رواية قصة وجدان الفصل الثالث عشر 13 بقلم انين الليل

اغلب القراء الكرام ايكلولي لو تختصرين الاحداث كله تحجيين عن نجاة او وضعها او وجدان واكلو وشربو صحيح

طولت بالسرد لكن لازم اذكر الوقائع وابين احوالهم داخل البيت حتى القارى الكريم ما يتفاجى بالاحداث وتكون

عنده صوره واضحه ويربط ما بين باقي الاحداث مرات كلمه تنكال محد منتبه الها تغير مجرى القصه بااكملها

من البدايه انا كلت انو هي قصه واقعيه ما بيها لا رتوش ولا مجاملات قصه تحدث بالعائله العراقيه الاصيله

اذا كانت القصه ممله او ما حبيتوها ف انا على استعداد ان اوقفها والرأي الاول والاخير الكم

   اشوف اذا اختصر اظلم القصه واكيد المفاجآت بالبارتات القادمه

تحياتي 😘🌷😘

/////...////...///

دخلت للمطبخ بعد ان سالتني ام احسان // منو اجه

:: عمو هو وعلووش

رحت للمطبخ خليت العلاليك على الطاوله واخذت البرتقال وصرت اعصر وخليته بكلاص بعدها كلت خلي

اسوي العمو كلاص رغم اني ضجت من كلامه. وتدخله بتصرفاتي خليت ثلج على العصير واخذته الهم لكيت

علووش متمدد وعمو كاعد ع القنفه شبه متمدد باوعلي واخذ الصينيه بعد ان شاف كلاصين كلي :: شكرا

ما جاوبته رجعت للصاله دخلت وهو وراي مباشره هواتحمحم وكال :: ياالله

شفته هو وعلووش الي كان بيده الكلاص وام احسان كالت // اتفضل عيني

:: السلام عليكم

- عليكم السلام هلا بيك دادا

باوع الامي الي مدنكه ورد باوع بتساؤل الام احسان الي لملمت حلكها وهزت راسها علووش

راح يم امي وهو ايكللها

(. ) م اما ما ررااح ااشرب العص ير اله انتي تش رب ين

باوعتله وجاوبت بحزن // حبيبي انته اشربه

هز راسه وغمض عيونه ( ) لا ما اااشرب

ام احسان متفاجئه لان علي ايقطع بالكلام لكن اني هزيت راسي

ام احسان // نجاة اخذي من علاوي شوفي مكسور خاطره ومقهور

عمو گلي :: روحي جيبي لفة علاوي ولفه الامج

استغربت كلامه على اساس جايبلي بس لفه الي فتحت العلاكه شفتها مليانه لفات معلاك وبركر وگص عرفت

علي ما ماكل بره وهو سائله امي شتحب واني شنو احب اكل خليت تلث لفات اثنين معلاك على اعتبار وحده الخاله

ام احسان وخليت وحده بركر وخليت قوطية عصير الام احسان لان اتعاجز اعصر وجبت الصينيه

علي (. ) ياالله م اما اك لي ال خخاط ري

ما جاوبته اخذت لفه وعمو طلع وانا كلت الام احسان = خاله هاي اللفه الج

ابتسمت // لا خاله هس توني متريكه

علي //. خخخاله هاي الل فه الج عم و ججابها لان ه(. ) سساالني شنو تحب ون تا كلون

ام احسان //. لعد وهو احنه ناكول وهو يبقى عيب

جاوبت = بقن لفات بالعلاكه

ام احسان // فوتي ودي العمج

رحت شفت بالعلاكه اربع لفات گص عرفت هو يحب لفات الكص ما عرفت شكد اخذله هنه اربعه بعدها اخذتله تلاثه

وقوطية عصير ورحت اخذتهن اله سمعته ايخابر بالتلفون ما عرفت شنو

ان شاالله اجي العصر (فيمالله ) في امان الله

دخلت خليت الصينيه ع الطبله هو باوعلها وصار يلم بحلكه درت اريد اروح سمعت صوته :: اوكفي بابا

درت = ها عمو

:: شنو ذن

= اللفات البقن

:: ها وانتي

= خليتلي لفه

:: تعاي اخذيهن انا ما اشتهي علاوي كلي تحبين الكص

= حتى اني ما اشتهي وحتى لو احب الگص ليش جايب هالكثر

:: ضميهن وبعدين من تجوعين طلعيهن وحميهن واكليهن

= كافي عليه وحده انت اكلهن عافيات

:: حبيبتي من اشتهي ادور سويج السياره واروح اكل اخذيهن بابا

=والعصير

:: خلي هسه اشربه امج اكلت

= اي جاي تاكول

:: ياالله الحمد لله انتي هم روحي اكلي

ابتسمت وهزيت راسي شلت الصينيه وصلت للباب سالته = عمو

:: ها عمو

= انت ليش هلگد تشرب جكاير

ابتسم وكف واتقرب مني :: ههه لا تگولين تشرب كولي اتدخن

= اسفه ليش هلكد تدخن

:: من انا زغير وبعد ما اكدر اعوفها

= بس مو زين على صحتك

:: ادري بس ما اگدر اعوفها

= لازم تفكر اتعوفها على مود صحتك

ابتسم وهز راسه

رجعت للصاله وسالتني ام احسان // ها عمج اكل

هزيت راسي = دا يكول ما يشتهي

اباوع الامي نص اللفه بالصينيه وعلووش جاي ياكل رحت للمطبخ وطلعت لفتي وعصير وكعدت اكل واشرب عصير

لمن ما اجت ام احسان // ياالله خلي اطبخ التمن ‎

=المن خاله اشو شبعنا

- مي خالف نطبخ شويه خاف عمج يجوع ويريد يتغدا يجوز احد يجيكم

گامت ام احسان تطبخ التمن وتعلمني ع مقدار المي الي اخلي للگدر وانتظره الى ان يشرب الماي مالته وبعدها اهدره

سالتني ام احسان // علاوي جاي دا يقطع بالكلام

= اي اخذه عمو للطبيب وكال متعرض الصدمه بمرور. الوقت راح يطيب بس لازم انبعده عن التوتر

اتقربت مني وكالت // الله يكون بعونج شتردين تتحملين

ما جاوبتها لان بهاي الفتره هوااي سمعت كلام ولان ما عندي رد ولان فعلا اني بهالوقت بدوامه بعيده عن التفكير

اباوع الامي الي احس بيها اتقربت من الجنون وعلي الي مصدووم وكلامه قليل واذا اتكلم فيكون يتأتأ وهشام

هشام الي ما اعرف شنو اخباره وشلون راح يتجاوز الي صار ويا

وهواي امور لازم افكر بيها لكن جاي ابعد نفسي عن التفكير لان اخاف واخاف هوااي وشي يراودني مخوفني هوااي

