رواية ساقي الود الفصل الثاني عشر بقلم هاله ال هاشم
وليّش كل إحنا حزانى
لا يّشيل هموم كلبچ
يكفي بس انا حزيّن
يكفي أشيّل اهمومچ، هموم الشماته
، هموم وكتي ..
كّلهن بهَل رگبه ديّن
كاظم اسماعيل گاطع
.
غياث :: شنو رأيج اردّن قامتج و ترديلي گلبي ؟
- صفنت ثواني احاول احلل كلامه ، لحظة قامتي ، السلاح الي نطانياه عزيز ايام ما كنت ساكنة وحدي ، السلاح الي أَخذه المگو.... صحت رأساً :
عرفتك انتَ المگوار ، يمكن من اول لحظة شفت عيونك
همهم بصوت خافت و همس بنبرة واثقة :
غياث :: و هي عيوني تگدر تچذب عليج ؟
- انت منين تجيب هذا الكلام ، شاعر كاتب لو شنو ؟
غياث :: انه عاشك متاني يمتى محبوبه يحن عليه
- لازم اروح
غياث :: ما تجين ؟
- لا و القامة هدية مني الك
غياث :: اول الغيث گطرة
رديت بأستغراب :
- شنو العلاقة ؟
- سديته بوجهه و اني ما مقتنعة بالي گلته ، هنياله شكد هادئ و اني بصدري نيران مشتعلة ، عصبت من روحي و أَحس راسي حيطك ، گمت بللت ريگي و افرك بصفحة صدري حيل اكو شيء جواية ما مفهوم ، حرب طاحنة من المشاعر المتناقضة ، انجذاب و نفور ، مودة و بغض ، حُب و كراهية !
فاتت كفاية و لاحظت علامات الحنق على وَجهي ، تساءلت بفضول :
كفاية :: شبي وجهج ملبوك ، صاير شي ؟
هزيت راسي بعنف و همست
- لا يمعودة ، قابل شكو ؟
كفاية :: كلما اشوفن التلفون بيدج ينخمش صدري و اكولن وراج مصيبة
- ظالمتني والله ، هالمرة ماعندي مصايب ، بس احسّ انت و بابا ضامين عليه مصيبة
كفاية :: شلج غرض ، امشي وياي و انت ساكتة
- لعد شلون اعرف شحضر هدوم ، ادري وين راح نولي بغداد محافظات وين ؟
كفاية :: اللهم طولج يا روح ، رايحين لمزرعة ابوج بال****
- هممم بعيدة يعني ، عموماً هسه راح احضر غراضي بس ما گلتيلي احنا شوكت نروح؟
كفاية :: هاليومين ان شاء الله .
عافتني و طلعت بس احسها مو على بعضها و راودني بهذهِ اللحظة شعور سيء ، حسيت شي ثگيل چثم على صدري اختنكت ، رحت توضيت و صليت ركعتين ، ارتاحيت شوية بس بعده مرافقني شعور القلق،
لوقت متأخر من الليل ، اجونا خطار ،و الظاهر عدد مو قليل
صاحت عليه كفاية البس شي على راسي و انزل ،
سويت مثل ما رادت و نزلت ، لكيتها منتظرتني
كفاية :: حضري روحج تسلمين على عَمج حمدان و تحبين على ايده .
تساءلت بأستغراب :
- عمي حمدان ؟
كفاية :: اخونا الچبير ابو عكاب و شهاب ، و سلمي على ولده هم
چتفت ايديه و صحت :
- اعرف هاي اللمة مو خالية فهميني شصاير ؟
ضربت افخاذها بقلّة صبر و همست گازة على اسنونها
كفاية :: مهددين ابوج ، ارتاحيتي ؟
ارتبكت و تساءلت بخوف :
- شنو يعني مهددينه ، ليش بابا شمسوي ؟
كفاية :: ناس جليلة شرف و ناموس ، عداوات مالج غرض بيهن
اسمعيني خاف تشوفين عَمج وجهه ثگيل لا تشيلين بخاطرج منه
- ترا گُمت اخاف تسولفين شصاير لو اعوفج انتِ و اخوتج
و أَصعد انام ؟
صفكت ايديها بأسف و صاحت :
كفاية :: چا ربحنه و انتِ شايله تفكة بنص حليگج
لهناك و طلعوا الجماعة و الظاهر اقارب من بعيد ، ناس معگله من مختلف الاعمار ، لهناك صاحوا على كفاية دخلت يمهم
و سدت الباب و راها بقت فترة و طلعت بس من طلعت وجهها گلش مختنك و عيونها مبينه باچية ، سألتها شبيج
كفاية :: شبيه غَير انه مَرة ، ضعيفة و مكسورة جناح !
- كلامج يوجع ، شصاير فهميني
اخذت ايدي و جرتني بأتجاه الباب ، صحت منزعجة
ويين موديتني
كفاية :: شميصير جوه جابليهم بگوة عين ، لا تخافين و لا تتحرجين انتِ صاحبة حگ و هم المفروض يخافون منج .
هزيت راسي بعدم فهم ، همست بصوت خافت
- هسه غير افهم شكووو ؟
ماجاوبت دخلت و سحبتني وراها ، دخلت مرغمة تفاجئت وانحرجت، بتردد سَلمت و هم ردوا تحية السلام بتثاقل ونظرات عدائية ،
اشرتلي بعيونها تريدني عود اخذ ايدين عمي و ابوسها ، غلست وثولتها .
سافرت بعيوني نظرة خاطفة عليهم جان كاعد عمي اخو ابويه الكبير و الي يشبهة الى حدّ ما ، اسمر مربوع و عيونه وساع بجحوظ و ابنه الكبير الي عوزه بس يكوم يضربني راشدي من هلكد ما يباوعلي بحقد مدري ليش و شهاب الي منزل نظره للارض و بس ينافخ ،
انداريت شفت عيونه ترسل شرارات بأتجاهي ، باوعت لابويه مدنك و ساكت و كفاية ما شالت راسها ، بقلّة صبر صحت:
- تفضل عمو ؟
حمدان :: عمى العماج ، تعاي كعدي جدامي !
