رواية وصمة قلب أسير الفصل الخامس عشر 15 بقلم رباب حسين



 رواية وصمة قلب أسير الفصل الخامس عشر بقلم رباب حسين 

أحببت قاتل.... تزوجته وأنجبت منه فأصبحت لعنة خطيئته تلحق بي وبولديّ.... خُطف إبني وحرمت منه ودفعت ثمن ذلك من دموع قلبي عندما ظننت أنه مات وهو رضيع والثاني أصبح نسخة مصغرة منه بل وأصبح ولدايَّ أعداء..... كم كنت حمقاء ولازالت..... أتبكين حزنًا على فراقه؟ ألازلتِ تتألمين على موته؟ ماذا تنتظرين أكثر لتعترفي أنكِ مجرد أمرأة مغيبة أحبت الشخص الخطأ؟ لعل هذا الوقت الصحيح لتعلمي حقيقة أمره حتى تستطيعي أن تجمعي شتات نفسك وتلملمي ما تبقى منكِ ومنهما

عرفت أمال حقيقة عوني ولكن بعد أن إنقضى عمرها مع شخصٍ مثله وظلت تنظر إلى ريان في صدمة ثم طلبت منه أن يغادر ويتركها وحدها علها تستوعب ما سمعته منه

إتصل تيم بأسعد وأخبره بما فعله سليم وبهروبه أيضًا

أسعد في فزع : يعني إيه؟ عايز يقتل ريماس؟! لا أنا مش هسيبه يخرب حياة ريان أكتر من كده..... إسمعني كويس أنا عايزك تحط حد وراها يراقبها في كل مكان ويحاول يحميها لو حس بأي خطر..... عايز حد راجل وأقدر أعتمد عليه

تيم : تمام.... بس مش هنبلغ ريان؟

أسعد : لا صعب.... ريان مش هيصدقني وخصوصًا إنه مش هيقدر يعملها حاجة..... ريان وريماس سابو بعض بسبب اللي حصل

تيم : طيب أنا هدور على بودي جارد يقدر يحميها و هدور على سليم ولو لقيته هبلغك

أسعد : ماشي بس أنا الأهم عندي ريماس

تيم : أكيد طبعًا

مر يومان ومازال سليم مختفي أما ريماس فكانت حبيسة المنزل لا تريد أن تخرج من غرفتها مما جعل السيوفي في حيرة من أمره..... ماذا يفعل كي يساعد إبنته على الخروج من هذه المحنة وفي يوم ذات مساء عاد السيوفي إلى المنزل ووجد ريماس تجلس بالأسفل وتنتظره وعندما رأته يدخل من الباب نهضت في فزع وقالت وهي تبكي : بابا

شعر السيوفي بالسعادة عندما رآها تجلس بالأسفل وخرجت من غرفتها أخيرًا فقال : حبيبتي أخيرًا خرجتي من الأوضة

ريماس في بكاء : بابا.... هو عمي عوني مات؟

زفر السيوفي في ملل وقال : اه مات من يومين.... إتقتل وهو خارج من الشركة

ريماس في غضب وبكاء : وليه مقولتليش؟

السيوفي : هو أنا بشوفك أصلًا..... وبعدين هقولك تعملي إيه يعني؟....إحنا مبقاش لينا أي صلة بيهم

ريماس : على الأقل كنا نروح الدفنة.... ده واجب يعني

السيوفي : أصلًا لسه متدفنش عشان الجثة كانت بتتشرح الدفنة بكرة لسه.... وبعدين هو إنتي عايزة تروحي الدفنة علشان الواجب ولا عشان تشوفي ريان؟

ريماس : بابا أنا لو عايزة أشوفه هشوفه ومن وراك كمان..... ولو عايزة أقابله هقابله بس أنا مش هعمل كده إحترامًا ليك لكن ده ميمنعش إني هفضل أحبه طول عمري وعشان تبقى عارف ومتأكد من حاجة أنا مش هتجوز حد غيره مهما كان مين

السيوفي في غضب : يعني إيه ؟ هتعيشي كده من غير جواز؟!

