رواية ارحموني ولو رحمة مرة الفصل التاسع عشر بقلم فراقد حسن علي
أركان/ الشكوى لله هواي تعبان
اني زلمه عسكري
صح دوامي يومي اروح وارجع للبيت حالي حال الموظف ،، بس التعب مو بالدوام لان تعودت ،، التعب من أرجع للبيت
-اني أرجع أعصابي فايرة
ومنا أسمع نگ رفل ،، يابه أفور بالزايد
أتخبل من مراه تبقى أدردم وتزن جنها ذبانة زبل
-رفل ما تدخل با أموري
امي متحملة كل مسؤوليتي
تغسل وتكوي ملابسي الشخصية والعسكرية
ومرات اني أكوي ،، اكلي شربي عليها
تنظيف غرفتي وشكو شي يخصني على امي
-من أجتي فرح شالت البيت دائماً أشوفه نظيف ويلمع ،، ولو امي تسمحلها يمكن حتى الغده تكمله من الفجر ،، هواي ارتاحت امي بوجود فرح
-كل ما انزل الصبح اروح للدوام
خطية تريكني وتبقى كاعدة يمي تسولف بين ما اخلص ريوكي
-ارجع الكي غرفتي نظيفة
وكلشي مرتب من الملابس والفراش
-والغده ينزل بوكته ،، والعشه كذلك
ابد ما اشوف هوسة المواعين على السنك نفس وضع قبل ،، شوكت ما ادخل المطبخ اشوفه نظيف مع العلم جانت امي
والمرحومة ورفل صح هن خوات بس شغلهن معاينة
-اني لاحظت فرح مالها دخل باأسلام
سألت أمي كالت //رفل ماتقبل تكربله
ما ردت ادخل لان رفل ما مقصره وياه
المهم عندي مداريته
-بيوم صعدت بليل لغرفتي وسمعت امي تهلهل ،، عرفت محمود ذبح البزونة ابو كلب الرچيچ
-وعلى طاري الهلاهل تذكرت بيوم
عرس محمود بعد ما زفيناهم للفندق
ورجعت للبيت أغلبية الاقرباء مشوا لبيوتهم
-اني اركض منا وأجي منا ،،
وحتى عشى ما تعشيت من وكت الغده
وراسي صاير طبل
ومحمود الباشا نايم بالعسل
-دخلت للبيت واشوف مواعين العشه
والجداري والبريمزات مليان الحوش غراض وهوسة وخاله سهام والبنات
وخالاتي ونسوان عمي
مجودرات وكاعدات وامي وياهن يدكن سوالف
-وعمامي وابويه بالصالة وصوت ضحكهم الراس الشارع
-أشرت لعمي أحمد خل نگرب النسوان
كافي گاله وحش بالوادم ،،وهاي راحت
وذيج أجت
-دخلت عليهن للهول عود مسوي نفسي عصبي بس بالجذب وكمت أصيح
//عبالي ارجع والكي المواعين مغسولة
والحوش نظيف
بدون زعل كل وحده تلزملها شغلة
بس النسوان الكبار مسموحلهن يكصن بالوادم
وانتن البنات كدامي يلا للحوش
-طفرن بنات عمي باسم/ منى وفاطمة ومريم
وياهن كوثر ،،وغدير وهبة بنات عمي محمد
-شغلت ماطور المي ووكفت فوك رؤسهن
خبصتهن ،،هن يجلفن بالمواعين
واني وعمي أحمد نشيل على أديهن ونسفط
-الاحظ كل بنات عمي حتى فرح
ما يلبسن من عدنه حجاب
الا منى شفتها بحفلة مهر محمود لابسه حجاب واليوم
وأبد ما تباوع بوجهي
-يابه خليتج براسي الا اعرف شبيج مكروصه
من عندي واني ما مسويلج شي
-بعد الخبصة وألشغل الزين خوش كربتهن
وغسلن الحوش ،،دخلن جوه
-منى حبابة سويلنا عشه اني وعمي أحمد
كاعدين بغرفتي فوك
فاطمة/يمه مناوي العشه موجود
بس حرري وصبي الهم
منى /خالة خاف ما يعجبه الاكل
لو ما يعجبه ترتيبي
فاطمة/لا يمه ليش ما يعجبه
ترى الولد ما يعيبون على نعمة الله
كلشي أسوي من نعمة ياكلون
اركان/صعدت نزلت ملابس ونزلت سبحت
وصعدت لغرفتي ،،وعمي أحمد جذب
ما يريد عشى كعد يم أبويه وعمامي
بس أريد ألكف هاي الشاخطه واعرف شبيها
-شويه وصعدت دكت الباب
عرفتها دكتها برجليها مو دكه مال أيد
دخلت وبيدها الصينيه
-جنت مجطول وأكلب بالتلفون
اشوف منو مخابرني ،،لو دازلي مسج
من جماعتي
-وما اجذب خابرتني بنية
وبحجة الرقم خطأ ولطشت
أطورت علاقتنا سوالف وشقى وحبجيات أسولف وياها بليل شوية واغلق الخط
الرصيد نهيبه
-شفتها ادور بعيونها مستغربه عمي
أحمد ماكو
-نزلت الصينية بالكاع واندارت بسرعة ومشت سريع تريد تطلع
-اني ما صدكت صارتلي فرصة لحتى اعرف شبيج مكروصة من عندي
-طفرت وركضت عليها وطبكت الباب ما خليتها تطلع ،،وكفت كدامها والباب صار بظهري وهي طكتها أبجيه
-أشتعلوا أهلج يولي شبيج تبجين
هسه اليشوفج يكول متحرش بيها
منى /حباب بس خليني أطلع
اركان/اني لا حباب ولا أبن جلب
من الاخير شبيج كل ما تشوفيني تنكرصين وتنهزمين من عندي ،،
-مسويلج شي وما ادري بروحي
غاثج بكلمة،،بحجاية،،سولفيلي خليني افتهم
منى /لا كلشي ما كو ،، بس أخلي أطلع هسه امي تكوم تصيح عليه
اركان/خرررب أصفاح أهلج كافي تبجين طلعي لا يكولون عرس عليها ،،
مو تحرش بيها على هذا بجيج
-شبببببببج مذهب الحلو اطلعي
راح تموتين من كثر البجي
اطلعي خلصيني
-امرها عجيب شبيها هاي مخبلة ابددد مو صاحية !!
