رواية نارا حيدره الفصل الثامن عشر بقلم نمارق رحيم
يا شاغلَ العينين كيفَ سلبتنِي ؟
وأصبحتَ اهوى فيكَ فوق الذي اهوى
يا سارقَ الأنفاسِ كيف عبثت بي ؟
وأنا الكتومُ الحادق المُتحَذّرُ...💔
⭐⭐⭐⭐⭐⭐⭐
سـالار
گاعد بالشقة اشتغل اتصل عليه حيدرة رديت عليه وسولفلي وصدمني بالصار بناردين بسبب لؤي وامي انطاني علم اخذها وحالياً بــ بيته تبقى عنده يومين لحدما اجي لبغداد
تشكرته على موقفه وامنته تبقى يمه ومايعوفها سديته منه وعقل ماضال براسي بسبب امي امنتها علئ اخواتي بغيابي
تكون الهم سند ،،مو مصدر رعب وخوف الهم ،!!
صوچي اجيت لاربيل وعفتهم اجيت لحتئ أشتغل وادبر عيشه ماعبالي بغيابي شهرين ،امي تخطط حتئ تجوزها غصب لـ لؤي
وهذا العار اخخ يابة خل اوصل لبغداد متحلف بي اذا ما ازرع نخله براسه واحرگ شواربه الفرحان بيهم ما اطلع ابن ابوي
كرامه ورجولة انعدمت منه كل هذا وبعده مُصر على ناردين بعد ابد ما امن اخواتي عند امي إذا گدرت تكتل بنتها لان حيدرة وصلها للبيت وسبب ما يسوى تضربها وطلعت حجه حتى تزوجها غصبًا عنها
هيچ أم تسوي بــ بناتها يحرم عليها كلمة أم
خلي ارجع لــ بغداد ويصير خير
...
حيدرة
تبعت سيارة لؤي والطريق فارغ لحسن حظي ضربت سيارته نزل من سيارته الدعمتها خفيف
بقيت بسيارتي منتظرة هو الي يجي، فعلاً تقدم يمي دگ الجام لحتئ انزل فتحت الباب وگفت اگباله غطيت على جسمه بقئ يصيح ويهدد واني ساكت منتظرة يخلص كلامه الي ما الهُ معنى
ببوكس واحد نيمته بالارض ضل خشمه ينزف دم وراد يشرد لزمته وكلبشت ايديه ودفرته ببطنه فتحت صندوگ سيارتي ورجعت دفرته برجلي بـ بطنه سحبته من ملابسه للصندوگ كل ردة فعل وحركة منه اضربه
كل ضربه اقوئ من الثانية لحد ما انچب وبقئ ساكت ولازم خشمة خليته بالصندوگ ببوكس علئ علباته سكتته قفلته عليه نكتت ايديه ومسحت جبيني فحطني الگو* *
رجعت ركبت اسمعه يصيح ويضرب بالصندوگ رح يكسر السيارة ابن الحمار شغلت الاذاعة عالية حتئى يضيع صوت نباحه
أسوق طبيعي والخروف بالصندوگ اليوم عيد عندي رح ينذبح علئ ايدي
نزلته وانا رابطه طببته للمخزن گعدته على الكرسي ربطته ولصقت تيب على حلكه صوته زعجني
گعدت مبتسم وانا اشوفه گبالي يباوع إلي بتوسل رفعت اصبعي بوجهه واهز براسي..
- چؤ مو بهذه السهولة حبيبي لازم اشبع منك اليوم أنت ضيفي عيب مني اخليك تروح بدون ما اضيفك
ياحبيبي الكوا* *
ورتث جكارة وكمت طفيتها بگصته ،،
علگت خشبه چبيرة على الحايط ودگيت عليها بسامير سحبته وعلگته من ايده وشديتهن نزعت قميصي شمرته على الأرض وابتسم تقدمت يمه وگفت
:- لا لا تخاف ما راح اغتصبك
خليك شريف لاخر مره بعمرك صفي نيتك مو گو* * مثلك انا
بس عاجبني اضربك كم ضربه لان جاي الاحظ معدتك وبطنك سليمات مابيهن شيء وانا ما اقبل انت تقبل؟ طبعًا لا مو صح؟
يلا مستعد؟ أكيد مستعد صدگ چذب نبدي بالتعذيب گو* ** ..
