رواية قصة وجدان الفصل الثامن عشر 18 بقلم انين الليل

بيبي // ياهو اجوكم

:: جماعتنه

وهم نشدوك

:: يمه هي الناس شعدها غير القال والقلت

وانت شكتلهم

:: ما كلت شي الولد ابن اخوي محسوب عليه وانا ملزوم بي

*ذ ذ

:: اووو انتي تعرفينه

اي محتار بنهوده من الله كون يفكنه منها ويفكه

نفخ :: شتسويله يمه عده جهال

چا وشلون

:: الله يحلها لا تحسبين

شلون ما احسب يمه

:: حجيه مو وكته اروح ارتاح

- اتچذب

:: شلون

:: اتچذب انت ما راح ترتاح ادريبك

اتنفس بعمق :: خلي اروح الحجرتي لاتگعد البنيه خليها تنام تصبحين على خير

وانت من اهل الخير

:: ديري بالج عليها

عين الله

بقيت كاعده وافكر وحسيت ابيبي نامت درت على الجهه الثانيه وفتحت عيوني شفت علاوي نايم بقيت گاعده

والي صار ينعاد عليه كل ما صفنت او بقيت ابحدي وهو الي ما مخليني ارتاح حتى من انام

غفييت وسمعت بيبي گعدت راحت للحمام وهي تستغفر ورجعت فرشت سجادتها وصارت اتصلي انتظرت شويه

شفتها بعدهي اتصلي وتدعي وتستغفر

عرفت انو بعدها صلاة الفجر ما صارت ولان ما يمهم مسجد فااكيد ما اسمع الاذان

انتظرت الى ان سمعتها گالت اصلي الفجر قربه الى الله 

انا گمت من فراشي ورحت اتوضييت رجعت انتظرتها تكمل من سلمت باوعتلي واشرت ع الجام خانه وهي تكلي

- - اهنا مصلايه اخذيها

اخذتها وفرشتها وصرت اصلي ومن كملت بيبي كالت // عفيه بتي صلاتج لا تعوفينها تره البشر محد ايفيده بس صلاته

اتخايلت امي والوحشه الي هي بيها ما اتمالكت نفسي صرت ابجي وكفت وصليت ركعتين هديتهن الها وصرت ادعي ربي ان يغفر الها بيبي باوعت الي وكالت

- - كافي بجي اطلبيلها الرحمه

لميت المصلايه ورجعت لفراشي غفييت گعدت باوعت علاوي نايم بس بيبي ما موجوده ما اعرف بيش الساعه كعدت

ورحت للحمام غسلت ورجعت للغرفه بصراحه ما اعرف شسوي ولا اشلون اتصرف اجت بيبي شافتني كاعده

- ها يحبوبه يمته گعدتي

= قبل شويه

- گومي لمي افراشج وتعاي اتريكي

لميت الفراش وخليته بمكانه لان ما اعرف اخلي ع البوفيه گالت // تعاي اتريكي

=. بيبي ما اشتهي

هي اتقربت مني ورافعه اصبعها //. شوفي انا بالبيت محد يكلي لا بس مرات عاصف فنج ليش

ظليت فاتحه عيوني بخوف هي ردت //. لني من احچي الشي كله بي زينيه ومن كلت تعاي اتريگي لن انتي

بنيه حديثه ولازم تتريكين الصبح وتضبين گلبج حتى تتقوين وتگومين الشغلج ومدرستج وتديرين بالج على اخيج

وهسه تعاي وراي

اتذكرت كلام خاله شيماء من اتكلي اسمعي كلام حبوبتج وعمج عرفت انو هذا البيت الكل بي يسمع كلام بيبي وعاصف

راحت تمشي وانا وراها اكو ساعه بالصاله شفتها بالتسعه ونص دخلت للمطبخ كلش كبير بي كاونترات المنيوم تصميمه

عادي بي ثلاجه ومجمده وطباخ مفروش زوليه بسيطه بيبي كالت العمه رجاء // صبيلها ريوك

باوعتلي // ها كعدت

هزت راسها // اي توها كعدت

رجاء //. هذا الريوك بالصينيه

باوعت للصينيه بيها بيضتين سلك وچاي وخلت يمي قندول الشكر وخبز مبين توه مخبوز

بيبي //. ياالله اتريكي

صرت اخوط بالكوب بيبي حاجتني بحده //. كوبج ما بي شكر خليله واتريكي ولا تصفنين تره انا ما ارضى

رجاء بابتسامه // كل شي ولا زعل عمتي اسمعي كلام جدتج تره اذا زعلت عاصف ايشيلنه ،

بيبي // وانتي اتمهزين صدك ايشيلكم

رجاء // اي عمه بختنا من بختج

بيبي باوعت الها صفح // ما عوزج بخت رجاء خلي الفرخه اتريك

رجاء // وانا شكايله خليها تتريك هني ومري

بيبي // شو اختج اليوم ما بينت

- - يجوز عدها شغل

- - حتى لو عدها تجي هي وبناتها ليش ما اجن ايسلمن على بت عمهن

رفعت اكتافها // شمدريني عمه

بيبي // من اتشوفينها گليلها اتجيب بناتها وتجي مو حاضره بس للقال والقيل

اجه صوت نهاد// ياهي هاي انا

بيبي // چا ابوي

نهاد وهي نضحك // يا ليش عمه شمسويه

بيبي // ما جبتي بناتج يسلمن على بت عمهن

نهاد // عمه البارحه عدهن دراسه واليوم راحن للمدرسه عود بالليل يجن قابل بت عمهن شايله شو هالكاعده اهنا

