رواية ارحموني ولو رحمة مرة الفصل الثامن عشر بقلم فراقد حسن علي
أركان /زروقنا السيارات وأخذنه فرقة موسيقية وطلعنا للمحمودية
-الفرحة بوجه محمود فرحة طالب وميأيس من النجاح وأستلم شهادته ناجح وشخط عقله من الفرح وبس يوزع أبتسامات
-وصلنا لبيت جدي وتلكونه عمامي
وأولادهم
-أصدقائنا الشباب لعبوا طوبه فرحانين على فرحنا
بعض من أصدقائي العساكر
واصدقاء محمود أطباء راحوا ويانه بالزفة
فرح/يوم ألاثنين هو يوم عرسي
-من الصبح طلعنا أني وهالة وعمه هناء للصالون
هواية تعبت وراسي أنثول ،،
-أم الصالون من مكيجتني اني كتلها //اريد شي بسيط وخفيف ما اريد أطلع قرقوز
-وأنوب لبست البدلة كلش ثكيلة
ومنفوشة من السيم
ما بيها ردان فقط شيالات
وصدرها كصته دلع يرادلها نص متر قماش يلا تغطي
-وبعدها بلش الضيم ،،أم الصالون تملش بشعري
وتسرح ،،وتلف ،،وتبخ سبري ،،
دخت وأنسطرت من صوت الفير ،،
وشكو ماشه بيك يا سوك خلتها بشعري
-بعد ما كملت كلشي طشت عليه لمع فضي
صرت حالي حال شجرة التكي أمشي وأنكت لمع
-جودرتني عمه هناء وهالة
وأجه رافد رجعنا للبيت
هو نجح وقدم على الكلية العسكرية
معدله زين ينقبل بالكلية بس بعده كاعد ينتظر
-من وصلنا كعدتني عمه بالهول كدام المبردة
المكياج يسيح من الحر ،،
-بس شنو بالكوة مصبرة روحي
وحابسة الدمعة بطرف عيني
بس واحد يسلم عليه أبجي
-منى سوتلي لفات تغديت
كتلها أريد كلاص جاي لان أنثولت
ومن خلصت نطوني علج وحباية هيل
-النسوان ألتمن هاي التصفك ،،وهاي التهلهل
امي خافت عليه من عيون النسوان خلت بيديه ملح
وشمرت بحذائي هم شويه ملح
-وضمت بصدري جكليت
بعدين ناكلهن أني ومحمود
علساس تصير حياتنه حلوه
-سمعنا صوت الموزايق والهوسة والرمي
هنا كتلني الخوف
أسولف ويه روحي عليش خايفة هو نفسه محمودي مجرم روحي عليش خايفة منه
-طفرن البنات يلبسن حجابهن وتسترن
وعماتي جودرني لان يطبون الشباب
-وشويه وأسمع صوت الدبج صار بالهول
قريب عليه ،،
-وصوت أركان يهوس وياه بعد شباب
والموزايق يمكن أدك باب الحوش
-محمود كعد بصفي
يمه كلبي يدك بسرعة ،،خوف ،،وقلق
وأرتباك ،،نفس شعور كل بنية بيوم زفتها
-شويه وأيد أنمدت عليه وكومتني عرفته من صوته هذا عمي نوري ،،بوسني من راسي وخلى أيدي بيد محمود
-مشينا خطوات لباب الهول محمود سلم على أبويه وعمامي ،،
-هنا خلص الكلام،، صار دور البجي
شكو بجي مجمعته بجيته من حظنت أبويه
وهو خطيه بجى ويايه ،،
حتى هاله هيج بجى وراها
-ما اعرف شلون أتصرف هوسه
ومشاعر مخربطة
وأحس ناس كلهم يسولفون سويه
والصوت يدخل بقوه بأذاني
وصوت هلاهل نسوان يرج دماغي
صدك دخت وأنثولت
-أنوب المصيبة ما اشوف ،،
ما أندل عمية وتايه بلا شوف
عمه نزلت البركع على وجهي
وفوكاه الگب الجبير مال البدلة
أمشي على خطوات مشي محمود هو يدليني الطريق
-هو ساعدني وصعدني بالسيارة
انوب سمعته يسلم على الزلم الواكفين بالشارع
سمعت صوت أركان بصفي واكف
اركان/هلا بزينة الحلوات
هاج بعد أخوج هذا مي مجرش
فرح/اركان عليك الله أختنكت
راح أخرب من الحر ،،عمه لفتني بلحاف
اركان/ثواني هسه أشغلج تبريد السيارة
بس لا توخرين البركع الشباب كلهم واكفين هنا
هذا التبريد الزين بين ما يجي محمود
هذاك هو يسلم على الزلم ويه وابوي
فرح/شغلي أركان التبريد وطبك ابواب السيارة
شويه واجه محمود صعد وحرك السيارة
محمود /فرحتي بهذاك اليوم مااعرف شلون أوصفها
بس اقرب صورتها ،،
-شايفين وحده عاگر ،،وأيست من الخلفه
