رواية ارحموني ولو رحمة مرة الفصل السابع عشر 17 بقلم فراقد حسن علي

أركان /وصلت للمقر اليداوم بي مخلد 

سلمت على الشباب كعدت يمهم شوية 

دخل مخلد وسلم بس شافني أنصك بمكانه 

-هو لابس عسكري ،،واني لابس مدني

كمت وتقدمت عليه ومديت أيدي أصافحه

-هو مد أيده صافحني لان حرجته 

حقه صارت بيناتنه عجينه مال بوكسات

-بس مستغرب وجودي

وبعيونه الف سؤال ليش جاي عليه

//مخلد عندي وياك كلمة خاصة 

بس أريد نكعد بمكان لوحدنه 

او نطلع نكعد بره المقر بأي مكان يعجبك 

مخلد /لا بره ما اكدر أطلع تعرف واجب وخاف كلشي يصير لان شوفت عينك الاوضاع الأمنية تعبانة 

-تعال تفضل هنا أستريح ،،

من رخصتكم شباب

عدنه موضوع عائلي وألاخ أركان نسيبي

أركان /طلعوا الشباب الاثنين من الغرفة اللي جانوا كاعدين يمي ومخلد كعد على الكرسي كبالي

مخلد/قبل ماتبدي بسالفتك،، اول شي لازم أضيفك 

تشرب جاي ،،كهوه 

اركان/اني جاي اسولف وياك بموضوع وامشي

ضيافتك وكرمك واصل ،،

مخلد/أحنه ولد عرب ومانرضاها لنفسنا 

خطارنا يطلع بدون ضيافة 

أركان/كفو ما عليك قصور 

انطيني بس بطل مي بارد 

-كام مخلد جابلي مي بارد ورجع كعد كدامي بس شنو قلق ،،ومبين عليه متوتر 

حتى من يحجي نبرته حاده من التوتر

-عشت ،،،،

شربت المي مجرش كسر سنوني

وهو يراقبني

مخلد /بالعافية 

-أركان اذا جاي على سالفة طلاك فرح 

لا تفشل نفسك وتطرق الموضوع 

أركان /نزلت بطل المي وخليته بصف رجلي

-مخلد عندي وياك موضوع مهم

واريدك تواعدني ،،وتنطيني وعد زلمه حوك ان الموضوع الي هسه راح تسمعه مني ميطلع بره باب هاي الغرفه ومن بعد ماتسمعه أنت حر ألاختيار

