رواية ارحموني ولو رحمة مرة الفصل الرابع عشر 14 بقلم فراقد حسن علي

فرح /ابويه وعمامي ابد مايحاجوني 

وأحسهم محمليني ذنب الهوسة الصارت 

-حجروا عليه وسجنوني باب الحوش بعد ما اشوفها 

-فوك حبس أبويه وعمامي اليه ،،

أني هم حبست روحي وكمت ما اطلع من الغرفة ابد ،، على كد الروحه الحمام 

وشوكت ما اجوع اروح اكل لكمة من المطبخ وارجع 

-وأسمع السوالف الطلعت عليه اشكال والوان

-وامي كل ماتطلع للسوك 

لو يجن يمها النسوان 

علمود الخياطه ويرحن 

تكعد وتشبع بجي 

-تكول أسمعهم مره يكولون

-بت باسم عدها علاقه وين ابن عمها

-ومره يكولون معيوبه وهيج سدوا سالفتها

-ومره يكولون ابوها شاف ابن عمها دكتور

وطمع بي بعد ما تزاعلوا سنين

-وانوب من حبست روحي 

النسوان اليجن يخيطن يم امي 

طلعن سالفه عليه لان امي تسولفلهن

-كالن عليه هاي تلبسها جن طالح 

بيوم حنتها لان حبست روحها بالحمام 

وهي عروس وجانت نظيفه

-وحسيت حتى خواتي كامن يخافن مني

من وره هاي السالفة 

-كمت أخلص النهار كله بس نايمة حتى اخلص من الحجي والكاله 

-واكعد بليل وحدي بالحوش

واظل اباوع للسماء 

واسولف ويه رب العالمين

كولشي البقلبي وبعقلي اسولف وياه

مااعرف صح لو غلط الكلام اليطلع مني 

بس اعرف هو يسمعني ويفهم نيتي شنو

1 

طخت براسي سالفة ليش بليل ابقى كاعدة واتصفن ،، انوب خفت لا صدك أتخبل 

لو يتلبسني جن طالح لان اكعد وحدي

-كمت أروح للمكينة مال خياطة

وامي شنو عايفة من خياط أغلق الباب واكعد أخيط

-مكينة امي وشغلات الخياطة مخليتهن بغرفة وحدهن لان يجن النسوان يكعدن بيها 

ويبقن يسولفن ويخلصن الوكت ويمشن 

يعني مانكعد لو نام بيها 

-وباقي البيت كله مستغلينه 

-امي وابوي ينامون بغرفتهم 

والغرفة الثانية بيها كنتور ملابسنا 

ونضده الفراش وباقي غراضنا 

-بس أحنا البنات نام بالهول علمود التلفزيون 

-والديوانية دائما نظيفة ومغلوق بابها 

على جيت الخطار نفتحها

-فغرفة الخياطة صارت سلوتي 

كمت بكيفي أفصل وأخيط 

واخلي قماش من هاي القطعة على هاي القطعة يعني أطعم الدشداشه او النفنوف 

لو اصفن واسويلها تصميم من خيالي

بالاخير يطلع الشغل حلو ومرتب  

-امي بالبداية من خيطت تقريبا ٤ دشاديش 

على فكرتي وتصميمي ،،كامت تحجي عليه

وراحت واشترت قطع قماش للناس بدالهن

-شوفت أمي أخياطي للنسوان

وتعتذر منهن عود لان ماتدري بيه 

واني خربت ألقماش

-الصدك عجبهن شغلي وكامن يجيبن قماش ويكوللي انتي خيطي بكيفج

-اني شنو بعد مخبل وجلب بخرخاشه

-ضايجة وحزينة ومتكأبة ولكيتلي ونس 

وهاي السالفة تشجعني وتطلعني من الأني بي

-كمت اخيط ليل ونهار ،،

وبس اشتغل وما اسولف ويه أي بشر 

يعني ما اسولف ويه النسوان التجي 

وكلت لامي تاخذ أقل أجره من قبل

حتى يجن النسوان علينا  

اركان/من يوم صارت سالفة الكعدة بعد ماوصلت للمحمودية 

-كلها بجفة وراشدي عمي نوري بجفة 

بوكتها صرت بكد العصفور

-عرفت فرح طلعت للبيت واوضاعها زينة 