وعمرها جزى الاربعين وصارت حامل وجابت ولد
بهذاك اليوم هيج فرحتي وأكثر بعد
-فرح روحي ،،شلونج
مشتاقلج يابعد نبض محمود واهل محمود
فرح/زينة الحمد لله
فدوة أوخر البركع ذبحني الحر
محمود/لا الشباب كلهم عيونهم متوجه على سيارتنا ،،بس خل أوجه التبريد عليج
-تدرين شكثر حلمت بهذا اليوم
وشكثر حلمت بالزفة ،،
يبووو يافررح روحي ما أصدك اليوم أنومج بحظني
فرح/محمود عفية لا تحجي هيجي أستحي
محمود/ماكو مستحى اليوم
يابه عطشان تعرفين شنو عطشان
اليوم أرتوي بيج
-فرح روحي تدرين أني حبيتج من اول ماجيتي للدنيا وباوعت بوجهج
وانتي بعدج بالحظينة ومخليج بالسلة
-وعبالي جاهل قزم وأنقهرت
لان رايح يصيحون عليج
الجهال ،،قزم ،،نفس هوبي القزم ،،
وصدك توقعي طلعتي قزمه هههه
فرح/هاي شنو ترى اني مو قزمة طولي ١٥٢
ذيج المره كل احنا البنات قسنا الطول بالفيتة
-بس انت طويل هواي تشوفني قزمة
محمود/الطول للزلمه هيبة
والگصر للنسوان فتنة
-بس وغلاتج أحلى فتنة
حنطية
ومدعبلة
والعيون تمرعد تمرعد
والشعر ليل
والحلگ دورة محبس
اليوم منو يخلصج من أيدي
طريق الافتراس اليوم طريقج
فرح/محمود شنو هاي ترى بديت تخوفني
محمود/ضمي خوفج لتوالي الليل
فرح/لا ترى من صدك بديت أخاف
محمود/اكول هاي شلون هيجي مسوية أصابعج بالحنة
-شنو ياربي تمر برحي مو أصابع
-اكول فروحة أذا أصابعج هيجي حلوة
الوجه اللي لهسه ماشايفه شحلاته
فرح/ياااا محمود شجاك
شجاب التمر بنصنا
محمود/يابه التمر مفيد للصحة
ويزيد النشاط والحيوية
فرح/ اكول عطشت أيصير أشيل البركع
واشرب مي
محمود/بس ديري وجهج عليه ولا تشيلين البركع زايد
الشباب يمشون بسيارتهم ويه سيارتنا
فرح/رفعت البركع شويه وفتحت بطل المي
ودرت وجهي عليه وشربت
رفعت عيني بوجه شو هذا صافن بوجهي
محمود/خرررب لشت عمي باسم
شايفة نفسج شكثر حلوة لو لا
فرح/عفيه بس باوع على الطريق لا تكلب سيارة بينا
محمود /اااخ يا كلبي
سهام جابتج و ضحكت بيوم ولادتج
واني بتليت بيج من هذاك اليوم
فرح/شنو يعني هسه أنت متندم ومتريدني
نزلني هنا أركان يرجعني للبيت
محمود/مو مخبل أني حتى ما اريدج
من لفة كماطج سجلوج اجدادي بسمي
فرح/بقينا الطريق كله نسولف ونضحك
-بس شنو الحر سلخ جلدي
هسه لو بس أرفع البركع شويه واشتم هوى
هم ميخالف بس هو ما يقبل
كلساع وكال//الشباب يمشون ويه سيارتنا
-وصلنا لبيت أبويه عادل
محمود دخل السيارة جوه للكراج
-هاي أول مره أطب لهذا البيت
ياربي رجلي خير على عتبتهم
وعتبتهم خير عليه
-نزلني محمود
وعرفت هذا صوت امي فاطمة
نزلت امشي وياهم دخلنا للديوانية
-كعدت وشلت البركع اخير أشتميت هوى
منى وهالة ساعدوني رتبت كعدتي
-محمود يباوع عليه ويريد ياكلني بعيونه
لو مانسوان كاعدات ويستحي منهن
يمكن يجيت عليه وياكلني
-شويه وطلع يم الزلم بره بالشارع
باوعت الديوانية جبيرة وبيها تخم حلو
وكلشي بيها نظيف وجديد ومرتب
-تعبت هواي
الحر بجهة
وتعب الطريق بجهة
وتعب البارحة واليوم بجهة ابد ما ارتاحيت
-انوب الملح اللي بحذائي ملخ رجلي دخل بين أصابعي
-النسوان الموجودات هاي اللي تبارك
وهذيج اللي تبوس
واللي تسأل امي فاطمة عندي بعد خوات
-عشوا الزلم بالشارع
والنسوان والجهال هنا بالبيت
منى جابتلي قوطية ميرندا ،،ولفة كباب
كتلها//ما أشتهي العسل من التعب اريد
بس انام وارتاح،،شربت بس الميرندا لان باردة
-شويه وأجه أركان كال لامي فاطمة
//جودريها راح نزفهم للفندق
بس انتي تعاي وياهم ،، وخاله سهام
