رواية قصة وجدان الفصل الثاني عشر 12 بقلم انين الليل

كريم //. وشغلك

:: شغلي يمه مهدي وبهاء

هاا

هز راسه :: اي شسوي اعوفلي مره وبت شابه ما يمهم زلمه

والى متى ؟

:: انشوف شيصير من امر الولد وبعدها يصير خير

بيبي دعت بصوت مسموع // الله يوفقك عمه ويرزقك ويسترك

عاصف :: آميين

كريم باابتسامه // ها يمه شو تدعيين لابن حماج وانا ابنج نسيتيني

بيبي // شني نسيتك كل ساع ادعيلك الله يرزقك ويفتحها بوجهك انت واخوك بس عاصف عاف بيته وشغله واهله

واجه اهنا وما ندري شيصير ما يصير

عاصف :: ان شاالله ما يصير اله كل خير

بيبي // ان شاالله

عمو عاصف حاجه خاله شيماء :: بلا زحمه ام احمد شوفي ام هشام هم ياالله نروح

- - اي صار

بيبي // وانا هم ارووح انا وشيماء

كريم //. من نرجع من المحامي عود اخذج انتي وشيماء

عاصف :: ها عمه ترحين

- - اي اروح شيماء عكب باجر يجيها رجلها وتروح ويا وانا هلتشوفني ما بيه حيل اشيل روحي

واهنا ياهو الي گبل من اجي نجاة تگوملي وتفرح وتشيل وتحط هسه نجاة مو يم روحها

بيبي // وهاي البنيه ولا تتخرج كل شي ما تعرف

عاصف :: الله كريم

اجت شيماء وكالت // هسه تجي

من سمعت امي كالت بصوت ناصي ومبحوح // السلام عليكم

اني طلعت ردو // وعليكم السلام

وكف عمي عاصف وعمي كريم وكالو // ياالله خلي نمشي

امي بايدها العلاكه انطتها العمي عاصف // هاكم هاي كل الفلوس ادفعوللمحامي اريد ابني يطلع

:: ان شاالله بس خليهن هسه خلي نشوف شكد يريد وشيطلع بيده يسوي

كريم // مي خالف عاصف اخذ عربون انطي اله سد حلكه

عاصف هز راسه. // لا كريم العربون مو اسد بي حلكه اريده يفتح حلكه

- - يخوي خاني التعبير

عمي عاصف اخذ مبلغ من الفلوس ورجع العلاگه بايد امي وهو يكلها :: اخذت مليون والباقي روحي ضميهن اكيد نحتاجهن

ويجوز نجمل فوكهن

من راحت امي بيبي سالت عمي // شيخكم شيكول

:: عليش

- - على الحادث

:: عمه ولا واحد اتصل ابد عبالك غربه (لملم حلكه وهو يهز براسه ) سهله ومي خالف خلي تخلص شغلة هشام

وعود الشيخ يودي عليه لطلابه العركه تعال ادفع ودي فصل انا اعلمهم

بيبي // عمه لاتنسى ما يتذكرون من سعدي طيب وزينيه

:: عمه سعدي اتوفه الله يرحمه وليش الجذب سعدي يدفع للفصل والودي والخساره صح ما يحضر

بس يدفع اصلا حتى عن ولده يدفع وبفاتحته كلها اجت

كريم // اي مو شهيد اجو يراوون نفسهم گدام الناس والشخصيات الاجو هذا حتى ...

عاصف شاف امي قاطع كريم :: ياالله امشينه ياالله ام هشام خلي نتوكل

وراحو وانا بقيت كاعده وخاله شيماء گالت راح اغسل الكراج راحت خاله وانا بقيت كاعده يم بيبي سالتني

اخوج اتغدى

= لا بيبي نايم

بيبي كعدي وخلي ياكله لكمه

= اي هسه اكعده واخلي يروح يشتري لفه

منين يشتري

= اهنايه يمنه واحد يسوي لفات دووم يروح ويشتري منه

لاتخلين اخوج يطلع ابحده اخاف علي

بقيت ساكته هي طلعت فلوس وگلتلي // هاج روحي اشتريله لفه وعصير وانتي هم اشتريلج لفه

= بيبي عندي

منيلج

= عمو عاصف انطاني گلي هذا مصرف الج والاخوج

مي خالف اخذي وروحي اشتري

طلعت وشفت خاله شيماء تغسل بالكراج من شافتني گالت //. وين رايحه

= للمحل اشتري لفات

وين هذا صاير

اشرت بايدي = اهنايه براس الفرع

وهاي انتي رايحه تشترين منه

= اي خاله لفاته كلش طيبه ودائما نشتري منه

زين روحي اشتري بس من توگفيين انطي الفلوس وصيري على صفحه

هزيت راسي ورحت للمحل اشتريت منه سبع لفات وعصير واجيت

لگيت خاله وبيبي گاعدات انطيتهن اللفات بيبي كالت //. لا ما اكلهن يسون عندي جالي

شيماء// چا شتاكلين

- موجوعانه تونه اتغدينه

شيماء // خلي اطلع لج كعك واصبلج چاي

رحت للغرفه گعدت علاوي فتح عيونه ابتسمت بوجهه //. هاك حبيبي اكل

اجت خاله شيماء // گوم خاله اغسل وجهك وتعال اگعد يمنه بيبي تسال عليك

باوعلي ابتسمت بوجهه هو طلع راح للحمام ومن رجع بيبي اشرتله بايدها هو اجاه باسته وگالت