💚💚💚💚

مخلد /لا يابه الا سوالف الشرف 

أوعدك وعد زلمه ،،

وأني أبو محمد وكلمتي وحده وماتصير أثنين 

حافظ سالفتك بصدري وما تطلعت بره باب الغرفه

أركان/كفو والله ،،عشت يالنشمي 

-أنت تعرف وبالذات سوالف الشرف 

اذا وصلت لحلوك النسوان يكومن يألفن قصص بكيفهن

ومن حرف واحد يسولهن قراءه وحساب

مخلد /صدقت ،،

سولف العندك وأطمئن

أركان/مخلد قبل لا أسولف السالفة 

واعتبرني صديقك ،، أنت تحب فرح؟؟

مخلد/مااعرف شكول ،،صدمتني بسوألك

-الصراحة ..... ما اعرف شكول 

-اني من جنت بالاعدادية حبيت بنت خالي بس أبوها زوجها لغيري بالعناد 

لان تلاغه هو وابويه على شغلة 

أركان /تعرف محمود ليش مجلب بفرح 

ومايفك نهوتها ،،

مخلد /لان خبيث ومايريدني أخذها

-يعني كل هاي السنوات ماتذكر عنده بت عم 

الا بيوم حنتنه يجي وينهي عليها

أركان/لا مو سالفة خباثة شوف واسمع 

محمود من جان طفل بالابتدائية 

مايعرف شنو العلاقة التصير بين الذكر والانثى وطخت براسه ووزه الشيطان ،،

وفرح جانت طفلة عمرها ٤ سنوات او أقل صارت كدامه وجرم بحالها 

مخلد/شنووو ،،بس عيد الحجي مافتهمت 

يعني فرح مو بنية ؟؟

أركان/للاسف أي ،،

ومو ذنبها ولا ذنب محمود 

أثنينهم جانوا أطفال ،،

يعني أعتبرها وكول حادث أسود 

مخلد /بس أصبر عليه 

وفهمني شنو السالفة ترى دخت 

بشنو بلغتك كوثر بيوم حنتها

اركان/شوف مخلد من توفت جديتي خاجيه

عمامي تلاغوا ويه أبويه ،،

وبعدها كل واحد راح بجهه

ومن هذاك اليوم ابويه قاطع عمامي

-وأحنا منعرف بسالفة فرح ومحمود أبد 

-فرح أنصدمت بيوم حنتها 

من جانت عمه شمس تعلمها شلون راح يصير موضوع الدخلة فبهذيج الساعة عرفت هي مو بنية 

-وصارت الهوسه من تصيح 

مااريد اتزوج،،

ويكولك تبطل من الزفه

وانت جنت حاضر وشفت حالتها 

وفكيتها من أيد عمامي

-هي وكوثر صديقات حاجيتلها الموضوع 

وكوثر هدت عليه وبلغتني بسالفة

من عدها عرفنا احنا الباقين 

-وجان لازم ينهي عليها محمود ،،

حتى لا يذبحوها عمامي

خطية بريئة ومالها ذنب بشي جانت طفلة 

-يا خوي هذا سر فرح ،،

وليش نهى عليها محمود

-أنت هسه بعد عرفت الموضوع ،،

وكتلك من البداية سالفة شرف وستر عرض

-تقبل تاخذها على هذا وضعها وتستر عليها

جزاك عند الله جبير لان مظلومة 

-تكول لا بعد ما راغب أتزوجها

بقت أنت وشهامتك ونخوتك على حرمة مظلومة وبريئة طلكها وخلي يسترها ابن عمها

مخلد/أركان راسي أنسطر 

وهسه انعاد بفكري شريط هذاك اليوم 

من تكولي أخاف وبطلت ما اريد ازوج

أركان/اي خطية حقها تخاف لان عرفت نفسها مو بنية ،،واكيد من راح تدخل عليها تكشفها 

وحالك حال أي زلمه عراقي بعد الغيره تعمي تفكيره وترجعها لاهلها وبتالي تنذب ح وتندفن وهي مظلومة وبريئة 

مخلد /ما مفكر بهيج موضوع أبد 

ولا مخلي هاي سالفة على بالي 

أركان /قابل شام كفى أيدك ،،

أني فرح عادها أختي مو بنت عمي

من أحنه صغار رابين سويه ،،

يعني أخت وأخو

-وأجيتك متعني وأتوسلك بصفتي أخ 

ان تعيد تفكيرك بسالفتها

وشتقرر اني أكون ممنون منك 

أركان/براحتك فكر شكثر ماتريد 

اني أترخص ،،ورايه طريق طويل

-سلمت عليه مصافحه ،،وهو صافن بوجهي

مصدوم من السمعه ،،حقه سالفة مو هينة 

-رجعت للبيت وتلكاني أسلام أبن الزمال بس يسمع صوت السيارة يجي يركض اسم الله أخاف أسحكه ،،وهو بطول البرغي 

والسيارة عالية ما اشوفه زين 

-صعدت الغرفتي بعد ماغسلت وصليت وتغديت أتمددت شويه 

-أحلى عشق وأطهر عشق 

هو عشق المكيف بالصيف 

يجرش حتى كلبي ببرودته

-خليت راسي على المخدة ونوعا ما مرتاح لان حجيت الحقيقة لمخلد وهو بعد حر الاختيار 

-بس خايف من ردت فعله أخاف يحجي ويفضح الموضوع بس ما اتوقع يدك الناقصة بعد هو أنطاني وعد وكلام زلمه 

الله كريم خليها يم الله هو يصفي المشربك

-أحس نفسي غفيت بس عقلي بين نايم بين الكاعد

((شفت ألحوش عبارة عن حفرة جبيرة 

ومليانة خيسة ،،ركض أسلام وجيت بيها ،،

-واني فرفحت روحي عليه

مديت أيدي ادور عليه أطلعه ،،ماكو أختفى

-أنفتحت باب الشارع بسرعة ودخلت رسل تضحك وسمنانة ومتغيرة هواي حليانة وملابسها حلوة هذيج الكشخة ،،