مثل احساسي بيوم حادثة رامي وهشام

هدرت ام احسان التمن وكلتلي انظف الخضره وسالتني // تعرفين اتغسلينها

هزيت راسي هي كالت // نكعيها بمي وشويه خل واذا ماكو خليها بمي وملح

طلعت راحت يم امي وبعدها سمعتها تحاجيني // تعالي خاله وجدان سدي الباب ورايه

طلعت وراها وحاجيتها = خاله ليش ما تبقين

- لا حبيبتي منار ابحدها

= سلميلي عليها

= يوصل اي شي تحتاجينه رمشي عليه

- منين ارمش

= اووو نسيت عبالي عندج او عند امج تلفون (اتحسرت ) استغفر الله ياربي

من وصلت الباب البيت دارت عليه وكلتلي // ديري بالج على امج صدكليش ما تاخذين نقال هشام وتستخدمينه

‏بقيت ساكته ما جاوبتها هي ردت عليه // هاي شبيج وجد شنو مخرسه

‏ابتسمت بوجهي لزمتني من وجهي // حبيبتي لا تبقيين ساكته مو زين عليج

حسيت على دموعي وهنه ينزلن هيه حضنتني وكالت // الله يساعدج بس انتي لازم تصيرين قويه

هزيت راسي وجاوبتها =. ان شاالله

تستمر القصة أدناه

راحت ام احسان وعمو طلع للحمام وشافني اريد ادخل للبيت سالني :: راحت ام احسان

هزيت راسي يعني اي

:: ليش ما عطلتيها للغدا

- ما قبلت

اتقرب سالني :: ليش باچيه ؟

وكأنما يگلي ابچي صرت اشهك وابچي بصوت مسموع هو اتنفس بعمق وغمض عيونه ودار وجهه وهو يگلي

:: اسكتي بابا وروحي غسلي وجهج وابقي يم امج

رحت شفت امي متمدده بالصاله ع الكاع وباوعت للغرفه شفت علي يلعب بلي اتقربت من امي حاچيتها

= ماما اذن گومي اتوضي وصلي

سمعت ردها //. اي

رحت اتوضييت وصليت بالصاله وانا اشوف امي متمدده ع الگاع كملت صلاتي واتقربت منها

= ماما كومي صلي

دارت عليه وانا اشوف عيونها حمر من گد البچي حاچيتها = ماما گومي صلي واقري قرآن وابچي واشكي الرب العالمين

بالگوه داريت دموعي عنها هي خلت اديها بالگاع وگامت بتعب راحت للغرفه وغابت رحت وراها شفتها اتصلي

طلعت للديوان البراني دگيت الباب سمعت صوت عمي :: فوتي بابا

= عمو اصبلك غدا

:: شنو غداج

= مركة باميه وتمن

:: خليلي شويه مركه وياها خبزه

= بس ؟

هز راسه :: اي بس ليش

= يعني مااصبلك تمن

:: لا جيبيلي خبزه حميها زين بالفرن

رحت صبيتله. بصحن مرگه وحميت الخبزه وخليت خضره وخاشوگه وصلت يمه هو اخذ الصينيه باوعلي

:: انتي اتغديتي

هزيت راسي = لا بعدني

:: وامج

= تصلي واكيد ما راح تتغدا

:: وعلاوي

= يلعب بلي ومن يجوع راح ايكلي

:: خوش روحي جيبي صحن تمن وخاشوكه

هزيت راسي ورحت واحچي ويه نفسي = مو توه يكول جيبيلي بس مركه وخبزه اشو هسهيريد صحن تمن

جبت صحن التمن هو اخذه مني درت اريد اروح كلي :: اوكفي

جاوبته بملل = هاا عمو

:: على كيفج شبيج تعالي اتغدي

صدك استحييت لان جاوبته هالشكل هو استردف :: تعالي اكلي انتي جاي اتعبين ولازم تاكلين

= مو هسه اكلت لفه

:: من يمته تعاي اتغدي وياي حتى انا ما اشتهي

شال الصينيه خلاها ع الطبله ::يالله اتغدي

صرت اكل وهو يخلي اللحمه كدامي

يباوعلي وانا اكل ولان هو ما صار ياكل اني هماتين بطلت سالني

:: ليش ما تاكلين

= الحمد لله شبعت

:: يعني لو باقي اكل اكيد هم تبقيين تاكلين

ابتسمت هو رد عليه :: اكلي بابا انا بسرعه اجوع وبسرعه اشبع

= يعني شلون عمو

جر نفس :: يعني مرات اتريك او اتغدا يمكن ساعه اجوع واكل اي شي ف اشبع

= بس انت اليوم حتى بالريوك ما اكلت وحتى هسه الخبزه بقت نصها

اخذ من الباكيت جكاره وصار يدخن :: اليوم انا ما اشتهي انتي اتغدي

هزيت راسي = لا اصلا اني شبعانه اكلت لفه

:: زين چا روحي جيبيلي چاي

= بكوب مو ؟

ابتسم :: بكوب

رحت خليت ماي بالغلايه ورجعت اشوف علاوي لگيته يلعب سالته = حبيبي اجيبلك غدا

هو هز راسه بالنفي

= زين لعد بس تجوع گلي

ما رد عليه عفته ورحت خدرت چاي واخذت العمو كوب دخلت شفته متمدد ع الزوليه ويدخن

= عمو شكد تدخن

:: جيبي الجاي

اخذه من عندي واشوفه ضايج سالته = عمو ليش ضايج اكو شي

:: لا ما ضايج بس ماالي خلك تعبان

= من شنو ؟

نفخ الدخان :: ما اعرف يمكن فلاونزا بعظامي

= زين لعد رووح للطبيب

هز راسه :: اي هو هم هالشكل هسه بس اكمل الجاي ابدل وارووح للطبيب وانتي سدي البيبان زين

= يابيبان ؟

:: الحوش والصاله

بقيت واكفه صار يشرب بالجاي من كمل انطاني الكوب اخذته وطلعت بقيت بالحديقه عجبني ارشها فتحت الماي

وصرت ارش بيها لمن ما عمو طلع يريد يركب سيارته گلي

:: فوتي ادخلي لصاله ومن اطلع اطلعي سدي الباب وراي

= خو ابقى اهنا ومن تطلع اسد الباب وراك

:: ها ؟

= اي

هز ايده :: فوتي ادخلي ومن احچي كلمه لاتردينها عليه وتجادلين

صدك انقهرت هذا شبي توه شلوناته ويكلي دا تعبين اكلي وهسه يعيط عليه ولا تجادلين شبي يريد يتحكم بينه

رحت دخلت للديوان واني غاديه ناار هو طلع وطبك الباب ورا حييل

يعني بعد ماكو حاجه اسد الباب باوعت المكانه شفته شايل المخده ومخليها على فراش النوم الي مصفطه بترتيب

ومخلي على صفحه

رجعت للصاله كعدت الكم تتصورون الملل والوحاشه الي اني عايشتها

رحت يم علاوي اتمددت على چربايته وكعدت على صوت الجرس طلعت المفاتيح وبعيوني النعاس فتحت باب الصاله

وصلت الباب الشارع = منو ؟

- - اني حبيبتي ام كرار

فتحت الباب شفت خاله ام كرار وهي لازمه بيبي هديه وياها بنتها (هدى ) وهاي بيبي سولفتلي انو عمو كريم

راد يسميها على اسمها هديه ) بس زوجته

ما قبلت فسماها هدى هي اكبر مني بوستني وراها شفت عمو كريم وعمو عاصف وابن كريم كرار

