رواية قصة وجدان الفصل السادس عشر 16 بقلم انين الليل

باوعتله بااستغراب هو استردف :: طلعي اوراقكم جناسيكم وبطاقة الكميه

كريم //. والسياره

تبقى يمك تشوف الها شراي ولو ما اتصور تنباع ومعاملتها اتدوخ

سالته رغم اعرف الجواب = عمو وين نروح

بيبي // ترحين ويه عمج البيت جدج

جاوبتها = بس اني ما اريد اروح اريد ابقى اهنا

عاصف رد عليه بكل هدوء :: لا عمو ترحين وياي البيت جدج انتي واخوج

باوعت البيبي وگتلها وانا ابرطم واحچي =. بيبي ما اريد اروح الاي مكان اريد ابقى اهنا

سعاد باستهزاء // ايي ابقي ياهو كاظج

عمو عاصف خزرها بيبي ردت //. بيبي هنا محد الكم انتي وعلاوي اهناك بيت جدج وعمامج اوولدهم وبناتهم

سعاد وهي تحرك بايدها //. هي من اجن النسوان ايلاجن ما تعرفهن ايسلمن عليها حتى ما ترد عليهن السلام

عاصف باوع الها :: صدك ما تعرفهن منين شايفه نسوان وكرايب

تكومت الدموع بعيني = بس اني ما اريد اروح اهناك

سعاد بنتر. // شنو بكيفج ما ترحين وين تردين تبقيين عدمن

جاوبتها واني ابچي = ما اريد اروح اريد ابقى

رحت للغرفه وسعاد تحجي // هاي مصدكه روحها

بيبي // شبيج سعاد ويه البنيه

سعاد. // ما تشوفونها شلون تتنعوص وتتعاير لا تكبرون راسها خليها اتولي

اجه عاصف وراي لكاني كاعده بالزاويه وجهي ابين اديه اتنفس وهويكلي

:: اذا تبقيين اهنا منو يبقى يمكم

وقبل ما ارفع راسي جاوبني :: لاتكليلي بيبي لو ام احسان كلمن يروح البيته انتي واخوج محد باقيلكم اهنا انا عمكم

وهناك عمج مهدي وحبوبتج وعماتج

جاوبته وانا ابجي = بس عمو اني شلون اعيش هناك

:: تعيشين عمو مثل ما عايشين احنه

= تتذكر لمن اجينه الكم ذيج المره ما شفت احد وهشام يگول اتكرهونه اني شلون اروح وياك

اتنفس بعمق :: ماكو هيج حچي محد يكرهكم وانا موجود

= واعوف هشام ما اگدر باالله طلع

هز راسه ورفع ادي بالدعاء :: ان شاالله يطلع وهم يجي هناك

= عمو من اروح وياك بيبي تبقى اتعيط علينه وحتى عمه سعاد

:: لا بيبي ما اخليها تعيط على گولتج ومحد ايحاجيكم وعمه سعاد تروح البيتها والي يحجي وياكم اكص السانه

خفت من كلامه جاوبته. = اخاف

:: وانا يمج لا تخافيين

= خلي بيبي هديه يمي وانت روح لاتخاف عليه

:: ما ترهم بابا ما ترهم

=عمو الله يخليك

وگف ونفخ :: وجدان حضري ملابسج وملابس اخوج باجر نروح البيت جدج

حاجيته بعصبيه. = جاي اكلك ما اريد اروح ليش ما تفهم

فتح عيونه ع الاخر وجاوبني :: منو الما يفتهم انا

وانا ابجي رديت = ايي انت ما تريد تفهم اني ما احب اروح لهناك

:: وجاي ارجع عليج نفس الكلام ترحين وياي هناك بيت جدج

=الله يخليك عمو

:: استغفر الله ياهو يبقى يمكم

= عمو عادي نبقى اني واخوي وخاله ام اح...

قاطعني :: اشش لحد يسمعج ماعدنا بنات يكعدن ابحدهن وحجي زايد ما اسمع صارساعه احجي وياج وانتي زايده

بعنادج مخلص الكلام تحضرين هدومج انتي واخوج والصبح نمشي

ما رديت علي خفت منه صارن بس دموعي تتجارى وهالمره اقوى بقيت گاعده ما كمت ولا حضرت ملابسي

  بعدها اجت ام كرار وياها بيبي وخاله شيماء بيبي كعدت يمي وهي تبجي وتكول

زمانج خلاج تكعدين بالكاع

شيماء //. يمه وشبيها الكاع

ما بيها شي بس هي بزر دلال

بقيت ساكته وبس دموعي تجاوب اتقربت خاله ام كرار وهي تمسد على راسي //. حبيبتي انتي فاهمه وعاقله وصرتي مسؤوله