شنو حبيبي ليش گاعد ابحدك تعال يمنه شويه سولف ويانه واگعد يم عمامك

بقى ساكت ما جاوبها شيماء // حبيبي لا تسكت احچي ويانه شنو ابحدك گاعد بالغرفه

بيبي// لا هو سبع تشوفينه هذا

جاوبتهم = عمو گال ياخذنه ايونسنا بس مو اهنا نسافر

شيماء //. وين تسافرون

= البيته عمو يگول عنده مزرعه كبيره وبيها حيوانات وبحيره بيها اسماك

شيماء // هههه اي هناك بالعشاير صدك مزرعه كبيره

= خاله يعني شنو عشاير

شيماء // يعني اكثر عشيرتنا موجوده هناك

= اقاربنا

هزت راسها //. اي اولاد عم ابوج وكرايبه كلهم اهناك ناس بالولايه وناس بالعشاير

=. شنو يعني ولايه

ابتسمت //. يعني مدينه بيها شوارع وقصور ومستشفى واسواق ومطاعم

=. ها يعني مثل منطقتنا والعشاير ما بيها

لا ما بيها بس كاع يزرعونها وبيوتهم

علي ياكل ومن كمل راح غسل ورجع دخل للغرفه صار يلعب بلي

شيماء سالتني // هذا هو هالكثر يلعب من زمان

هزيت راسي = لا خاله كنا يوميه العصر نلعب اني ويا بس من الحادث الهسه صار كله گاعد بالغرفه وساكت

والطبيب شگال الكم

= صدمه وتروح بمرور الايام بس اهم شيي يبتعد عن التوتر

بيبي هزت ايدها //. شلون يبتعد اذا يشوف امه كدامه النهار كله تبچي وتدك على روحها

شيماء // الله يساعدها يمه

بيبي // اي والله الله يساعدها انوب لا اهل يمها ولا عيال يردونها خلف الله على المره الغريبه جارتهم تجي وتسأل عليها

شيماء // يمه الدنيا ما تكاطعت

بيبي هزت راسها // لا يمه شو ويه نجاة اتكاطعت كلش عبالك كاتل ابهاتهم

شيماء // بعد شتسوي هذا حظها المسكينه

تستمر القصة أدناه

راحت خالتي شيماء للمطبخ واني وراها سالتها = ها خاله رايده شي

شيماء. // اي تعاي خنشوف شنسوي عشا

= مو اني جبت الكل واحد لفه

ابتسمت // هههه وتكفيهم هذوله زلم وياكلون

رفعت اكتافي = بكيفج خاله

شيماء // ما طول جبتي لفات عود اگليلهم بيض وطماطه

= اني اگلي

تعرفين

=. اي خاله اعرف

خوش من يجون عود انسوي الهم

غسلت استكان بيبي والكوب الي شربت بي چاي ورجعت للصاله واني رجعت يمها وصار المغرب واتوضينه وصلينه

واجوي امي وعمامي وسلمو وراحو للديوان ايصلون ومن رجعو بيبي سالتهم

ها بشرو

:: الله كريم عمه ان شاالله خير

انشاالله بس شگال الكم المحامي

:: گال الولد معترف هو كتل اخو ومحد حرضني ومن ساىلينه لويش كتلته گاله لان اكرهه وما ردته ايقاسمني بورث ابوي

ومن سائلينه اكو شهود ومن ضمنهم امك تگول اتعاركتو وانو رامي هو جاب السچين وراد ايضربك بيها وانت اتلاويت ويا وضربته ما متعمد هو راد لا مو صحيح كنت ناوي اقتله وحتى ناوي اقتل علي الزغير لكن امي عاطت ولمت الناس وحتى كنت مخطط انو اقتلهم اثنينهم بمسدس ابوي بس تسمحلي الفرصه

خاله شيماء //. يا هذا الولد متخبل وهالشكل يحچي

بيبي //. وهسه شلون

:: بلكي يحصل النه مواجهه نشوفه ونقنعه ايغير اقواله

عمو كريم //. اكلك عاصف هي مو امه المشتكيه

:: لا هو سلم نفسه وگللهم انا كتلت اخوي

- - بس يصير تتنازل

جاوب بهدووء :: هم سالت المحامي من بقيت يمه

كريم. // صدك المن بقيت يمه

:: گتله امه هلتشوفها تعبانه وانت شتريد اطلب بس انريد البراءه

- - وشگلك ؟

عاصف عض شفته الجوه وزفر بقوه وكال :: الله كريم

شيماء // صدك خويه شگلك

باوع الغرفة امي وحچى بصوت ناصي :: گال اذا هو معترف موقفه ضعيف لان مثبت التهمه علي وهو مو زغير ولا قاصر