لان امي وابويه يرحون ويرجعون عليهم 

-بس يكولون مانشوفها ابد ماتطلع علينا

واهلها يكولون حابسه روحها

ويكمن صاير بعقلها من الضرب

ومتلبسها جن

-اما محمود يلوب عليها 

بس ابوي وعمامي منعوه يوصل لهناك 

لحد ما مخلد يطلكها  

-كالوا مو حلوة بحق سمعة البنية وهي بعدها بذمة رجال 

ويطب لبيتهم ابن عمها الناهي عليها

-رسل بعد أيام قليلة على ولادتها

اخذتها ورحت لبيت جدي 

واخذت امي ويانه لان تستحي تروح وحدها

-الصدك اريد اهج وارتاح من نگ رفل 

كل ما ادخل البيت والكاها تعوي وتبجي

يافرح ياطلابة فرح 

-ويومية بليل تكب عركتهم 

وألصبح اشوف محمود نايم بالهول 

وهي تنزل تسويله ريوك 

عيونها مبقبقة من كثر البجي

-الصدك اني هم أستخطيتها 

وكعدت وسولفت وياها

-يابه ترى البنية بعدها بذمة رجلها ومنعرف شوكت يطلكها

وميصير محمود يروح عليهملان مو حلوة بحق سمعتها

-انتي لا تبقين تحركين بروحج هي بعدها ماجايه ،، عود من تجي شوف شلون تتراهمن

-انوب الاحظها كامت تنعاد وكلشي محمود يمنعها منه تسوي 

-ابسط شي يكلها لا تطلعين للمحل 

تردين شي اخذي امي وياج 

لو دزيها هي تروح تجيبلج 

لو تخابريني،،وهي بالعناد تطلع 

-لو تمد راسها من الباب 

تصيح على واحد من 

جهال الشارع يشتريلها

-لو تعلي صوت التلفزيون على كل صوته

والاغاني الخليجية التردح ،، وطرب الزن 

-كمت اهج من البيت من الهوسة 

اني اتعب بالدوام شغلنا وكفه وتفتيش

من ارجع للبيت اريد ارتاح 

بس اشوف رسل تلوب هي هادئة بس خطية تتوجع وتتألم من الحمل ومابقالها شي وتولد

ومنا نحيب رفل وكلساع وتكب عركتهم 

-عاد كلت خلي انهزم بهذا اليوم لبيت جدي 

واغير جو 

-دخلنا لبيت جدي  

وتلكتنا خالة سهام وخالة هناء

وبنات صغار كل أثنين يتشابه شكلهن

-بعد ماسلمنا وكعدنا ولن تدخل وحده 

طولها بكد البانيا البترة 

كصيرة ومدهربة ومليانة  

بس وجهه مال وحده بعدها طفلة 

هناء /تعالي سلملي شبيج أنصكيتي بالباب

كوثر/شلونج خالة فاطمة 

فاطمة/هلا بيج يمه 

شحلوج صايرة وشحلات عيونج

ليش ماتنزلين تسلمين علينا من نجيكم

كوثر/استحي اسلم من يجي خطار

هسه نزلت صدفه ولكيتكم 

هناء/هي خجولة وما اتسلم على احد

حتى من نروح لبيت جدها حامد 

تعزل روحها تخجل من خوالها وخالاتها

اركان/اااخ هي هاي كوثر 

متقيد ما اكدر اكوم وأخبزها هسه 

-بسيطة اني الج وين ترحين مني 

متحلفلج من هذاك اليوم

-أجوي عمامي من الشغل وتجمعنا على الغده

ورسل فاتحة حلكها ومتعجة 

ماشايفه هيج اجواء من قبل

تشاورني وتكولي//حلوة حياة العرب 

وبساطتهم وحجيهم 

واحلى شي جهالهم حلوين

-كامن البنات هذني الصغار وشالن السفرة 

ومسحن الكاع 

وهي متعجبة عليهن وعلى ندارتهن وشطارتهن

-راحت ويه البنات للمطبخ 

وره شويه جابولنا الجاي 

-اني اشرب الجاي فاهي

يعني لازم شكره قليل مااحبه حلو

-اخذت كلاصي ورحت للمطبخ 

لكيت رسل ،،منى ،،وكوثر 

-يبووو عيد وجابه العباس اليه 

-تعالي لج انتي شحاطه ديدي!!

