رواية اغفري لي الفصل الخامس عشر بقلم أوتار حزينة
صرخاتي
تتردد في الفراغ
لا يسمعها أحد
لكنها تحرقني
لماذا أنا؟
سؤال يتيم
يطرق جدران قلبي
ولا جواب
سوى صدى الخيبة
يمامه
جنت دائما اطب بفرع بي محلات مال سگراب
اختصر الطريق حتى اوصل لمكان
الفورتات بسرعه جانو مرة ورجال
يمشون گدامي ورجال
جبير يمشي ورايه
بنص الطريق شفت سياره واكفه واحد
يروح ويجي يمها يحجي بعصبيه
وصياحه وصل ليمي من صوته
عرفته هو نفسه
الشرطي
انداريت اريد ارجع سياره اجت سريع
باتجاهي وصل ليمه نزلو ثلاثه
شايلين تواثي مالحك كلشي
يسوي لان التمو علي
وكامو يضربون بي
الرجال والمره شردو والشايب رجع
ليوره وهم شرد
ردت اسوي مثلهم بس،،، وكفت من
شفتهم بعيوني شلون التمو علي ووگعلو دك
بالتواثي بس هو جان سبع ضربهم ودافع عن نفسه بس الكثره تغلب الشجاعه
ردت اصيح الم الناس بس ماكو احد الشارع
فارغ ومحد بي كلهم عزلو وراحو
تقدمت اريد اسوي شي افكه منهم رجعت
اردد
«،،،،لاا اني شعليه خاف يأذوني
رگضت،،،بس وكفت من سمعته
يصيح من الوجع ويفشر عليهم باوعت علي
جان بالگاع لام ايده على راسه
ويحمي روحه من ضربهم
«،،ولكم عووفوني نعل ااهلكم خرب والديكم
روحي فرفحت علي وكلت
«،،،ياربي شااسوي راح يموت جوة ايدهم
درت راسي اريد بشر يجي ماكو سمعت
واحد يصيح
«،،،اليوم الااا نخليك بالطب العدلي
گلبي فز من الرعب وعرفتهم ناويين على
قتله
باوعت على السگراب شفت شيش بدون
وعي رگضت اله شلته ولزمته
بقوه مااعرف شصار عبالك
واحد دفعني باتجاههم
من صرت قريبه
صحت
«،،،عووفو ولكم
واحد اندار ،،،ضربته بالشيش اجه براسه وكع
يسب بيه كمت اضرب بيهم مغمضه
واصرخ
«،،،،عووفو ولكم عوووفو ياااظلام
فزيت من سمعت طلقه ثارت بالجو وكعت
بالگاع ارجف، ،،،عبالي اني انضربت باوعت
شفته هو واكف موجه سلاحه
عليهم بس حاله حال
وجهه كله دم وراسه مفجوخ
وينزف بس صاح بيهم
«،،،بااالگاع ولك انت ويا لا هسه افرغ
هذا الشاجور
براسكم
واحد هد علي ضربه طلقه اجت برجلي صاح واني
صرخت ،،،،،خليت اايدي على اذني اسمعه
يصيح بخبال
«،،،تمددد انت ويا الا اخلي طلقه بگلبكم
حجه هيج وضرب اللخ هم برجلي وكع
يصيح الاخير تمدد بس
يخزر بي
شفته كام يرجف من غضبه دور جهازه
مالكاه كال
«،،،جيبي جهازي ذاك بالگاع
اشرلي علي جان قريب من عندي
كمت اخذته رجعت انطيته
اله بايد ترجف
باوع عليه جنت ملثمه بس عرفني لان شافني
قبل شويه اخذ جهازه وخابر
«،،عامر بسرعه تعال عليه اكو جماعه تعرضو
اليه وولزمتهم ولك ااي بس تعال
اني ،،،
فزيت من شفته داخ وكام يتمايل لزمته
بسرعه ردت اوكع اني ويا لان جان
ثگيل كلش صحت بي
«،،،وولك لاتموت ،،،،بس سلمهم للشرطه خاف
ياذوك ويأذوني
هز راسه بقوه ووعيه رجعله كال للولد
على المكان وظل ويا على الخط ظليت وراه خايفه لا يوكع وذوله يخلصون عليه وعلي
كمت الوم بروحي واردد
بخوف
«،،،اني شسويت وشلون جبت بلوه لروحي
ذوله عبالك عصابه وعدهم
ثار ويا
هم رجع يتمايل لزمته وكلت بتوسل
«،،،عفيه تحمل شويه والله بس تفقد الوعي
راح نموت اني وياك
اني حجيت هيج العدل كام يخزر بينا
صحت اهز بي
«،،،،ووولك هذااا كام
رجع لوعيه من هزيته وضرب طلقه بالجو
وصاح بي
«،،،،ااارجع ولك لااا الطلقه الثانيه
تصير بگلبك
كمت ارجف واني خاتله وراه وسانده ظهره
بايدي الاثنين
مر علينا الوكت ثكيل وصرت فد مرة من وراه
ومن ورة ذوله كلت هسه باي
لحظه يوكع ونروح بيها
گلبي فز من سمعت صووت دوريه اجوي
بسرعه نزولو عليهم جتفوهم
هو بذيج اللحظه وكع ليوره ضابط اجه
بسرعه ولزمه صارت هوسه يمنا
لان اجت دوريه اللخ
من شفتها صارت هيج والتهو بي وبذولاك
بسرعه انسحبت بهدؤ امشي واباوع علي
شالو فاقد وخلوه بالسياره
رگضت للشارع دنيا ليل ومااعرف شراح
يصير خاف يدورون عليه لان اني
جنت شاهده على الصار
مااعرف شلون صعدت سياره ولا شلون
وصلت لبيتنا طبيت جسمي
كله يرجف واحس بروحي
راح اوكع على وجهي
جان ماكو احد البيت فارغ رحت للمخزن
كعدت اتنفس بقوه والصار يمر
بين عيوني مثل فلم
رعب
جنات
جنت طالبه نقل لغير دائره اني
واسماء صديقتي لان الشغل هناك هوايه