عن اخوج ما يحتاج اوصيج

باوعت البيبي بتوسل اتخليني يمها //. لو بيدي ما اخليج ترحين الاي مكان بس انا هلتشوفيني مره چبيره وانا يرادلي مدارا

  روحي البيت جدج هناك حالج من حالهم

  جاوبتها بصوت مكسور = اخااف

شيماء // منين اتخافيين

=. خاله همه ما يردونه

  ام كرار //. شنو هالحجي

اي من رحنا اني وا(صرت ابجي ) وامي وهشام بيبي حتى ما خلتنا نبقى نرتاح طردتنا وهذا عاصف اسالو

شيماء //. لا خاله ابد لا تحجين هالشكل انتي ترحين هناك حالج حال بناتهم محد يگدر يفرقج عنهم

بيبي // صيري هبة ريح واسمعي كلام حبوبتج وانا ما اعوفج يوميه اخابرج وشنو يصير كليلي بيت جدج وعمامج اولى بيج

ماجاوبت بس ابرطم ودموعي تنزل ام كرار كالت //. كافي عيونج راح يعمن

= مو انتي جاي تبجيين وبيبي هم وخاله شيماء

ام كرار //. بس انتي تسكتين كلياتنا راح نسكت

مسحت دموعي رغم كلبي الي يبجي مسحتهن لان خجلت من بيبي كلش تعبت ويانه وما فاركت امي من يوم حادث هشام

= هاي اني سكتت

ام كرار تمسح بدموعها // عفيه ابتي انتي وين رايحه قابل مهاجره هياتها الناصريه شمرت عصا

بيبي //. مو عبالج نعوفج لا راح اجي واشوفج

شيماء // تره عمتي ام بدر خوش مره انتي بس اسمعي كلامها

بيبي // اي ياروحي اسمعي كلامها بيبيتج فرحه طيبه وتخاف الله

عرفت بيبي اسمها فرحه ويسموها ام بدر هزيت راسي واتقربت من بيبي هديه اكثر

= انتي ما راح تعوفيني ودووم تجيني لهناك اشوفج

حضنتني وباستني // اي وداعتج وعاتبيني اذا ما سالت عنج واجيتج

شيماء // وانا هم دووم امر عليج خاله لاتخافيين هناك عاصف ايدللج

= ها يعني ما يخاف من بيبي

ابتسمت شيماء وتحرك بايدها // لا ما يخاف انتي بس صيري مطيعه واسمعي كلامه

=. حتى هو عصبي

شيماء //. اي عصبي كلش وهناك كلهم يخافون منه انتي سايسي لاتخلينه يصير عليج عصبي

= شلون يعني ؟

شيماء // ها يعني لا ترادددينه واسمعي كلامه واهم شي لا تتدخلين معليج اسمعي كلامه وكلام بيبيتج ام بدر وراح

تشوفين شلون ايدللج ما شفتي شلون احتوى علاوي (باوعت البيبي ) والله جنت محتاره گلت هذا خطيه من يدري باامه

يجوز يطيح وترجع حالته مثل اول بس لان هو سايسه وفهمه بهدوء شفتي شلون اتجاوز المحنه خاله عاصف گلبه طيب

بس اليعانده اياذي وانتي لا تعاندينه راح ايدللج ويدلل اخوج

بيبي //. اي خو انتي شفتي شلون شايل علاوي واخذه للطبيب وهسه ما مفارگه ايگلي كريم كل ما يصفن يجيله ويحجي ويا

ويگله عمو انا ابمكان ابوك واخوك وصديقك يابيبي على گولت شيماء اسمعي كلامه وكلام حبوبتج

  = بس اني ...

ام كرار //. انتي شنو عمه ياريت خوالج الهم موقف زين خالاتج سالن كالن اشو الاغراب احن منهم هاي ام احسان ملخت

روحها على امج وهنه اجن عبالك غريبات مو اخوات اتحملي وعيشي لان محد بقالج ومن يطلع اخوج الله كريم بعد هو بكيفه