-تركتها ورجعت المكاني وكعدت أتعشى
وهي واكفه بمكانها وتعوي
-رفعت راسي عليها وبحلكي الاكل
//شبيج تباوعين عليه تعاي تعشي ويايه
منى /عفية اركان سامحني ضميري موتني
ما اكدر لا انام ولا اكل ولا أشرب نفس البشر
مخلصة حياتي بس بجي
حباب سامحني !!!!!!
اركان/هاي شبيها مو اكول مخبلة مو صاحية
كالت هذا الكلام وهي تشهك وتبجي
وطلعت تركض من الغرفة
-خررب حظي الاعوج هسه اليشوفها
شيكول عليها وهي هيج طالعه تبجي من غرفتي
وحالتها عبالك وحده خبله ورابطيها بشباك العباس
-وره شويه سولفت ويه هاي البنيه أسمها ((بلقيس))
يالله شكد تتنعوص وتجر بالحجايه كوه
وتفيك وتشمر على راسي بسوالفها
وماتدري هذن مالاتي ومصدر من عدهن للصين
-اني نهيت المكالمة ،،هي رجعت أتصلت
رفضت الاتصال وغلقت الجهاز
ما أحب الملحه الزايدة
-نزلت صينية العشه جوه
اشوف البنات ينكلن بالفراش
من غرفة امي مخلين بيها النضدة للهول
-شمرت الصينية على السنك وطلعت
ومريت من غرفة امي
اريد اروح للصالة أكعد يم أبويه وعمامي
-والمح بنية ظفيرتها متينة وبيها شكار
ونازلة على طول ظهرها
وعلباها بيضة ناصعة تبرج مثل المرايا
واكفة على طراف اصابعها تريد تسحب مخاد
-رجليه أخذتني عليها
الصدك الفضول سحبني اريد اشوفها
وكفت بصفها
وهي ألتفت عليه متفاجئة بوجودي
-فهيت عليها وسبت عقلي
تراجى الذهب تضوي ويه بياض الركبة
ودشداشتها دلع حركت روحي حرك
-راح يصيرلي بالسنتين ما جايس مراه
وهاي صارت كدامي الصبر ياروحي الصبر
-هي ركضت وأنثولت تدور على حجابها
واني كل حركه من عدها أحسها تغريني
من الاخير الشيطان ركب عقلي
وما أجذب حتى نسيت هي بنت عمي
-وأنوب دنكت بثول وأرتباك اخذت حجابها من الكاع وبين السماكي شعلت ابويه وأهله
لكفت الحجاب وطلعت تركض
-هو الموقف ثواني بس هواي أثرت بيه
-صعدت فوك الغرفتي،،نار وشعلت بيه
ليش هيج صار ويايه ...!؟
يمكن لان ما متقرب المراه راح يصيرلي بالسنتين ...
لو لان هي ترفة وبيضة وحلوة زيادة !!