بيبي // اي جيبيهن الظهر خليهن يجن ايتعرفن على ابنية عمهن واتغدو عدنا

نهاد //. دايم البيت واهله

كملت ريوگي ورحت غسلت ومن رجعت نهاد جاي تحجي ويه بيبي

- شني عمه صدك البنيه تبقى اهنا

بيبي هزت راسها // اي چا وين رايچ انخليها

- عود اگول لو تو...

بيبي قاطعتها وحجت بعصبيه // كبلج اختج حجت وخلي اعودلج كلامي خاافن اختج ما وصلته الج هاي الفرخه

واخوها وذاك البلسجن اولاد ابني حالهم من حال بهاء وفرح وفروخج اختج ما تريدها تروح البيتها جاهز لو ما تريد

تجي البيتج لو تروح البيت اخوتها محد كاظها البنيه ما تروح الاي مكان ثاني وما طول خشمي يشم الهوى البنيه

واخوها يمي والما يعجبها بكيفها تاخذ زلمتها واالله وياها وما الجن غرض اريد سعدي ما اريده الولد ابني

وذوله فروخه وسعدي لو يصعد السابع سما وينزل السابع گاع يبقى ابن غازي وابني صار معلوم

نهاد // يا عمه شحچينه هو سؤال

بيبي // سؤالج محنح

نهاد // يا هالسكتنا امدااك ياحلكي

طلعت بيبيتي وشافتني واگفه // تعاي حبوبه تعاي وراي للحجره 

ونهاد تسال // شنو خرسه شو ما تحجي

بيبي كعدت ع الجربايه واشرتلي اگعد بصفها // شوفي حبوبه ادري بنار گلبج واالله يساعدج بس هاي حال الدنيا

والصار مقدر ومكتوب انتي اهنا ابيت جدج ورجاء مرت عمج وبهاء وفرح اخوانج حالهم حال علاوي وهشام

وموبس ذوله لا ولد عمج مهدي وبناته وهم بنات عماتج انتي مو الوحدج كلنه اهلج وهذا السلف كلها كرايبنا

انتي ياجده الله يعينج بس لازم تصيرين سباعيه وهبة ريح ما اريدج تبقيين فاهيه وما تحجين اطلعي للبستان وسولفي

انشدي على الشي الما تعرفينه واحجي وحتى ساعدي مرت عمج وبتها بشغل البيت لا تخلين احد يمن عليج

وهذا بيتج وبيت اخوج مثل ما هو بيتهن عرفتي حبوبه وما عليج هاي تحجي وذيج تبربر ما عليج بيهن

ولا جنج اتشوفينهن

بقيت ساكته وبيبي استردفت // احجي حبوبه لاتضمين بگلبج مو زين عليج كليلي شتردين وانا اخلي عمج ايجيبه

ما اريدج تبقيين ساكته ما يصلح

كان جوابي كالعاده دموع يجرن على خدي بيبي طلعت من الغرفه وهي تستغفر وانا بقيت خاله وجهي بحضني وابجي

واحاجي باامي = ماما اشتاقيتلج فدوه تعالي

= ماما حبيبتي ليش هالشكل رحتي وعفتينه زين اني مو بنتج حبيبتج ليش تركتيني

سمعت صوته يمي وهو ايكول :: ليش البجي مو كلنه كافي

رفعت راسي شفته عمي عاصف واكف اباب الغرفه :: لا تبجيين بابا

شهگت واجت بيبي ورا // شسويلها احجي وياها وما ترد عليه

:: گليلي شتردين وانا اسوي الج

بيبي // جده حاجي عمج لا تسكتين

:: كولي بابا

بلعت ريكي = اريد اشوف هشام

اتنفس بعمق وحك كصته بعدها هز راسه :: مي خالف بس يتصل بيه المحامي تدللين اخذج وتشوفينه بعد شتردين

سكتت رد. :: لاتسكتين جاوبيني

  صامه حلكي ودموعي ينزلن :: امسحي دموعج بابا ( حجى ويه بيبي ) :: يمه باچر خلي البنات يجيبن ملايه وسوي

اقرايه الام هشام

بيبي // مو گلت ثواب للزلم

اتحسر ونفخ. :: اي ثواب وقرايه

- - صار

   اتقرب مني :: باجر عدنا عزيمه مسوي ثواب للمرحومه والاخوج الله يرحمه وشنو بنفسج تردين اتسوين ثواب

