رواية ارحموني ولو رحمة مرة الفصل الخامس عشر 15 بقلم فراقد حسن علي

اركان /ما اعرف شكد نمت كلش نعسان وتعبان ماصدكت لزمت المخدة ودرب السريع

أحلى نومة دافية بجو بالمطر

-فزيت أمي تصحي بيه ،،

بس ما اريد أفتح عيوني متعاجز 

بعدني كسول وماشبعت نوم 

فاطمه /كوم يمه أركان شو أصحى 

مريتك تخربطت كوم 

الحك اخذها للمستشفى 

اركان/فزيت وكفت على طولي مخروع مفتح عين ومغمض عين 

-يمه شبيها رسل خوفتيني؟؟

فاطمة/يمه صار ساعة من صعدلك أخوك ندهك وكتله// أي كعدت هسه نازل وراك وانت ماكو ،، هل صعدتلكً

-مريتك عدها نزف قوي 

من جبناها ولهسه خلصت جيس نسائيات مال ولادة وبلشت بالجيس الثاني

-وترعش من صخونة وتنفض

ما اكلت ولا شربت شي كلشي مادخل لمعدتها

اركان/باوعت الساعة ب ٤ العصر

يعني من ساعة ب ٩ الصبح نايم ولهسه

-طلعت بسرعة من الغرفة كلبي خمطني عليها

فاطمة/يلمشخوط تعال هنا!!

-وين نازل بطرك الشورت 

ومرت أخوك وعمتك جوه 

أنتبه شويه لنفسك ألبس وانزل ورايه 

-اركااان مو ترجع تنام

اركان/شكد فشلت،،هو مو شورت لا برموده بس مالابس تيشيرت 

-يمه هاي أسمها برموده مو شورت

فاطمة/يمه اندري شيسمونها

بس البس شي لا تنزل معرين جوه

اركان/امري لله ،،انوب سويتيني معرين

-بدلت لبست تراك شتوي ونزلت 

غسلت وجهي على المغسلة 

ودخلت لغرفة امي

-شفت حبيب أبوه نايم بالمهد

وجديته ام رسل كاعدة بصفه

-يالله ،،سلام عليكم 

الجميع /وعليكم السلام

-تقدمت على رسل وكعدت بصفها 

لزمت أيدها مجمرة من الصخونة 

وترجف مغطينها بلحاف وبطانية 

ومشعولة بالغرفة صوبة يعني المكان دافي

-هااا عيوني شبيج ،،خيرج

رسل/اركان فدوة الحكلي 

بطني كطعتني من الوجع 

والنزف موتني ،،الدوخة سطرتني سطر 

اركان/يمه مو سألتلج بالمستشفى وكتيلي لان جايبة هسه

ام علاء/اي عمه صح كل وحده جايبة يصير عدها دم زايد 

بس رسل النزف العدها مو طبيعي

-والصخونة مافكتها 

بالبداية ماكعدناك كلنا الصخونة لان يدر الحليب بصدرها تصخن

بس هسه هواي زادت عليها

اركان/وين محمود ؟؟

ليش مااجى وشافها

فاطمه/يمه أخوك ابد مانام 

خاف انت نمت وارتاحيت 

-هم ماقصر وياها 

هو طبيب اسنان هل يعرفه سواه

قاس ضغطها ،وسكرها ،وحرارتها 

يكول حرارتها مرتفعة 

حتى ماقبل ترضع الولد كال تأذي

-كال كعدي اركان ناخذها للمستشفى بين ما افول سيارة بانزين وأجي

اركان/مديت أيدي جوة راسها وسحبتها بحظني خليت راسي على كصتها ولفيتها بيدي الثانية 

-كافي عيوني لا تبجين عصرتي كلبي 

هسه أخذج للمستشفى وهناك ينطوج مسكنات ويخف عنج الوجع

-وره شوية أجه محمود 

لفيتها بالبطانية وشلتها للسيارة 

راحت ويايه امها ورفل اختها

وامي بقت يم ابوي و الطفل 

محمود/شوف اركان مثل ما تعرف مو أختصاصي ألطب النسائي 

بس عندي معلومات عامة بالطب 

اتوقع رسل صابتها جرثومة 

وسببتلها حمى النفاس

اركان/وهذن شنو ،،لا ترطن على راسي

محمود/يعني ألتهاب عدها صاب الرحم 

وجلبت بيها صخونة قوية يسموها حمى النفاس

اركان/اللهم لا نسألك رد القضاء ولكن نسألك الطف فيه 

-وصلنا للمستشفى اليداوم بيها محمود ،،

وهناك الاطباء يعرفون محمود صديقهم

-وللقسم النسائي،،ودخلت رسل للفحص طلعت الدكتورة كالت// حالة طبيعية لان مامر على ولادتها ٢٤ساعة 