-بس مدت أيديها طلعت أسلام

وكولشي مابي لا وسخ ولاشي 

ولابس غير ملابس كلش حلوه وأنيقه

-خلته بيدي وتقربت عليه باستني من خدي 

ولبستني بيدي ساعة فضه وطلعت 

-من طلعت أختفت الحفره 

ورجع الحوش نفس وضعه

كاشي عادي كولشي مابي ))

-فزيت مخروع 

وأصب عرك 

وذابحني العطش

وقلبي يخفگ بسرعة من كثر الخوف على أسلام عبالك حقيقة اسم الله مو حلم 

ياحافظ ياربي سترك ورضاك 

-أول مره أشوف رسل بالمنام 

من توفت لليوم ،،هاي اول مره أشوفها

-واني ابد مااحلم بالسنه مره 

لو أشوف حلم واحد لو لا

يعني لاغي خدمه تفعيل الاحلام 

-نزلت جوه ماكو أحد البيت فارغ

امي وابويه بغرفتهم وأسلام يمهم 

ومحمود ومرته بغرفتهم 

-رحت للمطبخ خدرت جاي ،،

كسبت خبزة على الطباخ 

هاي سالفة عشقي

كلاص جاي وأغمس بي خبزة

لو هستوني ماكل وشبعان لازم أسويلي لكمة

خبزة بالجاي

-رحت للهول شغلت التلفزيون وكعدت أتفرج

ماكو شي جديد كلها البرامج معادة ومملة

-سمعت خطوات نزلت على الدرج

دخل محمود للهول لابس بس برمودا 

-اي بدون حسد أمورك عدله أبو شكريه

أثار ،،وقبلات ،،وصراعات ،،وما الى ذالك 

-محمود/ليش ما تاكل تبن ،،بس مااضم عليك 

هذا مفعول الزركه

أركان/خرب عقلك ،،يول لا يوكف كلبك

محمود/لعد شسوي بس فهمني 

من يوم قررت أتغير ويه رفل 

كله كمت أمشي درب الزركة

أركان/أنت براسك عقل لو كوم طحين

مو زين تستخدمها بكثرة 

لا توكف كلبك لو تسويلك غير سالفة

محمود/شوكت تفهم اذا ما ابلع ما أرغب 

وبالذات من المراه تريد وتلح بالموضوع

بس من سالفة تصعد براسي لا ما أحتاجها 

أركان/وشلون بلا ،،ناوي تطول بأستخدامها

يمعود لا أسكطك ،،

محمود/بعد شسوي ومنين ما أصفنلها أكول رفل مالها ذنب بالصار 

ابوها وأبوي فكروا بس بمصلحتهم وصداقتهم

-ولازم أراضى بالواقع وأتقبلها زوجة اليه

بس حظي ألشاخط مشاعري تنفرها بالعلاقة ومن صدك أحس نفسي مجبور ومغصوب على الزواج منها

أركان/ألك الله يالدايخ بأمرك 

محمود /اااخ نفسيتي تعبانة ،،

كل هاي الدنيا بكفة ومصيبة فرح بكفة ثانية 

حالتها وربطتها كاسرات ظهري 

-هسه لو بس أبويه وعمامي يسمحولي

بس اشوفها وسلام عادي أطمئن على حالها

أركان/كول يالله ،،وذب همك على ربك 

هو يحل أمرك وأمرها 

-أكلك ضايج ماتخلينا نروح نزور لأبو طلبة 

-وشفت منام وشويه خايف منه

محمود/الله يستر من منامك لا تحجي مابينا حيل 

-هسه بس أغسل وأبدل ونمشي

-أكلك شوف أمي تروح ،،حتى مناك نطلع 

لشيخ عبد القادر 

أركان/اني ماعندي شي بس اكوم أبدل

وأمي دك الباب عليها تلكاها هسه كاركة بحظن أبويه

محمود/شو أنت فرد نوب زايعها للمستحة

أركان/أووي لك فدوه دادا أنت شكد متخلف 

يحجي بصوت بنات ويقلد 

-ورة ساعة الكل سبح وبدل الحر يسمط يوكع ألجلد 

-وطلعنا أني وامي وأسلام بسيارتي 

ومحمود ورفل بسيارته

وابويه راح على صديقه الحجي 

-زرنا هذيج الزيارة الحلوة صارت من العمر 

طلعنا من أبو الجوادين بوجهنا لشيخ عبد القادر

-وأسلام يمشي ويبوس باأبواب وشبابيك الامام يقلد أمي .