كوثر/هاا ،،اني ،،صحت عليه 

-شنو شحاطه ديدي هاي ؟؟

اركان/شبيج كمتي تمتمتين 

-شحاطه ديدي أعلان مال شحاطات

جان يطلع كبل بقناة الشباب 

وانتي جنتي فرده وحده من الشحاطات

-فاتت من يمي بسرعه تريد تطلع 

واني لزمتلها باب المطبخ 

لزمتها من كصيبتها

كوثر/اااخ عفيه عوف جذيلتي

اركان/هاي كصيبة لو بطل ببسي دبل

كوثر/كول ماشاء الله ،،جذيلتي اقل وحده بالبنات ثخن

اركان/شتخلين لشعرج 

شوفي مرتي خطيه شعرها خفيف 

كوليلها خلي تسوي نفسج

-اني جذب اريد بس اضوجها 

ومااكدر احجي لان البنات موجودات

-ورسل لكفت السالفه لان عرفتها 

هي الخابرتني ومدت السانها البلدوزر عليه 

كوثر/اخليله بس حنة واعجنها بنفط وكوجرات

-وبعد الحنة من أغسلها أخليله زيت الزيتون 

ومنكعه بي فلفل داره

-واغسله بس مرتين بالاسبوع 

بشامو اطفال

أركان /شكثر انتي خايسة اذا بس بالاسبوع مرتين تغسلين 

اكول شعرج خايس مثل السانج مو؟؟

كوثر/الله يخليك عوفني 

وما ادري بيك انت جبير عبالي بكد أخوي عثمان 

اركان/هاااا يعني تعرفين نفسج غلطانه

اذا مازوجتج لعميد شاهين اني فلا اركان 

كوثر/منو هذا انوب ،،

ظلوا عليه بس اهل العمايم

اركان/ههههه منو جاب طاري العمايم عميد يعني زلمه عسكري صاحب رتبة ومنصب بالجيش

كوثر/الله يخلي لأمه 

اني شكو بي ،،عرفه ولفه

اركان/اااخ ولج لسانج موشر توشر عليمن طالعة 

كوثر/امي تكول انتي طالعه

على خالتج رجاء

اركان/عوذه من هل ألاسم تف وبره ،

امشي أنقلعي من كدام خلقتي 

-تعاي أعتذري وروحي 

كوثر/اسفة عمي مو قصدي اغلط عليك

اركان/ههههه حلو هاي مال عمي

يلا روحي ،،

-اكول تعاي وين رايحة ؟؟

اخذي مرتي وياج خطية ضايجة  

كوثر/تجين اوديج لساجية المي هناك بالزرع حلو مكانها

اركان/روحي عيوني افتري وغيري جو 

بس البسي عبايتج ،،اذا تعبتي ارجعي لا تبقين تفترين 

-ماروكو حبابه صبيلي جاي مر 

مو فرد نوب قليل شكر

-هاي شبيها هيج تباوع عليه ؟؟

منى /اي هسة تدلل 

روح للهول واني اجيبه وراك

انطيني كلاصك اجددلك بي

اركان/اكلج وين فرح شو مختفيه

-اتقدمت عليه واني بعدني على وكفتي 

باب المطبخ ،،والبنات راحن للبستان

-هاي شبيها أيديها ترجف من اخذت مني الكلاص؟؟

منى /هناك بهذيج غرفة الخياطة 

اركان/اني رايح يمها اذا مصير عليج زحمه بس لا تنسين الجاي

-لاحظت كل البنات مفرعات كدامي 