ترجعون البيتكم تبقون اهناك المهم روحي وعيشي هناك حالج من حالهم بس شي واحد سوي

ما عليج لا تسالين ولا تتدخلين باوعي واسمعي واسكتي

شيماء //. واهم شي دراستج ‎

=. يعني ايخلوني ادرس

- - اي تدرسين ليش لا

= مو تگولين عشاير وريف

- - اي عشاير ويمهم مدارس وكل بناتهم ايدرسن

هزيت راسي وبيبي گالت الخاله شيماء وام كرار // كفظن البيت

شيماء // شلنه بس فراشات النوم لان عاصف گال خلو مثل ما هو

بيبي اتحسرت //. بكيفه بيته وبكيفه

شيماء //. راح الم المواعين وادخلهن داخل الكاونتر

ام كرار //. عاصف كلي افرغ المجمده والثلاجه وانطيتهن البيت ام احسان كتلها اذا يمكم فقره انطوهم الاكل حرامات ينذب

بيبي //. زين اتسوين

وراحت بيبي وبيت عمو كريم وخاله شيماء وبيبيتي وصت عمي عاصف وهي اتكله // هلاتك باليتيمه عينك عليها

:: عين الله عمه

بيبي هزت راسها // ادري بيك ما يحتاج اوصيك بس ارجع واذكرك بكلام رب العالمين ( واما اليتيم فلا تقهر )

وبچت وحتى عمي كريم هماتين بچى

وسلمت عليه خاله شيماء وكالت // رقمي موجود عد حبوبتج من تحتاجين اي شي اتصلي

=. منو حبوبتي

هزت ايدها //. استغفر الله بيبيتج ام بدر

راحو واني بقيت احاول امسح دموعي ويرجعن اينزلن

اجه عاصف وحاجاني // لمي ملابس الج والاخوج عود واي شي تنسينه انا اجي واجيبه الج

ما رديت علي رحت للغرفه وصرت اطلع ملابس العلاوي الي اجه وكلي ( )اخذي البلي مو تنسينه

جاوبته بزعل = انت اخذه انت الي راح تلعب بي

( ) ان انتي زع لانه عليه اااني ششمسوي الج

هزيت راسي وما جاوبته هو اتقرب مني وصار يبجي ( ) ااني لاززم ابيين قووي لان ااني رجاال بس ااني ارييد ابچي

حييل ع ع على اممي الي ااعرف بيها ماتت وبعد ما ترجع

صار يبجي واني حضنته واكله = كافي حبيبي ياعمري انت هسه كل شي الي انت اخويه وابويه وسندي ياريتك كنت

شويه اكبر من هذا عمرك كان بقينه ايهنا وما رحنا الاي مكان

سحبت هوى من خشمي لان احسه انسد من كد البجي وصرت اجمع بملابسنا وخليتهن بجنطه لان اخذت بس ملابس سود وداخليات

وعلي اخذتله اكثر شي تراكات وما نسيت البلي هو والاقراص جاي اصفط بالملابس لمن

ما سمعت صوت عمي وهو يصيح بااسمي بعصبيه :: وجدا وجدان

خفت اكثر منه طلعت سالني :: منو داخل الهاي الغرفه

اياشر على غرفة امي رفعت اچتافي لان اني طيلة ايام الفاتحه اصلا ما وصلتها

اتقرب اكثر مني :: انتي ما داخلتها

هزيت راسي بالنفي = انيكله كاعده ايهنا ( واشر على الغرفه مالتنا اني وعلاري )

عمه انصاف :: شصاير عاصف

ما رد بس باوع العمه سعاد گللها :: تعاي

راحت ورا ودخلو الغرفة امي سمعنا حجي بس ما عرفنا بعدها طلعت سعاد ضايجه او وجهها باهت وصعدت فووك

وهي تحجي ويه نفسها هو طلع متنرفز ومبين علي العصبيه عمه انصاف سالته // شصاير خويه

:: ما صاير شي

- - اي غير اتفهمنا

رد بعصبيه :: جاي اكلج ما صاير شي

سعاد نزلت وهي شايله علاكه وتحجي ويه عمه انصاف

- - شوفي انصاف هسه تكلين الرجلج يروح يوصلني البيتي وانتي اذا تردين تظلين ظلي محد لازمج

انصاف // اي فهميني شصاير

- - خلي اخوج يحجيلج

- - سالته وما جاوبني انتي احجيلي

سعاد صارت تبجي // فوكاها انكسر ظهري بالمستشفى والفاتحه على راسي فالي لطم وبچي تالي يبوكني

:: ما بوكتج سعاد الفلوس جبناهن ويانه وهي المره بس دخلت للغرفه طاحت وشلناهه بالمستشفى

— — وانا رحت وياكم

انصاف // شني خويه شني من فلوس

:: من رحنه للمواجهه ام هشام الله يرحمها اخذت للمحامي كل الفلوس الي بخزنة رجلها جانن خمسه وعشرين مليون