سلمو ودخلو للديوان البراني وام كرار سالتني // وين امج

= بالغرفه

اني رايحه يمها بين ما تسوين چاي

راحت ويمكن خمس دقايق اندك باب الصاله رحت فتحته شفت عمو عاصف وهو يكلي

:: البسي حجابج وصيري على صفحه

باوعت النفسي اووف نمت ومن اندك الباب گعدت مفزوعه ونسيت اخلي الشال على راسي

رحت للغرفه واني اسمع عمو عاصف وصوت كريم وهو يسلم على امي

طلعت لكيت امي لابسه شالها وعباية الراس واگفه وسالتهم

ها هسه نروح للمحامي نشوفه

كريم //. ام هشام هاي جيتنا من المحامي

ايي

هشام ما قبل

شنو

ما يريد يشوفنه

مو بكيفه انا امه وغصبا علي يقبل اواجهه

كان عاصف كاعد وهو يحرك رجله وينفخ وامي صارت تضرب على وجهها ام كرار لازمتها وتكللها // استهدي باالله نجاة

وامي تحجي // ولج ما يريد ايواجهني وهمه ساكتين ايكولون شنسويله

كريم // مو هيج الحچي ام هشام اهدي وخلينه نحچي

جاوبتهم بعصبيه // شتحجوون ها شتحچوون

كريم // اسمعيني ام هشام ابنج مو قاصر اذا ما قبل بالمواجهه اكبر واحد ما يجبره

تحرك بايدها // انا ما اعرف هذا الحجي انا هسه رايحه اعترف واكوول انا الكتلت ابني وهشام راد يسترني وسلم نفسه

وشاال الجريمه عني

بيبي هديه //هو هذا شلون حچي نجاة على كيفج خلي نفتهم

امي بعصبيه // ما عليكم بيه سمعتو ما عليكم بيه الولد ابني اذا صار بي شي من فكري

وراحت تمشي عمو عاصف وكف اكبالها وگللها بصوت حازم

:: نجاة اوگفي

    امي يمكن جمدت بمكانها اتقرب منها وگللها وكأن الكلام موجه للكل

:: اسمعيني كلش زين نجاة هشام مو بس ابنج لا ابنه ومو هين علينه ينسجن رادت تحجي هو رد

:: اسمعي خلي ينسجن وينعدم ولا وحده من نسوانه توصل مركز شرطه وتكول انا كتلت ابني ويصير القال والقلت

شنو الكدامج مو زلم ما معبين عينج

امي رادت تحجي هو رفع ايده يعني اسكتي

:: شوفي نجاة ابنج معترف على نفسه ومعترف اعترافات خطيره خلي نفكر ونلملم الموضوع

امي باوعت العمي الي كال :: هسه ترحين ويانه للمحامي وتشوفين ابنج واعترافاته ( هز ايده ) والله ما ادري شكول 

امي // اي هسه نروح

لملم حلگه وكال :: بنيتي اخذج بس لا ( هز راسه ويحرك بايده ). لا ابقي اهنا

  امي بانكسار // يا ليش ليش ما اروح

:: هالشكل وبهاي تصرفاتج وانا كتلت ابني وهشام راد يستر عليه وتصرخين وتلطميين ما ترهم

  بيبي // عمه حموينج مو هينه عليهم هالشكل تحچيين ما تشوفين عاصف عايف كل شي ورا وكاعد اهنا يريد يحصل نتيجه

عمو نفخ الدخان وكال الامي :: ترحين ويانه ونسمع المحامي شيگول بلكي نلكى حل وانتي تسمعين واحنه نحجي

واذا هالشكل تتصرفين تصرخين وتملخين روحج ابقي اهنا ملخي والطمي حد ما تموتين وهم بدون نتيجه ذاك اليوم

يم المحامي صرتي تحجيين ما تدرين بنفسج

امي كعدت بالكاع وصارت تبچي بحركه اجيت يمها وحضنتها وصرت ابجي وياها بيبي صارت تنعى وعمه ام كرار

تبجي لكن الي عجبني انو عمو عاصف راد يخفي دموعه لكن ما گدر اجتني ام كرار وكالت

= كومي خاله كومي خلي امج تغسل وجهه وتروح ويه عمامج

گمت وعمامي طلعو بالطارمه وام كرار كومت امي واخذتها غسلت وجهها وگالت الها //عدلي شالج نجاة

امي عدلت شالها الاسود ولبست عباتها وطلعت وسط دعاء بيبي الها الله يبرد گلبها

اندك الباب وطلعت ام كرار بعدها سمعنا صوت ام احسان الي دخلت وسلمت // السلام عليكم

وراحت يم بيبي دنگت عليها باستها وهي اتكللها // شلونج حجيه

بيبي // هلا بيج خاله

ام احسان // شلون صحتج

- - والله يايمه الصحه مو هلكد ولو ما مصيبة نجاة ما اجيت

- - - خير خاله خو ما هشام بي شي

هزت راسها // ياهو شايفه شمدرينه

- - لعد شكو وين راحت نجاة

ام كرار //. راحت للمحامي

بيبي //. مر علينه عاصف واخذ ابو كرار وراحو وانوب رجعو علينه وجابونه نبقى يم هالمسكينه هي واخوها

ام احسان // الله كريم خاله ان شاالله شده وتزول

رفعت ايدها //ان شاالله الله يسمع من حلگج

‏

جابت هدى الجاي وقدمته البيبي وام احسان وامها وصارن يسولفن عن قضية هشام وكل وحده تنطي رأي

واتشعب الحديث الى احاديث جانبيه انجابت بي سيرة بيت جدي اهل امي وخالاتي وليش ما يجن لاهنه ولا خوالي

حتى ما كلفو نفسهم يسالون عن امي لو بالتلفون حتى ام احسان كالت

- - تره نجاة اعصابها منهاره وخلف الله على حماها باقي يمهم

بيبي //. الله كريم الله يباوع الها ويبرد گلبها

- - آميين بس خاله شدعوه عليهم اهلها ميسالون ولا كانه بتهم

بيبي //. يمه كلمن ملتهي بنفسه نجاة الها الله والله يطول عمر عاصف ويخلي

- اي والله ولا مقصر منهم

المغرب راحت ام احسان وكالت بالليل اجي واشوف نجاة رغم خاله ام كرار لزمت بيها ع العشا

امي وعمامي غابو اكثر من ساعتين ورجعو واجت امي ويه عمامي سلمو وهي گعدت بمكانها بالكاع