گولي شنو تردين وصيني نجيبه الج

اجت عمه رجاء وسالتهم // الغدا حاضر اصب لو اتصلون

:: لا انصلي وتالي صبي

شفت الاستغراب بوجه عمه رحنه اتوضينا ورجعت للغرفه اصلي شفت عمي ايصلي وبيبي يمه

انتظرت الى ان يكملون باوعلي وهو عاكف وجهه بيبي گالتله // اذا خلصت اطيها المصلايه

    ابتسم :: بس هاي مصلايتي انا اصلي بيها

- - وهم عدك مصلايه بالحجره الثانيه هاي اطيتها الوجدان

:: هاخوش راح اطلع على ما تكمل

طلع عمو واني صليت ودعيت وسمعت فرح اجت وهي تكول // ميته من الجوع

رجاء // روحي غسلي وبدلي وتعاي نصب غدا

فرح // شني انصب مو جنكم طمعتو بيه

رجاء //هههه ام السان فوتي بساع بدلي وانزلي

  اسمع اصوات وسوالف وضحك اجت عمه رجاء وهي اتكول // ياالله عمه الغدا

  بيبي هزت راسها واشرتلي // اندهي اخوج وخلي ياكل ليش هاكثر ينام

صرت انده بعلاوي يكعد هو باوعلي واتثاوب ابتسمت = ياالله حبيبي صار ظهر اگعد اتغدا

( ) ما اشتهي

= لازم تكعد حتى لو ما تشتهي اگعد وياهم ع السفره

اخذته وطلعت حتى ايغسل باوعت الصاله مليانه اجيت سلمت بصوت ناصي = السلام عليكم

الكل رد باوعت بيبي اشرتلي اگعد يمها رحت گعدت هي گالت

بيبي // هذوله بيت عمج مهدي بناته واولاده

هزيت راسي مهدي // يمه هسه خلي التعارف خلي نتغدا

هزت ايدها //. ومنو كاظك ما تاكل همك بس بطنك

مهدي // جا شعدي غيرها

عاصف گال :: بسم الله الرحمن الرحيم

الغدا سمك مشوي وخبز حار وتمن ومرك باميه وخضره ولبن وصار الكل ياكل وهو ساكت لكن ما يخلو من بنات عمي

الي بعدني ما اعرفهن ان وحده تباوع للثانيه ويبتسمن

صرت اوكل بعلاوي وبيبي تكلي // عوفي هو ياكل

وفعلا علي صار ياكل بصراحه فرحت واتفاجئت لان علي متعود من يكعد ياكل بسكت وجاي او بسكت وحليب

كملو وراحو ايغسلون والبنات لمن السفره وحده من بنات عمي جابت طشت وصابونه وجكاية ماي وصارت اتصب على ايد بيبي كعدو بالصاله واني اخر وحده رحت غسلت هالمره ما اهتمييت اذا كانو استعملو صابونتي او لا لان اكتفيت بس غسلت

اديه بالصابون اما حلكي بس اتمضمضت رجعت واكفه لان ما اعرف اجي اگعد بالصاله او اروح للغرفه

عاصف حجى :: ساره تعاي انتي وهاجر سلمن على بت عمچن

اجن كانت ساره اكبر مني باوستني وهي اتگلي // هلا حبيبتي حياج الله

هاجر الزغيره اكبر من علاوي هم سلمت عليه

مهدي // شو صحت ساره وهاجر چا ذهب مو بعينك

:: ذهب زغيره ما عليها عتب

مهدي // اي عمي وجدان هذني بناتي

جاوبته لكن صوتي بالكوه يطلع =. الله يخليهن

مهدي // وهذوله ولدي يعني ولد عمج محمد وغازي وابراهيم

  ما عرفت شنو اكول اكتفييت هزيت راسي عاصف يحجي ويه بهاء :: بهاء شنو ايوصنك جيبه الهن من وكت اريد

كل شي حاضر

مهدي // شنو عزيمه

:: اي

- - سهله بس زلم

نهاد // لا عاصف عمتي تكول نسوي قرايه

مهدي // عليمن

عاصف خزر مهدي ورجع حجى ويه بهاء :: شفتهمت

بهاء // صار عمي

شربو جاي وصارو يسولفون ومرات يتشاقون ويضحكون بصراحه ما شفت الحزن بوجه احد بس احس

انو عمي عاصف حزين

رجعت للغرفه وكعدت واني دا احس بغربه وخوف وحتى وحشه رغم كل الناس الموجودين يمي لكن احس بغربه

اجن يمي ساره وهاجر وفرح ساره دا تحجي ويه فرح

- - هاي اجتج اخت مو دووم تكولين انا اضوج لان ابحدي هاي يمج وجدان

فرح // اي بس شلفايده جدتي مخليتها تنام يمهاتستحرم چيفن بهاء حجرته فووك يمنه

ساره وهي تضحك // بعد جدتي بالديانه ماكو هيج چا خلي بهاء ينزل بذيچ الحجره

فرح // شلون ينزل بيها غير مالت ابوي

ساره // عمي عاصف عجيب اله حجرته ابحده عود ليش

فرح رفعت اكتافها // شمدريني من وعيت هو الوحده

ساره // اگلج شو صار ساعه نحچي وانتي ساكته

فرح // اي هاي هي من امس ما سمعنا حسها

ساره // شوفي خيه ما يصير اتظلين ساكته سولفي فضفضي

شفت فرح تلزمها من ايدها عرفتها اتريدها تسكت وصارن ايسالني

انتي بيا صف وليش ما اداوم واضطريت اجاوبهن لكن جوابي مقتضب يعني مو اكثر من كلمتين تلاثه

