رواية قصة وجدان الفصل السابع عشر 17 بقلم انين الليل

عاصف

ام بدر // شني جايبهم اهنا

هزيت راسي :: اي يمه رايج وين اوديهم

خرطت خدها // يبووي يمه بخيرهم ما خيروني وبشرهم عمو عليه سعدي شنو محصولي منه لو ناسي

اتنفست بعمق ونفخت// يمه البنيه واخوها ما الهم احد بس الله واحنه شني ترديني اعوفهم واصير سالفه بحلوك الناس

     هزت ايدها بتساؤل // والنسوان يابني ؟

لملمت حلگي :: تدرين بيه اكبر مره مو بعيني وما تهمني

اتحسرت // ادري واعرفنك زين بس خايفه اعليك

:: لا تخافيين انتي وابوي الله يرحمه التدرون بيه شني انا

باوعتلي وعيونها مليانه دموع والعبره متكسره بصدرها //ادري وابوك مات وهو راضي عنك

اتقربت منها وبست راسها :: وانتي حجيه

  صارن شفايفها يرجفن وعيونها انملت دموع // انا كوه صابره وكاظه روحي الخاطرك

   نفخت دخان الجكاره الي ما تفارك حلگي :: وهم الخاطري البنيه واخوها ما الهم ذنب اتحميلهم يمه ذوله دمنا ولحمنا

اتحسرت // كل عمرك من انت هلكدك (اتلم باصابعها ) وانت شايل همنا وناسي روحك الدفنتها بايدك وهسه شايل

هم بت سعدي وابنه

:: الله كريم يمه الله موجود وما طوول انتي وابوي راضيين عني هذا الشي كافي عليه وزايد

اهنا اجه صوت مهدي // مساكم الله بالخير

هلا بيك

وينها بت ابنج شو ما اشوفها

امي //شبيك مهدي شتريد من اليتيمه

يمه ما بچذب سلمت عليه وحبتني ما چني عمها

انصاف تگول البت مخلوسه وما تحچي بس كل ساع تكتل بروحها وتصيح اريد امي اريد امي

يمعوده عياره

باوعتله :: هسه مهدي شلك بهالحجي البنيه الله يساعدها اخوانها وامها شتريد تتحمل

امي دنكت وهي تدمدم // بيت وانطفى خايب اسعيد ليش هيج

:: كافي حجيه ضغطج مو زين عليج

مهدي // اكلك عاصف انصاف تكول هي ما رادت تجي والسانها دلع تكول خلوني اهناك

  :: ايي

شني ايي ما طولها ما تريد تجي عايفها يم بيت عمي كاظم

:: لا باالله

اي وداعتك چا شعليها اهناك يم بيت كر...

  قاطعته وانا رافع ايدي :: بسك كافي

عود شني

  :: مهدي انت اطلع منها انت شايل ايدك منهم خير شر

هز راسه // اي شايل ايدي

:: هذا هو مالك شغل بالبنيه واخوها

وانا شكلت متعلمه على ديرتها خليها

    :: اي ليش لا اخليلي شابه وياها فرخ جاهل اعوفهم بنص بغداد يم بيت عم ابوها وبيت جدها ذااك حده شني

خويه تريد الناس تخلينه علج بحلكها

  مهدي // مو هي تتبچبچ وتريد اتظل چان خليتها هناك يم بنات رحيم يم بنات كريم

:: وليش ما تبقى اهنا حالها من حال بناتك وحال فرح لو هي وحد

   - - مو وحد بس هي اربات بغداد

  :: واربات بغداد من ما يظل الها احد هناك ما اعوفها اامنها عد الناس عود ذاك الوكت من ما تصير عدي غيره اعوفها واجي

اجه بهاء //. شكو شصاير

مهدي //ما صاير شي

شني ما صاير شي حجيكم واصل للمشروع

  رجاء // عمك مهدي يكول لو مخلين الفرخه هي واخوها ابيت حجي كاظم وعاصف ما قبل

  بهاء // طبعا لا شنو تبقى عد الناس وبيت جدها موجود البنيه واخوها حالهم من حالي

رجاء //. بهاء هذا بيت جدك وابوك

امي بحده // وهم بيت جدها وابوها وما طولني عدله الكلمه الي والعاصف والما يعجبه بكيفه وروحي صبي غدا

وصيحي للبنات

باوعت البهاء// وين الوليد

جده طلع بالبستان

لا يتيه لو يروح يم الشط روح جيبه

هز راسه وطلع باوعتلي :: كافي يمه بس تسحك جكاير شيظل بيك

اجه بهاء ويا علي الي كعد بصفي ومهدي كله // ها عمي تره انا عمك شو بس يم عاصف تكعد

  (. ) ل لان عم ( )ي

مهدي // ها وعاصف ما كالك انا هم عمك

::شبيك مهدي بابا علي هذا عمك مهدي حاله من حالي

رجاء جابت الصينيه خلتها كدام الحجيه وكدامي وباوعت الفرح وكالت //. اخذي بت عمج وروحن للمطبخ هسه اجي واصب الجن