سالتهم بيبي // ها بشرو

عمي كريم // باجر عاصف يحاول ايحصله مواجهه

- - ها خوش

- - اي واعدو

منو

- - صديق اله

- والمحامي شكال

- - الرجال يمشي حسب القانون

ام كرار //. شلون يعني

- - يعني الولد معترف على نفسه وهواي شغلات كايل والمحامي ما اله بس شهادة الشهود

بيبي // اي خووش

- - هي خووش بس هو يگول حتى الشهود يچذبون

بيبي //. ياا هذا اتخبل هالشكل يحجي

كريم // اي يمه وعاصف عنده خبر من امس وصار يروح ويرجع بلكي ايحصله مواجهه

- - الله كريم يمه

- - راح اروح يم عاصف

ام كرار //. وينه كرار

- - راح يجيب عشا ويجي

بيبي // هو منو اليشتهي

باوعتلي //. بيبي شوفي امج شتسوي

رحت شفتها تصلي رجعت گتلها =. بيبي جاي اتصلي

رفعت ايدها // الله يعينها

ام كرار //. عمه الي معجبني اهلها النجاة وعيالها شمسويه الهم محد اجه ولا سأل

- - ليش مو عاصف ها لموجود تردينهم كلهم يجون ناس عدها اشغال ومسؤوليات

—. عمه واهلها

- - هم نفس الشي عمه اخواتها كلمن ابيتها واخوانها ملتهيين بعوايلهم

- - الهلدرجه الناس ما صار بكلبهم حنيه

- - كل واحد وظروفه

- - لا والله عمه ولو همه اهلج وحتى لو تزعلين عليه بس هذا اسمه گطع

بيبي سكتت وصارت تسبح بسبحتها وام كرار راحت للديوان وهدى كاعده ومبين عليها ضايجه لمن ما اندك الباب وراحت ام كرار فتحته واخذت العشا من ابنها الي دخل للديوان وجابتهن للمطبخ فتحتهن كان جايب كباب ولفتين بركر خلت بصينيه كباب وقواطي عصير واحذته للديوان ورجعت خلت الباقي بصينيه وكالت // جيبي العصير وتعالي

جبت العصير هي انطتني لفتين البركر وگالت // عاصف خابر كرار يجيبهن العلاوي

هزيت راسي واخذتهن اله شفته متمدد ع الجربايه حاچيته = اكعد حبيبي اتعشا عمو عاصف جابلك بركر

علاوي كعد انا ابتسمت بوجهه وسالته = تريد كباب

هو هز راسه وانطاني لفه. اخذتها ورحت سويتله لفة كباب ورجعت انطيتها اله سالني

(. ) وجد شب يييه ا امم ي

=ما بيها شي تبچي على هشام

ما رد عليه ورحت بيبي كالت //تعالي اكلي

اخذت صمونه وسويتها لفه بيبي كالت //. شنو بس هذا اكلج

= الحمد لله كافي

ام كرار // زين لعد روحي للمطبخ سوي جاي

خدرت الجاي وصبيته اخذت الهم الكوابه مالت الجاي من وصلت اريد ادك الباب سمعت عمي كريم يحچي

- - يعني حسب اعترافاته شنو الوضع

عاصف :: احاول بلكي اخلي المحامي اياجل الجلسه لبعد اربعينية رامي

تتصور يقبلون

:: المحامي كال يقبلون

كريم //. عاد بلكي يقنع ويغير اقواله

عاصف //. شيغير اقواله لو ما هذا صاحبي چان من يمته صادقو على كلامه وعرضو ع القاضي بس الله ينطي

يحاول اياجل الموضوع لان انا كل شي حچيتله وعرف هشام جاي ايعاقب نفسه لان كتل اخو

- تتصور عاصف صاحبك يسوي شي

:: اي كله بالقانون وصدكني لو ما ادري بهشام مو بقصده يكتل اخو انا فلا اتدخل بس هو خطيه انجبر يدافع عن نفسه

كريم // منو كلك

:: التقرير

- - يا تقرير

عاصف :: هواي امور استجدت ما نحجي بيها هسه اهم شي بلكي انحصلنه مواجهه امه تشوفه ويبرد كلبها

كريم //. بلكي

دكيت الباب وانطيتهم الجاي عمو ضاگه گلي :: بارد

راح اغيره كريم گال. // كومنه عاصف خلي نروح يم امي

دخلو وراي بعد ان كال كريم :: ياالله

بيبي // هلا بيكم يمه

السلام عليكم

عليكم السلام

ام كرار //. وين كرار

كريم //. طلع كال رايح يم ولد صديقه شويه ويجي

حميت الجاي وجبته الهم اخذو وعاصف سال :: ام كرار ام هشام اتعشت

ام كرار //. اخذت الصمونه فارغه واكلت منها شويه

بيبي //. وشجم دووب هذا بعده لا متحاكم وهيج بس ينحكم هاي شتسوي

ام كرار //وشلون يتحاكم بدون ما تشوفونه

بيبي //. صدك عمه غير تشوفونه تحجون علي

عاصف :: متاني تلفون من واحد عرف

كريم //. يسويلك شغل

عمو عاصف هز راسه :: اي يسويلي وهو الممنون وبعدين انا شطالب منه

بيبي //. اااخ يايمه وينك ياسعدي تعال وشوف الجرى

بقى كاعد وكريم يسولف ويه بيبي لمن ما رن التلفون وعمي جاوبه

:: الو هلا ابو منتظر

:: الله يسلمك

:: اي

:: اي

:: ممنون منك بيش الساعه امرلك

:: يمك گبل الهدعش

:: يمعود هذا كتل اخو واتخبل كتله بالغلط دفاع عن النفس ولان مات بايده صار يحچي بكيفه وذب التهمه علي اكو شهود

بس هو منطي اقوال كلها چذب

:: اگلك افلام من كالي المحامي اتعجبت وهاي امه مسكينه االله يكون بعونها

:: ان شاالله ما اتاخز ومره ثانيه مردودها الك بالافراح

:: فيماالله سلمنه

:: الله يسلمك

كريم رفع حواجبه // ها بشر

:: باچر بهدعش نروح نشوفه وبلكي نقنعه يغير اقواله 

بيبي //. الله يهدي ويسهل امره

طلعو يردون يرحون للديوان البراني بيبي سالتهم //. وين رايحيين

كريم //. للديوان

امي طلعت من الغرفه وحچت بصوت متعب // عاصف

وكفو اثنينهم هي بشهكه وكلام مكسور ودموعها تجري على خدها // بداعت كل عريز اخذني وياك اشوف هشام

وصارت تبجي // ا اخذني اشوفه راح اتخبل اذا ما اشوف ابني

باوعت البيبي // عمه كليله خلي ياخذني بداعة ولدج

الكل بقى ساكت هي اتقربت عليهم // عاصف خليني اروح اشوف ابني واذا عبالك احجي وافشلك اضربني بحذائك

عاصف وكف وهو يردد :: استغفر الله استغفر الله ام هشام انتي قدرج چبير لا تحچيين هالشكل

امي // عاصف انا بكل عمري ما طالبه منك شي هالمره طالبتك اريد اشوف ابني

بيبي وهي تمسح بدموعها // عمه اخذها وياك تره بس الله يعلم بالنار الي بگلبها

هز راسه :: ان شاالله بس الولد يرجعلي خبر نروح ونشوف هشام

كريم //. سمعتي ام هشام ترحيين ويانه انتي بس اكلي وارتاحي

-هزت ايدها //ارتاح (رفعت راسها ) الله كريم

طلعو وبيبي هديه اتاشر الامي // تعاي عمه تعاي اكعدي وسمي بالرحمن وعينج بعين الله

امي گعدت بنفس مكانها بيبي كالت الها // اكعدي على الفراش

امي اكتفت تهز راسها ودموعها سبقنها بيبي ردت // تره كل شي ما تحصلين بس عيونج يعمن وحيلج يروح