وتعبنا منا وهم صارت النا كم
مشكله من وره المدير الي
شد ويانا وبس طلبنا
نقل وافق،،،، وانتقلنا للدائره الجديده
دوامنا اني وياها بالطريق سالت على
مهند ضجت من جابت سيرته
وكتلها
«،،،مابي شي بس اصدكين هو مو اخويه بس
كلت يستاهل السواه قائد بي
«،،والله ماادري شاحجي يعني ابوج
شلون كدر يسوي هيج بنت اخته
«،،،الطمع اسماء خلاهم هيج يسون وهم
يكرهوهم من زمان من ورة ذيج
السالفه الحجيتها الج
«،،،اي اعرف بس صعبه السوه بيهم خطيه
انتي كلتي جانو واحد يحب اللخ
بجنون
«،،اااي والله جنت اعرفه شكد يحبها وشلون
سوه المستحيل حتى ياخذها تالي
الي اسميهم اهلي لعبو لعبه
قذره عليهم وفرقوهم
«،،اوف هسه شلون حاله خطيه
جاوبت بقهر
«،،كاعد يموت من ورة السواه بس والله
هو ماله ذنب بالصار كله ذنب
ابويه وذولك خرابين
البيوت
اسماء سكتت واني هم صح هم اهلي بس
ماجنت ارغب الهم ولا عشت مرتاحه
عدهم من ورة سوالفهم المو حلوه
ومن وره مشاكلهم
اني ودانيه جنا مختلفين عنهم الي يعاشرنا
ويعاشرهم يتعجب لان الاختلاف مبين
وجبير من ازوجت عزلت روحي
عنهم لا احب اروح الهم
ولا احب يجوني
لان سوالفهم تفشلني كدام كريم واني
مااحب هالشي خليت حدود بيني وبينهم حتى
اخلص من مشاكلهم وسوالفهم الجايفه
وهم ماخلصت لان السواه اخويه وابويه
عرفو كل الگرايب وصرنا علج
بالحلوك
وصلنا للدائره،،،،،ورحنا انقدم اوراقنا
للمدير واكفين اني وياها بره
ننتضر السكرتير يدخلنا
علي كلت بضوجه
«،،،اليكول وزير مو مدير دائره صغيره
«،،،اي والله صارلنا شكد واكفين
ولا طلع هذا السكرتير
«،،اسكتي اليوم راح اتكسر شجاني شورطني
ولبست گعب عالي
«،،،اليوم انتي طالعه لوزه
ابتسمت وجاوبت
«،،،كريم هم كال
الباب انفتح السكرتير طلع وكال
«،،،تفضلن
اسماء طبت واني وراها غرفه جبيره
وفخمه كلشي جوزي طوخ ويلمع
واحد كاعد ومنزل راسه
يكتب
اسماء سلمت
«،،،مرحبا استاذ
«،،،،اهلا وسهلا
كلت
«،،،صباح الخير استاذ
تجاهلني وكال
«،،،تفضلو
حجيت وي روحي من كعدت
«،،،هذا شبي رد السلام قابل هو بفلوس
«،،،هاي اوراقنا اني وجنات
«،،،شنو سبب طلب نقلكم لهنا
سال وباوع عليها ردت
«،،،اسباب شخصيه
ركز بنظره وهز راسه وجاوب
«،،واكيد ماراح اكدر اسال شنو هالاسباب
موووو
اسماء دحگت عليه كلت
«،،،اختلافات بوجهات النظر
دار وجهه عليه ليش عكد حواجبه ماادري
رد
«،،،تمام تكدرون تباشرن بالعمل من باجر
وهسه تكدرن تتفضلن
كمت اني وياها هي كالت
«،،،شكرا الك استاذ
مارد طلعنا من يمه ورحنا للسياره مالتي
تردد
«،،،هذا شبي عبالك معقد
«،،اي وشايف روحه شفتي يحجي بثگل
وهو عاكد حواجبه
«،،،خرب حظي اني وياج بس لا هذا هم
مثل ذاك ويلعب نفسنا
«،،،ههه تورطنا بعد
«،،،،اي نعم وهي ورطه ورطه
حركت وطلعت كالت
«،،،حبابه اريد اسوك
«،،،اي اني هم ماعندي شي وكريم صاير
يغلس عليه من اگله على
شي يكول مشغول
لو ينسى
«،،،كلهم هيج وداعتج هم العندي يجي
جايب حاجه وناسي اربعه
سكتت بعدين كلت
«،،،اني ماادري احس باله مشغول بشي
يعني هالايام صاير يتاخر بره
ومرات مايجي على الغده
«،،ماسالتي ليش
«،،،سألته كال شغل للراس واكو مشاكل بالدوام
وناس تحفر جواه ويتاخر حتى
ماصير الهم حجه
«،،،ها نفس عادل هم مشاكل بالدوام
ومرات يجي متاخر من وره
الشغل
«،،،وين مااروح المشاكل
«،،،اي والله اكلج هذا استاذ ارشد عبالك
جاد كلش بالشغل،،،، ولازم نجي من وكت
خاف هههه يرزلنا من اول يوم
«،،،اي مو احنا بمدرسه حتى يرزلنا هاي العايزه
بهل العمر نوكف وهو يرزل بينا
«،،،ويضربنا مصطره هههه
ضحكت وجاوبت
«،،،،،ااخ من ست فريال تذكرين شلون جانت
قاسيه ويانا والي تخالف تنضرب
مصطره تخليها تجر عدل
اسبوع
«،،،،ههه اي ولج اذكرها بس صدك هي ماتت
لو بعدها طيبه
«،،،ولج بعدها طيبه شفتها من رحت اسأل على
بنت دانيه تعجبت اسماء هي جانت
جببره وكبرت بعد اكثر بس
بعدها تلبس ذاك االلبس الحلو والاظافر
مصبغه احمر والكعب يطگ بالكاع
«،،خرب حظي واني بكد بنتها وشوفيني
شلون مسويه روحي عجوز
««،،،ههه انتي غير گبرتي روحج بهل
اللبس والربطه
«،،،اوف اسكتي من هم العيال والرجال
