رواية ارحموني ولو رحمة مرة الفصل السادس عشر بقلم فراقد حسن علي
- ((ومن هنا بدأ منحى أخر للقصة ))
-((وتذكروا دائماً أن للبيوت أسرار ))
فرح /رحت للمطبخ وجبت
زرنيخ يعني سم مال جريذيه
وخبطته بكلاص شربت
-لزمت كلاص الشربت بيدي أبجي وارجف
-اريد اشربه وأخاف من الموت
اني اخاف انام بالظلمة ،،زين شلون اذا متت ودفنوني بالگبر وحدي
-بس كلبي محروك ،، روحي توجعني بس اريد اعرف شنو ذنبي واعيش هيجي عيشة
-بقيت مصرة على فكرة الانتحار
اريد أموت واخلص من القهر العايشه بي اخذت الكلاص وبقيت كاعدة بالمنور
-بقيت أحجي ويه روحي
ساعة اكول اشربه واخلص
وساعة اكول لا اخاف من الظلمة
-حسيت ايد زغيره على جتفي فززتني
-ها ياسمين شبيج تبجين
ياسمين/شوفي نسرين ملخت لعابتي حبابه تعاي خيطيها اليه
انتي مو تكولين اني بنيتج
فرح/بين دموعي وقهرت كلبي
وعصرت روحي ،، ضحكت على كلماتها
-اي انتي بنيتي ،،يلا تعاي اخيطها الج لعابة نسرين وين ؟؟
فرح/كمت وكلبت كلاص الشربت بالسنك وغسلت الكلاص زين خاف واحد يشرب بي مي ورايه ويتسمم خطية
-رحت وخيطت لياسمين لعابتها
-بس احس اكو حسرة قوية بصدري شلون الصخرة وتكورت بنص صدري بالكوة اجر النفس
-لليل مااكدرت انام ،،الصراحه
كمت اتخيل هسه مخلد دخل على مرته وهسه باسها نفس مابوسني بالبستان واكيد هسه يكوللها شعر وسوالف حلوه
-ابجي وعيوني توجعني من كثر الدمع
والحسرة جلبت بصدري خنكتني
صبابة كونكرت ونامت بنص صدري
-افكر واحاجي نفسي زين اني ليش مقهورةمعقولة احب مخلد ؟؟
-زين شلون احبه !!واني من صغري احب محمود!!
-وانوب أسلام بي تعويد مو حلو من يريد ينام لازم الواحد يخلي وساده على رجليه وينومه
ويبقى يحرك رجليه نفس المهد
يعني ((يهزونه على رجليهم))
-الناس فرحانة وتعايد وتبارك
واني اضحك جذب ،،وروحي محروكة
-حبست نفسي بالمطبخ ،،
ذبيت روحي على الشغل والطبخ
بس اسلم على عمامي واعايدهم هيجي مجاملة وارد ارجع للشغل أونس نفسي
-مرت الايام وامي حاجت ابويه
سهام/اكلك باسم مخلد مو تزوج بنت عمه بعد عليش رابط فرح ،،خل يطلكها
وياخذها ابن عمها
باسم/اني شايل هم هل البنية عليش ماعدها حظ شكثر ماهي فقيرة وطيبة وخدومة
حظ ماعدها
-يعني تشوفيني اني مرتاح لو راضي بحالتهاوروح الاعزاز بيوم السمعت بزفة مخلد من يمي كلبي تكطع هي شصار بيها خطية بس اكول الله يساعدها
فرح/صدك ثاني يوم العصر أبويه
اخذ عمه نوري ،،وراح لبيت اهل مخلد
-رجع ضايج ويتأفأف ،،
وجهه مزنبر من كثر الاعصاب
باسم/ماتوقعت مخلد هيجي عنود
يكول /الا ابقيها طول عمرها هيجي معلكة وما اطلكها
-واذا تردون اني أخذها أنتم اهلها روحوا لابن عمها فكوا النهوه عنها
واني من عين باجر اجي واخذها
-شكد حجينا وياه ،،شكد سولفنا يابه ما يصير هذا الحجي بس هو قافل ،،
-يكول /مادام محمود ،،خرب عرسي منها
فلا اطلكها واخلي ياخذها ويتهنى بحياته وياها
-كناله شتريد يجرالك ،،بس طلكها
خطية شنو ذبها هيج مربوطة
يكول /ما أريد شي ،،بس سالفة عناد روحوا حاجو محمود خلي يفك النهوه عنها وأني اخذها