وما ماخذة أبر ألتهابات ومسكنات

-كتبت الها راچيته علاج

طلعت وأشتريت العلاج من بره 

ورجعت للمستشفى

-انطوها العلاجات والمسكنات 

شويه أرتاحت ورجعنا للبيت 

محمود /اركان باجر أخذها دكتورة أختصاص شاك أني بتشخيص هاي الدكتورة الفاهية

اركان/هسه الله كريم منا الباجر

هسه بس خلي تنام وترتاح خطية غدت خرگة 

-الحمد لله نامت بس وصلنا للبيت 

وصخونتها نزلت 

-شو لليل وهم رجعت وصخنت 

وتنفض من الصخونة وترعش 

انغطيها وتصيح بردانة غطوني

-ياربي رحمتك الطف بحالها يارب العباد كلنا مكابليها وكاعدين 

انوب حظي الجايف حظر تجوال

-محمود ضربها الابرة المسكنة 

وابرة الالتهابات ،،وخلالها مغذي

-وكعدت امي ورفل يسولها كمادات

-وأمها حارت بالطفل هو صار الليل 

وهو شد وكام ينوص ويبجي

-بلكوه عدا علينا هذاك الليل 

للصبح رحت للدوام قدمت اجازة ورجعت للبيت وهم لكيتها متخربطة 

-محمود بدوامه صارله يومين مجاز 

أخذتها ورحت للمستشفى اتصلت عليه يطلعلي للباب 

-على الاقل عرف ويسهلونه امر

ويداروها أكثر 

-وهم للقسم النسائي ،،وهو دخل وحجي

ويه الدكتورة يرطن أنكليزي وياها

-اخذوها للفحص ،،وانوب حولوها سونار

وتحاليل ،،ورجعوها للقسم النسائي

-جبت بس رفل ويايه 

لان امي وامها تناوبن 

على اسلام بس يبجي

محمود/مثل ماتوقعت ،،حمى نفاس ،،

بسبب جرثومة 

-تعال أركان خل أفهمك 

رسل صاير عدها التهاب 

أو عدوى بطانة الرحم 

وهذا سبب الصخونة وألوجع بالبطن

وبسبب الالتهاب متورم الرحم 

شوفها شحابة 

ووجهها أصفر 

وجسمها يرجف

لان فقدت كمية جبيرة من الدم 

-قشعريرة البرد العدها

والصداع والدوخة 

وماتشتهي تاكل من كثر النزف 

حتى عدها خربطة بدكات الكلب

أركان/ياالله ،،ربي عفوك ورضاك

-يخوي كولي شسوي مريتي راح تروح من أيدي

-الصراحة كتلني الخوف عليها 

أسمع وأحاجي بخوف وقلق عليها 

ما اعرف شسوي شنو البيدي واكدر أسوي بعد أتربطت من كثر خوفي

محمود/كول يالله شبيك مفاول عليها

هسه يدخلوها للردهة 

ويفتحلوها طبلة طبية 

ويخلوها تحت المراقبة 

ويخلولها دم ويداروها 

وان شاء الله يومين وترجع مثل قبل واحسن

اركان/ربي بخت الحبيب محمد 

وبخت كلمن عنده بخت عندك 

رجعلي مريتي سالمة ومتعافية مثل قبل

-وبس تكوم على حيلها

نذر عليه أذبح طلي لوجهك الكريم دفعة بلاء عن عمرها

-باتت رسل بالمستشفى ورفل باتت وياها

-رجعت للبيت بس سبحت واكلت لكمة 

ويادوب غفيت ورجعت عليهن

واخذت ام رسل حتى ترجع رفل للبيت 

-ومرت على حالة رسل ثلاث ايام بالمستشفى 

ونفس وضعها حالتها تسوء بالزايد

-كلساع واحد جاي واحد رايح من اهلها واهلي 

يشوفها ويطمئنون عليها ويرحون 

-وهذا يوم جديد و رابع يوم لرسل بالمستشفى تسوء حالتها وماكو تحسن 

-اجتي الدكتورة وحجت ويه محمود 

كالتلة /الخيوط الداخلية ملتهبة 

والمكان ملتهب 

وصاعد الالتهاب لعنق الرحم

واكتشفنا وجود خلايا مو طبيعية من خلال فحص السونار لعنق الرحم 

-ونشك عدها فرط بالنمو البكتيري

(داء الجهاز التناسلي ألأنثوي الجرثومي) 

وبسبب الجرثومة الالتهاب واصل لعنق الرحم.

