رواية قصة وجدان الفصل الخامس عشر 15 بقلم انين الليل

وصلت من بعيد اشوف جادر ورياجيل ملتمه واكثرهم مخلين الچفافي على وجوههم

دخلت للبيت وجهال بالحديقه وياي ام كرار وام احسان وصلت للصاله لكيتها مليانه نسوان كانن كاعدات كل اثنين

يسولفن بس من شافني صارن يبچن ياترى على شنو البچي على امي وضيمها لو على حالي لو عليه اني وعلاوي

لو بچيهن كذب ونفاق خصوصا واني اكثرهن ما اعرفهن

البعض صار يلطم والبعض لزمني ويبچن وصلت يم بيبي هديه الي من شافتني صارت تلطم وتگول بيبي دفنتي امج

كعدتني ام كرار يمها وهي تبجي الله يساعدج

بقيت ساكته وعيوني تدير ما اعرف شريد اجتني ام احسان

ها وجدان شرايده

= عاصف

هسه اصيحه

ام كرار //شتردين منه الرجال تعب الله يساعده

ما جاوبتها راحت ام احسان وغابت بعدها اجتني عدلت شالي وكالت واكف بالگراج

كمت رحت وام كرار وام احسان وياي وراي نساء ما اعرفهن او يمكن اعرفهن بس ما نتبهه منو هنه مو مهم

شفته واگف مدنك وبحلكه جگاره من شافني شمر الجگاره من حلگه وصلت يمه حاچيته بصوت عالي وانا ابچي

= عمو عاصف النسوان يسالني شتردين اني اريد امي مو انت گلت راح تجيبها وتجي ليش عمو ليش طلعت كذاب

اني اريد امي جيبلي امي

اتقربت منه وصرت اضربه بصدره لا اراديا واكله

= اني اكرهك اكرهك

ماحسيت اله على راشدي اجاني وصوت سعاد وهي تكلي // انچبي ادب سزز عليمن تغلطين

ام كرار // شبيج سعاد البنيه فاقده

- - شني شبيه اريد اربيها الهاي المشنتره شلون هالشكل تحجي طايحة الحظ بس منين تطلبها منو حبايبها

اتقرب عاصف وهو يگل السعاد :: كافي روحي واحترمي نفسج

سعاد راحت للصاله وهي تهز بيدها وتكول // تريد يجيب امها من الگبور كافي سوالف المسلسلات وينه وين

هاي السوالف انهجم بيتجن شويه استچنن

صرت اشهك وصوتي ما يقبل يطلع اختنكت لمن ما عاصف گلي

:: لو بيدي اخلي روحي دون روح امج چا بدلتها بس هذا امر الله الج حق تزعلين عليه بس حسبالي ما بيها شي

وتريد اتوصيني على هشام انا اعتذر منج اعتذر هواي اسالي ام احسان شكلت الامج بس سبحان الله

روحي عمو روحي صلي واستغفري واندعي الامج

اخذتني ام كرار وام احسان ودخلني للصاله النساء وام كرار تكلي //. مع الاسف عليج شلون تضربين عمج

دخلت وصارن يبجن ومره يلطمن واهنا اني وياهن مره ابچي ومره الطم رغم ما اعرف بس الي اعرفه انو ملخت نفسي

واعيط وعيوني تدور على امي صار دنيا ليل اجت سعاد وهي تبوس بيه وتگلي

عمه السويتي عيب وفشل ما يصير تره عاصف محد يفك حلكه ويا

ما جاوبتها وصبو العشا واجتني منار وهدى جابولي سووب رفعت ايدي ما اريد راحن من يمي اجتني ام احسان

- وجد خاله لازم تشدين حيلج

بيه صرخه لكن صوتي راح وعيوني ثكلن انغمى عليه او هيج حسيت فتحت عيوني بالمستشفى والكانوله بايدي

باوعت يمي خاله ام احسان وام كرار واشوف يمي وحده نايمه ومن الجهه الثانيه هماتين اتقربت مني ام احسان

- - اشو فتحي عيونج وجدان خاله فتحي عيونج لا تخوفينه عليج

بقيت مغمضه واسمع صوت ام كرار تسولف ويه ام احسان //. الله يساعدها مصيبتها شكبرها

- - اي بس للامانه هي ما الها حق على عاصف لان گدامي اتوسل بنجاة كللها خلي اروح اجيب ابنيتج هي ما قبلت