الا هي لافه المشمر على راسها

-دخلت على فرح للغرفة لكيتها كاعدة وتخيط 

-الگوه ،،شلونهم الطيبين 

فرح/الف هلا بيك 

شلونك يالزين 

اركان/الحمد لله انتي شلونج

-فتحت الباب وخليت 

كدامها طابوكه مغلفيها بقماش

تقدمت وكعدت يمها 

وهي تركت الخياط وعدلت كعدتها كبالي

فرح/اركان ما اضم عليك تعبانة وعقلي وجسمي مكسرات 

-ولحد هسه احس مكان الكانونات والابر 

يوجعني 

-الله وكيلك بالمستشفى هروني هري

كلساع جاكيني 

اركان/الله يساعدج ،،وكون الج اجر وعافيه

-واني هم أخيج ،،بعد لا تكولين كلمه 

هروني هري ،،

او أنهريت مثلا من التعب

لان تعتبر فشار هناك بغداد 

وبالذات عند الولد يفتهموها غير شي

فرح/هاا ،،لا والله مااعرف معناها 

مو قصدي اكول كدامك شي مو زين

اركان/لا ماصار شي ،،

سولفيلي عنج 

شلونج اخبارج

-تعالي ماروكو شبيج فوتي ترى نسولف 

امور عاديه ماعندي شي خاص

منى/هاا ،،اي هسه بس اصب اليه جاي واجي

اكعد وياكم

فرح/اركان اني تعبانة وعقل ماظل براسي

هواي افكر واكول شنو ذنبي 

لا اني للسماء ولا اني للكاع

-احجيلك الصدك جنت أحس نفسي 

شمعة مشعولة وتضوي للكل 

-وبيوم خطبني مخلد هواي فرحت 

لان حسيته صدك رايدني ويحترمني

-وهذا الضوه والطاقة العندي كامت تشع اكثر

من كثر الفرح البداخلي 

-بس فجأة بيوم وليلة طفى هذا الضوه

وتحول هذاك الفرح الى حزن ومرض

وصرت عبارة عن نار واكل أبروحي

-اركان اني يومية من كثر ألتفكير 

أحرك بروحي حرك ،،كمت احس نفسي كورة مال نار مشتعلة من القهر والحزن

بس اكول ذنبي بركبة منووو 

اركان/ما اكدر كلشي اكول بس الله يسهل أمورج ويهدي مخلد ويطلكج وترتاحين من هاي الربطة 

-فرح ترى محمود يحبج ويموت عليج من الصغر وهو يكول فرح مرتي 

مالتي ومتصير الغيري 

-وأحنا نهينا عليج مو علمود نوكف بطريق سعادتج لو نقهرج بس لسبب اخر انتي تعرفي

وهاي النهوه المصلحتج

فرح /ااااخ ياخويه ،،

ادري واعرف لمصلحتي

بس شنو ذنبي بكل الصار 

-والله الضرب الحصلته البعير 

مايتحمله يوكع وينوخ

- اي شلونه دوامك،،زين لو شلعان كلب 

غيرت كلامي لان منى دخلت 

-تعالي فوتي شبيج بس تصفنين 

وكلساع جامده

اركان/اكلج لا تستغربين مني 

ياما شلتج ،، ولعبتج ،،

وبسطت هاي القزومة علمودج

منى /لا مو أستغرب بس مامتعودين نكعد ويه ولد كبار ،، احنا نعرف بس عثمان وخالد ولد عمي أحمد وهم صغار