«،،كتلج اخذي بيت بقرض وانتي ماقبلتي
«،،،اي واروح اسجله باسم رجلي مو مثلج
يابومه
«،،،اني وكريم واحد اذا باسمي ولا اسمه
شنو الفرق
«،،،غلط جنات لو كل الثقه والحب الي بينكم
جان لازم تخلي باسمج ماتعرفين
الدنيا شلون صارت ولا
تعرفين النفوس شوكت
تتغير
«،،،كلها تتغير الا كريم
«،،اوكفي هنا هذا يبيع رخيص
وكفت والتهينا بالمسواك وراها وديتها
لبيتهم وطلعت لبيتي وصلت
خابرت كريم اساله شاسوي
كال
«،،،اليوم مااجي على الغده
«،،،ليش هم شغل
«،،،اي يله اروح جنو
«،،،الله وياك
غاده
جنت عبالي راح يرجع بكلامه ويگلي
ماكو دوام واكعدي واسگتي
بس هو نفذ وعده اليه
والعصر اخذني اني وعمته ورانيه للسوگ جنت بس
اريد اطلع واشوف الدنيا مخنوكه
واحس بروحي مثل العصفوره
الي محبوسه بقفص
اسود
كعدت ليوره رانيه يمي وعمته يمه سالته
«،،،ها يمه اشوفنك صافن وعدالك مالك خلگ
«،،،مابيه شي
«،،،هم راسك يوجعك
«،،،،لا
جان يرد مختصر اني ظليت اباوع من الجامه
واسمع كلامهم
«،،،خلي نشتري من يم الكاظم فدوه لاسمه
عمته حجت رانيه جاوبتها
««،،اي هناك حلوات ويخبلن
جنت احجي وي روحي اكول
وين جنت ووين صرت حياتي انگلبت
بيوم واحد وصرت لواحد اني ويا مختلفين
مثل الليل والنهار لا هو مثل عمري
ولا اني بعمره هو 33
واني 23 يعني اكبر مني بعشر
سنين هو فلاح واني صيدلانيه مو تكبر هالشي
بس اختلاف بالثقافه جنت اريد
واحد مثلي يفهم عليه اشاركه افكاره
ويشاركني افكاره
واحد فاهم دارس مو همجي مثل هذا الي
يمشي وره غرزيته مو عقله واحد
مثل مم
سكتت ماكلت اسمه عيوني غورگت
وكلت
وهو ابو العقل شسوه اليه اشو عافني
وتخلى عني باصعب شده ولا عبالك
اني جنت مرته وعرضه هو
هم سلمني لهذا وخلاني
اعيش عيشه مو
رايدتها ولا راح
اتقبلها طول
عمري
دمعتي نزلت مسحتها بسرعه انتبهت هو
يباوع عليه بالمرايه بنظرات مو
مفهومه
درت وجهي منه وبعد ماباوعت
رانيه كالت بضحك
«،،،ابو جمرة اطلب شي
ذب حسره ورد
«،،،اطلبي يبنت العم
«،،،نريد عشه لفات صاج لحم وبيتزا
«،،،ادللي
«،،،يمه فدوه اروحن للحنين
ردت علي عمته سالتني
«،،،وانتي غاده ماتريدين شي
«،،،لاا
«،،،ماعليج بيها عمه نوصل واخسر ابو جمرة
كومه فلوس اليوم ارجعه مصفر
الجيوب
«،،،جيبي عامر ماتخلص فلوسه
رد عليها ضحكت وردت
«،،،تعلمني بيك الخزينة كلها يمك
«،،،مامقصر وياكم يايمه شتريدون يجيبه الكم
اي والله اصلا اني مزوجه وماينساني
بالصوغات
اسمع واني صافنه عقلي ماجاي يستوعب
اني صرت مرته لهذا وراح اظل هيج
طول العمر
«،،،،عمه خلي نزور
«،،،،اي چا شلون نوصل ابو طلبه مانزورة
«،،،،اي حتى اطلب مرادي واشد علگه
رانيه حجت وسالتني
«،،،زايره الامام من قبل
«،،،اي
«،،،هناك راح تنسين روحج وتحسين براحه
جنت اريد هاي الراحه اريد شي يبرد گلبي
المشتعل نار ردت السلام لروحي
بمكان روحاني بلكي ارتاح
شويه
وصلنا كال
«،،،،خلي نزور بالاول وبعدين نروح للسوك
عمته ردت
«،،،اي هو هم هيج
نزلت اعدل بالعبايه مال رانيه لان طلب
البسها من نطلع مااعترضت ردت بس
ادوام ومايدور الحجه عليه
كال
«،،،،،يله بويه امشينا
اشر النا مشيت وي رانيه عمته ويا من شفته
الگبه صارت كدامي عيوني غورگت
وحسيت بثگل براسي جنت
اريد اكعد بالحضره
وابجي واطلع
قهر گلبي بهل المگان
جانت هوسه وزاور هوايه جايين طبينا
بنصهم عمته مشت بصف رانيه
هو ورانا
رجال صارو من جهتي وازدحام صار
فد مرة وخرت من عدهم ماكو
مجال،،،،، ايد صارت يم جتفي
بس ماطخه مثل الواحد الي
يحمي واحد صوته اجاني
«،،،،امشي منا
وخرت بسرعه الا طخيت رانيه
كادتني حجه وي
عمته
«،،،طبن وكملن زياره وعگبن هنا
«،،،،تمام
عمته اخذتنا زرنا وصلينا بالحظره كعدت
هنا ابجي بصوت قوي الكل انتبه
عليه نزلت عباتي على
وجهي اردد وي
روحي
«،،عليمن ادعي ياربي على اهلي يوجعني گلبي
على اخويه يكسر ظهري
شهكت بصوت قوي عمته كالت
«،،،كافي يمه لاتروحين تتخربطين
رددت بگلب متروس قهر
«،،،حسبي الله عليك لو منطيها لبنت عمك
جان هذا كله ماصار لا انتو انفضحتو
ولا اني صار بيه الصار
بگلبي دعيت علي بالموت وتمنيت هالشي
يصير بسرعه حتى اخلص منه
حمزة