-ولازم نسويلها عملية تنظيف 

علمود نزيل الأنسجة الملتهبة 

-بعد أنتظار وقلق بين ماسيطروا وعادلواضغطها وسكرها ،،ونزلوا صخونتها

دخلوها عملية بنج عام 

وبعد ألف قل هو الله احد طلعوها

كالوا//لكينا باقي انسجة من المشيمة بالرحم وبسبب هاي البقاية صارت الجرثومة وكثرة النزف

-طلعوها للغرفة وكلنا الف الحمد لله 

كاعدين يمها وننتظرها تصحى 

البنج بعده براسها 

-وما اشوف الا الدم غركها 

وكام ينزل من السرير للكاع 

تكول جيس دم وطگ علينا 

-كلبت المستشفى عاليها واطيها

الخير مابالأطباء كام يركض كدامي

-كالوا//هذا نزيف حاد 

رجعوا سولها سونار

ردوا كالوا/ صار عدها ثقب بالرحم 

بسبب عملية تنظيف الرحم

والكحت من الأنسجة الملتهبة 

-والحل لازم نسويلها عملية فورية 

ونشيل رحمها لان هو اصلا بي جرثومة 

-وقعت على تعهدات هم ادارة المستشفى مرتبيها اذا توفى المريض بالعلمية 

ما اتعرضلهم لا قانونياً ولا عشائرياً

بعتبار شرحولي كافة خطورة العملية 

-دخلوها مره ثانية للعمليات 

ومن طلعت روحي من الخوف والانتظار 

يلا طلعوها كالوا الحمد لله اوضاعها زينة 

-ماكو ساعة شو تخربطت كل أوضاعها 

صار عدها الانسداد الرئوي 

وجلطة دموية سدت الشريان اليغذي ألرئتين

كالوا بسبب الحمى النفاسية 

-أنوب صار عدها أنخفاض حاد بالضغط

بسبب دخول الجرثومة المجرى الدم 

وسببت التهاب حاد بكل دمها 

-بعدها بساعتين توفت 😭😭

وأنتقلت الى رحمة الله الوسعت كل شي 

-صرخت صرخة كطعت بيها حبالي الصوتية 

-اااااااخ ،،رررربي رحمتك 

-ربي شنو ذنبه الطفل ينحرم من حنان أمه 

-وأم ما تهنت بشوفه أبنها 

ربي أسبوع أتعلعلت وشافت الوجع والضيم

-يعني اذب الصوج على منو أني هسه

على ذيج المستشفى التعاملهم حقير ويه المريضات

-لو على هاي المستشفى الاطباء بيها واحدهم مطي ومربوط بسفيفة 

استلموها من عملية العملية وحولوها لحقل تجارب وأصلا ماعرفوا يشخصون حالتها شنو

-وبشهاده الوفاة يكتبون سبب الوفاة ((حمى النفاس))

-صيحت صياح هرجت المستشفى 

ماخليت لا غلط ولا فشار ولا مسبه 

كمت أجيب واخرط على الدكاترة 

والممرضات ومدير المستشفى 

كل هذا وكلبي بعد موجره بي نار

-ااااخ يانار الفراك تحرك 

-حنجرتي طبكت صوتي أختفى 

من كثر ماصيحت وعيطت

-ما استحيت من بشر كعد بصفها ولفيتها بحظني وهواي بجيت ،،

-رسل خوش رسل زوجة مطيعة 

وبنت اوادم ومترباية وخوش بنية 

ابد ماكسرت كلمتي لو طلعت عن شوري

-حضنتها بكل قوتي لان ادري هذا أخر حضن النا سويه،، وبعد ما اكدر أحضنها وأشوفها

-بجيت على حالي من بعد فراكها 

تعلمت عليها صار سنه عايشه ويايه

-وميهون عليه أودعها هاي مريتي 

وام أبني الصار يتيم خلافها

-امها فقدت عياط وصياح هزت جدران المستشفى حقها بتها ونبض كلبها تروح من أيدها بسبب غباء الأطباء العدنه 