جاوبتها بكسره // مو بيدي عمه مو بيدي

رفعت ايدها بالدعاء// الله يطيج الصبر الله يساعدج يمه يانجاة ويكون بعونج

ام كرار // نجاة دادا لازم تصيرين قويه الخاطر بنيتج ووليدج

امي // الله كريم

وبيومها راحو بيت عمي كريم وبس بيبي بقت وهذا الشي ما انسا البيبي هديه هاي المره. الي بمجرد ما اشوفها احس بالامان

والي هي رغم مره كبيره وبنفس الوقت ثگيله يعني سمينه ونظرها على گدها ورغم ما كانت تجينه قبل من كان ابوي

موجود لكن ابد ما انسى وكفتها ويانه

وانا اشوف شلون من تشوف امي منهاره تصبر عليها وبعدين تصير تنعى وتبچي بصوت حنين

ثاني يوم بيبي كعدتني حتى اسوي ريوك العمي عاصف واني الي احب الراحه والنوم صرت بمجرد ما بيبي او اي احد

يامرني اسوي شي بسرعه انفذه واني ساكته كملت واخذتله الريوك لكيته كاعد وجايب صمون حار

ومن سالته = ليش ما دكيت باب الصاله وانطيتني ايا گلي :: كلت نايمين ما حبيت اكعدكم

مرات احس عمو انسان مثقف للغايه ومرات احسه انسان (بعيد كل البعد عن الثقافه ) ما يعرف بس يخزر

ويحچي كلام رغم هدوئه بس احسه كله اوامر

اتريك وبيبي اتريكت وطلبت مني الزم ايدها حتى تروح للديوان يم عمو ومن دخلت كلتله

شنو عمه اطي نفسك شويه مجال هاكثر تشرب جكاير

جاوبتها = بيبي لا تكولين تشرب گولي اتدخن

بيبي // هاي انتم الشباب هيج تحجون احنه على حچي گبل

باوعت العمي عاصف وابتسمت وهو هم ابتسم جاوبها :: شسوي عمه بعد من انا زغير الجكاره مافاركتني

- - اي ادري دووم اسمع عمك الله يرحمه يحجي عليك ويگلك بطل الجكاير وانت ما تبطل عاد انت جنت ولد

تستحي وما تعصاله كلمه بس بهاي

هز. راسه. وابتسم :: عمه الجكاره صاحبتها وصاحبتني اكلج تريدين جاي

هزت راسها // لا عمه شربت خاف انت تريد

باوعلي :: عمو جيبيلي استكان جاي

بيبي //. بنات هالوكت يتعاجزن ما يصبن باستكان كله باكوابه

جاوبتها = لا بيبي اعرف بيج انتي وعمو تشربون باستكان فمطلعتهن

بيبي // هسه عمج يشرب باستكان مو هذا الكوب

= اي مرات يعني من يريد ملحق

- - شنو شنو ملحق

:: هههههه روحي جيبيلي استكان جاي

بيبي // خطيه هالبنيه كل شي ما تدبر

:: اي عمه اشوفها

- - الله يعينها

صبيت الچاي وجبته سالني :: علاوي كعد

= لا بعده

:: البارحه نام

= اي عمو نام

هز راسه وصار يشرب بالجاي ويدخن رن تلفونه باوعله ورد

::هلا يمه اشلونج

::الحمد لله انا زين. وانتو

عكف وجهه :: حجيه شتحچين الوضع مو مال احد يعوفهم الولد ما نعرف شبي ما بي والمره الله يعينها

::يمه انتي تحجيين هالشكل المفروض ناس تجي وناس تروح

هز راسه ::يمه مثل ماحملت همكم وكل شي صار على راسي هم احمل هم بيت سعدي

::حجيه يا هو الهم المره مو بوعيها وطفل مصدوم وبنيه الله يعينها خلف الله على جيرانهم مره غريبه شايله

همهم وزايدتهم وناقصتهم وكريم ومرته هم ما مقصرين

:: يمه ادري بيج انتي عاقله وفاهمه ولازم وحده من البنات يجن وخلي مهدي لو واحد من ولده يجوون

   بقى يسمع وهو عاكف حواجبه وصار يحجي بعصبيه :: انتي تحچيين وتحكمين عليهم وغصبا عليهم يجون

  :: انا ما اجي منا لمن ما اشوف تالية الولد شني

  :: اوو حجيه احنه ابختج هااج هاي عمتي ام كريم

انطا البيبي الكالت اله // فك السماعه

اخذت بيبي النقال وفتح السبيكر // الو

- هلا ام كريم شلونج

- هلا بيج خيه حجيه انتي شلونج عاش منسمع صوتج

  - والله ياام كريم انا مالي لون من الصار ويلي هلي ويلي ضناي

   هزت راسها بيبي هديه // مي خالف ام بدر يااختي انتي الجبيره والفاهمه وهاي المصيبه مصيبتج

   - - ادري تره وروح الحجي وروح ذااك الراح مظلوم ما انام ليلي

  - - وشجم دووب هاي المره شويه واتسودن والولد الزغير مصدووم وهاي الفرخه محتاره لو ما جيرانهم

وعاصف الله يطي شايل همهم

- - هلتكولين عاصف يمهم بعد شبيدي عليهم تدرين بيه كلساع اطيحلي طيحه من وره القهر عفيه بيه مره وامشي

بيبي هديه // انا ادري بيج حجيه بس ذوله محسوبين عليكم ومصيبتهم چبيره

- - ادري ام كريم وهذا عاصف هالعايف بيته وشغله وكاعد يمهم

- - اي الله يطول عمره ما مقصر

- - وحتى يكلي كريم ومرته وشيماء هم مرت اعلينه وسولفتلي وانا تدرين بيه منا الضغط ومنا السكر بعد ما يحتاج اسولفلج

- - ادري الله يعينج بس اسمعيني ام بدر فروخ سعدي يصعدون للسما ينزلون للكاع يضلون فروخ ابنج واولادج مسؤولين عنهم

جاوبتها بحسره وعبره // ادري ام كريم

— چا خوش دامج تدرين الله وياج وديري بالج على روحج

- - الله وياج سلميلي

عمو عاصف اخذ الموبايل بعد ان سد السبيكر وگللها :: ها يمه

::اي شوفي اذا يجي مهدي انا اجي اشوفكم بس هالاسبوع لا يجي عدي شغل اريد اخلصه اسمعي يمه اي شي

تردينه تطلبينه من بهاء دوا طبيب اي شي انا خابرته وفهمته

:: الله يسلمج انتي بس ادعيلنه احنه نتوفق

::سالمه حجيه

باوعتله ام كريم // الله يوفقك يمه وينطيك على گد نيتك

:: مامسوي شي عمه هذا. واجبي

بقت بيبي گاعده يم عمو وانا اجيت للبيت المشكله الملل والفراغ الي احسه وفوك كل هذا خوف بداخلي ما يروح

طلعت المرك الي بالمجمده ونكعت تمن ورحت يم امي الي لكيتها كاعده بزاويه وخاله راسها فوك اديها اتقربت منها

= ماما

هي باوعت لي وما ردت حاجيتها = ماما حبيبتي كومي اطبخيلنه التمن تدرين اشتاقيت الطبخاتج