والمحامي ما قبل ياخذ اله وره المحكمه لان دافعيله مقدم مليونين ومن رجعنه المفتاح عد سعاد ما كتلها شي بس سالتها لان

الفلوس ماكو

سعاد // لا مو بس سالتني انت كلت المفتاح عدي وانا القفلت الغرفه فوكاها فوك ما قفلت الغرفه تتهمني جا مانشدت

عمتك لو نسوان ولدها يو بتها

عاصف :: ها ترديني ابوك الحجيه

سعاد // لا بوكني انا دومي حايط انصيص

انصاف خرطت خدها وصارت تضرب على وجهها //. انوب فوك المصيبه مصيبه ثانيه فوك موتة المره فليسات

اليتامى انباگن اويلاخ خويه سعدي شمسوي بحياتك وهيج صار بيك

سعاد // شني انصاف ترحين لو تبقيين تلطميين

انصاف // وين رايحه ابقي والصبح كلنه نمشي

سعاد تهز براسها // لا وروح ابوي ما اظلن هسه امشي يو ادري امشي لوحدي

انصاف // تاني خلي اشوف ابو احمد

طلعت انصاف وسعاد وراها وهي تكل العاصف // تريد تشوف العلاكه خاف بايكه الفلوس

رد عليها بعصبيه :: انجبي والزمي حدودج واحترمي نفسج

ما ردت علي رجعت انصاف // خويه هاي مسودنه وانت هم ماالك حق تبوكها

:: ما بوكتها المفتاح عدها كبل لا تطي العمتي

- - بعد ضاعن من التمت الناس خو ما نروح نحلف الناس كلها

عاصف باستغراب ::منو كال انحلف ؟

- - سعاد تگول اذا اله راي ايحلفني ايحلف الكل واولهن عمتي ام كريم مو اكلك مسودنه

هز راسه :: لا ما احلف اي احد هاي مال يتيم واول وتالي ايحوب

انصاف // خويه يجوز متوهم المره الله يرحمها مو برايها وشوف وين ودتهن المن مطيتهن

عاصف خزرها :: شنو انا زعطوط ما اعرف احجي لو ما متاكد ما حجيت المره رحت وياها واخذت الفلوس

بعيني شفتهن من طلعتهن للمحامي اصلا تريد تطيهن كلهن بلكي. تحصل البراءه الابنها والمحامي ماقبل

كال نتحاسب وره الحكم رجعتهن كدامي للجنطه واجت للبيت والفلوس بجنطتها

:: ومو بس الفلوس حتى المسدس هم ماكو

- - انوب يامسدس ؟

:: مسدس سعدي انا بايدي خاله بالكومدي

صارت انصاف تبجي وهي تگول // اويلي عليك سعدي رحت وكل شي ما بقى ابمكانك لامال ولا بنين

اجت سعاد وگفت اباب الصاله وتحجي بعصبيه // اكلج ياالله

عاصف اتقرب منها وحاجاها :: اسمعي سعاد انا ما بوگتج انا سالتج بس انتي ما ادري شبيج اسمعيني حجي زايد ناقص

انتي تعرفيني وفلوس. الايتام ومسدس ابوهم اطلعهن من الباكهن وذاك الوكت حسابي ويا عسير

سعاد // البايكهن واحد ما شايف دور علي بعيد عنه احنه متروسه عيونه

عاصف هز راسه :: اي ادري انا الادري سهله وفدوه وانا بس سالتج انتي الي سويتيها مشكله

سعاد // اي اسويها مره شكبرني وشكدني تنشدني وين الفلوس عوزك تگول بكتيهن

اتنفس بعمق :: استغفر الله العظيم

ما فاد توسل عمه انصاف بسعاد يبقن والصبح يسافرن راحن عمه انصاف هي وسعاد الي صارت تحجي باستهزاء

- - مره بدون راي ما ادري وين شمرتهن ينشد بيه ما اخذت من اول هسه تدني نفسي واخذ

بقى عاصف گاعد بالصاله ويدخن وانا وعلي نجمع بملابسنا لمن ما رحت يمه حاچيته واني مدنكه

=. عمو

نفخ الدخان :: هاا

بلعت ريكي = عمو انت فتحت القاصه

:: اي ليش ؟

=. ما لگيت بيها اسوار

:: اسوار؟

=. بلي اسوار ذهب

:: مالمن ؟

=. الامي ابويه اشترا الها ورادت اتبيعه من اتوفى حتى اتسوي بي ثواب بس ام احسان گلتلها لا تبيعينه خلي البتج

