رواية اغفري لي الفصل الثامن عشر بقلم أوتار حزينة
غاده
وكفت بالحمام لازمه الجهاز بأيد ترجف
واهز براسي لااااا هذا غلط
اي اني اجتني الشهريه اكثر من مره بس
هذا الجهاز مايغلط اي اعرفه
زين مايقبل غلط
«،،،لا يجوز غلط واني مو حامل
الباب اندك صاح
«،،،،يله تره تاخرتي
تماسگت بصعوبه خليت الجهاز بعلاكه
سوده وطلعت شايلتها هو ماكو
اخذت هدوم بدلت على
السريع
طلعت للمطبخ اذكرت جنطتي والعلاكه
بسرعه رجعت عليهن جبتهن
هو واكف يم الباب يشرب
جاي كال
«،،،ها نروح
«،،،،،اي
سلمنا وطلعنا ذبيت العلاكه بالحاويه
ورحت صعدت ليورة ماحجه شي
حرك طلعنا واني بغير عالم
افكر اذا طلعت حامل شراح اسوي اتخبل
غير اموت ماجنت اريد ييصير
عندي طفل ومن منو من
الي اعتدى عليه
باوعت علي جان صافن عليه بالمرايه
سأل
«،،،،هم عندج هبوط
«،،،،لاا
«،،،وجهج اصفر
«،،،ااارريد
سكتت بلعت السالفه سأل
«،،،كولي شتريدين
بلعت ريگي بصعوبه وجاوبته
«،،،اريد اروح دكتورة،،،،،من اطلع من الدوام
احتاج فحوصات هن ماكو بالمستشفى
«،،،اي من اجي عليج الظهر اخذج بس
احجزي اذا تعرفين دكتورة زينة
«،،،اي
بالدوام كلت ليلى فرحت وكالت
«،،صدك غادة
«،،،ولج ليش فرحانه وانتي تعرفين ابوه
شسوه بيه وشلون صار
سكتت كملت بعيون مغوركه
«،،،شاسوي ليلى اذا طلعت حامل والله
اموته مااريد طفل منه
«،،،لااا حرام هو شنو ذنبه بالصار غاده ديربالج
تسويها انتي انقذتي ابوه من الموت
لان كلتي روح واتحاسب عليها
شلون هسه تريدين تقتلين
ابنج
كمت ابجي حظتني تردد بقهر
«،،،،هذاا ابنج قطعه راح يصير منج عوفج
من ابوه هو ظلمج والله ياخذ
حقج منه
كملت الدوام بصعوبه هي حجزت اليه يم
دكتوره وخابرت خاله كالت اتاخر
شويه بس ماكالت الها راح توديني
للدكتورة ماردت تحجي لماما
وتخابرني تسأل
خلصت دوام طلعت جان وتكف بره رحت اله
هي وياي نزل يباوع عليه وعليها
كتله
«،،،ليلى صديقتي راح تجي وياي للدكتورة
«،،،،تمام تفضلي خيه
«،،،،لا اني عندي سيارتي راح اطلع قبلك وانت
الحگني
«،،،،تمام
ليلى راحت لسيارتها ،،،، صعدت ليوره
حرك وطلع وراها طول الطريق
ساكته وافكر بروحي
مره اكول مو حامل لان اجتني الشهريه
ومره اكول لا الجهاز طلع حمل
دخت والتفكير دمرني وصلنا وطبينا بسرعه
لان جنا اول الناس حجيتلها حالتي
كالت
«،،،نامي خلي افحصج بالسونار
تمددت جسمي حسيته ثلج وگلبي كام
يدك سريع فحصت بطني سالت كم سؤال وهي
تركز بالشاشه اردد
يارب مو حاامل بس هي كالت
«،،،،،ماما انتي حامل شهرين
انضربت براسي وگلبي راد يوكف من القهر
دموعي نزلت وكمت اشهك بصوت قوي ليلى
اجت عليه حظنتها ابجي انهاريت
يم الدكتوره
«،،،شبيها عبالك ماتريد طفل
«،،،،اي دكتوره
ليلى جاوبتها جذب
حاولت اتماسك بس ماكدرت ظليت
ابجي
«،،،خليها تغسل وترتاح شويه وبعدين
جيبها
الدكتوره حجت وياها اخذتني للمغاسل
غسلت اليه اردد بشهكه
«،،،،شلون صار هالشي مو اخذت مانع
كلت حتى مايصير وهو بعد ماتقرب مني
وهي اجتني اكثر من مره
«،،،،خاف نزف مو شهريه
جاوبتني واخذتني لغرفه الانتظار هو جان بره
يم سيارته كعدت ابجي النسوان تباوع
عليه هي كعدت يمي تردد
«،،،كافي تبجين صار بعد شتريدن تسوين
«،،،ماأريده راح ااذبه
جاوبتها وجسمي كله يرجف
ردت بصوت ناصي
«،،ولج حرام شبيج انتي مو تعرفين هاي روح
وراح تتحاسبين عليها
مراجعه طلعت السكرتيره حجت
«،،،يله عيني خلي اختج اطب حتى تكمل فحص
يم الدكتوره
اخذتني اجر برجلي ودمعتي بعيوني طبيت
من كعدت كتلها بدموع
«،،،دكتوره اني اجتني كم مره وجنت اخذ مانع
شلون صار الحمل
«،،،عادي ماما هذا نزف ومرات المانع ماايشتغل
«،،الطفل زين
ليلى سالت
«،،اي وضعه تمام بس هي وضعها مو شي يعني
شوفيها ضعيفه كلش حتى لازم يزيد وزنها
وتهتم باگلها لان مثل ماجاي تشوفيها هي
صفره كركم وهم اريد تسوي
تحليل دم خلي اشوف
نسبته واقرر العلاج
الها
«،،اي دكتوره
طلعنا اني وياها اخذولي دم كعدنا نتتضر
ودمعتي مانشفت هي تهدي بيه
بس حالتي جانت فد
مره
وره مشوار التحليل طلع ورجعنا الها جانت
النسبه مو زينه وانطتني مقويات
هوايه ومثبت لان ذبيت
دم
طلعنا من يمها ،،،،، بالممر شفته اجه باتجاهنا ختلت بحظن ليلى ابجي
بشهكه
حمزه
ثگلت خطواتي من شفت وضعها وشلون ختلت
بحظن صديقتها عاينت الها رادت تحجي
شي بس هي گضتها بقوه من