شيماء // بس هاي امه مو تكولون ما مشتكيه

هز راسه :: لو كل واحد كتل اخو وامه ما اشتكت چان محد بقى بالسجن وچان اي واحد يضوج من اخو كتله وطلع من السجن

بيبي وهي تفرك اديها // اويلي عليج عمه نجاة اتعذبتي وين هاي مضمومه الج

شيماء // بعد يمه الله يباوع الحالها

بيبي // هسه باجر ترجعون ع المحامي

:: اي ونشوف بلكي مستجد شي بالقضيه

رفعت ايدها بالدعاء // بلكي

كريم // شنو مسوين عشا لو اروح اجيب

شيماء // هسه نگلي بيض وطماطه

بيبي // ما بقن لفات جيبيهن خلي يسدون جوعتهم

راحت شيماء وانا رحت وياها خلت اللفات بصينيه وكلتلي // جيبي قواطي الببسي

= وماما ؟

- هاي لفه وقوطية ببسي الها

جبناهن للصاله وخاله خلت الصينيه بيها اربع لفات واخذت لفه وببسي الغرفة امي

عمو عاصف گال :: كافي هذني اللفات لاتسوون شي بعد اله اذا انتتن تريدن لو كريم

كريم // لا كلش كافي

صار ياكل خاله گلتله // عبالي ما تاكل اللفات عاصف

:: لا كله نعمه وهنه طيبات منين ؟

- وجدان راحت جابتهن من المحل اليمهم

هو غص باللكمه وباوعلي :: انتي رحتي جبتيهن

جاوبته بلا مبالاة = اي اني دائما اروح اشتري العلوش

هو لملم حلگه واتنفس :: بعد ممنوع اتطلعين للدكان

اتفاجآت بكلامه كريم گله //. ياخي ما بيها شي

باوعله :: لا بيها ابو كرار بيها بنيه شابه شلون تطلع ابحدها

اشرت باديه = هياته المحل عمو دووم اروح واشتري اني وعلووش

:: بابا هسه الوضع اختلف من تردين شي گليلي لو خلي علاوي يروح

جاوبته بحزن = هو وينه علاوي اسالها البيبي بالگوه اكله لفه

:: مي خالف بابا وصيني انا

= ليش عمو انت راح تگعود اهنايه يمنه

هز راسه :: اي بابا على ما نشوف قضية اخوج

هزيت راسي. هو باوعلي :: سوي چاي وبعد اذا محد موجود مو اله نتزقنب لفات

رحت اخدر الجاي وكريم ايگله //. على كيفك عاصف

واجت وراي خاله شيماء باوعتلي // خاله لا تزعلين من عمج

راسا بچيت ودموعي نزلن هي اتحسرت وهزت راسها //. لا خاله لا تبچيين عمج مو قصده يزمخ عليج

= اني ما سويت شي عيب

شيماء // هناك عدهم البنيه البگدج عيب تطلع الاي مكان بس المدرستها ومن تريد شي تاخذها امها حبوبتها اي مره چبيره

ليش اگلج لا تزعلين

= ما اروح الهم ذوله معقدين

- - ههههه. دغسلي وجهج وصبي الچاي احنه هم ياالله نروح

باوعت الها واني مبرطمه. = راح اشتاق لج خاله

حضنتني // وانا هم اوعدج كل ما اجي امرلكم

ابتسمت واخذت الچاي العمو كريم وعمو عاصف شربو وكملو وعمي كريم گال //. ياالله نروح

بيبي لبست جواريبها وخاله شيماء لبست عبايتها مالت الراس وراحن يسلمن على امي بقن تقريبا عشر دقايق

واجت خاله شيماء وهي تكول // اللفه وقوطية الببسي بمكانها وهي گاعده بالگاع حتى مو على الفراش

كريم // خلي اروح احاچيها

لزمه عمي عاصف وگله :: عوفها كريم المره مصدومه واي كلام وياها ما يجيب نتيجه

خاله شيماء //. اي صدك مثل ما يگول عاصف اي كلام ما يجيب نتيجه

كريم //. وشلون تبقى هالشكل

عاصف :: بلكي من تروح تواجه هشام ويغير اقواله بلكي شويه تهدا

شيماء // ان شاالله

وانتظرو بيبي الي اجت وهي تمسح بدموعها وشفايفها يرجفن //. همزين عمه ياعاصف ظال اهنا هاي المره ما عدها راي

شيماء //. الله كريم يمه كل مصيبه تبدي چبيره وتالي تزغر

بيبي // اله مصيبة نجاة يمه يوم عن يوم تكبر

عمو كريم //. الله يعينها وانت عاصف خاف تسافر يخابرونك مناك انطيني خبر اجي انا وام كرار يمها

