رواية بنات الملا الفصل الثاني عشر بقلم رغد الموالي
دره... جبنه العشه وكعدنه بالطرمه ناكل جانت الاجواء حلوه وابويه حلاها للكعده بسوالفه الحلوه
عبد المجيب... الله على هذا الكباب الطيب ياام جواهر صدك جان عاجبني كباب طاوه وياه طماطه لاجعه وهالوجوه الحلوه
بسعاد... الف عافيه ان شاء الله
عبد المجيب... ووين رجعتيني لاايامنه قبل تبسم بخنكه جان يتذكر
كمل كلامه مكابر على حزنه
تتذكرين يابسعاد من جاعت جميله بالليل واحنه جنه نايمين على السطح
بسعاد... هههههه يووو شذكرك بيها
عبد المجيب... والله متنسي هالسالفه
شيماء... اي وشنو هي احجولي الله عليكم
عبد المجيب ... هاي احنه بالصيف جنه نام على السطح كلنه
تطفي الوطنيه فنروح شلون هسه من ننام بالصيف
شيماء.. اي
عبد المجيب... اي فنصعد هاي ب 9 تسعه وشويه هاي احنه فوك مرات اخوتي يطلعون يتعللون ويرجعون
المهم هاي فد يوم مااجت الكهرباء ابد
الناس صعدت من وكت احنه تعشينه وصعدنه كلنه الجهال نامو سوينه لمه على السطح شلون اللمه هسه
شيماء... منو ومنو يعني
عبد المجيب... اني وبسعاد ونعيمه وعبد الودود وجميله ورجلها وعبد الرحمن وعبدالرحيم ابويه ينام من وكت والجهال هم لكن احنه نبقه كاعدين لل 12 هيج شي يلا نروح ننام
ف واحنه دانسولف عبد اللطيف كعد يسولفلنه على ايامه بالجيش وجانت رعب وتخوف هواي
شيماء... شلون يعني
عبد المجيب... هاي مره من المرات جان رايح للجيش جانت مطر داتزخ الدنيه وعاصفه هوى عالي فهو لازم يمشي يكطعها للدربونات كلها مشي يلا يوصل للكراج ومناك يروح للجيش
المهم دايمشي الدنيا ضلمه ومابيه لا آن ولا ودان غير بس صوت الهوى والمطر دنيا فجر وشتاء بارده ثلج ناس نايمه
دايمشي جان يجيه جيس جبير كلش طاير بالهوى وهي ضلمه الجيس الجبير صار بوجهها عبد اللطيف تفزز كلش وانرعب بالبدايه مجان متوقع جيس تخربط الا خطيه حيل خاف بوقتها مهم كمل طريقه وراح للجيش وبيومها...
عبد اللطيف صخن بالجيش واثر هالصخونه كام يشوف شغلات احنه مانشوفها
ميكدر ينام ابد واذا تعب كلش كلش ونام ينام بالزايد نص ساعه او اقل نهائيا ميكدر ينام الجيش ميرحم وميعرف هذا مريض وهذاك تعبان ومن واحد يسخت الويا يحرك عليه ونوب يتعاقب
خطيه وجر حسره وفر راسه بتحسف
الله يرحمك عبود والله اشتاقيت لسوالفه
المهم اكمللكم
بوقتها ضغط على روحه مصخن مو مصخن هاي يشيلها بحيله
لحد ما صار نزوله ورجع للبيت واجه وكع على ابويه ..