فرح /يعني من صدك لعبت روحي
حسيت نفسي لعابة وكعت بين أثنين واحد أعند من الثاني
هذا يجرني من صفحة،،وهذا يجر من الصفحة الثانية
-صارت ايامي بس بجي
بس اسمع اي أغنية اكوم ابجي
حتى لو أغنية حلوة ومفرحة اشبع بجي لان ايامي مابيها فرح
-والله حرامات اهلي سموني فرح
لان ماشفت شي حلو بحياتي
المفروض يسموني
شجن ،،حزن ،،نحيب ،،لطم
هاي الاسماء تلوگ لحياتي
-يعني شنو أفتهمت من حياتي
وشنو ذنبي ابقى معلكة
لا أني لمحمود ولا أني المخلد
-بيت أبويه عادل عزموا عمامي وعماتي على سنوية ألمرحومة رسل الله يرحمها اركان مسوي ثواب وعازم الاقرباء
وبعدها يرحون يزورون قبرها
-ابويه اتفق هو وعمامي يحاجون
محمود يفك عني النهوه
-اني أسمع وكاتلني الخوف
شلون بيه اخاف يقنعونه ويعوفني
وصدك ياخذني مخلد ويعرفني مو بنية وأنذب ح
-يعني الى متى ابقى عايشة بهل خوف والقلق والرعب ،،
-ساعة السودة من وافقت العب ويه محمود
على اللعبة اللي كالي عليها
وهو جان شايف امه وابوه
وكالي خلي نعلبها واني الغبية وافقت
-راحوا ابويه وعمامي وامي
وعماتي ،،وعمه هناء وعمه رجاء
يعني ال جدي ناصر كلهم راحوا
بقينه بس أحنه البنات بالبيت
-ونفس هذيج المره بيوم راحو بالفاتحة
وهم بات يمنا رافد ،،وياه عثمان ،،وخالد
ناموا بالهول
واحنا البنات نمنا بالغرفة
-رافد جبير بعمري
شكله عادي نفس اي زلمه عراقي
حنطاوي وصاحب جسم ضخم
على أبوه وعمامه ،،
عمي حامد واولاده كلهم ضخمين
و رافد طالع عليهم من هو صغير ضخم
-ولحيته دائماً يربيها عالية وسودة
ويحدد الشارب
هو رجل مشعر يعني أيديه وبدايه صدره
كلها شعر ،، حتى شعر راسه كثيف
وحواجبه طويلة وثخينة
-وعلى طول مهندم روحه
ودائما يلبس دشداشة بيضة
والعطر اليستخدمه يسبح بي يطر الراس من قوته
-وهو هسه بالسادس ،، يريد يدخل للكلية العسكرية
-بس اني مااطيقه لان احسه غثيث ويدوس بالشقى
-بعد ماخلصنا العشه
منى غسلت المواعين
هالة خدرت الجاي
اني خيطت دشداشة وحده وعزلت
والولد كاعدين يلعبون دومنه
-كوثر وومنى متابعات مسلسلات خليجية
-وحدها اسمها (اللقيطة /البطلة البيها اسمها هيفاء حسين) تطلع ساعة ب ٧ بليل
-والثانية أسمها (الفرية/ البطلة البيها أسمها حياة الفهد) تطلع ساعة ب ٩
-للساعة ب ١٠ كل فرش ونام
هااا ،،عود احنا نسهر وكاعدين لوكت متاخر
لان من ابويه جاب الدش ،،
كمنا نسهر على المسلسلات
-اني من ليلة زواج مخلد وبعدها بكل ليلة بس أغفى أختنك واكعد روحي معصورة
-اكوم اغسل وجهي واشرب مي
وارجع اكعد بفراشي شويه يلا اكدر
ارجع انام
-كعدت واشوف هالة ماكو بمكانها
باوعت الساعة ب ١ وربع بليل
-هالة مو صغيرة هسه عمرها صار ١٦ سنة. وهواي حلوة ،،وخدومة بشكل
ابد ماترد واحد ،، وفطيرة ،،
وحتى عثمان وخالد من ينصبون عليها
تكوم تبجي
-خفت لان ماشفتها بفراشها ،،
كلت خاف بالتواليت
كمت طلعت من الغرفة ،،
باب التواليت مفتوح
والحمام هم ماكو احد بي
-رحت للمطبخ ظلمة ماكو احد
شفت الديوانية فارغة
رحت للهول نايمين الولد ومطفين الضوه ظلمة