جاوبتها :: روحي جيبي سفره وصبيلهن ويانه

رجاء فتحت عيونها امي ردت // شني ما سمعتي

  رجاء // لا سمعت عبالي تستحي ما تاكل كدام ابن عمها نسيت ابغداد كلها سوا

الكل سكت وجدان بقت واكفه وامي حركت ايدها الها يعني تعاي راحت وكعدت يمها وعلاوي كام وكعد يم وجدان

بعد ان انا شاورته

فرح راحت للمطبخ وجابت ويه امها الصحون رجاء كعدت يم بهاء وفرح بقت واكفه حاجيتها

  :: اكعدي اتغدي

هي ما جاوبتني الكل استغرب بهاء حاچاها // ما تجيين تاكلين

هي صارت تحجي ودموعها يسبقنها //. ما اريد

  :: ليش تبچيين شبيج

ما بيه شي

  :: ما بيج شي وتبچيين ياهو وياج

حبوبتي بعد ما تريدني مخليه وجدان واخوها بحضنها

رجاء بضحك // يايا وانتي غرتي ما عدج سالفه

خزرتها وكلت :: تعاي اكعدي يم امج واتغدي

رجاء // تحب حبوبتها وتغار عليها

خزرتها وانا احجي ويه رجاء :: وانا ما كلت شي صيحيها تجي يمج وتتغدا

رجاء // تعاي فروحه تعاي حبيبتي بت عمج خطيه امها ماتت ومحد بقالها وهالبيبيتج مخليتها بحضنها

الكل سكت باوعت الهن اثنينهن بحيث فرح كعدت وسكتت اما وجدان فتلقائيا نزلن دموعها امي اتلافت الموقف

- - مهدي شني ما متغدي

- - لا متغدي بس يمه الاكل وياج اله طعم

- - خوش بلكت يوم تجيب مرتك وتطبخ ابدال اختها وناكل هم نضوك طبخ مرتك وهم تستذوقه وياي

الكل ابتسم بس وجدان بقت مدنكه والخاشوكه بيدها وامي صارت تخليلها دجاج كدامها وكدام علاوي وتكللها

-اكلي حبوبه اتغدي وانت جده علاوي اريدك تاكل الماعون كله حتى تصير رجال وعليك المعتمد

اشوفها تشيل بالخاشوكه شويه تمن يمكن الحبابي ينحسبن وتاكل امي باوعتلي

ليش ما تاكل

:: ما اشتهي

جاي من درب بعيد

:: شنو يمه ملزوم عليه شبعان

تستمر القصة أدناه

  الكل سكت وجدان عافت الخاشوكه وشربت كلاص لبن وبقت كاعده ما اكلت يمكن كل اكلها خاشوكة تمن

بعدها بهاء كال //الحمد لله وراح ايغسل ورا مهدي امي باوعت الها /=ليش ما اكلتي حبوبه

= الحمد لله شبعت

روحي غسلي

گامت وهي حتى ظهرها محني رجاء تلم بالمواعين ومهدي اجه كال // يمه محتاجه شي

ليش عدك سفره

لا حجيه

جا ليش تنشدني

اكول

امي تهز بايدها //خاب مهدي يوميه تنشدني محتاجه شي ولا يوم جبتلي وياك هذا الشي

جا يمه انتي ما توصيني

وهم ما اوصي عاصف

مهدي // حجيه عاصف بيده الخيط والمخيط وانا اخذ مصرفي منه وهو ما مقصر ياالله انا اروح

  بهاء //. ابقى اشرب جاي

  امي // لا الچاي يم نهوده اطيب

حضنها // هههه انتي فاهمتني

مهدي راح ورجاء جابت الجاي سالت وجدان // تردين جاي

هزت راسها بالنفي

  :: روحي بابا نامي وارتاحي

هي باوعتلي انا رفعت راسي :: روحي نامي بغرفة فرح

جاوبتني = عمو علووش هم خلي يجي ينام تعبان من الطريق

:: اي ياالله عمي كووم اصعد فووك نام وارتاح

بهاء // هاي شنو علوش يمي بالغرفه (باوعله ) ها ابو حسين شتكول

هز راسه هي جاوبت = بس هسه اريده يجي يمي

::رووح ويه اختك بابا اصعدي الحجرة فرح وهي شويه وتجي ها ولا تنسين علاج علاوي نزلتي مو

= اي عمو

:: ياالله اصعدي نامي وارتاحي

لزمت اخوها وطلعت باوعت البهاء :: هاك السويج وروح اغسل السياره

اخذ السويج ومن سمعت شغل السياره باوعت الفرح :: صيحي امج

بالمطبخ تغسل مواعين

:: صيحيها رايدها

   راحت فرح واجت هي ورجاء وانا نفخت الدخان وحاچيتها :: اكلج بابا فرح شنو سبب هاي الدراما الي سويتيها