عبد اللطيف...يابه حموت الحكلي
حجي شعبان.. شبيك عبوووود وشبيها عيونك هيج حمر شصاير
عبد اللطيف... مدانام يابه مداناااااام راسي حينفجررررر حمووووووووت الله يخليك اي شي نطيني بس انام ولو ساعتين ولو ارتاح
حجي شعبان... اعوذ بالله من الشيطان الرجيم ارتاح ابني ارتاح هسه اجيك
وخطيه راح ابويه للعطاره وجابله عشبه ونطاه حتى يهدأ وينام شربها عبد اللطيف
ابويه عبالك گلبه حسه راح جاب القران وكعد يقره على راس عبد اللطيف بعد ماتمدد وره نص ساعة تقريبا هدأ ونام وصار
يشوخر من التعب وقلة النوم
بقه يقره ابويه جان لازم ايد عبد اللطيف وعبود كل شويه يتفزز رغم نايم بس أثر الهبطه الي اكلها متبلغه بي وفعلا هذا الي كاله ابويه بعد ماصار يقرأ عليه
عبد اللطيف ماراد بالبدايه يقلقنه ضم علينه شنو يشوف لكن خطيه جان يشوف واحد ضخم وطويل كلش كلش طويل يوكف باب الغرفه بعدين يصغر ويرجع صغير حيل ويختفي وهيج يبقه يرعبه ويسلب النوم من عيونه ومن كثر ماتعب حجاله لاابويه
منهم كال هذا الطنطل وان عبد اللطيف متفزز بهذاك الوقت بالفجر يعني بالطنطل
ومنهم يكول هذا الجن بسم الله الرحمن الرحيم
بقه فتره يقراله ابويه ويبخرله
الله يرحمك ياب جان يكعد يقراله بالساعات قران حتى بس ميخاف عبد اللطيف وفعلا جان عبد اللطيف ينام لما يسمع القران يطمئن گلبه
جميله لمن سمعت بهاي السالفه صارت تخاف
كطع كلامه بضحكه وضرب على رجله وكمل
جنه نام على السطح وهي متابعه مسلسل
الكهرباء جانت طافيه وهي كل شويه عينها على الكهرباء بلكت تجي وهسه حتجي ويالله مامنها غير متحملت نزلت داتتأكد اكو وطنيه لا
ليش ما عبد الرحمن نازل قبلها هو عرف بيها حتنزل فنزل قبلها بدون متنتبه
جان يختللها جوه الدرج
هي نزلت تصفق وتهوس وتغني علمود متخاف لان ضلمه فراحت شافتها ولما رجعت داتصعد جان يفززها بطكطكه قويه بحيث تخلي اي واحد يخاف
وهي صرخت يمممممممممه
لحكووووليييييي
طنطننننطلللللل يبوووووووو
نوب تريد تصعد على درج صارت متعرف وتتعثر وهذاك ميت ضحك
احنه صرنه منكدر نكوم من الضحك بس خطيه عبد اللطيف نزل عليها خاف عليها بوقتها ولحد هسه كل مانتذكر نضحك
شيماء... والله صدك تضحك يمه شسوالف عليها جميله
بسعاد... جميله اجتماعيه صحيح لسان شويه بس گلبها طيب وماعدها حقد غلى احد
شيماء... اي صحيح
صرت اباوع لاابويه وسوالفه وشلون عيونه تلمع بفرحته بينه الدنيه جانت ملامتني
رغم الحزن الجبير الي بقلبه بس يضحك ويتبسم للحياة مسلم كل اقداره لرب العالمين
جنه فعلا محتاحين لهاي الاجواء العائليه الي تسودها المحبه ودفو العائله
حتى اباوع لروح مندمج وفرحان ويلعب عكس كل مره من اشوفه طفل هادىء منطوي
يمكن يفتقد لاابوه وهيج دائما مخنوك ومنطوي
او يمكن يحس بأمه ووجعها ومعاناتها وشايل هموم رغم صغر سنه
مرت الساعات والاوقات الحلوه بسرعه كانت أمسيه لطيفه وي اهلي وعمه شيماء
رحنه لغرفنه حتى ننام عمه شيماء ويانه بالغرفه فرشت ومددت حتى تنام
شويه وقت مر وهدوء تام صار اخواتي نامو
واني نعست كلش لكن سمعت احد يبجي بهمس