ما أريد ولا مراه ولا بنية توصل لباب الشارع
-كامن عماتي بسرعة لفوني وستروني
دخل محمود علينا وطلعنا بالزفة مره ثانية وياهم بس الشباب ورحنا للفندق
-صعدوا ويانه امي ،، وامي فاطمة
واركان ،، وعمي أحمد
-بعد ما وصلنا للجناح سلموا علينا وتباركولنا ونزلوا ،
-الصراحة ماخفت بس أرتبكت وأستحيت
وقبل كلشي ذبحني الحر وثكل البدلة
محمود بدأ يتفقد المكان ويباوع على
السقوف
فرح/ما أتوقع لان الفندق اركان يكول مشهور
واكيد ثقة شنو ماعدهم شغل وعمل يخلون كامرات ويصورون بالعرسان
-عفية محمود بس ساعدني وافتحلي قياطين البدلة أنسلخ جلدي
محمود/ليش هي مو سحاب
فرح/مو لان شويه سمينة ما نسدت السحاب
خلتلي القياطين
محمود/واني أموت على السمين يابه اليوم أفترسج
فرح/شحدك ،،
بس ساعدني فدوة ترى ثكيلة كسرت ظهري
محمود/شبيج راح تبجين
شو أنداري،،دقيقة هاي شنو مو شدة قيطان هاي رادلها منشار
فرح/هاي عمه هناء ضبطتها
-فتحلي القياطين رحت للجنطة ،،
أخذت سيتي الابيض
ورحت للحمام
-هااا شكو وين جاي ورايه ،،اطلع اريد أسبح
محمود/اني هم أريد أسبح ذبحني الحر
فرح/دفعته وطلعته ،،اني طاكه روحي من الحر
وهو منحرف بس يكمش ويبصبص
-سبحت الحمد لله المي بارد
غسلت بس جسمي حتى أعظامي أحسها بردت ،، وغسلت وجهي من المكياج
بقت المصيبة يم التسريحة منو راح يفلها
-طلعت واشوف محمود بس بالشورت ذبحني المستحى ،،اني شايفة بس رافد بهيجي منظر من كبسته ويه هالة
-سويت نفسي ما اشوفه ،، طبكت البدلة
وضميتها بجنطتها
-هو دخل سبح بسرعة وطلع خمس دقايق ماطول يمكن بس غسل وجهه
-واني بعدني اطلع بالماشات
يمكن مية ماشة قليل
والماشة الاوخرها شيعري ينزل سبرنكات
من كثر البخاج
محمود/هاي شكثر ماشات شنو
شعر لو مشبج مال زوالي كاشان
-تعاي هنا خل أساعدج ،،
هاي للصبح ماتخلصيهن وحدج
فرح /كعدت بصفه وبده يطلع ويايه الماشات
وما احس الا هجم علية
-ياااا هاي شبيك خرعتني
محمود/كافي دلال ،،تركي البيدج
وأندمجي ويايه
فرح/هااا
خفت لان دقت الساعة الحاسمة
بقى يبوس ويحظن ويكمش
واني مره أموع بيده ،،ومره أجمد أخاف
-من راد يتقربلي خفت ودفعته بكل قوتي
أنعاد براسي موقف الحادثة
نفس هذا الموقف صار ويانه من جنا صغار
وهيجي جرم بحوالي
انعصرت روحي من تذكرت يوم حنتي من مخلد وشلون أكتشفت الموضوع
وشلون شبعت كان طن كتل
محمود/شبيج ،، شبيييج
يمعودة لا تبجين
خرب يومج كافي راح تموتين بس كوليلي شبيج
فرح/عفيه محمود بس عوفني أخاف
تذكرت يوم الحادث من جنا صغار
ويوم كتلتي من عرفت بالموضوع
-يعني الموضوع الا اليوم لازم يصير
محمود/براحتج لا مو لازم ،،بس لا تبجين
عيونج يسبن كلبي،،
فرح/يصير انام يعني عادي متزعل هواية تعبانة
-ماصدكت كالي //براحتج
بسرعة لفيت راسي وانطيته ظهري
وتركته هو كاعد
حتى نسيت أتعشى
-فزيت بنص الليل كاتلني الجوع
باوعت شفته نايم بطرك الشورت
غطيته بالجرجف
كمت طلعت الاكل من الثلاجة وكعدت أكل
-غسلت ورجعت تمددت
هو فز وكعد مزاجه عالي
حاول يتقرب مره ثانية
هم رجعت أخاف وكمت أبجي
تركني وبقى يدردم ودخل للحمام
-ما اعرف شلون كضى الليل
غفيت وجه الصبح
ما حسيت غير هو يندهني ساعة ب ١١ الصبح
يمه اول مره بحياتي أنام لهيجي ساعة متأخرة
محمود/صباح الخير
يلا كلبي كومي غسلي وبدلي حتى نرجع للبيت ابوي خابرني من ٩
كتله// فد شويه نرجع
خايف يسألوج كولي كلشي ما سوينا نخاف مركبين كامرات
فرح/صباح النور
شكد خجلت لان راح أفشله كدام ألاهل