ريماس : أيوة.... يا إما أتجوز ريان يا إما تنسى موضوع الجواز ده خالص

ثم تركته وصعدت إلى الطابق العلوي وهو يصيح في غضب من خلفها ولكن لم تبالي بما يقول فقد أخذت قرارها ولن تتراجع عنه أبدًا

خرجت أمال من المشفى ولم ترغب في العودة إلى منزلها كي لا تتذكر أي شئ يتعلق بعوني فقد قررت أن تنساه وتحاول فقط جمع إبنيها معًا فقام ريان بشراء منزل صغير لها لتمكث فيه وبعد أن دخلا المنزل وبدلا ثيابهما وأعدت الخادمة لهما العشاء جلسا ليتناولا الطعام معًا وهو يلاحظ إنطفاء روحها وعينيها التي أصبحت خالية من معالم الحياة فأمسك يدها وهي تعبث بالملعقة داخل صحنها وقال : ماما.... لازم تحاول تخرجي من الوضع ده

أمال : بحاول يا حبيبي.... بس صعب عليا أوي..... عارف يا ريان أنا حاسة إن ربنا بعدك عنه عشان متبقاش زيه ولأول مرة أحس إن عبد القادر عمل فيا وفيك جميل إنه عرف يخليك الشخص المحترم اللي قاعد قدامي ده ومش زعلانة منه على اللي خلاك تعمله في أبوك لإنه ببساطة يستاهل أكتر من كده والراجل معذور خسر شركته ومراته وكمان إغتُصبت قبل ما تموت..... وفي النهاية أبوك مات عشان ده القصاص الحقيقي..... وياريتني قادرة ألومه ولا أتهمه

ريان : كان فيه طرق تانية يقدرو يجيبو حقهم بيه غير القتل..... لو كل واحد عمل غلطة راح التاني ردها نبقى عايشين في غابة.... فيه حاجة إسمها قانون

أمال : المهم.... عرفت حاجة عن سليم؟

ريان : الصراحة لا..... أنا اليومين اللي فاتو كانو في التحقيقات وبحاول بكل الطرق أخد الجثمان عشان أدفنه وما صدقت خلصت الإجراءات وبكره الدفن..... هتيجي؟

أمال : لا.... مش جاية.... كفاية ضحك عليا طول عمره وأنا عايشة معاه.... أنا مش زيه مش هقف أخد عزاه وأنا أصلًا مش مسمحاه

أماء لها ريان ولم يستطع أن يجادلها بالأمر فهي محقة

ثم قالت أمال : قولي أخبار ريماس إيه؟

ظهر الحزن على وجهه لمجرد سماع إسمها فهو مشتاق إليها حد الجنون ولكن لم يحاول أن يتصل بها مرة أخرى إحترامًا لحديث السيوفي الأخير معه فقال في صوت مخنوق من البكاء : معرفش عنها حاجة

أمال في تعجب : إزاى ده؟!

ريان : أبوها عرف كل حاجة... عرف موضوع سليم وكمان اللي بابا عمله وفسخ الخطوبة ولغى الدمج..... أصلًا الشركة بتنهار بكل المقاييس.... قضية سليم خلت الأسهم في الأرض وكمان قتل بابا بالشكل ده خلى الناس تتأكد أن الشغل مش مظبوط وشكل الشركة هتفلس.... أنا هخلص الدفن وأشوف هعمل إيه في الشغل اللي باظ ده

أمال : مش مهم الشركة.... المهم عندي إنت.... ريماس خلاص مبقتش معاك؟!

هربت دمعة حارقة من عينه وقال : خلاص يا ماما..... ريماس عمرها ما هتبقى ليا

رتبت أمال على كتفه وقالت : كله من عوني..... الله يسامحه على اللي عملوه فيا وفيكو..... لو كنت وقفت من الأول وقلت مش هكمل كان زماني عارفة أحميكو منه لكن خلاص سمه دخل في حياتنا وخربها

