رواية نارا حيدره الفصل الثاني عشر بقلم نمارق رحيم
انتي صدگ تحچين ترحين للعيادة مالتة بحچة نظرچ! لچ شنو من بنية انتي شنو هاي السوالف الي سويتيها!! كُلش طحتي من عيني نادريـن ما توقعت كل هذا منچ و أني و أبـوي منطيچ الثقـة الكاملة بس مو هيييچ!!
- آسفة سالار
- أسفيش شبيچ انتي خبلة خليتيني صافن ماتوقعت تسوين هيچ وحق ربچ!!
كُل تصرفاتچ غلط بغلط ما راح اگول لـ أبـوي
ولا أمي ، خلي موضوع بيناتنه نارديـن ما اريد اصيح عليچ لانچ جبيرة وثانياً أختي الصغيرة! ولا راح اگتلچ تعرفين كُلش زين بعمري ما ماد آيدي علئ وحدة منچن انتن خواتي أريد افهمچ واصحح تفكيرچ و آنصحج!!
كلشي غلط وعيب ما يصير الي سويتي
ما فكرتي إنُ أبـوي شيصير بيه من يدري ؟
ولچ ما گلتي شنو موقف أخوي
من حيدرة يروح ويگلة ؟
ليش هيچ نارديـن؟ احنه منطينچ ثقة كاملة والحريـة ويا مكان عاجبچ تردين ترحيله
انخليچ ترحين حتى لو وحدچ لان ما ينخاف
عليچ نعرفچ شنو ونعرفچ تعرفين تصرفين
وتالي هيچ يطلع منج !!
الحُـب حلو ومو عيب ولاحرام
بس تصرفاتچ هي الغلط والعيب!!
تصرفاتچ مال وحده عمرها 14 سنة مو مال وحده عمرها 18 سنة وهاي سنة رح تدخل
كلية يعني بعدچ بالمدرسة وهيچ لعد من
ترحين الكلية شنو تسوين وهناك تشوفين
أشكال والالوان شراح تسوين صرت آخاف
منچ بوية لا تسوين سالفة أكبر منها
وتفضيحنه!!
"كل كلمة يگولها إلية يخليني اندم على كل تصرف بدر مني بطيش بس مو بيدي أمي إلي ما أگدر أسميها أم ما چانت أتعلمني!! ولا تگلي هذا الشيء خطأ ما يصير تسوينه!! لا أم تعلمني ولا أخت چبيرة تنصحني!! كُل تصرفاتي إلي سويتها لا أرادي صح عمري ١٧ بس محد علمني أمي عايفتني شنو أترجه منها إذا هي تشوف لؤي يتحرش بيه وهي قابلة وساكتة شنو من أم؟
نصحني سالار هواي وحچه هواي ساعتين واحنه گاعدين مثل العاقلات نسمع لـ نصائحة وحچه على موضوع الخطوبة
- ما ادري شگلج، شكلچ موافقة عليه بدون ما ناخذ موافقتچ بس هم حيـدرة خوش رجال والنعم و صاحب نخوه أخوية و حيل آحبه
بعد اخو الغالي صديقي حسـن بس أنتي فكري والصبح أبوي راح يگعد وتنطين الهُ الموافقة وگولي افكر حتى لو اسبوع ماشي ؟
وهسه تصبحين علئ خير الصباح رباح
الله كريـم .
طبطب على ظهري وراح ..
وبسرعة راحن نامن لان فعلاً حيل نعسنه، بس انه ضليت گاعدة افكر أريد استوعب انو اني يلي ردته راح يصير ..
خطبني !!!
قبل يومين گلتله "أحـبك" وطردني وهسه گاعدة افكر علئ موضوع الأرتباط بي ؟
ضربت راسي كافي خبال بس عزة! ليش هو
اجه ليش مو امه إلي تجي تخطبني ؟ حسب الاصول و العادات، شلون هيچ وافق وقبل معقولة يحبني ؟
يعني خطبني هاهيه!!