صليت بالحضره وكعدت منزل راسي
اردد بقهر
«،،،هسه كاعده تدعي عليه بالموت وتطلب منك
يبو طلبه تاخذلها حگها مني وانت
تشور بالظالم واطلع حوبه المظلوم
بسرعه بس انه هم
جاي اگلك هم
انظلمت
سكتت وكملت بقهر
«،،،،الله يعرف انه شلون انظلمت من
بلاني بعله خلته الكل ينفر مني من
انه صغير سمعت اشكال
الوان كلام وحسيت بروحي مو طفل
لا كبرت قبل اواني والحزن والقهر
جانو ساكنين بگلبي
وهم انظلمت من تيتمت وانه صغير وربيت
فاگد،،،، الاهل كلها يمي لچن انه جنت اريدن
حنيه الام واسمع كلامها
الي يهون عليه الانه
بي
وانظلمت من هاي الي تيتمت وياي وماخافت الله بينا شفتها بالعزه
صغيره تفر راسها على الاوادم وتضحك
ماتعرف منو الراح ولا شلون
هي تيتمت عدالك
الله زرع حبها بگلبي شفتها اختي
الصغيره وحبيتها مثل ضنايه وسويت
الها الي رادته،،،،، لچن هي
ماااقدرت هالشي وفضحتنا بين
العرب وخلتني اظلم هالبنت بذنبها هي
واخوها وانه والله مااريدن
الظلم ولا احبنه
بس ااخ يبو طلبه ظلمت والظلم ظلمات
وخايف باجر لا اموت واتحاسب
من وراها
ماجنت اريدن اخذها ولا ردت ازوج انه
حبيت لچن ماانحبيت
واعرف محد راح يحبني ولا انحب من ورة
البله الي بوجهي وراضي والله
بامر ربي بس تعبت من
هالشي تعبت من نظرات الناس اليه وانه
اشوفن بيهن شنو تلعب نفسهم
من شگلي
ذبيت حسره طلعت نار من جوة گلبي
كلت بصوت مخنوك
«،،،يارب منك الصبر على ابتلائك اليه وانه
والله راضي بي خلي العيون
تشوفني مثل ماانه ااريدن
غاده
انتهيت من البجي وانهاريت بصعوبه عمته
ورانيه طلعني لبره كعدني بالحضره
ابجي واشهك غسلن وجهي
«،،،يمه كافي تبجين تره صرتي فد مره
عمته حجت وياي بخوف رانيه
خلت البطل يم حلگي وكالت
«،،،،هاج اشربي لا تروحين اطيحين علينا
شربت شويه هي مسحت وجهي وكامت
تهفي اليه روحي ردت ورة مشوار
وسكتت بس ظلت شهگتي
بصدري
«،،،اجه حمزة
شفته من بعيد اجه العيون علي من وره الوحمه
من صار قريب وشاف وضعي
ثگل خطواته والملامح
تغيرت
نزلت راسي ودمعتي رجعت نزلت بس بصمت
عمته راحت اله وكفت يمه ماادري
شحجت اجه وكال
بصوت متغير
«،،،اذا ماتكدرين نعگب وغير يوم نجي
جان مالي خلگ بس كلت
«،،،لاا مابيه شي
ردت اخذ الي كال علي حتى ادوام باجر
وهم شفت رانيه انقهرت بس
سكتت ماحجت شي سأل
«،،،تكدرين تمشين
«،،،اي
كمت اتجنب نظراته كمل
«،،،،يله عمه خلي نطلع للسوگ
مشيت وياهم مخنوگه ودمعتي بعيوني
تعبانه وراسي يفتر كلت هم صار
عندي هبوط هو جان
يمشي گدامنا وكل
ساع يندار علينا
كال
«،،،اوكفن هنا
طب محل مال حلويات وعصاير رجع وره
مشوار جايب عصير ونساتل انطاهن
لعمته ورانيه وماحجه شي
«،،،هاج هذا مال البرتقال زين الج
رانيه حجت وياي وفتحت نستله ام الكاكو
وكالت
«،،،هاج اكلي هاي طيبه كلش
««،،،مااريد
جاوبتها عمته حجت
«،،،يمه اكليها واشربي الشربت تره وجهج
صار نوميه واخافن عليج لايصير
بيج شي
اخذته من رانيه هو والنستله هو واكف
مسافه عنه انتبهت من شاف
العيون علي لف اليشماغ
على وجهه ونزل
راسه
شربت شويه من طب لزردومي حسيت
روحي ردت اليه رانيه
اكلت النستله وكالت
«،،،وج ااكليها راح تموع بأيدج
كملت بضحك
«،،،،اذا ماتريدها جبيها مااگلج لاا
مديت ايدي الها ضحكت بصوت باوعت
اله شافته باوع الها وهو عاكد
حواجبه نزلت راسها
وكالت
«،،،راح اترزل من ابو جمرة وكله من وراج
«،،،البنت شعليها انتي مفضوحه من يومج
عمتها ردت وكملت وياي
«،،،،اشربي مادامه بارد
شربته كله لان جنت محتاجه شي يخليني
اتوازن النستله انطيتها لرانيه
لان جنت مااشتهي
وصلنا المحل الي يبيع عبايه راس وهي
ساعدتني واختارت اليه موديلات
شبابيه وحلوات ونازگات
ماجنت اريد البس عبايه ولا اجه بالي
بيوم اني راح البسها بس لان حياتي تغيرت
180درجه وصرت لهذا الي خله
هالشرط حتى ادوام قبلت
بهل الشي
انتبهت هو يصرف بدون وجع گلب وشيريدن
ينفذن الهن بدون اعتراض اخذلي
اربع عبايات وكلهن غاليات
بس اني جنت اشوفهن
چفن اسود
رانيه جانت الي تحجي وتطلب للبيت واليه
واني ساكته ماردت شي منه ولا
ردت يصرف عليه
ماردت احس اني مسؤوله منه حتى لايزيد
عندي احساس اني هاهيه صرت