اتسعت عيوني مَصدومة ، بلا شعور صحت و اني أأشر لروحي:
- هاي اني تگلي هيج ؟
فتح عيونه بغضب لاهب ، و ابنه الكبير فَز من مكانه و تقدم بأتجاهي و كأنه يريد يضربني ، صاح ابويه بلهجة تحذير :
سليمان :: عگاب ! ديربالك تفكر تسويها .
تدخلت كفاية بنبرة متوسلة :
كفاية :: خوية ترى الفرخة مظلومة لا تصيرون انتم و الوكت عليها
تشكلت الدموع بعيني و بفضول قاتل صحت :
- هسه غير افتهم شكو ؟ مسوية شي آني و ما ادري
تضاحك عمي بسخرية و اعقب :
حمدان :: لا يا بوي ، كلشي ما مسويه انتِ بس رحتي گعدتي غاد ويه ابن خالج السگط و زورتي جنسيتج عودين نچرة وتاخذين بثار امج هَيج
- سقط فكي من الصدمة ، باوعت لابوية بعتب و لكفاية بخذلان
و بداخلي تأكدت باعوا سري ،
رديت باوعت لعمي الي دا يرمقني بنظرات توعد و شفت ماكو داعي للكذب و التسويف ، هتفت :
- و شبيه ما اخذ بثار امي ، ناقصني ايد لو رجل ؟
حمدان :: چبي و لا چلمة زايدة ، نسوان برعة و ما تخاف
- باوع لابوية بأستخفاف و هتف :
حمدان :: بالمبارك عليك يخوي ، تربات دلة و ديوان ، واكفة
و ترادد عمها و لا چنها مسوية فاينة بكد صماخها
سليمان :: الصار صار بعد و ما يفيد اللوم ، جبتك هنا تشوفلي دبرة ويه هذا السويفل عزيز موش تفتح بالدفاتر العتيجة .
-التفت شهاب لابوية و عيونه صايرة بنص گصتة من الاعصاب
شهاب :: و لمن الصار صار و ما ينفع اللوم ، ردت تعگلني بيها ليش ؟
فرقت شفايفي ردت اردحلة اله لكن سبقني ابويه و هو ينتفض من مكانه ، يصرخ و شرايين رگبته برزت :
گام شهاب وهو يتراجف طلع برا و اشتغل اللوم و العتب
والصراخ ما بين عمي حمدان و ابويه ، اما اني احس الكاع ما تشيلني من فرحتي و اني اشوف ابويه يدافعلي هيج
عكاب :: كلامك هذا ثجيل عمي و شهاب زلمة كلف ما مرجية منك هاي
حمدان :: عيفة بويه هذا اتفرعن علينا من يوم دش بشغيلته الغمة
صحت بأستغراب :: شنو قصدك؟
صرخ ابوية بنبرة هَزت اركان الغرفة :
سليمان :: حمداااان ، اخذ ابنك و امش منا گبل لا تصير موزينة و يكولون سليمان چتل اخية من تالي وكت
هز ايده عمي بسخرية و صاح :
حمدان :: چا لمن انت زلمة حوك هيج ، شعدك مودي عليه و على ولدي تا نطلعك من ورطتك هاي
سليمان :: حسبالي عندي اخو و عزوة اشد ظهري بيهم وكت العوز ،
- دك صدره عمي بعنف و هتف ::
حمدان :: عد عيناك يخوي ، موش لخاطر بنيتك ، لخاطرك انت ، وصية المرحوم ، بس چلامك ثچيل و هنت وليدي جدام النسوان
سليمان :: و حنا من شوكت نسوانا تنهان بنصنا و نسكت يبو عكاب ، يو ماشفت وليدك شلون تحجى حجي ماصخ
التفت لابنه شاوره يلحك اخوه ، و صاح :
حمدان :: عيفنه هساع من كلشي ، خلينا نفكر بسالفة الضابط
رد باوعلي و صاح :
حمدان :: و انتِ تعاي كعدي هنا و سولفيلي كلشي التعرفينة عن عزيز
تفاجئت بسؤاله ورديت بسؤال :
- عزيز ! ليش شعدكم وياه ؟
باوعت لابويه عيونه ضايعه عرفت عزيز هو المهدده ،
بس بشنو يهدده مثلاً
حمدان :: وين صفنتي مو جاي احاجيج ، - هااه ؟
حمدان :: استلم !
صفك ايديه بقلّة صبر
صحت ممتعضة من اسلوبه :
- ما اعرف عنه شيء غير الي تعرفونه ، ضابط برتبة نقيب بـال***** و ساكن ببغداد ويا امه و اخوانه الصغار و متنسب بالـ***
باوعلي مضيقْ عيونه ما مقتنع بكلامي
حمدان :: شنهي البينج و بينه يا بت وداد ؟
عگدت جبيني و همست :
- شنو البيني و بينه يعني ، ابن خالي و بس غير انه ساعدني بالجية لهنا
حك لحيته و تكلم بنبرة استجواب :
حمدان :: اهاا ، يعني لا عاشكج و لا عاشگته
سليمان :: حمدااان !
كفاية :: شسالفة يخوي كلنالك ما بيناتهم شي
حمدان :: اااي من هَيج مستقتل عليها تايزوجها و من رفض اخوج ينطيها راح ذباله مصيبه هالكدها براسه
عيوني تتنقل عليهم بضياع ، و هسه يلا بديت افهم السالفة ،
- الله يخليكم احجوا شصاير ، عزيز شمسوي ؟
سليمان :: عزيز ساومني عليج ، و من رفضت و انطيته المقسوم سوالي تهيمة و ورطني ويا جماعة ما يخافون الله
رحت وكفت گدامه و توسلته يوضح كلامه :
- بابا ، فهمني شنو شغلك ويا عزيز بالضبط و شلون گدر يدبرلك مكيدة اذا مو عنده عليك لزمة
همس عمي بتشفي :
حمدان :: عنده عليكم لزمات ، الله يلعن ذيج الساعة الجابلنه الحضرية مدري منين ما منين ماتت و ذبتج علينا !