وبيومها ماما انطت الام احسان التراجي مالتي ومحابس هم مالاتي وخلت السوار الي كالت هذا يبقى وياج لا تفرطيين

بي وهي شالته خلته بالقاصه

عمو بان على وجهه الاستغراب بعدها وكف وعض شفايفه وحاجاني

:: بابا لا تحجيين اي شي يجوز امج الله يرحمها باعته من جانت تراكض ع المعامله مو تگولين باعت تراچيج

حتى تسوي ثواب الابوج

=. بس هي كالت هذا الج لا تفرطيين بي وانت تكول الفلوس ومسدس بابا مسروقات يعني هو انسرق وياهن

هز راسه :: لا بابا ماكو سرقه ولا ابد هسه اتذكرت چنت ناسي الفلوس انطيناهن للمحامي وحتى المسدس هم بعنا

اعرف كلام عمو كذب وما اعرف لويش هالشكل حجى سكتت ورحت امشي للغرفه هو كال

:: وجد

التفتت حاجاني :: تعالي بابا

= ها عمو

:: اشلونه سوارج

= ليش عمو

ابتسم :: بس يصير عندي فلوس اسويلج واحد مثله

= لا عمو ما اريد

:: اوصفي حتى من تنجحين اسويلج احسن منه

وفعلا صرت اوصف اله السوار واني احچي ويه نفسي. =. اني شكد حقيره امي ميته واني اسولف ع السوار بس

هو ذكرى من امي وهي وصتني احافظ علي يجوز على كلام عمو امي بايعته وما گالت

يجوز

ونمنا بالغزفه والصبح سمعت دك الباب فتحت عيوني ما عرفت بيش الساعه سمعت صوته :: ياالله بابا اكعدو خلي نتوكل

ندهت علي وانا عيوني مليانات دموع رحت غسلتله وبدلتله واني هماتين غسلت وجهي اجه يمنا وكال

:: ياالله تعالو اتريكو هالمره انا سويت الكم ريوك

بدون ما اجاوب لزمت ايد علي ودخلنه للمطبخ شفت عالطاوله جبن وصمون وصاب كوبين حليب وجاي.

ابتسم وهو ايگول

:: ياالله اتريكو حتى نتوكل

علي صار ياكل وانا بس صافنه واباوع هو كلي

:: وجد بابا اكلي اي شي حتى ما تلعب نفسج بالسياره

تلقاىيا نزلن دموعي وهو نفخ وطلع كمل علي اكله وغسلت الكوابه وطلعنه رحت جبت الجنط وهو صعد يقفل بالغرف بقيت اباوع وكأني اودع البيت وصل يمي وكال :: ياالله 

رحت الغرفة امي صرت ابچي فتحت كنتورها وابوس بملابسها وصلت للجربايه صرت ابوس بمخدتها واشم بريحتها واعاتبها

=. ماما لويش عفتينه

باوعت الصورتها المرسومه وهي بگدي صرت ابچي واريد انزلها عمو كلي :: خليها

=. لويش اريد اخذها وياي

:: اخذي بس ملابسج وملابس اخوج ويااله خلي نروح

تستمر القصة أدناه

ما اعرف من سمعت كلامه صار عندي امل نرجع لهنا والا لويش كلي بس اخذ ملابسي وملابس اخويه

طلع گدامنا واحنه ورا طلعنه الباب البيت اخذ الجنط وباوعلي وكال

: : روحي دكي الباب على ام احسان سلمي عليها ولو يجوز نايميين

رحت امشي بسرعه دكيت الباب مره واثنين وتلاثه فتح الباب احسان الي مبين توه كاعد من النوم

باوعلي // هلو وجدان فوتي

= لا شكرا رايده خاله

- - اي فهميني لويش تبجيين

= صيحلي خاله

راح واجت هي ومنار شافتني اتقربت مني وحضنتني // ها خاله راح ترحون

شهكت لان احس اختنگت هي صارت تمرر ايدها على ظهري وتكلي

- - لاتبچيين لازم تصيرين قويه وانتي وين رايحه البيت جدج

باوعتلي وهي تمسح دموعي وتبتسم // صيري مطيعه واسمعي كلام بيبيتج وعمج عاصف واي شي ايمر بيج سولفي

البيبيتج صدكي هي هسه احن وحده عليج وللامانه امج وصت عاصف بيكم وصتني اگلج لا تعوفينه العلاوي

