رواية قصة وجدان الفصل الرابع عشر بقلم انين الليل
صرخت حييل وانا اشوف امي بس فاتحه عيونها وشي ابيض طالع من حلكها اجوي يركضون وعاصف بعصبيه
ايكل الغزوان :: شيلها جيبها للسياره
راحت عمتي سعاد وام احسان واني وياهم اريد اروح ويه امي عاصف كلي
:: ابقي يم علاوي امج ما بيها شي مرتفع ضغطها هسه بس يضربوها ابره تصير زينه
احتاريت بين امي وبين اخوي راحت عمتي سعاد وام احسان وياها
رجعت واشوف علي بحضن بيبي وهي. تكله // لاتخاف امك ما بيها شي
رحت يمه وحضنته وعدت نفس كلام بيبي وهو يمسح بدموعه حاچيته = علاوي لا تبچي امي ما بيها شي
( ) ل عد اننت ي لييش تبچيين
مسحت دموعي وابتسمت = لان اني هماتين مثلك خفت على امي بس عمو كال مرتفع ضغطها
(. ) ليييش هو ع ممو طبيب
ما جاوبته احس ابطني لوياات رحت للمطبخ ريكي يابس شربت شويه مااي واخذت البيبي ماي وبقيت ما مستقره الى
ان اندك الباب ركضت وعلي اجه وراي فتحته لكيتها خاله ام كرار بدون سلام سالتني //شبيها امج
= ما اعرف بس اجت وكعت
دخلت وكعدت وهي تحجي ويه بيبي // ها عمه اشلونج شنو شجاها المره
بيبي // والله ما ادري انتي منو كالج
- خابرني كريم وكلي روحي يم امي
- اي عمه تفرفحت نجاة ما ادري شصاير
- ما افتهمتي من الولد
-ماكو بس اجت دخلت الغرفتها وطاحت
- ومنو راح وياها
-ام احسان وسعاد
- ان شاالله خير
- بيبي جيبيلي ماي يبس ريگي
- هاي عمه يمج
- ما اشوفه
- عمه على كيفج
-شبيدي ياعمه على هاي المسكينه
-الله كريم ان شاالله ماكو شي
-شجاها
-حكها عمه شتريد تتحمل المسكينه لو صخر هم چان اتفتت مو بعد دم ولحم
-الله يساعدها
-انتي ياهو كالج
-كريم خابر وجابني كرار نزلني وراح للمستشفى
- شكالج من خابرج
- ما كالي شي بس ام هشام اتخربطت روحي يم امي وخليت كرار ايوصلني ويلحگهم للمستشفى
-دا خابري كرار
-عمه يمته وصل ازدحام
- مو كرار كريم
- انا كلت الكرار بس يوصل يخابرني هسه كريم تلگي محتاس
- شلفايده عمت على روحها وعلى هاي المسكينه
-عمه الله يساعدها الصار مو شويه انوب اهلها ولا واحد اجه سال عبالك ما عدها اهل
-ومن يجون شيردون ايسوون
- عمه لا تدافعيين من يجوون ايسوون اقلها من تشوفهم تحس اكو ناس وياها شويه ايهونون عليها يحاجوها
-عيالها ما مقصرين
-عمه احنه ابختج وينهم اعيالها هو بس عاصف بعد منو وسعاد البارحه اجت وهالطاحت المره
-بعد هاي حظها انوب ( اتاشر عليه ) هاي المسكينه رادت تروح ويه امها زمخ عليها عاصف
- يا ليش ؟
-ايكلها ظلي يم اخوج
ام كرار // عمه مو قصده يزمخ غير الولد مريض خطيه منو يبقى يمه
بيبي تبرطم // هو لو تشرفينه چان شابكني ويبجي
-الله يساعدهم جهال واتعذبو
بيبي // اي اجت واتفرفحت ما ادري شصاير من راحت تشوف الولد دخابري اساليهم
-اي هسه عمه
-اتصلت بعدها اتصلت مره ثانيه هزت ايدها // شنو ما تعرفينه الكريم اذا اكو شي يشلع كلبنه ياالله يجاوب
حاچيتها وانا ارجف من الخوف = خاله خابري كرار
-ايي هسه اخابره (ابتسمت واتقربت يمي ) خاله ما بيها شي بس هي ما ماكله ولاتنام اكيد ضغطها لو ارتفع لو هبط
