رواية قصة وجدان الفصل التاسع عشر 19 بقلم انين الليل

الكل باوعلي بنظرات خوفتني والبعض بنظرات عتب وغيرهن استغراب بيبي سالت سعاد بعصبيه

شتكولين طاكه عاصف واملخته

اي يمه انشدي عمتي ام كريم

ام كرار // على كيفج دادا سعاد البنيه كانت منهاره وحقها اي وحده غيرها اتسوي اكثر

نهاد // وسكت الها ما كسرها

سعاد // ولا فك حلكه لو ما انا طكيتها راشدي فريت راسها وخلستها چان فضحتنه بين الناس

خاله شيماء // هو هذا شلون حچي البنيه بيا حال وهسه مو وكت هذا الحچي

  سعاد // شبيها بيا حال هاي هي كل شي ما بيها الراح من فكر روحه

اجه صوت بهاء وهو يستعجل امه //. يمه وين الخبز

رجاء // ع الكاونتر بالمطبخ محضرته بصينيه ولا تنسى التمر هم اخذه

بقيت ساكته ومدنكه وخاله شيماء صارت اتغير بالموضوع اما بيبي فااعرف جاي اتراقبني وهي زعلانه عليه

وجابو العشا انا بقيت بمكاني كان عباره عن صياني بيها لحم غنم ويمه دجاج. وبمواعين كبار سمج مشوي وخبز حار

وتمر ولبن بدولكات وياهن كلاصات وخضره

الكل اتقرب وهاي اول مره بيبي ما تكلي تعاي اكلي ( اول مره شنو كله صارلي يومين )

بيبي ام كريم كالت //. اتدني بيبي اتدني اكلي

سعاد //. شني عمه اتعزمينها تريد تاكل بكيفها ما تريد اتكوم

بيبي هديه //. سعده عمه على كيفج

ما اشتهيت اكل بقيت بمكاني خاله شيماء كالت // وجدان ليش ما تاكلين

جاوبتها بصوت مختنك // ما اشتهي

ام كرار // هذا ثواب الامج واخوج اكلي شويه

بقيت ساكته ما رديت صار الكل ياكل وبيبي هديه لفتلي لفه لكن انا ما اخذتها اكتفييت بهز راسي بالنفي

بيبي هديه //. مثل امج من ماتت من الجوع والقهر

باوعلها اكثر الموجودات //. اي وهاي ام كرار حلفنها امها لانامت على فراش ولا على مخده ولا كلت الى ان طاحت

وما لحكو عليها

منهن من كالت خطيه

ومنهن كالت الله يساعدها مصيبتها چبيره

وعم السكوت بعدها كملن وانشالت الصياني وجابت عمه رجاء الجاي واجه بهاء وكال

- - حجيه عمي ابوكرار وابو غيث يردون يجوون ايسلمون عليج

بيبي // هله بيهم خلي يجون

شفت النسوان الكبار شلون عدلن عبيهن وعمه نهاد وعمه رجاء وبناتهم راحو للمطبخ وانا بقيت كاعده اجو عمامي

وسلمو على بيبي

ابو كرار كال // السلام عليكم

ودنك على راس بيبي وباسه وعمو رحيم نفس الشي هي ردت عليهم ،

هله عمه هله بيكم اشلونكم

ابو كرار // الحمد لله اشلون صحتج

والله عايشه ياابني والصحه على الله

  رحيم // الله يطول عمرج

دار عليه // هلا عمو وجد اشلونج

هزيت راسي // الحمد لله

هدى هواي تسلم عليج ورادت تجي بس عدها امتحان ان شاالله بس اتكمل اجيبها

خاله شيماء كالت // ان شاالله

ابو كرار // ها يمه نتوكل

بيبي // وين رايحه ظلي انشوفج شوراج

   - ما وراي شي بس تعبانه هالايام

    شيماء // امي جاي يرتفع سكرها وتتعب ودوم ناخذها للمستشفى

ابو كرار // ياالله اتحضرن

وطلعو وبيبي ام كريم كامت وسلمت على النسوان وصارت تشاور ابيبي وتباوع عليه واجت خاله شيماء

وام كرار صارن يبوسن بيه ويوصني كانت اكو غصه بكلبي اريد اكللهن اروح وياهم لان خايفه وما كو مجال

وبيبي ام كريم دنكت عليه وباستني وبچت وباب الصاله اتلاكن ويه عمي عاصف الي سلم عليهن وطلب من بيبي

ام كريم تبقى اتبات وهو ايرجعها لكن هي ما قبلت وحاجته وهي تباوع للكل

- - اسمع يمه عاصف البنيه امانه عدكم واذا ما بيكم حيل تشيلون الامانه اطوني اياها تبقى يمي على ما الله يسوي

