رواية اغفري لي الفصل التاسع عشر بقلم أوتار حزينة
غاده
گلبي هبط من شفت الجهاز بأيدها كالت
«،،،،البزون وكعت الوصخ ومن لميته لكيته
وياهن
رديت بصوت طلع يرجف
«،،،مو مالتي
«،،،غاده لاجذبين تره بس انه وياج بهل البيت واعرف بروحي مو حامل وجنت اعرف
انتي عندج اعراض حمل
وتأكدت من شفت هذا
الجهاز
سكتت دموعي نزلت وعبالك حست بالي
اريد اسوي لان كالت
«،،،عليج الله بروح الحسين لاتأذي
باوعت الها العيون مغورگه ومقهورة
كلش كملت
«،،،لاتسويله شي هذا ضناج واول فرحه الج
«،،،،يافرحه رانيه وانتي تعرفين شلون صار
«،،،اعرف بس هو ماله ذنب وهاي
روح غاده وامانه من الله يمج
سكتت وكملت بدموع
«،،،،شوفيني اني من راح ابني لحد هسه
اني ابجي علي وانه مااذيته غيري جان سبب
موته
اختنگت وسكتت بعدين رددت
«،،،الضنه غالي خيه ومو ام الي تأذي ضناها
كلمه ام دگت بگلبي وعقلي صفنت عليها صارت
فد مرة رددت بتوسل من لزمت ايدي
«،،،لاتأذي تره تندمين بعدين وتعيشين طول
عمرج تبجين علي وشوفي من راح
يجي وتخلي بحظنج شلون
ماراح تفرحين
بي
من حجت هيج شفت روحي كاعده وطفل
بحظني مبتسمه وفرحانه بي
غمضت عيوني دموعي
تنزل وتحجي القهر الي تارس گلبي
كالت
«،،خيه حلفتج بالله لاتأذي هو ماله ذنب بالصار
«،،ماراح أذي
جاوبتها بدموع وكملت
«،،ولا اريد اشيل ذنبه طول عمري بس
«،،،بس شنو
«،،لاتحجين لاي احد خلي يثبت الحمل وبعدين
نحجي
«،،تمام ماراح احجي شي بس انتي ديربالج
على روحج ولاتعبين حالج ومن تفوتين
بفالج نحجي
هزيت راسي بأي وكلت
«««الله يعوضج على الراح ويرزقج الطفل
الي يفرح گلبج
«،،امين امين
رددت هيج وكامت تبجي اخذتها لحظني
تشهك بصوت قوي هي تبجي
على الراح واني ابجي
على الجاي
وره مشوار طلعت من يمي كمت طبيت حمام
غسلت اريد اتنشط لان الخمول
تعبني طلعت مشطت
شعري لميته وخليت
عطر خفيف
كلشي اسوي بدون واهس من ورة الي
سمعته حسيت الدنيا كاعد تلعب
بيه لعب وماجاي تنطيني
فرصه حتى اكدر
اوكف على
رجليه
باوعت لروحي بالمرايه مو اني ولا هذا
شگلي شفت روحي بيت اهلي
دبدوبه وحلو كلش
اضحك للهوى
وهسه دمعتي بعيوني مانشفت وضعفت
كلش وكلشي ذبل بيه
هي جابتلي الغده واكلت شي قليل لان جنت
مااكدر وشربت الدوه اني
كاعده على الجربايه عيوني ثگلت
تمددت وغفيت كعدت دنيا مغرب كمت
توضيت وصليت كلما ادعي دموعي
تنزل وشهكتي تطلع بصوت
خليت راسي بالگاع
اردد
«،،،يارب برد گلبي يارب لاتخليني اذي
ابني
سمعت الباب انفتح كمت ماباوعت ليوره
عرفته هو من عطره سمعت الحجيه
كالت
«،،،يتقبل الله يمه
كمت مسحت دموعي بالازار وتجنبت
اباوع عليهم كلت
«،،،،منا ومنكم
ظليت بالازار كال بصوت متغير
«،،،،اكعدي عندي حجي وياج
رحت كعدت الحجيه اجت يمي حسيت
اكو شي باوعت الها القهر
بوجهها وتباوع
اله كال
«،،،انه
سكت انتبهت وجهه مطعون والعيون
حمر كمل داير وجهه
«،،،،انه راح اطلگج واعگبج للاهلج
گلبي مافز من الفرح لاا فز من الخوف
لان اني جنت مااريد اروح
لاهلي
سكتت وهو هم وره لحظات صمت كلت
«،،،،بس ااني مااريد ااروح لاهلي
صفن عليه وبعدين على الحجيه كالت
«،،،يمه والله انه مااريدن هالشي روحي تعلكت
بيج وعدالك ربج زرع محبتج بگلبي
لچن لا انتي مرتاحه ولا
هو
كمت وكتله
«،،،انت شنو بگيفك تاخذني من اهلي وبكيفك
ترجعني الهم
جاوبني بقهر
«،،،اذا ظليتي هينه راح تموتين واشيل ذنبج
«،،،انت شلت ذنبي وانتهينا وكتله من تموت
ابريك الذمه ليييش هسه تريد
ترجعني الهم وهم
تشيل ذنبي
«،،ذوله ااهلج وهناك يمهم راح ترتاحين
صحت بي
«،،،ووومنو كلك ااني راح ارتاح يم ناس
انت تعرف واني اعرف والكل
يعرف هم شسوه بيه
«،،على كيفج يمه لايصير بيج شي
الحجيه حجت مادرت بال كملت
«،،منوو گلك اني رااح ارتاح يم ناس باعوني
الك ومااخذتهم الغيره عليه
سكتت من اختنكت هو رد
،،،،وولج افهمي انه كاعد اشوفج جاي تموتين
جدام عيوني وانه والله راح
اموتن من وراج ومن
وره السويته
بيج
صحت بي
«،،،شبيك اانت ماااتفتهم جااي اكلك
مااروح لهناك ااني يتيمه ماعندي
اااهل
حمزه
اخذت حبوبه ورحت احجي وياها بسالفه
طلاگها عدالي راح تفرح بهل
الشي لچن هي تخبلت
وكامت تصيح تردد
بشهكه
«،،،اني يتيمه ماعندي ااهل لاادگلي روحي الهم
جاوبتها
«،،،موو اانتي ردتي هالشي مو گلتي جم
مره طلگني
«،،،وهسه جاااي اكلك مااريد اطلك