ضامه قبضة ايدي ومدنيتها على حلگي واعض بيها لا اراديا هي خابرت
ها ماما
اي
ها
وهسه
ها
الله كريم
الله وياك
كرار ماما شيصير وياكم خابرني تره احنه كاعدين على نار وهاي خطيه وجدان فد تبجي
اي عفيه السبع
الله وياك
سدته وكالت بدون ما نسالها // من ماخذينها للمستشفى بالطوارى معلكيلها مغذي انوب عاصف ناقلها المستشفى اهلي
بيبي // ها وهسه
هسه اجوي اطباء شافوها
لزمت كتف ام كرار = خاله اخذيني الامي
هزت راسها // اي خاله بس يجي اي احد منهم اخذج انتي بس صيري سباعيه وديري بالج على اخوج خطيه
مو زين علي ايخاف
بقينه ننتظر ماكو اي احد اجه وبيبي حاجتها //. روحي جيبيلي جاي راسي راح ينفجر
جابت استكان جاي واني حاجيتها
=. خاله خابري الله يخليج
- اي هسه
اندك الباب راحت خاله ام كرار فتحته اجت منار سلمت
- مساء الخير
خاله ام كرار وبيبي ردن هي باوعتلي وحضنتني انا صرت ابجي هي لزمتني من جتفي وكالت بابتسامه باهته
- ماما هس توها خابرتني تكول خاله نجاة زينه ضغطها شويه مرتفع لا تخافيين
= صدك
هزت راسها // اي دا تگول ساعتين تلاثه ونجيبها للبيت
اتنفست بعمق = الحمد لله اتصلي خلي احجي ويه خاله
منار // هاي شبيج وجد هسه امي مشغوله
= بشنو مشغوله انتي مو تكولين خابرتج وتكول ما بيها شي خلي احجي وياها
اتصلت منار بقت فتره /= الو ماما هاي وجد اگوللها خاله مابيها شي بس هي اله اخابرج وتسمع منج
انطتني النقال
=. الو خاله
هلا حبيبتي
= خاله امي ش...
قاطعتني /= كول شي ما بيها تعبوارهاق شنو نسيتي لانما تاكل دمها مصفر. ضغطها هابط كول شي بيها مصفر
= وهسه خاله
- هسه خلولها مغذيات ونامت وكالو خلوها ترتاح
= خاله يعني ما اكدر احجي وياها
- اكولج نايمه ترديني اكعدها خليها هاي شكد صار ما ضاكت طعم النوم انتي ديري بالج على اخوج
= يعني اليوم ما راح تجون
ام احسان // هو الطبيب كال بس تصحى ايطلعها من المستشفى بس هذا عمج عاصف كله دكتور خليها بالمستشفى اقلها
تنام على سرير وتاخذ مغذي
هزيت راسي = اي هم صحيح
- بنتي وجد لا تخافين هسه عمج يجي ويطمنج
= تمام خاله
- ياالله محتاجه شي
= خاله
- ها حبيبتي
= بوسيلي ماما بايدها وبخدها
- تدللين
حسيت بكلمتها الاخيره عبالك تبجي بيبي سالتني ها شكالت ام احسان
الدموع اتكومن بعيني بيبي رجعت سالتني // شكالت ام احسان
جاوبتها وانا ابجي = تكول ضغطها هابط ودمها نازل كلش
ام كرار $ذ اي طبعا اذا ما تاكل ايشي
بيبي // ويمته يطلعونها
= عمو عاصف طالب من الطبيب تبقى يكول اقلها تاخذ علاج وتنام على جربايه
ام كرار // اي هم صحيح الحمد لله والشكر اطمنه عليها
بيبي وهي رافعه ايدها بالدعاء // الف الحمد لله والشكر ربي باوع الهلبنيه والوليد
ام كرار // عمه اجيبلكم شي تاكلونه
انا ما اشتهي بس شوفي وجدان
هزيت راسي = لا بيبي اني ما اريد
ام كرار // خاله مو زين عليكم تبقون بدون اكل
ما جاوبتها ومنار استاذنت ترجع البيتهم راحت واني طلعت وراها كتلها
= عفيه منار ولو اسوي عليج زحمه بعد شويه هم خابريها الامج واساليها عن امي
منار // وجدان اخذي نقال هشام او رامي واتصلي.