...
نارديت
فتحت عيوني طيبة گاعدة يمي عدلت گعدتي واني لازمة راسي اباوع علئ الغرفة بأستغراب غرفة منو هاي؟ انتبهتلي طيبة وگالت..
طيبة:- الحمدلله من گعدتي حبيبتي ارتاحي اتمددي زين
- شنو صار؟ اني وين؟ حيدرا وين؟
- ما صار شيء انتي بغرفته من جابچ چنتي نايمة وصارلچ تقريبا 4 ساعات نايمة
- ليش عافني؟
- لا ما عافچ راح مااعرف وين هسه اتصل عليه لان بلغني اذا كعدتي اخابرة ،،هسه يجي لاتخافين اني يمچ وشتريدين خادمة الچ
- گلبي لا ما اريد شيء بس اتصلي عليه خلي يجي فدوا..
- آي ان شاءالله هسه رايحة ادگ عليه..
- ماشي..
راحت وسدت الباب وراها صافنة على الغرفة اباوعلها وادقق نظري بيها بتركيز وما مصدگة اني بغرفته انقبلت الاقدار!
الغرفة تركية عبارة عن چرباية نفرين وكنتور چبير وميز مصفط عليه عطور واكو بصف الميز المرايا رفوف كتب هواي وعمود بي تعلاكات معلگ عليه ملابسه الرسمية والغرفة كلها بلون الاسود والبني مابيها غير هالالوان عجيب هالشيء حتى ملابسه كذلك بس حلوة مرتبة ونضيفة..
لزمت گلبي معقولة هسه اني ببيته وبغرفتة وعلئ چربايته !!! ابدًا ما متوقعه ازور بيته وبهيج يوم علئ صفنتي دخلت طيبة وگالت..
طيبة:- خابرته هسه يجي بالطريق
هزيت راسي أي وسكتت وصدگ دقايق لا أكثر وچان يدخل.. قرب الكرسي يم الچرباية وگعد باوعلي وگال..
- الله بالخير يابه شلون صرتي..
- الحمدلله ارتاحيت من نمت..
- زين
عيونه صارت علئ طيبة گال الها..
- روحي بابا اريد احچي وياها
طيبة:- صار حبيبي
طلعت وسدت الباب بقينه ساكتين والهدوء سيد الموقف واحد صافن بالثاني لساني نبلع ومتوترة
حيدرة:- ها ؟
-ها ؟
أبتسِم تالي ضحك بهدوء..
سألته:- ليش تضحك ؟
- العار عندي حاليًا
- لؤي قصدك؟
- ليش اكو غيره عارات؟
- لحظة صدگ لو تشاقة؟ شلون عندك شسويتله؟؟
- تبعته وشمرته بالصندوگ واخذته للمخزن
- خطفته يعني؟
- لا يابه اني اخطف ؟ هاي مو رجوله مني
- لعد
- هو عار تدرين بي لذلك خليته بالصندوگ مثل الخروف ماچنت لازم سلاح ولا سچين علئ رگبته ما دافع علئ نفسة صار مثل الطلي المؤدب كم بوكس علئ مقبلات من حيدرة رجع عقلها لراسه
هذا يعتبر خطف بويه؟ لا طبعاً چان ناقص تربية لا أكثر
- مافهمت يعني خطفته بس ضربته هاهيه؟ رجعته؟؟
- چؤ صدگ چذب چان ضيفي اليوم طبعاً ما ارجعه سالم لازم اضيفه من مضايف وكرم حيدرة
ضحكت وهو ضحك بصوت عالي طلع موبايله ثواني شغل فيديو وشمره عليه بحركة سريعه لزمتة
- چان انكسر لو ما لزمته
- خل ينكسر فدوه الچ
أبتسمت باوعت علئ الشاشة مطلع إلي فيديو سألته شنو هذا؟
- مو گلتي شسويت بي شوفي الفيديو واستمتعي بالمشاهد شغلي
فتحت الفيديو بأستغراب من كلامة ..