بس مو بيدي الحادثة وموقفها يدك براسي
واتذكر طن الكتل الاكلته وكل جسمي يصير يوجعني عبالك هسه مكتولة
-دخلت غسلت وبدلت
طلعت مشطت ورتب روحي
لملمت أغراضنا
وطلعنا من الفندق رجعنا للبيت
-لكينا عمامي كلهم راجعين
باقية بس أمي والبنات
ابويه عادل يرجعهن العصر
وموجودات خالات محمود وجدة صفية
-جابولنا الريوك وتريكنا على السوالف وضحك
ودتني امي فاطمة لغرفتي جوه بصف غرفتها
-دخلت غرفتي كلش حلو تصميمها
وكلشي بيها جديد
والوان الصبغ زاهية
وريحتها تخبل
والبرودة فول من هسه نعست
فاطمه/ها يمه بشري شصار ما صار
فرح/ما صار شي محمود بقى خايف من الغرفة يكول خاف مخلين بيها كامرات
فاطمه/الله كريم الايام الجاية كدامكم طويلة
الله يسعدكم ويهنيكم يايمه
-وهذا الكردان هدية بياضج
هذا كردان امي صفية
هدتلياه من نزلنا بهذا البيت
وهسه أهدي ألج لانج أنتي أم بيتي تستاهلينا وعليج ألف عافية
-يمه أريد منج شغلة
شريجتج رفل لا تتصادمين وياها
وانطيها حكها مقهور لان رجلها ثنى عليها
وانت بعد تعرفين الضرة مره وما تنبلع غصتها
فرح/يمه اني تربات أيدج ،،وداعتج ما تسمعين صوتي
-للعصر راحت أمي والبنات بقيت أبجي وراهن شلون راح أفاركهن واصبر اعيش
بعيده عنهن
-لليل والناس رايحين وراجعين
يسلمون ويباركون
-كلشي ماسويت بقيت كاعدة خالات محمود ماقبلن اسوي شي
-لليل صدك نعست وتعبت
وما متعلمة اسهر
يمكن لل ١٠ قفلت عيوني من وحدها
اترخصت ورحت لغرفتي
بدلت لبست شي خفيف
وخليت راسي ونمت
ومحمود بعده كاعد يم الزلم بالديوانية
-حسيت عليه يبوس بيه
بالبداية تفاعلت وياه،،من وصلت للصدك أمتنعت ودفعته وكمت أشهك وابجي
هو أتخبل ،،
محمود/بس كوليلي ليش تصديني
وتنفرين من عندي ،،شنو ماترديني
لو بعدج تفكرين بمخلد
فرح/يمه فرفحت روحي من كال هيجي
ليش يتهمني //ياااا حرام عليك مخلد لا جاي على بالي ولا افكر بي
بس أخاف
محمود/عجيب منين تخافين
اذا على بياضج اني راضي بكلشي
واعرفج طاهرة وبيضة وشريفة
فرح/الله يخليك اذا صدك تحبني
بس أنطيني مهلة أخاف
محمود/كافي لا تبجين ،،براحتج
بعد مااجبرج على شي
فرح/كمت أشهك وابجي
أنقهرت ليش هيج يصير ويايه
تمنيت ارجع طفلة لا هم ولا غم موجود بحياتي كل همي أكل واشرب والعب وانام
-هو حظني ونومني بحظنه
ونمنا بعدها صار حباب كلشي ما سوه
-كعدت ثاني يوم واسمع صوت نسوان بالبيت
-بدلت وطلعت وتركت محمود نايم
غسلت وجهي ودخلت للهول
-وشفت أربع نسوان كاعدات ويباركن لامي فاطمة ،، وحده منهن تبجي
-دخلت سلمت
وامي فاطمة عرفتني عليهن
رفل ،، وامها ،، ونسوان أخوتها
-ورفل خزرتي خزر لو يصح بيدها تكوم تكتلني
بقيت كاعدة وساكتة
-الجناين حبابات ابد ما يشاركن بالحجي
ورفل ابد ماحجت شي بس تبجي
بس امها تبسمر بالحجي
-رفل تشبة الممثلة المصرية حلا شيحه تنطيها هواي شبه
-هن راحن ،، ورفل صعدت الغرفتها
-كمت أسويلنا ريوك اني ومحمود
اجى أسلام شلته وافتر بالمطبخ
وامي فاطمة اجنها الجيران يباركن
-مااحس الا أسلام أنخمط من أيدي
رفل/بعد ممنوع تشيلين أسلام
لو توصلين يمه ،،
أفتهمتي يالعربيه لو لا ؟؟
فرح/ماجاوبتها ،،جايه شاده حزامين
-كملت الريوك ورتبته كله بالصينية
ورجعت للغرفة أصحي محمود
بس دخلت للغرفة
وما احس الا رفل جايبه الصينية
دفعتني ودخلت خلتها على الميز
وراحت على محمود تبوس بي وتكعده
وهو لفها بحظنه عباله أني
-هنا شتردوني انصدمت وجمدت
ونار الغيرة تذبح شعلت بصدري
-هو صحى وظل متفاجئ
يباوع بوجهي وبوجهه