من سمعت ب اسماء اخواني رجفت هزيت راسي وجاوبتها = لا لا ما اريد (اهز بايدي ) ما لازم لاتخابرين
منار وهي رافعه حواجبها // هاي شبيج وجدان اني مدا اقصد نسيت اسفه اعذريني
ماجاوبتها رجعت للصاله شفت بيبي متمدده وعمه كاعده دخلت للغرفه شفت علاوي متمدد اتقربت منه لمست كصته
بي حراره كلش خفت رحت للمطبخ خليت ماي من الحنفيه بجدريه زغيره شافتني ام كرار سالتني
• ها خاله خير
= علووش عنده حراره ولازم اسويله كمادات
• ها يحتاج اخذه للطبيب
= لا خاله هو الطبيب كلي بس اسويله كماده وانطي علاج
بيبي // شلون تنطينه علاج وهو ماماكل
= هسه اسويله شي ياكله
• گليله بيضه
= اي صار
رحت صرت اسويله كماده هو فتح عيونه ابتسمت وانا اكله = راسك يوجعك
غمض عيونه ( ) ايي اري د مماي
شربته مااي اجت خاله ام كرار ابتسمت بوجهه وهي تكول //شلونه علووش البطل هسه يكعد ياكل هاي اللفه كلها
اتقربت منه وهي تكله // اشو اكعد ياالله يابطل واخذ من خالتك هاي اللفه شو حبيبي ياالله
(. ) ماما ...
قاطعته ام كرار //فد ساعه وتجي ،ما بيها شي ياالله اكعد اكل حتى من تجي تشوفك بطل وحلو
قنعته واخذ منها اللفه وصار ياكل ام كرار كالت
- وره ما يكمل اكل انطي علاجه وتعالي اكلي ما يصير تبقيين بدون اكل
ردت اجاوبها قاطعتني // لازم تاكلين ياالله بدون دلاعه
بقيت يم علووش الي كلي صرت زين روحي اكلي وبعدين انطيني الدوه
رحت لان بيبي خطيه لازم تاكل شفت خاله ام كرار مخليه طماطه وبيض وجبن وجاي انا اتقربت وبيبي كالت
ياالله حبيبتي اكلي
اخذت صمونه وخليت بيها بيض وطماطه وصبيت كوب جاي اكلت لكمتين مجامله وشربت الجاي بعدها كمت
رحت انطيت علي علاجه سالني () اممي ما اجت
جاوبته = هسه تجي
اخذ العلاج واني طلعت گعدت يم بيبي والكل مترقب احد يجي تقريبا الساعه بالتسعه اندك الباب وراحت ام كرار
واني طلعت وياها گالت // منو
:: افتحي انا عاصف
باوعتلي وفتحنا الباب دخل وكال :: السلام عليكم
ردينه عليكم السلام اباوع الدشداشته مليانه دم وجهه اصفر هو دخل للديوان بدون ما يحجي رحت ورا لزمتني ام كرار
لكن رحت لان بوقتها حسيت بالخوف شفته يفتح بجنطته وطلع ملابس باوعتله وعمه هم سالته
خير خويه شصاير
:: ما صاير شي ضغطي ارتفع وطك خشمي دم
وصار ايمرر الكلنسه بخشمه وصدك يطلع دم منه
وصلت يمه سالته = عمو وامي ؟
باوعلي وهز راسه وابتسامه باهته :: زينه ما بيها بس العافيه باچر الصبح تطلع ولو انا ودي تبقى بالمستشفى بس ادري
بيج بالج يمها
ام كرار //اي والله ولا استقرت ياالله عمه خلي عمج يغسل ويبدل واحنه نسويله عشا
:: لا متعشي رايد بس چاي
- امشي عمه
رحت ورغم تطمينات عمي اريد اروح اشوف امي وصلت للصاله وام كرار تحچي البيبي انو دشداشة عمي كلها دم
لان ظغطه مرتفع وبيبي تسالها // -وهو هسه وين
- راح يغسل ويبدل دشاشته
- دا كومي يمه حضريله لكمه
- عمه يكول ماكل بس يريد چاي
- روحي بيبي سويله