ايدها هالحرگه خلتني اسأل
،،،،شبيها وشگالت الدكتوره
«،،،مابيه شي
«،،،،شلون وانه كاعد اشوفج صايره فد مره
گولي شبيج وشگالت الدكتوره
جاوبتني بعيون تبجي
«،،،عندي قرحه بالمعده
عاينت لصديقتها صفنت
عليها بعدين كالت
«،،،اي ووضعها شويه مو زين ولازم ترتاح
«،،،يعني هاي ماتتعالج
«،،،،اي بس تاخذ وقت
عرفت هالشي من القهر الي صار بيها مني
ومن اهلها حرگه دمها صار مرض
بمعدتها مااعرفت شاحجي
ولا كدرت انطق چلمه
«،،،يله امشي اكعدي بالسياره حتى ترتاحين
صديقتها حجت واخذتها من يمي ظليت صافن عليها مقهور ومخنوك من السويته بيها
مشيت بنفس الخطوات
وصلت يمهن سألت
«،،،وين الوصفه
««،،،هاي
ليلى انتي جبيها
حجت بسرعه انتبهت لنظراتهن مشت من يمي عاينت الها لچن ماحجيت شي،،،،من وره وضعها دايره وجهها مني ودمعتها بعيونها
رجعت وره مشوار جايبه العلاج سلمت عليها
وراحت للسيارتها
صعدت هي ليوره ،،،،،،،،كلت وانا اعاين
الها بالمرايه
«،،،،اوديج لغير دكتور حتى نتأكد من هالشي
«،،،،لاا
«،،،،انه
سكتت شاحجي شأكول وانه جنت سبب
هالشي ذبيت حسره عاينت عليه
بعيون حمر ودمعتها تطيح
على خدها منظرها
لعب بحالي لعب چن ايد من نار
گضت گلبي
«،،،،ماجنت اريدن يصير بيج هالشي
شهكت وخلت ايدها على وجهها غمضت
عيوني بقوه مااريدن اشوف حالها
واتعذب بعد اگثر
لچن صوت بجيها زرف گلبي وحرگ روحي
ظلت تبجي ماسكتت لا انه اعرف
شلون اوسيها ولا اعرف
اطيبها من جرح
ايدي
عفتها اطلع نهده گلبها بس هذا الشي الي
كدرت اسوي الها وره مشوار سكتت
بس ظلت تشهك كل
لحظه كالت
«،،،،وديني للبيت
حرگت طول الطريق ماعاينت الها ولا حجيت
شلون اواسي مجروح وانه سبب جرحه
اذاا احجي الچلمه مثل واحد يذب
ملح فوگ الجرح
وصلنا نزلت قبلها خفت لاتطيح لان اعرف
وضعها من تتعب من البجي يجيها
هبوط وكفت مسافه عنها
نزلت مالت ردت
اگضها
سحبت روحها بعيد عني ماحجت شي مشت
تجر برجلها رحت وراها مسافه
وانه اكولن هسه تطيح
طبت للمطبخ بس شافنها عمتي وحبوبه
فزن وكالن
«،،،،يمه اسم الله شبيها غاده
عمتي اجت عليها گضتها انهارت
بحظنها تبجي بصوت قوي
حبوبه عاينت عليه
سألت
«،،،حمزه شبيها البنت وشگالت الدكتوره
جاوبت بتعب
«،،طلع عدها قرحه بالمعده ووضعها مو زين
«،،،اسم الله الزهره وومالها علاج
عمتي حجت مشت من يمنا وراحت
لجوه كعدت مهموم ومقهور
«،،،هاي اجتها من حرگه الدم والقهر
حبوبه حجت وكملت بحزن
«،،،اي وين يطيح غير بدن بني ادم وهي
المسكينه شبعت قهر من اهلها ومن
سكتت انه كملت
«،،،،،مني انه هم كمليها يمه ليش سگتي
انه هم ماقصرت وياها لعبت بيها فلك
وشلت خطيتها وراح تظل برگبتي
الى يوم الدين
«،،،،شاحجي يمه اگولن اي اقهرك وانه كاعد
اشوفك شلون صاير من وراها
«،،اااخ يمه والله كاعد اموتن من السوته ايدي
واريد اكفر عن ذنبي لچن شما
سويت ماراح ارجعها
مثل الاول
سكتت عمتي كالت
«،،،اروحن اشوفها
«،،،،اي يمه روحي يمها لاتخلوها وحدها
ليلى
رجعت للبيت افكر بغاده ومقهوره عليها
وخايفه لاتروح تسوي بروحها شي
وتموت الطفل وهو ماله
ذنب بالصار
بس كلت لاا ماراح تسويها لان اعرفها تخاف
الله اي شفتها شلون من صار بيها الصار كالت اريد
اموت روحي بس اخاف الله وهذا
ابنها قطعه منها ومستحيل
تأذي
وصلت لبيتنا نزلت وطبيت جوه وكفت
بالكراج وكلت
ماراح شي لماما خاف تروح تحجي لخاله
سوسن وتروح تتصل على غاده
وتزعل عليه لان حجيت
ذبيت حسره ورحت للمطبخ سلمت عليها
وصعدت لفوك،،،،، بليل اني كاعده
وي اهلي،،، افكر بيها كلت
خلي اخابرها واشوفها شلونها كمت
بابا كال
«،،،اكعدي بنتي عندي حجي وياج
رجعت كعدت كمل
«،،،،اليوم صديقي ابو خالد حاجني عليج
مثل كل مره من اسمع هيج كلام روحي تختنگ
واشوف قائد كدام عيوني كال
«،،،واني انطيته كلمه انتي لابنه
فزيت من مكاني وجاوبته بذهول
«،،،،شنوو بابا وشلون تنطي گلمه بدون
ماتسألني
«،،،راح اسالج وترفضي
جاوبني وكمل بعصبيه
«،،،،الولد خوش ولد استاذ بالجامعه وفاهم
وواعي ومثقف وابن ناس اعرفهم
يعني من راح انطيج اله
امن عليج ومااشيل
همج
«،،،،اني مااريده گله ماقبلت
«،،،مووو بكيفج اني انطيته كلمه ومستحيل
ارجع بيها بعد
«،،،،ماما احجي شي
باوعت علي رادت تحجي اشر الها بأيده
كام ورد
«،،،،امج ماعليها باي شي ولا راح تحجي كلمه
والي اگول علي يصير
دموعي نزلت وجاوبته