فرح/سامعين الناس بالتسعين تلعب 

واني بالعشرين وشيبت راسي

هذا حالي

-من يوم ما شفت مخلد بالسوك جلبت بيه الخنكة ما اعرف ليش هيج يصير ويايه 

-معقولة حبيت مخلد وهيج تأثرت من شفته يمشي ويه مرته !؟

لو لان جنت حاسبته رجلي وهيج غرت !؟ 

-اذا هاي النار هي نار الغيرة 

الله يساعد كل وحده رجلها تزوج عليها 

لو مصاحب عليها يمه النار تاكل بيه 

-وبهذاك اليوم دخلت علينا عمه شمس بهجوم كاسح شايله عهود على جتفها 

تحجي وتلهث بودها تطير من الكاع 

شمس /فررررح جيبي البشارة 

مخلد باجر ياخذج للمحكمة يطلكج

فرح/كلنا كاعدين العصرية نشرب جاي

ومجموعين بالهول

-هي كالت هيجي وأني شرگت بالجاي 

من الصدمة 

-عمه عليج بصلاة محمد تحجين صدك

شمس/اي اي أحجي الصدك 

الصبح مخلد نزل من دوامه 

وأجه بوجه علينا وبلغني أجي وأبلغج 

-يلا أيدج على البشارة لا تغلسين 

فرح/عمه ما مصدكة الخبر 

وشنو أطلبين على لسانج 

-شنو الغير رايه هيج ؟؟

شمس /اني هم سألته 

كالي/ هواي فكرت بموضوع فرح

ونور حرمتي حبله وشايله أبني بطنها 

وأخاف على أبني من حوبة فرح 

أطلكها تروح بحال سبيلها قبل لا يولد محمد 

فرح/كمت أبجي اول شي ما مصدكة راح أخلص من هاي الورطة 

وثاني شي ما أعرف شنو الراح يواجهني 

خايفة من الدنيا بعد شضامتلي

-صدك ثاني يوم 

طلعنا أني وأبويه وعمي أحمد للمحكمة 

وهناك لكينا مخلد ينتظرنه

-سلم على أبويه وعمي أحمد 

وسلم عليه بس كال ،،ألگوه 

رديت عليه ،،يگوي حيلك 

-اول شي رمى عليه يمين الطلاق كدام الشيخ

وبعدها خلص أجراءات الطلاق بالمحكمة 

مخلد /من رخصتك يابه بس أحجي ويه فرح كلمة صغيرة ترى عادها بمقام أختي أم سيف

فرح/ابويه كاله براحتك 

تمشينا تقريباً ٣ مترات عن أبويه وعمي أحمد

بس شنو أبد ما رفعت وجهي بوجه 

أستحي من عنده 

مخلد/فرح بس أحب أكولج أنتي محللة وموهوبة ومبرية الذمة ، ونفسي طيبة عليج 

روحي يابنت الحلال بحال نصيبج

أبن عمج أولى بيج من عندي 

ادعيلج بالستر وفرح الحال 

-فرح أني سبق وكتلج أنتي ترفه ،،

وبس شفتيني أمشي ويه حرمتي بالسوك تكومتي 

شلون بحالج لو صايره من نصيبي

ونزلن بعد عليج شرايج

-انتي تعرفين بعد طبعنا الزلمه المتمكن من عدنا وما يثني على حرمته ،،ويثلث بعد 

ما يعتبرونه زلمه ،،

-واني بس تولد نور أثني عليها ،،

مامقصره هي بشي

بس هاي بعد طبع بعايلتنه 

-أريد منج تبريني الذمة ،، وسامحيني أذيتج

