رواية نارا حيدره الفصل الخامس عشر بقلم نمارق رحيم
لَا بأس لقّد عِشتُ أيّاماً أكثر حُزنًا مِّن هذه
__
سكتت بدهشة مصدوم !!
جاوبته :" شهل حچي شلون كتله شجابه؟ .
-والله العظيم متخبل من عرفت لي هسه ما ادري وين اطم روحي .
- شلووون دعمه ؟ عجيب! شجابه للبغداد
هو مو مطمور بالبصرة شجاابه و شلون أحچي ؟؟
- آخر مره من رحت للبـصرة قبل ما تخطب نارديـن من ابوها ، من رحت چانت بس أمي بالبيت بقيت يمها فد ساعتين بالقليل ، وگلتلها عليك وچان يدخل ابوي گمت و اريد أطلع تعاركت ويا ، وگـال اجيلكم لـ بغداد أصبروو
- آي ؟؟
- آي ولك والبارحة صارت صدفة صديقي رايد يرجع للبصرة عنده اقارب هناك گلت أروح ويا
- ياحيوان واگول البارحة اتأخرت
طلعت رايح وما گايل إلية!
- لك غير من أجيت مسطور سطر لأن رحت لامي لگيتها لوحدها چان تسولف إلية إنُ أبوي صارله شهرين مسافر و ما تدري وين ، وگالت إلية بيوم الي مات ابو سالار هو جاي للبصـرة
ما خذ اغراضه و رايح
- و أنت شمدريك حتئ لو نفس اليوم
شلوون اتٲكدت هو المجرم ؟
- سيارته عايفها بـ بغداد لأن ما راجع بيها للبصرة وچان سكران هيه گالت من اجه ريحته تگتل وچان باين علي الخوف لك أحلف هو إلي دعمه هو والقران الكريـم!
- حساني تدري إذا صدگ شنو راح يصير ؟
- أدري سـالار بعد حتئ أستحي اباوع بوجهه شلون اگعد بعد ويا واحچي وهو أبوي گاتل
أبو، حيـدرة فدوه رحتلك الگالي حـل!!
- الگالك حل شنو أنت شدخلك ؟ طلع روحك
من السالفة خلي يطلع الصبح و اروح للبصرة
- شنو تسوي ؟
- أروح افتهم من أمك ولو ما اريد اوصل لبيت السكير بس مضطر والكائنـات كون صدگ يطلع كلامك ويدخل هل ثور للسجن!
- و سـالار ؟ من يدري بي ؟
- يابـه قابل أنت إلي داعمه ؟ متفق ويا ؟
حتئ لو هو أبوك أنت معليك بالحادث وسالار صديقك و أنت مسولف إله كل شيء ويدري
اطمئن ما راح تخرب صداقتكم انتو آخوة!
- ان شاء الله عود رايح انام و أنت
من توصل للبصرة خابرني
- إن شاءالله
طلع و انا أعيد التفكير
افكر اذا صدگ كلامة!
تنهدت و گلت الله كريم ..
صافن و أجت علئ بالي ناردين، أخر لقاء شفتها بالمقبرة أكيد هسه متغيرة وبطلت أخبال وعقلت، وفاة ابوها رجع عقلها لمكانه ..
سمعت من طيبة انقبلت قسم رياضيات ما أعتقد اتفكر بيه بدت حياة جديدة تلتهي بالدراسة ما رح اخطر على بالها
صار إلها شهرين ما شايفتني، نستني، ونست أسمي ونست الخطوبة أكيد تراجعت فكرة ارتباط بيه! .
قبلت اطلب ايدها للزواج من ابوها ، وچنت مستعد اعقد عليهاا ، حتى اساعدها وموت ابوها بيوم العقد غير كلشي، سديت الموضوع
تنهدت بضيقة.. يا الله بس رايد اطلعها من عقلي
أريد انساها ، الك الله يا حيدرة
...