   بلعت ريكها // شنو بابا

  : ها شنو ؟

وگفت واتقربت من رجاء وانا ضام شفتي :: وانتي مو عيب عليج شلها داعي السويتي انتي وبتج

رجاء // ياا انوب عليه انا شسويت

:: ها شسويتي العلمج ادري كلش زين هاي التمثيليه ودموع فرح هاي من جوه راسج تره مو عميان وبعدنا بعقلنا فرح

من صارت لليوم ما كعدت بصف امي بعد شنو داعي هالربربه

رجاء //. انا شعليه هي غارت

هزيت راسي :: ايي مبينه غارت من لمن اگعدي فروحه خطيه بت عمج امها ماتت ولج انتي ما تكبرين

باوعت الفرح :: هالمره سويتيها مره ثانيه حظج اطيحه ياالله روحي يمها واذا ادري مسمعتها لو نص حجايه تعرفيني شسوي

راحت وهي تدرم بس ما عرفت شكالت رجعت كعدت وصرت الم بحلكي وانا مخلي ايدي على رجلي

:: وانتي خاتون هاي كدام امي وجدان حالها من حال بتج

فتحت عيونها ع الاخر :: بعد اذا تردين طكيني

امي //على كيفك عاصف وانتي رجاء البنيه يتيمه مو كل ساع تسمعينها حجايه

  رجاء // عمه تدرون بيه ما اريد اشوفها

    امي // ها وشني رايج وين نوديها

   رفعت اجتافها // ما ادري

حكيت خدي :: بكيفج ام بهاء براحتج الي تردينه يصير من هسه اخذي بتج وروحي للبيت الثاني كامل كل شي ما عوزه

وبساعه اجيب عمال واشتريلج اثاث. ما تردين روحيالبيت مهدي على ما اكملج بيت الج والبتج لو البيت اخوج رحمن

  رجاء // ها تطردني

  امي // لا ما يطردج هذا بيت حجي غازي ومثل ما الابنج حك والبتج حك البنيه واخوهاالهم حك

  رجاء // ها عمه انتي هيج تحجيين وتدافعيين

امي تهز راسها // اي انا شتردين اعوفلي بت لحمه حمره وين تردين نذب لحمنا بالشوارع

تستمر القصة أدناه

  - - تروح الخوالها

وگفت :: انجبي لا اكفر بيج واخليج فرجه الامة محمد وشوفي بلكي اسمع بيوم مسمعتها انتي لو بتج احچايه اله اندمج

  امي // على كيفك يمه

اتقربت منها :: چان استحيتي انتي ما عليه بيج بس ذيج المتسميه بااسمي المفروض تجامل بت عمها وتلبس اسود

  رجاء // تريدها تلبس على مرت سعدي

  :: اي وشكو بيها وابن عمها الماصارله اسبوعين

   - - ما عليه منك البتك

   :: هم صدك مني البتي

اخذت جگايري وطلعت رحت للبراني بس هالمره اتعمدت اعبر من وره البيت عندي فضول اسمع رجاء شتحجي ويه امي

الي اتگللها // شبيج عمه ليش خليتي يصير عصبي

عمه كله اتدافعيله

مو ادافع له بس السويتي ما يصير

هو شني الما يصير نسيتي هاي بت ياهو بت سعدي

وسعدي مات وامها ماتت ومحد بقالهم بس احنه

عمه ما اريدها ولا اطيق اشوفها

رجاء تره هاي البت الي ما تطيقين تشوفينها حالها من حال بتج فرح

اتخسي تصير مثل بتي

لا تحجيين هيج عيب عليج طفله هيه واخوها يلطم بيهم الوكت

وانا شسويلهم

داريهم الج عد الله

عمه هاي الفرخه هي واخوها مالي غرض بيهم تردين اتدارينها داريها هاي بت ابنج انا اداريها نهيمه التنهمها

امي // اي حگج حگج هيج تحجيين اي اداريها ما طولني عدله وما اخاف عليهم عكب عيني ما طول عاصف موجود

وهم خلي اگلج هذا بيت حجي غازي جدها اول ما هي وتالي بتج وديري بالج اتكطعيين بيها تره ما اسامحج