نهضت أمال ودخلت إلى غرفتها فلم تستطع أن تنظر في عين ريان ولا أن تبكي أمامه أما ريان فنظر إلى أثرها وبعد قليل دخل غرفتها فوجدها تزيل دموعها سريعًا فابتسم لها رغم حزنه واقترب منها وجلس بجوارها وأمسك يدها وقبلها ثم أزال ما تبقى من دموعها من على وجهها وقال : أنا كفاية عليا وجودك معايا يا أمي.... إنتي عندي بالدنيا كلها.... ربنا يخليكي ليا يا ست الكل وتفضلي دايمًا تاج راسي..... وبعدين زعلانة ليه أنا معاكي وربنا أراد إننا نفضل مع بعض على طول.... يارب بس متزهقيش مني لإني مش ناوي أتجوز

أمال : ربنا يكتبهالك يا حبيبي ويجمع بينكم على خير.... ربنا كريم وعارف إنك مغلطش في حاجة

ريان : لو ربنا فعلًا كاتبهالي فا هتبقى من نصيبي حتى لو بعد زمن وأنا هفضل مستنيها

قبل ريان رأسها وطلب منها أن ترتاح وأن عليه أن ينام مبكرًا حتى يقوم بدفن عوني غدًا

في الصباح إستيقظ ريان وذهب ليأخذ الجثمان من المشرحة وبعد وقت كان يقف أمام القبر ينظر إلى التراب الذي ثرى جسد أبيه تحته.... والآن أنا أقف أمام قبرك أحمل اللقاء الوحيد الذي لم يكتمل وأبكيك بكاء من تأخر عن العمر كله.... ثم قام المعزيين بتقديم التعازي له ولمح ريماس تقترب من بعيد وهي تمشي بقرب السيوفي ووقفا أمامه وقدما التعازي له فصافح يد السيوفي ثم صافح يدها وكأن كفه يحتضن كفها ليطمئن قلبه بأنها حقًا أمامه ينظر في عينيها التي لطالما أثَرَت قلبه فأصبح لا يشعر بمن حوله ثم تخللت الرياح داخل خصلت شعرها فحملت عبيرها إليه ليستنشقه في إشتياق وظهرت الدموع في عينيه فسحب السيوفي يدها من يده بعد أن لاحظ نظرات ريماس له وكأنها تنظر إلى حلم بعيد يتحقق أمامها بعد طول إشتياق وأمل زائف فانتبهت ريماس إلى يد أبيها فنظرت له ثم عادت النظر إلى ريان وقالت : البقاء لله

تحمحم ريان قليلًا وكأنه فقد صوته ثم قال في صوت يحمل كل معاني الألم : ونعم بالله

أمسك السيوفي يد ريماس وذهبا من أمامه وظل ينظر إليها وهي تمضي أمامه ثم إبتعدت قليلًا والتفتت إليه تنظر إليه نظرة وداع..... سوف أشتاق إليك ولا أملك غير الدعاء ألا يكون هذا الوداع الأخير.... وفي مكان قريب يقف سليم ينظر إليهما بعد أن تخفى ليحضر الدفن ويودع والده الوداع الأخير وظهر على عينيه نظرات الغضب

عادت ريماس والسيوفي إلى المنزل وأبلغ الحارس الشخصي تيم بالأمر وأخبره أنها خرجت اليوم لأول مرة وعادت مرة أخرى.... جلس ريان أمام القبر قليلًا يدعو الله أن يرحمه ويسامح أباه ثم تذكر ريماس وظل يفكر قليلًا ليبحث عن حل لتصبح له فعندما رآها اليوم تأكد بأنه حقًا لا يستطيع العيش دونها ونهض مسرعًا

أما ريماس فجلست بالبهو بالأسفل وبعد أن صعد عوني وبدل ثيابه ونزل مرة أخرى وجدها تجلس شاردة فجلس بجوارها وقال : ريماس..... تفكيرك مش عاجبني

نظرت له ريماس بعين مليئة بالحزن والألم فقد شعرت بحزن ريان وكم خسر من الوزن في ثلاثة أيام وكأن هموم العالم فوق عاتقه وعلمت أيضًا بالخسائر التي تجتاح الشركة والعجز عن مساعدته كانت أكبر ألم تشعر به طوال حياتها فقالت له : تفكير إيه؟

السيوفي : الكلام اللي قولتيه إمبارح.... يعني إيه مش هتتجوزى غير ريان.... إنتي بتلوي دراعي مثلًا؟