:: ان شاالله

ياالله تصبحون على خير

:: طالع وياكم

طلع عمي كريم وعمي عاصف وبيبي وانا وخاله شيماء طلعنه وراهم وهي توصي بيه

- - وجدان خاله ديري بالج على امج تره الله يساعدها منهاره بعد ما اوصيج هواي مروگات بالمجمده يوميه الصبح من تكعدين طلعي مركه خليها بالفرن مال الطباخ لا تفتحين عليها بس خليها بالفرن وبهدعش ونص خليها على العين عشر دقايق من تشوفينها تفور طفي النار ويوميه نگعي تمن طاسه الي موجوده بالسطل ومن تمر عليكم ام احسان خليها تطبخه على ما تتعلميله

- - ها وما اوصيج اقفلي باب الصاله وباب المطبخ الخارجي والمفاتيح خليهن يمج والصبح من تكعدين افتحيهن وهم ضمي

المفاتيح لا تخليهن بالبيبان

= خاله لويش ؟

- - احسن خاله للامان وديري بالچ على اخوج خطيه تره مصدوم من الي صار الله يساعده

احچي ويه نفسي = يعني اني الما مصدومه بس شسوي

وراحو بيت عمي كريم صدك حسيت بفراغ عمو عاصف سالني :: رايده اجيبلج شي من الدكان

هزيت راسي واني مدنكه = لا عمو

:: من تردين تشترين تعاي وگليلي وانا اروح اجيبه الج

ما جاوبته رد :: تصبحين على خير اقفلي باب الهول والمطبخ وشيلي المفاتيح خليهن جوه راسج

استغربت نفس وصية خاله = ليش عمو ؟

:: احسن بابا احسن بس كبلها جيبيلي بطل ماي

= اي عمو

رحت اخذتله بطل ماي شفته جاي يفتح بجنطه وشفته طلع منها گلبيه رجاليه وخاولي ومشط وملابس ثانيات

عرفته يريد يروح للحمام خليت البطل ودخلت قفلت الصاله والمطبخ الخارجي وضميت المفاتيح جوه المخده

شفت علي گعد ابتسمت بوجهه = علووش جوعان رايد شي

لا مم (غمض عيونه وفتحهن ) ما اريد شش() ي

= من تريد شي گلي راح اشوف ماما تجي وياي

هز راسه يعني لا

گعدت يمه ع الچربايه = علووش حبيبي ليش ما تجي يم امي تدري هسه محتاجتك اكثر من اي وقت

ما اريد ار. و و ح يم ها لان بس ااااا تب( ) چي

= حتى لو علاوي يمكن من اتشوفك تسكت وما تبچي

مديتله ايدي ورحنه للغرفه لگيناها بالكاع فارشه سجادة الصلاة وجاي اتصلي باوعنه الها تبچي واللفه مثل ما گالت خاله شيماء بمكانها

بقينه واگفيين منتظريها تكمل لفت السجاده وباوعت العلاوي وصارت تبچي بصوت مسموع وهي اتگله

اخيك رامي راح بعد ما يجي وما ياخذك للدكان ويجيبلك حلويات وهشام همه بعد ما يجي علاوي يمه انهجم بيتي

صارت تبچي وهو هم يشهك ويبچي وانا بس دموع ينزلن حاچيتها وانا امسح بدموعي

= ماما الله يخليج لاتسوين هالشكل بروحج

- - الله لا يخليني ما اريد اعيش المن باقيه ولدي راحو شلي بعمري

= ماما واحنه

جاوبتني بكلام مليان عبرات // انتو الكم الله

صرنا نبچي تلاثتنا وهي حاضنه علاوي واسمعها تگوول // يمه اذكريني من تمر زفة شباب من العرس محروم حنتي دم المصاب

وبعدين تحچي //. دللول يالولد يابني دللول

عدوك عليل وساكن الچول

دلللول رامي يايمه دللول

عدوك اخوك وشلون بيه

رامي يمه لو بيدي اجي وانام بصفك

لو بيدي ياهشام اهج واطلع

شلون بيه ما احمل فراك

رامي يمه هشام راح اتخبل ولكم شسويتو بيه

جاوبتها واني ابجي = كافي ماما الله يخليج

باوعتلي وانا امسح بدموعي سوتلي بايدها يعني تعالي حضنتها وانا اجهش بالبچي وعلي صافن وبس دموع

= ماما شوفي علي شلون ساكت

= علي علي هزيته من ايده علي علي ركضت على الباب لگيته مقفول رجعت اخذت المفتاح = عمو

هو متمدد طفر :: ها شكو

= علي علي ما اعرف شبي

:: شبي فهميني

رحت گدامه ودخلت للغرفه لگيت امي حاضنته اجيت يمها وخرتها وشلته عمي اخذه مني مدده بالصاله وهو يعيط

:: جيبي ماي بسرعه

::علي علاوي عمي شو اصحى

صاريضرب بي على خده وفرك خشمه لمن ما رمش بعيونه غسل وجهه واشوف عمي يبوسه وهو ايگله :: شبيك بابا

علي بقى ساكت حاچيته = علووش حبيبي شنو يوجعك

هو بس يباوعلي اهنا عمي شاله سالته = وين

:: راح اخذه للنستشفى.