چان اشوف لؤي معلگ علئ خشبه من ايدي وحيدرا يضربه عبالك دا يلعب ملاكمه علئ جسمه
لابس بس بنطرون وصدرة عاري وشعره نازل علئ جبينه ،
مصدومة وبنفس الوقت خجلت لأن اول مرة اشوفه بدون قميص.. أبتسمت من اشوف لؤي يتوسل بحيدرة لحتئ يتركه واشوفه يتعذب يضربه ضربة اقوئ من الثانية..
من يمي وجعتني بطني
اباوعلة للفيديو ومندمجة وما منتبة بالي اگوله واصيح:- اييي حلللل بي اييي كفووو بعد عمرييي
حيدرة :- منو بعد عمرچ ؟
- ها
ضحك ضحكة مسموعه وگال:- الظاهر بعد هذا الفيديو ارتاحيتي صح..
- والله ارتاحيت هواااااي..
ضحك وگال اي الحمدلله چَا انا شريد..
رجعته للفيديو دايضرب بي گال اله وهو يضربة
-هاي لان خطفتها ،، وهاي لان حاولت تعتدي عليها ،،
وهاي بسبب دموعها ،،وبچيها وقهرها ولوعت گلبها من خمس سنوات ،، بسبب رجفتها منك
ضربه قوي بحيث اني من يمي توجعت كمل كلامة وگال وهو يضربة" وهذه تعادل تحرشاتك بيها
چان يحچي بحركة گلب وعرگان ،
انتهئ الفيديو خلص واخذ الموبايل واني تحت تٲثير الصدمة من كلامة..
- وجهچ ينطي الألوان ليش
- شون عرفت بكل هذا؟
- شنو هو؟
- شلون عرفت لؤي هيج مسوي بيه خمس سنوات؟
أبتسم:- انا حيدرة ماينظم عليه شيء
سكتت ودموعي نزلن على خدي..
- ليش هسه تبچين لؤي وبعد أبد ما تشوفي خلقته بمعنئ طلعته من حياتچ نهائياً لا تخافين بعد
- ليش هو وينه وين وديته
- بالسجن .
- شنووو صدگ ؟
- آي وحتى اسمچ رح ينساه
سكتت تالي گلت اله..
- شكراً حيدرا هواااي شكرااا
- على شنو بويه ..
- على السويته اليوم وكفتك وياي ومساعدتك ما رح انساها..
قاطعني وگال:- ولو ماعندي ميانة وياچ بس أحب اكلچ انچبي
ابتسمت وگلتله ليش..
- الي سويته ما منتظر شكر منچ
لأن الي سويته اتجاهچ من دافع الغيرة وانتي اجيتي لعيادتي واحتميتي بيه وطلبتي اساعدچ واوگف وياچ صعب ترحين وما اساعدچ وبنفس الوقت اني اريد اطيح حظه ابن خالچ أريد ادبه عديم الشرف
والي عرفته هو أبو نسوان وكل يوم يجيب بنات لشقته حتئ أغتصاب جبر قريت معلومات عنه وگفت عقلي چنتو مخدوعين بي حتئ مخدرات يشرب تدرين لو لِا ؟ الي سويته قليل بحقة المفِروض اقتله بس أريده بالأول يتعذب
- فدووه لااا تكمل لعبانه نفسي منه ما اريدك تزيدها عليها والقران ما اتحمل هاهيه حيدرا يطبه مرض دام خلصت منه ارتاحيت
- صار يابه..