«،،،ولج خلي اهدج لاتروحين تموتين
صرخت
«،،لااااا
تقدمت وكفت چدامي وقريبه گلش رددت
بعيون تبجي وكالت اسمي
اول مره
«،،،والله اااذا طلگتني ياحمزه الا اروح
اذب روحي بالشط
گلبي مااعرف شصار بي دگاته زادت
وعيوني ظلت صافنه عليها كملت
بشهكه
«،،،لاتشيل خطيتي مره ثانيه
«،،،لااا ماراح يشيلها ولا راح يطلگج
حبوبه جاوبتها وگضتها اخذتها ترجف
للجربايه كعدت تشهك
بصوت دمرني
دمار رددت
«،،،،الله مو يگول فأما اليتيم فلا تقهر اعتبرني
يتيمه ولا تقهرني واطلگني
باوعت عليه الدمعه تلالي بعيونها توسلت
«،،گول ماراح اطلگج
ماحجيت صاحت بيه
«،،،كووولها حمزة
حجيت بگلبي بقهر
المن اكول ولج وانه بهل اللحظه عرفت
انه حبيتج وصرتي چتالت
حالي
«،،عليك الله گولها بروح ابوك وامك احجي
وكول لااا
جاوبت بصوت مو صوتي
«،،،لااا ماراح اطلگج
«،،،وعد
سالت گاضه ايد حبوبه وعيونها عليه
«،،وعد زلمه راح يظل ويا للموت
كلت هالكلام وطلعت من يمها مو انه مشيت
بخطوات واسعه مقهور وغديت
دم من الي عرفته والي
حسيت بي
صعدت بسيارتي وهجيت من الديره
كلها رحت لابو طلبه كعدت
هناك صافن ومهموم
كلت
«،،هسه گملت عليك ياحمزه جان ناقصك
العشگ حتى قهر گلبك يزيد
والمن عشگت وحده
تكرهك كره موت
ونيت ودكيت راسي بالحايط كملت بوجع
يون بگلبي
«،،،شفت حظي يبو طلبه اجيتك اشكي همي
يمك ذاك اليوم واجيت هسه بهم
جديد
واعرف ماراح اطيبن ابد راح يظل القهر يمشي
بدمي مثل خيال گاض صاحبه
ومايهده للموت
ليلى
قائد طلع من المستشفى والحمد لله وضعه
صار زين الجمعه بابا اخذله طلي ورحنا علي لبيتهم
وصلنا وخاله وعمو صالح استقبلونا
ذاك الاستقبال الحلو جانت خاله
رباب جايه هي وعمو عماد
وولدهم
كلشي تغير عن اول مره والوجوه الي استقبلتنا
بوجه ثكيل قبل سنين هي نفسها
تلكتنا بوجه يضحك وفرح
كعدنا بالاستقبال اشوف ولد ثلاثه
يلعبون يمنا وبنيه صغيره بحظن خالتي
كالت
«،،،هذوله ولد مقداد علي ومصطفى وهذا
فهد ورهف جهال احمد
«،،،الله يخليهم الكم
ماما جاوبتها خالتي باوعت عليه بعيون
مغوركه وكالت
«،،ويوما اشوف ولد قائد وليلى
«،،،امين يارب
ماما ردت وكامت تبجي عيوني غوركت
بس گلبي فز بفرح من طب يمشي
بطوله ابتسم من شافني
راح گبل لبابا الي كام اله مد
ايده لزمها وجره
لحظنه
دموعي نزلت من شفتهم شلون واحد حظن
اللخ وخرو اشوفه صار دم وبابا
هم كله بصوت مخنوك
«،،الحمد لله على سلامتك وماتشوف
شر بعد
«،،،امين
الكل حجه هو وخر وراح لماما هم حظنته
تبجي وتبوس بي تردد
«،،،غالي يبعد خالتك واذتني وگعتك
«،،،لاتبجين خاله دموعج غاليه عليه
ماما كعدت تبجي بصوت كعد يمها يهدي
بيها كالت
«،،،،جان رحت من ايدينا ومن ورة بشر
ماخاف الله بيكم
كلها كالت
«،،،حسبي الله ونعم الوكيل
جنت اباوع اله لونه رد والفرح تارس عيونه
دار وجهه عليه النظرات
حجت حبي وحبه
بس نزل راسه لان جانو الكل كاعدين بابا
سال
«،،،هسه شلونك يابه زين
«،،،اي الحمد لله
جاوبه مقداد كمل
«،،،اخذنا فحص يم دكتور كلش زين كال
وضعه كلش زين وضغطه استقر
جنت اعرف بابا يحس بالذنب لان رفضه
وتعارك ويا ومن طلع من يمنا
تخربط عمو صالح
حجه
«،،،ابو ليلى احنا ان شاء الله مو هذا الخميس
اللخ راح نجيب مشايه جبيره ونجي
عليكم
خدودي اشتعلت نار ونزلت راسي، سمعت
صوت
«،،،ليلى تعالي يمنا
جانت منى مره مقداد عرفتها لان اجتي
بالمستشفى
بسرعه كمت وانهزمت من يمهم احس بنظراته
عليه اخذتني للمطبخ تضحك
وكالت
«،،انقذتج مو
مارديت حسيت بحراره صعدت لوجهي
وگلبي كام يدك بجنون
«،،،هاي نهله مره احمد
اجت بوستني وكالت
«،،،الحمد لله على سلامته لقائد
«،،الله يسلمج
حجت وي منى باعجاب
«،،حقه يتخبل عليها شوفيها اليكول
لعابه
«،،اي ماشاء الله كلش،حلوه والعيون
بعد احلى
«،،،انتن هم حلوات
«،،ههه بس انتي احلى وراح تكسرين علينا
منى ردت بضحك ونهله كملت
مبتسمه
«،،تره احنا خوات ونحب نشاقه يعني لاتزعلين
من عدنا من نشاقه وياج
«،،،هاي يعني انتن خوات
«،،لا بس منى احسبها اختي الجبيره
لان اني ماعندي خوات
«،،،اني هم
«،،،اي اعرف كالو بس انتي لاهلج والله
يخليج الهم
«،،الله يسلمج
جهازي دك برساله على الواتس
جان هو قريت
«،،تعالي اخذيني يمج گصتي عرگت من الخجل
ابتسمت هن انتبهن منى كالت
«،،،اكعدي هنا واخذي راحتج
كعدت وجاوبته
«،،دبر حالك اني ماعليه