التفتت اله بعصبية و بهاي اللحظة نسيت آني منو و هو شنو بالنسبة اليه ، بس اسم امي الي اهانه بهالشكل فجر دماغي صرخت بوجهه :
- احترم نفسك ، و لا تجيب طاريها بهالشكل
اشتعلن عيونه و فز من مكانه ، شال ايده و صفعني بقوة لدرجة وكعت عالارض !
صرخت كفاية و جتي گومتني ، اما ابويه مثل الي انصدم ما يعرف شنو يگول :
حمدان :: برعة و ما تنكحمين ، بسيطة خل تفض هالطلابه
وانه اعرف شلون اشكمج
- لازمه صفحة وجهي بحضن كفاية ما گدرت امنع دموعي ، ما مستوعبة اني انضربت منه و ببيت ابويه
كفاية :: حرام عليك ، يتيمة و مظلومه ، هسه جايين تلومونها
وين جنتم عنها كل هاي السنين ، هسه تفطنتوا عدكم عرض مطشر عد العالم و تردون تشكمونه
حمدان :: انتِ چبي و لا چلمة لو بيچ حظ چا ما كرطتي زلمتج يالفكر ، جايه تلوميني على سواية اخوج ، چا احنه كلناله يذب لحمه و يعتكف بروحه هنا
- باوعتله كفاية بأسف و تكلمت بأستقراف:
كفاية :: و أنت جاي تلومني على أمر رب العالمين ، الاخذ رجلي شهيد
راد يحجي قاطعة ابويه رأساً
سليمان :: حمدااان ، كافي عاد ، اغز الشر و توكل لدارك يخوي
انه لهنا حاط الدم و العمر البينه جدام عيوني لا تخليني اخسرك بساعة شيطان
باوعلنه بحقد ، همس
حمدان :: يجرالك يخوي ، انه طالع و ضل انت مجابلهن و تندب حظك خنشوف شلون راح تنحل هالورطة هاي .
سليمان :: الله وياك ، طريق السلامة يخوي
طلع وظلينا احنا الثلاثة واحد يباوع بوجه الثاني بضياع ، لملمت كسرتي و تركتهم اعتكفت بغرفتي و لأول مرة أَحس بهيج قهر على ابويه ، لا عنده مرة تونس غربته ، لا حتى ولد يشد ظهره بي ، انهانينا آني و اخته وانضربت گدام عيونه و هو عاجز يدافع علينا .
اخذت تلفوني بلا تفكير رحت ادور رقمه بقائمة المحضورين ، شلته و دَكيت عليه بقلبي العن بي و بالساعة السودة الوداني ابويه الهم ، رفع الخط بصوته المُستفز المغرور :
عزيز :: يا هَيل ؟
- يا سمّ بگلبك ، أَنت ما ناوي تستعدل و تصير آدمي ؟
عزيز :: هوووب عزيزتي ، أَحجي عدل لا اجي بنص بيتكم اربيج و انت تعرفيني أسويها بعدين ليش متعافية اكو وحدة يگلولها هيل و تزعل ؟
- اسمعني عزيز مفارغة لسخافاتك ، احجيلي شمسوي لبابا
عزيز :: اوي بابا ، هذا السؤال سأليه لابوج النص خيره بفضلي سواه ، هسه جاي يطلعني من مخططاته و يبعدني عنه و عنج لا والخلقج ما حزرتوا اخلي عاليها واطيها
واسحكم برجلي سحك ارد اشوف يا گو*** يطلعلكم
- شنو شغلك ويا ابويه عزيز ؟
عزيز :: ما يخصج ! بس انتِ يا حلوة تخصيني
- ابعد عني احسن الك ، اني اكرهك اموووت منك مستوعب الي اكوله
عزيز :: اكرهيني ، المهم اني احبج و اريدج و راح اخذج ، لچ ذني سوالفج عابرات عليه هواي الف كح*** و ساقطة عاشرت
مال تاخذين مصلحتج مني و تفلتين هيج تكونين غبية مو عزيز التضحك عليه زعطوطة مثلج.
- ما تگلي شنو المصلحة الاخذتها منك ، شنو الانجاز الحققته اني لحد الان ما اعرف راسي من رجليه
عزيز :: مو شغلي ، ساعدتج لو لا ، عرضت روحي للخطر
و زورت اوراقج لو لا ؟ صرفت دم گلبي علما ثبتج بمدرسة هاي المخبلة لووو لاا
عزيز :: بلا اسكتي و بلا مثاليات الظاهر نسيتي روحج ليش اجيتي لهنا و شنو جانت نيتج ، ضحكوا على عقلج الصغير بكلمتين و لا اخذتي حك و لا باطل
- ابعد عنا الله يخليك و لا تسوي شي تندم عليه بعدين ، هنا العشاير تحكم لا يعترفون برتبتك و لا بالقانون !
عزيز :: هو اني اريد اشوف العشاير التطلع وراج
- سديته بوجهه و رجعت حضرته ، واحد سافل و مستفز !
ليلتها مدري شلون نمنا ، گلوبنا مليانه هَم و كل واحد بينا انزوى بهمه لوحده ، حتى كفاية ما صعدتلي ولا حتى صاحت عليه ، جرحها اخوها جرح كبير و عَيرها بمصير مالها كل ذنب بي ،
كفاية مثال للمرأة الجنوبية الأصيلة ، الصابرة المحتسبة ، تكبدت عناء اليتم و تحملت لوعة إستشهاد الزوج ترملّت بمقتبل عمرها و فنت روحها لخدمة اخوها المريض و بهذهِ الفترة كانت نعم الصديقة الحنونة الداعمة ،
ضميت ايدي جوه راسي عالمخدة و دموعي ما وكفن مو لأن عمي الي شفته بعد كل هالسنين تلگاني بالقذف و الضرب بدل الاحضان و لا لأن شاهدت ضعف ابويه بالدفاع عني للمرة الثانية و لا حتى بسبب تهديد عزيز اليه ، ما بچيت حالي بكدما بچيت حال كفاية غمضت عيني حيل و راودتني امنية
ودعاء خالص بأن يكون الها فرصة و تلكه رجال يحبها
ويحميها ما جنت اظن بهاي اللحظة تتحقق كل الاماني الضالّة و تُستجاب الدعوات اللحوحة ، و لو ادري جنت راح اشمل نفسي وكل الاحبهم بدعائي و امنياتي .