منار // وجد حبيبتي كافي بچي

حضنتها وهي صارت تبچي وتگلي // راح اشتاقلج وجد لازم تواجهين الحياة ولازم تكملين

ام احسان // اي مو تبطلين لان شهادتج سلاحج

اشرت المنار الي راحت دخلت للبيت

اجه عاصف وهو يكول :: ياالله صبحكم الله بالخير

هلا دادا اتفضل جوه ابو احسان موجود

:: غير مره سلميلي عليهم وانتي ياخويه ما قصرتي السويتي بس بنات الاصول ايسونه

ما سويت شي نجاة الله يرحمها اكثر من اختي (وصارت تبجي )

:: ام احسان ديرو بالكم ع البيت وهاي نسخه من المفاتيح كل يومين تلاثه مرو ع الحديقه اسقوها

ان شاالله شنو تاجرونه تبيعونه

:: بعدنا ما مقررين انا رقمي يم ابو احسان اذا يستجد شي خابروني

ما اوصيك بوجدان واخوها تره ما بقالهم بس الله وانت همه عدك امانه دير بالك عليهم

هز راسه ورد :: لاتوصيين حريص

ادري بيك انت ما قصرت لعد سعاد وام احمد وين

:: راحن قبلنه

ها الله وياهم

:: ياالله بابا

ااجت منار وهي اتگلي // اهم شي دراستج مو تعوفيها

هزيت راسي وام احسان ردت // اي خاله ابد لا تفكرين تعوفيها

حضنتها وشاورتني بعد ان خلت ورقه بيدي هذا رقمي ورقم منار خلي يمج شنو تحتاجين تخابريني

هزيت راسي هي ردت شو سمعيني صوتج

حاجيتها والعبره متكسره بصدري = راح اشتاقلج خاله

مسحت دموعها واصطنعت ابتسامه // ديري بالج على نفسج وعلى اخوج

حضنت منار رحت وانا لازمه علي ركبت بالسياره اجت وراي حاجت عاصف // ما اوصيك عليهم

هز راسه بعدين كالت //الله يخليك كل ما تصير لك جيه البغداد جيبهم وياك

:: ان شاالله

ركبت ورا وعلي راد يكعد بصفي بس عمي عاصف كله :: لا علاوي اركب يمي

حركت السياره وصرت اباوع للبيوت والشارع وللمحلات اعرف بعد ما راح اجي ولا اشوفهن عيوني ما بطلن دموع

وعمي عاصف وعلي ساكتين مشت بينه السياره وانا منتجيه على الجامه وكل الذكريات صارت كبال عيني

اتوقف خلى بانزين واجه يمي :: اذا تردين اكو حمامات وهذا محل اذا يعجبج اشتريلج

هزيت راسي بالنفي ونفس السؤال ساله العلي الي گله //. ما اريد شي

ركب بالسياره ومشى شويه وصل يم الاسواق ونزل غاب شويه واجه جاب علاگتين فتح الباب الوره وخلاها ابصفي

ورجع ركب خلا العلاكه الثانيه بحضن علي رصار يسوق واحنه ساكتين وهوبس يدخن تقريبا ساعتين او اكثر تمشي

السياره علاوي نام وانا وجهي ع الجامه ودموعي ابد ما نشفن وانا اتذكر كل شي مر بيه ابوي وتصرفاته وامي

وتحملها واخواني وضحكاتهم وخوفهم من ابوي اخواني الي راحو بغمضة عين والي ما اعرف شراح يصير بهشام

والي صارلي كرهت كل شي واولهن حياتي الي صار ما الها معنى واتمنى الموت بكل لحظه لكن الي مخليني

متمسكه بهاي الحياة اهو وجود علي الي ما اعرف شنو راح يصيرله بالمستقبل

اما انا فمعتبره نفسي انسانه ميته لكن موجوده

،

وكفت السياره باوعت شفت مكتوب مطعم اهنا عمي عاصف باوعلي وكال :: ياالله خلي ننزل ناكل وشويه نحرك رجلينه

ما انتظر ردي نده علي :: كووم ابو حسين

علي فتح عيونه وعمي ابتسم بوجهه :: ياالله بويه خلي ننزل ناكل

فتحلي الباب ونزلت هو مشى قبلنا واحنه ورا دخل للمطعم وشاف ركن بعيد وراح كعد بي واحنا لحگنا وكعدنا هو كال

:: ذاك حمام فوتي غسلي اديج او وجهج

رحت للحمام وصرت اغسل بوجهي وانا اشمر الماي وصور الي مريت بيهن امامي

رجعت گعدت وهو اجه ويه علي الظاهر هم راحو يغسلون گعد واشر بايده اجه النادل وكال شتطلبون

