبالي اقتحمو بيتنه
دخلو علينه!!
سكتت واني بـدي أضـحك ..
رحت لـ ناردين مغطية روحها عبالك مچفنه بالچفن بنومتها وتشهگ
-نـارردين
-شرايـده..
-رح اكلچ شي يفرحچ
-شنوو هووو ؟
-بوسي اول ، ومديتلها ايدي
رفعت راسها ورافعه حاجبها :- امشي ولي..
ابتسمت وحاصره الضحكه وگلت الها.. خووش رايحه لعد ، اصب چاي للخطارنه الدكتور حيدرة وانتي ابقي نايمة ردت اطلع التفتت، الگاها واگفه علئ حيلها علئ الچربايه بصدمة وصاحت ..
- چذذذذذذذذذذذب !!!
- والله
- بداعتي؟!!
-وداعتچ اجه بالديوانية هسه
- لااا حلفي لااا تشاقيين مووو ؟
عززه بعينچ گوولي والقراان!!
- والقران يا شبيچ
- عززه نووور داتحچين صدگ لو تشاقين
والله والله اجه !!؟
- آي اجه توا هو وطيبة واخو
- اگول البيت ليش منور والآضويه زايدة
نچبي لحظة رايحه انزل اشوف واذا طلعتي مسويه مقلب بيه واني مناا مقهوره الا اسوي گتلچ عمل شعبي ..
لبست الكبوس مال تراكها وطلعت من الغرفة تركض رادت توگع من الدرج
...
نارديـن
وكفت بـ باب المطبخ اسمع ، لمحت ضحكت حيدرة خليت ايدي علئ حلكي فرررحت عززة فدووه ونذر أوح لضحكتك ..
بدي أدخل يمهم و اگعد ما تحملت عدنه
وما اشوفه خفت لا يروح
گعدت علئ الكرسي واني مبتسمة..واطگ بأصابيعي من التوتر .. واتسائل نفسي ..
- ليش اجه ؟ شيسوي ؟ شنو يريـد ؟
اجن نور ونبرس گعدن يمي ..
ننتظر شنوو شدايحچون ؟
شويه ودخلت طيبة للمطبخ
رحنه سلمنه عليها وراحن للهول
رحت حـضرت بطاله المي ..
ردت ادخل ..
اجت نـور ..
- ووين ولج تردين تفشلينه!
-ليش شكوو بيها شأفشل !
اخلي المي واسلم عليهم واجي
- انچبي و گـعدي
دخل "سـالار" ما گـال شيء بس يخزر بيه اخذ المي وكال سوو گهـوة علئ السريع
هزيت راسي ورحت سويت
علمتني نبراس صايرة شيف البيت ..
سويتها طلعت طيبه فرحت .. هم زين
دگيت الباب اجه سالار اخذها
واشرلي ادخل جوا ..
رحت رجعت للهول ..
نور وطيبه يتغامزن .. ومن دخلت سمعتهن
گـالن "خططـنه نجـحت وَ وافـق"
گعدت و اني اكول ..
- آي خطط ؟
نور :- هيچ ماكو شيء
- اهـااا
ضحكن وهنه يباوعلي شكيت مسويات شيء
- شبيچن ؟
- ماكوو ،، سلامتچ
سولفت وياها وسئلتها نبراس ..
- صااير شيء وهيج ؟
يعني شنوو مناسبه الزيارة المفاجئة
طيبه :- لااا ماصاير شي ،بس حسن يريد يجي لصديقه سالار مشتاقله كال ؛ ف كلتله اروح وياك وحيدرة هم اجه ويانه ..
- اها ، هلاا بيكم نورتونه والله
صرت اروح واجي من الهول
للمطبخ وتوتر والتفكير يقره الف
ساعتين وترخصو طلعوو وردت اجيب
روحي واطكها الدمعه وكفت بطرف عيني
تالي بچيت ..وكعدت بالغرفة
دخلت نور :
- شبيج تبجين ياا !!
- رررح أمووووت يزورونه ويجي ويبقئ ساعتين أهوايه وما اشوفه!!
لج حتئ ما لمحته ،ساعتين
ماكدرت اشوووفه صدگ بچيت
نور :- ههههههه يلااا مااريد اصدمج
اسكت احسسن..
ضحكت وراحت ..
خمس دقايق وسمعت صوت
أبويه من جوا يصيح إلي ..
رحت وعيوني حمرر من كثر البچي
البچيته بحسرة لشوفته ..
دخلت للغرفة بابا ..
سالار واگف يم الكنتور ..و يهز ايده
وامي طلعت من شافتني وگالبه خلقتها
ونور ونبراس واگفات
يم الباب الغرفه ويغمزلي ..
گال بابا ..
- سدي الباب وتعالي
- حاظر
سديت الباب ..
وگعدت على السرير ..
سالار يباوعلي بنظرة خفت منها!!
-هاا بابا ؟!
سكت محد حچه شوي وگال بابا ..
- تدرين چان عدنه الدكتور حيدرة
صديق اخوچ ..
-هاا اي أكيد ادري ..
بس ليش السؤال ؟
طول من سكت ..
تالي فاجئني سالار من كال ..