-خررب لشت عمي باسم شلون خلفه مخلف خو ما أبويه خلفته محمود الاجلح الاملح همزين راضيات بي نسوانه
فرح/رجعلي محمود ضايج
بعد ما اخاف من عنده السالفة وخلصت الحمد لله اذا البنات ينشاف نيشانهن مره ،، اني نيشاني أنشاف مرتين
ما عرفت شلون أتجرّأت، بس من شفته يحچي بحركة ومقهور من حچي أبويه،
تمددت ونمت بحضنه
وره شوية هدّأ، بس بقى مقهور على زوجة عمّه
محمود/فرح تدرين هاي اول مره اسمع بيها سالفة مراه عمي خطية شنو ذنبها راحت مظلومة
فرح/الله يرحمها ويجعلها من الشهداء
-وانت شكو تشوف نيشان ألمرحومة
محمود/شوف المخبلة
يول عيب ما شفت شي
بس من كعدنا نسولف اني اركان بموضوع الدخلة لان شفته ضايج أبوي هاجه بخوش رزالة معدلة لان متسرع ومامسيطر على نفسه
-سولفلي شصار وياه ،،
وسولفتله شصار ويايه
بس مو كلشي بالعمق يعني شغلات توضحية
-شوفي من الاخير اني واركان
سرنه واحد وحجايتنه وحده
لا أضم عليه ولا يضيم عليه
اعتبره نفسي ،،وهو يعتبرني نفسه
فرح/واني هم أعتبره أخويه
ونفسي ،،وصديقي ،،وابن عمي
وعم جهالي بعد
محمود/واني شبقالي اذا هذن كلهن لأركان باشا
فرح/ااااخ محمود متعرف ومتصور شكد أحبك من يوم الشلتوا واني صغيرة
يومية بليل أبجي عليك
-ما اعرف شنو الحب وسوالف الحب من جنت طفلة بس كل ما أكبر يزيد حبك بكلبي
من أشتاقلك أظل أبجي
وربك كوثر تسمع مني وتكعد تبجي ويايه
محمود/من رحت فدوه لهل دموع
اني هسه يلا حسيت روحي عريس
فرح/انت هم تحب رفل ؟
محمود/شوفي ما أريد أضم عليج
وممنوع يطلع هذا الحجي بره باب هاي الغرفه
-رفل زوجتي فقط ،،
ماعندي اي مشاعر تجاها
يعني مجبور ومغصوب عليها
فرح/ليش مطلكها اذا تحس نفسك مجبور ومغصوب
محمود/لا هاي الفكره ابد ما أفكر بيها
وأبغض الحلال عند الله الطلاق
ترى هي خطية مظلومة
ابوها الحجي نافع وابوي
لعبوا بحالنا اني واركان
وبحالها وبحال ألمرحومة طوبة
لان أعتبرونا صفقة عمل لتقوية مصالح شغلهم
تعرفين شنو ابوهن هداهن النه
كأنما يكول خلصوني منهن اول شي
وهن عربون تقوية الصداقة ثاني شي
-اني متأكد تلكيهن مجبورات حالهن من حالنا
و أكيد هم كالن لا وأنجلدن
او وافقن بدون كتل بس بضغوط من الاهل
فرح/اني ماعندي شي وياها
صح أغار من تصعد يمها
ومن اشوفك تسولف وتضحك وياها
بس ما أكرها بس أغار ،،
بس هي تكرهني
محمود/تردين الصدك حقها
لان ما عدت فترة على زواجها وتقدمتلج
ونهيت عليج
-ولا تنسين صعبة عليها
تخيلي شي بس الج وحاسبته مالتج
ويجي واحد ويشاركج بي شيصير بيج
مو عاد رجلها وتشوفه بعيونها يروح ينام بحظن غيرها
-شوفي انت تعرفين طبعي ابد ما اتعصب
وافقد اعصابي الا على شي يسوه
ودائماً أسولف بهدوء
وأخذ الامور بسياسة
لان غير هيج ما تنحل الامور
بس اذا عصبت افقد الوعي والتركيز بساعة العصبية
-اريدج تجنبين رفل ،،وممنوع تحتكين بيها
وشكد ما حجت أنطيها أذن الطرشة
وسوالف الغيرة ادري صعبة عليج
بس أول وتالي مرجعي ألج
وبس انتي ساكنة كلبي وروحي
-واي شي يغثج منها تجين وتسولفيلي اليه
وتشكيها يمي ،،مااريد تصير هوسه ومشاكل
فرح/اي بعيوني اني مالي دخل بيها
هم أمي فاطمة حاجتني وكتلها مالي دخل بيها
محمود/من فديت هل عيون وراعيتها
يول فاير عليج بس ما اكدر بعد أكربلج تتأذين
فرح/بقينا الليل كله نسولف
انوب كمت حميتله الاكل