مرته ولازم يصرف
عليه
هالشي دمرني وخلاني بس ساكته يحجون
وياي ،،اهز راسي باي هي رادت
تفتر بعد بس هو گال
«،،،لا يله خلي نعگب تأخر الوگت
«،،،،لا عفيه ابو جمرة والله بعد وكت
جاوبته سكت وطول باوعت عليهم جان
صافن عليه دار وجهه ورد
«،،،غير وكت رانيه تعبت وبعد مالي خلك
للفره
«،،،اي والله انه هم غديت فد مره واريدن
عاد اعگب حتى ارتاح
«،،،،قفلتو عليه مو
ردت عليهم بزعل هو جاوبها
«،،،لاتزعلين اجيبج غير مرة
«،،،وعد ابو جمرة
«،،،وعد بوويه
«،،،ههه فديت الحنين الي مايكسر الخاطر
«،،،،يله امشينا
طلع گدامنا يمشي وكل ساع يباوع علينا
وصلن لسيارته فتحها وكال
«،،،ذبن الغراض يم الجنطه وروحن اصعدن
هن خلن الغراض يمها وراها صعدنا اجه
صعد وكال
«،،،يالله
رانيه دغت عمته كالت من حرك
«،،،يمه لاتنسى العشه
«،،،لا مو ناسي هسه اجيبلكم بيتزا ولفات صاج
بعد تأمرون بشي ثاني
«،،،مايأمر عليك ظالم يبعد خيتك ماقصرت
رانيه جاوبته حرگ وطلعنا من يم الامام
نفس الهم بعده بگلبي والقهر
لان راح ارجع لنفس
المگان واگابل
نفس الخلقه
راسي رجع يفتر بقوه ونفسي كامت تلعب
وصلنا هن نزلن قبلي اخذن الغراض منه
نزلت من خليت رجلي بالگاع
دخت والدنيا افترت بيه
لزمت السياره بقوه
وغمضت عيوني
اريد اتوازن
«،،،بيج شي
جان هو قريب مني ماد ايده اليه
عفت السياره وصحت بيه
«،،،،لااتزلمني
سحب ايده بسرعه وابتعد مسافه مشيت
راسي ثگل ورجلي بادن وكعت
على وجهي هو تلاگني
وصاح
«،،،عمممه
مااشوف نفسي غير اذب من راسي
علي كعد بالگاع اني يمه
اذب بقوه بحظنه حسيت
روحي رادت
تطلع
اذني وشت وصار صفير بيها كلت صفر ضغطي
وراح اموت سمعت هوسه يمي مااميز
الاصوات مغمضه والدنيا
تفتر بيه بقوه
ايد اخذتني لحظنها غسلت وجهي اكثر
من مره وشربني مي وعيت
بس بعدني مو زينه
جنت بحظن عمته هو كاعد يمي والحجيه
ورانيه الي كالت
«،،،اروحن اجيبلها روبه وملح
«،،،،اي يمه بسرعه
«،،،،يمه خلي نشليها لغرفتها
رادت هي والحجيه يشيلني ماكدرن ولا اني
كدرت اگوم
هو صاح
«،،وخرن
ذب دشادشته الكلها تقيء واجه بسرعه
شالني ماجان بيه حيل ارفضه
او احجي گلمه
خلاني بالفراش ووخر من يمي
رانيه طبت بسرعه شايله كلاص لبن
كعدتني هي وعمته الحجيه يمي تباوع بقلق
شربته كله لان حسيت روحي
راح تطلع
«،،،،،جيبلها بعد
هو حجه
«،،،ااي هسه
هم شربت اللخ شويه شويه كامت رجفه
جسمي تروح واذني راح الصفير
منها
انتبهت من عيوني فتحت زين هو يروح
ويجي بالغرفه ويباوع عليه
بعدين راح للكنتور
فتحه بقوه اخذ
دشادشه
وطلع
الحجيه جانت صافنه علي القهر
مبين بملامحها كالت
بصوت متغير
«،،،،ماراح ترتاح يبن الخايبه من السوته
ايدك
حمزة
شفتها شصار بيها وهالشي دمرني بعد
اكثر هجيت للبستان كاره روحي
والسويته وكاره زهره
الي خلتني اظلم
كعدت على جذع نخله مهموم وحاير
شأسوي اعگبها لاهلها شلون
وذيج صارت الهم
اخليها راح تموت چدام عيوني واظل شايل
ذنبها طول العمر
عاينت للسما وظلام الليل وكلت
«،،،شاسوي ياربي والله كمت مااعرف اصرف
ولا اعرف شلون افگر
سمعت صوت مشي انداريت جان
جعفر كمت وسالت بسرعه
«،،،البنت بيها شي
«،،،،لاا مابيها شي
ذبيت حسره وكعدت هو اجه كعد بصفي
كلت
«،،،،شاسوي ياخويه گلي انت شور عليه
بلگي عندك حل يريح گلبي هذا
المشتعل
«،،،ماكو حل
رد وكمل
«،،،انت خذيتها وذاك اخذ بنت عمنا
«،،،ولك البنت جاي تموت من ورة السويته
بيها وانه والله ماردت هالشي
مو تدري بيه ولك مو تعرف
بيه مااحبن الظلم
«،،،اعرف والصار غصب عنك
«،،،،الله ماراح يعرف هالشي
جاوبته بقهر وكملت
«،،،،ولك انه راح اتحاسب ويجوز اروحن
للنار من وراها
سكت كمت من يمه اروح واجي اردد
«،،،،انه عذبتها وولك شاحجي ماجنت بشر
وياها حيوان انتقمت منها جعفر
اذيتها اذيه گشرة وخليت
بيها اثر راح يظل
بيها طول العمر
جان ساكت ويعاين عليه بقهر كملت
بحرگه دم
««،،وشفتها موو يوميا تتخربط وتطيح علينا
كل ساع اگولن راح تموت واظلن
بذنبها طول العمر
«،،،ماادري شحجي
«،،،،اكولن اعگبها لاهلها شلون وهي صارت
بعد حرمتي وانه خذيتها يعني
اكسر بختها مرتين اذا
طلگتها