كتب
«،،،ابوج طلب مهر 100مليون ليش،،،،يابه
خاطفج اني هذا مو مهر فديه
گلبي كام يدك بجنون من تذكر هذا
الشي ماكتبت شي دز
«،،،ارنوبه وينج
دمعتي نزلت مو ناسي ولا شي ولا اني
نسيت كتبت بعيون
تبجي
«،،،كول مياو
«،،هههه اني اسد مااگول مياو
غمضت عيوني ودموعي زادت
«،،ليلى بيج شي
سمعت صوت منى فتحت شفتهن اثنينهن
يمي يباوعنبقلق هزيت
راسي بلاا وكلت
«،،مابيه شي
«،،،لعد شبيج تبجين
««،،،فرحانه لان هو صار زين
جاوبتهن ابتسمن وعيونهن غورگت
«،،،اي الحمد لله وضعه كلما يمر يوم يصير
احسن
رساله اجت باوعت الها منى كالت
مبتسمه
«،،احجي ويا خطيه تعب كلش،من وره الصار
«،،اي
قريت
«،،بسبس وينج عفتيتي والتهيتي وي جناين
سعاد
«،،،هااا قائد
«،،،جنتي تبجين
«،،،لااا
««،عليه اعرفج اكثر من نفسي
«،،لاا مابجيت بس انت تذكر كلشي
تاخر وبعدين دز
«،،،ااي مانسيت شي من العشته وياج
عشته هناك بكل تفاصيله وجنتي وياي
طيف وين مااروح اشوفج
كدامي
«،،واني هم
«،،،جذابه من جنتي ادكولين نسيتك
«،،،،،اي جنت اريد اقهرك بس جنت اقهر
روحي وياك لان لساني يگول
هيج وگلبي يگول
جذابه
«،،،،وقهرتيني يولي اانتي وابووج ووخليتي
الضغط يعلك وافقد الوعي بس
والله الا اطلعها بيج
هانت ولج مابقى
شي وايدي تگضبج وذيج الساعه
جيبي الي راح يفگج
مني
گلبي هبط وكام يدك سريع ماكتبت شي
دز
«،،وينج ياشريان گلبي بس لا انهزمتي
كتبت
«،،،مو جنت خوش ولد ومن طيور الجنه
منو فسد اخلاقك
«،،،،هههه
عبالك اسمع ضحكته بأذني اهله ماقبلو
نطلع وجلبو بينا على العشه وعمو حلف على
بابا اذا ماظل يزعل علي
كعدنا بنص لمه الاهل اشوف ماما فرحانه
بخواتها وهن هم بابا هم نفس
وضعها يحجي وي الولد
وعمو صالح وعمو
عماد
هو جان كاعد بعيد عني كل ساع يباوع
عليه ويبتسم مااكلت من خجلي
منه ومن العيون
الجانت تباوع علينا بفرح
وره العشه رجعنا كاعده ليوره افكر بي
ومبتسمه
شفت بابا يباوع عليه بالمرايه خجلت
ونزلت راسي كال
«،،،،افرحي بنتي هالفرحه صارلي سنين
مو شايفها
عيوني غوركت باوعت اله ابتسم وكمل
وي ماما
،«،،،وهذا ابن اختج راح ياخذ بنتج ويكعد
يمج بعد شتريدين ندى
«،،الف الحمد لله والشكر مااريد من الله غير
بس هاي الفرحه
وصلنا ،،،،،،طبيت لغرفتي فرحانه
كلش،وبس ابتسم جهازي دك
جان هو فتحت الخط
بسرعه كلت
«،،،هلو حب
««،هلا حب گلبي
«،،وصلتو
«،،اي هسه قبل شويه طبيت لغرفتي
«،،غرفتج حلوه
صفنت من حجه هيج وكلت
«،،،شمدريك
«،،شفتها وعندج تبلام لونه وردي كله
ريش
فكيت عيوني دورت علي بعيوني ضحك
وكال
««،،خرب عقلج هم مثل ذيج المره هم
عبالج اني يمج
«،،،ها لاا بس يعني انت شمدريك اني
عندي تبلام وردي وبي
ريش
سكت عيوني راحت للشباج شهكت وكلت
«،،،طبيت لغرفتي
«،،،ههه اي
«،،،يمممه،،،، هااي شوكت
«،،،من جابني الشوگ الج اجيت بليل
وشفت الشباج مفتوح
ومااشوف نفسي
غير يمج
بالغرفه
كعدت مذهوله وسالته
«««صدك تحجي
«،،،اي والله وغلاتج
«،،،قائد معقوله يعني نزلت على بيتنا
وصعدت لغرفتي مثل
الحراميه
«،،ههه اي بس مابگت شي بنتهم هي الباگت
گلبي من زمان ومارجعته اليه
«،،يممه منك والله مو صاحي صدگ
من يكلون عليك مخبل
«،،،اوف والله جنت عاقل بس من حبيتج
لا ظل عقل يشتغل صح ولا الگلب
سكتت كمل
««،تعرفين كعدت يمج وانتي غافيه وحاجيتج
وگضبتي ايدي ولا حسيتي
««،صددك
«««اي والله وجنتي تبجين وادكولين مااانام
الليل وطلعتي تنامين وعيونج
تغفى
««،اي جنت ابجي واغفى من التعب ماشفت
اثر الدموع بعيوني
«،،،شفتها وبستهن وبست الشفه
شهگت ولزمت شفتي ضحك
«،،،ههه جذب والله ماسويت شي بس
جنت اتمنى اسويها لان مشتااگ
الهن موت
«،،،كافي قائد وروح ارتاح مو زين عليك السهر
««،،هاي الكلمه مال روح عوفيها مااحبها
تعقدت منها
ضحكت وجاوبته
«،،،،لعد شأحجي
«،،،كولي ابتعد عني
«،،،ههههه
رجعنا اني ويا مثل الاول وبعد احلى
وعشت من جديد قصه حب
وي الي اختاره گلبي
وقفل علي
يمامه
واكفه بهل البرد والدنيا مغيمه
اردد
جنت اتمنى عمري يمشي بسرعه واموت
حتى اخلص من هالعذاب
اسال روحي اني اذا
متت ورحت يم الله هم راح يحاسبني
على ذنوبي لو يرحمني بذنب
اهلي الظلام
الدنيا مطرت كلت خلي ارجع شلت كيس
الگلينس ومشيت افكر بالدخل القليل
وبحنين الي حياتها صارت جحيم
من وره سعيد الگلب
الي كل كم يوم كاتلها والنوب