= اروح وياك

:: وامج منو يبقى يمها انا اخذه

ما رديت لان فعلا امي منو يبقى يمها عمو باوعلي :: اقفلي الباب زين وانا راح اطبك باب الحوش واخذ مفتاحه وياي

جاوبته والعبره متكسره بصدري = عمو دير بالك على علاوي ورجعه وياك

:: لاتخافين مابي بس العافيه

طلع بره الصاله ودار عليه گلي :: اقفلي الباب وديري بالج على امج

قفلت الباب وبقيت داخل الصاله وكل شويه اباوع من الشباك بلكي يجون ورحت شفت امي وهي نايمه ع الكاع

ودايره وجهها درت اريد اسد الباب هي گالت // اشلونه علاوي

جريت نفس = ما بي شي اخذه عمو طلعه شويه كال يشم هوا

طلعت سديت الباب ورحت گعدت بالصاله وباوعت الى ان شفت عمو اجه وشفته دخل وعلاوي ويا طلعت لكيته

خاله ع القنفه سالته = ها عمو

:: ما بي شي لا تخافيين

= عمو شبي

:: مو الطبيب گال ابعدو عن التوتر

= رحنه شفنه امي

هز راسه ونفخ :: اعرف بابا بس لازم انبعده عن كل شي يقهره روحي بابا نامي

= وعلووش

:: راح ابقي يمي ينام

باوعت اله هو هز راسه وابتسم بوجهي ابتسامه طمنتني روحي جيبي الي بطانيه ومخده

رحت جبت بطانيتي الي اتغطى بيها ومخدتي. وانطيتهن العمو شفته مخلي علاوي على فراشه وهو اخذ البطانيه

والمخده خلاهن ع الزوليه عرفتهن اله رحت للغرفه بعد ان قفلت الصاله اتمددت ع القنفه بعدها رحت جبت بطانيه

واتغطيت بيها بقيت افكر بلي صار بينه وشنو السبب وليش هالشكل مرات ابچي ومرات اگول = لازم اصير قويه

غفييت گعدت يمكن الساعه بالتسعه سمعت امي تبچي بالغرفه ونفس العتب ونفس الكلام گمت اتوضييت وصليت قضا

بعدها رحت يمها باوعتلي وشفايفها يرجفن بعدها رفعت اديها للسما

- - آلهي باوع النه الخاطر هاي البنيه

رجعت باوعتلي // شفتج نايمه ع القنفه ما ندهتج شلونه علووش

ابتسمت = زين عمو يكول لازم انبعده عن التوتر

- - مو بيدي ماما شسوي مو بيدي

= سلمي امرج ال الله

- - ونعم باالله ليش انا شنو. عندي غير الله

حضنتها = اي ماما عفيه هالشكل اريدج قويه لازم تكونين قويه لان احنه محد بقى النه بس انتي

- - الكم الله ياامي

هزيت راسي = اي بس الله وانتي

— - - يمه اخوانج اخوانج مو واحد اثنيين راحو من بين اديه

= اعرف ماما بس احنه محتاجينج

صارت تبجي بصوت عالي // ادري يمه ادري مو بيدي لحد يلومني مرات ابدي اطلع من البيت اهج

عرفت بلحظتها ليش عمي وخاله شيماء طلبو اقفل الابواب واخلي المفتاح يمي باوعتلي وكالت

روحيسوي ريوك العمج عيب الناس مو مثلنه يتريگون من الصبح

= اي هسه اسوي واجيبلج

هزت راسها // لا انا ما اشتهي روحي ريگي الرجال وشوفي اخوج عود تالي جيبيلي چاي وشويه خبزه

تستمر القصة أدناه

رحت للمطبخ فورت ماي بالغلايه وحميت الصمون بالاوفن وگليت بيض وخدر الچاي خليتهن بصينيه بعد ان صبيت

كوب چاي رحت للديوان دگيت الباب الي شفته مفتوح فتحته شفت علووش نايم وعمي متمدد هو من شافني نهض من القنفه