حل الاخوها

عاصف باستغراب :: ليش عمه شصاير

  ام كريم هزت راسها // ما صاير شي

:: شلون ما صاير شي شكو

  - - ياابني بنادم اذا مو بيته ثگيل حتى لو عد عمامه

  :: عمه بلى هالالغاز واحچيلي

شيماء // ياالله يمه كريم ايدك هورن

- - انسلم عليك وهلاتك باليتيمه

راحت بيبي وعمي عاصف راح يمكن ايوصلها للسياره وانا ابدي اروح وياها واحس الكل يباوعلي خفت حيل بلحظتها

لان حسيت الكل يريد دا يعاقبني صرت احجي ويه نفسي

= شبيج وجدان لا تخافيين اصلا عمو عاصف ما حاچاج ولا عاتبج بيومها لاتخافين

= شلون ما اخاف والكل دا يخزر بيه واكيد هسه يسالونه ويمكن تصير مشاكل من وراي او حتى ممكن ايضربوني

وكفت اريد اروح للغرفه مشيت خطوتين وكلبي يدك بقوه واحس نفسي لعبت والكاع افترت بيه ما انتبهت اله

اني بالمستشفى والكانوله باايدي اجتي الممرضه وسمعتها تحجي ويه عمو عاصف وتكله

- - بس يخلص المغذي بلغني حتى اشيله وياريت ما تدخن يم المريضه

:: اسف واعتذر

وصوت وحده تكلي //وجدان عمه اشلون صرتي

ما جاوبتها بقت كاعده يم الجربايه وانا ما بيه افتح حتى عيوني كنت متعبه بشكل اجه الطبيب ويا عمي عاصف

الطبيب اتقرب وضرب على وجهي ضربات خفيفه فتحت عيوني بعد ان اتنفست بعمق سالني // شلونج هسه

غمضت عيوني الطبيب //. اشو احچي خلي اسمعج

جاوبته = راسي

شبي

= واجعني دا يفتر

- - اي طبعا دايخه لان ما تاكلين وهذا الشي مو زين عليج دمج سبعه تعرفين شنو سبعه يعني اتوقعي كل شي يصير بيج

هذا العلاج تجيبو الها من الصيدله البره لان اهنا ما موجود ولازم تاكل اكل صحي وكثروالها خضروات وفواكه

اذا بقت عدها الدوخه لازم اتعرضوها على طبيب اخصاىي بس انا متاكد شغلةتوتر وخوف وعدم اكل هالشكل

صار بيها يمها العافيه

:: الله يعافيك دكتور مشكور منك

- - العفو واجبنا (باوع للممرضه ) انطيها الابره ويه المحلول احسن لان قويه

- - صار دكتور

الممرضه // بلا زحمه جيبلي هاي الابره

:: منا لو من بره

- - لا من صيدلية المستشفى

:: صار

الممرضه سالت عمتي //. الرجال شيصير الها

عمتي // عمها وانا عمتها

- - عين البارده هواي مهتم بيها مبين ايحبها

- كلنه انحبها هي تنحب

جاب عمي عاصف الابره والممرضه خلتها الي بالمحلول وكالت //. خمس دقايق يكمل المغذي وتطلع وانتي ياحلوه

تعبتي اهلج كافي دلاعه واكلي زين

عمي عاصف حجى ويه عمه امل :: راح اوكف بالباب ادخن جكاره ومن تخلص صيحيني

- ان شاالله

بقيت مغمضه عيوني والخوف مسيطر عليه كمل المغذي واجت الممرضه شالت الكانوله واجه عمي عاصف بعد ان

صاحته عمتي :: ها بويه اشلونج

باوعتله بدون ما اجاوب سالني :: بيج تمشين لو اشيلج

عمتي ساالتني //. يمه يشيلج عمج

هزيت راسي = لا اكدر امشي

عمتي //. ياالله انتچي عليه شو

عمتي عدلت حجابي وخليت ايدي على كتفها وگالت // دا ياالله شدي حيلج ما بيج شي

عمي يمشي كدامنا وبهاء واكف يم السياره من شاف عمي ركب بالسياره وعمي عاصف فتحلي الباب دخلت وعمتي ركبت

يمي وساق بهاء والسكوت سيد الموقف عمتي گالت // دباعي للولايه ما شايفتها مو

عمي عاصف :: وين شافتهااول امس اجت

دار وجهه وسالني :: تردين نفرج بالولايه

عمتي ردت // لا وين تفرها ما تشوفها دايخه

  :: اي گاطعه الاكل

- - لا عمه ما يصير هيج هسه انتي اليوم ثواب امج ما ضكتي ما يصير تردين تموتين شني

خليت راسي على كرسي السياره وبدون ما اجاوب نزلت دموعي هالمره ما اعرف خوف ما اعرفمرض او حتى يمكن اشتياق