كلتله لا ما اريدها تشوفني بهذا حالي خو شفتيها حتى طلعتني رادت توصي بيهم ابيناتهم

ام كرار // اي دادا صدك بعد هي مقهوره وطفله وما شايفه والمر بيها مو قليل الله يساعدها

بقن كاعدات يمي والممرضه سالتهن عليه وسولفلها انو امي اتوفت وهي اتخربطت گالت

لاتخافون عليها لان ما ماكله ضغطها هبط خلنها شويه تنام اطلعن انتظرن بره الصاله

طلعن وبقت يمي الممرضه واجن ممرضات وياها سالنها عليه لان شافن وجهي بي كدمات وصارت اتسولف الهن

  بعدها صار حديث ابيناتهن ع الشغل وع البيت سالت وحده بيهن

شخبار بنتج

عندي بعد ما ترجع

يعني تتطلك

اي بعد شتسوي اعوج ما ينعدل

خطيه بس الطلاك مو هين

ما شفتيها شلون اجتني شمسوي بيها خو وجهها داعي خارطه وليش كل هذا ابن الكلب جاي سكران اني من البدايه ما

قابله على زواجهم بس هي اله اخذها احبه هسه شحصلت

كولي همزين ما عدها جهال

اي دادا الحمد لله من اجتني كالت ماما الدوره فايتتني اسبوع عاد اني جبت الها شيت اسبرين اخذت حبايتين بالليل

والصبح اخذت اثنين للظهر نزلت عليها الدوره

يجوز طفل

يجوز ما دام بعده مامتكون احسن بدل ما يضيع بين ابو وامه

اي احسن

يمكن نمت لمن ما صوت // ها صرتي زينه

فتحت عيوني هزيت راسي هي سحبت الابره وخلت الكانوله لان الطبيب كتبلي ابر وحبوب

  طلعت والكانوله بايدي وام احسان لازمتني وام كرار كالت خلي اناجر سياره

رجعنه وبالطريق اتصل كريم وصار يعيط شلون ما مخبريهم جاوبته ام كرار

لان انتو ملتهيين اخذناها اني وام احسان

لا خويه هاي هل اجينه ما بيها شي

اي كتب النه علاج

ام كرار گالت // هذا كريم صار يعيط عليه اشون ماخذاتها واحنه ما نعرف وبعدين اخذ التلفون عاصف ويكلي راح اجي

واخذها الدكتور اختصاص بس اني گتله هسه جايين

بقينه ساكتين وصلت وبوجهي للغرفه اتمددت ربع ساعه واجه عاصف جايبلي معلاك وهو يكلي

:: اكعدي بابا اكلي

دايره وجهي ما جاوبته :: وجد اكعدي اكلي حتى تاخذين علاجج

اجتي بيبي هديه وهي تگول // شو اكعدي احبيبه اكعدي اكلي وشدي حيلج شو ياالله لاتشلعين گلب عمج

  :: خليها تشلع گلبي قابل

  - - شو بيبي اكعدي خايبه عاصف

:: ها عمه شبي عاصف

ام كرار // ياالله وجدان عيب بيبي وعمج كاعدين يمج عيب ماما گومي اكلي

كعدت واني مدنكه ما باوعت بوجههم صرت اكل وعيوني تجري ام كرار // استهدي بالرحمن واطلبيلها الرحمه

شهكت من البجي لا اراديا رفعت راسي شفت عمي عاصف واكف بالباب ويمسح بدموعه ام كرار

  - - صدك جذب عمه حبيبتي اكلي واشربي العصير حتى تاخذين علاجج

اتقربت مني وشاورتني // عيب من عمج يگلي ابو كرار اي شي ما ماكل مقهور عليج

هزيت راسي اكلت لكمه وشربت وراها عصير بيبي // هذا هو عمه هلكلت رووح يم الزلم

طلع وانا اشوف هواي نسوان نايمه سالت عمه ام كرار منو ذني

اقاربنا ا

بيبي كالت // كلهن بنات عم ابوج والثنين الي لاكنج وبوسنج ذني عماتج

فتحت عيوني // اي عماتج امل وانصاف شنو نسيتيهن

هزيت راسي =. اي اتذكرتهن من اتوفى بابا اجن ويه بيبي

  وحتى من مات اه ( اتحسرت ) رامي هم اجن بس انتي ما چنتي منتبهه اجن ويه حبوبتج وهي ماگدرت تجي مريضه