للحضه من گلت هيج صرخت وآني أضحك واگول " ربـييي آييي ربـييي"
ماداصدگ! و سـالار درا وماضربني لو شيء
صح عصب وضاج بس مو ردة الفعل
إلي چنت اتوقعها!!
ولا صارت مشكلة ..
الحمدلله ..
ومنتظرين موافقتي ..عزه!
رحت طلعت سجادتي وبقيت خاله راسي
علئ التربه ودموعي علئ السجادة آحمد ربي
واشكرهُ إلي اريدة رح يصير ويتحقق مو حلم!
فارشه سجادتي وگاعدة قريت قران
وادعيه .. لـ 7 الصبح
وماردت انام ..من الفرحه الي ابداخلي
ماخلتني انام .. أو افكر انام
وفعلا مانمت صارت بـ9
گعد بابا صبحت عليه بكُل نشاط
ورحت گليت بيض وحميت الخبز
وحضرت الچاي ..
وآبتسامتي شاكه حلگي مترين گعدنه نتريگ اليوم خميس أول يوم عطله النصف السنة
والكل نايم ..
بس بابا گعد ورحت گعدت سالار لأن متعود يدرس بعد الريوگ عنده أمتحانات
فتح الموضوع بابا بعد ماخلصنه
الريوگ ،، حچه ويا سالار
سأله من وين واصلهُ من يا عشيرة ؟
و شگد عمره ؟
وليش مااجو اهله أمس ..وليش
هو الخطب مو ابو ولا امه
كال اله سـالار: اهله صايرة مشكلة و خلاف بينهم من سنتين واكثر ،لذلك انتقلو البغداد وفاتح عيادته لوحدة وعايش هو واخوانه
بيته ومستقرين بـ بغداد ..
گال اله بابا:"وشنو هيه المشكلة ؟ شنو شلون يعوفون اهلهم ابوهم وامهم ويجون لغير محافظه ؟
حيل عاند بابا بخصوص هذه السالفة
كُل مايحچي سالار ويجاوبهُ ..
يطلع ميه سؤال ثاني ..
تالي كال :- الولد خوش ولد والنعم عنده بيت وعيادة وسيارة بأسمه اخلاقه حلوة صاحب وكفات ..
بس چبير حيل چبير بمقارنة
عمر ناردين أكبر منها بهواي!!
وثاني شي عائلته مامقتنع
أريد اشوف ابو نگعد ونحچي
مو گبل اوافق ، هيه هاي خطبه مو لعبة
وناردين الف واحد يتمناها مو من أول واحد خطبها انطياها وبعدها صغيرة ما كبرت ..
گعد سالار يقنع ويحچي ويمدح بي
تالي دخلت أمي وخربت كل المخططات
:- بنتي ماازوجها لواحد اچبير
سـالار: يوووم العمر مو قياس للزواج قابل عمرها 14 ،15 ؟؟ غير رح تدخل جامعة يعني بالغة ناضجة! شكو بيها يعني ؟
-معليك انت ، اني كلت ماازوجها اله ماتعرفون لا اصله ولا فصله حتئ مااجت انه وخطبتها وين كاعدين احنه ؟ حتى العريس هو اليخطب من وحده ؛ وبكيفه ؛ واهله مايدرون ..
حچايه منا وحچايه منا انلاصت ..
وآني متأمله بابا يوافق!
تالي صاح :- كاافي اسكتوو ، خلااص رح اخابر الولد واكله ماموافقين وهيه قسمه ونصيب وناردين مو من نصيبه ..
راح وآني دموعي صبن شلال چان عندي آمل صغير يوافق من درا بأهله ماعايش وياهم بس هسه كل آمالي اطشرت بالهوئ ..
شافني سالار ابچي ..
سوالي بيده إنُ "اصبري"
ولحگ بابا للصالة..
راح يمنعه ما يخابر .. وينطي مجال
اباوع لامي تباوعلي بحقارة وشماته وتبتسم ..
مسحت دموعي بچف ايدي
وگمت تقربت يمها ..عيوني حمر
صحت ..