اي مشتاقه الهشام والي اعرف بعد يجوز ما اشوفه لان اكيد بيبي راح تمنع عمو ياخذني اله والله يعلم شراح تسوي بيه

اي الهسه اذكر خزرتها الي وتوعدها الله يستر شراح تسوي وياي

وصلنه للبيت وعمتي فوتتني وهي لازمتني دخلت الغرفة بيبي ولگيت الكل موجود عمتي سلمت الكل رد وانا راسا شمرت

نفسي على الفراش عمتي رجاء // ها شسوولها

- - حطولها مغذي واخذولها تحليل ولكو دمها سبعه

  - - يا سبعه (هزت ايدها ) چا شظال بيها

گال الطبيب يوم يومين واتحسن بس تاخذ العلاج وتاكل زين

سعاد // وياهو رادها ع الاكل ما تاكل

اجه عاصف الكل سكت بيبي سالت // امل وين دواها

يمه عد عاصف

:: هذا قسم وباجر انجيبه الباقي ما موجود بالمستشفى

- - منين تجيبونه

:: من الصيدليه چا منين

رجاء ونهاد وعمه انصاف طلعن من الغرفه وبقى عاصف وعمتي سعاد وعمه امل عاصف حاجاني :: شو اكعدي وجدان

عمتي امل // خاف نامت

  سعاد // توها اجت اسم الله بالطبك يمته نامت حتى ما سلمت شو اكعدي ما تسمعين عمج

فتحت عيوني واريد انهض گلي :: ابقي لاتكومين اسمعيني اريد احجي وياج

   باوعتله بخوف هو حچى بحده :: من باچر اتطلعين ويه حبوبتج للبستان انتي مو اول وحده اتيتمتي اتديرين بالج

على اخوج وعلى نفسج وسنة الجايه ترجعين للمدرسه وتعيشين حياتج حالج من حال الموجودين اهنا اكل تاكلين

وشرب اتشربين وشنو تردين اتطلبينه مني ومن حبوبتج بس شفتهمتي احچي

هزيت راسي

بيبي بعتب // شني ما تعرفين تحچيين خو چنج ما تدرين وصيحي مثل من صيحتي بفاتحة امج وطگيتي عمج گدام الناس

گلبي صار يدك بسرعه وبخوف ولان شفت الكل اجه خفت من عمي عاصف الي رد بكل برود والكل اتفاجأ برده

:: حجيه منو كلج

شني مضمومه يمه

  :: لا ما مضمومه بس گليلي مني گلج

سمعت

  ::اي منين سمعتي

يعني صدك مصيحه وطاكتك

:: اي واريد اعرف ياهو الكلج

كتلك سمعت

:: ها ومن سمعتي من الكالج ما گالج على بوكة الفلوس الخمسه وعشرين مليون والمسدس والسوار

  بيبي باستغراب // شني يافلوس يامسدس ياسوار ؟

هز راسه :: اي يمه انباك من بيت سعدي بيوم الفاتحه خمسه وعشرين مليون والقاصه مفكوكه ومبيوك مسدس ابنج

وسوار هاي المسكينه

بيبي خرطت خدها // شو محد گلي

:: لا ليش سعاد تدري بالبوگه وحتى زعلت عبالها متهمها بيهن ورجعت ويه انصاف ورجلها عبالي تدرين

بيبي خزرت سعاد :: شو ما گلتيلي ؟

:: طبعا ما تكلج لان هذاالشي يخص سعدي وبته بس لحگت اتكلج على بت سعدي طگتني خلي اگلج حگها من اتطگني

ما اخذتها تشوف امها وكتلها ظلي واجيب امج وتالي رجعتها ...

عمي اختنك بعبرته رفع اصبعه ::شوفو الكل يسمعني حجايه توصلكم وتعداكم بت سعدي حالها من حال فرح لا هي ابدى من

فرح ولو ادري واحد لو وحده غلطانين وياها بكد الشعره ما يلوم اله نفسه خليني محترم الكل ولحد يفوت وياي زايد

رجع باوعلي :: وانتي سمعتي شگلت ما احب اكرر كلامي

اكتفيت بان ادنك بدون ما احچي ودموعي نزلن حسيت بي وصل يمي باوعت شفت عمو كاعد وهو يكلي

:: ما دامني موجود وخشمي يشتم الهوا ما اريد اشوف هاي الدموع فهمتي اشو يالله امسحيهن كدامي

:: تعاي فرح

ها بابا

:: بسرعه سوي الاختج عصير برتقال وشوفي امج شتسويلها اكل

راحت فرح وهو ايكلي :: راح يجيبولج اكل تاكلين وبعدها تاخذين هاي الحبايه على ما باجر اجيب العلاج لاتزعليني منج