المسكينة بعدها بوردة عمرها اشافت من حياتها 

-محمود أتصل على أبوي وامي

واجوني للمستشفى 

واجوي أبوها وخوانها وعمامها وخوالها

-محمود واخوها علاء كملوا شهادة الوفاة

واجراءات خروجها من المستشفى

-أخذتها للمغتسل وبعد ماكملوا تغسيلها رجعتها للبيت 

-الكسر قلبي وملخ روحي 

امها خلت أسلام فوك تابوتها 

-وتكلها /يمه هذا وليدج الماشبعتي من عنده

ولا رضع من حليبج ،،ولا شبع من حنانج

-شيعناها لدار حقها 

أبوها كال// اريدها تندفن بكاعنا يم أهلها 

ماعترضت حقه أب وكلبه مكسور

بس الله يجبر خاطره

-هنا بعد ماكدرت اوكف على طولي

من الدفان كال/ وين محرمها ناوشلياها

ماكدرت أشيلها وانزلها بقبرها

-اااخ هواي صعبة من بيدك تدفن عزيز على كلبك جوه التراب وتخليه بحفرة ظلمة وصغيرة 

-وكعت على ركبي وغطيت وجهي بيدي وكمت أشهك وأبجي ما كدرت اناوشها للدفان 

-وعلى صوت بجي أبوها كام يصيح ويعيط

-يا بعد أبوج ياحبيبه كسرتي ظهري 

-عاد أبويه شالها وأخوها علاء

ناوشوها للدفان ،،

-بعد مااكدر أصبر

واشوف شلون يهيل التراب عليها

خليت وركضت وأبتعدت مسافه عن الدفن وكمت أصرخ بكل صوت البقى عندي رررررربي رررررحمتك

-رجعنه من الدفن وسويتلها عزاء 

يومين بيتنه ويوم بيت أبوها 

لان معارف ابوها واصدقائه هواي

-عمامي كلهم أجوي لبغداد 

وحتى المعارف والاقرباء على عرفة ابوي وعمامي واجدادي وصلوا 

-بعد ماكفت الهوسه والعالم كلمن رجع البيته

ورجعت للبيت هنا صارت الوحشة 

-ماطبيت لغرفتي بعد مالي نفس بيها

-خليت وليدي بحظني واباوع بوجه وأبجي

-امي أخذته من ايدي كامت تحجي 

تكول/ طفل أنفاس مو زين عليه 

تبجي وتنحب بوجهه

جديته ام ألمرحومة رادته 

ماقبلت أنطي الها ، كتلها /اذا تردين تشوفينه شوكت ماتجين هلا بيج

-عاد دارته امي وخالة رفل 

واني كمت أنام واسكن بالهول 

ابد ماصعدت لغرفتي

واذا احتاج شي أدز أمي 

-بس أكول الله يساعد كل شخص ،،فقد عزيز على قلبه 

-كامت تمر الايام ووليدي كدام عيوني

رفل هواي مداريته تكول عدها لعابة 

٢٤ ساعة تغسل وتبدل وتكمط وتلعب

حتى بطلت عرك ومشاكل ويه محمود

-حبيب أبوه كام يناغي وصار يفتهم

أصيحله يبقى يتلفت على صوتي

اذا أفوت ومااشيله يكوم يبجي 

-محمود وابويه هواي مدللي

وامي تكول روحها من الدنيا صار هو

-وأجداده بيت أبو علاء دائماً يمرون على رفل ويمرون عليه هم مدللي

-عدت الايام تركض ،تاكل من عمرنه وأحنه نكعد نحسبها 

-وهاي مرت سنة على وفاة ألمرحومة 

وصار عمر أسلام سنة والصدك حتى ما نسويله عيد ميلاد 

-وماكو شي تغير بحياتي خلال السنة المضت

كلشي على حطته نفس روتين بين الدوام والبيت 

-بس الصار بيها غرفتي بعتها جزت روحي منها

-وملابس ألمرحومة وذهبها وغراضها 

كلهن نطيتهن لأهلها كتلهم أنتم أحرار التصرف بيهن تنطوهن ،، تتبرعون بيهن توزعوهن على الفقراء بكيفكم 