امه وخواته فوگ مامسويتها خدامه
وتخدم بيهن هم كامن يگتلهن تعاركت وياهم
اكثر من مره وانگتل من ابويه
وقويدر
جنت اريدها بس تجيب حتى اخذها واشرد
من الضيم العايشين بي وكمت اضم
فلوس من الدخل حتى
ادبر روحي بيهن
صعدت فورتات ارجف من البرد لان هدومي
تبللت بالمطر رجال جبير كال
«،،،يابه ليش،،،هيج مبلله هدومج راح
تتمرضين وتصير بيج فلاونزه
«،،،هسه ارجع للبيت وابدل
صفن على حالي وردد
«،،استغفر الله يارب ذوله اهلج شنو مايخافون الله
ماعدهم ضمير غيره عليج شلون
عايفج تبيعين كلينس
بهل البرد
دمعتي نزلت ودرت وجهي للجامه دغني
باوعت اله كال
«،،هاج يابه انطيني خمسه كلينس
طلعت اله وانطيتهن اله نزلنا سوه من وكفت
السياره جان لازم اصعد باللخ
كال
«،،هاج هاي الشمسيه خليها فوك راسج
«،،عمو مااريد خليها فوك راسك انت
«،،اخذيها بنتي وارجعي بسرعه لبيتكم
الدنيا كامت تزخ بقوه
اشر لفرع وكمل
«،،ذاك بيتي قريب وراح اروح اله
اخذتها منه وشكرته ردد
«،،الله يستر عليج يابنتي
مشى من يمي وراح للفرع دمعتي تنزل
وي المطر اردد
«،،هي شيصير لو هذا ابويه واني بنته
جان لا هذا حالي ولا هذا
قهري
جنت اتمنى العايشته حلم لا مو حلم
الاحلام مرات تصير حلوه اي اني عايشه
بكابوس مستمر وماله
نهايه ولا راح اكعد
منه
صعدت بالسياره شفت اثنين عيونهم مو
راحه وشكلهم هم لزكت يم الباب
كلت اي شي يصير افتحه
بسرعه واشرد
عيوني على السايق خايفه لا اكو شي
بينه وبينهم بس ماشفت
اي حركه تخوف
وصلت للمنطقه نزلت بسرعه ومشيت
بركض سمعت صوتهم ورايه
يصيحون مادرت بال
ردت بس اطب
بالافرع
ايد لزمت جتفي وجرتني بقوه فريت
روحي وضربته بالشمسيه وكع
وصاح
«،،يااا بنت الخره من انعل ابوج لا ابو
اهلج يااكحبه
رجعت ليوره من شفتهم ذوله الاثنين الواكف
كله
«،،،،عار شلون خليتها تضربك
مديت ايدي بالشمسيه وصحت بيهم
«،«شتررريدون ولكم
«،،،ههه انتي غير
ذاك كام من الگاع يخزر بيه
رجعت خطوات ليوره من شفت نيتهم
وجان ارگض بكل قوتي جنت سريعه كلش
سمعت صوتهم ورايه ماانداريت
خليت قوتي كلها بالرگض
حتى ماصيحت لان اعرف
محد راح يطلع
كلهم مثل ابويه الگواد ماكو غيره براسهم
وصلت فرعنا انهد انداريت شفتهم
ورايه بمسافه بعيدة وكفو من شافوني
اباوع عليها الضربته
اشر لويا
عرفو صرت قريبه من بيتنا
رجعو واني،،،، رگضت
لبيتنا فتحت الباب
وطبيت
مبلله والطين بهدومي صايره نار من وره
الركض جريت روحي للحوض
فتحت المي اغسل
بوجهي وهو
مبلل بمي
المطر
كعدت بنص الحوض اذب مي على روحي
وابجي بشهكه جانو مگبورين جوه
يم الصوبه بغرفتهم
حتى محد عرف
بيه رجعت
كمت وره مشوار ذبيت الدخل يم الباب
ورحت للمخزن بدلت ورحت تمددت
بنص الليل صخنت ولزمتني
البارده
كمت اهذي وشفت امي بالحلم كعدت يمي
وخلت ايدها على راسي حزينه
ودمعتها بعيونها كلت
«،،،يمه اخذيني يمج
ماجاوبت كامت مشت بثوب ابيض
شفتها وكفت باوعت عليه
كلت راح ترجع
وتاخذني
بس غيري اجه وكف يمها لزمت ايدها
اندارت عليه وجان اصرخ
«،،،لااااا
كعدت انهد من الشفته والحرار دمعتي نزلت
وكلت
«،،،لاا مو حنين لاا يمه عوفيها
من الصبح كعدت رغم وضعي وجنت مااكدر
مشيت لبيت سعيد دگيت الباب طلع
هو يفرك بعيونه شافني
كال بضوجه
«،،خير شعندج جايه من الصبح
«،،،حنين بيها شي
«،،،لاا شبيها مثل الجاموسه تعلف وتنام
«،،نامت عليك طابوگه كول امين
«،،،شبيج ولج جاايه تتعاركين من الصبح
«،،،يمامه
سمعت صوت اختي وخرته بدفعه وطبيت
«،،،بنت الخره غير متعافيه وهي بكد الفاره
مادرت بال اله اخذتها لحظني ولميتها
بقوه دمعتي نزلت كالت
«،،،هاي شبيج يمامه صاير شي
وخرت اتفرس بملامحها مابيها شي مو ضاربها
سالت
«،،،بيج شي يوجعج شي
«،،،لا مابيه شي بس انتي شبيج
وليش،جايه بهل الوكت ابويه بي شي
قويدر منتضر
«،،مابيهم غير كل شر
جاوبتها بغضب هو فات من يمنا يدردم
سالت
«،،عبالك مصخنه
«،،،مابيه شي
جاوبت وسألت
«،،،محتاجه شي
«،،،،لاا
صفنت عليها وگلبي مااعرف ليش،انقبض
ولا ليش عيوني ظلت تفتر على ملامحها
بلهفه مثل واحد يريد يحفظ
تفاصيل وجهه اليحب
كلش
طلعت من يمها وبدت رحلتي الي مالها
نهايه
مهيب
يوميا امر بالتقاطع الي جانت توكف البنيه
بي اريد بس اشوفها اشكرها على
وكفتها وياي بذاك اليوم
وانطيها فلوس
ماكو اختفت كلت هاي خافت من الصار
وعبالها راح نحقق وياها لان هي