رحت للمطبخ سويت الچاي ومن كملته طلعت عمتي سالتني خدرتي الجاي
هزيت راسي بيبي كالت // روحي صيحي عمج كليله بيبي تريدك
رحت وبالي الف سؤال وصلت دكيت الباب سمعته ايكلي فوتي دخلت = عمو بيبي تكول خلي يجي رايدته
من طلعت انتبهت انو هو غاسل دشداشته دخلت بوجهي للمطبخ صبيت الچاي هو دخل :: ياالله
فوت عمه هله بيك
: : السلام عليكم
هلا بيك عمه
گعد وهو يكول :: ياالله بيبي سالته // شلونها ام هشام
باوعلي وجاوب :: الحمد لله زينه
يعني انتبهت
:: ما بيها شي خليها ترتاح بالمستشفى
ام كرار // والابره حصلتها
عكف وجهه :: ياابره ؟
- شمدريني كرار من خابرته كال عمي عاصف راح يدور ابره
هز راسه :: هاا اي اي ما لكينه الابره المهدأ بالمستشفى ورحت للصيدليه جبتها
بيبي // مستشفى شكبره ما بي ابره مهدأ
:: عمه ام هشام ما ماكله وضغطها معلك ودمها نازل مو كل ابره تصير الها رحت للصيدليه لكيتها وجبتها
بيبي // ومنو بقى يمها
:: سعاد وجارتهم
- - وكريم وكرار
::وصلتهم بطريقي
ام كرار // لو كايللهم ايمرون بيه وعمتي تبقى هنا
بيبي // ابقي باتي والصبح روحي
اتقربت من عمو حاجيته = عمو
باوعلي :: ها عمو
= الله يخليك اخذني اشوف امي
:: بابا هاي شبيج باچر امج تطلع هو الطبيب كال اليوم اذا تردون طلعوها بس ترجع ما تاكل وتنام بالكاع بدون فراش
عاد بالمستشفى نايمه وهادئه ومعلكيلها مغذي
= بس اني اريد اروح اشوفها
غمض عيونه واتنفس بعمق :: باجر الصبح اذا ما طلعوها انا اجي واخذج تشوفينها صدك علاوي وينه
ام كرار // صخن وسويناله كمادات
وكف ويخزر بيه :: شني مصخن وما تكلولي خلي اخذه للمستشفى
= لا عمو سويتله كمادات واكلته لفه وشربته علاجه ونام
وكف وراح للغرفه واني رحت ورا شفته يتلمس بكصته وباسه
طلع وهو يهز براسه :: زين الصخونه فاكته
ام كرار // خطيه وجد ولا عافته كل شويه تسوي كمادات وبقت يمه
:: عفيه عليج سباعيه شايله البيت واخوها وامها
رجع كعد يم بيبي وهم راد جاي هالمره ام كرار راحت صبتله وبيبي تگله // شصار انطي نفسك مجال بس چاي وجگاير
ابتسم :: ااه شو مسوين عليه جبهه مناك امي وهنا وجدان وانتي عمه وحتى بالمستشفى كريم
= اني فد مره وحده گوتلك وات تگولي متعلم وبعد ما حچييت
ابتسم :: اي سلمتي الرايه البيبيتج
بيبي // ههههه غير نخاف عليك
بقى گاعد ويسولف ويه بيبي وهو يدخن جكاير وحده وره الثانيه ودا احس ابد ما مستقر رحت يم علي صارت الساعه
بالعشره ونص اندك الباب عمه ام كرار كالت // يجوز اجوي علينه خلي اروح افتح الباب
بقيت واكفه اباب الغرفه دخلت عمه سعاد وراها ام كرار عمتي سلمت
السلام عليكم
ردينه السلام عمي سالها :: خير ليش جايه
كعدت وهي اتكل لام كرار // ماي رحمه الاهلج
بيبي // سعاد شكو
شربت الماي وباوعت العاصف // المره تريدك
:: يامره سعاد
- - ام هشام كالت اريد عاصف بساع
لا اراديا عطت ==يمممه
لزمتني ام كرار // اسم الله الرحمن خاله