بعد هاي الجمله عمو عاصف طلع وانا بقيت كاعده ودايخه سعاد باستهزاء//. بخت امس العصر دش للقصر وصار كل شي بكيفه امل //. سعاد شلج بهالحجي

بيبي سالت عمه سعاد // ليش ما كلتي على بوكة بيت سعدي

سعاد بعصبيه // يمه شكول ها اكول عاصف اول وحده تهمني انا

بيبي باستغراب //. شلووون

هزت راسها // اي يمه سالتي عبالك ايحقق وياي وهاي انصاف انشديها

عمه انصاف //. لا ما اتهمج كلج انتي الظليتي بالبيت وانتي العدج المفتاح هم شفتي احد دش الحجرة سعدي

  سعاد وهي تحرك بايدها // ها ما تهمني ما ظل يتقرر عليه ساعه

انصاف تنكت بدشداشتها // لا ما اظلم بختي كل واحد ابمچانه ينشد ها يمه مو صدك

  بيبي // اي صدك ما بيها شي من اخوج نشدج

  سعاد بعصبيه // اووو انتي دومج اتدافعين العاصف لو شيگول اتكليله آميين عبالك مخلي حبل على ارگابنا

  - - انچبي واحچي عدل

  — - - لا ما انجب وحاچيه عدل وانا بالاساس شسوي جايه اهنا مسويلكم ثواب وعزيمه وقرايه انا لا احبهم ولا اسبهم

      بس جيتي اسقاط واجب كدام الناس

بيبي // دا كافي واحترمي نفسج

طلعت المبايل واتصلت // تعال اخذني

لا ما ابات اريد اجي

ياالله راح اطلع بالباب مو تبطي

عمه انصاف //. اخذوني بدربكم

سعاد // ياالله تره ابو حسين جاي

جابتلي فرح العصير وسط نظرات عمه سعاد وجابتلي لفه دجاج وفوكها طماطه وهي اتكلي

ياالله وجدان اكليها حتى اشربين علاجج

اخذتها وصرت اكل بيها شويه شويه وشربت كلاص العصير بعدها عمتي انصاف باستني وهي اتكلي

ديري بالج على نفسج وامشي بطوع امي

ما عرفت جملتها الاخيره اله من كبرت يعني قصدها اسمعي كلام امي

وراحن عماتي وسعاد لحد ما طلعت من البيت وهي تحجي اخذت الحبايه درت وجهي واني افكر بكلام عمي عاصف

وافتهمت كلامه هو الصحيح وهو الواقع

واني لازم احاول ان اعيش الحاضر وادير بالي على نفسي وعلى اخوي واتجاوز الي مريت بي وكان السؤال الي يراودني

= معقوله انسى الي مريت بي ويكون جوابي مستحيل انسى

لكن قررت انو اتناسى او خلي نگول اضحك على نفسي واتناسى الي مريت بي

فتحت عيوني وضوى النهار بالغرفه باوعت ما شفت بيبي ولا علي اصلا علي ما نايم بفراشه بلحظتها ما اعرف

بشنو فكرت كلبي صار يدك حييل ومزيج من الخوف والتعب طلعت من الغرفه بسرعه سمعت بيبي وهي تحجي ويه عمي

عاصف من غرفته

لا اراديا دخلت عليهم باوعولي عيني راحت على الجربايه شفت بيها علاوي نايم نزلت عيني شفت عمي عاصف گاعد

على دوشك ومنتچي على مخده وع صفحة الفراش لحاف ديباج بيبي كالت

ها كعدتي وخفتي على علاوي

ماجاوبت هي ردت // دروحي غسلي وتعاي اتريگي خوش مسويه سياح

طلعت من الغرفه ورحت غسلت واتوضيت وصليت بغرفة بيبي قضا ورجعت الغرفة عمي الي سمعته يكول

:: يمه ان ما متهمها بس سالتها وگتلها المفاتيح عندج وانتي قفلتي الحجره وكبلها انتي طلعتي هدوم للمرحومه

  بيبي // بس هي تكول انا ما ادري رحت طلعت هدوم ما شفت لا فلوس ولا مسدس

خاف انك متوهم يو هي الله يرحمها شو وين ضامتهن

:: يمه لا متوهم ولا شي اجينه من المحامي الفلوس بالجنطه وهي بس وصلت فقدت ونقلناها للمستشفى وسعاد راحت ويانه

ومن رجعت انا موجود راحت طلعت هدوم وغراض وانا الي كتلها اقفلي الغرفه ومن اجت عمتي ام كريم هي وام كرار

ودت وياهن الجنسيه والبطاقه التموينيه مطلعتها من القاصه

بيبي // اي هي تكول مو بس انا بالبيت

:: انا ما تاهمهما الفلوس راحن حالهن حال الراحو فدوه بس عاتب عليها من حجت على البنيه وشلون طگتني وصارت