اجت بيبي // ها شو اهنا ما ترحن تنامن ترتاحن

ساره هي وفرح اتقربن منها وهنه ايگللها // ما شبعنا متانياتج تجين حتى ناكلج

وصارن ايدغدغن ابيبي وهي تضحك وتكللهن // برد شرچن ياعيارات شو ميلن

ساره // ما نميل انريد نظل يمج

شالت العكازه وهي تبتسم // ميلن ياالله روحن اريد انام

راحن وهنه ايضحكن وهي اتمددت وكالت // نامي حبوبه

سالتها = وين علاوي

لاتخافيين علي يم ولد عمه

= وين يعني

- - وين شني بالكاع والبستان

= خاف يتعب

- - منين يتعب توه كعد خلي يروح ويه الولد يتحرك يشوف الناس

ما ناقشها درت وجهي وبيبي نامت واني اسمع خطوات وسوالف وضحك وناس تدخل وناس تطلع اتمددت ودرت

وجهي للعصر وصوت بيبي تحچي وياي

دا اكعدي ياجده مشي رجليج شمي هوا اطلعي للبستان

ما جاوبتها هي عبالها نايمه طلعت وهي تستغفر اجه صوت عمه رجاء

- - اكلج عمه هاي راح اتظل ممطوله ما تكعد ولا تحجي

- - خليها عاصف يگول شويه شويه تتعود

- - وشچم دووب

- - حظها وحظ امها الامايه ما حوت اوليداتها وهي ما حوت امها لحد يلومها

- - استغفر الله شسويلج عشا عمه

بيبي //. ما اشتهي شبعانه من السمج

رجاء //. ما يصير على مود العلاج

اشويلي بيتنجانه

خوش راح اشوي بيتنجان واكلي طماطه

نعمه عاصف وين

طلع هو وبهاء يجوز راح ع الگاع

افرشيلي بساط بره

اي عمه

راحن وبقيت افكر انو هذا الي جاي دا يصيرلي فعلا امر واقع لا يمكن يتبدل الا اذا طلع هشام من السجن

سمعت بيبي تستغفر وهي تگول ياخفي الالطاف اكفنا ما نخاف بجاه محمد وآله الاشراف

وفرشت سجادتها للصلاة گعدت اريد اروح اتوضى وبيبي بعدهي اتسبح اتوضيت ورجعت وبيبي بعدهي ما مصليه

الى ان كامت للصلاة واني هم بديت اصلي ومن كملت صلاتي صليت الامي ركعتين واثناء ما اصلي بچييت

وكعدت وانا ادعيلها بالغفران والرحمه بيبي تباوعلي شفتها تبچي وتكلي

وشتردين اتحصلين بس عيونج تروح

مرات ايمر وقت وافهم كلامها عرفت بيبي تقصد بكلامها لان شافتني ابجي بس اني شفتها هي هماتين جاي تبچي

سمعت صوت عمي عاصف اجه وهو يكول كلمته المعتاده :: ياالله

من اسمع هاي الكلمه احس بالامان رغم بعدين افتهمت هو يگولها تنبيه يجوز اكو احد غريب

دخل وسال بيبي :: ها يمه شلونج

زينه انت شلونك

:: على الله

رحت للطبيب

هز راسه وهو ضام شفايفه :: رحت ضغطي مرتفع

دير بالك على روحك

:: الله كريم ( باوعلي ) اشلونج عمو

رديت كانما اشاور نفسي = الحمد لله

بيبي حجت // وينج رجاء جيبي شعدج

سمعت ردها // اي عمه هسه

اجت رجاء وجايبه صينيه بيها باذنجان مشوي وطماطه كلي وشوربه وخبز حار ولبن

خلتها كدامهم الشي الي عجبني انو من جابت الصينيه عمي عاصف اتلاكها اخذها منها باديناته ما خلاها اتدنك سالها

:: وين فرح

جاي تقرا بغرفتها

:: صيحيها خلي تتعشى

راحت عمه وهو كال :: ياالله بسم الله الرحمن الرحيم

بيبي // اتدني جده اكلي

بقيت بمكاني عمي كال :: بابا تعاي اتعشي انتي الظهر ما اكلتي

ما جاوبته هو حچى :: ما تردين لو الاكل ما يعجبج هسه اودي بهاء يجيبلج لفات

بيبي ردت // لفاتيش الي يجيبهن بهالليل

اجه صوت بهاء وهو داخل للغرفه ويه علي // سمعت اسم بهاء شبي تره انا حاضر وجسر للطيبين

بيبي نهرته //. اگلك شبيك شو صاير اخفيف وطاير منك اخلال

بهاء وجهه فلت وحجت فرح // حل هاي حوبتي

عاصف خزرها وبيبي // عليمن حل

بهاء بحزن // كلتيها فرح بعد محد يريدنا

:: اكعدو اكلو بلا دردرمه

بهاء // مو اكلج فرح سيسنا محد بحالنه

فرح// اي مو انت البارحه شبعتني رزاله هسه خو انا مو غلطانه

هز راسه // لا والله ياخويه

عاصف :: يمه خلي ناكل هذوله بعدهم ما مكملين المسلسل ياالله عمي علاوي تعال اتعشى باجر عدنا شغل هواي

صار عمي ياكل وعلي هماتين انا خجلت اتقربت ع الصينيه ثلمت الخبزه واخذت منها كلش كلش قليل يعني ما اوصفها

وخليتها بحلكي واعرف بيبي وعمو وحتى عمه رجاء جاي تباوعلي بهاء وفرح كعدو ياكلون وانا بقيت الوج باللكمه.