باوعت لام كرار // خاله وين علي

- - ويه ولد عمج رحيم ابيتهم وساكت صحيح سال عليج بس همه شاغلينه بالالعاب ويطلعونه

= ليش ما يجي لهنا

- شيسوي يجي خلي ويه الولد

= ما درا باامي

هزت راسها // لا ما كلناله

= بس لازم يعرف

- - عاصف يكول انا احچي ويا

= خاف يوكع اني اكله

- - مي خالف اخابر كريم وافهمه اخذي علاجج ونامي شويه

دنكت بدون ما اجاوب بيبي كالت // جيبيلي شي اريد اتمدد

اخذت علاجي ونمت وكعدت نص الليل رحت للحمام ورجعت للفراش حاولت انام ما گدرت يمكن غفيت وجه الصبح

شويه بعدها سمعت حركه ونساء كعدن وصوت ام كرار تكول // اكعدي عمه اتريكي

بيبي كعدت على حيلها وهي اتكلي // اكعدي يابيبي ادري بيج وجه الصبح ياالله نمتي

اجت ام كرار وجايبه وياها صينيه بيها بيض سلك وحليب وجاي وهي اتكل البيبي

اتريكي عمه خاف يجن نسوان والملايه خاف يجون اهلج مناك

بيبي // عشتو مني يجي

- - والله ياعمه ما اعرف شگول عفيه اهل لاتسالون على بتكم لا ولو تشوفين امس شلون اخوها اتلاغه ويه عاصف وكريم

- 0 ها ياهو منهم

- 0 ما ادري وكريم بس ايعيط ويسب ويغلط

شنو شعدهم

ما اعرف بس ايگلهم احقكم شلون مابلغتونه اله من ماتت

بيبي هزت ايدها وعيبا بحلكها // عاد همه على حورهم انذال لا اجو ولا سالو

اي كريم هم حجى. وياهم وصار يسب ويغلط

وعاصف ؟

- - عمه عاصف راح ساكت ورجع ساكت

اي حكه ما شفتي الدم البدشداشته

حتى البارحه هم متخربط وصاير ينزف دم من خشمه وماخذينه للطبيب

يا صدك شبي الولد

يكلي كرار الطبيب كايله ارهاق وهم زين ينزف خشمك دم حتى ما يصعد الضغط الراسك وتصيبك جلطه

بيبي. //. اسم الله تعب صدك تعب

- - اي عمه ما سمعتي كرار من كال اخذ السيارة ومن صيدليه الصيدليه بس كون ايحصل الابره

وما ادري بيش اشتراها

بيبي بچت // وشلفايده عمه ما فادتها

- - عمه بعد هذا يومها شنسوي

بيبي // وهاي المسكينه واخوها وذاك المسجون شلون بيهم

ام كرار // حتى كريم البارحه يبجي عليها هنووب ايگلي الولد الچبير بالسجن وهذا زغير ومريض

بيبي بحنيه // اااخ ياعمه يانجاة يامصيبتج الما حملتيها رحتي وعفتي جهالج

لااراديا صرت اشهك اجت يمي ام كرار وهي تكلي // اگعدي حبيبتي اگعدي كافي لاتبچيين

بيبي صارت تنعى وتبچي وبسرعه الغرفه انملت نسوان والكل صارن يبجن على امي بس بعدين عرفت هنه يبچن عليه

لمن ما ام كرار كالت الهن // خلي نطلع بلكي عمتي توكل وجدان

وصدك طلعن والبعض سمعتهن رادن ريوك وبيبي اتقربت مني وهي تكلي // اذا تحبين امج اكلي

برطمت وسالتها = بيبي يعني انتي ما تخربطتي

انطتني بيضه // ت اكلي هاي البيضه واشربي الجاي وانا اگلج

= يعني رحتي الامي

- - لاتردين ايدي انا مو بيبيتج ما تحبيني

اخذت البيضه واكلتها بدون خبز وشربت الجاي

بيبي // عفيه دگومي غسلي وجهج هسه تجي الملايه گومي حبيبتي

گمت ولزمتني دوخه بس غمضت عيوني وفتحتهن ورحت اغسل والنساء يباعلي واكثرهن سكتن

وبيهن ايكولن الله يساعدج غسلت ورجعت كعدت بالغرفه حاجيت بيبي = اتصلي ابيت عمي رحيم اسالي على علاوي