ولعبنا دومنه ويشاقيني ،،ويبوس ،،ويحضن
بس من صدك اني نعست وقفلت عيوني ما متعودة على السهر
-كعدت الصبح وبديت روتيني اليومي
بس هلمره كعدت ب ٦ شوية متأخرة
-كنس،،مسح،،غسلت الحوش
غسلت كم ماعون باقيات من البارحة
رجعت شغلت الغسالة عزلت الملابس الداخلية مال رفل مو أتنكس لا بس استحي
كملتهن وشريتهن
-هناك بيتنا عادي منو اللي تغسل هدوم تغسل هدوم الكل
-خليت القوري على النار
وحضرت الريوك
-ودخلت سبحت وطلعت ،،
-للعلم اني ماالبس حجاب بالبيت
-لاحظت أركان ما نزل
صعدت لغرفته دكيت الباب
ماكو ميجاوب ،،دخلت لكيته نايم
رحت كعدته كال //ماخذ أجازة ما اداوم
-نزلت،،دخلت لغرفتي
كعدت أمشط شفت محمود يتكلب
كلت خلي أقلد حركه رفل
كمت وبوسته من خده هو نايم
بوسته من عيونه ،،ومن خشمه
هو سحبني بقوه
محمود/يولي احلى حرشه من الصبح
اكول يوميه تعاي وتحارشي بيه
فرح/هههههههه
محمود/انعل أصفاح بليسج صوتج
فرح/ثردني ثرد يتعب ويرتاح ويرجع عليه
-عيوني فدوه كوم هسه أبويه وامي
كعدوا عيب يوميه أتريك وياهم
محمود/واني اليوم تريكت بيج
واحلى ريوك،،ربي يومية أرزقني هيج ريوك
فرح/طلعنا من غرفتنا
اني رجعت للحمام ،،
وهو بقى يغسل وجه على المغسلة
أركان/يوووولي فارة النضد وينج
مجاز وكلت أشبع نوم
تندهي من الغبشه شعندج
على الدرج واصيح عليها
-صباح الخير أبو شكريه
وين مريتك فارة النضد
محمود/صباح النور ،،شبيها
اركان/يعاااالم مجاز كلت انام واشبع نوم
تصعدلي فارة النضد وتكعدني من نومي ليش
محمود/مو زين تكعدك لا يروح عليك الدوام
-هنيالك مجاز اني بعد وين يلا أكدر أحصل أجازه
وانوب أجانه رمضان
فرح/طلعت من الحمام صار بوجهي اركان
-هاا شبيك تصيح مو زين أكعدك
اركان/شو تعاي ،،جريتها من شعرها بالشقى
محمود تريد مريتك
لو أعلكها الك بالبنكه من شعرها
عادل/شحدك أكسر ايدك بس تلمس شعرايه منها
اركان/هااا خوش عندج محامي
اول مره أشوف فارة وعدها محامي
فرح/بويه كله لا يكول عليه فارة النضد
عادل/ول يابه أحلى فارة
فرح/تريكنا كلنا بشقى وضحك والسوالف الحلوة ،، عدا رفل ما تريكت بعدها نايمة
-وأركان يخلي عسل وكيمر كدام محمود
يكله/ تصرف طاقه عندك أثنين نسوان
وامي تضربه تكله/ بطل سوالفك هاي ما تحشم احد كاعد
وهو يكلها/ اني مجذب مو عنده أثنين نسوان
-بعد ٣ ايام على رمضان يصادف يوم الاثنين
-بيت ابويه يشترون خبز وصمون جاهز
واني أستغفر الله ما اجرع خبز المعمل
بالكوه أبلع اللكمة تكول لاستيك وناكل بي من حشى النعمة
-امي ما تكدر تخبز عدها حساسية بصدرها
أتقبط من الحر ونخالة الطحين
-بقيت اتوسل بمحود واركان نزلوا التنور
من السطح ،،صح خبز تنور الطين أطيب بس خبز تنور الحديد أرحم من خبز المعمل
كملوا وجهزوا وخلولياه بالمنور يم المطبخ اسهلي بالحركة
-انوب كلت لمحمود يشتريلي مكينة خياط
لان أعشق الخياطة واعتبرها هوايتي
-هو ما قبل يكول/ شنو تخيطين للعالم
الحمد لله ما محتاجين
-كتله /مو شغله محتاجين او لا
بس النه للبيت أتونس بيها واخيط بوكت فراغي
-عاد كال /مااعرف بيهن أخذي امي وروحي للسوك أشتري
-الحلو بيت أبويه رواتب اركان ومحمود وشغل ابويه كله بيد امي،،وهي خطية ابد ما تقصر على واحد بشي ومن كيفها تجيب وتخلي حتى لا نحتاج شي
-ماجنت اعرف بهذا الشي الا محمود كالي
وكال /كل شهر تنطي ٥٠ الف لرفل
وجانت للمرحومة هم تنطي