-يااا هاي وين راحت
رجعت للغرفة
لبست جاكيت وطلعت للحديقة هم ماكو
-مابقى بس اشوفها فوك بيت عمي احمد
بس شيصعدها بهل ليل قابل شعدها
- صعدت باوعت بيت عمي الفوك
كله ظلمة والاضوية طافية
واني بدون كلشي اخاف من الظلام
-ردت أنزل وأسمع همس من غرفه نوم عمه هناء
بصف صعدت الدرج ،،لان صنطه وهدوء
يبن صوت شلون الواحد يشاور واحد
-فتحت الباب على كيفي أختفى صوت
الغرفة ظلمة هندس ،،البصفي ما اشوفه
مديت ايدي وشعلت الگلوب
-لا لا لا ياربي سترك
-الموقف شلني ،،مااعرف اتحرك
او شلون أتصرف
-كلبي وجعني من شفت المنظر
-هالة ملابسه الدشداشة باقية بس بالأتك والملابس الداخلية
وصايرة جوه رافد وهو لابس بس شورت داخلي ومحاوطها بيده ولاف جسمها بجسمه
وهي جرت النزلة مال وبقت تغطي بروحها
-اني أنصكيت لا أروح ولا أجي
انعاد براسي موقف الحادثة من صارت بيه
نفس المنظر بس قبل اني جنت صغيرة
هسه هالة جبيرة
-هي كامت ترجف وتبجي
ورافد تقدم عليه
وجه أصفر وكام يمتمت بالحجي
رافد/فروحه باوعي عليه لا تفتهمين الموقف غلط
اني أحب هاله ،،وهي تحبني
فرح/ما اعرف شلون أحجي
او شلون أتصرف ،، او شلون أفكر
بسرعة سألته بدون ما افكر بالسوال
// بس كولي هالة بعدها بنية لو صخمتها
-هو صفن بوجهي ،،وعقج حواجبه
رافد/شبيج فرح تخبلتي تحجين هيج
صح شفتينه بموقف غلط
بس والله وزني الشيطان جنه بس نسولف
ونحجي مواضيع عاديه ،،
وردت بس أبوسها
-وماسيطرنه على مشاعرنه وشفتينه بهل موقف
فرح/يعني ماسويتلها شي
ماتقربت منها ،،واخذتها
رافد/فرح أنجبي لا تلوصين بالحجي هاله عادها مرتي وعرضي
مااطخها الا بيوم دخلتنه
-وحتى أثبتلج وأثبتلها وأثبت للكل
حسن نيتي بيوم الخميس متقدم لخطبتها
فرح/شايفين الواحد من يكون بصدمة
وعلى لحظة يصحى منها وبعدها يتصرف بموقف هجومي هيجي صار بيه
-صارت عندي ردت فعل سلبية
بسبب الموقف المر عليه
مااريد أختي تصير نفس حالي
-ركضت وهجمت عليها ،،
جريتها من شعرها ،،ونمت بخوانيكها ،،
وهي بس تبجي حتى ماطلعت صوت
-رافد عتني من أيد بقوه
حسيت أيدي أنخلعت من جتفي
رافد/شبيج هيييي فرح تخبلتي
كتلج ماصار شي ،،والله ماطخيتها
شبيج أفتهمي أكولج أحبها تعرفين شنو أحبها وللخميس متقدم لخطبتها
فرح/اني بعد وين فقدت
رجعت عليها ودك كفخات ،، وعضيتها
-رجع رافد سحبني منها ،،
وهي ركضت وختلت وراه
واني تخبلت بالزايد ،،
اريد حتى هو أضربه
بس وين اكدرله يادوب اوصل لعكس ايده
هو طويل وضخم واني قزمه
-أحنا كل البنات ناعمات وكصار على أمي
بس جسمنا مليان يعني اليشوفنه ينطينا اكبر من أعمارنا
-يعني هالة هسه مو عمرها ١٦ سنة
بس اليشوفها ويشوف جسمها يقدرها ب ال٢٠
-دفعني رافد وصلني لباب الغرفه
ورجع عليها دنك للكاع شال دشداشتها
وانطاهياه تلبسها ،،وبقى واكف بصفها
يخاف لا ارجع أضربها
-اني واكفة بالباب اباوع عليهم وافور
نار وشاعله بصدري
ما اريد وحده من خواتي تتأذة
لو يصير بيها نفس حالتي
انوب ابويه خطية شنو ذنبه يتحمل عارنا
-سحبها رافد من أيدها وهي تشهك وتبجي
ونزل هو وياها جوه ،،واني نزلت وراهم