«،،،بابا ااني مااريد ازوج
«،،،ليييش
صاح بيه وكمل
«،،،،فهمني ليييش من وره ذاااك مو
درت وجهي كمل بصياح
«،،،وولج لييش تريدين تخسرين عمرج
من ورة واحد مااايسوه فضحج
ووخلاج تريدين تموتين
روحج من وراه
ماما كامت وكالت بخوف
«،،،فاروق مو هيج
«،،،،اااش،،،،ولا كلمه ندى
صاح وكال
«،،،فهميني الى متى يجوج وانتي ترفضين
سكتت كمل بقهر
«،،،،ولج عبالج مااعرف انتي رافضه الزواج من
وراه مااعرف انتي يوميا تبجين
علي بس ياريته طلع يستاهل
«،،،كاافي فاروق
ماما جاوبته واجت ليمي تردد
«،،،كافي تقهرها انت ماجاي تشوفها شلون
صايره
«،،،،اي اني كاعد اشوفها شلون صايره ومن ورة
هالشي واريد ازوجها تاج راسه
لابن اختج بلگي تنساه عاد
وتكدر تسوي عائله
قبل لايخلص عمرها
«،،،،واني مستحيل ازوج هذا او غيره
خزرني بغضب وصاح بيه
«،،،توووكفين بعيني ولج
مااجاوبته كمل بعصبيه
««،،مووو وكفتي بعيني من وره ذااااك شحصلتي
غير الفضيحه
دموعي زادت وصفنت علي بقهر
كمل
«،،ااخر الكلام ولج الخميس هذا عقدج وغصبا
ماعليج تقبلين بالولد واذا رفضتي
لا انتي بنتي ولا اعرفج
بعد
مشيت من يمه اشهك وابجي صعدت غرفتي طبيت اريد اصرخ،،،،من قهر گلبي
ومن وره السواه بيه ومن كلام بابا الي
مانسى،،،، بس ماصرخت
كتمتها بگلبي وجانت تطلع
بشهكات قويه
ماما طبت كلت بتوسل ودموع
«،،،ماااريد اازوج ماما احجي ويا اني اريد
اظل يمكم مو كتلج ذاك اليوم
وهو كال خليها براحتها ليش
هسه غير رايه
«،،،من ورة قائد غير رأيه خايف عليج منه
يعرفه مخبل ويخاف لايسويلج
شي
،،،،مااارح يسويلي شي تعرفي يحبني
ومستحيل يأذيني
«،،،ولج هذا من عرف تخبل ماظل عقل براسه
وخايفين عليج منه انتي مو گلتي
كام يجي عليج وتعارك وياج
اكثر من مره
«،،ورحتي كلتي اله موو
جاوبتها سكتت كملت بوجع والم
«،،،لييش ماما ليش حجيتي اله
«،،اني مااريد اغلط نفس الغلطه ذيج ومااريد اضم
علي شي باجر اذا صارلج شي منه
لاسامح الله اني شاحصل
اظل بالملامه طول عمري
من روحي ومن ابوج
«،،،وانتو عبالكم هو اذا درى راح يسكت
راح يتخبل ماما ويجوز يسوي الشي الي خايفين
منه
«،،محد راح يدري كلشي راح نسوي بينا
وبين اهل الولد وماراح احجي لاي احد ومن تعقدين ينتهي كلشي
«،،،ماااراح ينتهي اي شي لان اني مااريد اازوج
مو غصب ماما كولي لبابا خلي
يرفضه اني مااريد اعوفكم
الله يخليج خليني
يمج
«،،،ولج اافهمي ابوج قفل وانتي تعرفي لا اني
اكدر احجي ويا ولا انتي ماشفتي
شلون حجه بعده
مو ناسي ومن رجع
قائد هيج الجروح
الي بگلبه
بابا صمم على رأيه شكد توسلت بي وبجيت
حتى ماما ادخلت وتعارك وياها
وسمعها حجي يوجع
ابجي بغرفتي واردد
«،،،ليش رجعت بس فهمني حتى اتعذبني بعد
اكثر واروح لواحد اني مااريده
لو ظال بعيد هوايه احسن
جان لاشفتك ولاتعذبت
هالعذاب
قائد
نفس وضعي ماتغير اروح من وكت الصبح
انتظرها يم المستشفى تجي اشوفها من بعيد
وبعدين اروح لشغلي بس
صارلها يومين ماكو
وانشغل بالي بليل خليت رقم جديد وخابرتها
مافتحت خط بعدين انحضرت ذبيت
حسره وكلت
«،،،،مااريد شي بس سمعيني صوتج
حتى ارتاح واعرف انتي مابيج شي
ماجان عندي غير بس هالرقم خابرت خالتي
رباب جاوبت
«،،هلا قائد
«،،هلا خاله شلونج وشلون الاهل
«،،الحمد لله انت شلونك
«،،،مو زين خاله
سكتت كملت
«،،صارلي يومين مو شايفها وخايف لابيها
شي
«،،،قائد عوف ليلى وانساها حتى انت ترتاح
وهي هم ترتاح
عكدت حواجبي وسالت
«،،،ليش هالكلام مو جنتي ادكولين خليها تبرد
واحنا نحجي وياها هي واهلها
ماردت حجيت
«،،،خاله صاير شي
«،،،لااا
«،،،لا صاير ومن صوتج وكلامج اعرف انتي
كاعد اجذبين عليه
«،،يول عوفها لا هي من نصيبك ولا من قسمتك
گلبي نغزني كمت لحيلي وسالت بغضب
«،،،عجل قسمه منوو
هم سكتت صحت بخبال
«،،،راااح ينطوهااااا للغيري مو
كامت تبجي واكدت جرحي صحت
بجنون
«،،،،والله ااااقتله للياخذها اذبحهم
اذااا انطوها لغيري
مقداد طب سأل
«،،هاااي شبيك تصيح
سديت الخط اخذت السويج مشيت
گضبني امي اجت وراها مرته
يسالن
«،،،هاي شصااير
جريت روحي بقوه طلعت وكف بوجهي
صحت بي
«،،،وووخر من وجهي
«،،،ولك بس فهمني شصاير
الصااار ليلى راح تروح من ايدي
«،،،منو كال
ماجاوبت هديت لبره هو يگضب بيه
وامي هم تردد بخوف
«،،،ولك بس فهمنا من گلك
اخويه گضبني بقوه نفضته اخزر بيه
وصحت بخبال