- صدگ حيدرة احد يدري بيه اني بـ بيتك ؟
- خابرت سالار اول ماجبتچ وانطيته علم فد يومين تبقين يمي لحد مايرجع من أربيل
- اي همزين سالار يدري بيه
- على كلن انتي ارجعي نامي ارتاحي اذا ما نعسانة اطلعي روحي لطيبة تلگيها بالمطبخ تطبخ لو جاي ترسم روحي يمها
- اي والله نمت هواي واحس مابيه ارجع انام بعد
- چا كومي صدگ انتي جوعانة؟
سكتت لأن صدگ جوعانة حِيل واستحي اگول
علئ صفنتي ضحك بقوى :- شكلچ مشتهيه ومستحيه
- شنو شقصدك؟!
ضحك بصوت عالي وگال..
- قصدي شريف شقصد مثلاً
گومي وياي..
گمت وهو طلع سبقني امشي علئ كيف جسمي بعده يأذيني من الضرب دخلت للمطبخ ورا صاح لطيبة اجت تركض گال الها..
- ابقي وياها سويلها اي شيء لحد ما ارجع طالع اجيب عشه
اتفاجئت.. عشه؟ ليش بيش الساعة هسه؟
حيدرة:- بـ 8
- ليل ؟
- آي
- والله ما ادري عبالي عصر
- چا الساعات النمتي بيهن ما ينحسبن باليوم بوية ؟
- هم صدگ ههههههه
قبل مايطلع گال الي.. شنو مشتهيه اجيبلچ للعشه؟
- آي شيء لا اتعب نفسك والله
- لا بالعكس تعبچ راحه گعدي لحد ما اجي
- فدوااا لعمرك ماشي
گعدت وهو راح ضليت اسولف وياها مسولف الها حيدرة بالصار وياي نص ساعة واجه خله العلاليگ علئ الطبلة..
- بابا رتبي الطبلة حتى انا جعت وعلي..
اني استحيت احس روحي غريبة بينهم ومصدومة منه احسه متغير معقولة هذا حيدرا.. ساعدت طيبة بالترتيب جايب فلافل والريحة تسطر وبيتزا دجاج، ولحم كص بسفري وكباب وقواطي ببسي ما مخلي شي ما جايبه استحيت منه خاف هذا علمودي..
اخذت الطبلة للأستقبال مالتهم واني امشي ورا طيبة مثل الثولة اجي منا واروح منا گعدت بصفها لازكه روحي يمها خجلانة من حيدرا وهو گاعد گبالي بمسافة..
انطاني لفتين كص هو سواهن :- اكلي ناردين لاتستحين يابة اكلي علئ راحتچ
اخذتهن من ايده بديت أكل
- صدگ نسيت اگلچ لا تشربين ببسي مو زين عليچ وجسمچ مو قوي يكسر عظامچ بدل ما يقويها
،،جبتلچ حليب خلصي عشا واشربي ..
سكتت بس هزيت راسي اكلت شويه سمعت صوت الباب انفتح چان يدخل حسن اخو وهو يضحك و يگول..
- يمه حويدر يمه يمه حويدر يمه اهلي وعمامي يمه حويدر يمه احبه وعلي فلك طره مو اخو چنه حلغوم لك حويدررر وينك
دخل يمنه وانصدم بوجودي والمفتاح طاح من ايده
حيدرة:- الله يطيح حظك شهرتنا وخزيتنا
حسن:- احم هاي منو عدنه
حيدرة:- امشي اصعد لغرفتك
حسن:- طويب هاي منو چني شايفه لا صدگ منو لا لحظة هاي مو ناردين اخت سالار؟
طيبة:- اي ناردين
حسن:- شلونچ خيتي شخبارچ شنو شعجب عدنه جايه لوحدچ؟ سالار الجحش وينه اجه من اربيل؟
هزيت راسي لا..