دخلها لغرفه البنات ،،وهو رجع للهول
-دخلت وراها للغرفة وطبكت الباب
تقدمت عليها وجريتها من شعرها
وحاجيتها بهدوء ما اريد اسوي هوسه ويكعدن البنات
-يا كلبة حاجيني وفهميني كم مره هيج سويتي
هالة /وروح اجدادي هاي اول مره
جنا نسولف سوالف عادية
وهو كال أريد بس أبوسج وهيجي صار
حتى ما اعرف شنو صار وانتي شفتينا هيجي
فرح/من شوكت اكو علاقة الصخام
هذا الحب بيناتكم
هالة /قبل سنتين ،،من خطبخ مخلد
بيوم حفلة خطوبتج
هو شايفني بالفستان وحاله شعري
حاجاني بعدها وكالي// أني معجب بيج
واريدج مرتي وانتي بنت خالي
ما أحصل وحده أحسن من تربيتج
فرح/يعني تردين تفهميني خلال كل هاي المدة المضت هو كلشي ماسوالج
هاله/ابد وروح جدي ،،حتى من يجينا
نبقى بس واحد يباوع بعيون الثاني
وهو بس يباوع عليه ويبقى يضحك
-ومن توفت ألمرحومة وبات عدنه
هو اتفق ويايه نصعد فوك بس كلشي ماسوينها بس كالي//اني هواي أحبج وكمت اموت عليج
وبس اخلص السادس أخطبج
فرح/باوعي عليه ولا تجذبين
هسه سوالج شي تقرب منج
تفتهمين سؤالي لو لا ؟؟
هاله/وروح جدي بس باسني نفس هذولة
الممثلين اليطلعون بالافلام الأجنبية
-هو حجى بصوت ناصي ،،
وجان مشغل ضوه التلفون
ومن سمعنه صوت مشي
قريب على الباب طفاه
وكالي أريد أشوف صدرج جسمج
واني ماقبلت كتله أستحي واخاف
-وانتي دخلتي علينا ،،هذا كل الصار
ولا ضميت عليج شي
فرح/شوف يا كلبة أني راح اسكت منا للخميس وما اكول لاحد
ما اريد اوكف بوجه سعادتج
اذا صدك تقدملج بالخير عليج
-واذا ما أتقدملج ،،
اروح وابلغ عمي حامد
وهو يحل الموضوع
تعرفي خبل أيده والتوثيه ،
-ترى رافد كلشي مايسوله
ويفتخرون بي هو زلمه
بس يذوبون الصوج عليج
لان أنطيتي مجال ويعتبروج عار ويذبحوج
هاله/هو كالي اني احبج
واني هم صدك أحبه ،،
وكالي بس أبوسج وهيجي صار
فرح/الله كريم ،،شوفي ربج شلون يحلها
انتظره للخميس ،، واذا ماكو أشوفه باسم شخلف
-بقيت الليل كله أفور،،ياربي ليش هيج يصير بينه ،،صدق أبويه لو كال يا مخلف البنات شايل همهن للممات
-اباوع عليها انجطلت بفراشها
وغطت نفسها حتى راسها لفته بالبطانية
-طلع الصبح واني كاعدة
كمت للهول مالكيته بفراشه فارغ ،،
اباوع اكو نفاضة يم راسه تارسها جكاير هذا من شوكت يدخن؟؟
-باوعت بس عثمان وخالد نايمين
ندهتهم وراهم مدارس دوامهم صباحي
-رحت ندهت البنات وكعدتهن
بس هالة تركتها نايمة بقت الليل كله تشهك وتبجي نامت والشهكه بزردومها
-انتظر الساعات تمر
يالله صار اليوم شطوله وبالكوه يعدي اكلني القلق والتفكير
رجعوا أهلنا بليل
-محمود محاجينه أبويه عمامي يفك عني النهوه
هو وأركان وعمي نوري رافضين رفض قاطع
-ثاني يوم عمه نجمة وعمه كمرة
أجن وحاجن امي يردن هالة لرافد
-أمي ماقبلت كالتلهن//شلون ازوج الصغيرة وخواتها الاكبر منها بعدهن
-صعدت فوك لعمة هناء وحلفتها وأمنتها وسولفتلها سالفة هالة
-هي كالت اني اتصرف واقنع امج
صدك نزلت وبأسلوبها
ولسانها وبقت تحجي ويه امي
هناء/سهام انتي عليش ما تقبلين