ثاني يوم صَحينا على خبر طش بالولاية ، قتل مواطن اخوه تحت تأثير مخدر الكريستال بسبب خلاف بسيط و آخر قتل ابنة شقيقته بغير مكان ، بهاي الفترة سمعنا بهذا المخدر يغزو مدن الجنوب ، خصوصًا الكريستال اليدفع المتعاطين لـارتكاب أفعال خطرة من ضمنها استخدام السلاح.
ابويه ضل يلوب گدام التلفزيون ، شابك ايديه خلف ظهره و يروح ويجي يفكر بضياع ، راودني احساس غَريب معقولة يطلع يشتغل بالمخدرات ، معقولة عَزيز چان يساعدة بدخول البضاعة الي يسميها الحلوات ؟
ولكيتني بلا شعور اخنزر عليه و اتوعدله بشر بداخلي لو فعلاً يطلع تاجر مخدرات و تسبب بأزهاق كل هذهِ الارواح مَحسيت الا على صوته و نظرات الاستغراب الي تعلو محياه
سليمان :: لچ شعدج تتنوعيلي هيج چن چاتل اهلج
بعبوس و حواجب معقودة تساءلت :
- معقولة يعني ؟
سليمان :: و انت شبيج يا مرة حسرة سمعتينا انتنفس
وجيتينا تركضين عوزج بس تشكين زيجج
كفاية :: اندري بس اعوفنكم سويعة وحدة اجي الكاكم متكافشين من الروس
-هم يسولفون و آني اخوزر بي و دمي يغلي عليه
باوعلي مستغرب و صرخ :
سليمان :: وج شبيج راح تسودنيني و انتِ تفرين بعويناتج هذني
- متحملت اكتم بعد واجهته بشكوكي
بابا انت تشتغل بالمخدرات ؟
سقط فكه من الصدمه ، صاح :
- هاااع ؟
كفاية :: دَهر صابج كون ، منين جبتي هالسالفة الكشرة
- هي واضحة وضوح الشمس ، شنو الشي الي تحتاج عزيز يسهلّك دخوله ؟ و شنو هنّ الحلوات اذا مو مخدرات قابل نسوان !
يحجي وياي و فجأة كام يترنح يمنى يسرى الظاهر تخربط ، سندته كفاية و عيطت عليه حتى اروح اجيب الابر مالته من الثلاجه ، و هي اخذته لغرفته
امشي و ارزل بروحي هسه آني شگلت هو سؤال ، بعدين شدعوة عليه يدعي على ضروسي هيج
ناوشت الابرة لكفاية ، ضربته و مدد بفراشه ، بين الثانية
واللخ تخوزر بيه حتى تحسسني بالذنب ، طلعت هي
اني بقيت واكفة يمه أباوعله و أعصر بـچفوف ايديه ، اريد اعتذر او اخفف عنه وما اعرف ،
ماعرف شلون اتعامل وياه و شنو ممكن اكوله حتى الطف الجو ماجربت قبل اكون قريبة منه ويكون بيناتنا تعاطف و حنية .
سليمان :: راح تظلين موچفه هيج مثل زعير الليل ؟
گلب جسمه للصفحة الثانية بحيث ما اشوف وجهه ، صاح بصوت خافت
سليمان :: عليش اسفه بويه ، هن وحدة ثنين مالاتچ كلهن يدگن بالگلب
تجمع الدمع بعيني و بغصة جاوبت :
- و مالاتك هم ، لچمات ظلن بالگلب
سليمان :: تخلص المية سنة !
شفايفي ترجف ، اريد اصرخ عليه ، اعاتبه اتقاتل وياه ، اختزلت كل مشاعري بكلمة وحدة و ما ادري شلون طلعت مني
- اكرهك !
رد بسرعة بنبرة سخرية يدحض بيها ادعائي
سليمان :: اذا تكرهيني عَليش جيتي من شفتيني مريض ؟
صحت :
- ما اجيتك ، جبت الابرة و بس !
عفته و طلعت امسح دموعي بظهر اديه حتى لا تشوفني كفاية
ثاني يوم الصبح ، حسيت بحركة مو طبيعية بالبيت ، الكل مستنفر كفاية شادة راسها معصبة و خنجر و فخري ملازمين الديوانية و شفت شهاب وياهم همات ، اني افتر بينهم مثل الاطرش بالزفة رحت اسأل كفاية عاطت بيه بأنفعال :
كفاية :: روحي من وجهي هسه رحمة لامج
- غير اعرف شكو ، شبيكم تلوبون مثل السمجة عالنار ، بعدين مو على اساس نروح سفرة للمزرعة ؟
كفاية :: ماشفتي ابوج شحاله طايح بالقاضية و مريض شلون ترديني اعوفنه و اسافر ؟
- هم صدك شو وضعيته فدنوب تدهورت ، الله يخليج فهميني شصاير ، اني منكم وبيكم ليش مستكثرين بيه هالمعلومة ؟
تلفتت يمنى يسرى و اخذت ايدي ودتني لغرفتها و قفلت الباب
فاتحة عيونها و تحجي بمنتهى الحرص
كفاية :: شوفي ودة الكلام الي راح اكولنه كلش ثجيل و خطر
و اذا طلع من باب هاي الحجرة اعتبري حياتنا و حياتج انتهت
- ميخالف اعتبري سرج ببير ، بس احجي مو نشفتي دمي
كفاية :: مو سري بس هذا سري و سرج و سر اهلج و ابو المثل يكلك اهلك لا تهلك ، خليها ترچية بأذنج هلج شما چانوا بعينج مو خوش يظلون عزوة و سند حبوبة
اومأت براسي متأثرة بكلامها ، جرت حسرة و استرسلت :
كفاية :: ابوج من بعد ما توفت امج و جدج الله يرحمهم ، سلم شغله و تجارته بيد حمدان و سافر مدة من الزمن ، خلصاله فترة يترحل راح لاربيل مناك لسوريا و چم نوبة راح لايران و تركيا و رد ردود لديرته بس ما رد سليمان الاولي ، اجانه غير انسان
لحدما صار الي صار و استشهد رجلي و اجيت يمه ، اول هيل مارضى شال روحه و دكها مايريد يشوف واحد من عدنا لچن انه اعند منه قاطات و راسي يابس و فرضت روحي عليه فرض
مو لان محد يريدني بس لان شفت اخوي معتاز احد وياه
و يكابر ، مرت الايام و الوضع ساكت و كلمن مهود بمچانه الى ان بيوم اجانه خنيجر متصوب و ابوج و الولد تلكوه بالديوانية فايض بدمة لطمت على وجهي و حسبالي موات ، توسلت بي يوديه للمستشفى لو يودي طارش لهله يجون يشوفونه خطيه جاهل توهن خاطات شواربه لچن ابوج رفض و الامر حتى خنيجر رفض ، و تعاملوا ويه الموضوع بكل سرانية ،
عرفت ساعتها عدهم شغلة جايدة ضامينها عليه ، شديت العزم راسي و راسه الا يحجيلي و هم ما حجالي بس انه عمتج ظليت اراقب كل تحركاتهم ، اتصنط عليهم ، اسهر ليلي اخافن عدهم شغيله منا لو منا الا ان اجتي الساعة و طحت على علّتة
و عرفته يشتغل بالاسود
لطمت على گصتها و صاحت بقلّة صبر
- يا مصيبة المخدرات الچلبت بحلجج
- لعددد شنووو فهميني مو ريكي نشف ؟
كفاية :: ابوج يشتغل بالسلاح ،
هالمرة اني لطمت على صدري و انتفضت شايطة اصيح
-شتكولييين !