هزت راسها // اي هسه تجي ام كرار واگللها تتصل

= بيبي من رحتي للمستشفى ليش ما اخذتيني

- - بيبي شاخذج واخوج مصخن وعمتج من اجت مايسه من امج ردت اروح اشوفها وما خلوني بالگوه دخلوني

عليها دقيقه وطلعوني بس شميتها وبستها

صرت ابچي = نيالج بستيها وشميتيها ،

- - غير عمتها ولج هي مثل بتي شكول عليك ناظم شگول عليك حميد ظلمتو البت شبعت ضيم منكم ومن سعدي

اجت ام كرار وبيبي گالت الها // اتصلي اسالي على علاوي

عمه هسه تجي ام غيث ونسالها

- - لا مي خالف. وجدان تريد تحجي ويه اخوها

اتصلت ام كرار وفتحت السبيكر // الو

هلا ام كرار

هلا ام غيث شلونكم

زينين وجدان شلونها

الله يسلمج يمته تجين

فد شويه واجي خوماكو شي

لا ما كو شي اگلج علاوي شلونه

زين

ها

اي وداعتج ويه الاولاد ولا حسسو بشي صاير خو عبد الله ابد ولا عافه

زين وجدان تريد تحجي ويا

نايم بقو سهرانين كلش للصبح

خو ما بي شي

يا شبيج كول شي ما بي اجي واخليها تخابره بس خطيه قبل شويه نامو وما يهون عليه اكعده

هزيت راسي يعني خلي ام كرار //. زين دادا خلي نايم ومرتاح

ياالله شويه واجي

هلا بيج

ام كرار سدت الخط // ها خاله خو سمعتي باذنج

هزيت راسي بدون ما اجاوب اجت ام احسان دخلت سلمت واجت حضنتني اني فقدت صرت اصرخ واكلها // خاله اريد امي

وهي بس تبچي وبيبي صارت تنعى والتمن هواي بالغرفه وصارن ينعن ويبچن يمكن ساعه او اكثر بعدها ام احسان

لزمتني من اكتافي وكالت //وجد خاله حبيبتي صيري قويه امج ماتت الله يرحمها

اسمعيني امج وصتني تسمعين كلام عمج وتديرين بالج على اخوج علي حبيبتي خاله صيري قويه

صارت شفافي ترجف ودموعي تنزل باوعت الها = وانتي هم بستيها وشميتيها لعد ليش ما اجيتي اخذتيني

ليش ما خليتيني ابوسها احضنها

صارت تبچي // هي ما قبلت حتى عمج اتوسل بيها وكللها خلي بتج تجي خلي اجيبها الج بس ما قبلت

مسحت دموعي وام احسان كالت // هاي حال الدنيا انتي ما قصرتي وياها سويتي الي تگدرين علي ونجاة ما اذت

احد مثل النسمه وكعتها كلها ساعات

وبقت ام احسان تسولف عليه شلون لازم اصير گد الحمل

واجن الملايات واكثر الحضور اقاربنا ما اعرفهم ولا شايفتهم يجن ايواسن بيبي هديه على اعتبار هي عمتها الماما

وبيهن يباوسني ويدعلي بالصبر تقريبا الساعه بالعشره وسمعت عياط حييل وبچي گالت ام كرار // اجن خالاتج

اتلكنهن النسوان وهنه ايعيطن ويضربن على وجههن ما اعرف ليش بقيت كاعده بمكاني ما وكفت وهنه ايعيطن

الي جايات مو بس خالاتي وياهن جايات بنات شابات اكبر مني ونساء بكد امي واثنين عجايز وصارن يلطمن

وهنه يعيطن // ياخيه ما شفناج

كنت حانقه عليهم لان اعرف رغم مآساة امي وحزنها لكن كانت بحاجتهم بحاجة ان ايواسووها ويجون ويسالون لكن همه

تركوها ولا كانما بتهم عافوها القهرها وضيمها

بعد ان كعدنهن النساء الموجودات وحتى الملايه تقرا ام كرار جابت مره عجوز وكعدتها يم بيبي هديه وهنه كاعدات بالوسطه والملايه تقرا وهنه يبچن اني مدنكه حتى ما باوعت الهن الى ان كملن الملايه واجن يمي ويم بيبي وحضنني وهنه ايگللي ياخاله يامصيبتج