اذا على خواتها فرح محجوز لابن عمها
ومنى باجر عكبة يجي نصيبها
-لا توكفين بقسمة البنية
وانتي تعرفين طبعنا بس البنية تبدي تغسل أنزوجها ،،وهي جبيرة شكو كاطعة قسمتها حرام عليج
-ورافد خوش زلمه وابن عمتها ،،
ونجمة خيرة ونفس طبع عمتي الله يرحمها
وهم تخلصين من مسؤوليتها ويخف عليج الحمل
-شفت امي اقتنعت وجت بالحجي
لليل طرقت الموضوع على ابويه
ابويه كيف لان ابو رافد ابن عمه
وهم ابن اخته عمه نجمة
-ثاني يوم العصر امي خابرت على عمه نجمة
وكالتلها// هلا بيكم تعالوا كبعوها وخذوها
-للخميس وصدق بكلامه رافد
اجوي مشيه جده حامد وابوه وعمامه كلهم وعمام ابوه واولادهم
وخطبوا هالة يعني بس قراية الفاتحة وتسمت هالة بأسم رافد
-اتفقوا عل الاسبوع الجاي عقد الشيج وتلبيس الذهب
-كمنا نركض ركض ،،بين تعديل البيت وترتيب الفراش والغراض والتنظيف
-اجتي امي فاطمة يمنا من الثلاثاء
بس ما جابت اسلام وياها
كالت// مصخن وخليته يم خالته
خاف يصير عليه شي محمود يشوفه
-ماادري ليش كمت اضوج من يذكرون ويربطون اسم رفل ويه اسم محمود احس دود وياكل بجمسي
ابقى اتعارك ويه روحي
-بس التهيت وأنخبصنا نركض ركض بيوم الخميس الصبح عمه نجمة اخذت هالة للصالون ورجعوا الظهر ،،
-هالة بدون كلشي حلوة وبيضة
شعرها بي شكار بس مسرحته الها ام الصالون وشايلته الها من جهه مخليتلها بروش ابيض
وعيونها جوزية على عيون ابويه
وراسمتهن الها ومخيلتها ظل شي بسيط
ومكياجها كلش بسيط بس حمرتها حمره طوخ
وهي كصيرة بس جسمها مليان
ولابسه فستان نيلي
طالعة تمرعد تمرعد
-بعد ماكعدوا الزلم بالديوانية
والشيخ عقد لرافد وهالة بغرفة أمي الجوه رجعنا هالة للهول
-دخل رافد لابس قاط اسود
والعطر سابح بي وجاي
وساعة فضية وشايل بيده سبحة فضية صغيرة يتفيك بيها
-كعد بصفها ويريد يفترسها بعيونه
لبسها الذهب وهي لبسته حلقة الفضةوعماتي وخالاتي والنسوان
يهلهلن ويسون كولات
-هو ولا أستحى جرها وبوسها من حلكها
رافد /يمه لخاطري مو اني ابنج العود تعاي غطينه بالعبايه مابستها زين
-وعمه نجمة من كل عقلها خيمت عليهم بعبايتها والضحك صار بفلس ،،
-عاد عمه شمس جرته وطردته بره
شمس /محد فسدك وطلع عينك غير أمك
-وهو ضم عمه شمس جوه ابطه اطول منهاوبقى يخربط بشعرها
-وصل يمي وجان يكول
رافد /مشكورة يالزينة على حفظ السر وهاي وكفتج وحفظ سري ما انساها الج واردها الج بالزينات
-رحت وباركت الهالة وهي العوبة نزلت دموعها //حبيبتي الله يسعدج ويهنيج
-علساس بشهر السابع يتزوجون من يخلص امتحانات بس هو لطش كال //ما اصبر اريدها يمي
-وشنو خالي باسم كل ما اروحلهم يطردني
-عاد من عطل قبل الامتحانات النهائية تزوجوا
-يوم الحنة صار بيناتنا بس احنا الاقارب ونسوان الجيران
-ويوم العرس لا صار حفلة جبيرة
لان هواي عازمين ناس
-عمه شمس هم هي أستلم موضوع التعليم وشرحت الهاله درس العلوم هههه
-كل أحنا رحنا لبيت ابو رافد هو (بيت عمة نجمة) بعد كلنا اقرباء ومعارف ،،حتى امي وخالاتي راحن
-بعد مازفوا رافد لغرفته ،،
شو النسوان ظلن كاعدات !!