لان صدك ردتج حلالي ،،

-بس كتبت الله فوك كلشي،،

أني أشاء وانتي تشائين ،،

والله يفعل ما يشاء

فرح/هو يحجي ويسولف ويايه بهدوء 

واني ما صدكت الدموع تزخ على هل الوجه المنحوس

اني من البارحة من بلغتني عمة شمس أختنكت وبس أبجي

-مخلد أنت خوش زلمه ،،ونشمي ،،وأبن حلال

محلل وموهوب ومبري الذمه ،،من لسان وقلب

مخلد/جزاج الله خير 

روحي يا بنت الناس عساج مسعودة بخت 

ومرتاحة بال 

-وسلميلي على أخيج أركان 

وصلي سلامي اله ،،

وكوليله أبو محمد وفئ بوعده 

ويكول كنت نعم الاخ 

فرح/بقت صافنة شنو يقصد بكلامه هذا 

-سلم عليه وعلى ابويه وعمي من جديد 

وتركنه وطلع 

-رجعت للبيت وأمي وعمة هناء وعمة رجاء

طشن على راسي جكليت ويهلهلن

اول مره أشوف مطلكة يهلهلوها 

هذا هم حظي يمشي عكس حظ الاوادم

-صح أرتاحيت من هاي الورطة وتحدد مصيري اني لمحمود ،،بس هاي الخنكة البصدري ذبحتني

-أبويه بلغ أبويه عادل ان مخلد طلكني

-وبعد يومين وبيت أبويه عادل كلهم أجوي 

وياهم بيت جده صفيه وجدي سليم 

وخالات محمود اهل بغداد ،،

-بس مرته رفل ماكو 

محمود /كاعدين نتغده والواحد ما يشتهي ياكل اللكمة من ضيم الحر وتعب الدوام وأزدحام الطريق

-أتصل عمي باسم على ابويه ،،وبلغه

مخلد اليوم مطلك فرح 

عادل /يالله ،،يالله ،،هاي البشارة الزينة 

-خويه اليوم ثلاثاء

الخميس حضروا أمروكم أحنا يمكم 

بس نعقدلهم عقد شيخ 

حتى الواحد يعرف يضبط أموره

محمود/ابويه منطلق يسولف ويه عمي باسم 

ونسى رفل كاعده ويانه تتغده ،،

وهو مستمر يضحك 

ويسولف ويخطط 

-ما أشوف الا رفل طفرت ويه طفرتها 

ضربت دولكة اللبن برجلها صارت تمطر بالهول لبن

صوتها وصياحها وعياطها كلبت الدنيا علينا 

امي صعدت عليها تسولف وياها 

تريد تهديها وهي ماكو قفلت 

بدت تغلط وتسب وتشتم عايلتنا وعشيرتنا 

-ما حاجيتها حقها أنقهرت صح هي من قبل سنتين عدها علم بالموضوع 

بس من صارت صدك أتخبلت 

-بقيت كاعد بالهول 

وابويه أنحرج راد يصعد يعتذر منها 

كتله /عوفها خليها تصيح وتعيط ماعدها وسيلة ثانية غير صوتها تطلع بي حركة كلبها

-اركان من كبت العيطه أخذ أبنه وصعد لغرفته

-بس من كامت رفل تعد وتصف وتغلط وتسب وتشتم 

-اركان أطلع من غرفتك ودك على باب غرفتي بقوة ،، طفرنا اني وأبوي وصعدنا فوك ،،

هذا عصبي ويقفل من يتعصب لا يضربها

اركان/والعباس من اطبلج أكص لسانج 

واخلي بيدج ،،عليمن تكولين كو....