بقيت ساكته ما جاوبتهن واصلا ما اعرف ليش عيوني سكتن وياي ما نزلن دموع

المره الكبيره صارت تنعى وتبجي وبيبي هديه تكلهن // وين چنتن هسه اجيتن

جابو الهن ماي وصبو جاي وبيبي اتگول للمره العجوز // اتعذبت نجاة واتخبلت على ويلادها

وحده من العجايز گالت // عمت عيني عليج خاله

بيبي هديه هزت راسها // اي وشگد خابرنه اخواتها اخوانها يابه تعالو بس يوم يومين صبرو عليها احجو وياها

كلمن يكول ملتهيين

العجوز // صدك ملتهيين ام كريم

بيبي // بيش ملتهيين كلنه عدنا بيوت وهذا كريم هو ومرته يارايح ياجاي

العجوز /. يمكم مو مثلنه دربنا بعيد

- - ها هيج الحجي ام حاتم شو من ماتت واندفنت الدرب مو بعيد

عرفت العجوز تصير عمة امي ام حاتم لكن الي اتعجبت منه انو خالتي نظيمه كل شويه وسالتها عمه اجيبلج ماي

ومن تبچي ما تسكت خالتها تسكت عمتها

بوقتها استغربت من الي شفته مو انتي يانظيمه كنتي السبب انو جدي قبل يزوج امي الابوي من وره مصيبتج

لو انتي ام حاتم وين ما تمشيين تحجيين على امي وخالاتي مو انتي وبتج الي سولفتي الاهل شذى حتى ما يتزوجها صلاح

اشو هسه الكل صار اهل واحباب وامي بس طلعت غريبه

اتقربت مني خالتي غنيه وهي اتكلي // سوده عليه خاله راحت امج وما شفتها

نظيمه // لا وانوب دفنوها بعدين انطونه خبر عمت عيني عليج نجاة طوول عمرج عشتي بضيم وحسره

ام كرار // ماكو داعي الهلكلام مو وكته

- - شنو المو وكته ام كرار اختنه تموت وما يتانونه بيها

امل // ليش دادا ما تانوج بيها مو خابروكم ما اجيتن الاختجن

اي خابرونه وهي ميته ما خابونه وهي عدله

ام احسان // حبايب اختچن ما وگعت مريضه كل وگعتها ساعات وعبالنه تطيب وترجع البيتها

يحچن واني بغير عالم ما حجيت ويه اي وحده اصلا عفتهن ورحت للغرفه گعدت بيها وحتى طفيت الضوه

اجتي هدى ومنار واجن وياهن بنات اثنين اكبر متي عرفت هنه بنات خالتي غنيه گعدن يمي لكن اني خاله

راسي بحجري وما اباوع ولا اشترك وياهن بااي حديث

صبو الغدا واني اتمددت ما اريد اكل اي شي واجتي ام احسان جابتلي غدا لكن اني هزيت راسي يعني ما اريد

والكل طلع من الغرفه وام احسان هماتين اخذت الصينيه وطلعت وبيبي هديه اتحاچيني من الصاله

وج بيبي اكلي مو زين تبقين بدون اكل

ما جاوبتها ولان اتمددت ومحد بقى يمي صرت ابچي واحجي ويه نفسي = يووم ليش ما فكرتي بيه وين ابقى وعد منو

= هلگد اني وعلاوي ما النه وجود بحيث متي ورا رامي وهشام

= زين هسه اني وعلي شنو الي راح يصير بينه او وين نعيش وشلون

ما اعرف شگد مر من الوقت لمن ما حسيت بادين تهزني من صفحتي باوعت شفته علي

حضنته واني ابچي وهو يگلي ( ) اك عد ي ااوكلي ههاج عمو عاصف دزلج لفات

الي شفته عجبني يعني علي ما مهتم لان امي ماتت كلي /. ( ) ككافي وو جد هاج ااوكلي مو زيين تبققيين مما تاكلين

استغربت منه لزمته واني اهز بي =. علي ماما ماتت تعرف شنو ماتت يعني ما بقالنه احد وانت ولا مهتم

صرت اعيط واهز بي = حقيير جاي تگلي اكلي وامي ميته وانت ما مهتم

صرت احچي بهواي كلام وبعياط وما منتبهه النساء اجن بالغرفه ما انتبهت اله عمو عاصف اجه اخذ علي