وكلساع وصاحوا على رافد
متطلع من الغرفه شبيك لطشت
-هو ولا يجاوبهم مطنشهم
-ورة ساعة وطلع من غرفتهم
وصاح على عمة نجمة
طفرت عمة شمس وعمة هناء وامي وراهااني هم طفرت بعتبار صرت اعرف الموضوع
-دخلنا للغرفة هالة لابسه السيت الابيض
وشعرها محلول ونازل على جتافها ،،انتبهت معضوضة من ركبتها
بس تبجي وترجف ،،
-تقدمت عليها امي أنطت نيشانها بيد امي وعمه نجمة وعمه شمس
وكعن السكف بالهلاهل
-باوعت القطعة القماش البيضة بيها دم صافي ،، انعاد براسي مشهد الحادثة الصار بيه من جنت صغيرة
-بسرعة فكرت لو متزوجني مخلد
واكيد نفس هاي اللمة وهاي الكعدة
يبقون منتظرين العريس
ومن يدخل عليه راح يكتشف اني مو بنية
واصير فضيحة بين كل هاي النسوان وذبحتي تصير حلال على كل لسان بالديرة
-قررت ابقى بدون زواج احسن شي
-هالة حبيبتي شبيج تبجين وترجفين
هالة /مو رافد ماسيطر على نفسه وشوية اذاني ،، يكول//صار سنتين أتمناج وهسه من شفتج يمي ما اكدر اسيطر على نفسي
هناء/نجمة شبيج دخذيها للحمام
خطية خل تغسل حتى ترتاح
نجمة/سودة عليه ياعمة راحت من بالي يلا كومي خلي اوديج للحمام
فرح/عمة نجمة نزعت كلادتها ولبستها لهالة تكولها//هاي هدية بياضج
-الحمد لله اهم شي وحده من عدنه
اخذت حبيبها وان شاء الله
تعيش سعيده بحياتها
-مرت باقي الايام عادية مابيها شي جديد
-بس اشوف منى هواي تصفن ،،
لو تبجي من تسمع أغاني ،،
ومرات حتى تبقى بدون أكل وتعزل نفسها عنه وتعتكف وحدها بالغرفة
شكد حاولنا اني وكوثر نعرف شبيها متحجي شي بس تكول// ضايجة ومخنوكة من البيت
-بهذاك شهر السابع الجو حار يسمط سمط
اضطريت اروح للسوك اجيب شغلات للخياطة رحت ويه عمه رجاء هي رايحة تسوك
-مرينا اول شي على بيت عمة نجمة حتى بطريقنا نشوف هالة
-سألتها شلونج ،، شخبار رافد وياج
الحيوانة بس تضحك
وتكول //ماادري هيجي الزواج حلو رافد هواي مدللني
-وأنوب كالت //عمه نجمة حبابة وزينة ويايه
بس اقبال شادة ويايه وتغار مني
على كلشي تقلد وتصنف عليه
-باوعي هالة اتركيها تولي ولا تدخلين بمشاكل وياها و مالج دخل بيها عليج برجلج وبعمتي وعمي هم الأساس
-بعدها شربنا عدهم الشربت وطلعنا للسوك حر الشمس يدك بروسنا
-عمه رجاء بقت تفتر وتسوك
اني رحت على معميلنا أخذت شغلات الخياطة وبقيت افتر وياها بسوك المخضر
-واشوف الي عمري مااريد أشوفه
-مخلد تمشي وياه مرته
وهو يشتريلها ميوه
وهي مجلبه بيده
وبطنها عالية مبينة حامل
-((لسان حال فرح بشوفة مخلد بعد غياب
اخر لقاء بينهم من يوم النهوة يعني بيوم حنتها
الما توجت بزفه عرس 😔😔
وشلون شوفه ،،يمشي متهني ويه مرته
-وفرح شنو موقعها من الاعراب 🥺🥺))
-((انا بيه حزن يترس فطور الكاع
ونواعير العيون تصير من تدمع
وبيه بالكلب شوف شكثر ونات
يذوب الصخر كونه بونتي تسمع
وانا فوك المتون محمل هموم
الجبل لو شالها من الكاع اظن يقلع
لاتغرك ضحكتي من اضحك وياك
الجمر محروك وكبالك يظل يلمع))
-اني شفتهم كبالي لو ما اعرف شصار بيه كل أوضاعي أتخردلت ،، شو أنعصر صدري وبعد ما اكدر أتنفس
-بس حسيت الكاع أفترت بيه
وصوت ولد يصيح الله ،،الله يابه شبيج أسمع الصوت ،،بس ما أشوف عيوني عابلك مغمضه
ووشه صارت باأذاني
-عمه رجاء شمرت على وجهي مي
صرت أحسن أشوف بس عيوني بعد بيها غواش
-لا يالبخت الاعوج عمه رجاء ذبت على وجهي مي من سطله الخضره الزلمه ينكع ايده بيها ويرش الخضره بيها حتى لا تذبل
-وكعت بصف جنبر بياع الخضره
وعمه رجاء تصيح على الزلمه
تريده يشيلني من الكاع