أريد احچي جاوبه حيدرة
- روح لغرفتك حساني بعدين اتفاهم وياك
حسن:- شعجب تحچي وياي باحترام عجيب ماعرفتك
حيدرة:- اگوملك ؟
ضحك:- لا شنو ما رايد روحي رايح رايح طويب ضميلي فلافل لِا تنسئ اخاك
راح واني احس غركت بهدومي ما رفعت راسي كميه الخجل الحسيتها بهذا الموقف لا يُحسد عليها همه يردون ياخذون راحتهم واني عدهم
حيدرة :- ها وين ضميتي راسچ بويه بس لا استحيتي؟ لا تصدميني ناردين الجريئه الماتخاف وبطولاتها كلها يمي تستحي ؟
- ها لا عادي دا أكل
انتبه إلي اكل باللگمه ساعة شافني مستحية اخذ قوطية وگام..
- الحمدلله رايح انا اخذي راحتچ خاف تستحين تاكلين بوجودي
- لا لا ارجع كمل عشاك والله ما مستحيه
- چا خدودچ حمر ليش ؟ خلي أروح ولچ
احس گومته من عشا شگد عيب اكلت وگمت رجعت للمطبخ غسلت ايدي تالي بقيت واكفة وين اروح هسه ؟
رجعت لطيبة دا تاكل كلت الها ..
- شسمه اشو اني نعست من تعشيت
طيبة :- اي واحد من يشبع يحس روحه ثگيل تالي ينعس
ضحكت - ماعرفتچ طيبة منيلچ هلمعلومات الخطيرة
- چا شعبالچ ههههههه
كعدت يمها وكل شوية اغفئ واتثاوب
طيبة :- يمكن حيدرة راح طلع انتي نعسانة روحي لغرفته ارجعي نامي اندليتيها مو ؟
- اي عفية والله متت نعس
رحت صعدت الدرج غرفتة فوگ فتحت الباب وچان اشوفه واكف بباب الكنتور يگلب بالاوراق وقميصه علئ چربايه وبس بالنطرون
عزه حرفياً نقطه دم مابقت بجسمي من الخجل وهو من شافني كال :- چان دكيتي الباب شسالفه
غمضت عيوني ودرت وجهي واني لازمه يده الباب..
- والله ما ادري بيك موجود بالغرفة اجيت حتئ انام والله و كالت إلي طيبة يمكن طالع حيدرا
- اوكفي يابه بقت على جسمي تستحين منه شفتي بالفيديو خل ابدل وادخلي لا ترحين
سكتت بدل وسحب اليده الباب مني..
- ادخلي ادخلي
دخلت وهو طلع يمشي ويدگم بقميصة رحت ورا..
- لحظة حيدراا
التفت.. ها ناردين؟
- ما اريد انام هنا الغرفة غرفتك خل اروح لغرفة طيبة او بالاستقبال عادي بأي مكان انام مو مشكلة
حيدرة :- شهل حچي خطار انتي ضيفتي بيتي تردين انومچ بٲي لا تعيديها بعد
- زين ارجع لغرفتك؟
- غرفتي غرفتچ عادي ماعندي مشكلة نامي واخذي راحتچ ،طالع انا واتاخر من اجي انام بغرفة حساني
إذا احتاجيتي شيء گولي إلي لاتستحين
- ماشي شكرًا الك تعبتك وياي
رفع حاجبة وضحكت
- لا لا اسحب كلامي تعبي راحه هههه
ابتسم اي عفية لاتعيديها بعد..
رجعت للغرفة سديت الباب عززه يحچي وياي ويخاف عليه ويساعدني ورضى انام بغرفته نوب شيقصد غرفته غرفتي ؟؟
تمددت على چرباية تغطيت بالبطانية ونثرت شعري على المخدة حتى النوم طار من عيوني
دخلت طيبة انطتني بجامه نوم ميكي ماوس خفيفه ومريحة بدلت وخليت لبسي بزاوية همزين بدلت چنت مختنگه من التنورة
چان اكو ميز بصف الچرباية فارغ بي بس ادويه انتبهت للكتب ما سيطرت علئ نفسي وگمت رحت اگلب بالكتب تقريباً اكثر من 30 كتاب مسطرات على رفوف
وكع نضري علئ اسم كتاب جذبني رجعت لچربايه تغطيت وبديت اقرا ..