لما ركزت انتبهت ان عمه شيماء تبجي
ضوه الخفيف الي داخل للغرفه خلاني اشوفها وهي مخليه وجهها على المخده وتبجي
قهرتني كلش بعدها رغم صغر سنها والحياة قست عليها
بيني وبين نفسي كلت هاي تاليت الي تتزوج
مينعرف شيصير لو تنسعد وي رجال حنون وطيب لو بيموت وكلها تصير زلم عليها
ياعيني عليج ياعمه شيماء خليت ايدي على عيوني ونمت
صحيت على صوت عصافير على شجرة التين ومبين من صوتها انها تتشجار بينهم العصافير جنت كلش احب صوتها خصوصا الصبح
كمت بهدوء وطلعت من الغرفه كلها بعدها نايمه باوعت للساعه 7 ونص
خليت الشاي على النار وبديت اجهز الريوك لان احنه اساساً ما متأخّر بالنوم نكعد من وكت وفعلا مابيها الا عشر دقايق وكعدت أمي
بسعاد... صباح الخير... يمه جواهر فرشيلنه بالطرمه نتريك شحلو الجو داخل على ربيع نريد هوى يردها للروح
جواهر... صار يوم
وبعدها صارت وحده تتبع الثانيه وتكعد ومن ضمنهم عمه شيماء والتمينه كلنه على الريوك
بسعاد... الكدمات واضحه اكثر على وجهج اليوم شيماء
شيماء... اي شفتها
بسعاد... لازم اوصي ابو جواهر على مرهم لوجهج
شيماء... لا لاتكلفون نفسكم
بسعاد... شنو هالحجي هذا
شيماء... صدك وين عمي ابو جواهر
بسعاد... يطلع عمج من الفجر يصلي ويروح لشغله
شيماء... هو عطاره شعجب هيج من الفجريه
بسعاد... هو عادته هيج وهم يشتغل يسوي حجابات يكعد يكتب حجابات بالزعفران وتاخذ وقت فيكعد بالمحل ويكتب على الهدوء ولان كلشي موجود هناك
شيماء... كون يسويلي حجاب يخليهم بعد محد يفك حلكه وياي اكو هاي الي شيسموها..... شيسموهاااااا
اوووو نسيت
كالتلي عليها مره نسرين صديقتي دكول مسويتله لرجلها بعد ميحجي وياها شي هم جان لسانه شطوله عليها
بسعاد... قصدج عقدة لسان
شيماء... اي اي اي هي بالضبط كليله لعمي يسويلي علمود اخوتي يسدون حلكهم من يمي
بسعاد... لا ياشيماء تحجين صدك ولج حرام هذا سحر
شيماء... نزلت دموعها وبجت... والله ياام جواهر من ضيمي تعبت من اهلي ومن اخوتي انتي متعرفين شنو من عيشه عايشتها وياهم اني هواي شغلات اني ضامتها بقلبي وماحاجيتها لأحد بس تكطع بروحي
بسعاد... ليش شنو ضامه شنو الي محجيتي شيماء
شيماء...راح احجيلج كلشي بأول فتره الي اجيت بيها لاأهلي بعد مامات عبد الرحمن
اولها شالوني على جفوف الراحه
سلام... لاتنقهرين باجر عكبه الله يعوضج بلي ببطنج عسى ان يكون ولد ويسندج خيتي من بعد الله وبعدنه
شيماء... اشكرك سلام الله يخليك انت واخوتي سند الي
سلام... اي شي تحتاجين بس كولي ابد لاتستحين
شيماء... متقصر سلام
عشت عادي مثل اي بنيه عايشه عند اهلها لكن لما يكون اكو جناين وجهال بالبيت متكون العيشه مريحه مثل بنت بين امها وابوها اخوتها
جنت اكعد وياهم بنفس الوقت الي يكعدون بي واشتغل حالي حالهم برغم اني نفر واحد وهم كل وحده شايله مسؤولية نفسها وزوجها واولادها
لكن جنت ماأخلي هذا الشي بالحسبان ابد
اخوتي كانو ينقهرون عليه حيل ومتعاطفين وياي بشكل لما بدت تكبر بطني واني كم دشداشه عندي وبدت تكصف يشترولي ملابس وهالشي خله غيرة النسوان ماتهدأ ابد وطبعا ماجان الكلام ينكال بوجهي لكن الوجه تبين من ملامحه ان كانت راضيه او لا