هي باوعتلي ودموعها بدت تنزل رديت عليها

= ماما الى متى هالشكل تبقيين اني وعلووش محتاجينج

لكن هي ما ردت عليه گمت ومسحت دموعي ورحت للمطبخ طبخت التمن مثل ما علمتني خاله ام احسان لان عرفت

امي بغير عالم ويمكن بعد مستحييل ترجع مثل قبل گعدت على الكرسي الي بالمطبخ وصرت ابچي

سمعت باب الصاله ينفتح وعمي يكول ::ياالله

عمي ايگلها ::ارتاحي عمه

-الله ينطيك العافيه ويوفقك

عمو عاصف ::وينج وجدان

ما جاوبته دخل للمطبخ شافني امسح بدموعي من شفته صرت ابچي واشهك اجه يمي گعد ع الارض ردت اكوم هو اشرلي

ابقه كاعده صار يحچي وياي :: ليش تبچيين

  = عمم و اام ي

::اعرف كل شي بس انتي لازم تصيرين قويه تره انتي هسه راعية هذا البيت وانتي هسه ام امج

باوعتله هو هز راسه :: اي مثل ما اكلج انتي المسؤوله عن امج واخوج تتذكرين ذاك اليوم من كتلج داومي شنو جاوبتيني

الوضع مو مال دوام فنج ليش هيج جاوبتيني لان انتي تدرين بنفسج انتي المسؤوله عن امج واخوج

وانا ياعمي ما امنعج تبچيين لا ابچي بس من ترتاحين امسحي دموعج وانكتي كل شي وكومي على حيلج

هسه راح اطلع يم حبوبتج وانتي اغسلي وجهج وجيبيلي استكان چاي بس سوي الي جديد مو تحمينه

مسحت دموعي وجاوبته = اساسا ما بقى

ابتسم وطلع وانا غسلت وجهي بالسنك وسويتله جاي صبيت استكانين واخذته البيبي واله شفته گاعد ع القنفه ويدخن

وبيبي لازمه سبحتها من شافتني ابتسمت انا خليت الچاي كدامها وقدمت الاستكان الثاني العمو هي كالت

- - ها شفت عاصف شلون هالبنيه كحيله من صبت الجاي مو بس الك والي هم

   :: اي عمه طالعه عليج

- - وامها عاصف نجاة چذب مره اتحملت بكدها بس هسه الله ايعينها

اتنفس بعمق ::الله ايعينها

درت اريد اروح للمطبخ بيبي سالتني //ها حبوبه وين رايحه

= بيبي اريد اكمل الغدا

عمو عاصف سالني ::تردين اروح اجيب مسواك

  = لا عمو كل شي موجود

بيبي //. على كيفج طلعي الجدوره وحمي الغدا

هزيت راسي = ان شاالله

بقيت بالمطبخ احمي بالغدا لمن ما صار وقت الصلا طلعت شفت بيبي تتوضا وما شفت عمو عاصف بعدها رحت للغرفه

لگيت علاوي كاعد ومشغل البلي ابتسمت بوجهه ورحت شفت امي لكيتها على نفس مدتها اتقربت وگتلها

= ماما صار وكت الصلا

هي دارت عليه ما حاچتني انا طلعت اتوضييت

 واجيت للغرفه يم علي وصليت من كملت گعدت يمه وانا اتذكر كلام عمي حاچيته

= شوف علاوي اليوم ثلاثاء وباجر اربعاء اسبوع الجاي ان شاالله تداوم بالمدرسه

هو باوعلي انا هزيت راسي =. ايي مثل ما سمعت اتداوم وهسه راح اصب غدا العمو وانت ويا تتغدا تره عيب يوميه

الرجال جاي وشايلك وماخذك يمه تاكول

بس اااني ما ( ) اريد

= حتى لو تگعد وتاكول لو لگمه وحده تجامله

شفته ضاج حاولت ابين انو اني ما مهتمه وفعلا من صبيت الغدا العمو حاجيته = ياالله علووش فوت اتغدا ويه عمو

واتغدينا اني وبيبي بعد ان رحت سالت امي الي اكتفت بان اشرتلي بايدها ما اريد وحاولت اكون طبيعيه لان فكرت

بكلام عمو ولگيته كلام صحيح

بيبي اتمددت واني اخذت استكان جاي العمو بالديوان هو الجكاره بحلكه وتقريبا متمدد عبالي نايم درت سمعت صوته

::جيبي

نزيت من كلامه جاوبته =. عبالي نايم

::لا گاعد

اخذ مني الجاي وگلي :: اذا عبالج نايم ليش ما شلتي الجكاره من حلكي

رفعت اكتافي بدون ما اجاوب بعدين سالته

=عمو

::ها عمو

= ليش هلگد تشرب جاي وتدخن جكاير

::متعلم

=بس مو زين عليك

::شيصير بيه مثلا

=يعني سامعه الجگاير مو زينه

::يمكن بس الجكاره من الواحد ياخذها يذب كل ضيمه بيها

= بس هي مو زينه

ابتسم اني اخذت الاستكان ومن ردت اطلع حاجيته رغم خايفه من ردة فعله

=عمو خليني اروح وياكم اشوف هشام

هز راسه واتنفس بعمق ورد عليه بهدوء :: مي خالف بس مو بهاي روحتنه

= ليش اني مشتاقتله

:: مو ماخذ امج حتى تشوفه ما يصير ترحن اثنينجن

= ليش عمو شكو بيها ؟

::هو شني ليش ما يقبلون لان هاي مو مواجهه رسميه بعدين نسيتي علاوي والطبيب كال يبتعد عن اي توتر

هزيت راسي هو اتنفس بعمق وكلي :: بابا لاتزعلين مني على روحتي الثانيه اخذج اتفقنا

هزيت راسي وطلعت هو كلي :: طفي الضوه

طفيت الضوه وسديت الباب ورحت للصاله شفت بيبي نايمه ورحت شفت امي متمدده على صفحتها دخلت للغرفه الثانيه

ونمت فزيت على دگة جرس الباب وبيبي تگلي //اگعدي روحي شوفي منو بالباب

فتحت عيوني اتثاوب سمعت الجرس گمت وانا منعسه واحچي ويه نفسي

= ليش عمو عاصف ما فتح الباب

باوعت للديوان لان شفت بابها مفتوح وسيارته ماكو عرفت هذا الي يدك الباب عمو عاصف وصلت ردت افتحه اتذكرت

كلامه سالت = منو ؟

اجاني صوت مره //افتحي انا

ما عرفت منو سالتها =منو انتي ؟

-خطار

كلامها قريبه الهجة عمو عاصف فتحت الباب شفتها عمتي سعاد وياها نفس الولد الي شفته بالمقبره واتعارك وياي

هي باوعتلي //. اشلونج عمه

= هلا عمه اشونج

هلا حبيبتي شلونج وباوستني//. ياهو عدكم ؟

= محد بس بيبي

- بيبي ياهي

- بيبي هديه

ابتسمت وباوعت على ابنها // چا ما تسلم مستحي من بت خالك هذا ابني غزوان

= اهلا

انتبهت ما لابسه شال على راسي رحت اركض قبلهم بيبي // اسم الله شبيج

ما جاوبتها خليت الشال على راسي وعمتي دخلت هي وابنها وسلمت على بيبي هديه وابنها هماتين وهو ايكلها // شلونج جده