= اممي امي شبيها
سعاد باعتلي وهي تهز براسها // ما بيها شي بس تگول اريد عاصف بشغله مهمه
عاصف وكف :: اكيد تريد تسالني ع المحامي
سعاد هزت راسها // اي اظن
اخذ الباكيت والنقال :: ياالله رايح
= عمو اروح وياك
:: امشي بس علاوي شلون منو يبقى يمه
=. تبقى عمه ام كرار وعمه سعاد
:: بكيفج بس خاف يكعد وما يلكاج ويخاف
سعاد // هو ياهو يخليج اتدخلين انا وكل ساع وحده تجي ما يصير اثنين مرافقات وحده تبقى ويه المريضه وكل شويه اختل بمكان
=. اريد اروح اشوف امي
نفخ :: امشي
ام كرار //. علي من ما يلكاج يجوز يتخربط خلي عمج يروح والصبح ناخذج
بقيت واگفه ما ادري شسوي عاصف كلي :: راح اشوف امج شتريد وارجع بسرعه وباچر من الصبح ناخذج ونروح
= وعد
ابتسم بوجهي :: وعد
بيبي // حتى انا اروح وياكم
:: تدللين
راح يمشي سعاد كالت // اوكف خلي اخليلها ملابس (باوعتلي ) وين هدوم امج
بعدني ما مجاوبه راحت للغرفه غابت شويه وطلعت تكلي // جيبي علاكه
طلعت علاكه من الكاونتر خلت بيهن ملابس امي واخذهن عاصف الي اشوف الارتباك على وجهه من طلع فتح باب
الصاله لحگته = عمو
دار عليه اتقربت منه = عمو جيب امي وياك لا تعوفها
ابتسم ابتسامه زغيره وراح
من طلع اتقربت من عمتي سالتها = عمه امي شبيها وليش رادت عمو
- - ما بيها شي شني بيها شي واوديلها هدوم
= صدك
- - چا اچذب عليج اذا ما طلعت هسه الصبح عمج يجي وياخذج نروح انا وياج هم زحمه من جوارينكم تبقى يمها
بيبي // چا شعجب انتي اجيتي ما خليتي ام احسان ترجع البيتها
- - عمه تعبت ودخت وام احسان ما قبلت تعوفها
بيبي // الله ينطيها هي ابد ما عايفتهم
ام كرار // حق الجار ع الجار
بيبي // ام كرار يمه شوفيلج شي تاكله سعاد خاف ما متعشيه
- - ياهو يشتهي ياكل
گامت ام كرار وانا بقيت واكفه اباب الغرفه وراحت عمه تغسل وام كرار جابت الها جبن. خبز وچاي وصارت تاكل انا
هم دخلت يم علاوي اشوف حرارته لمن ما اجتني ام كرار //وجد
=. بلي خاله
اتعدل بحجابها وتاشر ع الصاله // بيبيتج اتخربطت ارتفع سكرها ولازم اخذها للطبيب عمتج سعاد راح تبقى يمج
طفرت من مكاني = بيبي شبيها
- - تعبت ولازم تاخذ ابره وحبايه لان ناسيه ما ماخذه علاجها
= شفتها اخذته
هزت راسها // اي بس اكو علاج ناسيته وهالرتفع سكرها لازم اخذها للمستشفى انتي ديري بالج على اخوج
طلعت رحت وراها حضنت بيبي = حبيبتي اسم الله عليج تعبتي مو
عبالك تبجي // اي بيبي تعبت اروح للمستشفى وارجع اهنا ما ابطي
وراحت بيبي هي وام كرار بعد ان جابتلها سياره من الشارع القريب وبقينه انا وعمه سعاد كاعدات بس عمتي ما تسولف
وياي عبالك ما تعرفني او اني انسانه غريبه عنها سالتني
اكو حمام فووك
باوعت الها هي استردفت // فووك فووك بالطابق الثاني
= اي عمه اكو
خوش راح اسبح فوك خو ما تخافيين
= لا منين اخاف حتى لو تنامين فووك هم ما اخاف منطقتنه امان بعدين مو بيبي كالت تجي