نـارديـن
چنت كاعدة بالمطبخ اثرم بالزلاطه أسوي
عشه إليه، اندگ الباب راحت امي تفتحه سمعت اترحب بشخص عفت الزلاطة ورحت للديوان اشوف منو اجه .
إنصدمت بـ لؤي گاعد وامي واكفة تقدمله المي وفرحانة، ظليت صافنة هذا شلون اجه إنتبه عليه واگفه اباوعله.
لـؤي: "هلاا بهل وجه الحـلو تعالي
گعدي شبيچ مصدومة ؟
سكتت ردت امي :- تعااي شبيج واكفه رووحي جيبي العشه يلاا انريد نتعشه
-أنت شجابك شلون تجي .
لؤي: روحي جيبي العشة بدون أسئلة زايدة. .
عفتهم متعصبة.. أمي سوتها صدگ وعزمت هذا العاار على الأكل! اريد اعرف شنوو هل صلافة الي عنده ؟ .
جاي فرحان انه اله اذا ماطردة ويطلع وهو الممنون ..صوچ سالار امنه عند امي ، وهيه تروح تجيب هل حيوان لبيتنه ..
مصطفئ چان طالع عند اصدقائه ، حرت شسوي ونوب خايفه لايسويلي شي ما أمن روحي ويا بنفس البيت واخواني ماموجودين ..
حرت اگعد بالغرفة واسد الباب واسكت ..
لوو شنوو ؟ اجه ابالي امجد ؤلت اتصل عليه بس خاف تصير مشكلة چبيرة بسببي ؟
يوووو خلي تصير ، بس خلي انتظر
واتاني بلكت يتزقنب و يروح ..بقيت بالهول ساكتة وگاعدة ايدي علئ خدي
شفت امي اخذت الاكل وراحت للديوانيه ، واسمع اصوات ضحكهم العاليه
- كوون سم و زقتبوت
مااتحملت ابقئ علئ هذا وضعي ، سالار هوو الكالي قبل مايسافر اذا صار شي اتصلي بامجد
رحت فوك اريد اتصل چان سمعت صوت الباب الطرمة طلعت للمطبخ شفت من الشباك مصيطف وٲمجد اجوو ودخلوو للبيت للديوانيه ..
ارتاحيت اي همزين اجوو ، سمعت اعياط واصياح ٲمجد ،
..يكول لـٍـً لؤي ..شلوون تدخل للبيت مابي زلمة ..
وهو يگله: " بيت عمي مو غريب انه"
تالي ٲمجد طلعه سحل ..
هل عار تعود علئ الطردة
والأهانه حيوان مو بيده ..
طرده وراح يحچي علئ أمي
شلوون ادخله للبيت!
وهاي أمي زودتها وصارت تصيح وتعيط عليه واتگوله: " لعد موبس لؤي الي يطلع انت هم اطلع هم غريب اطلع شكو جااي عدنه ؟
وٲمجد طالع زعلان لان حييل غلطت بحقة
و رايح مصطفئ ورا لحگه..
دخلت للمطبخ يمي تنفخ وتصيح
- اكلچ أنتي ما تستحين موعيب عليچ
هيچ تسوين طردين ٲمجد ابن عمي
- هاي منوو الماتستحي ؟؟؟ ، اجي اربيج من جديد چلبه
عفتها ادردم صعدت فوگ للغرفة ..
نبراس شنو الي يصير بالبيت حتئ لو انفجار ماتدري بي طوول اليوم نايمة ، مخلصتها نوم
ونور الكتاب مايفارگ ايدها صار جزء من ايدها .. عيونها انحولن من الدراسه ،
سمعت صياح مصطفى، نزلت شفته يتعارك وي امي ومتعصب وهيه تصيح عليه ، سحبته من المطبخ بلكوه دخلته لغرفته ، وبعده معصب ..
-شبيك حبيبي
مصطفى: لچ ما شفتيها شلون طردت أمجد .
-اهدئ رايحة احچي وياها .
مصطفى: ولي منا ما بيچ خير .
-صحيح بس اهدئ رايحة اولي، الؤقت اتأخر روح نام حبيبي وراك مدرسة ماشي .