هي ردت عليهم السلام بعد ان باوسوها ومن گعدو انا جبت الهم ماي ورحت للمطبخ خدرت چاي صبيته وجبته

وبيبي گالت // ما ادري خافنكم ما متغدين

   غزوان رد عليها // ياغدا هذا جده راح يصير دنيا ليل

سعاد باوعتله // لا يمه همه اهل بغداد يتغدون ويتعشون فايت وكت ( باوعت البيبي ) اكلج عمه چا وين نجاة

بيبي اتحسرت //. وين هالمسكينه بغرفتها

  هزت ايدها // شبيها مسكينه اليموت من فكر

روحه

حسيت بعمتي سعاد شكد حاقده وتكره امي بيبي ردت عليها // حكج ما شايفتها چا ما سولفتلج شيماء

سعاد //. ما شفتها بس هي مسولفه الامي

غزوان //. الله يساعدها

  - - اي والله جده لاتاكل ولا تنام مثل الناس من مات الولد وهي ما كعدت ولا نامت على فراش كله بالكاع

سعاد //. الله يساعدها الصار مو شويه

  - - لا مو شويه

- - وعاصف وين ؟

بيبي باوعتلي همه دارو عليه انا رفعت متوني بيبي ردت // شنو مو بالديوان

سعاد // ما ندري

بيبي // خاف عده شغل وراح يخلصه

  سعاد // عاصف شعده من شغل ابغداد شغله هناك بالناصريه وهلعايفه وكاعد اهنا

غزوان //. لا يمه خالي عاصف بكل مكان عده شغل

بيبي //. الله يرزقه تعبان

اندك جرس الباب اريد افوت افتحه غزوان كلي // انا رايح افتحه

طلع. وبيبي كالت // يجوز جارتهم ام احسان

سعاد // ها هاي الاجت باربعينية سعدي

- - اي هي الله يطيها ما عايفه نجاة

  - - اي صاحبتها من زمان

  - - لا حق الجوره

سمعت صوت عاصف وهو يكول :: ياالله

  بيبي ردت // فوت عمه

  :: السلام عليكم

سعاد وكفت وهي تكله // هلا خويه الله يساعدك

  :: يساعد بختج هلا شلونج ام غزوان

الله يسلمك

  :: امي والولد ؟

كلهم يسلمون عليك

::شعجب اجيتو ؟

سعاد // امي ظلت تحجي وكل ما تشوفني تتناكر وياي وهلجيت

بيبي // چا ليش ما تجيين مرت اخوج وبته وابنه

    سعاد // عمه ملتهيه بيتي وفروخي وزلمتي

  بيبي // مي خالف اليوم واليومين ما يعطلنج هالعاصف عايف شغله

   سعاد // وچم دووب على كولتج عاصف عايف شغله وبيته وملتهي

    - - چا شلون رايج تردينه يعوف العايله

   - - عمه همه هناك بدونه ما يدبرون شي

عاصف سال غزوان :: اي خالي شلونه شغلك خو ما شالع گلب امك

   ابتسم // لا خالي شبيه

  سعاد // اسم الله علي غزوان ما كو مثله مخول

  :: الله يحفظه يمته اجيتو

  غزوان // صار نص ساعه من وصلنه

بيبي // وين طلعت عمه

  :: شويه شغل يخصني

  - - ها بيها الخير

وكفت عمه سعاد //خلي اروح اشوف ام هشام

عاصف باوعلي :: شنو امج ما طلعت العمتج

   سعاد // خاف نايمه شنو انا خطار انا راعية بيت

وراحت عمتي وما نسمع بس صوت عمتي سعاد تنعى وتبجي تلقائيا وگعن دموعي وبيبي تباوعلي وصارت تحجي

سعاد // دنيا غروب كافي اسكتي ما يصلح

وطلعت عمتي وهي تلملم بحلگها وتهز بيدها // المره فاقده على ابنها

بيبي // مو كتلج

  - - ايي عمه صدك الله يساعدها هاي مثل العبرت ولد وخلت ولد

عمي عاصف ضرب على رجل غزوان :: كومنا خالي بالديوان نصلي ونروح نجيب عشا

رحنا اتوضينه وصلينه عمتي وبيبي بالصاله وانا يم علاوي ومن كملت حاجيته = ليش ما تطلع تسلم على عمتي

( ) مما اري ييد

طلعت للصاله وبيبي تسولف ويه عمه وتسالها عن ناس يمكن اقاربنا وعن احوالهم او ولدهم وعمتي تجاوبها اجيت گعدت

يمهن عمتي سالتني // شني اتداومين

بيبي ردت // لا وينها او وين الدوام

- - اي صدك على شوفتي للمره مو بحال احد

بعد تقريبا نص ساعه او اكثر اندك باب الصاله وسمعت عمتي تكول فوت خويه دخل عمي وهو جايب علاكه وكال العمتي

:: خلي عشا الي والغزوان والباقي الكم عود خابرت كريم يجي كلي عده شغل

وراحت عمتي للمطبخ وهي تكلي // تعاي دليني امواعينكم وين

رحت وياها ودليتها الصحون لان هنه بسله فوك السنك وخلت عمتي عشا اخذته الهم وكلتلي سوي چاي بعدها اجت خلت

عشا وشالته وسمعت عمي عاصف وهو يحچي :: وجدان صيحيلي علي خلي يجي يتعشى

رحت للغرفه وگتله = عمو رايدك

علي راسا راح بدون ما ايعقب يعني حسيت انو علي يرتاح العمي عاصف

واخذت عمتي الصينيه وخلتها يم بيبي وانا جبت صحن خليت الامي بي شيش كباب وطماطيه مشويه وبصينيه زغيره

خليت صمونه واخذته الها امي من شافته سالتني منو جابه للعشا

::عمو عاصف

  هي اخذت شويه من الصمونه - - اخذي الصحن جيبيلي بس كوب جاي

= ماما اكلي شويه كباب حتى لو بدون صمون

- - ما اشتهي

عرفت اذا ابقى الح عليها يمكن حتى الصمونه هم ما تاكلها اخذت الماعون ورجعته وعمتي كالت // ليش ؟

   = تريد جاي

بيبي // هذا اكلها صمونه وجاي تبقى عليهن اليوم كله

عمتي //الله يساعدها

رحت للمطبخ اكلت شويه وراها اجه علي كلي (. ) عمي يريد چاي

صبيت كوبين وانطيتهن العلي

عمتي كالت // كملي اكلج

= الحمد لله شبعت

شكلتي

= شبعت

وجاب عمي الصينيه وسعاد اتكله // ليش انت جبتها چا الگاعدين يمك شنو شغلهم

::مي خالف وين ام هشام

- بحجرتها

::اتعشت

اكلت شويه صمونه وجاي

::بس

اي بس

دخل للصاله وراح يم غرفة امي دك الباب بهدوء وهو يحچي

::ام هشام باچر الصبح ان شاالله نروح نواجه هشام

هي طلعت من باب الغرفه //صدك

::اي صدك الي اريده منج تشدين حيلج وتاكلين

هزت راسها //اي ان شاالله اسالها وجدان جاي اكل

اتنفس بعمق :: ان شاالله خير

باوعلي وگلي :: عمو انطيني فراش الابن عمتج

   = اي

رحت فووك نزلتله فراش من النضيده وناوشته العمي الي اخذه اما عمه سعاد فمن كملت الاكل هي وبيبي شالت الصينيه