وانا بايدي احاسبج

  رجاء // دامج تخافين الله هالكد ما تحاجين ابنج يخاف الله بيه

   امي // ولج ابني هو الي يخاف الله وكافي لا تظلين تعيدين ع الخالي بلاش

طلعت رجاء // اي وانا شمحصله دووم انا الغلطانه

  امي // استغفر الله الك بيها اراده ياربي

رحت للبراني وگعدت وصرت ادخن اجه بهاء وكعد يمي

ها انت اهنا

:: اي اجيت

تريد تنام اطلع

:: لا بعدني

صدك لاكاني ابو راشد وابو عباس كالو بالليل يسيرون ياخذون بخاطرنا على مرت عمي

:: هلا بيهم غسلت السياره

اي عمي كملتها

:: عاشت ايدك

باوعت البهاء:: بوجهك حجي شكو

تره عرفت فرح تتعاير وردت اكوم اكسرها

:: غيرة بنات

بهاء // النغوصه ما الها داعي

:: مي خالف حليتها انت روح خليني اناملي ساعه خاف بالليل يجون علينه جماعه وصيهن يحضرن جاي وماي

- صار

راح بهاء وانا اتمددت صرت افكر اجت امي //ها عاصف تريد تنام اروح

كعدت انتچيت على المخده :: لا يانوم

ادري بك ما تنام

صرت ادخن :: ها يمه ؟

والله ما ادري ما رضيت احجي جدام مهدي ورجاء وبهاء

:: عليش ؟

امي صارت تبجي :: ها حجيه عليمن تبچيين

مسحت دموعها وتحرك بيدها // مدري على المره الراحت بعز شبابها لو ع الفرخه البس فاكه عيونها لو ع الولد المسجون

:: كله منه هو هو السبب

مقدر ومكتوب ياابني مقدر ومكتوب

:: اي مقدر ومكتوب على هاي الطفله واخوها شفتيها حتى گعده بالكاع ما تدبر

الهم الله ياابني الهم الله

نزلن دموعي وانا احاول ان ما ابين حزني لكن صرت ابجي وصوت نحيبي انسمع امي حضنتني وگالت

- - ابچي يمه لاتحبس عبرتك بصدرك ابجي واحجيلي

تدري بيه ما ارتاح اله اسولف وياها واسولف الها كل شي وهي مره تبجي ومره اتعاتب بسعدي

امي مره قويه هواي اتحملت مصاعب بالحياة ويه ابوي والي يشوفها يكول عنها قاسيه وفعلا مرات اشوفها جبل ما ينهد

ومرات اشوفها كلها طيبه وحنيه

بقينه بالديوان البراني للمغرب لمن ما كالت // گوم يمه اتوضى وصلي ودور يمي اكلك لكمه خافن يجونك جماعه

هزيت راسي هي راحت وانا فتت للحمام اتوضيت وصليت من كملت صلاتي درت للبيت لگيت امي كاعده

والسبحه بايدها گعدت يمها واجت رجاء وكالت // اصب العشا

امي ردت عليها /= اي صيحي للبنات

رجاء // فرح من يمته نزلت تساعدني بس ذيج البنيه اظن بعدهي نايمه

- - ودي عليها فرح خلي تندهها

اتنفست بعمق ولمت شفايفها وراحت اسمع فرح تدرم // شنو ياصاعده يانازله ما صارت هاي

رجاء وكانما تتعمد اتسمعنا // انچبي وصعدي لا يكولون انا گايلتلج هيج تحچين موعوزي مسبه.

ما رديت عليها نزلت فرح وهي تگول لگيتها تصلي واخوها نايم

جابن العشا الغرفة امي واجه بهاء انا گمت من مكاني ورحت صعدت الغرفة فرح دخلت بعد ان دگيت الباب

ومحد جاوبني شفتها گاعده على سجادة الصلاة وعلي متمدد ع الجربايه باوعتله واتقربت يمه وانا ابتسم حاجيته

ياالله يابطل انزل يم حبوبتك للغرفه

شلته نزلته من الجربايه صار يباوع الاخته هزيتله راسي يعني انزل وهي تجي هوو نزل وانا اتقربت منها او خلي

نگول گعدت بصفها شفتها گاعده تبجي سالتها

:: كملتي صلا

هي ما انطتني اي ردة فعل حاجيتها :: تقبل الله وياالله خلي ننزل حبوبتج رايدتج وصبو عشا

صارن بس شفايفها يرجفن اتنفست بعمق :: ما يصير انتي لازم تقبلين بلي صار لان ما نكدر انبدله ومو كل

ساع لازم اذكرج انو انتي صرتي مسؤوله عن اخوج وحتى عن نفسج صحيح انتي هسه ابيت جدج بس انتي ما متقبله

وجودج وبنفس الوقت لازم تتعايشين بالواقع الي انفرض عليج

:: اعرف وحاس بيج انتي جاي اتعانين بس لازم اتعرفين شي واحد انو كل الناس كل الناس هم عدهم معاناة واكيد كل

واحد معاناته تختلف عن الثاني لكن الكل يحاول يتغلب على الشي الي انفرض علي وانتي وحده من هاي الناس ولازم

تحاولين تتغلبين على معاناتج وظروفج الي انفرضت عليج واذا تبقيين هالشكل صدكي ما راح تتقدمين خطوه

رفعت راسها ودموعها ماليات عيونها :: لازم اتفهمين البجي ما راح يغير شي بالعكس راح ايبقييج حزينه واتاذين