«،،،هدددني ولاتخليني امد ايدي عليك
مشيت اسمع صراخ امي صعدت بسيارتي
هو صعد يمي حركت بشحطه كال
«،،،بس اهدأ وخلينا نصرف صح
«،،،ووولك ياصح راح تروح من ايدي والله
احرگ اهلها اذا طلع هالشي صح
صحت بي وگبت بيه نار طول الطريق يهدي
بيه ويگلي لاتتهور ولا اتتخبل خليني
اني احجي وخابر مهيب وحسين
كال الهم تعالو لبيتهم بسرعه
وصلنا نزلت انهد من غضبي هديت على الباب
گضبني وكال
«،،،،اوكف وخليني اني احجي
دك الجرس وره مشوار الباب انفتح من
شافنا عم فاروق خلقته انگلبت
كال
«،،،خير يابه هم جاي هداد علينا
««،،عم ممكن نحجي وياك
اخويه حجه گله
«،،،مقداد اني احترمك واحبك وماانسى وكفتك
بذاك اليوم بس مااكدر اكلك تفضل
لان هذا وياك
تقدمت وكتله
«،،راح تنطيها موو
اخويه گضبني كملت بگلب محروگ وعيون
صايرات نار
«،،عم اني شنو ذنبي بالصار مو اني هم انظلمت
ناس طلعت من بيت اگبالهم كال
بضوجه
«،،،طبو جوه
طبيت بسرعه اخويه وياي رحنا للاستقبال
كال هو واكف وبعصبيه
«،،،،اريد اسالك انت باي عين جاي للمره
الثانيه علينا انت ماتعرف بروحك
شسويت
«،،اعرف والله اعرف وتندمت ندم جبير ودفعته
من عمري خمس سنين بس اني هم
انظلمت وانضحك
عليه
«،،اي عم فاروق انت تعرف اللعبه الصارت تعرف
هم شسوه حتى يفرقوهم
مقداد حجه نتر بي
««،،ااي واخوك ماقصر فضحها بنص اهلكم
وخلاني انزل راسي بينهم
«،،ماجنت بوعي والله وياريتني ميت ومامسوي
هالشي
جاوبته بتوسل رد بغضب
«،،هالكلام بعد مايفيد ولا راح يغير شي
من الصار لان بنتي صارت لغيرك
واحد رجال اجه من الباب
مو من الشباج
«،،اني ااجيت وحجيت ويااك وانت ماقبلت
من وره ذاك الگواد
جاوبته ارجف من اعصابي وكملت
««،عم لاتظلمني ولاتحرمني منها والله اموت
اذا راحت لغيري
ليلى
عرفته راح يعرف ويجي متخبل واجه
سمعت صوته يصيح نزلت
ابجي ماما واكفه يم باب الاستقبال
بالاستقبال تسمع الحجي
مشيت اجر برجلي وجسمي كله يرجف
لان صارلي يومين مااكل حتى
دوام مادوامت
سمعته شحجه وگلبي زاد وجعه كمل
«،،،،اموت والله اموت اذا راحت من ايدي
ردت اروح اله اگله واني هم اموت اذا
صرت لغيرك شهكتي طلعت
ماما اندارت الدموع
بعيونها اجت عليه
بسرعه وكالت
«،،،لاتروحين اله
وكفت يمها ابجي بخنگه سمعت
بابا گال
«،،مقداد اخذ اخوك وروح البنيه انطيتها
وانتهى كلشي
«،،،،مااااراح يصير هالشي
صاح بابا وكمل بخبال
«،،،انت شتررريد تموتني تشيل خطيتي
كااعد اكلك ااني راح اموت اذا
ماصارت اليه
««،وين اشو مامتت من رحت خمس سنين وعفتها
رجعت متعااافي وصاير احوال
بابا رده بصياح وكمل
«،،،بنتي الي ماتت والله رجعها اليه ومن
وره منو من ورة واحد جبان فضحها
وخلاها تذبح روحها
«،،،ولكم والله ماظل عقل برااااسي
جاوبه وكمل بتوسل
«،،،،اني مو جبان والله مو جبان مو ردتها
مو ذبحت روحي عليها بس انت واهلي
الظلام وذولاك الچلاب ماخلونا
ماعافونا نفرح وفرقونا
«،،،،اااسمع
بابا صاح بي وكمل
««،،اني بعد ماعندي حجي وياك واعيد كلامي
الك وكدام اخوك اي تعرض منك الها
او النا گبل اروح اشتگي عليك
واذبك بالسجن
ماما طبت عليهم لان علگت مقداد يحاول
يهدي الموضوع ماكدر قائد
صاح
«،،،،رووح ااشتكي شتريد تسوي سوووي
تذبني بسجن تخلي طلقه بگلبي
اني ماراح اعوفها ولا راح
اااخلي هذا الگواد
ياخذها
سكت وكمل بصياح
«،،،چتاله اااني للي يفكر ياااخذها مني
او اليوكف بعد بطريقنا
«،،،قااائد
مقداد صاح بي بابا گله
«،،،كاعد تهددني ولك وبيتي
«،،،اااي اهداد وغيري مارااح ياخذها
لو اعرف اشوف من وراها
الموت
«،،،،اااطلع ولك اااطللع من بيتي
«،،،،مااطلع والي اااريده ااخذه لو اشلعه
من العيون
كمت رحت يم الباب باوعت اله شافني
الملامح تبدلت تقدم اخوه
لزمه بابا صاح بيه
«،،،،روووحي منا
هو حجه بتوسل
«،،،ليلى كولي لااا ولج لاتقبلين بي لهذا
ماراح يحبج بكثر حبي الج
«،،،روح قائد وانساني
جاوبته بشهكه صاح بيه
«،،،،ولج هم حجيتها هم كلتيها وتريدين
تروحين لغيري وتموتيني
شباب اثنين طبو بسرعه علينا بابا
صاح بيهم من شافهم لزمو
وي مقداد
«،،،اخذووو منا واطلعو من بيتي
««،،وولج ليييش،هسه تريدين تحرگين گلبي
موو
جاوبته بگلب راح يموت من القهر
«،،،روح وخليني انساك
«،،،وولج ليلى والله اخلي طلقه براسج وبراسي
ومااخليج تروحين لغيررري
جانو يجرو من يمنا وهو ينفض بروحه
يصيح