إعتدلت ريماس ونظرت له في تحدي وقالت : بص يا بابا.... أنا سمعت كلامك وفسخت الخطوبة وبعدت عن ريان مع إني عارفة كويس إن ريان ملوش أي ذنب باللي بيحصل بس مع ذلك نفذت طلبك..... لكن مش هنفذ أي طلب تاني تطلبه مني لإني ببساطة مش هتجوز واحد تاني غصب عني ولا هتجوز واحد وأنا قلبي وعقلي مع واحد تاني.... لا تربيتي ولا أخلاقي يسمحولي إن أعمل كده في واحد كل ذنبه إنه فكر يتجوزني..... فلو سمحت نقفل كلام في الموضوع ده خالص

وقف السيوفي في غضب وقال : يعني إيه؟! هو اللي خلقه مخلقش غيره.... وبعدين محسساني إنه ملاك ومفيش حد زيه أبدًا..... إذا كان عيلته وسمعته وهو ذات نفسه عاملين بلاوي..... عايزاني أرميكي في وسط عيلة زي ديه؟

وقفت ريماس في غضب أمامه وقالت : وأنا مطلبتش منك تجوزهولي.... الموضوع خلص زي ما إنت عايز عشان تحافظ على إسمك وسمعتك اللي أهم من بنتك الوحيدة ومع ذلك متكلمتش وحاطة حزني وكسرتي في قلبي وساكتة بس أكتر من كده متطلبش مني.... ديه أقصى حاجة ممكن أعملهالك ومعنديش أي حاجة تانية أقدمها لا ليك ولا لغيرك

ثم ذهبت من أمامه وهي تبكي وخرجت من المنزل دون أن تأخذ سيارتها فقط ترجلت خارج حديقة المنزل ولاحظ الحارس خروجها دون سيارة فنهض مسرعًا ليلحق بها ولكن وجد سيارة سوداء كبيرة تقترب منها وأحدًا ما سحبها عنوة داخلها فعاد وأخذ سيارته سريعًا وانطلق خلفها.... في الطريق إتصل الحارس بتيم وأخبره بما حدث وعلى الفور بلغ تيم أسعد الذي قال في فزع : يعني الراجل وراها ولا لا؟

تيم : أيوة وراها

أسعد : طيب إتصل بيه وقوله أول ما يقفو يبعت لوكيشن فورًا وإنت تنزل دلوقتي تروح القسم تبلغ عن خطفها وخدهم على هناك.... سليم لازم يتقبض عليه..... خلاص وجوده برا خطر على ريان وكمان كفاية اللي حصل أنا كده خدت حقي منهم والشركة راحت منهم وعوني مات.... بلغت ريان؟

تيم : هكلمه..... بس معتقدش إنه هيرد لإنه كان في الدفنة النهارده

أسعد : إبعتله رسالة وإبعتله اللوكيشن خليه يجي ياخدها ويرجعها لأبوها يمكن أبوها يرضى عنه شوية

تيم : حاضر

أنهى تيم المكالمة ونفذ ما طلبه أسعد منه وذهب إلى قسم الشرطة وبعد قليل أرسل له الحارس إحداثيات المكان وانطلق مع الضابط والعساكر إلى هناك بعد أن رأى رسالة سليم التي تركها لتيم بمنزله

في مكان قديم تجلس ريماس على كرسي فاقدة للوعي وعندما إستعادت وعيها نظرت حولها في ذعر واقترب الحارس من المكان يراقب ما يحدث حتى تأتي الشرطة كما أخبره تيم ويترقب إذا لزم الأمر أن يتدخل قبل مجيئهم أم لا.... ظلت ريماس تنظر حولها حتى سمعت صوت أقدام تقترب منها فنظرت بإتجهاها واقترب منها وقال : حبيبتي فوقتي

ثم ضمها إلى أحضانه ورتب على ظهرها بحنان وقال : ملقتش حل غير إني أخطفك تاني والمرة ديه مش هسيبك إلا وإنتي مراتي..... السيوفي بيه لازم يتحط قدام الأمر الواقع ومش هسيبه ياخدك مني..... أنا مش قادر أعيش من غيرك ومش عايز حاجة من الدينا تاني.... أنا خسرت كل حاجة حتى الشركة راحت مني لكن إنتي لا