الي ما اكدر ابلعها

بيبي حاجتني // هاج جده اشربي شوربه خلي بطنج يدخل بيها الزاد

باوعلي عمي اخذت الصحن والخاشوكه استحيت ارجع ايد بيبي وصرت اشرب بالشوربه يمكن تلث خواشيك وانا اغالب عيوني دموعي ما ينزلن لان بلحظتها صارت صورة امي كدام عيني وصورة رامي وهو سابح بدمه وصورة هشام وهو متهستر

بلعت ريكي وكلت = الحمد لله

    رحت للمغسله جريت نفس ودموعي تهمل احاول اغسل وجهي لكن دموعي تنزل بغزاره

كعدت يم المغسله وخليت ودنكت راسي على رجليه وصرت اناشغ وابجي

اجتني عمتي رجاء وصارت تمسح على ظهري وتكلي

- - كومي عمه سلمي امرج ال الله بعد هذا الصار وانتي ما بيدج شي كومي حبيبتي كومي ابنيتي

انطتني ايدها وكفت ورجعت غسلت ورحت الغرفة بيبي شفتهم كلهم ماكلين ومخلصين وفرح جاي اتلم بالمواعين

وعمه رجاء جابت الجاي عمي ايدخن وبهاء هماتين ايدخن بقيت ساكته ورجعت كعدت يم بيبي صبت الجاي عمه

وصرنا نشرب باوعلي عاصف

:: ها اتعلمتي اتشربين باستكان

ابتسمت بحزن وما جاوبت عمه رجاء //. مايصير تبقيين ساكته احجي وردي على اليسالج

ما جاوبت بيبي كالت //. ام بهاء يمه بعد اكلنه يصير بالهول والا بس احنه ناكل بالمطبخ

بهاء // عود ليش

هاي الحجره الي انا او وجدان

بهاء // ها واحنه ناكل بالهول

اي شني اله تتكركح بحجرتي شتكول عاصف

الكل ضحك عاصف كال :: كلام امي صدك المفروض انا وياك وابو حسين يصير اكلنه بالديوان

بيبي // صحيح بس انا مراوف الرجاء اكول ناكل سوا

بهاء // ياكلمه ردي المكانج عمي حتى لو بالبيتونه ناكل هم قبول بس انا اراوف بيج حجيه فرحه ما تكدرين اتصعدين

فرح // لا تراوف بروحك لان اذا ناكل بالبيتونه انت راح اتشيلها وتحطها وعظامك تتكسر

بيبي // كون اتكسرت اعظامج بيش طالبته

بهاء //. ها اشتغلت المحنه توج غاسلتني وجه وكفه

اشوف علي يباوع ويبتسم ما اعرف فاهم الكلام او لا

فرح راحت تقرا وعمه رجاء راحت للمطبخ واجه صوت نهاد // شني نايمين

عاصف وبهاء وگفو كالو العلي تروح ويانه للديوان هسه يسيرون علينه زلم

علي باوعلي وعاصف لزم ايده وكال :: سوولنه چاي زين

نهاد دخلت // اشلونج عمه

هلا بيج

سالتني // اشلونج حبيبتي

= الحمد لله

كعدت // چا. وين فرح

صعدت تقرا

سالتني // انتي عمه بالمدرسه

هزيت راسي بالايجاب رجعت سالتني // وهسه اتداومين

بيبي ردت // لا ما تقبل اتداوم

يا خافنها مثل سويره ما تحب المدرسه

بيبي // ما ادري بكيفها

وانتي عمه تبقيين ما تحچيين

ما جاوبتها بقيت ساكته نهاد كالت // خلي اروح اشوف رجاء

راحت وانا اتمددت ودرت وجهي فتره من الوقت واجت عمه رجاء وياها نهاد بيبي سالتها // وديتن چاي للزلم

اي عمه

نهاد //. اكلج عمه شعجب ما تحچيين على هاي البنيه وتفهمينها العيب

بيبي // ليش شمسويه ؟

نهاد // شو نحچي وياها ما تجاوب وهسه ممطوله ودايره وجهها

- - ها وانتي شحارك گلبج

- - ليش عمه شو بناتنا لو يسون غلط بگد الشعره تگوم عليهن الدنيا شني هاي وحد

بيبي نفخت // بعدهي ما تعرف

- - شتعرف عمه

- - طبايعها مو مثل طبايعنا شويه شويه وتتعلم

نهاد // هاي لو وحده من بناتنا انجان انكلبت الدنيا

بيبي // نهاد البنيه ما مسويه شي البيها مكفيها ما تكليلي شتردين منها

- - ما اريد شي عمه بس اريدها حالها من حال بناتنا

بيبي //. كولي شتردين ولا تظلين اتبربرين

نهاد. // عمه هم فهميها تحط ايدها بالبيت خو مو كله على رجاء

بيبي // شني رجاء شامه ايدها على بت سعدي تسويها خدامه بالمثل

نهاد // ولا رجاء خدامه

بيبي // انجبي ولج لا تحجيين شي ما تعرفينه رجاء ابيتها تشتغل الابنها وبتها واذا متعاجزه من لگمت اليتيمه

واخوها هي تحجي ما مخليتج محامي احجي رجاء ليش ساكته

رجاء // لا عمه انا ما حجييت نهاد تكول خليها تمد ايدها بالبيت ما دام ما راح اتداوم

نهاد. // عم...