تستمر القصة أدناه
وراحت عمتي تسبح واني رجعت يم علي انتظرت بلكي احد يجي يمكن بسبب التعب نمت شويه وبعدها فزيت
وحسيت بنفسي مذبوحه واريد بس احد يجيني ويجيبلي اي خبر من امي حتى بيبي الي كالت رايحه وارجع راحت ما رجعت
بقيت گاعده على حيلي شفت عمتي كعدت بچييت = عمه
هي سالتني // وين اوراقكم ؟
بلعت ريكي = يااوراق
- - يااوراق اوراقكم الجناسي وبطاقة الكميه
= ليش ؟
- رايديهن
= بالقاصه
- وين مفتاح القاصه
= ما ادري يمكن بجنطة امي بالغرفه
رحت للجنطه فتحتها شفت بيها المفتاح انطيته العمتي وانا ارجف هي فتحتها وطلعت الاوراق اخذتهن وراحت للباب
ما اعرف المن انطتهن ورجعت عليه سالتها = عمه شكو
- - ماكو شي شيلي فراش بيبيتج خلي بالغرفه
رن تلفون عمتي // الو
- تعال انت انا مالي غرض انت تجي وتفهمها
سدت التلفون رحت يمها = عمه شصاير
- ما صاير شي كل ساع وكلتيلي ما صاير شي هسه انا شجابني وشكومني من مكاني
خفت من تبرة كلامها = عمه اربد احاجيج اسمعيني
- - هسه يجي عمج وشتردين اتكليله گليله
سمعت الباب اندك دخل عاصف ويا ام كرار الي صايرات عيونها دم من البجي كلتلي وهي تبجي
- - ياالله وجد تعاي امشي الامج
= صدوك
- - اي امشي ياالله
شفت عمو لازم علاوي من ايده واخذه للمغسله غسل وجهه
ومشى بايده علي وكال :: ياالله
سعاد //. وانا
:: خلي غزوان يجيبج
غزوان من البارحه ما شفته
:: خابري
ام كرار // دادا ابقي بالبيت انتي اخاف احد يجي
- - اي
طلعت وياي ام كرار وشفت منار راحت البيتنا كلنه ساكتين ما سالتهم لان ابالي شي ردت اتاكد منه الى ان وصلنه
شفنا سيارات باوعت الهم ام كرار گالت
انزلي خاله
صرت اباوع بدون ما احجي هي ردت عليه // انزلي خاله شوفي امج
= امي بالمستشفى
عاصف باوع عليه وجاوبني وهو يداري دموعه ما تنزل :: انزلي بابا
بلعت ريكي وحاچيته = امي بالمستشفى وانت تاخذني الها
لزمتني ام كرار واجت ام احسان لزمتني من ايدي الثانيه مشيت وياهن شفت بيبي كاعده وتبجي ام احسان دارتني الها
عتيت ايدها ورحت الباب ما اعرف حسيت امي موجوده بي فتحته
شفتها نايمه اتقربت منها وصرت احجي وياها
= ماما اكعدي انتي ما بيج شي ياالله اكعدي خلي نرجع البيتنا
وصلت يمها صرت اهز بيها = ماما ليش هالشكل اتاذيني اكعدي وين اروح اني منو الي اشو اكعدي
بچييت بعبره واعاتبها = ليش ماما ما فكرتي بيه المن خليتيني اكعدي لبنيتج يمه اكعدي منو الي وين اروح
= اكعدي فدوه اكعدي وعلووش ياهو اله اكعدي لبنيتج اكعدي
1
صرت احرك بيها حييل واتوسل = نجاة اكعدي نجوى لا تعوفيني
اجتني ام احسان لزمتني // وجد امج الاخر لحظه وصتني تكلي علاوي باامانتها
باوعت الها = راحت امي خاله راحت وخلتني للضيم اكعدي يمه هلكد تحبين رامي وهشام ورحتي وراهم
لعد واني وعلووش عفتينه
= اكعدي ماما بعدج زغيره اگعدي نجاة ياحلوه يازغيره اكعدي ياصديقتي
اجتني ام احسان // خاله وجد ...