تستمر القصة أدناه

عمو ابتسم بوجهي وسالني :: شتحبين تاكلين

جاوبته = بكيفك

:: الحمد لله سمعت صوتج وانت ابو حسين

( ) كباب

:: تدلل

باوعلي وكال :: نطلب كباب

هزيت راسي بدون نفس هو طلب كباب ومقبلات وببسي جابو الطلب ابتسم وكال :: ياالله سمو بسم الله الرحمن الرحيم

بقيت مدنكه واي شي ما اكلت عمي باوعلي وحاجاني :: اكلي بابا

اخذت الشوكه وصرت اكل شيش الكباب بدون صمون هو ما عقب اكلت شيش واحد بس بدون اي شي وبقو هو وعلي

ياكلون بعدها اشر واجه نفس الولد طلب چاي ورغم ما سالنه بس طلب تلاثه على عددنا وهم ما شربنا لان علي شرب ببسي

وانا بس شربت ماي

بعدها حاسب ورجعنا ركبنا بالسياره الي ظلت تمشي بينه واحنه ساكتين وعمو يدحن جكاير

استدار على ارض بيت جدي من التبليط وينزل اتذكرها من اجيت قبل شهر ويه اهلي اي كان عندي اهل هسه احنه

اثنين ايتام لاحول ولاقوه ومانعرف شنو ضام النه المستقبل

،من استدار يريد يدخل على ارضهم طفى السياره وصار يكح بقوه بعدها دار عليه

:: اسمعي بابا وجدان وانت بابا علي راح تعيشون ابيت جدكم ويانه اقصد ويه جدتكم وياي انا وهناك عمكم

مهدي واولاد عمكم وبنات عمكم ما اريد منكم اي شي (ويحرك باديناته ) اي شي ما اريد منكم بس شغله وحده

تسمعون كلام حبوبتكم واي شي تگوله تكلولها حاضر واي شي تردونه وتحتاجونه خصوصا انتي وجد اتطلبينه منها

او. مني اي احد ما تطلبين منه شي بس حبوبتج وانا صار مفهوم

هزيت راسي

:: ولو اتمنى تحجيين بس (هز راسه ) ان شاالله تحجيين

بقيت ساكته ما جاوبت بس دموعي هنه الي ايجاوبن هو رد گال بعصبيه :: زين ليش هلگد تبچيين كافي الراح ما يرجع

ما اعرف ليش حسيت بي كانما يبجي هو سحب خشمه وغمض عيونه :: امسحي دموعج راح نوصل

شغل السياره وهو اياشر ويگل العلي :: شوف هاي مزرعة الاسماك

علي ( ) هاا يعني ااهنا نجي نصيد

هز راسه :: لا مو اهنا هاي بحيره نربي بيها نصيد بالنهر غاد

(. ) ويين يع ني

اشر بايده :: هناك ع الجهه الثانيه بس نرتاح اخذك

() او وجد تروح ويانه

باوعلي :: بكيفها بلي يعجبها

ما جاوبتهم ولا كانو الكلام يعنيني بين البيت من بعيد وصرنا نمشي بالسياره وريحة الزرع والماي تملي انوفنا قبل

ما ننزل هو كال :: عدلي حجابج راح نوصل

عدلت شالي وكلبي صار يدك :: وصلنه ياالله خلي ننزل

شفناهم واگفين عمي مهدي ويا اولاد واحد بعمر رامي اتسالمو ويا وكلهم التمو على علاوي وصارو

يتسالمون ويا ويبوسونه

وبعدها اجه واحد بسيارته واتسالم ويه عمو اتذكرته هذا الي اجه ويه عمو وراح ويانه للنجف من اتوفى رامي

بقيت بوگفتي لمن ما دار عمي عاصف وكلي :: تعاي بابا

اجيت عمي مهدي انطاني خده لكن انا اي شي ما بدر مني ولا حتى حجيت

عمي عاصف هز راسه وگلي :: فوتي للداخل

ما اعرف وين اروح ومهدي ايگله // هاي بعدهي

تستمر القصة أدناه

عاصف :: اي الدرب كله وهي تبچي

صوت واحد منهم // خطيه الله يساعدها

مهدي // چا شنسويلها هذا الجره وصار قابل احنه اموتين امها لو گايلين الاخوها يكتل اخو