- ليششش تكرهيني ؟
جاوبي ؟
ما جاوبتني وراحت للكاونتر لازمة المواعين ..رحت إلها اخذتهم منها
وشمرتهم بحرگه گلب ..
عاطت بيه ، ورادت تصربني دفعتها
بصرخة و بچي ..
- انتييي ليشش تكرهيني ما تحبيني ما تتمنين الي الخير ؟ بعمري ماشفتت امهاااات مثلچ دائما إذا لمحتيني فرحانة لازم تخليني اضوج وابچي !
الشيء الي إريدة متخليني احصلهُ
والي ماريدة تچلبينه بيه!
شفتي اكرهه لؤي ورغم تصرفاتة واعمالهُ تردي تزوجي إلي غصبًا ومن تقدم إلي حيدرة رفضتي وطلعتي الف عيب بي ما موجود اصلاً!
كُل هذا لأن شفتيني فرحانة مو؟ گولي؟ سمعتيني كلت أحبة و أريدة
تردين أبتعد منه؟
"بعمـري ما شفت أمهات مثلچ بعمـرري! ".
شهگت: " أمهات صديقاتي يخافن علئ بناتهن ويدورن سعادتهن وانتي أمي إلي استحي اگول عليچ انچ أمي أكرهچ والله أكرهچ"
حچيت هذه الكلمات وطلعت من المطبخ
فاقده توازني وايدي علئ راسي ..
دخلت للحمام ..وكعدت لوحدي حتئ
أخاف ابچي لا يطلع إلي قريني ..
حيييل قهرتني والله اشرد لو امرض نفسي علمود يخطبوني الهُ مستعدة أروح
و اگول لهُ كل شيء ما اريد، وقابلة ..
طلعت من الحمام گعدت علئ الدرج شافني سالار اجه يمي گعد علئ نفس البايه وحضني
باس راسي ..
- لاتخافين هو الچ اتصيرين الهُ
لا تبچين عيوني الأثنين
- ليش هيچ أمي تكرهني ؟
- لا اسكتي ما تكرهچ شهلحچي ،بس هي هذه الأيام طابگات عدها مدري شبيها المُهم معليچ الچ الصافي
- زين لعد بس بابا ليش هيج يعني
واذا چبير شنو يعني ؟ انگلبت الدنيا
ضربني بخفه علئ خدي ..
- بعد اخوچ نااقص بس تتغزلين بي يمي
أدري تحبي والله هوو الچ لا تخافين
ضحكت :- احببك تدري ؟
- ازين لحيتي الي فرحان بيها
إذا ماصرتي الهُ
بسته من خده ..
- معندي غيرك احچي وياا ويفتهمني
بس أنت عُمري
ضحك وراح .. رجعت لغرفة
گلت اكوو آمل يقنع سالار بابا!
ما انطو الموافقة ولا الرفض
مر اسبوع كامل ..
وسالار كل دقيقه يفتح موضوع
الخطوبة و يقنع بابا ..
ومخابر اخوو حيدرة وگال اله
انطينه وقت البنية داتفكر
خوفي من حيدرة يصدگ بحچي سالار
وعباله صدگ دا افكر ما يدري اني انطيت الموافقة أول ما سمعت خطبني ..
الأسبوع الثاني خلص وخلصت العطلة
وبدت المدرسة .. داومت يومين
واليوم الثالث چنت نايمة توني راجعة
من الدوام دخل سالار و گعدني
وهو يضحك ..
- عزة شٰصايَݛ !!
سالار :- حضرري روحج باچر يجي الشيخ يعقد الكم ؛ابوي وافق
فزيت مخروعة من الحلم
وگال إلية هيچ تخبلت ..
-صدگ وافق ؟ باچر الخطوبة ؟ أني وهو؟
ضحكن خواتي ..