قاطعتها وانا خاله ايدي على حلكي ==اسس كلكم اتجذبون كلكم اكرهكم
لزمتها من اكتافها وصرت اعيط = هي مو صديقتج ليش ما كلتيلها لا تعوفين بتج ليش خاله
حضنتني وهي تكلي // وجد وجد اسمعيني علووش علووش
طلعت بدون تفكير شفته لازمه عاصف وصلت يمه لزمته من ايده واخذته اريد ادخله لكن عاصف لزمني من معصم
ايدي وهو يكلي :: علاوي لا يدخل
باوعتله اريد اضربه اريد اعيط واغلط هو حاچه علووش :: تعال عمو ابقى يمي
يباوعلي وياشرلي براسه ولازم علاوي من ايده
بدون تفكير حضنت علي وكعدت بالگاع وصرت ابجي واكله =علووش
ما كدرت اكله امي راحت خفت علي بذيج اللحظه تقريبا نص ساعه طلعت ام كرار وصاحت على عاصف الي ما اعرف
شنو كال الها بعدها اجه عاصف وشال علي وكله
::بابا علي تعال امشي وياي
انا بدون وعي حجيت بعصبيه = وين وين ماخذه
اجت مرت رحيم ابن بيبي هديه كالت //خاله اخوج مريض مو مال يشوف امج خلي يروح ويه اولادي
ما رديت عليها هي كالت// حبيبتي انتي فاهمه راح اخذه يم جهالي احسن لا ينتكس وشلون بي
اتذكرت من وگع شهكت = يعني حتى من علي اتحرموها ما تشوفه
- مي خالف خاله صيري قويه عفيه ابنيتي
راح علي ويه اولاد رحيم واجتني ام كرار اخذتني من ايدي ودخلتني شفتها كانما نايمه وكفت ودموعي تنزل وانا احاول ما اعيط
اتقربت منها بستها مره واثنين وتلاثه
ام احسان تبجي وحاچتني // احجي وياها كليلها علي بالحفظ والصون وكليلها راح اسمع كلام عمي عاصف
بدون تفكير حاجيتها بعتب = ماما ما ادري هلكد اني رخيصه عندج حتى ما فكرتي شراح يصير بيه حتى ما كلتي هاي بتي
وابني وين يرحون منو الهم موتي روحج على مود هشام ورامي لعد واني وعلووش هذا الزغير ما فكرتي بينه
صرت اباوع الها اتقربت منها وبچييت حييل = ماماا ماما حبيبتي سامحيني ياعزيزة روحي تره حتى اني احب هشوم
بس شسوي ما اعرف شتصرف سامحيني ياماما
بستها بخدها وبگصتها وبخشمها وبكل مكان بوجهها بعدين اخذتني ام كرار وهي اتكلي //صيري على صفحه حتى يشيلوها
وبيبي هديه تكول // يمه نجاة كون هسه ولدج واخوتج شايلينج يمه اول ما غربج حميد وسعدي وتالي غربوج ولدج
خلوها بالسياره واجت وياي ام احسان وام كرار وعمو كريم وعمو عاصف هو الي يسوق وانا الطريق
كله اعيط مره اخمش وجهي مره املش شعري بعدها انتبهت سالت ام احسان = وين علي
جاوبتني ام كرار // لاتخافين يم ولد عمج رحيم وبيبي هديه راحت يمه
جاوبتهم والعبره بصدري = مو المفروض ابنها يدفنها
من حجيت هالشكل الكل بچى والسياره تمشي عبالك بسباق نزلو فولوها بانزين وكان اكو محل راح عاصف اشترى جكاير
وجاب ماي كال الام احسان شربوها لكن اني ما قبلت وتبادل عاصف ويه كريم السياقه والطريق كله ونقال عاصف
ما بطل رن كريم ساله // ليش ما تجاوب
:: رقم غريب
اي جاوبه شوفه شيريد
تستمر القصة أدناه
:: الو
:: منو
:: اوگف اوگف لاتحمى ولا تصيح
:: اي لا تصيح لا انعل اسلاف اسلافك امس اختك دخلت للمستشفى وينكم عنها من مات ابنها ياهو ظل يمها
ياهو سال عليها
:: اي امس نلتهي بيها لو ننطيكم خبر
:: جاي اگلك لا تصيح مو تعرفوني من اتخبل شسوي
كريم اخذ التلفون من عاصف
- - اسمع لا تصيح خاف عاصف شويه محترمكم انا ما احترمك واكبر نعال اخلي بحلك اليحجي لك شكم مره خابرتك
انت بالذات شكم مره امي حجت وياك ويه اخواتك گنالكم المره راح تتخبل تعالولها باالله ذاك السكط ما النه شغله
بي بس هاي بتكم انت نفسك شكلت مو كلت كلمن ملتهي بروحه
- - ولك مو البارحه رحيم خابرك وينكم