جانت شاهده على
الصار
اني جنت مااعرف شگلها لان جانت ملثمه
بس ظليت ادقق بالبنات الي يفترن
كلهن اسمن منها هي
جانت ضعيفه كلش وناعمه تجي ليم
صدري والي كاعد اشوفهن
مو مثلها
كاعد وي حسين قائد جان ملتهي يحضر
للعقد مالته كال
«،،،بقيت بس انت وجهه البوم شوكت تزوج
ماادري
«،،،خرب بالزواج مخبل اني حتى اربط روحي
بوحده تظل معلكه برگبتي وتسود
عيشتي
شفنا اجه من بعيد مبتسم ويحجي بجهازه
«،،،جنت بواحد صرت باثنين
سلم وكعد كال
«،،اروح حب بعدين اخابرج
سد الخط يضحك صفنت علي وجهه
رد لونه وعافيته رجعلته كلت
«،،ها ولك طبت
«،،،اي والحمد لله
«،،،ثثامداااك اي والله ولك صدك جذب بنيه
تخلي ضغطك يعلك وتخليك
ممدد بالمستشفى
ابتسم ودحك لحسين الي حجه
«،،،خلي نشوف انت من تحب شراح يصير
بيك
«،،،،،منو ااني احب طاح حظي اذا اسويها
ولكم اني انحب مااحب ولا اسلم
گلبي لاحد
حسين رد
«،،،ااي نعم خلي نشوف بعدين اذا ماصرت
اضرب منه بالعشگ اني مو حسين
قائد كمل
«،،،يجيك يوم يول وتوكع على وجهك
«،،،ماراح يجي هاليوم روح احلم انت وهذاا
الخفيف
حسين ضحك وكال
«،،،ههه هذا لقبك سياده النقيب
ابتسمت هو جر تشيرته ودعى
«،،،ياارب توكع بوحده زعطوطه تخبلك
وتخليك تضرب التل وماتندل
قائد ضحك وكال
«،،،اامين
ذاك كمل
«،،،،ياارب ترزقه بوحده تربي من جديد
وتخلي يركض وراها ويريد رضاها
«،،،هههه ظل احلم يول ماراح يصير هالشي
بس بالحلم
رد علي
«،،،يجي يوم واشوفك هيج مو قائد
«،،،اي يجي يوم ويوگع وكعتنا
جاوبتهم
«،،،عوفكم مني والله ضايج من شغله
«،،،خير ولك
قائد سال جاوبته
«،،،تذكرون هاي البنيه الي خلصتني من ذولاك
الجلاب
«،،،اي شبيها
«،،ولكم شكد دورت عليها مالگيتها وخايف
لا هاي من انهزمت جماعه تابعين
لذوله اخذوها وسوه
بيها شي
رد
«،،،لا مااعتقد انت كلت هي سبعه وكدرت
تفكك منهم يعني مستحيل
توكع بأيدهم
«،،،مااعرف دخت بيها مره اگول خاف وكعت
بايدهم ومره اكول لا هاي خافت
من التحقيق وغيرت مكانها
«،،،اي هيج ماكو غيره لان هم يخافون من
الشرطه
حسين رد هزيت راسي باي وكلت
«،،،اي ماكو غير هالشي بس جنت اتمنى اشوفها
حتى انطيها فلوس على وكفتها
وياي
«،،يجي يوم وتشوفها
قائد رد كتله
«،،،ولكم المشگله مااعرف شگلها من هدت
عليهم جانت ملثمه ماشفت خلقتها
حسين كال
«،،بله صدك تحجي عجل شلون يوميا ادور
عليها
«،،،اعرفها گصيره وناعمه تجي لهنا
اشرت لصدري وكملت
«،،،والي كاعد اشوفهن اسمن منها واطول
واگصر
«،،،هاا ماعدها شي مميز تعرفها بي
حسين سأل صفنت واجه براسي
ذاك اليوم مدت ايدها بحهازي ضوه الگلوب
صار على عيونها كلت
«،،،،لون عيونها صفر
«،،بس
درت وجهي على حسين كلت
«،،اي
«،،،هههه من طاح حظك اي والله الف وحده
عيونها هيج
«،،،،اي بس هااي لونهن جان عجيب
اول مره اشوفه
«،،،والله هالبنات يگسرن بالگلب يعني بس اريد
اعرف بنيه طالعه بهل الليل شلون
اهلها يخلوها
قائد حجه كتله
«،،،هذني ماعدهن اهل
«،،،عجل منين اجني اذا ماعدهن اهل
حسين سالني ضربت برجلي وكتله
«،،،،اافتهم ولك لااتصير غبي
رد بنعوصه
«،،،ااوي وجعتني
دحكت لقائد يضحك كتله
«،،،هذا من ازوج صار سندس
«،،،هههه
خربو ضحك كملت مبتسم
«،،،وخايف عليك انت هم يالمدكك لا باجر
تصير سندس ثانيه
«،،،امداك اي والله كل هالعضلات وتريده
يصير سندس
حسين جاوبني كلت
«،،،اي ارگعه عين ناقص الرجال قبل ايام جان
يريد يموت والله فگه منه عوفه
خلي يروح يزوج حتى
نخلص منه ومن
مشاگله يوميا هاد على العالم
وراكضين علي نجيبه
منهم وفوكاها شبعانين
كتل منه
«،،،هههه شفت شسوه بينا شبعنا بوكسات
منه
حسين جاوب خربان ضحك كتله
«،،،اسكت فچي لحد هسه يوجعني من خرب
اهلك سنوني احسها تحركت من
مكانها
«،،اعوضكم بعشه توب
حسين كام وكال
«،،،اي يله كوم ولك
«،،،ابو بطن ماعندك كرامه بعشه يرضيك
جاوبته وكمت كملت
«،،،خلي اعوف الكرامه اليوم شراح تعشينا
ولك
«،،،هههه
غاده
جنت ملتهيه بروحي ومااتصلت على
ليلى ولا خابرت،،،، رحت للدوام تأخرت
خابرتها ،،،،جاوبت تبجي وتفاجأت
بالصاير
حجتلي الصار بيتهم وبالمستشفى وشلون
عمو فاروق سامحه وهي هم وفرحت كلش من
سمعت عقدها هي ويا بعد اسبوعين
لان جنت اعرف هي تموت علي
وجانت رافضه الزواج
من وراه
رادتني،،،،،اجي اوكف وياها بيوم المهر كتلها
اشوفه اذا قبل اجي ماحجيتلها شلون راد يطلگني