= صباح الخير

اخذ الصينيه وهو يبتسم :: صباح النور

= ليش دا ادخن ما يصير قبل ما تاكل

:: اكلت

= يمته ؟

:: طلعت للمحل الي براس الشارع اخذنلي صمونه وكوب چاي

= ليش ما صحتيني

:: لا بابا ما صار شي

= تدري عمو اني هماتين مثلك نمت بالصاله ع القنفه

جاوبني باستغراب :: ها وليش ؟

هزيت راسي = مو بقيت هالشكل كاعده الى ان غفيت وهياتني سمعتها الامي تبچي وكعدت

اتحسر :: الله يساعدها

= بس اليوم شويه اهدا

رفع ايده للسما :: ياالله

هزيت راسي = اي عمو هي الي گلتلي سوي ريوك العمج لان انتو متعودين تتريكون من وكت

ابتسم :: كلامها صحيح وديتيلها ريووك

لملمت حلكي وحجيت = اعرف ما راح تاكل اتصور لفة امس بمكانها

:: روحي جيبي كوب جاي وصمونه واتريكي وياي

= لا عمو ما اشتهي

= انا شكلت وجد بابا روحي جيبي كوب جاي وتعاي اتريگي

رحت صبيت كوب چاي وصمونه ورحت هو مخلي الصينيه ع الطبله وكلي اكعدي ع القنفه اشرلي

وهو گعد ع الكاع مقابيلي وصار ياكل بيض مع الصمون واني مره اكل بيض مره جبنه شفته يبتسم سالته

= عمو انت شنو تشتغل

:: انا اشتغل كل شي

= شنو يعني كل شي

حك ذقنه :: يعني بالموسم اسوق المحصول وابيع واشتري

= يالسمك

:: شني؟

= مو تكول عدكم بحيره كبيره (اشرت باديه ) بيها اسماك اكيد تصيد وتبيع

هز راسه ابتسم :: اي مثل ما تكوليين

= الله حلو تكعد تخلي السناره وتصيد مو هالشكل

ههههه هز راسه :: اتريكي

= عمو انت شكد عمرك

:: ليش تسالين

=. دا اقصد انت اكبر لو بابا

:: لا ابووح اكبر مني بهوااي

= مبين انت اكبر من ابوي

:: لا ابوج اكب...

اهنا رن تلفونه كان ع الطبله الثانيه اخذه ورد

:: هلا يمه

:: الحمد لله انتو شلونكم

جاوب بعد ان اتنفس بعمق وهو يستمع :: يمه الوضع مو مال اعوفهم واجي الولد معترف على 

 نفسه (باوعلي )

ولملم حلگه وابتعد شويه :: حجيه الشغل يمه العمال وبهاء ومهدي

:: لا مثلي واحسن وانا كلساع اخابر ابو علاء وجابر وابو فؤاد

سكت واسمع صوت بس ما فهمت شنو تحجي. هو رد :: يمه رحمه الربج لا تفكرون اعوفهم ابحدهم خلي يجي مهدي ابمكاني

:: خووش اذا ما يجي لحد يفك حلگه ما اريد امشي والناس تكول عايفيلهم نسوان لا حول ولا قوه

:: شني يمه هذنيج شعليهن ما راح ينقصهن شي

رد صار يحچي بهدوء :: بلكي اليوم المحامي يحصلنه مواجهه ونروح انقنعه يبدل اقواله

:: حجيه اي شي تحتاجونه اذا بهاء مو يمج ودي على جابر

:: ان شاالله انتي بس ادعيلنه

:: الله وياج

خله التلفون واخذ جكاره وصار يدخن سالته :: عمو شبعت

هز راسه وهو ينفخ الدخان وكفت اشيل الصينيه باوعلي = اگعدي اتريگي

= شبعت عمو

:: لا شو تتريكين

= عمو دا اكولك شبعت

:: ليش اتعاندين اتريكي

ما اعرف خوف او شي بداخلي گال لا تزعلينه لان هذا هو الموجود حتى يساعدنه

عمو طلع صار يرش بالحديقه وانا كملت ريوكي واخذت الصينيه للمطبخ صبيت الامي كوب چاي وخليت جبن

واخذته الها لكيتها متمدده ع الكاع خليت الصينيه وحچيت وياها = ياالله ماما اكعدي اكلي شويه

دارت وجهها عليه وگعدت ابتسمت بوجهها سالتني

- - شلونه اخوج

= نايم

- - ليش ما ندهتي تشوفينه

= عمو ما قبل گلي خلي مرتاح

امي ثلمت لگمة خبز وخلتها بحلگها وصارت تشرب بالچاي بدون ان تاكل شي باوعتلي // شيلي ماما

= بس انتي ما اكلتي

هي بقلة صبر // وجد شيلي ولا تحچيين مالي خلك

شلت الصينيه اخذتها للمطبخ وغسلت المواعين ورجعت للصاله طلعت شفت عمو يرش بالحديقه وصلت يمه

شافني گلي :: الحديقه يراد الها تنظيف

ما جاوبته رجع سالني :: امج تريكت

= كالعاده لكمة وحده اي هلكدوتها وشربت جاي

:: الله كريم

سالته = تحب الزرع ؟

هو يرش بالاشجار :: اكو واحد ما يحب الزرع

= امي كانت هي الي تنظف الحديقه وحتى دووم اشوفها تلبس كفوف وتشيل الحشائش ومن اسالها تكلي هذني حشائش