اجتني ام احسان // شبيج خاله اتخبلتي علي المريض شنو ذنبه هالشكل تسوين ويا

صرت ابجي وما اعرف شحچي جابتلي ماي شربتني شويه وغسلت وجهي وام كرار گالت // عاصف من عرف انتي ما اكلتي دز كرار للمحل جابلج لفات شبيج خاله هالشكل اتصرفتي

ما رديت بس ابچي ام كرار استردفت // كلياتنا عبالنه علي ينصدم لكن عمج عاصف بقى يسولف ويا

ويفهمه صحيح بالبدايه بچى وعيط حييل بس عمج عاصف گله انت رجال ودمعة الرجال عزيزه ما تطيح بسهوله

ياالله خاله سمي بالرحمن واكلي لو شويه حتى تاخذين علاجج

= وعلاوي

- - ما بي شي عبد الله ابن عمج رحيم يگول ساكت ومابي شي

طلعت لفه وقسمتها اخذتها واكلت لگمتين وبعدها اخذت علاجي واتمددت هنه طلعن وسدن الباب عبالهن نمت

گعدن اباب الغرفه بيبي سالتهن // اكلت

- - يادوب لگمتين بس حتى تاخذ علاجها

وهسه نامت

اي عمه نامت

الله يساعدها يمكن من يوم المصيبه اليجاي ما نايمه

خاله شيماء اجت يم ام احسان وام كرار وهي تگول // صدك الي يموت يكطع بروحه شوفي سوالف اخواتها بس بولدهن وابني اشترى السياره الفلانيه وبتي ما تريد تدخل هاي الكليه

ام احسان // اي دادا ومحد سال عن المسكينه كلمن يكول ياروحي حتى ما چنها بت اختهن لا اجن يمها ولا صبرنها

شيماء // ما سمعتي غنيه شتحچي تگول مثل اهلها ما تريد احد ولو ما سعاد تخاف من عاصف چان صارت ملحمه

ام احسان بحسره // طاحت بيها نجاة والله يعلم شنو مضموم الهلمسكينه

ام كرار //. والله خايفه عليها ما شفتي شسوت بااخوها

شيماء // الله يساعدها عليها ضغط صدك منو كال العاصف واجه اخذ علي

ام كرار // هو دز علي باللفات لان سالني كريم البنيه اكلت اني كتله ما قبلت تاكل شي هو كايل العاصف وداز على

لفات وباقي واكف العلاوي ومن شفتها شلون اتهسترت رحت كتله وهو اجه

ام احسان // زين تسوين

سمعت مباوس وخاله شيماء اتكللهن // وين رايحات ابقن باجر الختمه

وصوت غنيه //لا عيني هناك احنهمسوين فاتحه بس اجينه اهنا اسقاط واجب واله احنه شنو النه بقى اهنا ونجي

اشو اختنا لا وكفنا عليها ولا شفناها

نظيمه // محله وانكسمت شعدنا باقيات اهنا

انصاف //. ومنو لزمچن ما اجيتن الاختجن انتن حتى بالجذب مخابره ما تخابرنها

غنيه // الكالج چذاب ومنافق

لا متوهمه شفناها بعيونه محد گالنه وهاي عمتي ام كريم ملت وهي تخابر بيكم

خاله شيماء //. غنيه خيه الله وياچن يصيحوجن الولد هم ياالله توصلن

نظيمه // اي طالعين عيني يالله عمه خلي نمشي

شيماء /. جا انتي خاله المن رايحه ما تبقيين

- - لا خاله ما اگدر وحاتم هم راجع ويه الولد

شيماء // ابقي وانا ارجعج

— - لا خاله انا اجيت اشوف امج واتبارى وياها الذمه

وراحن خالاتي وهنه ما سالن عليه ولا حتى وحده كلفت نفسها واجت باستني لو حجت وياي

وبس طلعن سعاد عبالك بالون وانفجر صارت تحچي //. مسويات فضل جايات اصلا منو مودي عليهن

بيبي هديه //. اسكتي عمه اجن الفاتحة اختهن

عمت عيني خطيه اجن جانن مهاجرات واجن

شيماء //. هسه انتي سعاد شتردين ترعدين بالصيف

والله لو ما حاسبه احساب العمتي ام كريم ويصيرن بنات اخوها چان طردتهن من البيت جايات يخوزرن ويباوعن