- - ها هسه تردون تجون لا لا تجون واليوصل اكسر رجله ورجل الخلفه
- - اغلط وانعل ابو الساعه العرفناكم بيها ياعاار
- - اي احنه نسويلها الفاتحه حماها وابنها وبتها وعوايلنه انتم سوولها فاتحه واتنكبو وكولو عفناها بااصعب وكتها
- - الله يطيح حظك وحظ اخواتك امشي ياناقص
سدا عمي كريم وظل يغلط بعصبيه // الساقط طايح الحظ يكول ما ندري واني كلت الرحيم يخابره
ام كرار // على كيفك كريم
- - شعلى كيفي اذا يكول عود خلي نشوف ياهو يسويلها فاتحه
ام احسان وهي تبچي // ما يدرون بنجاة ماتت من يوم الدفنت رامي هسه صارت عزيزه
كريم // اي يريد يدندح كدام الناس عوود شوفوني
ام كرار // تانوهم كريم يجوز يجون
- - ما يجون جبناء همه من چانت عدله ما اجو ولا سالو شكم مره امي خابرت
- - مي خالف كريم تانوهم
دار علينه //. شنتاني يمعوده بعدهم بالبصره
عاصف ساله :: ياهو كال الهم
ام كرار // عمتي خابرتهم
الكل سكت وصلنه وزورو امي آمير المؤمنين وبعدها اخذونه للمقبره وهناك لكينه كل شي جاهز شالوها وام كرار تگول
- نجاة كون هسه اولادج لو اخوتج همه الي يدفنوج اويلي عليج وعلى ضيمج
صرت اعيط =. عوفوها امي خلوها لا تدفنوها
لكن همه ما سمعولي دفنوها يم رامي شالوها عمي عاصف وعمي كريم ونزل عاصف حتى يلقنها
واهنا اجه رجال كال اسكتو لا تبجوون. فعلا سكتنا وصار رجال يقرا يمهم وبعدها عاصف انطا فلوس
ما اعرف المن لكن بعدين عرفت البناء القبر
بقينه كاعدات والسكوت سيد الموقف الى ان اجه عمو كريم وكال // ودعوها حتى نرجع
وصلنه يمها واني اشهك ومختنكه من البچي
ام كرار // نجاة الله وياج الله يرحمج هواي اتعذبتي وهواي اتحملتي
ام احسان تبچي بحرگه //. دادا نجاة شگول وشحچي شكد راح اشتاقلج المن اسولف وبعد منو تسولفلي ضيمها وقهرها
يااختي ياصديقة عمري ارتاحي دادا شفتي ما شفتي ومحد اتحمل بگدج الله يرحمج
اختنكت بعبرتها اجن گللي // ياالله ودعي امج
كريم گللهن ابتعدن عنها خلنها ويه امها وكفت وابجي واحچي وياها
= يووم المن عفتيني شلون بيه وبعلي وهشام من يسال عليج شنكله
= هشام كله من عنده هو السبب بلي صار
= ماما شلون اكعد وما اشوف ضحكتج بوجهي وعلي منو اله
= زين وين نروح ومنو بقى النه
= ماما ماما
اجتني ام احسان وهي تبجي // كافي خاله گليلها الله وياج يوووم
صرت ابجي حييل =. خاله شلون اعوف امي ايهنا وارجع وين والمن لا خلوني انتو روحو وخلوني
ام كرار // وجدان خاله خلي نرجع علاوي ابحده
منسمعت باام اخوي نزلت بست التراب واحچي = الله وياج حبيبتي ماما الله وياج نامي وارتاحي هواااي تعبتي ارتاحي
اجه عاصف :: ياالله امشي
رديت بتوسل = لا خلوني ايهنا ابقى يمها
:: لا عمو امشي علاوي ابحده وهسه ايفكدج
من حاجاني صرت اعيط = ما اروح ما ارجع المن ومنو بقالي خلوني يم امي انتو روحو
ادور ع القبر = ماما ما اكدر اعوفج ايهنا ماما
ام كرار //. استهدي بالرحمن خاله
= اريد امي اريد امي
ام احسان //. امشي خاله بعد ما يفيد لا عتب ولا حچي
الموقف ما اگدر اوصفه اخذتني ام احسان وركبتني بالسياره وبس شهكاتي عمو كريم بالسياره اشوف عاصف يم القبر
ويرش بالماي ويوگف يحچي ويرجع يرشه ماي بعدها يوكف يحچي بعدها گعد وصار يحجي وعمي كريم دك هورن
اجه شفت الكسره بعيونه صعد اني ما اتحملت صرخت
= ماما ماما رجعوني يمها اريد امي
لكن السياره مشت الكل بجى وبعدين سكت واني فاقده مره اعيط وابچي ومره اضرب وجهي
وام احسان وام كرار لازماتني الى ان وصلنه وشفنه چادر مبني اباب بيتنا
شكرا لزيارتكم عالم روايات سكيرهوم