و هنهِ يگولن: " آييي آييي
صرت اكمز من الفرحة دخل سالار
باركلي وگال: " إنُ من چان يقنع بابا وما يقتنع بس البارحة رايح وگال اله إنُ اني احبة واريده وحچه ويا بطريقتة وقنعهُ بأسلوبة"
وكال اله -داام تحبه وراضيه بي ماعندي مشكله ومااهتم بعد لا لعمره وللا اهله هوو الاهم وهذا كافي ؛
ضليت طايرة من الفررحة وكُل ساعة أبوس وحدة وسالار الصبح مخابر حـيدرة وگال الهُ علئ الموافقة و جاوبه إنُ باچر راح يجي ويجيب الشيخ ..
طبعًا هلحچي أمي ما تدري بيه
اني گلت لسالار لاتكولها خفت
لاتكول لـَ لـؤي!
واتفق ويا حيـدرة بس عقد شيخ ..
وعگب باجر الحفلة ..
ما خليت بنفسي شيء رحت سويت كلشي وتعلمت وصفات حلويات كورية من اليوتيوب
و كُلش طيبات
وصيت سالار علئ معطرات بخورات
وفرش جديده للصالة .. جابهن العصر
وباچر يُمكن ما أروح للمدرسة إذا يجون الظهر
رتبت الكعدة والديوانية .. دزيت سـالار علئ كيك جاهز ..لأن ما اعرف اسوي ما يضبط وياي يحترگ وما اريد اگول لأمي خاف تشك بشيء
جاب الكيك التقديم خليته بالثلاجة ..
شگد ما أوصف فرحتي قليل وكُل دقيقة
اصفن وماا صدگ باچر انخطب الهُ!
سويتلي أجواء وحمام بخاري ..
عندي فستان قصير بلون الازرگ غامق
گلت البسه حلوو علية ..
تنهدت و إني اتذكر ما عندي ما عندي ولا قطعة مكياج، أريد شي قليل اخلي بوجهي ماريدة فارغ اريد يشوفني غير وحدة ..
رحت لغرفة سـالار الساعة بـ٩ چان يكنك
رحت اله توسلت بي يطلع يشتريلي ..
تالي وافق گال:
- شنوو إلي تردينه ؟
- مكياج
- وين اعرف اني بهذه السوالف
شفتيني بنيه!
- فدووة لعد منو الي يجيب إلي ؟
- ما اعرف والله شسوي إلچ ؟
- روح لكوزمتك الي بفرعنة
قلم حمرة وكحلة وبس!
- خوش لعد سهلة
راح صدك وجابلي .. الالوان الحمر والاقلام الكحل يبوو فرررحت حييل ،
ضليت أبوس بي ..
رحت لغرفتنة .. اخلي اني و البنات
سديت الباب لا تدخل امي وتنلاص ..
حضررت كُل شيء ونمت برياحة وفرحَ
عبالك باچر العرس مو عقد قرآن
الصبح گعدت حايرة
اروح للمدرسة أو لا ؟
تالي گال إلي "سـالار" روحي لايفصلونج
همه يجون بـ5 العصر تلحگين ..
أقتنعت ورحت البيت نضيف ومعطر
والحلويات جاهزة ..
"نـور" و "نبـراس" ما راحن لأن ما عدهن شيء عكسي عندي أمتحان رغم توها داومنه!
وصيتهن يحضرن الباقي
و رحت للمدرسة ..
اريد الدرس يخلص بلگوه
حتئ بالفرصة ما طلعت ..
بقيت أفكر من يعقد علينه ..
شنوو أحچي ؟
من نگعد سوا لوحدنه ..
وضليت افكر شنو رح يلبس
رسمي لو عادي ؟
أكيد لون لبسهُ أسـود
خلص الدرس السادس وصارت حله ..
الساعة بـ1 ..الظهر
منتظرة يمتئ أوصل للبيت ..
گلبي يدگ سرريع و متحمسة ..
دخلنه بدايه شارعنه ..ولمحت النسوان والزلم ملتمين بباب بيتنه ..!!!
راد يوكف گلبي
سترررك ياررررب!!
فدواتك لا تفجعني .