محمود/اني نايم بغرفة فرح ،،وطافي
وأصحى على بوسات وحبيبي وقلبي
يعني حتى لو حايط يتحرك ،،
-عبالي فرح جريتها لحظني ،،
صحيت بس شميت عطرها عرفتها رفل
فزيت مصدوم هاي شجابها هنا
أني أنحرجت لان دفعتها بقوة من حظني
اباوع واشوف فرح باب الغرفة متبسمرة وتريد تبجي
-هسه خلي اي واحد بمكاني
شلون يتصرف ويحل الموضوع
-رفل شلون تدخلين لغرفة فرح !؟
هاي المره سويتها مره ثانية ممنوع تنعاد كل وحده وغرفتها
ممنوع اي وحده تدخل لغرفة الثانية
-فرح طلعت تركض من الغرفه
وهاي طنكرت صعدت فوك
بلشنه على ضيم الشرايج
-كمت ولبست هدومي وغسلت وجهي
رحت للمطبخ واشوف فرح كاعدة وتبجي
واني نقطة ضعفي دموعها من أشوفها تبجي اريد أبجي وياها
-بوستها وراضيتها
واعتذرت عن سوء الموقف الصار
ورجعنا لغرفتنا أتريكنا
ورفل بعد مانزلت
-الله يعيني على الراح يجي
من مشاكل وجع راس
فرح/بقيت اليوم كله مغثوثة من حركة رفل اللي ما اعرف شنو اكول عنها
ساعدت أمي فاطمة وهي خطية ماترضى
بس اني ما اقبلها على روحي ابقى كاعدة
وهي خطية تعبانة من ركضت العرس
-لليل بعد مامشى النهار بثكل وملل
دخل محمود لكاني أمشط
وبين البوسة والاحظان من راد يتقرب صديته
محمود/يابه مقدر خوفج بس مو لهدرجة
حتى كرامة ماظلت عندي
شطلعت هاي صار ٣ ايام أركض وراج
-شوفي فرح اني زلمه واللي رغباتي
من أطخ براسي واريد وتصديني
لا تتوقعين ابقى اتوسل بيج
لااا ترى عندي مراه ثانية تسد بمكانج
-اني صاعد لرفل
عود شوكت ماعقلتي
وتردين قربي
اني نازل ابات يمج
تصبحين على خير
فرح/تركني وصعد يم رفل
غير أحس نار وشعلت بيه
دود وياكل بجسمي
-رجعت بيه الخنكة واني ماصدكت صارلي كم يوم مرتاحة منها
-أنجطلت بس ماكدرت أنام لان مقهورة
يادوب غفيت حسيت عندي وجع ومغص
لا فدوة صارلها كم يوم متأخرة مو وكتها تجي وتفضحني
باوعت الساعة ب ٤ الفجر
-كمت للمطبخ بعدني ما اندل الغراض
كمت أهبد و أدور على هيل
لكيت وسويت كونداغ وشربت كلاص
بس أقشمر على نفسي
-أتحملت لل ٧ الصبح وكالتلي بطني
هوب هذا حدي وياج ،،أتكطعت
-طلعت من غرفتي اريد أدك باب غرفة
امي ما اكدرت اوكف أنجطلت بالكاع وكرفصت نفسي من قوة الألم
اركان/كعدت للدوام ونزلت جوة بين ما اغسل واتريك اصعد ابدل واطلع
أشوف فرح نايمة باب غرفة أمي
ركضت عليها // هاا فرح شبيج
فرح/أركان فدوة راح اموت وديني للمستشفى
أركان/من شفت حالتها وكالت وديني
للمستشفى ،، أجتي بالي سالفة رسل
كتلني الخوف لو ماعيب من عدها
ولزمت نفسي بالكوة جان وكعت كدامها
-بس كوليلي شبيج ،،ليش هيج صاير بحالج
فاطمه/أسم الله يمه شبيها
أركان شجالها البنية
فزيت على صوت حجيكم وبجيها
فرح/يمه ألحكيني راح أموت
فاطمة/عادل ،،عادل،،كوم البنية ماادري شبيها
اركان/بس فهميني شنو اليوجعج ،،
شبيج شنو سالفة مو عقل ما ضل براسي
فرح/يعني شريد أكوله لو شريد أحجيله
//اركان لا تخاف هاي سالفة كل شهر تصير عندي بس اخذني للمستشفى
اركان/يمه وليرحم أمة محمد ،،
انتي ثانية فهميني شنو الموضوع
فاطمه/فرح يمه ليش هيج يصير عندج
شنو سالفتج
فرح/مو مال اسئلة وأجوبة
بطني كطعتني سجاجين وتكطع بيه
كمت أصرخ // ااااخ يمه ألحكيني
أررركان فدوة راح أموت
اركان/يعني أبد حالتها مو طبيعية
اول مره بحياتي أشوف مراه هيجي يصير بيها
-شلتها من الكاع جنت كاعد مكنبص كدامها
-يمه عباية ولحكيني
رجلها السكط وين ؟؟
عادل /محموووود،،محمووود
دكيت على باب غرفته الجوه ماكو
-شنو تاركها وصاعد فوك وهي بعدها عروس