تصرخ چان حچت على النهيبه مال بيت اخوها

- - چا گول راحن الفلوس

  :: اي يمه راحن وما اگدر احجي من افك حلگي الناس تزعل وتگول امبوكهم

بيبي // ويلاه سعدي الي سويته رد على بزرك

  :: استغفري ربج يمه هذا قدر ومكتوب

- - استغفر الله وشراح تسوي

  ::بيمن ؟

- - اخ يمه حملك ثكيل وما ادري على ياصفحه تنتچي اليتامى والمسجون

  اتحسر :: اليتامى بعهدتي وما كاعدين بالشارع بيت جدهم وعمهم والمسجون عسا لاطلع كله منه

صار گلبي يدك ليش عمي هالشكل يحجي على هشام بيبي كلتله

- - هو شبيده مو تگولون هذاك هو الراد ايكتله وهذا حمى روحه ما جان رايدها

  :: اي ما رايدها بس كله من جوه راسه المره ما اتحملت من راحتله ورجعت طاحت وماتت

  - - حگها يابني الصار بيها مو شويه ايهد اجبال بس هم لازم اتخبرونه الله ايساعده من يدري

   :: الله لا يساعده

  - - شبيك يمه

يمه كله من جوه راسه گدامي تتوسله ايغير افادته ما يرضى

  - - بلكي من يسمع باامه ميته يغير افادته

  :: اروح واشوف المحامي

  - - وانت اتظل يارايح ياراد

  :: چا شلون اعوفه وداعتج لو ما ابو منتظر چان ما بقو الهسه وهو هم ما گاعد

- شمسوي

:: بعد شيسوي مووت المره من القهر

دخلت شفت بيبي تمسح بدموعها بشيلتها بينما عمي عاصف مدنك وجكارته بحلكه من شافتني بيبي اشرت بايدها

على مكان اكعد بي يمها دنتلي الصينيه بيها بيض سلك واقراص دائريه لونهاابيض وخبز اشرتلي وگالت

هاج اكليلج سياحه

ناوشتني قرص داىري بقيت فاهيه بيبي سالتني // ماتعرفين السياح

هزيت راسي

عمي عاصف ابتسم وكلي :: ضوكي كلش طيب

اخذت قطعه زغيره وبتخوف دنيتها الحلگي لان بصراحه ما ضايگتها قبل خليتها طعمها غريب وطيب بيبي كالت

  - كبري الثلمه وخلي بيها بيضه

افتهمت قصدها كبر الخبزه واخلي بيها بيض سلك بس لان الخبزه طريه ما عرفت شلون الفها عمي عاصف كلي

  :: اكلي شلون ما يعجبج

خليت شويه بيضه بالسياح واكلته فعلا كلش طيب واستساغيت الطعم بيبي سالتني

شلونج اليوم جده

انتبهت النفسي وكان لحظة النسيان اخذتني الى غير عالم جاوبتها = الحمد لله

كانت كلماتي متكسرات بصدري وبمجرد ما احجي العبره تخليني ابجي

بيبي ردت //. صلي على محمد ما بيج بس العافيه امس خوفتينه عليج

استغربت من ردة فعل بيبي وحاجيت نفسي يمكن خوفي ما اله مبرر اتشجعت وسالتها = علووش يمته نام

بيبي // ها علي تسمونه علووش

  عاصف :: اي يمه يندهوله علووش (باوعلي ) هو نام يمي. بالديوان وشلته جبته وخليته عالجربايه وانا نمت بالكاع

ما ردتج اتكعدين لان شفتج رايحه الغير عالم ( ابتسم ) هسه ما كلتيلنه شنو رايج بالسياح

جاوبت بعفويه = كولش طيب

؛: اي هاي امي كل جمعه تكعد من غبشه وتخبز النه سياح يمه علميها خلي تخبز

- - تلحك يمه تتعلم دا خليها تعرف تاكل بالاول

هو ابتسم :: يمه اذا ما تاكل زغطيها مثل البط

بيبي //. ههههههه غير تخرب علينه وهم انشيلها للمستشفى ( باوعتلي ) اتريكي حبوبه وشدي حيلج عفيه ابنيتي

بعد ان كملت ريوكي وهالمره اكلت اخذت علاجي ورحت للغرفه واني اساءل بنفسي

= شنو سوا هشام داخل السجن وامي انتكست واتوفت وعمو ليش ماخذ منه موقف

بقيت متمدده يمكن غفيت شويه واني اسمع اصوات گعدت ورحت الغرفة اشوف علي دگيت الباب اجاني صوت عمه