لكن سمعت مرت سلام وهي تحجي وي رجلها بالغرفه
ابتسام... انت شنو كل يومين تلاثه مشتري لااختك شي ملابس شي عطور شي ناطيها مصرف تكطعها من حلكي وحلك جهالك وتنطي لااختك
سلام... وشترديها تباوع عليج وعلى نسوان اخوتها شلون لابسات وعايشات حياتهم وهي اصغر منكم ومترمله ومغلفه بالاسود من فوك لجوه
ابتسام... شنو قابل بس انت اخوها مو عدها مصطفى ومجتبى ومرتضى شنو بس انت اخوها
سلام... اني الجبير هنا واني من عكب عين ابويه عيني عليها شوفي ابتسام حلكج تسدي وبعد اياج تفتحين موضوع اختي شنو اجيبلها وشنو انطيها انتي مالج دخل خووووووشششش
ابتسام... والله هالحجي هذا ميصرفلي عيشني عيشه حالي حال هالناس هاي وعود وقتها ماافك حلكي
سلام.... اللهم طولح ياروح شتردين انتي لخاطر الله
ابتسام... كتلك الي اريده لاانت الوحيد اخوها ولاهي ملزومه منك اشو عيالها مامقصرين كل يومين تلاثه المعاليك والدجاح والفلوس كت عليها
سلام... يابه خافي ربج وكولي الحمد لله ترملت هاي ترملت وهي عروووووسسس
لما سمعت هالكلام نقهرت حيل واستهضمت أسريتها بداخلي وماحجيتها
ومشت الايام على تصرفات من نسوان اخوتي غير مقبوله
الي تصيح عليه اغير لااطفالها
والي تريدني ادرس جاهلها
والي تكلي تعبانه وتعالي نضفيلي الغرفه
واني انفذ من سكوت مااكول لا ولااحجي
كبرت بطني بالاشهر الأخيره صرت وصارت حسره عليه الكومه والكعده وتعب مستمر مدمر
صرت اتعب مااكدر اشتغل ولما يشوفوني مااشتغل تكب العيطه بيومها واسمعهم يشتغلون ويحجون
... خدم عدها احنه ليل نهار نكرب ونشتغل بالاخير يجيج الرحال گالب الخلقه هاي على هاي شمسويه وشطابخه ولوك لوك لوك
.... والله كلها مقهوره عليها والله شنو أرمله شبيها يمه شناقصها غويلي علينه أحنه
.... هسه لكتها حجه مااشتغل حامل باجر تجيب هاااا والله اني عندي صغير ومتعبني وكل شويه يبجي ومن هالكلاوات شبعنه منها عمرييييي
... والله العظيم ماادري شحجييييي وشكووووول حسبي الله بسسسس كلشي مااكول
لما شفتهم يتحسبون عليه هنا متحملت ابقه اسمع واسكت كمت ورحت عليهم
... انتو تحجون عليه وتتحسبون مابيها داعي كل هالكلام هذا على الشغل هو شيرادله على المتعافي انتو تلاث نسوان هم لو كل وحده شغلتين هم البيت ينضف بساعه
ابتسام... شوفي ست الحسن تمشين منا تمشين ماتمشين اجيج اخليج عبره لاأمة محمد كلها
شيماء... هذا كلامج مردود عليه
عفتهم ومشيت ولما اجه سلام كتله بلي كالته ابتسام وسلام بيومها گلب الدنيا گلاب على ابتسام
سلام... ولج انتي شلون تحجين هيج وي اختي شتسوين يعني وتسويها عبره لأمة محمد بالله هااااا شتسوين
ابتسام.... اختك حضرتها اكل ونوم براسنه شنو احنه خدم عدها شوف سلام اختك زودها حيل حيل زودتها يااني ياهي بهذا البيت
سلام.... تخبلتي انتي ابتسااااااام لااااا رسمي تخبلتيييييي
ابتسام... هذا العندي والله
سلام... تلمين غراضج ولبيت اهلج اني بعد مااكدر اتحملج ولااطيقج