وجاسم ابن عمي محمد هبش دائما نطرده لخالتي

اركان/هسه شلون ،،

يابه اني طالع كاعد بالهول

اخذن راحتجن 

-عجيبة هاي البنية شبيها ؟؟ 

حتى ما تعرف تسولف وتحجي مثل الاودام 

وبس تباوع بوجهي امرها عجيب

-بقينا كاعدين وسوالف وجاي 

ولن يطب عمي نوري وعايلته

صح سلمت عليه بس سلامي ثكيل وياه 

وماخذ على خاطري منه 

نوري /يابه اركان اذا جنت شايل بخاطرك عليه

اني هم أبوك أعذرني 

-وجان لازم أسوي هيج ،،

حتى أكسر عيونهم 

-وأني أعرف بزواغير وسوالف العشاير أكثر منك 

-وبوكتها لو مو أني ضاربك 

او واحد من عمامك 

جان ثبت علينه الحك 

انك متقصد كتلت الزلمه 

-بس هاي الضربه صارت مانع لهذا القصد 

ولفتها من درب عصبي

ويريد يهدئ الوضع والهوسه 

-يابه سوالف العشاير ولوفاتهم 

وزواغيرهم انت ماتعرف بيهن

-وأني هل أوكع على راسك واتعذر منك 

اركان /لا بويه العفو منك 

اني أبوس راسك ،،وايدك بعد 

لو ماحكمتك ومعرفتك بهاي سوالف 

ماتنسد المشكلة ،،عساك سالم وتدوم خيمة على روسنا 

-للمغرب أخذت امي ورسل ورجعنا للبيت

-امي هواي ترتاح من تروح هناك لبيت جدي

تكول حتى الهواء عندي يختلف

-ورسل هواي تونست ،،

وحبت البنات وطيبتهن

تريد تروح مره ثانيه ،،

كتلها من تجيبين اوديج

-مرت الايام ماكو جديد 

بين الدوام والبيت 

-بس رسل تأخر موعد ولادتها 

اوديها للدكتورة تكولها //كل أمورج طبيعية أنتظري 

-وأمي تكول ماعليها شي يسموها

((معوشره يعني داخله بشهر العاشر من الحمل ))

-وانوب ترجع عليه والله أنت تاكل من بره ،،

وأكيد ماكل لحم جمل وهل أتاخرت بالولادة

هسه أني شعليه هي الحامل لو أني 

-ورح يا أركان للديرة دور وبر مال جمل 

أمي تبخر بي رسل علمود تجيب

-لكيت ظفيرة مال وبر الجمل 

عند بيت عمي أسحاق

أنطوني شويه ورجعت للبيت

-وامي سوت بخور وخلت الوبر وياه

وطفرت رسل من فوك البخور

وبخرتها بي 

اريد أشوف صدك تجيب بعد هاي التبخيره

والله سوالف النسوان أدوخ 

محمود/كل الهوسه التسويها رفل اعذرها واكول حقها مراه وتغار وتريدني بس الها

-كعدت وياها وفهمتها وحجيت بكل هدوء

-يابه البنية مااعرف شوكت رجلها يطكلها

وعود من تصير بذمتي ما افرق بيناتجن

ويوم يمج ،،ويوم يمها ،،

-وانتي تبقين عزيزة وغالية على كلبي 

رفل/خلي تولي شلك بيها 

وبعدين شلون تساويني وياها 

اني تزوجتني بنية وهي لا مو بنية 

محمود/شلون مو بنية ،،منين تجبين هذا الحجي

رفل/لعد على شنو صارت 

كل هاي سالفة والهوسة غير انت ماخذها من هي طفلة

محمود/نور النبي ينور عقلج 

يعني مو ذنبها جانت هي طفلة وماتفتهم واني الوحيد المتكشف عليها وخطية تنذبح وهي مظلومة 