بكت ريماس بين أحضانه ثم إبتعدت عنه قليلًا تنظر إلى عينيه وقالت : وحشتني أوي يا ريان

بالخارج وقف أسعد يراقب ما يحدث وبعد قليل وجد الشرطة تقترب دون أن تشعل صفارات الإنذار فترجل من سيارته فإذا بأحد يصوب سلاحه على رأسه ويضع يده على عنقه فنظر له وقال : سليم.... متقتلنيش..... مش أنا اللي قتلت أبوك صدقني

دخل الضابط في هدوء ووجد ريماس تقف أمام ريان ويتحدثان معًا ثم نظر إلى تيم وقال بصوت منخفض : أنا خايف يكون معاه سلاحه وهي قريبة كده..... لو ظهرنا مضمنش هيعمل إيه ممكن ياخدها رهينة ويهرب أو يقتلها زي ما كاتب في الجواب ده

تيم في هدوء : طيب هنعمل إيه؟

الضابط : أنا هحاول أصوب على دراعه ولما يقع إنت تجري وتسحب ريماس من جنبه بسرعة

أماء له تيم واستعد ليركض إليها سريعًا ولكن لمحهم الحارس الذي تأكد أن من مع ريماس هو ريان وليس سليم فصاح بأعلى صوته قائلًا : لااااااا.... ده ريان

إلتفت ريان إلى الصوت وكانت الرصاصة قد خرجت من سلاح الضابط وبدلًا من أن تصيب ذراعه إخترقت قلبه مباشرةً فنظر ريان إلي ريماس التي فتحت عينيها في صدمة وسقط أرضًا وركض تيم إليها

كان سليم وأسعد بالخارج وأسعد يقول : صدقني يا سليم اللي إنت بتعمله ده هيأذيك زيادة

ثم قطع حديثه صوت العيار الناري وصراخ ريماس فركضا إتجاه الصوت إلى داخل المكان ووقفا في صدمة عندما رائا ريماس تصرخ وتمسك بريان وهو مغمض العينين وتقول لهما في غضب وبكاء هيستيري : ليه قتلتوه..... ليه؟.... هو معملش حاجة

ثم وقع نظرها على سليم الذي يقف ويفتح فاهه في صدمة وقالت : ده سليم اللي عمل كل حاجة.... لكن ريان معملش حاجة

الضابط : أقبضو عليه فورًا

ثم اقترب منه العساكر وأخذو سليم إلى سيارة الشرطة واقترب الضابط من ريماس التي تجلس بجانب ريان تبكي في حرقة وقال في توتر : أنا كان قصدي أضربه في دراعه هو اللي لف فجأة لما الراجل ده صرخ..... أنا مكنش قصدي

نظرت ريماس إليه ثم عادت النظر إلى ريان وحملت رأسه على ذراعها وقالت في بكاء : أطلب الإسعاف أرجوك..... بسرعة أنا حاسه إنه مش بيتنفس

وضع الضابط يده على رقبته يتحسس نبضه ولكن أغمض عينيه في حزن وقال : البقاء لله

أحتضنته ريماس وصرخت صرخة مدوية : رياااااااان لااااااااا

الفصل السادس عشر من هنا

تعليقات



×
insticator.com, 6ed3a427-c6ec-49ed-82fe-d1fadce79a7b, DIRECT, b3511ffcafb23a32 sharethrough.com, Q9IzHdvp, DIRECT, d53b998a7bd4ecd2 pubmatic.com, 95054, DIRECT, 5d62403b186f2ace rubiconproject.com, 17062, RESELLER, 0bfd66d529a55807 risecodes.com, 6124caed9c7adb0001c028d8, DIRECT openx.com, 558230700, RESELLER, 6a698e2ec38604c6 pmc.com, 1242710, DIRECT, 8dd52f825890bb44 rubiconproject.com, 10278, RESELLER, 0bfd66d529a55807 video.unrulymedia.com, 136898039, RESELLER lijit.com, 257618, RESELLER, fafdf38b16bf6b2b appnexus.com, 3695, RESELLER, f5ab79cb980f11d1