بيبي قاطعتها // عمه العماج ودار فجج ليوراج اسس ولا حجايه لا يسمع عاصف ويكلب البيت على روسچن البنيه

امها ما صار الها سبع تيام وهي امس اجت وانتي بعينج شفتي لكمتها حتى العصفور ياكل اكثر منها عاد خلي تخلص

سابعة امها خلي يمر عليها وكت بلكت تنسى الصار بيها وتالي نهوده احجي وبربري لو نسيتن

نهاد // شنسينه عمه

نسيتن من ابوجن مات اكثر من عشرين يوم ما خليتن ايدجن بالشغل ها تتذكرن مو امل وانصاف يجن يخدمن بيجن وبالخطار

نهاد //. والله عمه ما عرفتج هيج اتدافعين البت سعدي

بيبي // وليش ما ادافع سعدي ابني حاله من حال رجلج وكافي حجي زايد ما اريد

نهاد // يا عمه واحنه شحجينه

بيبي // والله يرادلج فركة حلك بس الماخذته مگير وما بي حظ بس هينه يجي يووم واكسر العوجيه على راسج

ياالله اطلعن وانتي رجيوه من تردين تسولفين لاتسولفين على هاي الرعنه تره ما تعرف شلون تذب احجايتها

رجاء // عمه انا ما حاجيه

   بيبي بعصبيه // لا حاچيه وادري بيج واذا متعايزه من لگمت البنيه واخوها گولي ولا تظلين اتبربرين اسمعيني رجاء

هاي البنيه بت سعدي ونجاة وذوله ماتو الله يرحمهم وظلت الفرخه هي واخوها ابيت جدهم مو ابيت احد ثاني لا بيت حدهم

وهسه گومن روحن كملن نفاقجن بره

رجاء // يا عمه انوب سويتينا منافقات

- - واكبر منافقات وما الجن رداد وساكته ما احجي العاصف امراوف بي ضغطه مرتفع ولو يسمع يجنزجن

استرن على ارواحتجن وانلصمن

طلعن وانا ما اتحركت ورغم اكثر المفردات الي حجتهن بيبي ما اعرفهن لكن عرفت شي انو رجاء تريدني اشتغل بالبيت

وبيبي ما انطتها مجال لذلك لازم اسمع كلام بيبي واسوي اي شي تريده وهم عرفت الكل يخاف من

عاصف ويحسبله الف حساب

حسيت بجوع ونمت الاذان الفجر كعدت صليت ورجعت نمت گعدت الساعه ثمانيه اريد

اگوم اشتغل اساعد بالبيت لكن احس بالغربه من شافتني بيبي الي لكيتها لازمه سبحتها وكاعده ع الجربايه گلتلي

اخذي هاي العلاكه بيها هدوم الج روحي اسبحي والبسي منهن

جاوبتها = ملابسنا بالجنطه

هزت راسها // اي عمج يگول اهنا تلبس من ذني استر وفكي البوفيه واشرت على باب افتحي واخذيلج خاولي جديد

وبعد من تكعدين من النوم الصبح تگولين اصباح الخير

اخذتهن ما فتحت العلاكه ولا شفت شنو جايبلي ردت عليه // شو بعدج كاعده گومي اسبحي هسه ما تحسين اله الوكت رايح

رحت للحمام وبيبي استوقفتني // روحي للمطبخ طلعيلج صابونه جديده

رحت للمطبخ اسمع رجاء ونهاد يسولفن بس ما فهمت شي من كلامهن باوعتلي رجاء الي چانت واكفه ع الطباخ اما نهاد

فجاي تعجن سالتني // ها حبيبتي شرايده

جاوبتها بهدوء = رايده صابونه

هزت راسها وفتحت باب داخلي وطلعت صابونه // هاج عمه

اخذتها =. شكرا عمه

رحت للحمام نظيف فتحت العلاكه شفت بيها دشداشه وتراك اسود طلعت التراك علكته

هو والخاولي ورجعت للغرفه وخليت العلاكه وسالت بيبي

= ما نزلو الجنطه

- اي نزلوها البارحه وانتي نايمه ما دخلو اهنا راحو خلوها بحجرة عاصف

= اريد اطلع منها ملابس

- - مو عاصف جابلج هدوم

دنكت وجاوبتها = ملابس داخليه

اشرت على غرفه مسدوده // روحي تلگينهن بيها اخذي هدوم وتالي طلعيها

رحت دخلت بالغرفه كانت كبيره تقريبا بكد غرفة بيبي نظيفه كلش وبيها غرفة نوم وثلاجه وبيها قنفه وطبله زغيره

عليها نفاظة جكاير شفت جنطتي على صفحه فتحتها وطلعت ملابسي الداخليه وسديتها ورحت للحمام