شيماء... لا سلام الله عليك لا خلص سد الموضوع واعتبره ماصار
ابتسام... يسد الموضوووووع شخليتي بيها يالحيه شخليتي هاي بيتي وهجمتي شفتي نفسج ترملتي ترديني اتطلك
شيماء... مارديت عليها وسلام تخبل بعد هذا كلامها
سلام.. كااافييييي سكتييييييي والله دقيقه وحده متبقين هنا امشيييييييييي
وراحت لبيت اهلها وبعدها استلموني نسوان اخوتي الباقايات وعلى كلشي سوو مشاكل وصارت وحده وره الثانيه تطلع زعلانه هنا اخوتي اعتبروني قصص وروايات عراقية كرار صلاح اني دااسوي مشاكل ثگلت وجوههم من يمي وره ايام كل واحد رجع مرته
اني هم مابيها اسبوع وجبت روح ابني وره ما كمت على حيلي وتعافيت رجعت اشتغل واحسن منهم هم
صارو يتقدمولي ناس هواي منهم الجبير بالعمر ويردوني اخدمه ومنهم الي مايخلف ويريد يتبنى ابني روح ويتزوجني اني ومنهم الي يريدني على مرته لحد ابن خالتي وبوقتها لما شافو اخوتي هذه الملحه من الناس ويردوني بدو يحجون بعد ما جانو محترمين قراري وحبي لزوجي
مرتضى... اني اريد افتهم انتي ليش متقبلين ب أبراهيم شبي اشو رجال فلوس واله قيمته واحترامه بين الناس ليش متقبلين ست شتردين بعد
ابتسام... هه والله ياالله هنيالي يحير منو يتقدملها وهي رافضه ست الحسن متكليلي على شنو
شيماء... كتلكم اني مااتزوج وابقه أربي أبني روح وغير هالشي متسمعون مني
مجتبى... شايفتلج خاف شوفه ثانيه
صرخ بي سلام مباشرة... ولك.... عدل لسانك واحجي عدل شلون تحجي وي اختك هيج احنا ماربيناها على قلة الشرف ياعديم الشرف
مرتضى... كلي بله لعد ليش ماتقبل هااااا على شنو اكو بعد احسن من ابراهيم حيجيها
سلام...التفت الي بهدوء وتكلم... ليش متقبلين شيماء؟
شيماء... متزوج وماكو مره بالدنيا تقبل رحلها يتزوج عليها ثم أني احب ابو روح وروحي متعلقه بي تفكيري وروحي كلها يمه مستحيل مااتقبل رجال غيره
مرتضى... لج بابا متزوج شنو... تحبين شنو
شنو هالمثاليات الزايده الي انتي بيها
بابا الحياة غيرررر غير هالخريط مالتج
الناس مالاكيه تاكل وانتي كل واحد يتقدملج اضرب من الثاني وترفضين
شيماء... من اول مااجيت كتلكم هذا اني وهذه حياتي ومااتزوج وطلبت تحترمون قراري ولحد الان وارجع اكرر تضغطون عليه اروح يم عمي شعبان الرجال فاتحلي بيته وموصي ولده عليه لهنا وكافي
سلام... شنو هالحجي هذا مالتج هو شدايحجي اخوج من يمج احنه كلنه نريد نطمن عليج ذوفي خيتي الحياة ميصير توقفيها والله مطول بعمرج انتي بعدج صغيره خو ماتدفنيها لنفسج بالحياة
باجر عكبه الله يمكنه وكل واحد بينه اخذ مرته و جهاله وراح بيت وحده مستقل ومستقر بي انتي حتصفين وي ابنج بطرك هالبيت لاتزعلين مني بس هذه الحقيقه
انتي يرادلج رجال يحميج يصرف عليج يطلعج يونسج اخ لاابنج اخت
شيماء... بخنكه... والي حيصير زوج الي وسند حيصير عدو لاابني
محد مثل الاب يكون حنين ابد
مجتبى... مو اجاج هذا الي مايخلف وحيموت على ريحة الضنه ليش ماقبلتي هااااا جان دلله لاابنج
شيماء... وذنب مرته شنو هااااا