««،«كووولي لاااا ولج راااح اموت من وراج
ووولج ليلي كولي لاااا مااراح
اصير لغيرك
وولكم حررااااام الكاعد تسوه بيه
رجعت للصاله وانهاريت هناك ذبحت روحي
بالبجي ماما يمي تروح وتجي
تبجي بخنگه
بابا اجه صاير فد مره قبل لايحجي
هي انهدت بي
«،،فاروق رااح تشيل خطيتهم
«،،،ااني ندى لازم نسيتي شسوه بيها نسيتي
شكد دعيتي علي من فضحها
وفضحنا وياها ومن رادت
تموت
«،،،ماجااان بوعي وعرف غلطه واجه اعتذر
وسبحان الي مايغلط
«،،،هم رجعتي ادافعين عنه وانتي تعرفين
شسوه
«،،،فاروق شوف حال بنتك ماراااح اطيب منه
ولا هو وراح تشيل خطيتهم اذا هم وكفت بطريقهم مرة اللخ
«،،،،اااش ولا كلمه بنتي انطيتها واريد من
الله احد يكسر گلمتي
كمت من يمهم مشيت دخت ماما بسرعه
لزمتني وكالت
«،،،راح تموت بنتي من القهر
«،،،ااخذيها لجوه
صاح بيها اخذتني امشي بصعوبه تمددت
بالغرفه الجوه اشهك وهو
بين عيوني شلون احترك
بنار الي عرفه
مقداد
اخذنا اخويه بصعوبه من يم بيت خالتي شبعنا ضرب منه ومسبه خلينا گوه بالسياره طلعنا بي من يمهم يصيح بخبال
«،،،،ووولكم راح تروح من ااايدي رجعوني
عليهاااا
تخبل ماظل عقل براسه يضرب بحسين
ومهيب الي لازمي بقوه وينفض
بروحه ليفوك ويصيح
«،،،ياااربي مو بأيدي الصار والله لعبو عليه
وولكم ليييش،،،،گوااااويد شمسويلكم
ااني
««،،ولك مهنددد گواد جاايك والله لاقتلك
كام يفشر ويسب بابويه وابوها
«،،،خرررب اهلكم كلكم وولكم انتو الي حرموتني
منها ماااااخليتو عقل براسي
وصلنا البيت نزلنا مجتف يصيح ويغلط
علينا اخذنا للاستقبال امي
تبجي وتردد
«،،،وولك يمه كاافي راح تروح من اايدي
«،،عووفيني كله منج ااانتي الي حرمتني منها
صاح بيها جاوبته
«،،ولك بس اهدأ وخليني اااتصرف
رد بخبال
««،،وولك مووو خليتها يمك شسووويتلي
مااسويت شي
نفض روحه من عدنا عفنا صاح
«،،،كله منكم ياااظلام ياهلي ماااوكفتو وياي
وخطيتي برگبتكم الى يوم الدين
وومو مبريه الذمه ليلى
مووو
سكت وگضب راسه ووكع على رگبته
رحت بسرعه علي،
امي تصيح
يمممه قائد شبيك
فگيت عيوني من شفت خشمه طك دم
هو واذنه وووكع ليوره گضبته
وصحت
قااائد
مهيب
جنا اني وحسين بگافي كاعدين مقداد خابر
حسين وكله تعال بسرعه لبيت هاي
البنيه الي يحبها قائد جنا قريبين
من بيتهم رحنا عليهم بعد
مادز الموقع
بعيوني شفته شلون انهار من سمع بيها ،،،،،، راح تروح من ايده تخبل وفقد وبصعوبه اخذنا من يم بيتها
رجعنا لبيته متخبل ويصيح ويضرب بينا
وهناك ماسكت بلحظه مااعرف شصار بي
جان واكف يصيح فجأ خشمه طك دم
واذنه هم وكع بين ايد اخوه
لا حس ولا نفس
شلنا بسرعه اسمع امه تعيط وراه ردنا
بس نكعده ماكو كلت مات لان
النزف زاد
ووولك بسرعه راح يروح من ايدينا
صحت بحسين اخوه يصرخ ويحظن
بي يتوسل بي يفتح عيونه
ماكو لا كعد ولا فتح عيونه وصلنا للمستشفى
واخذوه من عدنا بسرعه وخلوه
على سديه
دكاتره التمو علي فحصوه مااعرف شحجوه
بالانكليزي ضربوه ابره وخلو مغذي
وجابو جهاز تخطيط
اخذو اله بعدين
دكتور كال
بسرعه حولو للانعاش
اخوه انهار واحنا ويا سألنا الدكتور
شبيي شنو بي
شيصيرون منه
مقداد جاوبه
اني اخوه
هز راسه وكله
يعني هو مو اكيد بس التشخيص الاولي
يكول ضاربته جلطه
وكع ليوره كضبته اني وحسين كام يبجي
بصوت قوي الدكتور كمل
هسه لازم نخلي تحت المراقبه لان هو بعده
فاقد للوعي
سألته وحيلي انهد من السمعته
راح يكعد مو
ان شاء الله
مقدااد گضبه وتوسل بي
دكتور اخويه راح يكعد ويصير زين
مو
اي بس ادعلو تمر هالليله على خير
يارب يالله
بس قائد ماكعد ،،،،،،وظل بغيبوبه لثاني يوم هوسه صارت يمه ابوه كاعد كبال الانعاش
يبجي وامه هم
اخوته حالهم حال حسين واني صرنا فد مره
من وراه ناس ادكول ضاربته
جلطه بگلبه وغيرهم
يكولون براسه
جنا نريد نطلع بي لشمال بس،،،من وره
وضعه ماكدرنا نروح لهناك
غاده
جذبت هالجذبه لان ماردت احد يعرف
بيه حامل كلت ماراح اخلي
الا انزله
شلون اخلي بطني واني اعرف هو صار
نتيجه اعتداء من ابوه
دمعتي نزلت وكلت
مااخلي الا اموته حتى لا اعيش بعذاب
ثمره تنمو بطني اجت من واحد
معتدي ودمر حياتي
الباب انفتح هو طب غمضت عيوني
مااريد اشوفه دموعي زادت وشهگه طلعت
بخنگه
سمعته ذب حسره وصوته حجه
بعد تردد
شلون اطيبج كولي شلون اكدر اخليج
اطيبين من البيج
شاحجي اگله
ماراح اطيب لان انت زرعت اثرك