يضرن الاشجار

:: وانتي ؟

= اني شنو ؟

:: انتي ما تعرفين تعتنيين بالحديقه

هزيت راسي = لا ما اعرف يادوب اغسل صحون واطبخ چاي واسلك بيض

باوعلي وضحك :: ههههه تطبخيين چاي

= اووو نسيت اخدر هاا واسوي گهوه

:: عفيه شويه شويه تتعلمين

شفته شلون يدنك ويشيل الحشائش سالته = عمو ؟

بدون ما يباوع رد :: ها عمو

= ليش قبل ما كنت تجينه اني اتذكر مره او مرتين اجيتنه

هز راسه ::اي صحيح

=. اتذكر مره فتحت الباب وشفتك تريد تضرب بابا او انت ضاربه تتذكر

باوعلي باستغراب وهو عاكف وجهه :: هاا ؟

= اي واني اجيت وگتلك عوفه الابويه وانت عفته

ابتسم :: هاي تتذكرينها احنه بيومها چنه نتشاقى

= حتى بابا من رحت داخل لحگني وكلي لاتحجيين الاي واحد احنه جاي نتشاقى

هز راسه :: اي دووم هذا شقانه

=. بس بيومها شسوه باامي ملخها موتها من الضرب

اتنفس :: الله يرحمه

= وبعد رحت وما شفناك اله من اتوفى ابويه وهسه

:: عمو مشاغل

= لعد هسه ما عندك مشاغل

:: ها ترديني ارووح

هزيت راسي = لا لا تفهمني غلط بالعكس اني اريدك تبقى

:: وانا باقي الى ان اشوف شغلة هشام

= عمو

باوعلي بعد ان راح للسياره مالت بابا وصار يرش بالتايرات سالني

:: وين السطل والاسفنجه مالت السياره

رفعت اكتافي مشى وراها للترك الي يم المطبخ شاف السطل وبداخله بطل الزاهي رجع كلي هذىي

صار يخلي زاهي بالسطل وماي وصار ينظف بالسياره باوعلي وهو يغسل بيها سالني ::شردتي تگليلي

= عمو من تروح انت وامي تشوفون هشام خلي اروح وياكم

شمر الصونده من ايده واتقربلي ونظرته اتخوف

:: اسمعيني زين شفتي هاي روحة امج للمحامي ومن تحجي وتتوسل بي هاي على عيوني ومو سهله عليه

بس اخذج للمركز وتواجهين اخوج لا هاي ما اقبل بيها

انملت عيوني دموع خوف منه وشوق الاخويه =ليش اريد اشوفه مشتاقتله

هز راسه ::بدون ليش خلص ان شاالله يطلع وتشوفينه

عرفت عمي ما يريدني اشوف اخوي لان حاقد علي لان قتل اخويه رامي

بلعت ريكي ما جاوبته خفت من نبرة كلامه اندك الباب وراح عمو عاصف كال :: منو

سمعت صوت ام احسان تكله // صباح الخير

رد عليها :: صباح النور هلا خويه اتفضلي

دخلت وشافتني // هلا خاله اشون امج اليوم

= الحمد لله

اكلت شربت

= لگمة وحده وشربت الچاي

خلي 

 اروح اشوفها سالتني // بالغرفه

هزيت راسي دخلت رحت وراها للصاله ورجعت كلتلي // امج مو بالغرفه

اشرت بايدي = لعد صعدت الغرفة رامي

اتنفست // اووف الله يساعدها ويساعدج انتي. شتردين تتحملين

صعدت ام احسان وغابت شويه ونزلت وهي لازمه امي من اكتافها وهي اتگلها

ما راح اتحصلين شي بس عيونج تنعمي

شسوي مو بيدي لحد يلومني

لا دادا محد لايمج بس ذوله خطيه (واشرت عليه )

امي ما جاوبتها وام احسان لازمتها من ايدها وصلت للصاله گعدت ع القنفه وامي گعدت بالكاع

ام احسان //. واذا كعدتي بالكاع راح ترجعينه

لحد يلومني لو بيدي اطلع بره وما ادخل للبيت

ما راح تحصلين بس المرض الله ينطيج الصبر

باوعت ليفوك وهي مبرطمه ورفعت اديها بالدعاء // يارب

رحت سويت كهوه وجبت فنجانين وخليتهن ع الطبله واخذت فنجان العمو عاصف الي لكيته غاسل السياره

مالت ابوي ومالته مسويهن ايلمعن شفته لازم الصونده وجاي يغسل بالطارمه وصلت يمه شافني او خلي نگول حس بيه

واگفه ورا دار وشافني لازمه الصينيه وبيها الفنجان اخذه وهو يبتسم وكلي :: عشتي

رحت للديوان واتقربت من علووش. فتح عيونه حضنته وبسته = شلونك حبيبي

( ) زي ين الحممد لله

= حبيبي شنو مشتهي اسويلك

لفه ( )