كل الناس الي يحبوج وما راح تتقدمين لو خطوه ( مديت ايدي ) ياالله بابا كومي اتعشي

ما انطتني ايدها وگفت عدلت شالها هزيت الها راسي وابتسمت :: غسلي وجهج وتعالي بحجرة حبوبتج ولا تنسين

الكلام الي گلته الج اسمعي كلامها وانا بظهرج اي شي تردينه اطلبي مني

لمت السجاده وراحت غسلت بالمغسله وانا نزلت قبلها شفت مهدي ومرته

  :: السلام عليكم

مهدي // عليكم السلام

نهاد // هلا ابو فرح شلونك

هلا

نهاد // الحمد لله ع السلامه والبقيه بحياتك

بحياتج الباقيه

مهدي //. اشلونك عاصف

:: بخير الله يسلمك

اجت وجدان وكفت بالباب امي كالت الها // تعاي جده سلمي على عمتج

هي حجت بصوت واطي //. السلام عليكم

نهاد //. عليكم السلام تعاي احبيبه خلي ابوسج

راحت يمها //. هلا بيج ياروحي

امي گالت //. تعاي يمي اگعدي

صارت فرح تجيب بالصحون هي وامها ومبين عليها الانزعاج نهاد گالت //. شبيها فرحه ليش زعلانه

رجاء //. ما بيها شي

نهاد // يا ههه مهدي گلي خاله فروحه لاتضوجين معزة اليتيم بس اول سنه انتي الاصل ولا يهمج

الكل سكت بيبي هزت ايدها //. لو ماحاجيه اشرفلج عود هسه انتي سويتي الجويده

نهاد // ليش عمه شبيه

خايبه شمالج ما تعرفين تحچيين

يا وانا شگلت

لا ما كلتي شي

چا ليش عمه اتكليلي لو ساكته احسنلي

ماكو شي ياالله الما متعشي يتدنى ياكل

گعدت يم امي وعلي بصفها وانا كعدت بصفحة امي الثانيه ويمي مهدي وبهاء ورجاء ومقابيلنه ونهاد وفرح

العشا مخلمة لحم ومكليه بتيته وطماطه ولوبيا وچاي الي يريد اتصبله نهاد امي حچت ويه وجدان

اكلي ياحبوبه انتي ما تغدبتي

هزت راسها واخذت نص خبزه وخلت بيها شويه مخلمه وشويه بتيته وانطيتها العلاوي الي اخذها والنص الثاني

سويت الها لفه

بهاء گال //. هاي شنو هاي

مهدي //. همه هيج اهل الولايه كاظينها لفات

لا مو قبول علاوي بس اليوم تاكل لفتك من باجر تاكل مثلنه

امي //. خلي بكيفه شيريد ياكل

بهاء // لا حبوبه انتم ما عليكم علاوي حصتي ( باوع العاصف ) ها عمي شتگول

:: خلي ناكل ونكمل منا وهيج يجون علينه ناس

الكل سكت وانا ما كملت اللفه بيبي گالت /. ليش ما تاكلين

جاوبتها بدون صوت = الحمد لله

نهاد // شني عصفور

امي // بكيفها يمته ما تريد تاكل

نهاد //بس هيج تتعب وما بيها حيل ال كل شي

امي // عاصف ايكول نادره وبساع تتعلم وتسوي جاي طيب

ما بدر منها اي تجاوب كملت :: الحمد لله

فتت اغسل وراي مهدي وبعدها لمو السفره جابو الجاي وصبو نهاد سالت // البنيه هي واخوها تنام بحجرة فرح

امي جاوبت /. لا يمي

عمه وين

اهنا بهاي الحجره

جا ليش مو حجرة فروحه جبيره او واسعه

لا هم حجرتي چبيره وتگعد وياي

مهدي وهو يحرك بايده // شني يمه غير نجي ونگعد ونسولف

اي تعال ياهو كاظك اكعد بالهول

شني حجيه غير ولدي يجون متعلمين عليج

هلا بيهم وجدان يمي ولدك من يجوني يسلمون ويگعدون بالهول

نهاد // عمه ما ترهم يتشاقون وياج ويتعللون

امي // هو شني الما ترهم وجدان حالها من حال فرح من يجون اولادكم لو ساره من تجي وياكم مفرعه فرح

من يجون الولد مفرعه

ردت نهاد // لا

امي // هذا هو وجدان حالها من حال بناتكم

تستمر القصة أدناه

نهاد // عمه بنات الولايه مفرعات

ليش انتي شفتيها مفرعه

غير حزينه على ابوها واخوها

جاوبتها = لا اني محجبه حتى اسالي عمو عاصف

امي // ها سمعتي

مهدي // چا ليش يمه خليها ويه فرح

امي بنتر // اريدها يمي افتهمو

الكل سكت وشربو چاي مهدي كال سوون چاي زين هسه يجونه زلم (باوع العاصف ) ها عاصف ويبدون