عادل/اركان امشي رد لغرفتك 

لا تخلي عقلك ويه حرمه

اركان/يعني ماتسمعوها تعد وتصف 

سوت الكاوليه أشرف من عدنه 

-وانت يا لرابطها ما تسمعها لو أطرشيت 

محمود/يعني مراه و محروك كلبها 

قابل أكعد أحاسبها شكلتي وشحجيتي

هسه تتعب من حالها وتهدأ

اركان/أشتعلت أصفاح أبليسك على هذا برودك ،،

لو هاي مرتي الا أسويها وصلتين 

محمود /دخلت عليها للغرفة 

امي كاعدة على طرف الجرباية تهدي بيها وتسولف وياها بكلمات طيبة 

-وهي أملخه روحها ،،وملشه شعرها 

وحتى وجهى مدميته

-يمه لمي أهدومها أوديها لبيت أهلها 

رفل/حتى تروح تعقد على هاي الكح....موو

محمود/ألزمي السانج رفل 

هاي مرتي قبل لا تكونين أنتي مرتي 

رفل/خوش كلاوات ،،هاي وحده مو شريفه 

ك .... لعبت وياك وسلمتك روحها 

والله واعلم لعبت ويه منو من وراك

وجاي وتكلي مرتي

أركان /وكف وره الباب وأسمعها تصهل 

وانوب كامت تشخبط بشرف فرح تخبلت 

دفعت الباب بقوه ودخلت عليهم 

-محمووود سكتها لو هسه أرتكب جريمة 

مو أختي الينطعن بشرفها 

رد مرتك لو هسه أسوي سالفة الماصايرة 

رفل/وليش مغثوث أنت منو يمك 

وبعدين مو هاي الحقيقة

لو أنت هم لاعب وياها وماخذلك وياها شوط لعب وجاي هسه تنتفظ علمودها

أركان/هي كلت هيج ،،واني طفيت 

هجمت عليها بس ااااخ أمي نامت بخوانيكي 

-يولوا بس أنطونياها والله أربيها من جديد

محمود/هواي تمادت بحجيها 

يعني الواحد شكد ميصبر بس من يسمع هيج كلام يفقد أعصابه 

صلختها براشدي فريت راسها 

وهي زادت ،،

انوب امي تريد بس أنسد حلكها ماكو 

-ابويه متصل على أبوها 

والحجي سامع صوتها وغلطها وفشارها 

-أركان كام يفور ،،حط حركته بالطفل 

حبسه بالغرفة والطفل يصرخ يريد يطلع

وهو قفل دخل لغرفته وقفل الباب عليهم 

-شويه ودخل علينا الحجي أبوها 

وأخوها علاء ،،

-عاد خلت وصعدت فوك 

وامي صعدت نزلت اسلام 

صوته طبك من البجي والصريخ

-صعدت عليها لكيتها تشهك وتبجي 

حاول أسكتها أهديها ماكو 

بس تكول /بسيطة اني أعلمها لهاي الحقيرة 

ما اهتميت الكلامها حقها وكلبها محروك 

-لليل وصلتها لأهلها 

وتعذرت من الحجي ومن الولد على الهوسه الصارت ،، سلمت عليهم وطلعت

-بوجهي لبيت جدي سليم وعزمتهم على 

يوم الخميس يروحون ويايه 

-رجعت للبيت أبويه بلغ كل عمامي ،،وعمامه

وأولادهم وخبر الكل نمشي على فرح 

-عمي نوري كال/ خلي يعدي فد شهر على سالفة طلاكها 

بس ابوي مارضى وسولفله عن هوسة رفل

كاله/خلي ألملم السالفة لا تروح رفل تتخبل وتفضح البنية 

-رحنا بيوم الخميس من الصبح 

وكلبي يدك وأخيرا راح أشوف فرح روحي 

هي نفسها لو متغيرة ،،شكثر مشتاقلها

فرح /ما اعرف شنو أحساسي بهذا اليوم 

شعور مخربط 

يعني فرحانة لان تحدد مصيري ومجروم روحي راح يستر على حالي

ويمكن فرحت حالي حال أي بنية راح تزوج 

-عمه هناء بس سرحت شعري وتركته مفتوح على طوله ، وخلتلي كحلة بطن عيني وحمرة 

ولبست فستان ماروني وبي وردة بيضة ناعمة مستور من مخلع

-أنجمعوا كل عمامنا 

وامي فاطمة وعماتي وخالاتي كلساع وحده تهلهل

بعد ما قروا الفاتحة 

عمه هناء كالت//كومي للغرفة الجوه حتى يجي للشيخ ويعقدلكم

-جودرتني بقماش جبير يغطيني من فوك ليجوه وردي فاتح 

وبالاطراف مالته داير مدايره دانتيل أبيض