يعني رجلها الي مايخلف ولان هي يتيمه ومكطوعه من شجره انجبرت تبقه ويا حرمت نفسها من ان تكون ام وفوكاها الافندي يريد يتزوج وحده عدها جهال ديسد الفراغ الي بداخله وهي تبقه تصفن بالحياطين مووووو
سلام... انتي او غيرج بالنهايه حيتزوج
شيماء... وخل يتزوج المهم ماادخل بخطية احد
سلام... افهم منج تردين تتزوجين بس متنزلين على ضره
شيماء... مااتزوج من الاخير بس انتو داتذكروهم وتردون اسباب مامقتنعين بمسئلة ان اني احبه لزوجي لحد الان
مجتبى... متنسي باباااااا متنسي لحد ماتموتين وهم بالاخره تطلبين من الله تشوفي شبيج انتي بس هاهيه لازم تقشمرين على نفسج نسيتي وتعيشين خو ماتوكف الحياة
ورود زوجة مجتبى.. تحجي بثقه استاذ مجتبى لازم مجربها
سلام... انت اكرمنا بسكوتك مجتبى افندي كل شويه وجايب العيد جفصاتك اسكت
شيماء... مرت ابراهيم زعلانه بيت اهلها لان عرفت رجلها يريد يتزوج ومال اني اقبل اكسر بگلب غير او اصير مره لغير عبد الرحمن انسوووهاااااا
عفتهم وكمت بقو فتره يلحون واني رافضه وبعدها نسد الموضوع
وبقو هم يتقدمولي وارفض وهم نفس القال والقيل ماتخلص جان بكل مره راسي يريد ينفجر من كثر الضغط والكلام
كل هالفتره ونسوان اخوتي جانو مايسكتون واخوتي صارو مايتدخلون ويوم الي يتدخلون فتفتر عليه واصير اني الي غلطانه
مريت بفتره صعبه حيل فتره الي جنت ارضع بيها ابني روح وهي جان الحليب مايكفي مايشبعه فاأحتاج اكل وخصوصا التمر اشتري بالمصرف الي جان يدزه عمي واخلي بالثلاجه اي شي اشتري اجي الكاه ماكو واسكت اكول البيت بي جهال والف عافيه
لكن كنت اشوف هم لما يجيبون اي شي مااشوف الا قشور الفواكه او علب الحلويات وهم اكول الف عافيه
احيانا كان يعجبني شي اريد اكله ماالكه الا الخضراوات بالثلاجه حتى لما اكون جايبته وللاسف مكان خاص بيه ماكو انام بالصاله وملابسي وملابس ابني جوه الدرج بسله
وهاي حامده ربي وشاكرته
لكن احيانا الانسان ينكسر خاطره من شغلات يمكن المقابل يشوفها عاديه ماتسوه
اي انسان لما يكون وحيد او ضعيف واكو دائما من يحسسه بهذا الألم راح يبقه متألم دائما
بمرور الايام والشهور اخوتي اعتمدو على الي يدزها عمي صارو ماينطون مصرف ابد
اكثر موقف دمرني وخلاني احس بفقدان عبد الرحمن من صدك لما تمرض روح ابني
جان صغير وشتاء وبارده ثلج فجأه صخن كلت عادي اي طفل يصخن بقيت اسويله كمادات واهتم بي صرت ارضعه ولما ارضعه يتقيء بكل مره حرت شبي شجاه
باوعت على روح كل مره وجه اصفر ودايضعف خفت عليه حيل وبوكتها اجيت لاابو جواهر وعالجه بالطب النبوي
صحيح رجع تعافى روح بس بوقتها ضاقت بيه الدنيا حيل ضاقت وحرت شنو اسوي
من يومها وقررت اعتمد على نفسي بكل شي
ورغم هالشي لا بطلو نسوان اخوتي كررههم عني ولا رجعو اخوتي يحبوني مثل الاول
لما كبر شويه روح وصار يلعب وي الجهال
بالعاده الجهال يلعبون يتعاركون سويه عادي مفروض الكبار مايتدخلون لكن للاسف الي شفته من النسوان عكس هالشي تماما اضافه لهذا الشي صار يوصل الكلام لااخوتي
مره مرت مجتبى ضربت روح بقوه بحيث اصابعها نرسمت على وجه روح اني بلحضتها صدك نغثيت ونقهرت...