وكفت جوه الدووش غسلت شعري بشامبو موجود وليفه جديده ليفت بيها جسمي بمجرد ما لمس الماي صار يحكني

نشفت ولبست ملابسي وغسلت ملابسي بالمغسله الي كانت موجوده بالحمام وطلعت خاله الخاولي على شعري وملابسي

بايدي وانا اسال عمه رجاء وين اشرهن

اشرتلي على باب داخل الصاله قريب الدرج وكالت //. اطلعي من هذا الباب وشري ملابسج ع الحبل

فتحت الباب الي صاير بالجهه الثانيه وانا متعجبه لان ما شايفته للباب او ما منتبهه الوجوده طلعت لكيت ترك بي

حبلين كبار وعلى صفحه تنور وطباخ

شريت الملابس ورجعت الغرفة بيبي الي من شافتني گالت نعيما

جاوبتها = شكرا

اي هذا خوش لبس القميص طويل

فعلا باوعت القميص التراك شفته طويل بيبي گالت // عدج مشط

هزيت راسي بالنفي

- - روحي الحجرة عاصف بالجراره تلگين هواي امشاطه

باوعت الها باستفسار هي هزت راسها // فكي جرارة ميز المرايه وتلگين امشاطه عاصف ما يحب احد يجيس غراضه

كل فتره ايبدلهن بجديد

= لعد شون اروح امشط

- - روحي فكي الجراره واخذيلج مشط ومشطي

=. مو خاف عمو ميقبل

- ما عليج انا اكله

رحت للغرفه وفتحت اول جراره بميز تواليت ما لكت بيها شي

فتحت الجراره الثانيه لكيت بيها علبه شفافه فتحتها شفت بيها مشطين وفرش اسنان مبينات جدد وحتى صابونتين ما مفتوحات

اخذت المشط ومشطت وفتحت الجنطه طلعت شال حتى البسه انفتح الباب وشفت عمو داخل هو اتفاجا بوجودي واني هماتين

حاجيته = عمو جاي اخذ جنطتي

هز راسه :: عادي اخذيها

عدلت شالي وشلت الجنطه واجيت يم بيبي الي گلتلي خليها جوه الجربايه وبالليل صفطي هدومج

بدون اي مناقشه خليتها سمعنه صوت عاصف وهو يگول ياالله

فوت يمه هلا بيك

:: الله يساعدج حجيه

ايساعد بختك هلا ياروحي

:: اجيت الحجرتي واسمع حركه عبالي فار فكيت الباب شفت وجدان

اي رادتلها مشط وكتلها تروح تاخذ من حجرتك

سالني :: ولكيتي

= اي عمو بميز تواليت

تستمر القصة أدناه

بيبي // شوف الهدوم الجايبهن شلون زينات گليله انعم الله الله يطول عمرك

:: يمه

- - شني يمه هي مو زغيره خليها تتعلم

= شكرا عمو

ما رد عليه بيبي سالته // شسويتو

:: ذبحو واجه الطباخ راح ايبلش

ياهو ويا

:: بهاء وجابر ومهدي

بيبي //. مهدي اخذ المعلاك مو

ابتسم :: اي ودا الساره تشوي

غلاب مهيدي

:: يمه شتردين منه خلي ياكل بالعافيه

سمعت صوت عمي مهدي بالصاله وصل يم الغرفه مد راسه // ها يمه اشلونج

هلا بيك

وين نهوده

شوفها يم اختها

راح للمطبخ وبيبي سالت عمي عاصف // اكلك علاوي وينه

:: خليته يم بهاء

= عمو ليش ما جبته وياك

:: بابا خليته يم الولد احسن

بيبي // اي خلي يباوع للگصاب وللطباخ

:: لا يمه ما خليته يباوع من ذبحو الخرفان اخاف علي

رجع عمي مهدي گعد يم بيبي وباسها براسها //ها يمه شلونج

- الله يسلمك

- شلونج عمو

= الحمد لله

اجت ساره وهي شايله صينيه بيها صحنين معلاك مشوي ودولكة لبن وخبزتين خلتهن كدام عمي مهدي وعاصف

عمي مهدي ساالها // اكلج شو بس خبزتين

بعدهي امي جاي تخبز

باوعتلي وابتسمت وكالت البيبي // شلونج حبوبه

هلا بيج جده

- اشلونج وجد

باوعت مستغربه لان سمتني وجد هي ابتسمت // عمي عاصف سماج ومن سالنا كال هناك كله يسمونها وجد

هزيت راسي وعمي مهدي دنى الصينيه وكال الساره // روحي جيبي خبز

- اي

- ياالله يمه

بقيت كاعده وعمي عاصف مد ايده ع الخبزه وقطع نص خبزه وخلى بيها معلاك وقدمها الي بعد ان باوعتله وهو ابتسم

وهزلي راسه واجت ساره جايبه خبز وهي اتكول حركني الخبزات

بيبي كالت //. جا وين بهاء وعلي صيحوهم خلي ياكلون

مهدي //. ها يمه اتكولين ما افرق شو نشدتي بس على بهاء وعلي ونسيتي افروخي

ادري بفروخك مثلك بكل طبيخه الهم لبيخه

عاصف ضحك بصوت واول مره اشوفه هالشكل يضحك ومهدي فلت وجهه وساره صارت اتكهكه خزرها مهدي