جاوبته بهدوء //. شني يبدوون

ياخي ما شفت لو انت ما اجيت من رجعنا من فاتحة رامي كل اليشوفني يسلم عليه وينشد شلون مات وليش كتله

وخاف شايف شي

جاوبه بنفس هدوىه :: هاي الناس ما عدها بس الحجي

نهاد //. هم صدك عود ليش اتكاتلو

ما جاوبناها اكتفيت خزرتها حاجيت مهدي

  :: شوف ابو محمد احنه ما ملزمين انبرر للناس اي شي اولاد اخونه اتكاتلو والشيطان دخل بيناتهم واحد انكتل

والثاني بالسجن لاتظل تحچي وياهم بالموضوع ما محتاجين احد يبدي رايه لان اصلا محد وكف ويانه لو سأل

مهدي // انت ما تدري بيهم ليليه يجون وينشدون

ادري بس هم ادري محد اجه وكال شخسرتو بالفاتحه حاضرين وياكم عدكم ولد بالسجن شنو وضعه شراح تسوون

امي // احنه ابختكم هي الناس شعدها بس كال فلان وحجى علتان

باوعت النهاد :: روحي جيبي جاي وخلي ايحضرن جاي وماي هسه تجينه عالم

  راحت نهاد للمطبخ غابت شويه واجت فرح جايبه استكاين جاي اربعه كل واحد اخذ استكان

  حاچيتها :: فوتي صبي كوبين چاي الاختج واخوج

  - - اي بابا هسه

راحت وجابت كوبين وخلتهن كبالي انا اخذت كوب وانطيت العلي كوب ثاني بهاء گال

لا مو قبول علاوي بعد اتصبوله باستكان حاله من حالنه

مهدي همه متعلمين هيج

مي خالف حتى لو متعلم اهنا هم يتعلم

وكفت اخذت الجكاير والموبايل :: اذا كملتو ع الكوابه والاستكانات الحكوني

//////...//////...//////

وجدان

من اجينه ويه عمو عاصف وتركنا البيت الي عشنا بي والي شهد على خوف وحزن على مدار سنوات وابد ابد

ما حسيت بي بالامان لكن يبقى بيتنا الي عشنا بي

من اجيت ويه عمو واني احس بخوف وقلق واتساءل شلون راح ايعاملوني وشلون واني اتقبلهم

واكثر شي خوفني كلام ام كرار من كالت شلون تتجسرين على عمج هذا محد يحجي ويا

هواي تصورات بذهني واولهن خوفي من بيبي ام ابوي لان اتذكرها من اتوفى جدي شلون ما قبلت ابويه يجي يسلم عليها

ومره ثانيه من رحنه ويه ماما تسال ع البيت وكيف كانت معاملتها جافه لكن هماتين ما انسى شلون شفتها تبجي

على ماما بفاتحة رامي

واني بالسياره احجي ويه نفسي =. هذا صار واقع حال واني لازم اتعايش اقلها انتظر هشام يطلع وبعدها اكيد راح

يصير النه حل

ومن وصلت البيت جدي كنت مو بس خايفه لا خايفه ومرتبكه لان اني ما شايفتهم ولا عايشه وياهم

وصلت وانا اشوف بوجه عمي مهدي الكره وزاد خوفي لكن اتفاجآت بتصرف بيبي اتجاهي حسيت بحنيتها

واني احضنها وابجي

واتعرفت على بنت عمي عاصف الي كان اسمها فرح وامها رجاء الي بينت امتعاضها من وجودي وكثر استغرابي

من شفت عمه رجاء وبنتها ما لابسات اسود اقلها مجامله الي

وشفت نهاد الي تكون اختها الرجاء والي متزوجها عمو مهدي وهاي من اول لحظه حسيت بيها خبيثه من خلال نظراتها الي

وكلامها الي من تحجي تحاول تزينه بقالب من الاستهزاء مره والابتسامه ومره ثانيه تخلي اليسمع يضحك

لاحظت بيبي وعمو عاصف ما يرتاحون الوجودها ما اعرف يجوز يطلع احساسي غلط

من سالت نهاد تعقيبا على كلام زوجها // همه ليش اتكاتلو

دنگت ما جاوبتها بيبي گالت // گومي بيبي كضي ايدي خلي نروح انغسل

لزمت ايدها واخذتها للمغسله غسلت ودارت عليه حاچتني

اسمعيني جده هذا بيت جدج يعني مثل ماهو بيت بهاء وفرح هذا هم بيتج وشني تردين اكل شرب اخذي بدون

ما تگولين الاي احد وهسه روحي للمخزن

باوعت الها بتساؤل اشرت بايدها // شوفي مو ذاك المطبخ بي باب ثاني افتحي تلكين المخزن كل شي بي