رفل/روح كول لرجلها ترى هي مو بنية وكوله جانت طفلة وماتعرف

وخلي هو يتزوجها ويستر عليها

محمود/يابه أفتهمي مايصير هذا الحجي،،هناك ناس عرب 

وتفكيرهم مو مثلي ومثلج 

-هناك عدهم بياض البنية توكع علموده عكل 

وتصير بيها دماية وسوالف عشاير

-وماعدهم يفكرون متعورة 

او متعرضة الحادث

كبل يكولون مو شريفة وطالعة عن الطريق

ويذبحوها بدون اي تفاهم 

رفل/اني مااقبل تجيبها ضره عليه

محمود/تبقين انتي الاولى ومكانج محفوظ 

وتبقين معززة ومقدرة 

-هذا الحجي كل يومية ينعاد 

ونفس الاسطوانة تنجرخ  

وماكو فايدة حجي الليل يمحي النهار

-كامت تعاند وادري بيها ادور مشاكل 

حتى أمد ايدي عليها وتروح زعلانة لاهلها 

-بس هذا شي باحلامها 

لو تعلب دعبل بالعناد

والخباثه بالبيت مااحاجيها

-انوب طلعتلي بسالفه انت ماتريدني

وحتى كمت اغار من رسل واضوج 

من اشوفها تنزل بليل تغسل

-يابه انعل ابو المايريدج 

بس خلي اخلص من النگ

كمت اتقربها كل ماتصيرلي فرصه 

-انوب كامت تضوج وتتحجج 

-هاا شنو انت ماتشبع 

احتاريت وياها

-من الأخير كمت كل ما أدخل للغرفة 

يافرح يامصيبة فرح

-يابه فرح هسه يمج ،،بكربج ،،جاية صوبج

حتى مانعرف شوكت رجلها يطلكها

-اخلص نفسي من دوخة الراس 

اخذ المخدة والبطانية ،،

وانزل جوه انام بالهول 

-والله ماكو احلى من الهدوء وراحت البال

-صادف يوم الاحد ماداومت ،مالي خلك 

عندي أنفلونزا وباردة بشهر الواحد

وتمطر بس يعجبه الواحد بس يلف راسه وينام

-نزلت واشوف رسل تلوب تروح وترجع من الهول للحوش للمطبخ

-الله يساعدهم ،،هااا خويه خيرج 

رسل/خالة تكول راح تجيبين

محمود/يالله تكومين بسلامة 

خل اشوف امي هي تعرف بهل سوالف

حتي اخابر اركان وأوديج للمستشفى بين ميوصل 

-دخلت للمطبخ ولكيت امي واكفه على الطباخ

-الله يساعدج يمه ،،شنو هذا القوري

فاطمه/يسعد بختك يابعد امك واهلها

-هذا بطنج وهيل ،،افوره للبنية علمود تسهل ولادتها

محمود/هي شنو عدها ولاده 

لو انتي من يمج تنطيها هاي سوالف

فاطمه/اي يمه عدها ولاده 

بس بعدها بدايتها لان بچر تتاخر 

ولادة الولد اصعب من البنيه

محمود/لعد بدلوا وجهزوا غراضكم اخذكم

لمستشفى الكاظميه بين ميوصل اركان 

فاطمه/لا يمه هي وامها يردن بمستشفى 

الولادة العام لان نسوان اخوتها يجيبن بيها 

ويكولن عليها خوش مستشفى

محمود/بكيفكم بعد الكاظمية هم خوش مستشفى وهناك العناية الطبية ما عليها قصور 

-اتصلت على اركان وبلغته احنه طالعين 

للمستشفى 

-بين مالبسن وحضرن امورهن 