ضليت فوگ الساعتين اقرا و مندمجة انكمزت على صوت دگه الباب.. حيدرة گال افتحي
كمت فتحته چان لابس تراكسود..
گال:- ها شنو كعدتچ؟ چنتي نايمة..
- هاا لا مانمت
- الـ هاا مالتچ فاهيه
ارجعي نامي اجيت اخذ الابتوب واطلع
- ماشي
تذكرت الكتاب..
- صدگ حيدرا اريد اگلك انو اخذت كتاب لأن ما نعست وشسمه بديت اقرا بي عادي لو ما تقبل واسفة لان قريت بدون ما اخذ اذنك بس جذبني الاسم وماتحملت ما اقرا كم صفحة منه..
- لا عادي بويه اقري الي يعجبج واذا تردي اخذي گدامج كتبي كلهن بس بقية غراضي لا تتقربين منهن اكو ملفات وأوراق مهمة
- لا بس كتاب ما امد ايدي على غراضك اعرف..
- اي عفية
اخذ الحاسبه وراح.. استمريت اقرا خلصت نصه من الملل تالي عفت الكتاب وضليت افكر بي حضنت مخدته ونمت..
ثاني يوم گعدت باوعت للساعه بـ7 طلعت من الغرفة ما منتبها للبسي اصلاً نسيت اني ببيت حيدرا
باوعت علئ البيت عزه هذا مو بيتنه!! وين اني مشيت للمطبخ شفت حيدرا تالي تذكرت ضحكت وضربت راسي بغباء..
چان يتريك ويكتب بالابتوب ..
گلت اله.. صباح الخير
جاوبني:- صباح الورد بعد وقت شعجب گاعدة؟
- متعودة هيج وقت اگعد للكلية
- اها حلو
- صدگ حيدرا اليوم اداوم؟
حيدرة :- لو تأجليها افضل لان لا ملابسچ موجودات ولا محضرة محاضراتچ
- صدگ نسيت اي لعد ما اروح احسن
- سالار الليلة يجي
- عزه صدگ والله؟ فدوااا شگد مشتاقتله واريد احضننننه فرحتني من الصبح !
من كلت اريد احضنه عاف الكوب وركز بكلامي تالي گال اي من يجي راح يتفاهم وياا امچ..
- ولؤي ؟
- مو كلت الچ انسي هو بالسجن أمرتهم يعذبو ومايطلع
الليلة يجي سالار گال إلي اريد حصة بلؤي عاد گلتله تأمر وتدلل
- شنو امرتهم ؟
رفع حاجبه.. ورجع يكتب باللابتوب وهو يگول
- لا تعلقين على كلامي افضل..
سكتت ..
- روحي نامي افضل الچ لان رايح لعيادتي انا وطيبة گلت الها لا اتداوم اليوم
كام راد يطلع انتبه عليه لابسه ملابس طيبة مالت النوم ..
سكت وسمعته همس - صبرك يااالله
باوعت لبسي شبيهن؟ ما بيهن شيء! طلع وراح واني رجعت للغرفة..خلصتها نوم والظهر محد موجود لا حيدرا ولا اخو..
بس اني وطيبة چانت عدها مسئله بالرياضيات ماتعرف تحلها كلتلها تعاي اني احلها الچ مو صعبه علئ ناردين نفخت روحي گدامها تالي حليتها وما اعرف الحل صح لو غلط
لليل اندگ الباب وكفت بالباب الطارمة راحت طيبة تفتحه..
وچان يدخلون ،، حيدرا وسالار ......