سالار :- حيدرة طلب ايدج علئ سنه الله ورسوله ،خطبج من ابوي
هوو هيج كال وصارت عندي ردة فعل قويه ... صحت باعلئ صوتي ،بحيث بابا انكمز من مكانه .. -جذذذذذذذذذذذذذب !!!! ...
خزرني سالار وابويه عاط بيه وباوعلي بنظرات شك..
ابوي: وسم بوووية شبيچ تخبلتي! اشو احسچ منتظرة هلخطوبة ؟
سكتت عبالي يتشاقون ما صدگت ضليت ساكتة علئ طول مايحچون .. وهيچ وهيچ
لحدما گالولي ها موافقة لااا ؟
سالار :- وين صافنة ؟
رديت بفهاوه:- هاا هااا ؟
- روحي بابا الصبح گعدي احچي وياچ لان خاف مستحية واني تعبان روحي نامي واخذي وقتچ
سـالار :- روووحي شبيچ ؟
گمت واني صافنة بحيث اليده الباب ماگدرت افتحة ايده وكل جسمي يرجف ..
فتحلي الباب وهز ايده ..
صعدت فوگ و تعثرت بالدرج وگفت بـ باب الغرفة ردت ادك الباب من كثر ماعقلي مو بحال يفكر بشيء "بس كلمة خطبچ دادور براسي"
فتحهن الباب وصاحن:- و أخيررًا !!
جرني من ايدي وگعدني واني صافنة
بوجهن بغير عالم .. مانطقت حرف
- احچي ولچ واخيررا صاار الي ابالچ تحقق حلمچ خطبچ!!
- ولچ وين صافنه تخبلت البنيه
- ناااردين ،، ولچ نااااردين!!
رجعت لفراشي تغطيت وعيني علئ سگف
وهنه يباوعلي مصدومات
نـور :- احچي علئ اقل كلمة انخرستي ؟
سكتت ثلث ساعات ساكتة
وكلمة خطبچ اترن باذني ..
دگت الساعه بـ12 ..وهنه واكفات علئ راسي رادن يطفن الكلوب بعد ماشافن ماكو آمل احچي ..
گمت و گعدت بالگاع بنص الغرفة
وتربعت .. واني اكول
- حيـدراا خطب نارديـن ؟
گامن من فراشهن وتربعن مثلي ..
نور: آي خطبچ ما مصدگة؟ عزه
- ناردين خطبها حيدراا ..؟
نبراس: آيييي
- يعني حيدرا خطبني اني ؟
نور: وربچ اييي اييييي
- صدگ ؟
نور :- والقران والله وداعة أبوي
وداعه حيدرة
-بنات لحد يحچي وياي والله مصدومة ماداطخ بعقلي ، ماعرف احچي شيء، بعدني بدوامة حاله نفسية لا تحچون شيء!!
سكتن واندگ الباب دخل سالار بطرك الفانيله التعلاكه وشعره منكوش چان نايم
وكال :- شكوو ثلاثي النون متجمعات ؟
كمنه گـال " تعاي"
وأشر عليه ..
گعدت ولمني لحضنه ..
- نـور ونبـراس يدرن موو ؟
بعدني ما رديت هنه فهمن شنو يقصد
جاوبنه" آي ندري ندري"
اتحمحم تالي كرص اذني حيل
- يااا شبيك أذنيي
سالار :- تره عرفت بسوالفج !
كزبر جسمي .. ضليت صافنه بوجهه
- يا سوالف عزه بعينك
سالار :- لاتمثلين بعد حسن گال إلي كلشي
- يا حسن ؟
- جدچ، نارديـن حسن سولف إلية و قبل ما يحچي حلفني بداعة ابوي ما امد آيدي عليچ
گال إلي إنُ أمس طلعتي رايحة
لعيادة الدكتور حيدرة ..
من خوفي گلت اله:- چذب ما رحت يمته رحت هذا حسن أكبر چذاب!!
- لاتخليني أفقد اعصابي گلت احچي وياچ وافتهم!!
نـور:- خوية عوفها داخلة بحالة صدمة
- ليش بشنو ؟
- مصدومة إنُ خطبها
ضربني علئ خدي .. :- ام البلاوي شسوووي بيج كوولي
- معليك بيها خوية تعرفها مخبلة
من صغرها إلية تريده تسوي!!
سـالار: قبل ما يگول حسن إنُ حيدرة يريد يخطبها وسالفة اتجر سالفة گال إلية من طلعت من مدرستها ... راحت لـ"حـيدرة" واحنه فكرناچ رايحة مدري وين! هو واحد مو غريب زين حـيدرة آعرفه بس ليش رحتي اصلاً ؟
نور :- سالار راح نحچي الك كلشي
شنو سوت نادرين حتئ يكون الك علم
سالار :- احچو!! أسمع
رديت:- لا نورر أسكتي شبيچ!!
چان حاضني وسد حلگي
وگال الهن احچو و الكم الصافي
حچت كلشي ما خلت موقف يعتب عليها
" بس من أعترفت بحبي لهُ ما ذكرته "
تالي گالت متفقات هيه وطيبة
رفعت ايد سالار بصدمة ..
- ياااا احلفن والقران كُل شيء صار انتن مخططات عليه!!
- أي شعبالچ لعد
_ واني ما عبالي !!
..الچن حساب بعدين
كل الحديث وسالار ساكت
وصافن تالي كال:
شكرا لزيارتكم عالم روايات سكيرهوم