اني مو مجطولة بالكاع ،،
لا كاعدة اني وعبايتي بالكاع
ومسنود جتفي وراسي على
رجلين عمه رجاء
-تقدم الزلمه بياع الخضره يريد ينهضني وما اسمع الا صوت عمي حاتم رجل عمه كمرة يصيح على الزلمه //اتركها مكفى ماقصرت
اني أشيلها هاي بنت اخوي
-تقدم عمي حاتم ونهضني
اريد أوكف على طولي رجليه ماتشيلني ليش هيجي ارجف شجاني
شلت راسي واباوع اهل السوك والناس كلهاتباوع عليه تفشلت ودخلت بنص عبايتي
-شفت مخلد واكف مسافة ويباوع علينا عبالك هسه أنتبه على الموقف
من عمي حاتم صاح بصوت عالي على الزلمه
-وأشوف مرته مجلبه بيده بقوة
عبالك راح يطير منها
خزرتني خزرة لو العيون ترمي سهام جان كتلتني
حاتم/يابه شبيج
تكدرين توكفين على طولج لو أشيلج
فرح/اي اكدر ،،عمه تعاي اسند نفسي عليج راسي مسطور
رجاء/مشكور خويه ،،ابو عدنان
ماقصرت ،،توكل انت احنه نرجع للبيت
حاتم/لا ابد شعندي قابل
هن سمجات وأشتريتهن
ومن شفتج تفزعين بالزلمه
تركتهن يم الزلمه واجيت عليجن
هسه بس أجيب العلاكة واجيجن
تمشن كدامي أطلعن من السوك
سيارتي مركونه باب الدخول
تعرفيها بعد أكعدن بيها بين ما ألحكجن
فرح/مشيت دايخة واذاني تصفر
واكو غصة صارت بكلبي ذبحتني عصرت روحي و أختنكت أحس ماكو هواء خلص من الدنيا
-كمت أبجي لان مخنكوة
والصراحة هواي أنقهرت المفروض اني هسه متزوجة وصاير عندي جاهل
-اااخ ماادري ألوم حظي المجير
لو ألوم محمود ،،والحادثة السودة
لو ألوم مخلد المايقبل يطلكني وتاركني مربوطة
-رجعني عمي حاتم للبيت
وحظي المجير والمزفت بحصو وجير مال تبليط أصلي مشتغلي بعهد صدام
-لكيت أبويه عادل وامي فاطمة
واركان وأسلام كلهم يمنا
بس محمود ومرته ماكو
-من دخلت وشافوا حالتي
امي وعمه هناء طفرن عليه
خايفات ويباوعن بوجهي لان اشهك وابجي
-وعمي حاتم سلم عليهم وكاللهم //وكعت بالسوك وجبتها يمكن عدها خلل بالضغط لو وكعت من قوة حرارة الشمس
-ولاصت السالفة عمه رجاء
تكلهم /حقها الله يساعد كلبها تشوف رجلها الراح من أيدها بليلة ويوم يتمشى ويه مرته متهني ومرتاح ،،وهي مكمشة بيده وتتعاير عساس بس هي حبلة ،،ترى حقها هي من شافتهم أنقهرت ووكعت
-يا فشلة الفشلة هسه شيكولون عليه
ميتة على الرجال وعلى العرس
-بس اني ليش كاتلني القهر لان ما اعرف مصيري شنو ولشوكت أبقى هيج معلگة
أركان/حياتي صارت روتين ممل
من البيت للدوام ،،من الدوام للبيت
-غرفتي امي فرشتلي كاعها
وخلتلي بيها مندر وباقي الفراش
وأشتريتلي كنتور ابو بابين اخلي بي ملابسي وكومدي خشب اخلي بي الاحذية والجررات الفوك اخلي بيها ساعاتي والشغلات الناعمة الاحتاجها
-أسلام وين ميروح أكو عرب يلفونه
-يجي مره ينام يمي ،،مره بغرفة محمود واكثر شي ينزل ينام جوه يم أمي وابويه
-الصراحة بليل هواي أفتقد رسل
رايدها مراه اليه أحضها واسولف وياها وأنام مرتاح
-تعلمت عليها ،،جانت هواي نظيفة ومرتبة كلشي ألكاه جاهز
حتى من كثر ما اتعاجز
هي خطية جانت تكعد بليل تغطيني وترجع تنام
-صديقي كالي// لازم تزوج
بعد عدت سنوية المرحومة الله يرحمها
وانت رجال وتحتاج مراه بحياتك
تلفك بحظنها بليل ،،و داريك بالنهار
-رفضت فكرة الزواج لشغلتين
-اول شي أخاف الازوجها تأذي اسلام وماداري
-وثاني شي خاف هم تحبل وتموت بالولادة
بعد ما عندي كلب يحمل قهر
-بقينه نروح ونرجع لبيت جدي ناصر
-منى أبد ما اشوفها تطلع علينا
سألت أمي عليها
تكول //عادي من تسمع بينا موجودين تجي تسلم وتكعد
أنتبهت يعني بس من اني اروح عليهم
متطلع علينا معقولة ضايجة مني!!