ومن أربع جهات مطرزين عليه اسماء الله الحسنى

هاي كل بنيه نعقدلها من ألاقرباء يجودروها بهذا القماش

-سمعت صوت غريب عرفته الشيخ 

وصوت محمود 

واركان 

وابويه عادل 

وعمي نوري 

وعمي محمد 

وعمي احمد 

وابويه باسم 

والنسوان هن اصلان موجودات

لو عاقديلي بالهول مو أحسن 

-بده الشيخ يحجي بصيغة العقد 

أنطيته موافقتي 

وانوب كمل ويه محمود 

وكمل عقدنا وباركلنا 

والهلاهل شعلت الدنيا 

-طلع الشيخ ،،والكل تباركوا ،،واسمع صوت أركان

اركان/فروحة بالمبارك عليج العقد 

أني أخيج أبو اسلام 

لا تشيل هم هاي الدنيا واني حزام ظهرج

ترى أني هسه أخوج مو أخو محمود 

ولو يوم من الايام عال بيج أجنزه الج من البوكسات 

فرح/كمت أضحك ،،حتى ماريدت عليه 

بس كتله أشكرك 

اركان/شكر لتواجدكم ،،ماقصرتوا 

من رخصتكم جميعا ،،

أخويه يريد يشوف مريته

-طردت الكل من الغرفه ،،

بحجة الضحك والشقى وطبكت الباب عليهم 

شكو واكفين شنو كطاعين طرق 

محمود/صحت وراه 

أركان مشكور يخوي مردودة الك هاي الحركة اردها الك بيوم عرسك 

اركان/رجعت وفتح الباب عليهم 

واصل شكرك ،،عود اطلع بسرعه لا طول 

و تذكر وراك عرس بعد ،،

غمزتله وطبكت الباب

محمود/كلبي يدك بقوة وشغل فرقة العزف 

عبالك أول مره أكعد ويه مره وحدنه

فرح/أختنكت من الحر ،،حمسني البركع

شلته من وجهي ،،ومحمود ساعدني وخرته عني 

رحت وكفت بحلك المبرده أريد هوى بارد 

روحي ماعت من الحر 

محمود/خررررب لشتك عمي باسم 

شعندك بخت يم ربك استغفر الله 

ويرزقك بهيج نماذج 

-نزعت البركع لو اني خربت 

شهل جمال العيون مكحلة تمرعد تمرعد 

وحلكها دورة محبس 

وشعرها ليل ونازل على الظهر 

-شو هاي تركتني كاعد وراحت للمبردة 

من أشتعلت أصفاحج على هاي الدكو 

حتى أستحيت أكوم وراها ،،

صدك مخبلة ونفس سوالفها ماتغير عقلها 

بس كبرت وحلوت زيادة

فرح/بس بردت وأخذت هوى بارد

لو ينجمع الهوى بشيشه والله أجمعه

-رجعت كعدت يمه 

بس عادي مخجلانة من عنده

أحس نفس شعور قبل تجاهه من جنا صغار 

ارتاح بوجوده وأكيف بشوفته من يكعد يمي

محمود/اني منتظر هاي اللحظة من يوم العرفت شنو الحب وجع الحب 

اريد بس أحضنها حتى أصدك هي صارت أليه 

-بس كعدت يمي جريتها عليه ،،

وحظنها بس شنو حظن قوي ،،

أريد أصدك هي صارت مالتي

مرتي 

فرح/ااااخ محمود وجعتني حباب 

طبكت ظلوعي 

محمود/لا هاي مو خوش سوالف

لا تسولفين كدامي هيج كلمات 

لان أخاف عليج من خبالاتي

فرح/وخرت من حظنه ،،هو دنك بوسني

خررررب أريد أدفعه ما اكدر انوب معت بيده

شو هاي البوسة حلوة ،،هواي حبيتها 

بس مو نفس ما بوسني مخلد 

ياا شكد عيب وليش كاعدة أقارن 

-هنا تخربطت كل مشاعري ،،

صدك أستحيت من عنده

-وانوب ضم وجهه بركبتي ،،

دفعته لان كل جسمي كام يرجف ،،

مستحى وخجل ،اول مره هيج يصير ويايه

وهو تخبل بالزايد يبوسني بلهفه أشتياق

فاطمه/يمه محمود عمامك يردون يسلمون عليك 

ويباركولك ،،تعال أطلع 

فرح/خرررب حظ بليس ،،عفية محمود 

أمي فاطمة تصيح عليك 

محمود/أششششش أتركيهم مالج دخل بيهم 

خليني مسلطن على هذا الجمال الكدامي 

يولي أمج متنسيه بيج شگر لمه 

أركان/ابووووو شكرية يمعووود الزلم منتظرينك يابه بعد هي الك صارت 

مراح تخلص اطلع 