عاصف :: شبيك مهدي

- - ما تشوفها ولا جني عمها حتى ما سلمت

صوت نفس الولد //. عمي هي بيا حال صدك چذب

عرفت بان عمي مهدي يمكن يكرهنا او ما يريدنا نجي لهنا اجه عمي عاصف بيده علي وگلي :: شني ليش ما دخلتي

هو مشى قبلي ويگول كلمته المعتاده بعد ان يتحمحم ::ياالله

سمعت صوت مره وهي اتكله //. هله هله بهالصوت بعد امك وروحها

كان البيت كلش كبير دخلنا للصاله ويمها غرفه او اكثر ما منتبهه عمو راح للغرفه دخل وشفت بيبي گاعده

ع الچربايه وبيدها سبحتها اتقرب منها وحضنها وهو يبوس بايدها وراسها ويكللها :: اسم الله على روحج

- - هله بيك يمه سوده عليه متغير

نفس صوت الولد //. شبي متغير اصلا بغداد طايحتله صاير يخبل

:: ههههه (شفته حرك راسه )

هي باوعتلي وفتحت اديناتها انا تلقائيا رحت حظنتها ودموعي تنزل صرت اشهك بحضنها وهي اتگلي

وينج او وين الضيم

صرت ابچي ردت وكالت // كافي جده كافي البچي ما يجيب الراح

وباستني ومسحت دموعي لكن انا اشهك من العبره اريد اصرخ باوعت العاصف وحچت

- - يمه هاي هي دووم هيج

::اي حجيه

اتمسد على شعري // چا ياحبوبه تعمى عيونج وهذا المگرود ياهو اله

رغم ما عرفت قصدها لكن الي فهمته تقصد على اخوي علي الي حضنته واشوف دمعه بعيونها وهي تدمدم بكلام بينها

وبين نفسها

كعدت ويمي علاوي وبيبي حجت // وينج فرح

الولد حچى بصوت // فرح ما سمعتي

- - ها جايه

باوعت الها شفتها ابنيه اكبر مني او بكدي

بيبي // هاجده شمالج ما شفتي ابوج من اجه وهاي بت عمج تجينها وتسلمين عليها

هي اتقربت على عمي عاصف // الله يساعدك بابا

- - هلا يابه سلمي على بت عمج

بيبي // گول اختها هاي اختج اخذيها للحمام خلي تغسل وتبدل وتالي اخذيها الحجرتج ترتاح

الولد كال // هاي فرح اختي وبت عاصف سموها معزه بحجيه فرحه

بيبي //وانت شحارك حمامك

هو فلت وجهه ابتسم وكال // وانا بهاء ابن عمج بدر

فرح باوعت بانزعاج وبيبي استردفت //. اخذيها خلي ترتاح

هزت راسها // صار حبوبه تعاي وياي

عاصف گلها :: اوگفي

- - ها بابا

:: انا كلت سلمي وانتي ما سلمتي

- - بابا غير اخذها للحجره مالتي واسلم واسولف وياها

بيبي // امج وين

- - هاي انا عمه الله يساعدك

:: هلا

بيبي // روحي صبي الغدا

:: اي عمه هسه

الولد // راح اخذ علاوي الغرفتي يغسل ويبدل

استغربت واني اشوف امها الفرح الي هي زوجة عمو ما لابسه اسود يعني من اجت لابسه دشداشه لون ككوي وبيها

ورده زغيره بيضه وحجاب لونه جوزي وفرح كانت لابسه دشداشه صفره وما مبين عليهن حزن رغم اشوف عمو

عاصف وبيبي ضايجين وحتى مقهورين

رحت ويه فرح الي احس بيها متضايقه من وجودي او اني هيج حاسه صعدتني وبالممر اشرت وكالت هذا حمام وهاي غرفتي

روحي غسلي وتعالي

رحت قبل ما ادخل للحمام اكو مغسله ومعلكه فوگاها مرايه اباوع الوجهي صدكوني ما عرفته عيوني ذابلات وجوه سواد وجهي مخرمش وبقع زرك وحمر

رحت للحمام وغسلت ورجعت للغرفه دخلت شفتها غرفه بيها كنتور بابين وجربايه نفر وميز تواليت وميز دراسه لان شفت كتبها هي كالت. // هاي حجرتي هزيت راسي سالتني

ليش ما تحچيين

ما جاوبتها هي ابتسمت // هسه ساكته بس ما طولج راح اتكعدين ويانه اهنا راح دووم تحچيين

سمعت صوت وهويگول // فرح انتي وبت عمج انزلن اتغدن

الفصل السابع عشر من هنا