لو بيدهن حملن البيت

شيماء // كافي سعاد هذا الحجي مو وكته عيب

منين عيب

عيب من بت اخوج

لا تخافين طالعه عليهن نفس الوكاحه

شيماء بعيطه // ياوكاحه هاي سعاد ياوكاحه هي البنيه فكت حلگها

سعاد // عوزها اتفك حلگها حتى انعل سلفه سلفاها

خاله شيماء // عيب هذا الحجي منو سلفاها اخوج وابوج

ام كرار // شبيج سعاد اتخبلتي تره شفناج شلون تباعيلهن وتبسمرين بيهن

سعاد بعصبيه // ها كولي راحن من وراي

شيماء // اي من وراج كاعده وتخوزرين بيهن

عمتي انصاف // لا شيماء انا گاعده واتصلو على غنيه گلولها هسه نروح گالت خلي نبات الباجر اسمع يحجي وياها

بعصبيه وصياح شوف شصاير

ام كرار // اي اكيد صاير شي حتى بالچذب ما ودو على بت اختهم يسلمون عليها

صارت بيبي هديه تبجي بعبره وتنعى على امي وعلى شبابها وعلى بيتها وعليه وعلى اخواني والكل بچى وياها بعدها اجت الملايه

واني اجتني ام كرار وطلعت گعدت يم بيبي وهم بالليل اجتي بيبي نامت بالغرفه هي وخاله شيماء وثاني يوم كانت الختمه واكثر الناس راحو وبقن بس عماتي وبيبي وخاله شيماء وام كرار وصارت حركه بالمطبخ يسوون جاي وكله خاله شيماء هي ومنار تقريبا الساعه بالتسعه ام كرار گالت كريم خابر يردون يجون

بيبي كالت هله بيهم

اني بالغرفه اجتني خاله شيماء وكالت // خاله عمامج راح يجون اطلعي يمهم

هزيت راسي هي اتقربت مني وگالت //. بس من يصيحوج اطلعي لا تعاندين

باوعت الها هي هزت راسها //. اي خاله يجون يشوفونج ويسولفون عليج

جاوبتها باستغراب = ليش

خاله شيماء // شنو ليش ناسيه انتي ( اتحسرت ) استغفر الله خاله انتي هسه بقيتي بس انتي واخوج وما ندري شيصير

طلعت وخلت الباب مفتوح بقيت فاتحه عيوني على كلام خاله شيماء وهي اتكلي بقيت بس اني وعلي

سمعت عمو عاصف وهو يگول ياالله السلام عليكم وصوت عمو كريم وعمو رحيم والكل باس راس بيبي

عاصف. :: اشلونج عمه

هله بيك يمه الله يساعدك ع التعب

:: الحمد لله والشكر

بيبي //. مهدي وين

عمو كريم // راح هو واولاده مناك الشغل والحجيه ابحدها

عاصف :: ما جنت موجود من راحو

بيبي // وين رحت ؟

عمو رحيم // راح للمستشفى خشمه كل ساع وطك دم

بيبي //. شني عمه شبيك هاي الك يومين خشمك ينزف دم

:: ضغطي مرتفع

هذا كله من الجكاير

:: الله كريم محد يموت ناقص عمر

اسم الله عليك عمه اكلكم هم عدكم احد بالبيت

عمو كريم // اي حجي محمد وابنه

ها

عمتي امل // اي عمه باجر نروح هو اليوم العصر راح على بيت اخو

صدك هي مرت اخو اجت للفاتحه

اي عمه اجت وحاببتج

والله ما عرفتها ابالي ما اجت

لا عمه اجت

عمي رحيم // اكلكم اشو غزوان ما شفته

سعاد //. وصلني ورجع گال عده شغل

بيبي //. خواله كفو او وفو عساهم سالمين

بيبي // اكلك عمه

عاصف :: ها عمه گولي

بيبي //. اح اهل المرحومه ليش راحو

كريم // خو گولي ولد اخوي وبناتهم بعد ليش اتكولين اهل المرحومه

بيبي باوعتله بعتب // ما ناكرتهم اگول ليش البنات والولد راحو

رحيم //. اليسمع امي يگول عشرين رجال وخمسين مره اجوي للفاتحه هو بس حسين وحاتم

سعاد باستهزاء //. بس النسوان هواي الاجن خالتها وعمتها واخواتها ومرت اخوها وبناتهن