-وأسلام كام يخطي 

بس خطواته مو متوازنة 

ومشيته تخوف على يا ساعة ينجبح على وجهه

-وعنده أثنين سنون فوك ،

وأثنين سنون جوه

امي تكول/لان سمين وراسه ثكيل هل تأخر وماكملن سنونه 

محمود/مصيبة اخويه أركان كسرتنا كلنا مو هينة علينا وداع أم أبنه 

-الحمد لله على كل حال 

محد يموت ناقص عمر 

وهاي بعد كتبت الله الها

واكيد تنعد بمنزلة الشهداء عند رب الرحمة لان توفت بسبب الولادة 

-رفل أتبنت أسلام ،،ونست الدنيا بي وامي تكول روحها صارت بهل طفل

-خلال هاي السنة المرت راجعنا اني ورفل 

علمود الحمل الحمد لله مابينا اي خلل طبي لا أني ولا هي عدنا فد مشكلة 

-بس بعد سوالف النسوان ما تخلص 

يكولون//لان تزوجت اني واركان سويه

واحنا خوان ،،وهن خوات ،،

أنجبست رفل

-أمي أخذتها لمراة علوية وسبحتها 

تكول عدها طاسة مكتوب بيها ايات قرانية وخرز مال جبسة 

يابه هم ميخالف قابل بسوالفكم 

بس كون تحبل ويصير عدها طفل تلتهي بي

-وهل كاعدين ومنتظرين رحمه الله 

كتلها /لا تراجعين الاطباء

لان العلاج يلعب بيج طوبه

ويخربط كل أوضاعج وهرموناتج 

هو رزق من الله شوكت مايشاء يرزقنه

مادام لا اني ولا انتي بينه خلل 

-أما سالفة فرح كلبي ااااخ يا ضيم روحي

لهسة مخلد معاند وما يقبل يطلكها

فرح/ من يوم نهوة محمود عليه بهذيج السنة 

ولهسة اني معلكة ،،لا أني لمحمود 

ولا أني المخلد 

-وأني متأكدة هاي النهوة المصلحتي

وابد ما ضايجة لو زعلانة على محمود

وابد مألومه بسبب الصار بيه

لان جنا أثنينه جهال 

والصار بينه سببه اهمال اهلنا النا 

وعدم متابعتهم ومراقبتهم النا بصورة صحيحة 

-وهو لو مايفكر بيه ويحبني 

جان تركني أتزوج مخلد 

وأنكشف اني مو بنيه 

ويذبحوني عمامي 

-الصار ويايه بكل هاي الفترة شمرت نفسي على الخياطة عشقت هاي الشغلة 

بس المشكلة ماعندي صور او مجلات او جرايد اشوف تفصال جديدة وأسوي نفسها 

عمه هناء كالتلي//ليش تحتارين وتدورين صور لو مجلات

شوفي التلفزيون وأحفظي التفصال 

من هدوم الممثلات اليطلعن بالافلام او المسلسلات

-صدك كمت اراقب وبتركيز 

واباوع واحفظ الوان وتفصال 

هدوم الممثلات ،،

-حتى ما انتبه شنو قصة الفلم او المسلسل

لا بس اركز على الالوان والتفصال

-اني اعرف أفصل واخيط 

بس الفصالات الجديدة رادلها جرأة بالكص 

-كمت شنو أشوف كدامي من الهدوم القديمة العدنا الزمها وأفصلها وأصغرها على كد فاطمة ومريم 

واذا اصغر على كد ياسمين ونسرين 

-مره ،،مرتين ،،ثلاثه،،

كامت تضبط الافصالات بيدي

-النسوان من يجن يخيطن كمت أسولفلهن هيجي أفصل القطعة وهيجي اضيفلها لحتى تطلع حلوة 

-وكمت أخيط على مزاجي وافكاري

وهواي عجبهن خياطي 

-صح اكو كم وحده ماترضى 

بس اعرف شلون ارضيها 

اكولها جيبي قطعه ثانيه اخيطها الج بلاش وهذا الشي يفيدني اليه لان اتقوى أكثر 

-بهاي الأيام سودة عليه سمعنا برسل جايبة بس اوضاعها مو زينة ونايمة بالمستشفى 

ابويه وامي وعمامي 

راحوا يشوفها ويطمئنون عليها 

-ما عدا كم يوم اسم الله وبلغونا توفت المسكينة الله يرحمها برحمته الواسعة 

-هواي بجيت وأنقهرت عليها ،،

صح شفتها مره وحدة 

بس جانت كلش حبابة وبسيطة 

وهواي تضحك وتشاقي روحها حلوة 

-ابويه كال// ماكو وحده من عدجن 

قصده احنا بناته توصل وتروح للفاتحة 

-كل اهلنا أمي وابويه وعمامي وعماتي 

خلصوا كل ايام الفاتحة هناك بغداد 

-بليل يجي يبات يمنه رافد ابن عمة نجمة 

وعثمان وخالد ينزلون هم يباتون جوه 

-وكوثر ويانه تبات 

أحنه البنات كلنا أنام بغرفة امي 

والولد ينامون بالهول 

-عمه شمس من يوم النهوة بعد ماخلاها

عمي سلمان تجي علينا 

-وعمه هناء شايفتها بالسوك كايتلها //عيالي شادين ويايه بسبب سالفة خراب العرس والنهوة 