جرتني و سدت حلكي تحجي بخفوت :
كفاية :: حسّج يمصكوعة شهرتينا
- عزا العزاكم ، تشتغلون بتجارة السلاح ، يمة گلبي راح يوكف
كفاية :: هدي و خليني افهمج
- شتفهميني كفاية شتفهمين ، هاج شوفي لشتي شلون دترجف ، عقلي راح يوكف والله
- ما فهمت يعني شنو ؟
كفاية :: يمه شغلي مخج زين ، هنا ناس عشاير و عيشتهم عالطلايب ، اكو ناس تهوى السلاح و اكو الياخذه تا يحمي اهله و حلاله و اكو الي يكلج ساعة الساعة تگب بينه و بين عشيرة لخ عاد انه مزهب رويحتي و مأمن عليها .
- و ان يكن ، هذا سلاح منفلت و جريمة يحاسب عليها القانون ، لحظة ،، لحظة يعني عزيز متواطئ ويا بابا و هو مسهل امره بالشغل ؟
كفاية :: وانه من تالي عرفت و دكيت و لطمت ما فاد
- و انتِ شلون راضية و ساكتة ؟
فرت ايدها بأستهزاء و ابتسمت بمرارة
كفاية :: و هي المثل حالي چلمتها مسموعة لو رايها مهم ،
هسع اني سولفتلج بس ما اريدن بشر يعرف يا ود هالكلام تطير بيه ركاب و الدم يصير للرچاب ، حتى انه و انتِ نضيع
- بقت شغلة ما عرفتها، عزيز ويامن ورط بابا ؟
كفاية :: ابوچ بذاك الوگت جان عنده صويحب يشتغل تاجر مال تبغ ، وره مدة من الزمن اختفى و ما عاد سمعنة عنه خبر ، طگ و فش ظهر بس بغير اسم محد يشوفه بس نسمع بي وده طارش على ابوچ و عرض عليه يشتغلون سوه لچن ابوج من سمع بشغيلته الغمة رفض و كطع كل تواصل وياه ، من اشتغل ابوج بالسلاح وداله طارش نوبة لخ و هم راده يشتغل وياه حتى يسيطرون عالساحة و ابوج طرده و حذرة ما يفتح الموضوع وياه بعد ،
مثل ما تگولين صارت حزازية بين جماعة ابوج و جماعة ذاك الرجال ، و الي يطيح عالزلمة من السما يذب الصوج بأبوج
اخر فترة ظهر ازلمة منكب و يطلع بس بليل يطيح بيهم دوسه
و نص و يخرب كل شغلهم ، يوم يخرب البضاعة و يوم يبوكها
و يوم يبلغ عليهم ، احتار الزلمة وياه و احتارت الديرة ياهو هذا
لا ينشاف و لا ينكمش و الديرة من شافته هيج سبع و اخو خيته ، حشدت ولدها بالنهار ، يساعدونه و يراقبون السلف ، خاف يلكولهم واحد منا ، منا يتعاطى لو يبيع هذا البله الاسود
همست و آني اعرف المقصود
- التحجين عنه المگوار ؟
كفاية :: رحم الله امچ و ابوچ ، هو المگوار الشايل مگواره
و طايح بالوادم طك الله يحفظه و يستر عليه
- ابتسمت و ضميت ابتسامتي بالعجل ، حسيت برفرفة و شعور حلو بگلبي مدري ليش ، يمكن لان اني الوحيدة تعرف هويته .
استرسلت هي :
كفاية :: ولو هاي العالم ما يفيد وياها عشرة مثل المگوار ، سمعتي شلون هذا الزلمة چاتل اخوه بسبة هذا السم اليشربه؟
- هممم سمعت و سمعت بالخبر مال العصابة الي لزموها اليوم
كفاية :: چا ما تشوفينا شلون انترادم من الصبح لهسع
خايفة تطيح السالفة براس ابوچ و حسبالهم هو علسهم لان الظاهر ابن خالچ النغل هيچ مفهمهم.
- يطبهم مرض ، و زين سووا من لزموه لهذا التاجر ، يگلج كاتل واحد من الأمن خطية و لاكين عندة كيلوات من الكرستال
كفاية :: و شنهي الفايدة ، حسبالج راح يعترف عالروس الكبار
لا و ربج هذول يچتلون روحهم تا لا يعترفون على جماعتهم
فتحت حلكي مصدومة
- تحجين صدك انتِ ؟
هزت راسها بأسف و گالت :
كفاية :: و عيونج رب الصدك، قبل لا تجين بأشهر هم المكوار لزمله واحد ربطة و حطاه اباب المركز ، يكلج خلال التحقيق معترف على ريسهم و من مداهمين بيته الشرطة گوم و حط چيلة براسك و موت روحك ، لا خذوا منه حك و لا باطل ، ذوله شبكات و روس كبار الله لا يبلينا وياهم .