لان ردتها تفرح بروحها وماتشيل
همي
هي اخذت اجازه طويله حتى ترتب امورها
واني ظليت ادوام ،،، كاعده بنهايه الدوام
احجي وياها اجاني اتصال جان
هو كتلها
«،،،،اروح ليلى اجه عليه
«،،،اوكي حبي روحي وديربالج على روحج
وابنج
ذبيت حسره
«،،،،اي باي حب
«،،،باي
رديت علي
«،،،ها اجيت
«،،،اي اطلعي
«،،،،تمام
اخذت جنطتي والعبايه لبستها وطلعت
امشي وافكر بحالي
رحت للموقف ماكو مو واكف بمكانه
واحد اجه عليه كال
«،،،،تكسي
«،،،لااا
جاوبته لزك
«،،،خلي اوصلج
«،،،كتلك مااريد
دورت علي شفته من بعيد اجه عيونه
على هذا كال
«،،،،بلاش يمعوده بس اصعدي
مشيت من يمه ورحت علي عاكد حواجبه
ولا باوع عليه سال ويخزر
بذاك
«،،هذا شبي
«،،،،مابي شي
«،،،شلون مابي شي وانه شفته يحجي وياج
«،،،،عباله اريد تكسي
«،،،،ماكلتي اله مااريدن صخام
سكتت هو صاح عليه
««،،هيي اانت
خفت لان شگله جان يخوف من مشى اله
لزمت ايده بدون وعي وكتله
«،،،حمزه مااسوه شي
باوعت ليوره ذاك صعد سيارته وراح
درت وجهي جان صافن عليه
وخرت ايدي بسرعه
ومشيت اجه
ورايه يردد
«،،،گواد ماعندك لا غيره ولا شرف
ردت اصعد ليوره بس شفت صناديق كارتون
كال بغضب
«،،،اصعدي يمي
بدون كلام صعدت شغل يسب بي
ويكول
«،،عاار وجبان بس صحته شرد
حرك وطلع بسرعه من رحنا للشارع ردت اگله
على ليلى اروح يمها اظل يومين
حتى اوكف وياها بس
هو صار نار من
الشافه
«،،،صوجي انه مااجيت ووكفت انتظرج
«،،،مااسوه شي
جاوبته رد بنتره
«،،،،چا اذا مااسوه شي ليش،شرد الجبان
سكتت كمل بعصبيه
«،،،اشوفنج سگتي
باوعت علي من يغضب وجهه يزيد سواد
لان هو اسمر طوخ وعنده وحمه
نتر
«،،،وين لسانج اول مرة اشوفنج تسكتين
وماتردين
«،،،شتريد تتعارك وياي من ورة شي مايسوه
«،،،مايسوه ولج ااني عرضي شرفي وواحد
تحارش بيج
صفنت علي كام يرجف من غضبه كلت،بگلبي
،شبيكم انتو يااهلي وانت يامعتصم
مااخذتو شويه من غيرته
«،،،انه اعلمه خلي اشوفنه مره اللخ شلون مااگضه
اعدمه العافيه
«،،يعني شلون تريد بس تتعارك وتسبب اليه
مشگله
جاوبته بنتره كرد بعصبيه
«،،،واانتي شگو وليش اسببلج مشكله
«،،،مو راح تتعارك ويا يم المستشفى وانت
يعرفوك رجلي
سكت ودار وجهه عليه كملت بدون انتباه
«،،،قاي وراح يحجون عليه عليك هااا رجل
غااده كتل وواحد من ورااا
سكتت انتبهت لنفسي من شفت النظرات عضيت شفتي ودرت وجهي بسرعه على الجامه
شفته بيها بعده صافن
عليه بعدين انتبه
لطريق
ضجت،،،وكرهت روحي لان جاي
انسى نفسي مره اصيحه باسمه مره
اگله رجلي
سمعته ذب حسره سمعت طكه جكاره
ريحتها هي وعطره گلبو نفسي
فتحت الجامه مقفوله
كلت
«،،،افتح الجامه
«،،،ليش الجو بارد
«،،،بس افتحه شويه
فتحها اخذت نفس طويل وذبيته سال
بنبره متغيره
«،،،بيج شي
«،،،لاا
«،،،چا ليش اشوفنج عدالك راح تتخربطين
«،،،مابي شي
«،،،اكيد
«،،،،اي بس خليها مفتوحه
«،،،تمام
ظليت اشم الهوه البارد جنت مااتحمل عطره
بس ساكته ومتحمله ومن دخن جگاره
ريحتها وعطره امتزجو
وصارت ريحه
قويه،،، ماتحملتها
صار هدؤ وشويه ارتاحيت كلت
«،،،تعرف ليلى صديقتي
«،،،اي هاي الراحت وياج للدكتوره المفرعه مو
«،،،اي هي
«،،،شبيها
«،،،نهايه الشهر راح تعقد وتريدني اوكف وياها
عبالي راح يرفض بس،،،كال
«،،،اي عادي هي خيتج لازم توكفين وياها
«،،،بس يعني
«،،،شنو احجي رايده شي عيوني الج
حجاها وانتبه ماحجه شي بعد كلت
«،،،هي تريدني اظل يومين يمها
مارد گلبي هبط كلت راح يرفض بس
كال
«،،،اي
«،،،يعني موافق
«،،،اي موافق
فرحت وابتسمت هم شفت منه ذيج
النظرات الي مو مفهومه
لهيت روحي بعبايتي
سال
«،،،منو راح يأخذها
«،،،ابن خالتها ولد مهندس
«،،،هاا شاسمه
«،،،قائد
«،،ااسمه قائد
«،،،اي
جاوبته وباوعت علي كمل
«،،،هذا الي تخربط ونام بالمستشفى
ثلاث ايام
تفاجأت وجاوبته
«،،،،اي تعرفه
«،،،،اي هذا صديق مهيب ابن خالتي زينب
«،،،شنوو
جاوبته بذهول وكملت
«،،،صدگ يعني تعرفه
«،،،اي الولد شفته بذاك اليوم من جماعه تعرضو لمهيب
سكتت هو كمل
«،،،مو تخربط من وراها
«،،،،اي بس
سكتت من شفت الحوار صار سهل والكلام
اخذنه سال
«،،،بس شنو
«،،،لا ماكو شي
درت وجهي اباوع للجامه
«،،انه عرفت من مهيب هو يحبها كلش وصارتلهم
مشاگل وتفارگو خمس سنين
«،،،اي
رديت مختصر هو سكت بعدين كال
«،،تعرفين هي تشبهج اليكول خوات بس