-بنهاية شهر الثاني أبويه أخذ عمامي 

وعمامه واولادهم وراحوا لبيت أبو سلمان 

-من باب الصلح والمراضاة ،،

مو علمود مخلد يطلكني 

لا بس من باب الصلح 

ونبقى اهل ومن هل سوالف

-ويكول أستبقلنا الجحي ورحب بينا 

وولده كلهم رحبوا بينه حتى ابو مخلد 

بس مخلد جان ملتحق بدوامه

-عاد عمي نوري كايل لعمي سلمان 

بحجة الشقى //اتوقع النه بت يمكم 

هم نريد نشوفه ونطمئن عنها عدلة ،، ميتة 

-انوب ضاحك وكايل//أبو طه يابه خاف تزوجت عليها وطكت وماتت البت وماتكولنا 

-عاد عمي سلمان كايله//ابشر بنهاية الاسبوع أجيبها لبيت ابوها موعد ولادتها 

والولد متعبينها

هنا الحجية ماتكدرلهم 

ونسوان اخوتي كلمن حايرة بضناها 

-صدك يمكن أربع أيام وأجانه عمي سلمان 

وجايب عمه شمس ،،وياها ولدها 

عدها ولادة 

-اخذتها امي وعمه رجاء للجده بوكت الضحى والعصر رجعهن عمي سلمان بسيارته

الحمد لله جابت بنيه سموها ((عهود))

-يمه ولدها طه ،،ومروان،، وهارون 

هل كثر وكحين 

طه ملخ البنات ينام بشعرهن ويجرهن للكاع

-ومروان وهارون شياطين مال وسخ

كلساع أنظف ونمسح وراهم 

حاروا شيوسخون وشنو يخبثون

ماخلو شي سالم بالبيت 

لا فراش ،،لا هدوم ،،لا مواعين 

كلها يكلبوها عبالك عدهم جولة تفتيش 

نفس خباثه الامريكان من يطبون يفتشون البيوت

-عثمان راد يربطهم 

كالي //جيبيلي جواريب مال نسوان 

اربط أيديهم ورجليهم

-عمه هناء مارضت كالتله // عيب ينقلون حجي لاهلهم 

وانوب يزعلون الكبار

-بس دخل عمي سلمان وشاف وكاحتهم

صوت واحد كاموا يرجفون من عنده 

وكل واحد كعد بمكان ،،

بس عيونهم تتلاكط جنها عيون الواويه

-امي فرشت وخلت عمه شمس و ((عهود))

بغرفتها الجوه ،،

-تكول/حتى النسوان من يجن يباركن لو واحد يجي تعبان ويدخل للهول مايصير ثقل على الطفله وتبقى تون بليل

-الطفلة حلوة وصغيرة وناعمة ،،

وبالنهار بقت ساكتة بس بليل يبووو شيلت عرب بصريخها

-ثاني يوم كعدنا من الصبح وبس غسلت وجهي ركض للمطبخ اسوي ريوك ،،

حتى بعدها نكف البيت خاف 

يجون خطار،،لو النسوان تجي تبارك لعمتي

-واسمع صرخة عمه شمس على أمي 

بادت رجليه اريد أركض مابيه حيل 

شمس/يوووول سهام ألحكيني 

-دخلنا ركض للغرفة اني وامي ومنى 

وعمه هناء نزلت تركض من فوك 

-واشوف عمه شمس محلله طفله

ومكشفتها وتباوع عليها 

سهام/هااا اسم الله شبيها البنية 

شمس/يولن الحكلي البنيه (( أنطارة ))