- مدري ليش انخمش گلبي من كلامها و حسيت بخطر راح يداهم حياتنا ، صوت براسي مثل نذير شؤم تعوذت من الشيطان يمكن صرت اوهس من ورا كلامها .
بيومها حتى الاكل گوة جرعناه ، منا ابويه تخربطت منا نحس روحنا متهددين ، اني عفتهم و لازمت غرفتي بقيت اصلي
و اندعي ما يصير شي لابوية ما مستعدة انفجع بي ، جنت اتخيل اني اكرهة و اتمنى اشوف بي يوم بس الحقيقة المُرة الي اخاف منها هو اني ما اريد افقده ، و اذا فقدته وين يصفى بيه الحال ، ارجع تحت رحمة عزيز و هو هذا الي يريده
جنت اتخيل راح اخذ بأنتقامي من غياث و اهله و اخلص على حياتي قبل لا يفكر يلمسني و راح اذوق ابوية طعم الخسارة
مثل ما سويتها قبل اكثر من سنتين لمن اجيت لهنا و طردني
لكن فجأة تغيرت كل مخططاتي ، ليش صرت متمسكة بالحياة أَكثر و ليش گلبي ناحية ابويه بدأ يلين ؟
قاطع شرودي صوت اتصال زينب ، اجه بوقته جنت محتاجة افضفض ويا بشر
زينب :: خايبة وينج ، ادك عليج صار يومين مامش
- تعبانة زينب ، عدنا شوية ظروف بالبيت و ابويه مريض
زينب :: ياااه عنده العافية ، شماله ذاك اليوم شفته چنة صل كلشي مابيه
ضحكت رغم الالم ، صحت
- لسانج هذا شوكت يستعدل ، هارون شلون متحملج
صاحت بتفاخر :
زينب :: چا شحدة ما يتحملني ، غير انه الحب
- يا عيني ،، يا عيني حبيات و امور
زينب :: اي و العباس الحب يسودن كلش حلو ، ما الله يهديج
و تحبين اخوي ؟
- ما الله يهديج و تبطلين سوالفج هاي
زينب :: والله اهيسج تحبينه بس تتكبرين
-و شدعوة هالثقة هاي ؟
زينب :: چا طبعاً هذا غياث مو ياهو الچان ، بس حسة يسوالة عصبة زلم
- شالفايدة و امـه البدوية
زينب :: دضحكي خايبه الدنيا خلصانة
فجأة خطرلي اسألها عن سمرة ، مشتاقة الها حيل
- سمرة شلونها ؟
زينب :: والله شأكلج ، ضايجة منها حيل عبن سوالفها غمة وما ينفع بيها التعلوم
- خير قلقتيني عليها ؟
زينب :: چا غير بعدها تسولف ويا الاغبر عزيزان
- صدگ تحجين ، اني مو وصيتج تبعديها عنها
زينب :: يا خية شني هي جاهلة و انه ابعدها ، حجيتلها فواينة كلها حتى سالفتة وياج
انتفضت من مكاني ، همست بأنفعال
- موو كتلج لا تسولفيلها عني ، راح تكرهني بزيادة
- ضوجتيني كلش عود اني وصيتج زينب
زينب :: يووو عاد لا تسوينها قصة ، هاي بنين يمي تسلم عليج
- الله يسلمها شلونها دتقرأ بعد كم يوم تبدأ امتحاناتها مو ؟
زينب :: ااي بنونة سنعة و جاي تقره.
- الله يوفقها ، يلا اني لازم اروح سلميلي على خالة سعدية
زينب :: الله يسلمج خية ، ديري بالج على رويحتج
انهيت اتصالي منها و كعدت افكر بسمرة ، اكلني القلق عليها
معقول عزيز ناوي على نية مو خوش وياها بدافع الانتقام لو يعرف زينب راح توصلني كلام و يريد يضغط عليه حتى استسلم اله ؟
لكن كلشي تغير من اجاني هذا الاتصال بصباح يوم گئيب
والي صار سبب بأنهيار حياتي و بدء مرحلة جديدة من الصراعات و العذاب الابدي ، من اول لحظة لمحت الرقم على شاشة تلفوني حسيت بشعور موحش ، نغزة بگلبي و صوت بعقلي يگلي لا تجاوبين و لاول مرة بحياتي اترك عنادي و اتبع صوت حدسي و ما اجاوب لولا هذهِ الرسالة الي غيرت مجرى القرار :
- آني عزيز افتحي خط لان شخص تحبينه گاعد بصفي ،
بعدني اعيد بقراءة المسج و اجتني مكالمة الفيديو ، قشعريرة سرت بجسمي و صوت ضربات قلبي احسّة مسموع ، عيوني دَمعت من شفتها كاعدة بحضنة و مأمنة بصدريتها
و قميصها الابيض و القراصات الفضية الي تزين شعرها القصير ، همست بشفايف ترجف :
- بنين ؟
شالت راسها و ابتسمت للكاميرا و هي تلوح بأيديها الصغيرة
تسلم عليه ، بلعت ريكي و رغم الدمعة الي طفرت من عيني ، بادلتها الابتسامة حتى لا تخاف او تحس اكو شي مو مريح
عزيز :: صحي النوووم يا حلو ، و فتحيلي دماغج زين !