محمود/بعد مابيها مجال مو مال اجلب بعد 

لازم أطلعلهم 

فرح/يالله شكد عيب ،،ماادري ليش

حسيت الكل الموجودين بره يعرفون 

ان محمود كاعد يبوسني ،،هواي خجلت

-طفرت ورحت للمرايا عدلت شعري 

وجددت حمرتي 

واخذت كلينكس مسحت حلكه مطبوعه بي الحمره وطلعنا سويه ،،وكلها كامت تهلهل 

هو راح يم الزلم ،،وأني كعدت يم النسوان

هاله/هااا القزمة شو طولتوا جوه

فرح/انجبي بس كعدنا وسولفنا شويه

هاله/اي واضح من هذا جوه أذنج

ولج هاي الفترة تصير احلى فترة 

اني ورافد عدنه احلى شي 

فرح/يااا شو طالعة عينج 

وصايره تسولفين سوالف مال كبار 

هاله/غير تربات رافد 

فرح/كمت أضحك على سوالفها

للمغرب الكل راحو ،،

بقوا بس بيت ابويه عادل

-ابويه باسم ومحمود وابويه عادل أتفقوا 

الاسبوع الجاي عقد المحكمة 

والاسبوع البعده حفلة النيشان وتلبيس الذهب

والاسبوع البعده الزفة 

-صدك ركضت الايام بسرعة 

وصادف شلون حر يموع البسمار بالباب 

-الحمد لله عقدنه محكمة ،،

ورجعنا للبيت ،، الكل باركلنا 

-امي فاطمة كالت// انتي تشترين الذهب

لو أني أجيبه الج 

كتلها// انتي على أختيارج

-الاسبوع البعده صارت حفلة النيشان 

ولبسني محمود الذهب 

أمي فاطمة ماقصرت ويايه جايبتلي خوش ذهب صياغة وشكل 

صارت الحفلة بيناتنا 

-وراها كامت عمه هناء يومية تطلع ويايه للسوك أشتري وأجهز للعرس 

وأخذت أمي ورحت للكاظمية هم جهزت 

وشغلات البيت اني خطيتها

-صار يوم الحنة حفلة حلوة ومرتبة 

وكل النسوان أقربائي والجيران موجودات

-صح سمعت كلام غثني بس طنشته

كافي أسمع وأحرك بروحي حرك 

حلوك الوادم مايسدها غير التراب 

-بس جنت خايفه من شي واحد 

هي شريجتي رفل شلون راح أعيش وياها

أركان/فرحان لأخوي وظلعي أبو شكرية 

هاي القسمة المفروض من الاول تصير 

بس بعد حكمة الله فوق كل شي 

-شفت محمود حتى نفسيته تغيرت 

وبس يضحك والدنيا زهت بعيونه

-الغرفة الجوه بصف غرفة امي جانت مخزن 

صفينا غراضها شي بالسطح ،،وشي بالمنور ،،

وشي النحتاجه جوه الدرج

-فزعت جماعتي ،،صبغنه البيت من جديد 

-وغرفه فرح صديقي جندي 

وخوش شاب وهو اصلا صباغ 

كال خلوها عليه اني أصبغها بمزاجي

أشتغل بيها يومين ،،صدك شغله خرافي

-اشترينا غرفة اخشاب جديدة من الصالحية ونصبناها 

وامي وخالاتي يركضن ويعدلن

-رفل من يوم وداها محمود لأهلها بعد مارجعت بهاي المدة مرتاحين من النگ والصوت العالي وأشتغلنا براحتنا 

-اليوم حنة أبو شكرية 

يا يابه الفرحة العنده يوزعها على كل أهل بغداد وماتخلص 

-والحلو حجي نافع وعلاء وخالد 

اجوي بالحنه وركضوا ويانه وساعدونه

-الحجي يكول لابوي //خوتنا أقوى من سالفة نسوان ،، أخوان رفل ماقصر بوكفتهم

-اليوم زفة ظلعي من حبيبتة الطفولة 

وعشق الصغر 

-طلعت وحجزتله بفندق بابل 

أحسن من دوخه البيت 

-واعرف جماعتنا يكعدوله بالباب 

وتعال شوفنا النيشان وهل سوالف التعبانة

-وكلساع وصاحوا عليه ،،لو يدكون الباب عليهم 

يابه شنو مطلعله وحده ك..... ،،وكلساع صحتوا أطلع 

عبالك خلص وقتهم ،،ترى مو وضعيه هاي

-زروقنه السيارات وأخذنه فرقه موسيقية وطلعنه للمحموديه .......

اترككم في أمان الله وحفظه 

وأنتظروني في الحلقة القادمة 

--------

شكرا لزيارتكم عالم روايات سكيرهوم