شيماء.. ليش تضربي شمسويلج
ورود... ربي لاابنج شيماء بعده كله طوله شبرين يكلي ولي
شيماء... تحجين صدك طفل عمره سنه ونص توه بتلفظ النطق حتى ميعرف يحجي زين وانتي بدال متشجعي شلون يتكلم عدل تضربي
ورود... اشجعه! تحجين صدك انتي
شيماء... تشجعي على الكلام وتعلمي ان الكلام الي كاله غلط وعيب مو تضربي
هسه هو شمفتهمه على شنو ضربتي
هسه يعتقد انتي متحبي وتضربي
هو مايعرف الكلام الي كاله غلط مفروض تعلمي
ورود... والله هاي مسؤوليتج مو مسؤوليتي نوب تريدني اربي أبنها
شيماء... لمن مسؤوليتي تجين تكليلي من يغلط مو تضربي مااسمحلج بعد تمدين ايدج عليه افتهمتي
ورود... يجي اخوووووج وهو يشوفلكم صرفه مو عيشه هاي
عافتني ومشت
واول مااجه مجتبى تلكته تبجي وتشكي
ورود... ترضاها.... ترضاها ابن اختك يغلط عليه وتلزمني امه تسوي بيه العجب بس لاني حجيت على ابنها وضربته كف
مجتبى... بخرعه... ضربتي روح
ورود... غلط عليه مامتربي
مجتبى... لا ياورود لا هذا الكلام زايد منج هو حجايتين ميدبرها نوب يغلط عليج وبعدين بأي حق تضربين رووووح هاااااااا
ورود... اكلك يغلط عليه ويتجاوز
مجتبى... بصياح.... متضربي وروووووود متضربيييييي
يتيم هذا يتييييييم ولج تعرفين شنو يتيم
ورود... والله ولا لحضه ابقه كاعده بالبيت هنا هاي تقويها عليه بعد وبعد شنشووووووف نوب علينه روح كله طوله شبر
روحي شيماء عسى الله يفجع گلبج بأبنج وتلتهين بروحج وتفكين عنه
شيماء... ياداعي الك ثلثين المندعى و حاشى لله ان يرفع هيج دعوه خبيثه الله خير الحافضين منج ومن كيدج وخبثج
دارت وجهها وطلعت لبيت اهلها ولما اجو اخوتي وعرفو بلي صار ذبو كل الحق عليه
سلام... انتي متعبرين حجايه يعني واذا ضربته شسوتله قابل قتلته؟
شيماء... اذته ايدها انطبعت على وجهه روح ليش هيج
سلام... بس هذا مو مبرر تخلقين مشكله كافي مشاكل شيماء كافي احنه نريد نرتاح بيتنه عاد وانتي كالبته جحيم
كاااافي مو عيشه هاي والله
وراح لغرفته وهو يتكلم بهذا الكلام
بقيت صافنه معقوله اني داسوي مشاكل وماننتبها على نفسي
اخذت روح ورحت لغرفتي
ثكل خاطري كلامه حيل وجرحني وخلاني اعيد حساباتي من اول وجديد واتسائل
هيج اني دااغلط بحقهم واسوي مشاكل؟
بقيت بوقتها افكر ومقهوره وبيومها حتى ماطلعت باب الغرفه
خليت روح يمي ونمنه
روح بيومها نام بدون عشاء
عزت علينه نفسنه
هالسنتين الي مرو بمشكله وره مشكله
تعبت نفسيتي حيل وكرهت حياتي
وبده فهد يكرهلّي حياتي اكثر وأكثر.....
شكرا لزيارتكم عالم روايات سكيرهوم