اتصلت على أبويه يرجع للبيت بقى فارغ

اخذت امي ورسل ورفل وطلعت للمستشفى

-وصلنا للمستشفى

دخلت جوه وحدها ميقبلون احد يدخل وياها

-نص ساعة وطلعت 

فاطمة /هااا يمه بشري 

رسل/خالة هاي الدكتورة تكول بعدج 

روحي وتعالي المغرب 

محمود /اتصلت على اركان كتله يرجع للبيت

واحنا هم رجعنا 

اركان/رجعت للبيت بين ماسبحت هم دخلوا

صليت الظهر 

-وامي ورفل كملن الغده 

وراها اخذت رسل وطلعت امشيها

انوب الجو مغيم كلساع تمطر الدنيا ،، وتوكف

رسل/فدوة رجعني للبيت بعد مااتحمل خابر امي خلي تجيني نروح للقابلة أحسن 

اركان/بس لا تبجين كلبي يوجعني عليج

-ليش تروحين للجده مو المستشفى أحسن وانظف

رسل/ما اريد اروح مره ثاينة هناك 

مايرحمن وحده الله لا يوفقهن  

اركان/ليش شبيهن وياج

رسل/والله أسلوبهن مو حلو 

الدكتوره كامت تغلط عليه ،

-لان كتلها والله استحي من الفحص عاطت بيه ،،

تكولي/ بس بليل متستحين 

من تنامين ويه رجلج وتسلمينه روحج 

-أنوب البردات عافتها مفتوحه 

والغرفه بيها بعد بنات

والله هواي أستحيت ،،

-وأذتني بالفحص ،،من شافتني كمت أبجي 

كالتلي /لا تتعايرين روح 

وتعالي المغرب بعدج مو هسه تجيبين

اركان /خلي تولي هاي المستشفى 

اوديج على غيرها 

رسل/لا اريد اروح للقابلة أحسن على الاقل تسترني  

اركان/ما اعرف بهاي سوالف

هسه أجيب امج واجي 

واشوف امي وامج شيكولن

-رجعتها للبيت تبجي وتلوب 

اخذت السيارة رحت جبت امها واجيت

وبعد نقاشات عسيرة وهاي تكول وذيج تقترح صفن على راي نرجع لنفس المستشفى 

لان هي مخصصة للولادة فقط

واكيد مو نفس هاي الدكتورة موجودة ونسوان أخوتها يجيبن بيها وخوش بيها عناية 

-صلينا المغرب وتعشينا بسرعة 

-ورسل بس تبجي وتلوب 

وامي وأمها كلساع 

ومشرباتها كلاص بطنج وهيل

وانوب شربنها شيشه زيت خروع

خلنها تبحث بالكاع من كثر الألم 

-المسكينة أنتهت من الوجع 

رجعنا للمستشفى واخذت امي وامها ولحكنه محمود ورفل بسيارته

احنا الزلم نبقى جوه بصالة الانتظار 

والنسوان تصعد وياها فوك

رفل /انوب بنات الجلاب 

مايخلن وحده من عدنه تطب تشوفهاولا هن يتحاجن ،،كل ما نسال عليها يكولن بعدها 

- ب ٢ بليل طلعت وحده تبشرنا

ولزكت تريد بشارة 

-أخذتها ونزلت على اركان ومحمود جوه بصالة الانتظار

اركان /نزلت رفل كالت الحمد لله جابت رسل 

-وأجت وياها السستر تبشرني اجاكم ولد علساس ما ادري راح يجينا ولد 

-هي وحده أجت ويه رفل تبشر أنطيتها كرامية شو هذن طلعن كورة مال زنابير ما ادري من وين طلعن أني أنطي بجهة،،ومحمود ينطي بجهة ثانية 