-صعدت ودكيت على باب غرفته
طلعلي مطفي ونوم بعيونه
محمود /صباح الخير بويه
خير سمعتك تصيح عليه
عادل /لحك على مريتك تخربطت
واخوك وامك أخذوها للمستشفى
محمود/شنوو يابه شبيها ،،
كلبي وكع بين رجليه
-اتصلت على أركان كال//طلعت لمستشفى الكرخ ،، هو صار يضوج ويتخبل من مستشفى الكاظمية
-بسرعة غسلت وبدلت
واخذت سيارتي وطلعت
-وأسلام فرفح ورايه من البجي ،،
بلكوة شالته رفل ودخلته جوه
-توجهت للطوارئ شفت أركان واكف باب الردهة برة ويدخن
-هااا خير بشر شنو سالفة
أركان/ياخويه انت شنو سالفتك ،،
انت عاطل ؟؟
لو كمت ماتشتغل الا بالزركه ؟؟
محمود/لا تلوص بالحجي من الصبح وتاكل تبن شكو شعندك
اركان/دخلت على فرح لو بعدك
محمود/شبيك مكنكر عليه من الصبح شعندك
أركان/الدكتورة رزلتني عبالها أستغفر الله اني رجلها
سألت فرح جم سؤال نسائي
وانوب سألتها انتي متزوجة
وهي جاوبتها اي
-رجعت عليه وتكلي//شمتاني متفضهاوتخلصها من هذا الالم اليذبحها كل شهر عدها عسر بنزول الدورة ترى هي كل شهر تموت وتعدل من الالم
-وشتريدني أنلصمت كلشي ماكدرت أحجي شكلها أخويه عاطل لو ميشتغل الا بالزركة
محمود/لا تبقى تلوص كتلك ماكدرت أتقربلها كل ما اتقرب منها تخاف وتبجي وأتركها
أركان/صير نچر شوية ولا يبقى كلبك رچيج من أول لحظة وأذبحلها البزونة وخلص الموضوع
محمود/خرب شيب أبو كلبي اللي خلاني هيجي ارجف كبالها
-تمشيت عليهن ،،وكلت لاركان يروح لدوامه
وهي راقدة بداية الردهة
وبيدها المغذي ونايمة على صفحة
لو ما مفتهم شنو موضوعها من اركان وشفت هذا وضعها جان كلت عدها زائدة
-يمه سكتيها لا تخليها تبجي لو أهج من البيت
فرح/غير أستحيت من اركان عرف سالفتي وانوب دكتورة نزلت عليه بهذيج الرزايل
وهو خطية ساكت ومدنك وجهه للكاع
-وامي فاطمة بدت تسألني
//يعني انتي دائماً هيج يصير وياج
-وليش متخلين محمود يگربلج
ترى حرام عليج ،،وحتى الله ما يرضى عنج هذا حقه وهو يحبج من الصغر ويتمناج
-واذا بقيتي تصدينه راح تخسرينه
وتنفر روحه منج ،،ورفل تاخذه منج
-اني بس أبجي الوجع كطعني
بس الحمد لله أنطوني أبره وخلولي مغذي
وبعد ما مشى الوكت بدت تخف الاوجاع
-خلصت المغذي وشوية ارتاحيت
رجعنا للبيت
يبوو الفضيحة وين من ابويه عادل يسأل شلون صرت ،، وشنو عندي
-وأمي فاطمة حجت كل الشريط بدون لا زيادة ولا نقصان وحتى كلام الدكتورة وشكالت لأركان وشلون رزلته خطية
-وهو طكت عيونه على محمود عرف بي لحد هسه
مامتقربلي
-ورفل تكول لأمي//خالة شنو هل عيارة مالتها ترى كلنا جنا بنات وحالنا من حالها
شو ما سوينا سوايتها ،،ونجذب أنتباه
لو سوت هل فلم مالتها لان محمود تركها وصعد نام يمي
-تركتها ما حاجيتها
وما حجيت ويه واحد غيرها
لان متكطعة من الوجع اذا ما انام ابقى ألوب
دخلت غرفتي لفيت راسي ونمت
-كعدت للظهر الحمد لله أحسن
لازم هسه ابدي أشرب أعشاب حارة
-كل البيت بجفة
وبعدني عروس ومستغربة المكان بجفة
وبسامير رفل بجفة
-كلساع وكالت //انوب علينا العربان
لو تكول// خوش حظوظ من وره الهوش وأجوي للمدينة
لو تكول// عوع شهل لبس المخركن والمبهذل
عود مسوية نفسها عروس
تذب الحجي وهي تباوع للتلفزيون
وعادي عدها تبسمر واذبه الحجي كدامي وكدام أمي
-ما أهتملها ولا أرد عليها
بس من أدخل الغرفتي أشبع بجي
-ومحمود كل عقله زعل وما يحجي وياية وبليل يصعد ينام فوك
واني أشبع بجي الليل كله كاعدة وحدي اتعب وأنام