عفته ورحت لأمي قافله غرفتها ، الحمدلله والشكر . رجعت للغرفة گعدت نبراس تنطيني الموبايل ، انطتنياه اخذته ورحت للصالة ، خابرت على سالار اتأخر يلا جاوب .
سالار:- هلا بالمخبلة شعجب متصلة .
-هلا حبيبي شلونك مشتاقتلك .
سالار:- ههههههه بلا رسميات فدوه
-لا صدگ شلونك شخبارك سوير .
سالار :- الحمدلله زين عال العال ، متصله عليه مشتاقتلي موو اعترفي هههههههههه
-أي والله اشتاقيت لسوالفك الخايسة .
سالار :- ايا طايحة الحظ .
-أنت وين گاعد .
سالار:- حالياً بشقه صديقي ، قريبة على الشركة الي اشتغل بيها .
-صدگ هيه شركة شنو .
سكت ما رد ورا شوي يلا جاوب .
سالار :- ملابس وعطور ومن هالسوالف .
-هاا ماشي لعد من تجي لبغداد مو تنسى اتجيبلي كم قطعة هدية .
سالار :- بدون ما تگليلي، شلونج انتي نور والخبلة تؤامج شلونهن ومصيطف أبو جوعة .
-تمام ما عدى مصطفى، معصب وضايج .
سالار :- خير شبي هل مسودن ؟
-"سولفتله على لؤي" .
سالار :- خير ان شاء الله هذا ثبت لنفسه حيوان ، اشما ينطرد وينهان وينضرب يرجع مثل الحمار ،
بس موصوچه صوچ امي المعدله الرحبت بي .
- اي اتصلت عليك علمود لؤي خايفه،لايجي مره الثانيه ومحد موجود
سالار :- لاا شنوو هلقندرة بكيفه يجي بيت الخلفوه ،لحضه لعد امجد ليش ماخابرني
-طردته امي ، غير كلتتلك معصب مصطفئ بسبب طردة امي لامجد ،طلع زعلان واخذ موقف
سالار :- والكعبة هسه من اهد البيت علئ امج احد يكلي ليش شنوو زعطوطة وهيج تتصرف؟هلايام كلش زودتها امنتها عليكم هيج تسوي انوب طاردة امجد بسيطة بس خلي يمر فد عشرين يوم واجي لبغداد .
-خايفة سالار خايفة من لؤي .
سالار :- متگليلي شسوي شصخم واني بأربيل ما اگدر ارجع موقع على عقد، وهذا امجد لازم اتفاهم وياا ، روحي انتي بعدين اخابرج حبيبتي ديري بالچ على نفسج تمام .
-تمام ماشي الله وياك .
سديته منه ورحت نمت، گعدت اني ونبراس بدلنه واجه السايق تزلت نبراس لجامعتها واني وصلني لجامعتي ، دخلت لقاعتي ماركزت بالمحاضرة بالي مشغول وصافنة .
حسيت على صيحت الدكتور عليه فزيت ..
-وين صافنة ست ناردين اخذيلج بعد غفوة .
ضحكو الشباب عليه وعلى تصنيف الدكتور عليه
-أستاذ تعبانة أعتذر .
-أطلعي برة إذا تعبانة .
هزيت راسي وماگلت لا .. اخذته جنطتي وملازمي وطلعت گعدت علئ الحشيش چنت لابسة تنورة كُل معتاد، وقميص أسود وشعري ورا ظهري وشامرة الجنطة والملازم بعيد عني
وادندن واغني. ... (چا وين اعليوي سارح بالهوش وان تو ثري مييييع )
رفعت راسي وچان اشوف واحد واگف
فوگ راسي وخربان ضحك عدلت گعدتي ونزلت راسي .
- اشبيج كاعده اتمعمعين مييع شفتي الحشيش وطلعت الصخله الي ابداخلج
-عفوا أنت شدخلك وهاي منو الصخلة أنت ما تحترم .