رجاء وهي واگفه وراي // شتردين واكفه بالباب

= اريد اشوف علووش اخوي

ها اظنه بعده نايم بالحجره

  حسيت بيها مزعوجه من شي دخلت للغرفه شفت علي بنفس نومته رجعت للصاله الداخليه كعدت ع القنفه وبعد وقت طلعت

  فرح وهي شايله ابايدها استكان چاي من شافتني ابتسمت وكالت

اتطلعين ترحين يم بيبي بالبستان

هزيت راسي هي استردفت //. خوش چا هاج اخذي الچاي ودي الها

انطتني استكان الچاي وابتسمت وهي اتاشر بايدها // اطلعي منا وعلى ايدج اليمنى تلكين حبوبتي

 

عرفت كلمة (حبوبتي ) يعني بيبي وهاي اول مفرده اعرفها

اخذت الصينيه ورحت شفتها كاعده على بساط حياكه يدويه وبيدها السبحه

وبالقرب منها دجاج عرفت بعدين يسمونه دجاج عرب وصلت ومن شافتني ابتسمت الصراحه اشوف بعيونها حزن

وهذا الشي موجود من اول ما شفتها يعني مو جديد وصلت يمها وخليت الصينيه هي كلتلي // اگعدي

گعدت بيبي حچت وهي تنش بايدها الدجاج // اي ياجده اطلعي شمي هوا الله كله ساجنه روحج بالحجره

غير تتكرمين وشلون بيج

باوعت الها لان ما عرفت المفرده الاخيره سالتها = تربين دجاج

باوعتلي وضحكت /= ههههه اربي دجاج

  هزيت راسي =. مو دا اشوفهن ملتمات عليج

   - - لا هذني موجودات بالبستان وبعد اكو بط وفسيفس

فتحت عيوني بيبي سالتني /= شني ما شايفه. بط وفسيفس

= بط اعرفه بس فسيسف لا يم...

   قاطعتني // هههه شني شكلتي فسيسف

سمعت صوت بهاء // شنو جده شنو

  - - تعال خاب جده تكول ما شايفه فسسيسف

ههههه (باوعلي ) الحمد لله ع السلامه ما تعرفين شنو فسيفس

هزيت راسي بخجل = عمو من. كان يمنا گلي هو الديك الرومي بس ما شايفته هالقرب وجها لوجه

(ردت اكللهم بابا جابه وامي طبخته بس ما حجييت )

بهاء //. اي هو هسه اجيبه واتشوفينه وجها لوجه العبي ويا وحتى لو تردين اتسمينه عادي

راح بهاء بيبي تشرب بالچاي وتسبح اجه وهو شايل ديك رومي نزله يمي وگال هذا الفسيفس شوفي

الديك الرومي راد ينقرني اني ختلت بحضن بيبي وضميت وجهي بصدرها وهي كالت // اشش شو وخره

   بهاء بضحك // ايا جبانه تخافين من الديك الرومي لو اشمر عليج حيه شتسوين

اتمسكت اكثر بحضن بيبي الي گلتله // شحدك اموتك غير

ها بدت الانحيازات

انجب خرعت الفرخه وخره بساعك

لاتخليني اذبحه واشوي

انت تحوم من يمته تريد تذبحلك اوحيد

هز راسه // اي حجيه مال اذبحه ونشوي بالبستان هيج وخبز حار شرايج

  بيبي // بكيفك بس خلي انشد وجدان

لزمتني من كتفي // ها ياحبوبه نشويلج فسيفس

هزيت راسي يعني لا

  بيبي // وليش ؟

  = ما احبه

  - - چا انتي مو كلشي نگلج علي تكولين ما اريده وما احبه

بهاء //. انا رايح اذبحه واشوي ع الحطب والي يريد ياكل وياي بكيفه والما يريد هم بكيفه

بيبي // من تشوي خلي براحته مو تحركه

بهاء رد باستهزاء //. شني خويه اول مره شاوي ما تدرين بيه اختصاص

راح بهاء بيبي سالتني // اخوج گعد

  = لا بيبي وين عمو عاصف

   ما ادري شغل سيارته وراح ليش

   = لا هيج دا اسال عنه

  - - هسه يجي ما يبطي ما تگومين تتمشين تحركين رجليج بالبستان

  = لا اخاف

    منين

  = تطلعلي حيه

  - - هههههه خايبه بهاء يچذب

     عاصف :: منو هذا اليجذب

  بيبي // هلا يمه اجيت

  :: اي السلام عليكم

  - عليكم السلام

  :: منو اليچذب

  - - بهاء خافت من الفسيفس ايگللها اشمر عليج حيه

    

       :: خفتي من الفسيفس

هزيت راسي وبيبي استردفت // اگلك وجهها اصفر وختلت بحضني وهو ايگللها اشمر عليج حيه

  :: شحده تخافين وانا موجود

هزيت راسي هو گال :: ياالله امشي للبستان شوفي وانتي يمه گومي ويانه

مابيه حيل

  :: شني ما بيج حييل وين رايحيين گومي

عمي عاصف وگف وانطا ايده البيبي الي صارت تمشي واني وياها واشوف النخل والارض المزروعه وعمي يكلي