-يعني هم يعجبني أهتم بي حالي حال كل بنية متزوجة وتهتم بزوجها بس رفل وين تنطي مجال عدها مسابقة تركض تجهزله الاكل
تحضر ملابسه
تضحك وياه بصوت عالي
ومن تشوفه كاعد تجي وتلزك وتكعد بصفه
-أسلام ممنوع عليه أوصل يمه العبه او أشيله
-اني بعدني ماخذه طبع أهلي
أنام من وكت وأكعد من وكت
اكعد من الفجر وين أروح أبلش بشغل البيت
من أكعد الفجر لل ٩ الصبح أني مكملة كل شغل البيت غسل،، كنس ،،مسح مطبخ مواعين أغسل الحوش
وبعدها أسبح وأسوي ريوك
أشتغل بكل هدوء خطية امي وابويه نايمين
بس الغده من تكعد امي تخلي على النار
-اركان يكعد الصبح أريكه ويطلع لدوامه
أصعد فوك انظف غرفته
انزل ملابسه الوسخة
ادخل للحمام أغسل الهدوم بالغسالة
اشوف السلة مليانة اغسل هدوم الكل
ما أفرق حتى ملابس رفل اغسلهن
بس ملابسها الداخلية ماغسلهن أستحي
-يكعدون امي وابويه نتريك سويه
ويانه أسلام
يومية الصبح أبويه عادل
يصبح عليه ويضمني جوه جنحه
ويبوسني على راسي
بعد ما نكمل الريوك هو يطلع لشغله
ونبقى اني وامي و اسلام
-أخلص أغلب وقتي ويه أمي فاطمة
والصبح أبقى العب ويه أسلام
لحد ماينزلون رفل ومحمود من غرفتهم
ساعة ١١-١٢ الظهر
أنسحب من أسلام ما أريد أسمع كلام يغثني
-بيوم السبعة امي فاطمة كالت//أسويلج حفلة
ماقبلت كتلها//مايحتاج لا تعبين نفسج
بس هي خطية ماقبلت كالت// ما يصير لازم نكمل الفرح وياج
عزمت بس نسوان الجيران
وخواتها وجدة صفية
واجتي امي وخواتي وعماتي من الصبح
لبست دراعة بيضة ومكياج خفيف
مو حفلة وهوسة بس هيج كعدة عصرونية وكيك وشرابت
-ورفل هلكثر قلدت وضحكت عليه
لحد ماهي جزعت
-اني أكدر أملخها وأمسح بيها الكاع
بس ماخذتها على كد عقلها
وامي وابويه واركان وحتى أسلام
كلهم واكفين بين عيوني ويحبوني
بعد ليش أسوي مشاكل وياها واضوجهم ويايه
-بس الصراحة بداخلي ميتة من القهر والليل أخلصه بجي
-مر أسبوع من روحتي للمستشفى
ومحمود زعلان مني ومايحاجيني
أمي فاطمة سألتني/ نظفتي لو بعدج
كتلها/ اي صارلي يومين
فاطمة /ليش ما تتحاجين أنتي ومحمود
كتلها /زعل مني لان صديته يكول هنتي كرامتي
فاطمة /دعج من سوالف الكرامة
ماكو بين المراه ورجلها هاي سوالف التلفزيون بس بعد لا تصدينه حرام عليج والله ما يرضى عنج ،، وهذا حقه
-يعني شسوي أروح واجره من أيديه
واكله تعال ،،هو يادوب يصبح ويمسي عليه
محمود/اني ميت عليها ،،
أتمناها اليوم قبل باجر
بس ٣ أيام أركض وراها ،،
كل مااقربلها ما ترضى
-وزاد الطين بله رزالة أخويه اليه
وانوب جملها أبويه غسل شراع ابو حظي//
انت فاهي ومادبرت زواجك الاول الا هددتك
وهاي الثانية مو انت ذبحت نفسك عليها وشبيك مخفت ومجير وياها
تريد اراجع بيك للشيوخ والسادة خاف صار عندك مس من اثر سحر لو غير شي
-اني اعرف المراه ،،ماتذبحها غير المراه
رفل شيطانة مو نفس فرح فاهية وطيبة
رفل استغلت سالفة الشرايج
بس هي فرح لا أستسلمت
-اني ما اخذ إجازة من الدوام ١٥ يوم
بقيت يم فرح بس ٣ ايام
الباقي صارلي أسبوع يم رفل بس ما تقربتلها بس مره وحده ما ارغبها شي مو بيدي
-اشوف فرح مكضية كل وكتها ويه امي
وما اكدر أسولف لو أحجي وياها علساس امزاعلها ،، بس اني اراقب كل حركاتها
وهايم بيها بس ما أريد اضعف كدامها
حتى تعرف خطأها ويصيرلها درس
طلعت العصر أني واركان واخذنا أسلام ويانه نفتر ضايج ومخنوك من البيت
-رجعنا بليل جبنا عشى جاهز من بره
-بس دخلت أبويه سحبني للصالة
ويحاجيني بهدوء بس بصيغة امر
يريدني أعدل بعد بين نسواني
أفتهمت قصده ...