- لا لا عيني اعتذر ما قصدي اضوج حضرتچ چنت اشاقة وياچ بس صراحة صوتچ كلش عجبني
-عفواً !
- اي والله وخاصتا من لحنتي (مييع)
-دا تستهزء حضرتك ؟
-لا حشاچ
سكتت ..
-رجاءً ممكن تروح منا خربت گعدتي .
-عادي اگعد يمچ .
-عفوًا ؟ .
-أي انسولف ونتعارف ما بيها شيء .
-ما فاتحة گروب للتعارف .
اجه وگعد يمي ولا كأنو گعدته ما مرغوبة .
- آي شلونچ شخبارچ ؟ صدك شسمچ
أنتي اني أسمي "عـبد الرحمـن"
ما جاوبته رئستاً عفته وگمت، گام مشى وراي ..
-شبيچ خفي علينه يل ثكيلة شگايلج هو اتعرف عليچ .
باوعتله وخزرته ورحت للكافتيريا لحگني اشتريت لفه وببسي رحت كعدت أكل كعد اگبالي اگبال طاولتي ويضحك ويغمز .
توترت حييل شسوي يا ربي حتئ توني گعدت ما اگدر اگوم ، والكل دا ياكل لا ينتبهون عليه
دنگت صرت أكل علئ السريع شربت الببسي وعفت اللفه علئ نصها وگمت ..
طلعت اريد اروح للحمامات و احسه يمشي
وراي اتعصبت حيل هذا زودها شرايد ؟
چان ادور وجهي التفتت ورا واني اصيح:
- لااا اهنااا وكااافي عاااد!!
فتحت عيوني علئ وسعهن من الفشله ، طلع موهو واحد مااعرفه زمخت بوجهه
وهو متفاجئ وصاح بيه لان صيحت عليه ..اعتذرت منه وبلگوه طلعت روحي
ورحت ركض للحمامات ..
گعدت .. وين اضم وجهي من الفشلة
گعدت فوگ الساعة .. اكوم اعدل ملابسي وشعري بالمرايا وارجع اگعد ..
راحت عليه المحاضرة الأخيرة ..
خلص الدوام ..ورجعت للبيت سبحت ورحت للمطبخ عود احمي الغدة .. فتحت الجدوره شفتهم فارغه
استغربت ..دخلت نور من شافتني گالت:
- ماما اليوم طابخة بس الها علئ كدها حتئ انه من رجعت من المدرسة لكيتها ماضامتلي غده رحت سويتلي لفه جبن واسكتت ومصطفئ راح نام بدون ماياكل
- عززه صدگ شبيها ماما ويانه هلگد وصلت
لهذه الدرجة للأكل تحرمنه منه! الحمدلله
اضطريت اسوي لفه جبن مثلها ، و سكتت
رجعت للغرفه اباوع فلم كوري بچيت
علئ نهايته حزينة ، درست شوي بليل
و نمت من القهر ..
____
حيدرة
رحت للبصرة وصلت العصر رح تغيب الشمس اتجهت لمنطقتي القديمة إلي اكثر من سنتين ما داخل إلها، اعاين الباب وصافن منتچي على سيارتي وادخن طفيتها ومشيت دگيت الباب چان يجيني صوت أمي فتحت الباب مصدومة وتباوعلي بدهشة ..
وهيه تگول يمه هذا انت ؟! ..
هزيت براسي:
-أي الله بالخير .
-كل الهلا شلونك طمني عليك اختك اخوك شلونهم!! ادخل ادخل يمه .
دخلت وگفت بالباب..
-هذا حدي ما افوت داخل .
-چا ليش اجيت عليه .
تنهدت وزفرت نفس وجاوبتها:
-ما جاي عليچ،جاي مضطر احچي حچايتين واطلع .
-سنتين يمه ما شايفتك على اقلها تعال
لحضيني ما مشتاگ لأمك .
- نعم ؟ آي أم هاي ؟ ما عندي أم و تعرفين كلش زين قصدي ما أريد افتح مواضيع قديمة ناسيها أجيت اسئلچ سؤال ومنتظر جوابچ لحتئ أروح
جرت نفس طويل وجاوبت..