هناء/خرب حظج شمس 

هاي مو خوش سالفة 

فرح/شبيها عهود ،،شو كلشي مافهمت 

شمس /خرب حظي عهود حظها مصخم حظها أنطارة 

هناء/منى أطلعي بره خلي أسولف لأختج الموضوع 

منى /ليش بس فرح تعرف 

اني هم اريد اعرف شبيها عهود

سهام/يلا ولي طلعي بره بدون لغوة زايدة 

هاي سوالف نسوان كبار ميصير تسمعيها

منى /يعني فرح هسه جبيرة 

ترى فرق بس سنة بيني وبينها

هناء/ لا عمه مو شغله عمر 

بس سالفة تخص النسوان المتزوجة 

-وفرح عدها علم وعلمناها 

بيوم حنتها على هاي سوالف

علمود عرسها 

-هسه انتي من تزوجين اني هم اعلمج وأوعدج اكولج شبيها عهود 

فرح/طلعت منى ضايجة لان طردنها

-اني تقدمت وكعدت اباوع على عهود 

خطيه واكع عليها دم بين رجليها

-عمه شمس شنو عهود من هسه أجتها العادة

شمس/خرب حظي عمه 

لا هذا مو دم العادة بعدها صغيرة 

من تكبر بعمرجن يلا تجيها 

-هذا دم حظها المصخم 

دم الأنطاره 

هناء/فرح باوعيلي اذا البنيه اجت للدنيا

وبعد يوم او يومين من ولادتها 

يوكع عليها هذا الدم ،،

ومن تكبر بسلامه 

وتجيها قسمه وتريد تزوج ،،لازم بيوم دخلتها 

تبات وياها وحده من النسوان ،،

عمتها لو خالتها لو أمها 

فرح/هاي شنو غير يوم دخلتها 

ولازم بس هي ورجلها 

شكو بايته وياها وحده من النسوان

هناء/عمه مو ميصير ياخذها ويتقربلها رجلها قبل أذان الفجر ،،

ما يصلح مو زين على حظهم

اول شي تصير حياتهم تعيسه 

وثاني شي لو هو العريس لو هي العروس اسم الله واحد منهم يموت وميتهنى بحياته

فرح/يا اسم الله ،،سوده عليه عهود 

حظج أنكس من حظي 

سهام/شمس بلغي عماتها ،،وبلغي خالاتها وانطي علم لابوها ،،حتي بسلامه ليوم 

دخلتها الكل عنده علم بموضوعها 

ومنو موجوده وياها بهذاك الوقت 

عود تنطر وياها 

شمس/هذا هم حظي ،،مدري حظها

سودة عليه يا يمه من هسه لازم أشيل هم لهذاك اليوم ،،مدري اني عايشة وأنطر وياج 

مدري ميتة وشوف منو تاخذ مكاني وتنطرج

هناء/كولي يالله ،،كولي خير يصير خير 

شو وخري خل أخذ البنية وأغسللها ،

فرح/الصراحة أنقهرت على عهود خطية 

شلون حظ عدها ،،حتى ليلة دخلتها 

مو طبيعية مثل باقي البنات لازم 

تنطر وياها مراه ،،

-خو أطرد الزلمه ينام بره غرفته وينتهي الموضوع

بعد عليش هل بجي والنويح من هسه

شلون حظ يربي بعد كلشي الك بي حكمة 

-بعدها هاي السالفة مرت الايام عادية مابيها شي جديد خلصت بين شنو سنوي غده 

شنو نسوي عشه 

وانتي نظفي هنا 

وانتي عجني ،،وانتي خبزي 

وبين الخياطة وگاله النسوان 

-بس لاحظت رافد جياته كامت تكثر لبيتنا 

واني من الله ما اطيقه ،،دمه ثكيل 

وشقاه ماصخ 

-وبيت أبويه عادل مرات همه يجون علينا

ومرات امي وابويه وشوف منو يروح وياهم 

يرحون عليهم لبغداد

-وامي فاطمة تجيب وياها أسلام 

صدقة للنبي سمين عبارة عن مربع 

لحم مطرك ويمشي بالكوه 

وجهه وملامحه يشبه أركان 

بس شعره أسود مو أشكر

وملابسه كلش حلوة 

هيجي بس يعجبة الواحد يعضعضة 

ركضت للكنتور 

وطلعتلة دشداشة اني مخيطتها 

-قبل أسبوعين رحت ويه عمه هناء للسوك 

أشتريت قماش خاص بالدشاديش الرجالية 

بس المشكلة ما اعرف افصلها 

عمه اخذتني لخياط الملابس الرجالية 

يخيط بس دشاديش 

-بعد ماسلمت عليه كتله//بس علمني على فصال الدشداشة اريد اتعلم اخيط دشداشة صغيرة لابن اخويه