ام كرار //. اي بيهن عشر نسوان

وانا شگايله

بيبي // هسه نظل نسمع مناگرچن گلي عمه ليش ما بقو

عاصف :: يگولون مسوين هناك فاتحه

احچيلي الصدك

كريم // يووم عاصف طردهم

بيبي // ليش ؟

عاصف :: لان مو خوش اوادم

بيبي // شبيهم

:: يگلي بكل صلافه وكدام الديوان اريد اخذ ابن اختي وبتها وياي هناك ايعيشون يمي

اهنا رن تلفونه :: هاكم اتفضلو

طلع يرد ما عرفت منو اتصل بيبي سالت كريم //. اتعارك وياهم

كريم // حجيه لو ما ناس موجودين يمكن كتل حسين خلاص

ليش

مو هذا ابن اخوج ما يعرف يحچي ايگله اي حقكم ما اتعوفونهم راتب وبيت

بيبي // شماله هذا صدك ما يعرف يحجي

عمه سعاد // چا والحبايب من اجن ولا كانو اختهن المتوفيه بجن شويه گدام النسوان وتالي سكتن بقن يسولفن

ابيناتهن ويتبسبسن ويضحكن

بيبي // اي اليموت من فكر روحه

اجه عاصف كريم كله //. شبيك عاصف من خابرك

العار الثاني ابو الخارج

ها وشيريد

يحچيلي بالحقوق ويريد ايعلمني الاصول ،

بيبي //. مي خالف عمه همه هم اولاد اختهم

عاصف :: عمه رحمه الاهلج شنو ابن اخته شني بت اخته شتحچيين

بيبي //. بس ما يستوجب اتطرده

:: ما طردته گتله ابو علي اتغديت وشربت چايك هلا بيك

بيبي //. هاي طرده

:: عمه ما اريد تنفتح دفاتر قديمه

شيماء // بس همه خوالهم

عاصف :: خوالهم ما ناكرينهم والناس كافيين نفسهم خير شر وكلام حسين اسقاط واجب عود شوفوني انا طالبت

بولد اختي وعمامهم ما ينطوهم

شيماء // بس يبقون خوالهم

:: ما ناكرهم بالنسبه الوجدان وعلي مسؤولين مني وين وجدان ؟

خاله شيماء // بالغرفه

كريم // ليش ما تجي لهنا تكعد

سعاد // شني هي تطلع من الغرفه كله بيها

ام كرار // لا تطلع من تجي الملايه

سعاد //. اي ومن تخلص ترجع

بيبي تفر بايدها لان اشوفها // ههههي ياعمه شنو هالمسكينه شتعرف

بيبي سالت عمي عاصف //. ذاك المسكين سمع بعده

اتنفس بعمق :: لا بعده

وشنو اتگلوله

:: اي انكله قابل هي مضمومه

عرفت يحچون على هشام طلعت بسرعه من الغرفه حچيت والعبره متكسره بصدري =. عمو من تروح الهشام اخذني وياك

هز راسه وهو يعض بشفايفه :: يصير خير

عمو رحيم // تعالي بابا تعالي

وصلت يمهم عمو كريم وكف واتقرب راد يبوس راسي بس اني ابتعدت تلقائيا بخوف هو گلي

البقيه بحياتج بابا شدي حيلج

عمي رحيم // البقيه بحياتج

عاصف باوعلي وگال. :: جمعي ملابسج انتي وعلاوي حتى ترحون وياي

باوعتله هو استردف :: طلعي اوراقكم الجناسي وبطاقة الكميه

كريم //. والسياره

 يمك تشوف الها شراي

= عمو وين نروح ؟

بيبي // ترحين ويه عمج البيت جدج

  هزيت راسي وباوعت العمو عاصف = بس اني ما اريد اروح اريد ابقى اهنا

عاصف رد عليه بكل هدوء وهو ينفخ الدخان :: لا عمو ترحين لهناك لان بعد ما بقالج شي اهنا

لاول مره اتمنيت يكون ابوي موجود حتى من احجي ويه عاصف ما اخاف صرت ابجي حييل واهز براسي يعني ما اريد اروح

الاي مكان اريد انتظر هشام هشام الي بقالي هو وعلي من اهلي

الفصل السادس عشر من هنا 

شكرا لزيارتكم عالم روايات سكيرهوم