درت وجهي علي جان يباوع للشارع كال
«،،لا ماكو شي
سكت وبعد ماحجه شي
وصلنا نزلت قبله ورحت للمطبخ هم جانو
يتغدون من وكت وي الاذان من ارجع اتغده
وحدي طب ورايه كال
«،،،صبيلي غده لان ماتغديت
«،،،،تمام
رحت بدلت ورجعت للمطبخ صبيت الاكل
اجه لابس تراك وخال كبوس فوگ
راسه كعد شاف بس
صابه اله سال
«،،وين غداج
«،،،مااشتهي
عاف الخاشوكه وباوع عليه كال
«،،،اكعدي اكلي ماجاي تشوفين وجهج
شلون صاير
«،،،مااكدر هسه اكل بب
سكتت من كام مشى وكال
«،،،شيلي مااريده
طلع لبره مادرت بال رجعت الاكل ورحت لغرفتي
طبيت ورحت تمددت نمت وكعدت
وره اذان العصر صليت
طلعت يم رانيه والحجيه وعمه شربنا
جاي واكلت كيك الما شبعت حجيتلهم على
ليلى وتاثرو كلش بقصتها قبل
المغرب رحت لغرفتي
حتى اگوي ملابسي
طبيت سديت الباب ورايه
عيوني راحت لعطره جان مضوجني كلش
لان قوي ومن يخلي واشتمه
ادوخ وتلعب نفسي
مديت ايدي اله شلته واجه بالي اذبه
حتى اتخلص من هالريحه
وسويتها خليته بعلاكه سوده وطلعت من غرفتي
ماكو احد سمعت صوتهن بالمطبخ
مشيت لباب المنور بسرعه
فتحته من الحديقه
للبستان
مشيت مسافه ووكفت فريت راسي ماكو احد
دورت حفره ادفنه بيها مشيت
كم خطوه لگيت وحده
ذبيته بيها ودفنته
بالتراب
كمت انفض ايدي وكلت
«،،،وهسه خلصت منك ودفنتك بالتراب
انداريت فزيت وشهگت من شفته
كدامي
حمزة
جنت كاعد بالبستان ادخن جگاره وافكر
بحالي اگولن هاي مثل بنت عمي
هم حبيتها وتالي برد گلبي منها
من ماقبلت بيه من ورة
الوحمه ونسيتها
صفنت للاشجار اشوفها بذاك اليوم
شلون تتوسل بيه مااطلگها
وذكرت اسمي لاول
مره
چن گضت گلبي المشتعل بنار بأيد
بارده
كلت بقهر
«،،هااي مو مثل بنت عمك يبو جمرة انت ماجنت اتابع تفاصيلها ولا تركز بعيونها مثل
ماجاي تركز بكلشي يخص
غاده
ونيت
«،،اخ ياوجع گلبي عشگت وحده تكرهني وتموت
مني شلون راح اطيبن من هالعشگ
ماادري
روحي اختنگت مشيت هي محتله عگلي
وگلبي يوجعني من هالحب الي
من طرف واحد
وكفت من شفتها من بعيد تمشي بسرعه
عكدت حواجبي وكلت هاي
شعدها طالعه بهل
المغربيه
مشيت بسرعه اريدن اشوفها وين رايحه
عيوني عليها من بعيد ثگلت
من شفتها وكفت صرت
وره شجره
عاينت الها وره لحظه مشت كم خطوه
ادور مدري شنو بعدين راحت
مسافه
نزلت للگاع مدري شخلت وذبت علي
التراب مشيت الها بهداوه اريدن اعرف هاي
شكاعد تدفن صرت وراها ولا حست
كامت تنفض بالتراب من ايدها وكالت
«،،،وهسه خلصت منك ودفنتك بالتراب
اندارت شافتني فزت وشهگت ورادت
تطيح ليوره گضيتها بسرعه
وجريتها عليه كلت
«،،،الله بويه
سحبت روحها مني مرتبكه وخايفه سألت
«،،،هاي شعندج هينة
«،،،ها ماعندي شي
مشت من يمي كلت
«،،،منو المات ودفنتي هنا
وكفت بمكانها اندارت عليه ماردت
عاينت للتراب كلت
«،،،،شنو الي دفنتي بهل النگرة
«،،،ماكو شي
«،،،،اذا ماكو شي خلي اشوفن واتأكد
كعدت نبشت التراب شفت علاكه سوده
شلتها وكمت فتحتها فگيت عيوني
من شفت عطري عاينت
الها مشت من يمي
بسرعه
صفنت عليها ماعرفت هي ليش دافنته بالتراب اجه براسي من كالت افتح الشباج
وشفتها اختنكت
كلت بهم وقهر
«،،،هااي تكره عطري مثل ماتگره صاحبه
عگبت للبيت ماشفتها بالمطبخ وي رانيه
وعمتي رحت لغرفتي خليته
بالكنتور كعدت هناك
صافن والقهر تارس گلبي العشه صار
وصاحوني طلعت هي كاعده
يم حبوبه ومنزله راسها
ماحجيت شي
تعشيت وكمت من يمهم رجعت لغرفتي
اليل كله مانمت افكر بحالي
وبيها
الفجر صار صليت ودعيت ربي يطلعها من
گلبي مثل ماطلع بنت
عمي
اجه وكت روحتها بدلت وطلعت رحت للمطبخ
شربت بس جاي عمتي وحبوبه
سالن
«،،،،،مااكلت شي
«،،،،مااشتهي
هي اجت عطرها فاح وجان نازك مثلها
كمت بدون مااعاين الها وكلت
«،،،يله امشي
طلعت قبلها هي ورايه صعدت كعدت
ليوره
«،،،يالله
شغلت مشيت طلعت لشارع هي ساكته
كلت وره دقائق طويل
غاده
ردت اموت من شفته طلع للعطر وصفن
عليه ماعرفت شاحجي او ابرر
انهزمت من يمه ورحت
لغرفتي
كلت هسه يجي ورايه ويظل يسأل هاي
ليش سويت هيج بس هو مااجه
بالعشه شفته مااكل شي ولا
حجه شي
الكل انتبه علي وعبالهم هم متعاركين
الصبح هم شفته نفس وضعه
من صعدت حتى يوصلني
للدوام ماعرفت شاحجي
بس هو سأل
«،،،انتي ماتحبين عطري موو
باوع عليه هزيت راسي باي
«،،،ليش
«،،،قوي ويخنگني
رفع حواجبه كملت مرتبكه وتجنبت اباوع
علي