روحي وطلعي صابونه ادري بيج ما تعرفين تغسلين بصابونه احد مغسل بيها

بقيت واگفه بيبي گالت النهاد لان شافتها واكفه ورانه //. ها انتي واكفه ورانه

نهاد. //. اي عمه اجيت اغسل

دروحي طلعيلها صابونه من المخزن

راحت نهاد تجيبلي صابونه وبيبي راحت الغرفتها انطتني نهاد الصابونه غسلت بيها وغسلت وجهي

ونهاد تباوعلي من ردت اروح الغرفة گالت

يا هاي شبيها حتى شكرا ما كالتلي

ما رديت عليها لان ما ارتاحييت الها رجعت وسمعت عاصف يحاجي بمهدي على اخوتي ويفهمه ما ينطي

للناس مجال من يسالون

وشفتهم شلون فلت وجههم ( مهدي وبهاء ). لمن عمو عاصف كللهم على الاستكانات والكوابه

  طلع وهمه راحو ورا بقيت ساكته والكوب بايدي رجع بهاءگال // علاوي تعال وياي عمي عاصف يگول

باوعلي هزيت راسي بيبي كالت // علي جده من يودي عليك عمك عاصف تنهض ما تباوع الاختك

نهاد // عمه لا تحجيين هيج خاف اخته ما ترضى

باوعت الها بيبي وما جاوبت اجت رجاء وگعدت وهي بايدها كوب جاي فرح كالت الامها // حتى وجدان تشرب بكوب

هي ما جاوبت احس بيها ما تطيقني نهاد سالتني // هسه اخوج درا باامج ماتت

دنكت بدون ما اجاوبها رجاء گالت //.من احد ينشدج ردي لا تغلسين

  بيبي جاوبت بدل عني // مو من ساع سمعتني من مهدي نشد عاصف كله الولد دراباامه يو بعده

    نهاد هزت راسها // لاعمه انا ما سمعته

بيبي // هاي رجاء چانت كاعده خلي اكلج نهوده تره انا ادري بمهدي يحچيلج كل شي وادري بيج ما تخلينه ايدش

للبيت اله اتقررينه على كل زغيره وجبيره وخلي ابرد ال ... اه الولد بعده ما سامع باامه وعاصف متاني المحامي

يخابره ويروحون ايگلوله

باوعت البيبي = اريد اروح ويه عمو اشوف اخويه حبابه

نهاد. وهي تضحك // يا يا شني هاي حبابه گولي حبوبه

بيبي خزرت نهاد // اكلج ست نهاد مو تشوفين روحج من اجيتي الهسه وانتي بس اتصنفين وتتمضحكين انتي.

واختج تره الرايح من عدنا مو طير دجاج ولد اشبيب ومره بعدهي بحيلها كافي حسي على روحج

رجاء // انا شعليه خليتيني بالوسطه شني من ذول من ذول

 

بيبي // اي اخليج تسمعين. وتشوفين اختج تسهك وتتنشد وتضحك وانتي ساكته وتضحكين

  رجاء // عمه انا مالي غرض شني عم ولد خال ولد

اجه بهاء وكال // وينه الجاي

  رجاء // حضرته ع الكاونتر

نهاد باستهزاء // منا وغادي وجدان تسوي الچاي مو منساع عمتي تحمد بچايها

بيبي // اي تسوي الچاي وتشتغل حالها من حال فرح لا اكثر ولا اقل

الكل بقى ساكت ونهاد كالت // انااروح

بيبي حاچتها // عود خلي بناتج يجن يم بت عمهن. يشوفنها ويتعرفن بيها ويسلمن عليها

اي ان شاالله تصبحون على خير

بيبي //. هلا بيج

طلعت عمه نهاد وياها رجاء وفرح وكفن اباب الغرفه نهاد تحچي وغايتها اتسمع //. اكلج عود عمتي شدعوه عليها

هيج وياي شنو ه انا شكلت

  رجاء // چيفن تنشدين بالبت

  نهاد // واذا نشدتها شني طاحن دلاليعها لو سبيت العنب ما ادري هاكثر تحب سعدي وبزره

بيبي // نهاد لا تسمعين وتكثرين بالحچي الولد. ابني وبزره حالهم من حال بزرج وبزر اختج

نهاد //. عمه انتي ما ادري ليش متواتبه وياي

  بيبي\\عمن ما تعرفين تحجيين

خلف الله عليج انا شگلت

  بيبي // ما گلتي شي بس ما تعرفين تحچيين

  نهاد// يا چيفن گلت عمتي تخاف على بت ابنها

   هزت راسها // اي اخاف عليها وحجي زايد ما اسمع وروحي البيتج لا اگوم اكسرج بالعوجيه وانتن رجيوه انتي وبتج

امشن منا لا تعرفني شسوي

شفتهن اتفرقن بسرعه ورغم ابتسمت بيني وبين نفسي بس عرفت انو انا ما مرغوب بيه من رجاء ونهاد ومهدي وفرح