خاف يردن يشترنً شي خاص بيهن
ملابس داخلية
او أحتياجات نسائية ويستحن
غير هل شي هي تاخذهن للسوك ويشترن اليردنه
-لان أتفقنا اول ما تعينا رواتبنا بيد امي
حتى تحل علينا البركة
-وهل شوفت عينج الحمد لله البيت ما ناقصه شي ،، ولا أحنا علينا قصور
-عاد كلت لامي اريد مكينة مال خياط اتونس بيها ،،
فاطمة /العصر ابوج ياخذنا للسوك ويشتريلج وحده
-يمه الزلمه يريد الملكى الحلو
والكلمة الطيبة
والثوب النظيف
واللكمة الهنية
وبليل فراش دافي
سوي بس هذن الشغلات يكوم يموت عليج
وبدون كلشي هو محمود يحبج
فرح / بس رفل ما تنطيني مجال
فاطمة /لا تبقين باردة وفاهية وينفر رجلج منج ،، صيري سباعية وتسابقي وياها
على مدرات رجلج
بس بدون مشاكل ،،كون بعقل وحكمة
فرح /صفنت وبديت اقارن
يعني بدأ يشتغل دماغ الشرايج
-اني بشغل البيت هواي اشطر من رفل
والخبز و العجين راح استلمهن
والطبخ اعرف اطبخ بس امي تنطيني اشارة استلم عنها
-وتبقى شغلة وحده لازم احسن منها
احس لبسي مرعبل بالنسبة لبس رفل
هواي ملابسها نازكة ومرتبة
تلبس كله جاهز مو خياط
بس اني اذا شفت شي اخيط احلى من عنده
-للعصر أخذنا أبويه وأفترينا بالسوك
اباوع البنات لابسات اشكال والوان
ومو نفس هناك بديرتنا كل النسوان والبنات يطلعن محتشمات
بديت أركز على تفاصيل الدشاديش المعروضة أخياطهن أحلى من الخيطتهن بجهازي وقماشهن والوانهن تختلف
لازم اشتري قماش وافصل مثلهن
-عجبتني ملابس نوم ما اشتريت اني هواي هن كم قطعة من الكاظمية اخذت لان لا اني اعرف ولا امي
-شاورت امي وكتلها /عجبني هذا السيت
اخذت فلوس من ابويه
وهو راح يفتر يدور على مكينة الخياط
-دخلنه للمحل واكف ولد ،،
استحيت احجي ،،
ليش ما يخلون بنات تبيع هاي السوالف
-عاد امي هي أختارتلي ،،وذوقها حلو
-اخذتلي بعد ملابس داخلية حمره
كتلها/ ليش مو باقي الالوان
تكول /محمود ابني واعرف ذوقه كلش زين
من يشوف الاحمر عليج يتخربط
كمت أضحك على تفكيرها
-طلعنا من المحل ،، تمشينا شويه
رجع ابويه علينا كال// تعاي لكيت مكينة
شوفي نوعيتها الزلمه يكول زينة وخوش بيها مواصفات
-رحت شفتها نفس مكينة الخياط التخيط بيها امي برذر ياباني لونها رصاصي فاتح أصلية
-أني عجبتني
ابويه هم على حجي الرجال عجبته
تعامل وياه وانطاه حقها
اخذناها هي وجنطتها ،، شكد فرحانه بيها
-حبيت محبة امي وابوبه اليه
-دخلنا للبيت والولد ماكو طالعين
ورفل بغرفتها ،،واسلام يمها
-دخلت ونصبت المكينة على طبلة خشب جبيرة وعدلتها هواي فرحانة بيها
-طخت براسي سالفة امي
محمود اهم هسة من فرحتي بالمكينة
وهو اليوم يبات يم رفل
خل استغل الفرصة قبل لا يصعد الها
-كلت /لامي راح اتحضر علمود جيت محمود
مالحك اسوي عشه
فاطمه /روحي ومالج شغل بالعشه
همه من يجون يجبون جاهز وياهم
هسه ابوج يخابرهم
ابوج ومايحب الكباب
يلكاها حجة من نتعاجز من العشه
-ركضت سبحت وطلعت
بدلت لبست سيت اسود
اجره من فوك يطفر من جوه ،،
اجر من جوه يطفر من فوك
-شعري بس خليتله زيت
بريحة جوز الهند ومشطته بقى رطب
-المصيبة ما اعرف أخلي مكياج
بس كحلت عيوني
وخليت حمره حمره طوخ
تغير شكلي،، ورشيت عطر قوي
-اني بعدني استحي من محمود ما ماخذه عليه بس غيرة الشرايج نارها تحرك ابو المستحى
-كعدت أصبغ ايدي لون أحمر طوخ
ورجلي هم صبغتها