-شفتها بيوم عرس رافد
اااخ شلون عمي باسم نطاه هالة ما ادري
الصراحة الزلمه مايوم طلعت منه العيبة بس من يوم صارت الهوسة والعركة بسببه من جنا صغار ومحمود خبزه من شمر هالة بساجية المي من هذاك اليوم شلت بكلبي عليه
-صدك لو كالوا حب من أول شمره بالساجية
-بس شلون متراهمين ما ادري
هو ضخم وجثيث يعني فلاح ابن فلاح
وهي ناعمة وكصيرة جنها قبچ
يعني بس يطرها براشدي يكسر فجوجها
-من شفت منى بالعرس شو هاي هواي ضعفانة وجهها ذبلان مو مثل اول مره من شفتها بيوم نهوه فرح
-هي شافتني وراحت تركض جوه لبيت عمتي نجمة ،هاي شبيهه؟؟ انوب بقيت شاك بنفسي
خاف مصجمها وماداري بروحي
وهيج تخاف مني ،،
-لو عبالها لان اني عسكري أصير مو خوش زلمه وهل شكل تنرعب من تشوفني
الصراحة حيرني أمرها!!
-فد يوم امي شدت من الصبح تريد تروح تشوف أبوها وأخوانها
جبتها هي وأبوي وياهم اسلام وأجيت للمحمودية
-دخلنا لبيت جدي ،وبعد السلام والكلام ،،
وياسمين ونسرين يلعبن أسلام
-دخلت خاله رجاء ساندة فرح تبجي وبالكوه تشهك النفس من شفت هيجي حالتها خفت هواي عليها
-ودخل وياهم عمي حاتم ،،
وخاله رجاء سردت الموضوع
افتهمت سالفتها ،،
الله يساعدها ويلوم الي يلومها
-محمود ميكدر يفك نهوتها لان خايفين عليهاومخلد بالعناد مايقبل يطلك
-هسه ان ليش خايف من مخلد
هو زلمه واني زلمه ،،
شنو يريد يكص راسي
-شنو المانعني كل هاي المدة ساكت وما اروح احاجي
يمكن ألتهيت بمصيبتي ونسيت مصيبة فرح
- رجعنا للبيت
ويومين بقيت أكلب الفكرة براسي ليش ما اروح لمخلد واطرقله سالفة فرح بما انزلت
وهو بعد حر ألاختيار
لو يطلكها وياخذها محمود
لو يقبل ياخذها على هذا وضعها ويستر عليها
-خابرت على عمه شمس وكتلها وين مخلد
كالت ملتحق بدوامه
كتلها /دزيلي رقمه وعنوان شغله ،
محتاجه ضروري
-وره شويه دزتهن اليه برسالة من رقم رجلها سلمان
-اخذت سيارتي وطلعت لمكان شغل مخلد اندليت مكان الفوج والمقر اليداوم بي
-وصلت للمقر اليداوم بي
سلمت على الشباب ،،وطلعتلهم باجي اني عسكري وضابط حالي حالكم
رحبوا بيه ،،
-وسالتهم على مخلد كالوا هسه يجي طالع بشغلة
-كعدت يمهم شويه وسمعت صوته سلم
بس شافني أنصك بمكانه ..........
شكرا لزيارتكم عالم روايات سكيرهوم