هو شرحها اليه بطريقة سريعة 

يعني ماتعذر مني 

بس كلشي مافهمت عليه

-رجعت للبيت ضايجة 

صعدت على عمه هناء أخذت منها دشداشة خالد صغيرة عليه قديمة وتعبانة متريدها 

كعدت وفتكتها على كيفي

وكل قطعة كعدت رقمتها حتى احفظ تفصالها

-انوب على أثرها فصلت أصغر من قياسها لأسلام طلعت حلوة بس مو كلش مضبوطة 

-امي فاطمة طارت بيها ،،

وكلساع تبوس الدشداشة وتشجعني 

نزعت اسلام ملابسه ولبسته الدشداشه

خربنه ضحك عليه ،،صارت جيس عليه

القياس صغير عليه

-كتلها وعد على الجية الثانية 

اخيطله وحده على قياسه ومضبوطة

-مرت الايام ،،ويوم عن يوم 

صرت أقوى بالخياط والفصال هن صارن سلوتي 

حتى كمت أخيط نزلات مال جرباية 

وهواي شغلات تخص البيت 

وكلش اهتم واعتني بالخياط

-بس لاحظت نفسي صرت ضعيفة 

من كثر التعب،،وقلة الاكل ما اشتهي اكل والتفكير شل دماغي

ومن أكعد وحدي لازم أبجي 

-بس المهم ضبطت شغلي والخياط 

واي خياط كمت بس اشوفه افصله صح واضبطه

-وكمت اعرف اخيط دشداشه رجالية 

خيطت لاسلام على قياسه وصار فيت ومضبوطة عليه 

وحتى خيطت لابوي هواي فرح بيها ولبسها ما فشلني 

وخيطت لعثمان ولخالد 

-وبهذاك اليوم صادف يوم خميس 

واول يوم بعيد الاضحى المبارك 

-مالي خلك مجطولة بالهول قبل يومين ودوني للمستوصف ضربوني ابره مسكنة ،،

شوكت ارتاح من هل الوجع 

-وباجر أبوي عازم كل عمامي على الغده 

هم جمعة عيد 

وهم مسوي ثواب على روح اجدادي الله يرحمهم

-سمعت زفة وهورنات السيارات 

وياهم فرقة موسيقى تدك فاتت من يم بابنا 

-أجى خالد يركض دخل للبيت 

يكول /يول فرح هاي الزفه مال رجلج مخلد الهسه فاتت من الباب 

فرح/من سمعت بهاي الزفة المخلد 

وفات من يم بابنا كلش أنقهرت أحس كلبي أنعصر 

-دموعي ملت وجهي 

يعني للحظة 

حسيت هو رجلي مالتي ليش يروح لغيري

-بعدين كلت لا لو يعرف اني مو بنيه حتى لو يحبني ورايدني ويكتشف الموضوع 

لو اسولف واحجي منا الباجر 

واكوله جنت طفله ومااعرف ،،

اكيد مراح يصدكني لو هو يذبحني 

لو أبويه وعمامي يغسلون عارهم 

-بس ذب حني القهر اني هسه شنو ذنبي

-محمود متزوج ومرتاح ويه مرته رفل 

-ومخلد هل تزوج بالعافيه عليه وبالمبارك 

-بس اني وين راح يصفه بيه الدهر 

-خالد تعرف منو زوجة مخلد؟؟

خالد/اي اعرف صديقي بالمدرسة جيرانهم رحت سألته 

-كال بنت عمه صالح ،،

وبداية الشهر خطبها ،،واليوم عرسهم

فرح/اكول عمه شمس ليش ما تجينا صارلها فترة خطية متريد تحرك كلبي 

وتكولي مخلد خطب وراح يتزوج

-هااا بنت عمه صالح ،،هذا الرجال الراح ويانه من عقدنه محكمة جان خوش رجال وكلمته حلوة

-الله يسعدك يامخلد ويهنيك 

وربي يرزقك بالذرية الصالحة 

-لسان حال فرح في يوم زواج مخلد 

-((راح أصبر بدونك وأرهم بلياك 

وأذبح رمش عيني الجان يبجيلك 

وأتحمل عذابك والبعد والشّوك 

وما حط صورتك كدّامي وأشكيلك 

ما أكلّك نسيتك بس جرح بالرّوح 

يكسر واهسي وما يقبل أمشيلك 

عيني الشّالتك كلتلها أشيلج راح 

كالت شيلني وما قبلت تشيلك 

وجرحي ألفاك صدره وما يريد خيّاط 

واكف جنُّه واحد جاي يدعيلك 

بس مجبور أدفنك يا عشك يا شوك

وأقرى الفاتحة وبالوحشه أصلّيلك 

بعيوني الحزن يقرونه اليواسون 

والفوك الحزن لو تدري شاحجيلك 

شمّات الأجو وأسوني ثالث يوم

حيل ويّاك كالو،، مدري شدّ حيلك))

-شبعت بجي احس عيوني كامن يطلعن نار من كثر مابجيت روحي أحتركت قهر وظلم وضيم 

-بعد شعندي عايشه وشتاني 

ماكدامي بس القهر والضيم 

-رحت للمطبخ وجبت زرنيخ يعني سم مال جريذيه وخبطته بكلاص شربت ...........

الفصل السادس عشر من هنا 

شكرا لزيارتكم عالم روايات سكيرهوم