بقوه بروحي وبطني
«،،،اعرف بروحي شسويت بيج
فتحت باوعت اله وجهه مطعون وصاير
دم كمل بخنگه
«،،،انه
«،،،،انت شنو
جاوبته بغضب وكملت
«،،،انت تعرف شسويت بيه
سكت كملت
«،،،انت دمرتني خليتني ،،،اتنفس بس اني
ميته اي،شعور ماعندي ولا احس
اني على قيد الحياه
«،،،اعرف شسويت
«،،،لاااا ماتعرف
صرخت بي وكملت
«،،،لاااا مااراح تعرف لان اليجرح مو مثل المجروح
لان الي نزف اني والي وجعه جرحه
ااني انت شنو وجعك گلي
فهمني شنو الي
كاعد تحس
بي غير
الندم
سكت كمت خاله عيوني بعيونه وكملت
باعصاب ترجف
«،،مااعندك جواااب موو
«،،اي ماعندي غير الندم
الباب اندك صاح بيهم
«،،،عوفنا وحدنا
مااندك بعد كملت بعيون تبجي
«،،،ليش بس فهمني ليش اخذتني بذنب
غيري ليش اني الي تدمرت
حياتي وخليتي اخسر
حتى روحي
«،،،اسف والله تندمت ندم جبير
ابتسمت بالم
«،،شاسوي بهل الكلمه واني خسرت كلشي
لاا اخذت الي حبه گلبي ولا
عشت مثل مااريد
دار وجهه مني كملت
«،،،لادكول بعد اسف لان هالكلمه ماراح تسويلي
شي لا طيب البيه ولا راح تمحي
السويته
كعدت مهدود حيلي ابجي بشهكه هو
طلع من يمي الحجيه طبت
القهر بوجهها اجت
ليمي كعدت
ماحجت شي اني كلت
«،،،اني شنو ذنبي بالصار
«،،مالج ذنب يمه ذنب غيرج الصار
بيج
«،،،،ليش اني ابجي وهي هسه تضحك
وي اخويه
حجيت هيج باوعت الها وكملت بدموع
«،،،شفتي شسوت دمرتني اني الجنت عروس
وماباقي لعرسي غير كم يوم
دمعتها نزلت كملت
«««هي فرحت بالابيض واني چفنت بي
لا اخذت الي گلبي حبه ولا
وفرحت بي
««،مايستاهلج مو زلمه يايمه
««،،ااعرف والله اعرف وكرهته لان ماصار
بعيني رجال ووكف بوجه ابنكم
عافني اله عاافني
ااانهاريت وكمت اشهك بصوت
قوي اخذتني لحظنها اردد
«،،،ليش هيج ياربي والله مااذيت احد
حمزة
مثل كل يوم
كعدت بظلام الليل وحدي مخنوك مو مرتاح
من السويته والي كاعد اشوفه
كل يوم
اخذت جگاره من باگيت ورثتها وجريت
نفس طويل جنت تاركها بس
رجعت ادخن من ورة
قهر السويته
والجاي احس بي
عاينت الها وكلت
«،،،،گون عمري شلون عمرج يل چگاره
شلون تگضين بسرعه هو يگضى
ونيت
«،،،،اخ خرب بعمري كلشي ماافتهمت منه گضيته
يتيم ادور الحنيه بالوجوه ومن
ورة شگلي ماشفتها
الا بوجه القليل
جنت اكابر ابين انه مو مهتم لچن جوه
بصدري نار مشتعله ماجاي
تطفى لان النظرات
جانت تذبح
تقهر
والقهر زاد مانقص من صار الصار وخذيت
هالبنت الي اعرف اجلي راح
يصير على ايدها
اي اعرف حوبتها راح تطلع بيه ولو بعد
حيين لان ظلمت وتجبرت
رجعت متاخر وفايت الوگت طبيت لجوه
مشيت لغرفتها وكفت يمها
وسندت راسي
على الباب
كلت
«،،،لو روحي تمحي السويته بيج انطيها
والله حتى ارتاحن وتغمض
عيوني وخلي اصيرن بتابوت
والغطه چفني
فتحت الباب عاينت الها نايمه مشيت بهدؤ ليمها غافيه واثر الدمع بعيونها كلت
بگلبي بقهر
«،،،ماراح تنشف هالدمعه ابدا مادام هي يمي
وبيتي والاحسن اعگبها لاهلها
وخلي ذيج يمهم لا اريدنها ولا
اريد اشوف خلقتها
ليلى
لا كدرت ادوام ولا كدرت اكل لگمه
ماما شكد توسلت بيه
اخلي شي بلحگي
ماقبلت بس مي شربت ابجي علي
وعلى روحي وادعي على
الي فرقونا
صرت فد مره من وراه لان شفته شلون
تخبل من سمع بيه راح اروح
من ايده
بالغرفه الجوه كاعده دمعتي بعيوني لان
ماجنت اكدر اصعد لفوك وهم ماما
ماقبلت اظل وحدي
تروح وتجي عليه خايفه عليه ومقهورة كلش
بابا ظل مصمم على رأيه وماقبل
اي نقاش ويا كلت هسه
يجي مره اللخ
بس هو مااجه ولا شفته
ثاني يوم العصر كمت اريد اروح اغسل
وجهي اريد ابرده حتى
روحي ترد اليه
شويه
مشيت للصحيات غسلت ورحت اجيب
مي من المطبخ سمعت ماما
صاحت
«،،،،رباب ااانتي شكاعد ادكولين ولج
شوكت صار هالشي
طبيت سكتت بس جانت تبجي
گلبي نغزني وحسيت
هو صاير بي
شي
كعدت منهاره تبجي بقوه سالت
بصوت طلع يرجف
«،،،قائد بي شي
«،،،وولج شااحجي كله من ورااهم
اختنكت وذبت الجهاز من ايدها رحت بسرعه
اخذته وحجيت
«،،،خاله قائد بي شي
گلبي هبط من سمعتها هي هم تبجي
صحت
«،،ااحجي بي شي
«،،،ولج ليلى قائد مو زين ضربته جلطه
من رجع من يمكم ودخل غيبوبه
الجهاز وكع من ايدي وكعت بالگاع
صرخت
«،،،لااااا لاااا
ماما اجت يمي اصرخ مفجوعه
بي
«،،،،لااا ولكم لاااا
كمت وكعت هي لزمتني مشيت بصعوبه
اردد
«،،،لاااا ماما لاا هو مابي شي ااي،مابيه
شي هسه اروح اشوفه ومااتعارك