ويمكن حتى بيبي. الي ما اعرف ليش هالشكل تحجي وتدافع عني

  اجت رجاء // عمه رايحه انام رايده شي

   - - طيحي فراشات للبنيه واخوها

  -منين ؟

اشرت على البوفيه مالتها // منا

ما جاوبت نزلت من بوفية بيبي فراشين جدد وفرشتهن بيبي اشرتلي وكالت هذا فراشج اهنا تنامين واخوج يمج اهدومج

بعدهن بالسياره من ينزلونهن اخذي هاي الخانه (اشرتلي على خانه بكنتورها ابو البابين ) سفطي بيها اهدوج

هزيت راسي هي اتمددت على جربايتها والسبحه بايدها

اتمددت على فراشي وافكر شلون راح اعيش واتصرف وياهم درت وجهي ونزلن دموعي اشتاقييت البيتنا الي كرهته

والي ما عشت بي بس الخوف والحزن والترقب لكن هناك احس انو هو ملكي واكدر كل شي اسوي بي

غطيت وجهي وصرت افكر شنو الي راح يصير بالمستقبل وشلون اتصرف

اسمع بيبي تستغفر بالسبحه اتذكرت بيبي ام كريم والي گالت تخابر وتسال عني وهاي اني هذا اول يوم الي حتى ما خابرت

ولا سالت عني

سمعت عمه رجاء اجت هي وفرح /. ها عمه نايمه

لا بعدني ليش

هيج والبنيه نامت

اي نامت

فرح //. شعجب جده خليتي وجدان تنام يمج

ليش شبيها ؟

  رجاء //. عمه فرح تكول حبوبتي ليش ما خلتها وياي بالحجره اقلها انا وياها نسولف ونتسلى

   بيبي. // اح حبوبه انتي حجرتج فوك وامج واخوج هم حجرته فوك مو

   فرح // اي جده

- - چا بهاي كون امج اتگلج مايصير

   رجاء // شني الما يصير

  يبي // مايصير وجدان تنام يمج ما طول حجرة اخوج يمج والحمام براني تره وجدان موش اخته بت عمه وهو

محرم عليها مو هيج رجاء

  رجاء // اي عمه صدك

  فرح // شني جده اتخافيين من بهاء

   بيبي بنتر // انجبي ولج مو خوف بس حلال وحرام والسانج گصري تره التمثيليه مالت الظهر كشفتها وعرفت

من جوه راسمن

  رجاء // ها عمه رديتي عليه

   بيبي. // اي ارد عيب السويتنه ابنيه يتيمه ومكسورة الخاطر

رجاء بنتر //. اوو والله انخبصنا يتيمه ويتيمه كلنه ايتام

بيبي // اي صدك كلامج بس يتيم عن يتيم يختلف

   رجاء // عمي بعد ما انشدج شو بس نحجي انا لو بتي ننوكل

   بيبي باستهزاء //ولا تنسين اختج

  رجاء // عمه انا مالي شغل بلتجيبينه وتخلينه وتكعدينه وتطردينه اعتبريني ما موجوده وحتى بتي

بيبي //. لا لهنا وحدج وخليها ترچيه باذنج بتج حالها من حال وجدان وعلي

   رجاء بعصبيه الفرح // اتگومين لو بعدج

   فرح // گايمه اصلا باجر عندي دوام

راحن ايدردمن ورجاء اتكول // منا وهيج نفتحها دار ايتام ههههي هي

راحن وانا ما اتحركت بقيت بمكاني

سمعت صوت عمي عاصف وهو ايكل العلي بصوت ناصي :: نام اهنا

طرق طرق خفيف باصابعه بيبي جاوبته //. اوكف يمه جايتك

راحت وسالته // الوليد راح للحمام

:: اي يمه راح للحمام البراني

عود الصبح نزل اهدومهم

:: اه شلون نسوه

الله يساعدك

   حجى بهمس :: يمته نامت

منساع

:: باجر الصبح اروح اجيب الها چربايه

ها

:: اي البنيه متعوده تنام ع الجربايه وتاكل وهي گاعده على كرسي

بيبي // يمه هسه توانى

  :: ليش ؟

- - ياابني خلي نشوف اخوها ومحكمته بلكي يطلعونه براءه

:: الله يهون علي خليها تنام ولا تكعدوها خليها براحتها

- - خليها شعدها بس اگلك على مود المدرسه

:: ادري شتردين تگولين البنيه لا هي ولا اخوها السنه ايداومون انتي گلتيها نشوف اخوها وهي اساسا

ما تريد اتداوم وانا مخليها براحتها اريد شويه تاخذ ع الوضع وتنسى الي صار وياها

ردت اگعد واكله // مستحييل الي صار وياي انسا مستحيل

///////////////////// /////////////////////

شكرا لزيارتكم عالم روايات سكيرهوم