تكلمت بنبرة عادية گوة اخفي غَصتي و ضعفي بهذه اللحظة
- مصحصحة عزيز ، بس ممكن تحول المكالمة عادية و تسد السبيكر ؟
عزيز :: الله ، اموت اني عاليستلم بساع ، يجرالج بنت عمتي
سد المكالمة و اني صرخت بكتمة لان اعرف شراح يگول ، رجع اتصل مكالمة عادية ، فتحت خط متوسلة :
عزيز :: يعني ، سميره الحلوة كتت الاول و التالي و عرفت ابو الخط مالتها جيرانهم ، رجال چبير من اهل الله
- صخام الصخمني ، يعني شافك
عزيز :: و آني غبي حتى اخليه يشوفني ،
گوة تجرعت استفزازة و ضحكتة ، تساءلت بخوف :
- شسويت للرجال عزيز ؟
عزيز :: بس لا عبالج كتلته هههه ، لاا بس خليته ياخذ غفوة صغيرة بين ما اكمل شغلي وياج
- شتريد مني فهمنييي تريد تموتني ، رجع البنية لاهلها الله يخليك ، و الله ما يخلونك عايش اذا صارلها شي
عزيز :: ما سويلها شي ، ما شفتيها مرتاحة و كاعدة تاكل ، كلت چيس حلويات بس عوزها تاكلني ، باعي ود انت جبرتيني اتصرف هيج تصرفات رعنة ، فيا بنت الناس تعوذي من شيطانج وتعالي وياي ،
- وين اجي وياك انت تخبلت ؟ عزيز بروح ابوك بداعتي عندك اترك البنية ، هاي طفلة مريضة لا تدخلها بلعبتك
عزيز :: ها هسه صارت طفلة مريضة و ما يصير ادخلها بلعبتي و انت يا هانم ما فكرتي هيج من جيتي لهنا ؟
- لطمت على وجهي حيل و صحت من بين اسناني ، جنت غبية ، معمية بالحقد و الانتقام و ماشفت گدامي ، لخاطر ربك اتركها
عزيز :: صايرين ، اتركها بس بشرط
- شنو شرطك ؟
عزيز :: تجين انت ، ارجعها ما تجين البنية اعتبريها انتهت
- شجاي تسولف انت ، شنو حجي المجرمين هذا ، انت رجل دولة شلون تساومني هالمساومة الحقيرة ، بعدين شيطلعني منا و الحراس متجمهرين بالباب
عزيز :: مينخاف عليج حبي ، اذا ردتي تسوين شي الف حارس ما يوكف بوجهج !
- من الخوف خشمي طك دم ، و احس الروح طلعت من رجليه ، وكعت على حَيلي و آني عيني عالساعة ، خاف هسه اهلها دروا
مية بالمية المديرة راح تخابر ابوها و تسأله عن تغيبها عن المدرسة .
عزيز :: الوو يا حلوو وين رحتي !
- تحجي ببرود و آني راح اموت ، لك ضغطي علّك عزيز هاي التصرفات ما تليق بيك
عزيز :: مو هو راح ادفعكم ثمن هاي التصرفات ، مو عزيز اليضحكون عليه ناس همج مثلكم
- شفت الكلام ميجيب اي نتيجة ، و الوقت دا يمشي مالگيت حل غير اني اطلع ، بس شلون راح اطلع ؟ صحت :
- هسة انت وين ؟
عزيز :: قريب على مدرستها بفرع الـ **** يم مركز الشرطة
- وديها للمدرسة و اني جايتك
عزيز :: لا يحلوة ما حزرتي ، تجين تروح هي ، سلم و استلم
تعالي و كل شي لا تجيبين وياچ غير هويتج
- صار ، بس ديربالك عليها امانة لا تأذيها
عزيز :: غير اموت عليها شتحجين هاي الغالية بنت الغالي
سديته بوجهه ، رحت رأساً غسلت وجهي و خشمي الي يصب دم ، عيوني ما بطلت تهّل و حاسة اكو مصيبة وراه
بدلت شلون مكان ، و نزلت اتختل بلكي ما تشوفني كفاية ، هيج وكت جاي تخبز بالترك الورا البيت ، مشيت و بأيدي بس موبايلي و تعمدت ما اخذ هويتي لان أَعرف بشنو يفكر وصلت برا مشيت بخطوات سريعة لحدما وصلت للباب للرئيسي واستوقفني صوت جلال وليد صغير من زلام ابويه
جلال :: خير ان شاء الله خوية ؟
- هاه ، رايحة للمدرسة ، المديرة اتصلت عليه عدها شغلة وياي بخصوص الامتحانات .
يباوعلي مضيقْ عيونه ما مقتنع ، جر جكارته من حلكه
وشمرها داس عليها و صاح :
جلال :: امشي خوية انه اوصلج
- لا ، ميحتاج ، اني راح اصعد تكسي منا ،
احجي وياه و اتلفت خاف تجي كفاية او خنجر ذوله گدامهم اكيد انفضح و هذا مبين مصر ، ما لكيت حل غير اني اخليه يوصلني ، صحت :
- تمام بس استعجل !
جلال :: ماعندي شي خوية ، يلا امشينا
راح للكرفان ، جاب سويچ السيارة و شغلها ، اني صعدت ورا
و گلبي يدگ سريع عبالك راح يطلع من مكانه
يمشي و رنّ تلفونه الموضوع بهاي الفسحة الي تصير گدام الگير مال سيارة ، گدرت اقرأ الاسم خنجر يتصل بك
راد يشيله ، صحت :
- الله يخليك ، لا تحجي بالتلفون و أنت تسوق ، شنو الحجي ما منبهكم
فشل و رجع ايده بلا ما يحجي ، همست :
- بلكي تستعجل شوية
وصلنا أَخيراً بعدما ذاب شحم گلبي من الخوف ، نزلني بباب المدرسة و توكل هو ، انتظرت تختفي سيارته و حطيت روحي بتكسي گتله يوصلني للمكان الي بي عزيز، اضم بروحي احس الناس كلها تباوعلي و يعرفون عندي شي
وصلت لعزيز ، سيارته مظللة راكنها قريب من مركز شرطة ، اول ما وصلتله فتحلي القفل و صعدت ، هتفت بنين من شافتني
وعبرت اجت گعدت بحضني تبوس بيه
بنين :: عمو عزيز يكول راح نروح سفرة
ابتسمت بمرارة و بداخلي احسّ راح اتقيأ من القهر ، بستها
و همست بأذانها :
- روحي اكعدي ليوره حبيبتي و هسه راح نوديج للبيت بعدها نروح سفره
قوست شفايفها بزعل و طفرت عالمقعد الخلفي چتفت ايديها
و كعدت تنافخ مراضية
باوعلي عزيز راد يحجي ، قاطعته بحدة :
- هسه توديها لبيتهم ،
عزيز :: نوديها عيني ، بس ليش هلگد عصبية !