«،،،اعرف تصرفي غلط وجان المفروض
مااسوي هيج بس هو يعني
من تخلي ادوخ وراسي
يكوم يوجعني
«،،بس هااي
سأل صفنت علي جان مركز بعيونه
عليه جاوبت
«،،،ااي
ملامح وجهه تغيرت ابتسم وهالشي
اول مره اشوفه درت وجهي
وصفنت مثل كل مره
على الجو
والزرع
«،،،شوكت عقد صديقتج
«،،،اسبوع الجاي يوم الخميس
«،،الله يتممها على خير
«،،امين
«،،،يستاهل قائد خوش ولد صح انه شفته مره
وحده بس حسيته خوش زلمه
ومعدل وعدالك يحبها
كلش لان تخربط
من وراها من
سمع رادت تروح من ايده
«،،،اي
جاوبته وذبيت حسره لان تذكرت
معتصم الي كال احبج وطلع مو كد هالكلمه
درت وجهي جان صافن عليه
بنفس النظرات الي مو
مفهومه
دار وجهه ورث جگاره فتحت الجامه سال
«،،،،هم ادوخين منها
«،،،ها لاا اخذ راحتك
طفاها وكال
«،،،لا مبين من فتحتي الجامه سديها
الهوه بارد
اخذت نفس،من الهوه البارد وسديتها وصلنا
ماوكف بالموقف طب جوة
بالكراج وكف نزلت
كال
«،،،راح اگف هينه بعد وانتظرج تمام
«،،اي
مشيت من يمه احس نظراته عليه بصمت
ورحت للصيدليه ورة مشوار خابرت
ليلى فرحانه كلش تريد
اطير من فرحاتها
فرحت الها وظلينا نحجي على التجهيزات
مال المهر من صارت هوسه ترخصت
والتهيت بالمراجعين ونسيت
اكول الها طلع يعرف
قائد من مهيب
ابن خالته
كملت الدوام خابرني وطلعت اله جان واكف
بالكراج مثل ماگال اشرلي
ليكدام باوعت
ليوره جانت اكو صناديق كعدت يمه
اشتميت ريحه گص لحم
حرك من طلعنا للشارع
مد ايده لعلاك كدامه وكال
«،،،اخذي هاي العلاكه بيها لفتين كص
«،،،مااريد
«،،،بوويه اخذيها تره مو جايبها الج
«،،،لعد المن جايبهن
«،،،،استغفر الله ياربي جبت ثلاثه عدالي
اكلهن كلهن ومن وحده شبعت لان جنت
متريك بالعلوه وظلن
ذني اكليهن انتي
جان ماد ايده بيهن اخذتهن منه وخليتهن
بحظني كال
«،،،اكليهن حارات ووياهن ببسي
«،،مااشتهي
«،،،،هالدكتوره ماانطتج شي يخليج تاكلين
«،،،اي
«،،چا ليش لحد هسه ماجاي تصيرين زينة
وتاكلين زين
«،،،الدوه ياخذ وقت
«،،،هاا
سكت واني الريحه شگت خشمي وجنت جوعانه
كلش بنص الطريق معدتي طلعت
صوت قوي سمعها وكال
«،،،طلعي لفه واكلي تره جاي تعذبين روحج
بهل الشي مو احد ثاني
ترددت بعدين الجوع غلبني طلعت وحده
درت روحي منه وبديت اگل
من جوعي كملتها بسرعه
كال
«،،،اكلي الثانيه مادامها حاره
«،،لا خليها لرانيه
«،،،،بووويه اكليها انه اجيب بليل
«،،،شبعت
«،،،اكيد
«،،،،اي
وصلنا ونفس الروتين العصر جنت كاعده
وياهم اميره يمنا رادت تروح للبستان
رانيه ماقبلت كتلها
«،،،،اني اخذها لان هم اريد اتمشى شويه
طلعنا اني وياها كايدتني وتهز بأيدنا
كالت
«،،،من نرجع
اريد اصبغ اظافيري عندج صبغ حلو
«،،،اي
«،،،عندج يالون
«،،،،يالون تحبين
«،،،،ههه احمر وردي عندج منهن
«،،،اي
«،،،چا خوش من نعگب صبغي اليه احمر
عبن احبنه كلش
«،،،ادللي من عيوني من نرجع اصبغ الج
حجيت هيج، ،،،،وشفت واحد جاي
باتجاهنا جان عباس
ابن عمهم صالح شافني
قرب يباوع عليه بنظرات كلها حقد كال
«،،،هاي،،،شعندج هنا
«،،،نفتر عندك ااعتراض
اميره ردته بنتره وكملت
«،،اليكول بستان ابوه مو بستان ابو جمره
«،،سديي حلگج ولج لااخلي بي قندره
«،،اانجب ولك
غلطت علي تقدم وكفت بوجهه كتله
«،،،عوفها انت مو تعرف وضعها
خله عيونه بعيوني وخزرني كال
«،،ووخري ولج لااتخليني امد ايدي عليج
عكدت حواجبي وجاوبته
«،،،احترم نفسك وامشي منا
ابتسم باستهزاء ورد
«،،،والله ماظلت بس اخت العار تعلمني الاحترام
«،،،محد عار غيرك انت
جاوبته تقدم خطوه رجعت ليوره
من شفت نظرات الشر بعيونه
رد
«،،،،والج عين ترديها ولج
ماجاوبته لزمت ايد اميره ومشيت
صار كدامي وگطع الطريق خزرته وكتله
«،،ووخر من طريقي
«،،،واذا ماوخرت شسوين
مشيت هم وكف بطريقي صحت بي
«،،،ووولي من وجهي
مااشوفه غير يضربني راجدي،من
قوته وكعت باالگاع اميره صرخت ورگضت
من يمنا دمعتي نزلت كمت اباوع
علي بحقد كتله
«،،،عرفت هسه ليش،،،،زهره فضلت اخويه
عليك طلعت واحد عار وماتكدر
بس للنسوان
«،،،اانجبي سااقطه
هد عليه وجرني من هدومي قبل
لايضربني خرمشته بقوه من وجهه لزم ايدي
ولوها الا طگها عطت وكعدت
بالگاع اصرخ من وجعها
اجه عليه مره اللخ
يريد يضربني حميت روحي وصرخت
«،،،،عوووفني
بنفس،اللحظه سمعت
صرخه رجت
البستان
«،،،عبااااس
شكرا لزيارتكم عالم روايات سكيرهوم