ولبست ذهبي ،،حسيت نفسي صرت راقصة
-سمعت صوت الولد دخلوا للهول
اخاف محمود يصعد فوك
فتحت الباب شويه
ومديت راسي صحت عليه
-هو من اجه ختلت وره الباب ،،
دخل لو أنصك بمكانه
محمود/يولي ناويه توكفين كلبي
بس صبر دقيقة ،،
قفلت الباب بهدوء ما اريد ينسمع صوت القفل
-شو تعاي أفتري كدامي خل انظف عيوني
بشوفه هذا الجمال
فرح/حباب ليش هيج تباوع والله استحي
محمود/ترى كلبي رچيج ما يحمل تنوصين هيجي شو تعاي بس أبوس
فرح/جلبت بي يا بس تبوس
اليوم فلا أخليك تصعد فوك ،،
نمت بخوانيكه
فقد ،،صار خبل رسمي
رفل /خالة وين محمود
فاطمه/ما ادري بي ما شفته
اكول تعاي تعشي خوش كباب حار
وخوش زلاطه ومقبلات،،
تعال يمه اسلام ،،اكعد بحظن خالتك
اركان/دنكت وشاورت امي ،،
خوش تعرفين تضمضمين لفريحه
ومحمود نايم جوه بالعسل ،،
وهاي مبوزه كبالي عبالها طالع
فاطمة حجت بصوت عالي
// يا صلوات يمه تريدلك مراه
بس أشر بصبعك واني أجيبها الك
اركان/هااا ،،اي الله كريم يمه الله كريم
فاطمة/يمه تزوج وأستجن لا تصير كطاع أرزاق
-صارت ب ١٠ انعصرت من الجوع
كمت بدلت وهو هم بدل
من طلعنا الكل بغرفهم
دخلت للحمام،،وهو لطش دخل وقفل الباب
-من طلعنا بس لفيت شعري بالمنشفة
الجوع ظالم رحنا للمطبخ حررت الاكل
ورجعنا للهول نتعشى هو يمشي ويايه نسولف ومتونسين
رفل/محمود وين جنت
فرح/بسم الله الرحمن الرحيم ،،كلت بقلبي
لان صدك صوتها خرعني
محمود/شكو تصيحين ترى اسمع منو كالج اطرش
جنت بره يم جماعتي هسه اجيت
رفل /محمود لا جذب مبين غاسل انت وياها
شعركم رطب
عادل/يابه عيب صوتج قللي
عندج شي انتي ورجلج عدكم غرفه
من تصعدون تناقشوا فوك
-فرح يابه من تخلصين عشاج
سويلي كلاص كمون معدتي خنكتني
محمود/بويه لا أدوس بليل بالكباب
عادل/وين دست هي لكيمة بس امك نافستني عليها
يا ضغطك يصعد يا مو زين عليك
فرح/كملت كلشي ولملمت الهوسة
وسويت لابويه كمون
-محمود لازم يصعد فوك اليوم
يبات يم رفل
-اجى للمطبخ بحجة ياخذ مي بارد من الثلاجة حظني وبوسني
أركان/دخلت للمطبخ اصبلي جاي
والكي العشاق كدامي
هسه حسوا شويه
كولوا أكو زلمه عزابي موجود ويانه
-حمممم ،،خررب شبيك ملكوف
مو عندك غرفه شكو كارص بيها بالمطبخ
محمود/اششش يول فضحتني ترى مرتي ما ناهبها
اركان/يمه ه ه ه ،،،بووووووووويه
تعالوا ربوا أبنكم يتحارش بأختي
وكارص بيها بالمطبخ
فرح/عزززززة اركان يمعود شجاك تخبلت
عادل/انلصم واكل وحل ،،عيب عليك
مناشب أخيك على راحته
رفل/عمي ترى ما يصير هيج
اليوم محمود اليه شكو يوصل يمها
محمود /ههههههههههه مو اني لعابه
وترديني بس الج ،،يلا صعدي كدامي
-وانت اركان عاشت ايدك على هاي اللويصة
اردها الك
اركان/بالافراح غير
عليك الله عود لا تصير عذول مثلي وتكطع راحتي احاسبك عليها هاااا
فاطمة/يمه بطل من هاي سوالفك
اركان/يمي روحي لغرفتج
ابويه يصيحلج روحي أكرصي بحظنه
-صعدت ركض للدرج اخاف أحصلي
هفه بفد شي من اليد الحنونة
فرح/كعدت الصبح وبلشت حملة تعزيل وتنظيف ماخليت لا منور ، ولا جوة الدرج
كلها تعديل وترتيب ،،مو بيدي أحب الشغل
واذا ما اشتغل أتكسر
-شكد طلعت غراض تلف وما يحتاجها الواحد
عبيت الهوسة بكونية الطحين
بس كملت الريوك ويه ابويه وامي
سحبت الكاونترات للحوش وجلف وغسل
وامي عزلت المواعين التريدهن والماتريدهن
وانوب رجعت على البيت