-احچي شنو هو .
- رجلچ الثور شاكه بي داعم رجال كاتل رجال لو مرتكب جريمة احچي .
توترت ودنگت راسها گالت بقلق..
-شنو هلحچي منو الگالك .
-قبل يومين چان عندچ حسن ومسولفه اله انتي .
- ها آي سولفتله ابوه ما هو مختفي صارله شهرين ونص ما جاي للبيت ما اعرف بي كاتل واحد
- زين شاكه بي احچي ؟
مر وقت أستجوبتها ماكو فايدة ماحصلت منها
معلومة طلعت بدون ما ازيد كلمة وياها ركبت بسيارتي والف سؤال ابالي ما لگيت جواب لهُ
وانا راجع بطريقي لبغداد، چان يدگ علية
رقم غريب مجهول الأسم! ضغطت رد مُباشرةً
- الوو منو ؟
- حضرتك سيد حيدرة الـ* * ؟
- آي نعم صح
- احنا استخبارات لمكافحه الادمان ننتظرك بباب بيتك ...
وتحَسب إنكَ جُرمٌ صغَير وانتَ الليل وسَماه ونجومه وقَمره عند احِدهم
..
- عفوا ؟!
- والدك حاليا بالسجن لزمنا هو وجماعته احنا عند باب بيتك سيد حيدرة ننتظرك
غلقته مصدوم چنت جاي للبصرة بسببه وهسه هو بالسجن! حركت السيارة رجعت لبغداد وموبايلي صامت قبل ما انزل من السيارة فتحته دك اتصالات من حسن وطيبة..
دخلت للبيت طيبة گاعدة بالطارمة وتبچي..
- خير طيبة شكوو شصاير حبيبتي!؟
اجت تركض وتبچي حضنتني ..
طيبة :- ويين چنتت حيدرررة اجووو اجووو الشرطة قبل اربع ساعات دكينه عليك ومارديت والشرطة اخذت حسن وياها وراحووو
- شششش بويه مسحي دموعج روحي بس جيبيلي كلاص ماي نشف ريگي خل افهم السالفة غبت عن بغداد نص يوم وهيچي يصير بيكم بغيابي
گعدت علئ الكرسي شربت ماي وتصلت علئ حسن مايجاوب ..
مغلق ، ابن الثور ماترد رحمة للحسين
صحت لطيبة :- ليش اجوو ومنو چان يمچ؟
طيبة :- ماادري بس سمعت حسن يحچي علئ ابوي وحتئ الشرطة ؛ محد يمي بقيت بحدي
سكتت وتنهدت .. ياابه ارريد ارووح للمركز هسه ، شلوون اعوفچ بحدچ بالبيت ،وين اوديچ ،السالفه رح اطول
- ماادري
- رووحي لبسي حجابچ وتعااي للسيارة
- خوش هسة دقايق
تشتت تفكيري ما اعرف وين اوديها حرت حييل مناا افكر بإلي أتصل عليه وكال لزم هلسكير ومنا افكر بحسن اخذو ، وطيبة ما اكدر اتركها بحدها بالبيت واروح ..
حركت السيارة واتجهت لبيت ابو سالار ..افضل شي واحسن حل اجه علئ بالي ،
- تبقين يم البنات وراح ٲتٲخر اني لاتخافين وتقلقين عفيه بالسباعيه حتئ لو تباتين اليوم عدهم موغريبين خوش حچي ؟
- اي والله لاا ما اقلق ابقى يمهن
- يلاا حبيبتي نزلي ..
طلع مصطفى حاچيته دخلت جوا وصلتها واتوجهت للمركز دخلت شفت حسن كاعد يم الشرطي سلمت عليه وحچيت وياا
- ألقينا القبض على چاسب بتهمة التجارة بالمخدرات اتصلنا عليك بعدما عرفنا انو عنده ابن كبير عايش بغير محافظة وطلعت انت سيد حيدرة..