-طلعونه رسل وره شوية أباوع عليها منتهية جابتها الممرضة بالعربانة  

كالت// تعالوا لطابق الاستراحة 

-رحت وراها دخلونه لصالة جبيرة 

وبيها بنات هم موجودات والدات

وهنا يرتاحن

-سودة عليه رسل تون وتبجي متوجعةومابيدي شي أسوي ألها 

-شويه وجابوا أسلام بحاضنة وخلو يمها وكفت على راسها الممرضة كالتلها رضعي 

-وهي متكدر تكعد سودة عليه مسويلها عملية داخلية وكلش متأذية منها لا كدرت تكعد 

ولا تكدرت تشوف ابنها وتخلي بحضنها وظلت بس تبجي متأذية 

-أخذت الطفل ونزلته جوه لابوه يشوفه

وهم يروح يشتريله ممية وحليب

خطية مبين جوعان 

-أخذه محمود وبوسه من كصته 

وأذن وكبر بذانه ،، وانوب نطانياه 

-أباوع عليه كلش صغير وناعم 

ويحرك بحلكه ،،

يبجي بس صوت بدون دموع

رفل/اركان روح جيبله ممية وقوطية حليب وبطل مي ،، لان جوعان ومتكدر رسل ترضعه

خطية متوجعة

اركان/شبيها لا تخوفيني عليها

رفل/هاا ،مابيها شي 

حالها حال كل الجابن بس هي تعبانة خطية 

اركان/الحمد لله من كامت بخير وسلامة

-هسه اروح وارجع بسرعة اشتري لوليدي 

حليبه على حجاية جديتي الله يرحمها

-محمود ديروا بالكم عليه 

هذا وليدك مااوصيك عليه 

رجعت للمستشفى اسأل 

كالوا //اشتري من عدهم 

عاد امي تخشخشت هنا وهناك 

وأشترينه من العاملات ممية وقوطية حليب

-صعدت رفل واخذت أسلام وياها

وبقينه اني ومحمود كاعدين جوه

وابويه وابوها كلساع متصلين 

ظال بالهم على رسل والطفل

-لل ٦ الفجر كالوا أطلعوا 

بعد ماكملت معلومات بيان أسلام 

وكالوا بعد أسبوع تعال أستلمه

ولقحوا الطفل ،،

وكملت كل أجراءات الطلعه

-نزلوا رسل أباوع بوجهها صفره كركم

دافعتها الممرضة بالعربانة 

وصلتها لسيارتي 

-بس وكفت وأشوف الدمايه نزلت 

وتسيح على رجليها

اني من يمي خفت 

-يمه تعاي هاي ليش هيج 

خاف صار بيها شي

فاطمه/لا يمه لا تخاف مابيها شي

لان هسه جايبة 

-هاك أفرش هاي البطانية على الكرسي

وصعدها يمك بالصدر 

علمود تمدد رجليها لان متأذية 

-نفذت كلام أمي لان كلشي ما افتهم 

ولا اعرف بهاي سوالف

شلت رسل وصعدتها يمي 

-يمه أصعدي بسيارة محمود علمود أسلام 

التدفئة ماتشتغل عندي 

-صعدت امي وأم رسل ويه رفل ومحمود

وأسلام بحظن جديته ام رسل 

-خرب كصة كوثر لا تبجين شبيج 

رسل/مو كتلك ماارجع الهاي المستشفى 

لعبن بيه طوبة 

-باوع اني جبت وطلع الطفل

والحقيرة كصتني بالمكص ولا رحمتني

ولا كالت خطية هاي بشر جوه أيدي 

-انوب خيطت ٦ غرزات بدون تخدير

كمت أصرخ لرب السموات من الألم 

جان تضربني على فخذي بكل قوتها 

تكلي// أنجبي صوتج فضحتينا مو بس أنتي جايبة 

-والله وجع الولاده أهون من وجع الخياط

ابد ماكو بقلوبهن رحمه

-كتلها/ مو جبت ليش كصتيني

تكول /هاي مسؤولية ولازم كل وحده بچر تنكص

هسه لو مخليتلي تخدير ميخالف

حسيت وكف كلبي من كد الوجع والالم

والله شفت الموت بعيوني 

أركان /مو ك ..... ماعليها عتب 

هي الك... شلون تصير بعد حمرة خضرة

لا بكلوبهن رحمة ولا ذرة أنسانية 

-بس هن موصوجهن صوج العينهن بهيج مكان

المفروض يسموهن شياطين التعذيب

بدل ملائكة الرحمة بنات الكلب 

عدهن ارواح المرضه هينه الساقطات

-وصلت للبيت وأمشي بهدوء 

خطية تتأذه بالطسات وبس تبجي متأذية

-عيوني أخذج لمستشفى أهلي 

لو دكتورة أختصاص 

رسل/الله يسلمك عمو ،،يتربي بحظنك ودلالك

اركان/اي جدو عادل واني شنو ماتباركلي

عادل/وانت شكو قابل طلكت ولدت بمكانها

-بالعافية والخير يابه ويتربى بحظينك 

ويكون من الاولاد البارين 

وتشوفه زلمه وتجهزه بيوم عرسه

اركان/بوست أبويه على راسه 

الله يعافيك بويه بوجدك ان شاء الله 

تزفه على ايدك

محمود/شلونك جدو اني أجيت 

ام رسل جانت شايله أسلام ودخلنا كل أحنه للغرفة

عادل /الف هلا بجيتك يابعد جدك وطوايف جدك

الف صلاة والسلام على رسول الله

اركان/يابه غير جان معتقل بطن امه

هسه صار عليه افراج 

محمود/من عاب هل لسان ماتعرف تسولف

غير بس بالشغلات العسكريه 

فاطمة/صلوا على محمد واهل بيته 

وخروا عن الولد لا تباوعون بوجه مايصلح لا تنظروه 

محمود /عليه افضل الصلاة والسلام 

هاك أستلم سوالف العجايز

اركان/كل البيت فرحان بجيه أسلام

امي ورفل أستلمن رسل غسللها وبدللها 

-وامها كالت// بس اروح للبيت وارجعلكم اشوف ابوها خطية ماله خلك واكع انفلونزا 

راح محمود يوصلها

-اني لهنا حدي طفيت وقفلت 

درب المخده وين دلوني 

تركتهم وصعدت نمت 

- مااعرف شكد نمت 

وفزيت أمي تنده بيه 

-كوم يمه مريتك تخربطت 

الحك اخذها للمستشفى .........

الفصل الخامس عشر من هنا 

شكرا لزيارتكم عالم روايات سكيرهوم