ويا
«،،،ولج وين رايحه ابوج ماايقبل
«،،،،اااريد اااروح علي
صحت بخبال وكملت بجنون
«،،ماما اخذني اله الله يخليج راح اموت
اذا مااشوفه شوفني تره
تخبلت اخذيني علي
«،،،ولج كافي راح يصير بيج شي
تهسترت وكمت اضرب بروحي
«،،،ووديني علي اريد ااشوفه ادري بي
بس راح يشوفني راح يصير
زين
«،،،اامشي امشي
مااعرف شلون بدلت ولا شلون طلعت بس
شفت نفسي امشي بممر بمستشفى
هي وياي تلزم بيه كلما
اريد اوكع
احمد اجه من بعيد حاله حال اول
ماشافنا كام يبجي كال
«««خاله قائد مو زين راح يروح من ايدينا
«،،لااااا هو مابي شي هسه يشوفني ويكعد
صرخت بي وكملت
«،،لاااا ماراح يروح ااي ماراح يعوفني
وينه هو وينه،،، اريد اشوفه
«،،،،تعاالي
مشينا وراه وصلنا للانعاش امه ابوه
مقداد وولد واكفين بره خالتي من شافتنا
صاحت
«،،،،ندى قااائد مو زين القهر راح
ياخذه مني
امي انهارت يمها ردت اطب ممرض منعني
عطت بي
«،،،،ووخر اااريد اشوفه
«،،،مايصير اختي
مقداد گله
«،،،بس خلي تشوفه بلكي يكعد
سكت وبعدين كال
«،،،طبي بس اهدأي خلي مرتاح وانتي
والاخ فقط
طبيت مقداد وياي عيوني صارت علي ممده واجهزه معلكه بجسمه،،،،،عضيت اايدي
وكتمت صرخه رادت تطلع من جوه
گلبي
مشيت اله كعدت يمه لزمت ايده وخليت
خدي عليها ابجي بشهگه رددت
«،،،قائد لاتعوفني والله اموت والله مااظل
عايشه
رفعت راسي وكمت اباوع لوجهه
توسلت بي
«،،،فتح عيونك اني اجيت والله بعد مااتعارك
وياك ولا راح اخذ غيرك
سمعت اخوه كام يبجي ر انهاريت
يمه ايدي بايده اتوسل
بي بشهكه
«،،،لاتعوف اايدي انت عفتها مره ومامسامحتك
واذا عفتها هسه هم ماراح اسامحك
للابد
بجيت يمه دم مو دموع وطلعوني من يمه
شبه فاقده كعدت اگباله
ارجف من خوفي
علي
اسمع امه تبجي وتلوم بروحها وتدعي على
نفسها بالموت وعلى خالي
وولده
رددت بدموع
«،،،ماما اذا راح اني اموتها لروحي
حظتني لصدرها تهدي بيه جنت اباوع للباب
الي هو نايم وراه شفت بابا اجه صاير فد مره
من شفته صحت بخبال
«،،،،لووو گايله ااي جان مااصار بي
الصاار ااني السبب اااني الي،قهرته
وخليته ينام هالنومه
امه كامت تضربه على رجلها
وردت
«،،لااااا بحظي،مو انتي اني وابوه احنا الي
شلنا خطيتج وخطيته
سكتت من اختنگت بالبجي وكملت
«،،،وهاااي شوفووو راح يروح من ايدي
للمره الثانيه بس هالمره من
صدگ للگبر
«،،،لاااا ماراح يموت
صحت بيها وتهسترت كمت اصرخ
«،،،ماراح يموت ويعوفني ااي راح يكعد
قااائد تسمعني ماابريك الذمه ااذا عفتني
مره ثانيه
بابا حظني بقوه وكام يبجي
اصرخ بخبال
«،،،بابا كول ماراح يموت ولكم كولو راح
يعيش،ومايعوفني
صار بيه انهيار وضربوني ابره مهدئه
هدأت بس ظليت اشهك
بالبجي
ثالث اجه اني كاعده بنفس مكاني اريده
يكعد بابا يمي هو وماما وحالهم
حال
اعرفهم يحبوه ويموتون علي بس السواه
خلاهم يزعلون علي زعل جبير
ممرض طلع من يمه
صاح
«،،،صيحو الدكتورا
گلبي راد يوكف الكل راح علي اني
اريد اگوم من مكاني ماكدرت كلت بشهكه
«،،،،عافني ماما وراح اموت وراه
مقداد صاح بي
«،،ااخويه بي شي
امه سألته بخوف
اابني شبي كعد موو
اي كعد والحمد لله
گلبي فز بفرح بابا كال بصوت مخنوك
«،،،الحمد لله والشكر الك يارب
احمد سأله
«،،زين موو يعني حجه شي
«،،،اي بس خلي الدكتور يجي ويفحصه
باوع عليه وسأل
«،،،انتي مرته
جاوبته بدون شعور
«،،،اي
«،،،سال عليج اول ماكعد وكال
وين ليلى
ماما كامت تبجي هي وامه ماهمني احد
نسيت الكل وكلت
«،،،اريد اشوفه
«،،،هسه خلي يفحصه الدكتور
اجوي دكاتره اثنين واحد جبير بالعمر طبو علي وره
لحظات صعبه ودمرتني دمار طلعو
كلها راحت الهم ابوه
سال
«،،،ها دكتور شلون وضع اخويه
«،،،الحمد لله وضعه كلش زين
«،،،يالله
الكل صاح مقداد رجع سأله
«،،،والجلطه دكتور راح تأثر علي
«،،،،منو كال بي جلطه
دكتور حجه ويا بالانكليزي افتهمت شحجه
كال
«،،،هذا التشخيص غلط الولد مابي،اي
شي
«،،،زين ليش فقد الوعي لثالث يم يله كعد
احمد ساله خايف رد
««،،الجسم من يتعب ويتحمل فوق طاقته
تجي هيج حااله والظاهر اخوكم
تحمل هوايه قهر وما تحمل لان
ضغطه صعد كلش والحمد
لله خشمه طك دم
هو واذنه لان لو ما صاير هيج
اكلك اي ينضرب جلطه
بس ربك لطف بي
وخلاه الدم
يطلع حتى يخفف من الضغط
«،،،الف الحمد لله والشكر الك يارب
عفتهم يحجون ويا الدكتور وطبيت علي