«،،واذا طلكت يجوز ذاك هم يطلگ زهره وتعگب
علينا وهم ترجع السوالف القديمه
الي حنا ردنا بس نخلص
منها ونسد الحلوگ
الحجت بعرضها
جعفر حجه هالكلام وكمل
«،،اعتذر منها حاول تصلح موقفك وياها
ابتسمت بوجع وجاوبته
«،،،ولك المن اعتذر وعلى شنو على نهبي الها
لو على السويته بذيج الليله
لو على كلامي وياها
سكت كملت
«،،،مايفيد بعد اي اعتذار لان السويته
مايمحي اي كلام
جهازي دك جان ابن خالي هشام جاوبت
«،،،هلا هشام
فگيت عيوني وصحت
«،،،شنو شوگت صار هالشي
«،،،شكو حمزة شصاير
«،،،جااي هسه
سديت الخط وكلت لجعفر
«،،،مهيب متعرضلي جماعه وطاگي وهو هسه
بالمستشفى
«،،،شنو وليش،يطگو
«،،،مدري خلي نروح ونشوفه
مشينا وكفت وكتله
«،،،،لا انت ظل هينه خاف يصير شي
للبنت
«،،،،تمام تمام بس طمنا علي
«،،،،،اي
ليلى
واكفه اشتغل بالمطبخ،،،،هو بين عيوني
شلون انهار بيتنا وتخبل ومن وكف بطريقي من ردت اروح لغاده عرفت اني راح اشوفه
هوايه وراح نتواجهه
اكثر من مرة
«،،،ها كملتي جلف
انتبهت من حجت ماما جاوبت
«،،،،اي
كعدت باوعت الها القهر مبين بوجهها
كالت بخوف
«،،،اني وابوج خايفين عليج منه والتفكير راح
يموتنا
«،،،مايكدر كلشي يسويلي واصلا من اجه
بذاك اليوم واني ماشفته بعد
جذبت حتى مايظلون شايلين همي كملت
«،،،اطمني هو بعد مايجي لان عرف كلشي
انتهى وهو خسرني للابد
«،،،ماادري ليلى خايفه منه مو تعرفي هو مخبل
ومايعرف يصرف صح
«،،،اعرفه اكثر من روحي واكلج ماراح يجي
وانتي شفتي اجه بذيج المره
من عرف وبعد ماشفنا
سكتت بعدين كالت
«،،،رباب هم كالت هالكلام لان اخوته حاجين
ويا وكايلين اله عوفها لاتروح
تسوي شي بروحها
درت روحي اغسل ايدي وكلت بگلبي
«،،،وماعافني لان اعرفه هو هسه يريدني
بس اسامحه كملت
«،،،ويجوز من ورة هالشي بعد مااجه
غيرت الموضوع
«،،غاده راح ادوام
«،،،يا صدك
«،،،اي رجلها وافق ترجع للدوام
«،،اكلج هو شلونه وياها خما بعده يأذيها
«،،لا ماما كالت تغير وياي وحلف بعد
ماايأذيها ولاا
سكتت وخجلت اكمل هي افتهمت هزت راسها
وكالت
«،،،الله يهدي عليها
«،،،امين باجر ادوام وكلش فرحانه لان راح اشوفها
ذبت حسره وجاوبت
«،،،خطيه هسه هي،،،تريد بس تكعد وياج حتى
تحجيلج همها
سكتت وكملت تباوع عليه بحزن
«،،،،وانتي هم تحجيلها الي بگلبج
مارديت بابا صاحها راحت اله مشيت ورحت صعدتدللغرفتي هو بگلبي وعقلي محتلهن
من اول يوم عرفت بروحي
اني بديت احبه
طبيت غرفتي كعدت باوعت للساعه بالعشره
اخذت جهازي وخابرتها ماجاوبت
كلت يجوز يمها رجلها
بعده بايدي
رقم غريب اتصل گلبي كال هذا هو
ماجاوبت رجع اتصل ولح
فتحت الخط ماحجيت
شي حجه يجر
بالكلمه
«،،،شلونج ياشريان گلبي
عيوني غورگت وغمضت ردت
اسد الخط بس صوته رجعني لذيج الايام
الحلوه كمل
«،،،اريد اشوفج يولي واخذج لحظني مشتاگ
الج كلش واريد انام بحظنج بلگي
يطفى هالشوگ الي بيه
حسيت بي مو طبيعي عرفته شارب شي
جاوبته
«،،،روح قائد
«،،،وين اروح يبعد گلب قائد اشو الدنيا فرتني
الكرة الارضيه ورجعتني الج
شهگتي طلعت كمل
«،،،من امداني بجيت هالعيون الحلوه وخليتها
تنقهر
سمعته ذب حسرة وكمل بنفس
الصوت
«،،،،تذكرين من زعلتي عليه شلون اجيتج
بليل بعز البرد والمطر وبست عيونج
الحلوه ورضيتهن
خليت ايدي على حلگي وكتمت شهگاتي
كمل
«،،هسه هن هم زعلانات عليه ماتريديني اجي
ابوسهن اعرفهن ماراح يرضن الا
اني اجي واخذج لحظني
وادوايهن بوسه
«،،،كاافي وافهم كلشي انتهى بينا
«،،،،اااي لسانج يحجي شي وعيونج
ادكول انتي بعدج تحبيني
مثل مااني احبج
سديت الخط وانهاريت بالبجي اتصل
انطيته حضر ومسحت رقمه ورة
لحظه اجتني رساله من
رقم ثاني جانت
بصمه صوتي
فتحتها سمعته يكول
«،،،،اني مااجاي انام ياشريان گلبي عيوني
تعبت من السهر وگلبي يوجعني
حيل ويمكن راح اموت
واظل بحسرتج
اللخ اجت
«،،،اريد اجي بس ابوج هم صاير ماادري
شلونه طردني واني والله احبه واموت علي
لان اشوفه من رحيتج وخالتي هم
اعرفها بعدها تحبني مثل
بنتها الجاي تدلل
عليه جثير
هم دز
«،،،،وتدللي يبعدهم شعندي غيرج انتي شريان
گلبي وضوه عيوني الاثنين
«،،،كافي ولك كاافي ارحمني وارحم روحك