-بعد ما جمعنا على العشه وسوالف والضحك
اركان صعد نام عنده دوام
وامي وابويه راحو الغرفتهم
-بقينا بس احنا كاعدين نتفرج فلم
ورفل تلاعب أسلام
-فرح سويلي جاي ،،وجيبه للغرفة
-يعني اسمع رفل اليوم مو يمج
هي نطت عيونها عليه وشالت اسلام
وصعدت أدردم
فرح/كمت سويتله جاي ،، وديتلهياه لغرفتنا
لكيته مطلع علبة مال دومنه وكاعد منتظرني
محمود/تعرفين تلعبين
فرح/لااا مو هلكد اعرفلها
دقايق هسه اجي بين متشرب جايك اخذت ملابس ورحت سبحت
ورجعت للغرفة وكعدت أمشط
-هو تقرب يمشطلي بس جذاب سحلني بعد خلص وكت الدلال
بجيت توسلت حجيت وياه قفل
محمود/كافي عاد صارلج ١٠ ايام مدللهه أربطج والله لا أدفعين ،،
بس أهدى حتى لا تتاذين
فرح/محمووود توجعني ،، حباب عوفني الله يخليك عوفني ،،
بس وخررر راح اموت
محمود/اششش ،،صبر ،
أهدئي وساعديني حتى نخلص الموضوع
فرح/هواي توجعت وتأذيت طلعت روحي
هو صح يسوي نفسه عصبي ويخوفني بس زين بتعامله وياية
-وللأسف ما طلع دم !!!!!
نزل بس مي لزج لونه جوزي طوخ
مو نفس نيشان اختي هالة دم صافي
محمود/وهاي أحلى بوسة لاحلى مريتي يمخبلة أعشقج مو بس أحبج
فرح/بقيت أبجي لان متوجعة
اتغطيت ما اكدر اكوم ابدل
محمود/شوو خلي أبوس اخر بوسة حتى اطلع أصيحلج أمي تساعدج
فرح/بوسني وبعدها كام جابلي هدومي وساعدني ابدل
وراح صاح امي فاطمة
بس دخلت كامت تهلهل
هسه غير تسكت ياااا شكد عيب أنفضحت
-شويه ودخل ابويه عادل بوسني على راسي ويضحك وجهه فرحان
من رجعوا لغرفتهم
كمت طلعت للحمام غسلت،،ورجعت لغرفتي
ومحمود بعده بغرفه امي وابويه
- شويه ودخل محمود ضايج
ومعقج وجهه
-شبيك ضايج ؟؟
محمود/أمي شوفت نيشانج لابويه
يكول الحمد لله ما أخذها مخلد
جان هسه البنية مذبوحة ومدفونة من وراك
فرح/مافهمت
محمود /ابويه يكول
-لازم دم لونه أحمر ويكون غامق
يعني أحمر صافي ومابي شوائب ،
يعني يكون دم شبيه بالدم الطالع من اي جرح
-كتله/ يابه بالطب عدنه انواع غشاء البنات اشكال وانواع
-مو شرط دم صافي ينزل
الطب يكول نتيجة لاختلاط دم البكارة
بأنواع من السوائل والخاصة بجسم الزلمه والمراه يتغير لون هذا الدم
ويتحول لو أصفر
لو برتقالي لو وردي
ودم البكارة ما أله لون محدد
وبعض الحالات ما ينزل الدم نهائيا
-وهو قفل يكول//سوالف الطب خليها الكم احنا عرب وما نمشي بسوالف الطب البنية من يدخل عليها زلمتها لازم يطلع دم صافي
أنوب سأل أمي كاللها /تذكرين زوجة عمي أسحاق الثانية نيشانها نفس نيشان فرح هسه
وعمي رجعها لأهلها ومن هذاك اليوم اختفت البنية
-كتله/ ليش ترى حرام عليه
وهي بنية ليش هيجي سوه
-يكول /هذا بعد عقلنا و تفكيرنا
وهاي الحالة عدنا معيوبة
يعني واحد واصلها قبل زوجها
وشلون اشبهلك الحالة مثل الجرح من يبدي يطيب ويبدي يبس
ومن واحد يطخه يصير ينز دم وجراحة هيج نفسر الموضوع
-أنوب يكلي/مو أنت بنفسك من أخذت فرح وهي صغيرة طلع دم صافي وهسه ماكو دم هاي فقط جراحة جرح ملجوم
-وبس أكول الحمد لله البنية ما اخذها مخلد حتى لو هو عبر الموضوع لان ولد وما متزوج قبل من يشوف نيشانها لاهله يرجعوها على أبوها
كتله /يابه والله عليكم عقول
مو رسل الله يرحمها دم بكارتها جان وردي مو دم صافي نفس أختها رفل ولا جوزي نفس فرح هسه غير البنات أشكال والوان وكل جسم يختلف عن الثاني
كتله /اي يعني باقي البنات يمرن بنفس حاله رسل ويطلع دمهن لو جوزي لو برتقالي لو وردي
يكلي /لا تنسى مو كل الزلم مهورشين نفس أخوك وما يسيطرون على نفسهم
-عاد كفيت نقاش وياه وترخصت من عدهم وطلعت
-ونبهتهم ما يحجون كدام رفل بهذا الموضوع لان محد يعرفها بكثري
فرح/صدك بقيت صافنة على فرق التفكير بين تفكير العرب
وتفكير الطب والناس المثقفة
-وصدق محمود من كال رفل محد يعرفها بكثري سوتلي كوارث بس الله خلصني منها ........
شكرا لزيارتكم عالم روايات سكيرهوم