زارعيها حنطه وشعير

بعدها اخذنا المكان بي شرك حديد وفتح باب دخلت شفت بيها انواع الطيور بط ودجاج وديك رومي هوااي والبط

ويا افراخه كانو قريبين من بحيره عمي عاصف فتح للبط الباب وهنه راحن ايسبحن المنظر حلو سالني //. ها حلوات

    = كولش بعد جيب طاووس ونعامه

   :: اي مفكر اجيبهن ان شاالله امشي خلي نشوف بحيرة الاسماك

بيبي گالت // روح انت وياها انا ابقى اهنا

  :: بكيفج يمه

بقيت واكفه عمو سالني :: ليش واكفه

  درت على بيبي وسالتها = يعني بيبي مينقرج الديك الرومي

بيبي // اكلك يمه شو ما عرفت حچيها شني

عاصف ابتسم //. حجيه تخاف عليج خاف الفسيفس يتحارش بيج

بيبي هزت ايدها // روحي جده شوفي البحيره

     سالته = يعني عمو صدوك تربي اسماك

  :: اي بابا صدك امشي شوفيها

راح يمشي كدامي واني ورا وصلنه شفتها بحيره مالت ماي كبيره وبلقرب منها شط ويمها اجهزه گلي

  :: هاي هي

اي من اجينه اني وا...

  :: شوفي بهاي الشبجه نصيد

عرفت عمو يحاول ايغير الموضوع هو رد :: بس الاعلاف غاليه تردين اصيدلج سمجه

هزيت راسي هو سالني :: ليش بابا

بلعت ريكي = موو بهاء راح يذبح الديك الرومي

ابتسم اسمه فسيفس انتي لازم تتعلمين على كلامنا والما تعرفينه اساليني وانا اجاوبج

باوعي هاي (اياشر ع البحيره ) هاي الصبح مو حلو منظرها كون تشوفينها العصر تخبل ياالله خلي نروح الامي

رجعنا من غير طريق شفت بيت داخل البستان سالته واني رافعه ايدي ااشر = بيت منو ؟

   :: هذا بيت الفلاح

  = يعني موجود بي

   :: اي هو وعايلته

عمي حجى بصوت عالي :: وينك جابر

طلع بعد ما واصل يمنه // هلا ومرحبا ابو سيف

:: هلا بيك اشلونك

الحمد لله توني اجيت سجييت الزرع

:: اي شفتك الله يطيك العافيه بس وجدان نشدتني على البيت وكتلها بيت جابر ابو مصطفى

اتقرب الرجال كان تقريبا بكد عمي عاصف وهو ايكول // هلا بيج عمي حياج الله

رديت علي = اهلا

هو رد حچى بصوت //. سميره سميره وينج ام مصطفى

طلعت مره واجت صوبنا وسلمت على عمي عاصف // اشلونك ابو سيف

:: هلا بيج الله يسلمج

اجابر //. هاي بت سعدي الله يرحمه

  هزت راسها // اي اعرفها شفتها البارحه بقراية امها

جابر // اتفضل ابو سيف

:: غير مره وجدان تعبت

   سميره // اي خليها ترتاح داخل البيت تره بيتنا مرتب ونظيف حتى اسالي ابو سيف علينه

ما رديت عليها اكتفيت اهز راسي عمي جاوب :: والنعم منكم وبيتكم بيتنا بس هي ما متعوده على المشي

بالتراب والطين

ام مصطفى // تتعودين اصلا تتمنين بعد ما ترجعين للولايه

  :: فيمان الله

الله وياكم

   سميره //. هاي ما نحسبها جيه خاله وجدان تجين وتكعدين بالبيت وتاكلين ويانه

    ابتسمت وهزيت راسي

تستمر القصة أدناه

صار عمي يمشي ويحاجيني :: من احد يحچي وياج ردي

  باوعتله هو هز راسه :: مثلا سميره من كالت هاي ما محسوبه المفروض تگليلها ان شاالله ع الجايات

ما جاوبته حسيت بي ضايج من تصرفي صرنا نمشي لمن ما هجم (كلب ) اجلكم الله اني من شفته شلون يركض

صوبي صرخت بخوف وحضنت عمي الي ايگل للكلب (ميحوم هدو ) والكلب راسا دار وراح يمشي بهدوء