رددت بدموع مسحت الرسايل وحضرته
بعد مااتصل ولا راسل
تمددت ابجي بصوت قوي وهم كمت اعتب علي
لان دمرنا وخلانا نعيش هاي اللحظات
الحزينة
قائد
كاعد وحدي صافن لصورها الي اخذتهن من بعيد
حاجيتها بعيوني وگلبي ولساني
«،،،حلويتي يولي وهالحلاه الزايده تعبت گلبي
لان جاي اشوف العيون شلون ادحك
عليج واني اغاار ااغار يبعدهم
واريد اضمج جوه ضلوعي
حتى محد يشوفج
سكتت وتحسرت حسره حرگت افادي
كملت بقهر
«،،،هالعيون الحلوه جانت اليه
والشفايف تحجي كلام حلو واني صافن عليهن
بس ااخ اني الي ضعيتج من ايدي من ورة تسرعي
وغبائي
شربت من قهري كلش ماتغير هناك جنت اشرب
من قهري وهنا هم كمت اشرب من قهر
السمعته
رقمها مهيب جابه اليه وخابرت اريد اسمع صوتها
مشتاگ اسمعه بأذني خلي تحجي
تغلط ترزل قابل بس اسمعه
حتى يبرد گلبي شويه
مااعرف شحجيت بي اعرف گلبي هو الحجه
مو لساني شلون نمت ماادري
كعدت على صوت جهازي كمت راسي
يدك بقوه وعيوني توجعني
جان حسين
جاوبت
«،،،خير
«،،،ولك ياخير مهيب بالمستشفى جماعه
ضاربي ومأذي
فزيت ضربني الم براسي گضبته وصحت
«،،،اخ خرب بالحظ
«،،،شبيك ولك هم شارب
«،،،،لاا وينه هو خما متأذي
«،،،ولك مكسري هسه اني رايح اله
«،،وين هو بأي مستشفى
كلي العنوان
«،،،جااي هسه
سديت الخط رحت بسرعه سبحت اريد
اتنشط ويروح اثر الشرب من
راسي
طلعت للمستشفى وصلت نزلت خابرته
دلاني على المكان الي هو بي
شفت الامه مگلوبه
يمه لان نقيب
بالشرطه
حسين واكف يم واحد لابس دشادشه
ولاف يشماغ على وجهه عم محمود
ابو مهيب يمهم وامه وصايرين فد
مرة سلمت وسالت
«،،،،هاي شصاير ومنو ذوله الي ضربوه
وهو شلونه هسه
امه ردت تبجي
«،،،ناس ماتخاف الله رادو يگتلو يايمه
بس الله سلمه منهم
«،،،هو شلونه وضعه زين
ابوه رد
«،،،هو زين يابه كعد وان شاء الله عدت على
خير وهذوله صارو بايد الدوله وهم
عاد يعرفون شغلهم وياهم
اشر للرجال وكمل
«،،،حمزه ابن خاله مهيب
مديت ايدي اله انتبهت اكو سواد
يم عيونه مادرت بال كلت
«،،،،اهلا وسهلا والحمد لله على سلامته
«،،،،الله يسلمك تفضل اكعد
«،،،لا اريد اشوفه شلونه
ناس من جماعته جوه وكاعدين يحققون
ويا
ابن خالته رد ابوه طب سالت
«،،،منو ذوله ماعرفوهم
«،،،عصابه وعدهم ثار ويا
سكتت من رد وكمل
«،،،بس والله ذيب لان صوبهم وگضهم
«،،،كفو والله منه
حسين رد علي وكمل
«،،،هسه عاد خليهم يلعبون عليهم بالحزام
«،،،حيل بيهم لو گاتلهم هوايه احسن
جاوبته الي اسمه حمزة رد
«،،،ااي انه لو منه چيله براس كل واحد
منهم واسلمه لعزرائيل
بسهوله
الشرطه طلعت من يمه طبينا علي كلنا
حسين حجه بضحك
«،،،ولك هاي شنو صاير فلم هندي
«،،،حتى باسوء ظروفي ماراح تبطل ضحك
وتصنيف
«،،،جاوبه بتعب بس مبتسم
«،،،الحمد لله على السلامه
حجيت ويا وحمزة هم اجه باسه وكله
«،،،ماتشوف شر خوويه
«،،،،الشر مايجيك بعد اخوك
صفنت علي راسه مشدود وايده هم ومبين ماكل ضرب هوايه سألته
«،،،ولك هذوله منو ماعرفتهم
«،،،عرفت الدازهم عليه وراح ياگلون خره هم ويا
لان اعتدى عليه
«،،،،ههههه ولك يگلون صاير رامبو وكاتلهم
ومصوب كم واحد
هز راسه وجاوب
«،،،والله لو ما هي جان اني هسه ميت
الكل صفن علي حسين سال
«،،منو ولك
«،،،بنيه
فكينا عيونا من رد هيج حمزة ساله
«،،،بنت
«،،،،اي وصغيره مو جبيره اجت عليهم
ووكعتلهم دك بالشيش
حسين حجه
«،،،كفووو والله منها ولك هاي غير سبعه
«،،،اي وماعافتني الا من اجت الشرطه
سألته
«،،،ماعرفتها
اعرفها تبيع كلينس بالتقاطع وهم تمد
ايدها للناس
«،،،صدك
حسين سال جاوبه
«،،،اي
حمزة كال
«،،،،هيج بنات يصيرن شرسات لان تربن
بالشوارع وربك رحمك من
هي اجت وفگتك
منهم
ظلينا يمهم للصبح ماقبل يظل بالمستشفى
تخبل وراد بس يطلع وطلع على
مسؤوليته
غاده
نمت نومه اهل الكهف كعدت دنيا ظهر
كمت افتر راسي بس مو مو قوي
رحت للحمام غسلت وطلعت
الباب اندك طبت رانيه
شافتني واكفه
كالت
««،،،ها شلونج اليوم
«،،،الحمد لله احسن
اجت ليمي مبين عليها صاير شي
كالت
«،،،البارحه ابن خاله ابو جمرة گاضي جماعه
وطاگي لچن الله ستره وكدر يفك
روحه منهم
«،،،ليش