واخذت جاي وراحت يمهم وبيبي كالت نزلي فراش العمتج وجيبي اهنانه يمي وفعلا رحت نزلت ونامت يم بيبي

الصبح سمعت عمه سعاد گعدت وصارت تسوي بالريوك گلت بيض وطلعت جبن وحمت صمون واخذته الهم

وبعدها اخذت البيبي

وصارن يتريكن وانا اخذت جبنه وصمونه وصرت اكل لمن ما اجه عمو عاصف جاب الصينيه وبيبي سالته

يمته ترحون

:: فد ساعه كريم يمرلي ونروح

وتاخذون وياكم نجاة

اتنفس بعمق :: لو بيدي ما اخذها بس شسوي

  بيبي // خليها تروح وياكم بلكت من تشوفه شويه تستقر ويبرد كلبها

  ::هي اتريكت

سعاد جاوبت // اي كوه اكلت الها نص بيضه تره المره اذا تظل على هذا الوضع ما تچادد

بيبي // ليش اكلك خلي تروح بلكي من تشوفه ويشوفها شويه ترتاح

  ::ان شاالله

- - وانت هم الله يساعدك عايف شغلك وكاعد اهنا

  :: جا شلون هاي العايله منو الهم

  بيبي // يمه عاصف فضلك ما ينسي

  :: الفضل لله عمه يبقون ولد سعدي ولدنا

رحت الامي وانا افكر واكول = عمو عاصف ابد ما جاينه اله مرتين من واحنه زغار ويعود الامي من بعيد

وما عافنه وخالاتي وخوالي ابد ما مرو ولا سالووما اعرف شنو السبب

هواي تساؤولات تطري على بالي اريد الها اجابه رغم الحاله الي احنه بيها

رحت الامي لكيتها متمدده كعدت يمها = ماما كاعده

دارت عليه ما جاوبتني حاچيتها = عمو عاصف يكول خلي تتحضر

جرت نفس // حاضره شعندي

= زين لعد امشي اكعدي بالديوان البره يم عمو وبيبي

غمضت عيونها وكأنما الكلام مو يمها

رحت للغرفه شفت علاوي بعده نايم رجعت كعدت بالصاله لمن ما سمعت جرس الباب اندك باوعت من الشباك شفت

عمو كريم اجه راسا رحت الامي وكتلها = ماما عمو كريم اجه

هي وكفت على حيلها ولبست عبايتها واخذت جنطه وطلعت امي حتى مشي ما صارت تكدر تمشي او انا هالشكل اتهيا الي

وكفت سلمت على بيبي وعمتي بيبي حاجتها

• يمه نجاة ما اوصيج

• الله كريم عمه

• اخذتيله مصرف

هزت راسها //اي واخذت كل فلوس الي طلبها المحامي

• وليش ؟

• بلكت من يشوف الفلوس ايطلعلي ابني مو كريم يگول عنه محامي شاطر وياما طلع ناس

• خوش يمه الله وياج ومثل ما وصيتج مو تحجيين وتتهورين عيب من عاصف

راحت للديوان واني طلعت وراها وحتى بيبي هم كالت السعاد تساعدها ودخلت للديوان سلمت بصوت ناصي وهي مدنكه

وهذا الشي من يوم الحادث ما شفت امي رفعت راسها او سولفت راحو وبيبي تدعيلهم الله يسهل طريقهم وتوصي باامي

• عمه ديري بالج لا تتهورين كل شي واله حل

كان فكري مشوش واحسب وافكر شنو راح تكله الهشام من تشوفه وشلون تتصرف

كنت خايفه عليها وهم خايفه من هشام وما اعرف شنو ردة فعلها من اتشوفه

يمكن التلث ساعات الي مرن عليه كانن اطول وقت مر بحياتي واندك الباب وراحت عمه سعاد فتحته اجت ام احسان

وسلمت على بيبي الي رحبت بيها وسعاد اتشكرت منها وهي ردت //. دادا ما سوينه شي حق الجار ع الجار

وبقيت منتظره وعيني ع الباب واحجي ويه نفسي =. ليش اتاخرو شنو السبب

يمكن ما اتاخرو بس اني اتهيا الي هذا الشي حسيت بالباب اندك راحت عمتي سعاد فتحته شفت عمو دخل بسيارته.

وامي نزلت وهي منهاره وتبجي ومن وصلت دخلت للصاله عاطت بكل قوه لان حابسه صرختها وتضرب

على وجهها وتگول //. ولك هشاام ما كفاك السويته ليش هالشكل هشام ليش شسويت بيه

لزمتها عمه سعاد وبيبي اتكلها //عمه على كيفج

صارت تلطم على وجهها وهي تگول //ابني راح مني الثاني هم اذا ما ينحكم اعدام هو يكتل روحه

ام احسان // استهدي بالرحمن نجاة مو هالشكل

اتقربت وهي تباوع ابصورة ابوي // قرة عينك سعدي حتى الثاني هم راح يموت

دخل عمو كريم ويا عمو عاصف الي صار يحجي بعصبيه :: بعد روحي للمطبخ وطلعي سجين واذبحي روحج

امي صفنت شويه وهي تلطم خدها // ولك رامي ولك شسويت بيه ضيعت روحك وضيعت هشام وهجمت بيتي

كريم // اسكتي ام هشام العصر نرجع للمحامي بس شويه اهدي

بيبي // غيرتفهمونه شصار ؟

عاصف باوع ام احسان لزمتها وتگلها // نجاة امشي للغرفه علاوي اخترع

عاصف بنفس عصبيته :: لا خليها بلكي علاوي يكتل نفسه يفتح الباب ويهج وهي ترتاح فد نوب

امي سكتت وعيونها غارن راحت للغرفه وهي تشهك وراحت وياها ام احسان ورجعت وهي تكول

- - الله يساعدها اذا تبقى هالشكل مو زين عليها

بيبي تسالهم // شصار وياكم شكال المحامي

عاصف نفخ وكريم ايباوع اله ::ما صار شي بعد

بيبي //شني ما صاير شي المره هل اجت مسودنه

كريم / الولد عنودي مصر على رايه (اشرلي ) روحي عمو اخذي الامج ماي بلكي تشرب الها شويه

اخذت الدولكه وگلاص ودا احس اكو كلام مايردوني اسمعه

وصلت يمها شفتها متمدده وايدها جوه راسها ودايره وجهها

=. هاج ماما اشربي شويه ماي

امي ما ردت اتقربت منها = ماما اكعدي

درتها شفتها فاتحه عيونها وطالع شي ابيض من حلگها

صرخت حييل

الكل اجه يركض عمي عاصف صاح على غزوان :: تعال شيلها خلي ناخذها للمستشفى