ضربت رجلي حيل و احجي من بين سنوني :
- لك انت سويت مصيبة ، لك احساسي يگلي ما راح نطلع سلامات ، وييين مفكر نفسك ببغداد؟
باوعلي بعدم رضا و رد باوع للشارع ، شغل سيارته انطلق وهو يمطرني بحقائق صادمة :
عزيز :: ابوج النذل ، اطلبه كومه فلوس نكرهن ، طلبتج منه هاني و رفضني ، من حركة روحي رحت بعته لعدوة ، بس طلع انغل مني تغده بيه قبل لا اتعشى بيه
بعبوس جاوبت :
- شلون يعني ؟
عزيز :: ابوج باعني لاخطر رجال هنا ، و كاللهم اني مبلغ عليهم و الشرطة داهمت و كتلت منهم شتتوقعين يسكتون اليه
صار كم يوم ما نايم ، لا اكدر ارجع و لا اكدر ابقى بمكان واحد
احسّ على اي لحظة راح انكتل و السبب ابوج الغدار !
- ضربت صدري مصدومة ، همست بخفوت مرعوبة :
يعني هسه انتَ ماخذني درع بشري الك في حال هاجموك ؟
باوعلي بقلّة حيلة و همس :
عزيز :: لا ماخذج لان اخاف عليج ، ابوج هم حاطينه بالزائد
فتحيلي مخج رحمة على والديج ، اني و ابوج مطلوبين الهم
ما تعرفين شخسروا هذول ، بضاعة بسعر ديرتكم ، و صماخ شكبره !
ضربت وجهي و أَصرخ حتى ما اهتميت لوجود بنين
- رجعنا ، رجع البنية الله لا يوفقك
هي سمعتني انهاريت ظلت تبچي بصمت و هو صاح :
- لا تبچين عمو ، هسه اوديج لبيتكم
دار الستيرن و غَير وجهة الطريق ، ملامحه مرتبكة ويباوع بالمراية الوراه كل شوية ، صحت بقلق
- شكووو شبيك تتلفت كل شوية ؟
عزيز :: راح انزل بنين هنا ، ما اكدر لازم ارجع رجوع
- وين تنزلها بالشارع تخبلّت ، اذا نزلتها نزلني وياها ، هي تبچي و آني ابچي و اتوسل بي يرجعنا
عزيز :: بس اوكف يرموني بالشارع ، حتى انتن يكتلوچن
بنين :: اريدن ابوي ، ودوني اله
اندارت عليها و همست :
- لا تخافين ياروحي ، هسه اوديج
انهارت و اجتها حالة من الهَيجان و صارت تكرر نفس الجملة
بنين :: اريدن ابوي ،، ودووني لابوي
انخبص عَزيز و تهستر ، عاط بيها صوت :
عزيز :: لچ انلصمي عااااد انعل ابوج لابو حتى عشيرتج
- بچيت و صرخت :
- الله لا يوفقك ، ورطتنا
توجه على الطريق السريع بأقصى سرعتة و السيارة الوحدة صارت سيارتين يطاردونا بوضح النهار ، صحت على بنين تمدد عالكشن و تغطي اذانها ، جسمها يهتز بخوف مثل گلبي الدا يخفق بقوة ، چلبت بالمقعد منا و منا و صوت أزيز محركات السيارتين صار واضح و قريب ، اندعيت الله يخلصنا من هاي الورطة ،اباوع للطريق مثل شريط طويل نهايته سراب ،
عزيز انهار وجهه يتصبب عرقْ و ايده ضاغطة على الستيرن بكل قوة ، بأيده اللخ سحب سلاحة ،جمد الدم بعروگي ، صرخ
عزيز :: چلبي زين ، لتخافين مو عزيز اليسلم عرضة و نفسه للنثايا
- يحجي و يباوع بنظرات خاطفة بالمراية الجانبية ، همس بصوت متعب
عزيز :: ولد الكح*** يردونا نوكف
- ما اكدر احجي و شأريد اكوله ، عيوني تهل بخوف على نفسي و على الطفلة الي صوت نشغتها مزقت روحي
لحظات و صرخت على صوت الرصاصة الي فلّشت المراية الجانبية ناحيتي ، صحت :
- لك عزيز الحكلنااا ، يرمون علينا دخيلك يابو فاضل
أنكمشت بمكاني، بينما عزيز دار الستيرن بحركة مفاجئة، انحرفت السيارة لليسار ، ارتفع وراه الغبار و الحصو ، صرخ بصوت حاد :
عزيز :: نزلي راسج جوه
- تشاهدت و حسيت خلص هاي نهايتنا من شفت عزيز مطلع راسه و يرمي عليهم
تشجعت و شلت راسي ، شفت سيارات لخ ورانا هم يرمن ، باوعت لبنين بنظرة سريعة ، منطوية على نفسها و تصرخ ، صرخت بوجه عزيز بقلّة حيلة :
- شديصير فهمنييي ، شنووو ذني السيارات نوب
صاح بهستيريا :
عزيز :: مادري ،، مادري
ضل يصرخ و يسب ، طلع تلفونه ، اتصل بسرعة على واحد من جماعته ،
عزيز :: اني عالطريق الـ**** جماعة الدعلج لاحكيني
هي لحظات مرت بلمح البصر ، اخر شي اتذكره سيارة ضخمة بلون رمادي خطفت من صفحة عزيز و ضربتها بحركة محسوبة ، صوت معدن ينضرب وَميض عالي ضرب بعيوني ، السيارة تعدتنا و اشتغل الرمي ، مدري شلون انزلقت بروحي جوه ، عقلي وكف ، احساس بألم فضيع بس ما اعرف وين ، عيوني غوشن ريحة دَم و بارود عبئت المكان ، رفرفت روحي و كأنها خرجت من جسدي ، وراها ما حسيت بشيء .
و آني خليتهم و اجيت 🗡️🥀
شكرا لزيارتكم عالم روايات سكيرهوم