غسلت البردات وشلتات المنادر
-لل ٥ العصر طلعت البيت مرايا
ساعدني محمود مثلا يعلك البردات
يشيل المنادر المغسولة ،،
سلة المغسول النظيف اللي طلعته من الغسالة
-بس شنو كمت ارجف من الجوع
الولد كاموا يصيحون تخربطوا من الجوع
وابويه يصيح عليهم يكلهم// شبيكم ما يلحكن جلفن البيت اصبروا شويه
-رفل ساعدت بالشغل وغسلت البيت
ليش واحد ينكر تعبها
-واسلام كلساع ومبربع بالمي
ومكيف يطبش
-لليل البيت أستقر كلشي بي نظيف ويلمع
من باب الحوش للمنور
بقى بس للسطح على عطله الولد نبلش بي
-اليوم محمود يمي،،واني تعبانة غادية خرگة
بس سبحت ولبست شي خفيف
بعد مابيه حيل كلشي اسوي
بس هو عنده عسل على كلبه
-هل علينا رمضان ،، والحمد لله كلنا صايمين
امي كعدت متأخرة
ورفل نزلت من غرفتها ب ٤ العصر
-اني ما اعرف الا اكعد من الصبح
ونفس جدولي اليومي حتى لو ماكو تنظيف
لازم اكنس وامسح واغسل الحوش
يعني شي تعويد مو بيدي
-عجنت وخبزت عطشت
ما بقى بعد عدنه شغل
سبحت ونمت على الكاشي علمود البرودة
-اجه اركان من الدوام اتلكيته
اخذت ملابسه الوسخة شمرتهن بالغسل
ونزلتله ملابس نظيفة
يكول/ لساني خشب من العطش
سبح وصعد لغرفته
-صاح عليه صعدتله
-هاااا الزنبور الاصفر شتريد
أركان /حبابة فارة النضد
على مجالج حتى لو بعد الفطور
بس أكويلي بدلتي العسكرية الثانية
فرح /ما اعرف اكوي
بس هاي الشغلة ماعرفها
اركان /لعد اني أعلمج وانتي أكويها
فرح /ميخالف تريد شي بعد ،،
لو اروح انجطل
ذبحني العطش
أركان /روحي ،،،
تعااي فارة النضد ،،
فرح /هااا شبيك
أركان /سدي البردة و روحي
فرح /سديت البردة وطلعت بالباب كتله
//شكد صاير غثيث ودمك ثكيل
-ركعني باكيت الجكاير ويصيح
-حرامات مابيه حيل اكوم
جان شريتج بالسطح
-طلعت ركض وصارت بوجهي رفل
شفتها ميلت راسها وتباوع داخل الغرفة
اركان مجطول على المندر
لابس بس برمودا ونايم على وجه
ومخلي المخده فوك راسه
-مشت ايامي عادي بين شغل البيت
والفطور والسحور،،
-واركان استلمت كلشي يخصه بدل امي
غسل ملابس ،، اكل ،، شرب ،، كوي
تنظيف غرفته كلشي يخصه عليه
هو اخويه وهذا واجبي
عود من يتزوج وتجي مرته
بهذا الوكت أعتزل عن خدمته
-نص رمضان رفل راحت لأهلها
وأجتي ثاني يوم تضحك وتبشر امي
هي حامل
وامي فرحتلها وباركتلها
-بس اني شنو من قلة العقل
ونار الغيرة شعلت بيه
دخلت لغرفتي وشبعت بجي
-اي حقها وأكيد حالها من حالي تريد تصير ام
بس الغيرة موتتني أحسها تطعن بكلبي وتلمخ بروحي تملخ
بوكت الفطور كل احنا مجموعين على السفرة
وأمي بشرتهم
اركان باركلهم
ابويه أنشك وجهه من الفرحة
ومحمود جرها وبوسها على راسها
احنا كعدتنا بشكل دائرة
محمود ورفل
وامي واني
وابويه واركان واسلام
-لو ماعيب ابجي،،مو انانية بس غرت لان شفت الكل فرحان الها
-الغيرة مردتني وره يومين بعد ما تحملت كلت المحمود يوديني لأهلي اريد ارتاح أنفتت روحي
-وداني أبويه من الصبح بس نزل سلم
ورجع للبيت قبل أذان الظهر
-بقيت ٣ أيام يم أهلنا
رافد جاب هالة
واجني عماتي
وانجموعوا عمامي ونسوانهم
كل احنا أنجمعنا على الفطور جمعة حلوة
-الحمد لله غيرت جو شويه
اجاني محمود العصر ورجعنا للبيت
سلمت على الكل حتى على رفل
-وره يومين ما ادري ثلاثة انتبهت شو مانزلت الشهرية وجازي موعدها ما معقولة اكون حامل بهاي السرعة !!