ماجان يهمني اعرف شي بس
سالت لان ماردت افشلها لان البنيه حبابه
وياي
«،،،،هو نقيب بالشرطه واكيد عنده عدواه
هزيت راسي وبديت ارتب بالفراش هي
ساعدتني تحجي على الموضوع
وذاك بليل رايح علي
ولحد هسه مو
راجع
«،،خاله زينب ماتستاهل يصير بضناها هيج
هو بس هذا ظل يمها وهمزين الله
ستره من ذوله العصابه
باوعت عليها كملت
«،،ولدها الكبار طلعو للخارج وظل بس مهيب
هو الصغير وعنده خوات اثنين اكبر
منه وحده مزوجه وساكنه تركيا
واللخ هم مزوجه وكاعده
بالدورة
«،،،الحمد لله ماصار بي شي
«،،،اي لان امه تموت علي بعد تعرفين الصغير
ومدلل
معاذ اجه بين عيوني هم مدلل ابويه
وامي
ذبيت حسره كالت
«،،،امشي تريكي
«،،،مااشتهي وهم الوقت تأخر والغده بعد
شويه يصير
«،،،مايصير انتي ماشفتي روحج شصار بيج
البارحه طحتي علينا وردتي تموتين
بس الله سترج
«،،،والله مااشتهي اتغده حتى اشرب لبن
باوعت عليه بدون رضى بعدين ضحگت
وكالت
«،،تعرفين انه من شفت ابو جمرة وشمسويه
بي من ذبيتي علي من راسج اجتني
الضحكه بس سكتت
گوة
مارديت لهيت روحي ارتب بالغرفه عمتها
صاحت جاوبت
«،،،اجيت
طلعت من يمي غسلت وكعدت امشط
شعري هملت كلشي بيه اغسل
ماامشطه خليت اله سيروم
ومشطته بهدواه لان
راسي جان يوجعني كملته
وعفته ينشف النهار كله ماشفته لليل يله
اجه،،،،، الباب انفتح هو طب
سلم وسده مارديت اجه ليمي
وكف مسافه سأل
«،،شلونج اليوم
«،،،زينة
«،،،اذا بعدج دايخه اوديج دكتور
«،،،لاا
الباب اندك
الحجيه طبت رانيه وراها شايله صينيه
اخذها منها وجابها خلاها
يمي راح اخذ هدوم وطب
حمام
الحجيه كعدت يمي رانيه سالت
«،،،محتاجه شي خيه
«،،،،لا تسلمين
اشربي روبه حتى ضغطج يصير زين
«،،،اي
«،،،اني رايحه اذا ردتي شي صيحيني
«،،،،روحي يمه ماقصرتي
الحجيه جاوبتها طلعت من يمنا هي
حجت
«،،،،اكلي يمه وشدي عودج مو زين عليج
هالهبوط خاف ترحين من ايدينا
ونشيل ذنبج طول العمر
هزيت راسي هي ترددت بعدين
كالت
«،،،انه كاعد اشوفن وليدي چن تندم وعگله
رجعله وعرف هو ظلمج بذنب ذيج
المگموعه
«،،،بعديش بعد ما خرب حياتي واخذني غصب
وخله ابن خالي يطلگني
«،،،ابن خالج لو زلمه حگ مايهدج اله
صفنت عليها من ردت هيج،وصح كلامها
واعرفه كملت
«،،،لاتزعلين مني يايمه بس هذا الكلام ينگال
للزلمه الجبان وابن خالج زلمه ماينشد
الظهر بي
جاوبتها بدموع وغضب
«،،،ابنكم هم مو رجال لان ماكدر لزهره بس
كدر عليه اني
القهر ترس ملامحها وباوعت للحمام ذبت
حسره وجاوبت
«،،حگج بهل الكلام لچن يايمه هو جان يخاف الله
بيها وهاي شوفي شلون جازته
كسرت ظهره وخلته
يصيرن واحد ثاني
«،،،اي ومحد دفع الثمن غير اني شنو ذنبي
ادفع ثمن ذنبها هي واخويه واصير
لواحد مااريده ولا طايقه
وجودي ويا
جاوبت هو طلع وسمع اخر الكلام وكف يباوع
علينا الحجيه سكتت ،،ماحجه شي مشى ينشف
شعره،،،،،، وكف مشط حط عطر وطلع كامت
وكالت
«،،،تعشي ،،، يمه وديربالج على روحج ان طحتي
ماراح يتاذه غيرج والروح عزيزه
وامانه عندج من ربج
حجت هيج ومشت من يمي سدت
الباب وراها باوعت للاكل جانت مشاوي
وطرشي وشوربه جنت مااحب المعلاك معدتي طلعت صوت اكلت بس تگه،،، جنت جوعانه
كلش وشربت لبن. هوايه حسيت بروحي
ردت اليه ظليت
كاعده وتاخرت حتى يكملون العشه
بعدين كمت شلت الصينيه كلت عيب من
رانيه تظل رايحه وجايه
عليه
طلعت للمطبخ ماكو احد جلفت المواعين
وخليت الاكل البقى بالفرن رجعت للغرفتي
طبيت كعدت اريد اخابر ليلى تذكرت
الدوه كلت خلي اشربه جان ماكو مي
كمت طلعت رحت للمطبخ مره
ثانيه وكفت يم الباب
من سمعت رانيه
تحجي
«،،،حيل بيها يمه تگبرت على حمزة من رادها
ورفضته من ورة الوحمه وشوفي
هسه شلون عايشه بضيم
وضلايم وي الي فضلته
علي
اعرف محد رادته من البنات من ورة هالشي
واعرف محد راح تاخذه،،،،وطبهن طوب
هن الخسرانات صح زواجه من
غاده جان غصب بس
احس ربج راح
يعوضه بيها وينسي گوثر
انداريت بسرعه مذهوله من السمعته جمدت
بمكاني من شفته ورايه عرفته سمع
الكلام الي كالته رانيه
لان يباوع للمطبخ كلت بصوت مخنوك
«،،،عرفت هسه ليش ااخذتني
شكرا لزيارتكم عالم روايات سكيرهوم