= صار لفة شنو

( ) بر گر

= تدلل حبيبي ياالله گوم للحمام غسل

كام طلع من الديوان وعمي منتجي ع السياره يشرب بالكهوه من شافه گال :: هلا ابو حسين شلونك بابا

علي //. ص ( ) بااح الخ يير

:: هلا بهالصباح حبيبي

جاوبته بفرح = عمو علووش جوعان وكال يريد لفة بركر راح البس واروح اجيبله

علاوي راح للحمام وعمي اتقرب وكلي :: شنو كل ساع اعيد كلامي ما طولني موجود بالبيت ممنوع تطلعين الدكان

المحل السوك اله انا اوديج افتهمتي

بلعت ريگي وهزيت راسي

:: هسه ابدل واخذه ونطلع وشيريد اشتريله وانتي ديري بالج على امج

رجعت وجهي فالت وكعدت بالصاله شافتني ام احسان سالتني // ها عمج شرب گهوته

= اي وراح ياخذ علووش ويروح يشتريله

ام احسان // شيشتريله

= يريد لفة لان هو من امس ما ماكل وردت اني اروح اجيبله بس عمو ما قبل

-ليش ؟

= كال هو يطلع هو ويا وياخذه يوكله ويرجعون

ام احسان تحجي ويه امي // الله ينطي هذا حماج من يوم الحادثه الهل اليوم ما عافكم

امي اكتفت تهز راسها وام احسان استرسلت // شنو هو ما يشتغل

امي جاوبتها //. ما ادري

اي دادا اعرف ما الج اي تواصل وياهم

جاوبتها = اليوم سالته شنو يشتغل گلي يسوق المحصول والهسه ما اعرف شنو يعني يسوق المحصول

ام احسان // الله يرزقه

  ام احسان // حتى هو اول امس جابلنه الثواب (رفعت اديها ) ان شاالله ثواب الواصل اني اتفاجآت من اجه لان اني

فتحتله الباب استغربت ليش ما جابته وجد

= خاله مه قبل حتى لو تشوفين البارحه من رحت جبت اللفات وعرف بيه اني الي مشتريتهن اتصوري غص

ولو تشوفين هسه من گتله علووش يريد لفه بركر وراح اجيبله خزرني خزره متت من الخوف

ام احسان // يايا شدعوه

امي بهدوء //. مو همه عدهم عيب ما يصير بنيه شابه تطلع وتروح تشتري

من اشوف امي منتبهه الكلامنا او اتعقب افرح رغم الحزن الي صابنه ام احسان سالتني

- شراح اتطبخون اليوم ( باوعت الامي ) نجاة ما مشتهيه شي اسوي الج

امي هزت راسها بالنفي وگفت ام احسان // تعالي وياي للمطبخ وجد خلي اشوف شطبخ الكم

= خاله مو اول امس عمه ام كرار وخاله شيماء طبخن النه مرك اصناف وخلنه بالمجمده وگللي يوميه طلعي وحمي

ام احسان // وليش كل هذا اني يوميه اجي واطبخ

=. يكولن انتو ما قصرتو

- - لا تحجوون هالشكل احنه اهل واني ما سويت اله الواجب زين لعد اطبخ تمن روحي نكعي طاستين واله اگلج

طاسه ونص انتو محد ياكل

رحت للمطبخ وخاله ام احسان تحاجيني // اخسلي زين ومو يتبده منج بالسنك 

رحت اغسل التمن وخاله ام احسان تسولف على امي وتصبر بيها وامي ساكته لمن ما اندك الباب ورحت اشوف

منو فتحته اجه عمو هو وعلووش وعمو نزل بيده علاكه كلي

:: هاج اخذي

= شنو ؟

:: اخذي العلاكه بيها خضره وبرتقال وجبتلج لفه الج

= شكرا بس اني شبعانه

:: بعد شويه اكليها والبرتقال اريدج تعصرينه العلاوي تعرفين يو لا

هزيت راسي = اعرف

:: عدكم عصاره ؟

= اي عمو يدويه

:: تمام اعصريله كلاص وخليله فوكه ثلجه خلي ايشربه

= اي

درت اريد ادخل للصاله حاچاني :: وجدان

درت = ها عمو

= عمو من يندك الباب لا راسا اتفتحينه

باوعتله مستغربه = ليش ؟

هز راسه :: احسن يجوز رجال يجوز واحد من اصدقاء اخوتج بالاول اسالي منو. وتالي صيري وره الباب وافتحي مفهوم

هزيت راسي وحييل ضجت من تدخل عمو بكل شي واتمنيت ما يبقى بعدين فكرت اذا راح منو يبقى يمنه منو يروح ويشوف هشام منو ياخذ علي للطبيب ويشيله ويوكله ويدير باله والاهم من كل هذا امي امي من يحچي وياها شويه تهدأ

اذا راح ما نعرف شلون نتصرف

الفصل الثالث عشر من هنا 

شكرا لزيارتكم عالم روايات سكيرهوم