امه ورايه طبت وماما وبابا
جان مغمض كلت
اسمه بشهكه
«،،،قائد
فتح ودار وجهه عليه رغم البي
شفت ذيج النظرات القديمه الجانت تخلي
گلبي يدك بجنون
امه حظنته تبجي بصوت قوي ماما وياها
بابا راح ليمه باسه من راسه
وكله بخنكه
«،،،،الحمد لله على السلامه ماتشوف
شر
مارد ولا دار بال لاحد جانت عيونه
عليه بابا كال
«،،،تعالي بنتي يم خطيبج
صفنت علي بعيون تبجي كمل بعيون
مغوركه
«،،،تعالي يابه هي الروح روح وحده
وحرام علينا بعد نفرقها مرة اللخ
رحت بسرعه لحظن بابا اشهك وابجي
وخرني منه باسني من راسي
وكله
«،،،،شد حيلك حتى تجي تخطبها بس
ها تره راح تكعد يمي ولادكول
لا
عبالك الروح ردته اله ابتسم وهز راسه
وجاوب
«،،،ماراح ااكول لا
قائد
اشوف اهلي كلهم يمي بس اني عيوني عليها وهي
عيونها عليه الفرح ترس گلبي من
سمعت عم فاروق شحجه
ردت اليوم اخطبها
وبسرعه نزوج
بس البيه اجل كلشي وهم جان لازم انتظر
ثاني يوم وضعي صار احسن من
بارحه وحولني لغرفه خاصه
اجت وي ابوها وامها ظلو ساعه وراحو
ثالث يوم حسيت بروحي
انشط ،،،، مقداد يمي
ومهيب كال
«،،،ها عار برد گلبك
«،،،،انجب
«،،،شفته مابي شي من كال انجب
«،،،اسكت مهيب ماظل بي حيل حتى
للحجي
«،،اي والله هالگواد نشف دمنا وعبالنا
راح يودع
«،،،من عمري على عمره
مقداد جاوبه واجه باسني من راسي
كال
«،،شد حيلك يول حتى تعرس وتاخذها
للي كتلت روحك عليها
«،،،مااجت
سالته
«««لا خليها ترتاح والله تخبلت من سمعت
الصاير بيك وكلت هسه تموت
من وراك
«،،،ااي من الاول وكول اي الا جلطت الولد
مهيب حجه وكمل
«،،،بس والله ابوها خوش رجال ومبين
يحبك ولك رغم انت صيحت علي وهددته
بيته
««،،عم فاروق ماكو منه رجال طيب وابن
اصول
مقداد جاوبه ذاك الگواد غمز وكال
««،اي مبين من ملامحه وبنته تشبهه
خزرته
««،،راح انگتل كتله اللخ مو
««،،يول استر علي وخلي راكد
مقداد جاوبه ضحك وكله
««،،هههه مابي حيل يسوي اي شي
مكسر وفاين حظه والگلب كام يكح
ويضرط وهو بعده ماعرس
ابتسمت الباب اندك مقداد رح فتحه
خالتي طبت وراها هي الروح
يمها من اشوفها ترد
اليه
جانت خجلانه من اخويه ومهيب ترخص
وطلع خالتي اجت ليمي بوستني
وكالت
«،،،ها اليوم شلونك احسن موو
««،اي
جاوبتها مقداد كال
««««الحمد لله وضعه كل يمر يوم يتحسن
للاحسن
«،،يالله والله ماتعرف شسوه بيه
هبطت ذيج الهبطه وردت اموت من وراه
ماحجيت شي صافن لروحي وگلبي
وعقلي قربت شفت العيون وارمه
والخلقه تعبانه كالت
«،،،شلونك اليوم
«،،،،زين
سكتت وهي هم مقداد كال
«،،،خاله تعالي وياي
«،،،اي
عافونا وحدنا او هم تقصدو يسون هالشي
دمعتها نزلت كلت
«،،،لاتبجين وتعالي يمي
«،،،،، لاااا
رفعت حواجبي من رفضت تكعد يمي
كالت
«،،،،خليني هنا
«،،،،ليش
«،،،،اعرف نيتك
ابتسمت وجاوبت
«،،،بس خليني اگضب ايدج
«،،،تلزمها من نعقد
«،،،،مو وجعان ونفسي بيج
«،،،لاتحاول سويتها مره وتندمت ومااريد هسه
اخون ثقه بابا مره ثانيه
صفنت عليها وعرفت شبيها جاوبت
«،،،عجل خلي استعجل بالعقد حتى اكضبج
براحتي
ماردت وهم مثل قبل صفنت بعيونها الحلوه
وبكل ملامحها كلت
«،،ضمي لشعرج،،،،،تره متعب گلبي لان
مهدود للعيون
ابتسمت وجاوبت
«،،،،ماتغير بيك شي بعدك ذاك قائد
المخبل الي،يغار بجنون
«،،،وراح اظل هيج مخبل بيج واغار عليج
بجنون
غاده
ثاني يوم مارحت للدوام لان جنت مااكدر
وبصعوبه انطوني اجازه الا
بنيه كالت اني اوكف
بمكانج
ظليت بغرفتي متمدده مره اگول انزله
ومره اكول لاا حرام هو شنو
ذنبه بالصار
حرب صارت بعقلي اريد اكوم اجيب
دوه اعرفه وعندي بس اشربه
راح يموت بطني
الشيطان لعب بعقلي كمت ورحت للجراره
طلعت الدوه صفنت علي بعيون
تبجي
كلت مو حرام اموته لا مو حرام ابوه اعتدى عليه
شلون راح يجي للدنيا وهو ثمره
اعتداء
طلعت حبايه خليتها بحلگي كلام ليلى
اجه براسي
«،،،حرام تموتي هو شنو ذنبه بالصار هاي روح
وراح تتحاسبين عليها انتي انقذتي
ابوه من الموت لان گلتي
روح واتحاسب عليها
شلون هيه تريدين
تموتين ابنج وهو قطعه منج
شهكت وطلعتها من حلگي لزمتها بايدي
بقوه الباب اندك طبت رانيه
وكالت
«،،،هاا كعدتي
شافت وضعي اجت عليه سالت
بقلق
«،،،معدتج توجعج
«،،،كلشي يوجعني
جاوبتها ورحت كعدت الحبايه بعدها بأيدي
كعدت يمي ظلت ساكته بعدين
مدت ايدها بجهاز الحمل
وكالت
شكرا لزيارتكم عالم روايات سكيرهوم
