رواية ساقي الود الفصل الثالث عشر بقلم هاله ال هاشم
. تجارة أرواح
الفصل كان واضح جدا وبي هواي معاني و رسائل وحدة منهم ان تجارة المخدرات والأسلحة اثنينهم يؤدون إلى الهلاك والموت ويهجمون بيوت يعني تجارة على حساب أرواح الناس.
غياث و ود .... غياث واضح بمشاعره وصدق حبه لها وعيونه تسولف قبل لسانه وكل كلامه وياها رسائل حب وعشگ والدليل ما انكر ان هو نفسه المگوار وهي بنت الناس الكاعد يحارب اعمالهم وتجارتهم المشبوهة
ود گلبها يريده وعقلها ينهرها عنه والاسباب هواي واحد منهم امه البدوية، طفولتها المشوهة وكرهها لجنس آدم بسبب عزيز وعمه الانذال وهسه راح تكبر الثغرة وتطول المسافة بينهم بعد خطف عزيز لبنين واذا صار لها مكروه لو تأذت غياث ما راح يسامحها و راح ينقلب الدور وغياث هو الي راح يدور ثاره منهم وينتقم أشد انتقام.
حمدان العم المتعجرف متذكر وجاي يحاسب ود على سوايتها لعد ما حميتوها بصغرها و ربيتوها عدكم ليش ذبيتو لحمكم لناس انذال لاعدهم غيرة ولا شرف
من اجاكم تهديد عفتو عزيز ورجعتوا على ود تحاسبوها. وكفاية يوم بعد يوم تثبت شكد هي طيبة وحنينة رغم الي عاشته وهي بعز شبابها فقدت زوجها وترملت ويجي اخوها الي لازم يكون سند وكتف وأمان الها يعيرها بموت زوجها لعد شكد عقليته مصديه هي بكيفها هذا أمر الله اجه أجله واستشهد بس واضح بعد دعاء ود الها كفاية راح تلكه النصيب الي يعوضها ويسعدها.
علاقة سليمان و ود علاقة غريبة كل واحد منهم يريد يبين للثاني شلون يحبه ويخاف عليه بس اكو شي يمنع هذا الاقتراب بين الاب و بنته يمكن السنوات الي عاشتها ود بعيد عن ابوها والي تعرضت له هناك عد خوالها خلق هاي الفجوة بينهم وسليمان يشوف بيها امها الي عاشت وماتت وهي مظلومة وأكيد هو أحد اسباب حزنها ومأساتها.
سمرة الغبية بكلامها واتصالاتها بعزيز انطته كل الاحداثيات عن حياتهم وبيتهم وكدر من خلالها يوصل لبنين ويخطفها حتى يساوم ود عليها
سمره على ود صارت بس هي وبس وزعلت عليها وحتى بعد ما زينب حذرتها منه استمرت وياه لعد شكد رعنه وغبيه وضحك عليها بكم كلمة غزل وحب ياريت بعد هاي سوايتها تتعظ وتبطل.
القفلة دمااار وانهيار للاعصاب عزيز الخسيس اخذ ود بنين درع بشري يحتمي بي من جماعة الدعلج الي راد يوكع بينهم وبين سليمان لكن سليمان اتصرف بسرعة واعترف عليه هو المخبر الشرطة وخلاه بوجه المدفع بس ود يم عزيز يشتغل عدها الغباء فوول ويوكف عقلها عن التفكير يعني من طلعتي خلي خبر او رسالة لابوج او لغياث حتى لو لزينب عاد يلحكون عليج وينقذوج انتي والبنية المسكينة الي دخلتيها بلعبة الثأر والانتقام، الله اليستر اذا صار الها شي غياث راح يكوم الدنيا عليها وهو حذر سابقا وكال الج طلعي الطفلة من هاي اللعبة.
هاله آل هاشم حبيبتي ابدعتي كالعادة فصل يجنن كل شي بي رائع ومبهر والقفلة هاي وحدها حكاية تسلم ايدج عمري وكل التوفيق.
شكرا لزيارتكم عالم روايات سكيرهوم