وهو ايكللها // بت الكلب عليمن تضحكين

بيبي // ها شتريد منها روحي صيحي الاخوانج واولاد عمج خلي يجون ياكلون لا ابوج يكول افرق

- - جده اكلي همه جاي يشوون بالبستان

- - ها مهدي خو انا ما اجذب (باوعتلي ) اكلي حبوبه وانتي سويره اكعدي اكلي

اي جده

اكلنه واجت عمه رجاء وهي تتساءل يا اتغديتو چا مو سويت الكم غدا

مهدي // خلي بعد شويه نتغدا بي

بيبي // هم بعد تاكل مهدي

يمه شماكل انا شني ترديني عصفور مثل بت ابنج

عاصف :: حجيه خلي ياكل بالعافيه

  عمي عاصف طلع وعمي مهدي بقى ياكل ومن كمل غسل وراح للمطبخ يسولف ويه نهاد ورجاء ويضحك

   بيبي سمعته هزت ايدها واتحسرت راحت تتوضا واني رحت وراها من كملت وضوء انا غسلت واتوضييت واجيت للغرفه

شفت فارشه مصلايتها وجاي اتصلي

فتحت باب البوفيه وطلعت المصلايه وتربه وصرت اصلي الى ان كملنه انا وبيبي ولميتها وخليتها بمكانها

واجت فرح سلمت وبعدها عمه رجاء جابت الجاي واجه عاصف وبهاء وعلي بيبي سالت بهاء //اتغديتو

اي جده الحمد لله

وعلاوي

سبع

اكل

اي جده اكل حتى اسالي

باوعتلي طلعيله هدوم وخلي مرت عمه اتسبحه

بهاء يسال بعلي //. عود صدك عبالهم زغير اتخلي النسوان ايغسللك

بيبي // انجب بهاء

جده رجال شكبره شنو مرت عمه اتسبحه

جاوبتهم = اني اسبحه العلووش

محد جاوب شربو جاي واخذت علاوي للحمام سبحته ولبسته تراك ومشطت شعره اتبللت بالماي اجه بهاء شافني

امشطله گال //هسه سبحتي قبول بس لاتمشطيله خلي هو ايمشط شنو ما يعرف

دخل عاصف وحجى ويه بهاء :: اكلك خبرت حجي جليل

اي عمي گتله انت وربعك

:: تعال رايدك

باوع العلاوي // ها ابو حسين تبقى اهنا لو تروح وياي

بيبي // خلي ينام شويه والعصر يگعد

طلع بهاء وعاصف وبقى علي اتمدد على افراشه وانا هماتين اتمددت نمت وغطيت وجهي واسمع اصوات داخل البيت

لمن ما سمعت صوت خاله شيماء وهي تشيل عن وجهي الغطا عبالي احلم وهي اتكلي

اكعدي خاله شو اكعدي

فتحت عيوني وحضنتها وكلبي صار ايدك وهي اتگلي // حبوبتج تنشد عليج

طلعت للصاله وشفت عمتي سعاد وامل وانصاف وشفت بيبي ام كريم

وام كرار جايات رحت امشي وانا فاتحه ايدي وحضنتها البيبي ام كريم وگعدت بحضنها عبالك طفل جاهل

هي من شافتني صارت تنعى وتبجي هي وبيبيتي جان اكو نسوان هوايه ما كنت منتبهه لوجودهن بحيث مره كالت

ويلا خيه عرفتج على ريحة امها واجتج

صارت بيبي هديه تبجي حييل وتكول // ياشبابج يا عمه الما تهنيتي بي

وصار البجي وبيبي هديه وبيبي ام ابويه كلهن ينعن وعلا البجي وانا گاعده يم بيبي هديه واشهك ودموعي اينزلن بحركه

بعدها شاورتني اكوم اسلم على عماتي ورحت سلمت عليهن عمه امل وانصاف باوسني بس سعاد ردت سلامي ابرود

وسلمت على ام كرار وام غيث والنسوان الكبار والي ما اعرفهن هنه صاحلي وسلمن عليه

واجت الملايه واجن هواي نساء بعدين عرفت ذني كلهن اقارب بابا وصارت الملايه تقرا مجلس وتعالى البجي

واكثرهن ايباعلي ويبجن وبعدها صار توزيع الثواب وبيبي هديه تسالني // شلونج بيبي وشلون علاوي

هزيت راسي =. الحمد لله

ا نهاد جاوبت گالت // هالبنيه خطيه ما ينسمع صوتها بالكوه نطلع منها الحجايه

ام كرار //. بعدهي ما متعوده وهم الصار وياها مو شويه

نهاد //. بس مو هيجي ولا حجايه اليشوفها يكول خرسه

واهنا فجرت عمه سعاد القنبله وصار الكل يخزرني ويباوعلي وهو مستغرب ومتعجب

سعاد // منين خرسه چا لو شايفات حسهاا وحچيها وهي تطك بعاصف وشلون ملخته عبالك فرخ جاهل

ما تكولون هاي الفقيره الساكته وجنها خرسه

الفصل التاسع عشر من هنا 

شكرا لزيارتكم عالم روايات سكيرهوم