- اولا اعتذر على التأخير چنت بالبصرة والطريق اخذ نص وقتي جائز ما فهمت الموضوع صح چاسب يصير ابوي بس انا وأخواتي قاطعين علاقتنه بي يعني اعتبر ما يهمنه اذا چان تاجر مخدرات ويسكر
- ويسكر هم؟
ضحكت ضحكة عالية:- خليها على الله حبيبي وين فد سالفة طايح حظها متجمعه بي المهم بشنوو افيدك..
- سيدي والدك شغتله مو سهلة ابداً ، خطيرة جداً واحنا حاليا قابضين عليه وهو بالسجن وباچر يتحول للمحكمة ومناك ..
- لجهنم
- القاضي رح يحكم لو اعدام لو مؤبد لان مو فقط هوو يتاجر ؛ كذلك جماعته واحنه لازمي بس هوو وكم شخص ودا نحقق وياهم
اثناء الحديث اجه علئ بالي حادث ابو سالار ، الله يرحمة الواضح ما عدهم علم بالحادث والقضية مامشتبها بي والله خوش طلع منها
هذه فرصة واجتلي تبليغ واحد مني عليه رح تنفتح القضية بعد رجلية تلمست ارض المركز
يحلم يطلع منه الا علئ جثته
لليل رجعنه بعدما انهلكت من التعب..
حسن :- يخوي چا غير طلعت روحي منين طلعتلنه هالسالفة..
- ما ارتاحيت من هلثور سنتين هم رجعت وشفته بحكم انا ابنه لو اعرف اتبره منه! ما اتشرف اكون ابن هالحيوان المو بشر
حسن:- الله يخلصنه منه ومن مخدراته
جاي اسوي وتالي ضربت جبيني بنسيان وگفت السيارة.. لحظة لاا چؤؤ نسيت طيبة خرب عمي
حسن :- شنو نسيتها ليش هيه وينهاا ؟
- غير انت المحترم والشريف عفت اختك الصغيرة ورحت وي الشرطة وخبلتها لوحدها، وديتها لبيت ابو سالار الله يرحمة ورحت للمركز
- والله دگيت عليك ماترد والشرطة انتضرتك فوگ الساعة تالي اخذوني وظل بالي عليها بس انت كلت تجي شعجب وديتها الهم ؟
- ما ادري اجوو على بالي واقرب شي
- هاا
- اي يلاا وصلنه انزل حبيبي
- رووح انت والله باردة شعندي نازل وياك
- جحش موبيدك
نزلت ودكيت الباب ، اهز بالسويچ ومنتظر، تردد على سمعي صوت ناردين
يااا الله ...
...
اندك الباب ، چنه نلعب اوراق اني وخواتي وطيبة ، وحيل فرحانة لجيتها النه لانو ملل بالبيت وسوت النا جو..
اجتي فجأة وصلها حيدرا وراح ماهمني والتهيت اسولف ونلعب بغرفتنه چنت كاعدة يم الشباك وسمعت صوت صف سيارة بعددت البردة وچان اشوف سيارة حيدرة دخلت بالفرع..
رحت نزلت وكفت بالطرمة وندگ الباب گلت منو..
صاح :- اني اني حيدرة صيحي لطيبة بلا أمر عليج..
فتحت الباب وچان اتصير عيني بعينه صارلي اكثر من 8 شهور ما شايفته! سكتت وهو صافن بوجهي
تالي تحمحم ودنگ راسه وگال:
- ناردين صيحي لطيبة اريد اروح
هزيت راسي وگلت اله:- تمام هسه رح تجي ادخل ليش واكف هنا الجو بارد هسه يجي مصطفى اگعد يمه ..
ما قبل يدخل عفت الباب مفتوح رحت لمصطفى صحتله طببهم هوو واخوو
ورحت لطيبة صحتلها نزلت بعدما شربوا چاي راحوو..