وعمي ايگلي :: لاتخافيين هذا الچلب مالتنه مخلينه يحرس الحلال

ما عرفت شنو يحرس الحلال بس عرفت انو الكلب الهم سالته

= عمو

:: ها عمو

= سمعت عمو جابر ايگولك ابو سيف اشو ما شفته اليهسه

:: ياهو ؟

= ابنك سيف

اتنفس بعمق :: ما عندي سيف بس همه يصيحولي هيج طلعوها عليه

= يعني ات عدك فد فرح

هز راسه :: الحمد لله

رفعتايدي بالدعاء =. ان شاالله يصير سيف

ما عقب على كلامي اصلا ضاج واني سكتت رجعنا شفنا بيبي كاعده بمكانها ويمها عمه نهاد

وصلنه ونهاد من شافت عاصف وگفت وهي اتگله بكل احترام // الله يساعدك عاصف

:: هلا الله يساعدج

باوعتلي وسالتني // ها اشلونج اليوم

= زينه الحمد لله

اي هيج اطلعي وامشي

هزيت راسي بيبي سالته // وين رحتو

:: للبحيره وشفنه جابر ومرته وشافت الچلاب وخافت

بيبي // لا يحبوبه لاتخافيين هسه يرومنج

اكتفييت اهز راسي لان ما عرفت الكلمه الاخيره بعدها رجعنا للبيت ويانه عمه نهاد دخلنه للبيت وعمتي رجاء بالمطبخ

راحت يمها نهاد فرح بالصاله تباوع ع التلفزيون شافها عاصف گللها :: ليش ما اجيتي ويه بت عمج

  - - بابا غسلت المواعين وانوب ملابسي

  :: ها اشو كاعده ع التلفزيون ما عندج دراسه

- - هسه كعدت العصر ادرس

  :: امج وين

  - - بالمطبخ تصلم بالفسيفس

رحت الغرفة عمي عاصف وصلت شفت علي بعده نايم ندهته يكعد فتح عيونه گتله = اگعد صار دنيا الظهر

اجه عاصف وراي :: خلي شتردين منه

= مي خالف عمو يكعد شويه وباخذ علاجه

هز راسه باوعتله =. عمو

:: ها

ات مو قبل شويه كتلي الكلمه الي ما تعرفيها اساليني عليها

:: اي

= بيبي من سولفت الها على الكلب كلتلي يروم انج. شنو يعني

ابتسم :: يرومنج. يعني يتعودن عليج

هزيت راسي =. تمام

وبيومها شوا بهاء الفسيفس باكمله وعمه رجاء خبزت بتنور الطين ومن صبو الغدا اجو بيت عمي مهدي وكان غداهم مرك بتيته والتمو والكل ياكل وهمه سعداء وحاولت اكون مثلهم واعيش وياهم وابتديت ادخل للمطبخ واغسل مواعين الظهر واساعد بتحضير العشا حاولت اتناسى الي صار لكن مجرد ما ابقى ابحدي كل شي اتذكر ابچي واخاف من المجهول عمي عاصف وبيبي تلث مرات راحو ما اعرف وين مرتين رجعو بالليل تعبانين وثاني يوم بيبي بقت بفراشها ما گامت من التعب ومره باتو

  بيبي دووم تنعى وتبجي وعمه رجاء ونهاد ايكللها كافي تعبتي لكن هي ما تسكت ودائما تذكر اسم عمي بدر وتگله

يامظلوم يايمه

  عمي عاصف نفس ما هو الكل يحسبله الف حساب وكل شي بيده والحزن الي بعيونه ما راح

   عماتي انصاف وامل يجن ويسالني على احوالي وبيبي من تشوفهن تظل تبجي وهنه يبجن وياها

عمتي سعاد اجت مره وحده كعدت ساعه وراحت ونفس نظرة الكره الي دا احسها الي

اني ما اسال ولا اسولف هواي ويه بنات عمامي فرح وساره الي دائما يجن يمي يحچن وياي واطلع وياهن للبستان هنه يلعبن

واني ابقى كاعده ما اشاركهن اله قليل كل همي ادير بالي على علاوي اخويه الي طلبت من عمي عاصف ان يبقى ينام يمي

علاوي الي بعده كلامه متقطع وبي تأتأه لكن هو مندمج باللعب ويه اولاد عمي وخصوصا بهاء الي وين ما يروح ياخذه ويا

ويوميه اريد اسال عمو عاصف يمته تاخذني اشوف هشام لكن اخجل لان داىما مشغول وما يكعد بالبيت ويسافر ويرجع تعبان

فقررت بااقرب فرصه احجي ويا بس اهم شي يكون موجود بالبيت ومرتاح

وبعد شهر من اقامتي ابيت جدي قررت اطلب منه ياخذني اشوف هشام لكن هو سبقني من اجه بالليل وهو ايگلي

:: محاكمة هشام باجر وانتي لازم ترحين لان يردونج شاهد

الفصل العشرون من هنا 

شكرا لزيارتكم عالم روايات سكيرهوم