بقيت ساكتة ما حجيت
كلت خاف أحجي وتكول رفل غارت من عندي
بنهاية أيام شهر رمضان اركان حاجاني كالي
//اذا تكدرين وما عليج تعب اني عازم جماعتي ٦ ضباط على الفطور تكدرين تسويلي فطور ،، لو أعزمهم بمطعم
كتله/عليش خساير المطعم شتريد أسويلك
ابويه كال /هااا نعزم وياكم الحجي وعايلته
ومحمود كال /أعزم صديقي بس هذا صديقي المقرب
وامي كالت/ نعزم ابويه سليم وامي صفية وخواتي
ماشاء الله صارت اللمة زينة ،، الصدك احس نفسي اتورطت بس ما حجيت عيب بعد اتعذر
رفل ما تتحرك وما تشيل عود الشخاط من الكاع وبس نايمة
امي تكول// ميخالف نعذرها لان نساوتها براسها
-ابويه كال /نجيب طلي ونذبحه
هم دفعة بلاء
وأحسن ما نشتري لحم كيلوات
-صدك الولد جابوا الطلي
وابويه ذبحه بالبيت وكصبه
امي هواي تعبت كتلها//روحي اني انظف الباجة وكراعينها والكرشة
بقيت ساعتين اشتغل انكسر ظهري يلا خلصت
انوب جابوا ٨ دجاجات بس مذبوح ما منظف
وسمج ،، ومخضر ،،
-كعدت اني وامي نظفنا الدجاج
ونظفنا السمج علمود نشوي
اريد اوكف على طولي بعد ما اكدر نكضت من التعب
-ثاني يوم وبلشنا طبخ من الضحى
اني وامي نركض ومانلحك بين الطبخ
وبين التنظيف
خالات محمود ساعدوني
-وجده صفية سوالفها حلوة
وكلساع مبوستني
وتكول/ يالمرصرصة جنج تين عجم
واركان يكلها /منيلها تين عجم ،،
فارة النضد كافي عليها
وهي تكول/أحلى فارة الشعر اسود والعيون ملونة
-ومحمود يكلها /يمه عليج الله مو صدك جنها تين
عوزها بس واحد هسه يفطر بيها
-وهي تضحك تكله/ اخذها وروح أفطر بيها منو لازمك
-واركان يكول /يمه ماتدرين شابع ختلات
-وامي فاطمة ضربته بالجبير على ظهره
-وهو يكلها/ كون ابويه هم يختل بيج
شكو تكطيعن ارزاق الوادم
وخلى الكل يضحك
-رفل بس شمت زفره حمس اللحم
كامت تذب من راسها
-امي وجدة صفية كالن//هاي بيها ولد
لان نساوتها براسها
وروحها صغيرة ما تحمل الزفرة
-وما شاء الله بوكت الفطور
أنمدت سفرتين وحده بالديوانية للزلم
وحده بالهول للنسوان
ودرب الركض ما الحك اطفر هنا وهناك
الف الحمد لله فطور العافية على الجميع
-بعد ما لملمت الهوسة
وغلست المواعين خطية خالات محمود
ما قصرن أيديهن ويه ايدي بالشغل
خدرت الجاي وجدة صفية ايدها بيها العافية
هي أستلمت صب الجاي
اني شربت كلاص يادوب يهدي راسي
ادوخ من اتفطر...
وره شوية كمت للمطبخ لملمت الباقي من الهوسة وطلعت اشمر السفر بالحاوية بره بالحوش ،، بعد ما تأكدت كل الشباب طلعوا
من صوت سلامهم على الولد وابويه
أندفعت باب الشارع ودخل علينا شاب طويل وضخم بيده باكيت جكاير وجداحة
أني انصدمت وهو بقى صافن بوجهي
الشاب انصك بالباب ويباوع عليه
-اني بالبداية جمدت ما متوقعة واحد منهم موجود الادري بي كلهم راحو هذا منو؟؟
بعدين وعيت على روحي تركته واكف
ورجعت امشي سريع ودخلت للهول
كلبي يدك سريع استحيت لان شافني بدون حجاب
-للساعة ب ١١ يلا الكل راحو
بس شنو نكضت من التعب
بعد ما احرك لا ايد ولا رجل
دخلت لغرفتي وشمرت نفسي على الفراش
-واسمع اركان يصيح عليه
ومحمود يدردم ويصيح
كمت طلعت اريد اشوف شكو
يمه هذوله عيونهم بكصصهم
محمود/وين جنتي طالعة قبل شوية
اركان/فرح منو شايفج اليوم من الولد
فرح/ما طالعة باب الحوش
بس من طلعت شمرت السفرة بالحاوية
شاب طويل دفع الباب ودخل للحوش
بس هو شافني ،،واني دخلت بسرعة جوه
اركان/ياا فارة النضد هذا ضابط نقيب صديق ويايه بالدوام
بعده ما متزوج ويدورله مراه
ومن شايفج بالحوش
اجه يحجي ويايه من كل عقله
يكول// مادري عندك خواتك
تقبل تناسبني وتنطيني اختك
-يالفارة اني عبالي شايف وحده من خالاتي
كتله /ماعندي خوات
كال/مااجذب عليك شفت وحده مليانة
وجميلة ،، وشعرها وراها
وعيونها تلمع مكحلة
اريدها حلالي وشتطلب على لسانها
كتله /هاي جنتنا زوجة اخويه الدكتور محمود ابو شكرية
يكول /لعد شوفلي أختها،،
-ومحمود دخل صدفة وسمع كلامه وتخبل
فرح بقيت اتصفن بوجوهم
//هسة اني شعلية هو يدور مراه ويريد يتزوج اني شكو
-عفتهم كاعدين بالهول
وكمت طلعت أريد أدخل لغرفتي
شفت رفل واكفة بداية الدرج شكلها تريد تصعد
رفل/صدك كح..... ما كفاج رجلي قشمرتي عليه
وبحجة ماخذج من جنتي صغيره
والله اعلم وراه ويه شكم واحد لعبتي
-انوب حولتي على اركان شبعتي من عنده
-هسه رديتي على صديقه الضابط
هذا حظ الك ...يكعد ويه الصماخات الجبيره
-رررررررررفل ............
شكرا لزيارتكم عالم روايات سكيرهوم