رجعت للغرفة وحضنت مخدتي.. ياالله متغير هواي 8 اشهور ما شايفته
استغفرت ربي ما اعرف اني من افكر بي بيني وبين نفسي
حلال لو حرام ؟ ،،،
اجه امجد رحنه انه ونبراس ونور سلمنه عليه وكعدنه ساكتات بس هو يسولف ويفتح مواضيع ومصطفى ويانه
تالي صعدوا للغرفة اتأخر الوقت وكذلك رحنا احنا لحتى انام ، امجد رضى ونسى الموضوع مال طردة امي سالار حاچي وياا ومصالحة
،،، لان سالار متصل علئ سالار وحاچي عليها
وعلئ تصرفها الي يفشل وحلفها بعد ما تعيدها وكالها لؤي وجيته علئ البيت ما انساها ارجع لبغداد ويصير خير
وفعلاً امي سكتت ومن اجه امجد ماطلعت بقت بغرفتها لا سلمت ولا اعتذرت
ليلتها مانمت للفجر والتفكير صرع راسي تحلمت بي وياريتني ما متحلمه رجع نفس احساس اول حلم ورجعت افكر بي
ثاني يوم من رحت للكلية بالإستراحة شفت عبدالرحمن يباوعلي ويضحك..
كلت اطنشه افضل لاتصيرلي مشكلة بسببه إذا حچيت وياا.. مر اسبوع نفس الكليشه .. كل ما اطلع من المحاضرة وحدي لو وي صديقاتي بالقسم اشوفه واگف امام القاعة عبالك ينتظرني
،،البنات ضلوو ينتبهن ومن يشوفني يغمز ويبتسم
يالله هذا خبل شبي يكوول صديقي لو اعرفه
ماعبالك حچيت وياا بس مره وموقف موحلو مبين عليه عنده سوالف مكسرة
كلت احاچي العميد عليه احسن لان ما اريد سمعتي تصير موحلوة بين الطلاب القسم
طلعت من المحاضرة مدنگه ما اريد اشوفه بس لمحته واكف مشيت بسرعه وچانت وياي رسل زميلتي رحنه للحديقة وسولفتلها عليه
تالي من كتلها اريد اشتكي عليه كالت بصدمة:
- اسمه عبد الرحمن مو؟؟
- اي ليش شبي
رسل :- كولي والله ! عززه بعينچ ولچ هذا ابن العميد عماد ،، نوب تردين تشتكين عليه حتئ يفصلوچ من القسم والله
- وإذا ابن العميد اريد اشتكي عليه لأنو يضايقني بنظراته و وين ما اروح يلحگني
رسل :- ولچ وثوله وين لايكتلچ ابن العميد ويباوعلچ يمكن معجب بيج لو يحبچ ؟ فوكاها تشتكين والله بطرانه وترفسين النعمة برجلچ هوو الله ينطي جوز الماعنده سنون
- شبيج اكلتيني اكل لايكون تردينه اخذي بس ريحيني منه
رسل:- وين الگى بجماله بس جديات ناردين لا تشتكين غيرج سووها وفصلوهم فصل نهائي يعني عبد الرحمن مو شخص عادي ديري بالج منه طنشي احسن
- امشي امشي صوچي اني اسولفلچ
اسبوعين نفس الشي صرت اكرهه اروح للكلية بسببه واتأخر بالقاعة ما اطلع حتى لااشوفه
وبيوم گاعدة بالحديقة نتغده مسويات عزيمة اني جبتلهن بس عصاير وهنه مبدعات
،،الدولمة ،، والبرياني ،، والدجاج ،، والمقلوبة ،،
لمه حلوة وضربنه المحاضرات ما رحنه ماعدنه محاضرة مهمة كنسلناها وكعدنه ناكل ونسولف
دا اكل وألتفتت چان اشوفه واكف من بعيد يم الزرع وتركيزه عليه غصيت بلكمتي انتبهت عليه رسل وشافتني چان اتباوعله وضحكت عليه..
اتبدئ العصير علئ تنورتي تنرفزت ..
الحقيرة تعمدت تشمره عليه حتئ اكوم ادري بيها كمت واني متجهة للحمامات حتئ اغسل توصخت
چان يلزمني من ايدي دفعت ايده بعصبية:
- منو الي سسسمحلك تلززم ايددي؟
عبد الرحمن:- اهددي ارريد احچي وياج كلمتين لا اكثرر ما اسويلچ شيء
- واني ما اريد احچي ويااك ومره الثانية لا تلحگني لا اشهرررك
- اگعدي والله كلمتين واروح وبعد ما اضايقچ بس اسمعيني
نفذ صبري وجاوبته:
- احچي هنا بمكانك وروح..
- ماشي ناردين
صفنت مستغربة:- انت منين تعرف أسمي ؟؟
ابتسم وگال إلي: ناردين جاسم صالح ، مو بس اسمچ كلشي عنچ اعرفه اسمچ ،، عمرچ ،، منطقتچ ،، عائلتچ ،، وكلشي
ظليت مصدومة جاوبته شلوون تعررف عني كل هالمعلومات منووو انت اساساً !!
- مو صعبة على عبد الرحمن هذن سهلات اصلاً شوفي مثلا ابوچ متوفي صارله 10 اشهر اخوچ سالار مسافر إلى اربيل اختچ التؤام بقسم رياضيات وعندچ اخ واخت بالإعدادية
صفنت مصدوومة عزه هذاا شنووو وشلوووون يعرررف كل هذا المعلومات!!
كلتله بدهشة:- انت منووو وشتررريد مني؟؟
- اريدچ انتي
- نعععم !!! شقصددك ؟
- ناردين اني احبچ !
انصدمت ! :- شنوو تحبني شداتحچي اخي؟؟
- اي احبچ واريدچ اريد اتزوجچ!
- شبيك اي زوااج شحبيت مني؟؟
- حبيتچ وجذبتيني بجمالچ وعفويتچ واسلوبچ وهدوئج كلشي حبيت بيچ
سكتت مصدومة منه ..
- باچر الوالدة تجي تطلب ايدچ
- لااا لاا تتعب نفسك لاا تجي اني مااريد اتزوج ولا اريدك ارجوووك ابتعد عني
- لا تستعجلين اخذي وقتچ بالتفكير عايفچ على راحتچ
- لا اني ما موافقة خلص وابتعد عني
اجت رسل رحت وياها بسرعة وعفته واكف وضاج من ردي عباله اوافق لو افرح
سولفت لرسل بعدما لحت عليه الا احچي الها شنو صار ،،،،
رسل :- عزززززه دريت بي يحبچ والله بس اخ هنيالج شگد حلو وين تلگين مثله عندﭲ حظ وبخت ابن عميد وشخصية وزنكيل وحلووو واشگر وطوله يخبل وانيق وعيونه تخبل ولچ والله وافقي ولاترفضي يعشيچ اميرة بالجنة
- انچبي شايله الزواج من راسي
- بس ناردين
- فدوه رسل اسكتي وارجعي اكلي هاچ هااي دولمة اكلي وسدي الموضوع
كعدت تاكل واني صافنة خطر على بالي حيدرا
سماره وعيونه.. وشخصيته ورزانته واسلوبه وهيبته وهدوئه وضحكته.. وكلامه..شنسى منه؟
خلص الدوام ورجعت للبيت ونفس الشي امي ماطابخة بس الها والگا نور خطية دوامها عكسنه مرات فتحل قبلنا ونلگاها مگليه طماطة لو مسويه فد اكله ما ادري امي شنوو من گلب عدها وهالگد قسى علينا
هذا الشهر كال سالار اجي قبل رأس السنه لبغداد اشوفكم وباقي على رأس السنة كم يوم وندخل بسنه جديدة
هاي السنة بابا مو ويانه كل سنة نحتفل لو نطلع للمدينة الألعاب تصير اجواء حلوة وننتظر ادگ الساعة تصير بـ12 ويطگون الألعاب النارية بالجوو وبكل بغداد ونستقبل السنه
شكرا لزيارتكم عالم روايات سكيرهوم
