رواية ارحموني ولو رحمة مرة الفصل العشرون بقلم فراقد حسن علي
محمود /اني مو غشيم ،،ولا مطفي
اعرف كلش زين شنو الجاي يصير
واعرف رفل مستغلة فرح بشغل البيت
بس ليش ساكت عنها لان مستخطيها
لان اعرف الحمل وثقله وتغير الهرمونات
ومعاناة المراة بفترة الحمل
-ودائما فرح تشكيلي من لسانها
تعيرها وتكوللها العربيه ،، عرب جول
الهمجية ،،المتخلفة ،، المرعبلة
وغيرها من الالقاب
-وكل هذا واني ما انطي بيها
وما احاجيها ،، ولا ارزلها
كدام أهلي او كدام فرح
-انطيها حقها واكول ميخالف تتعود وتتغير ومو سهلة على المراه تنزل عليها شريجة بس بعد هذا الشي بالغصب انكتب علينا كلنا
-ودائما اعقل بفرح واكللها// أتجنبيها وحقها تغار ،، وألشريجة مره تركيها بحالها
-صح فرح أصغر منها بالعمر
وتختلف عنها بمستوى الدراسة
والثقافة ،، والبيئة ،،
بس الظاهر صدك كلمن وعقله
-أصعد يم رفل تلطم وتبجي
//يابه شبيج
تجاوبني//ليش متريدني ومتتقرب مني
أتقربلها تلعب نفسها وتنفرني بسبب تغير هرمونات الحمل
وهم ترجع تبجي
//يابه حقج وعاذرج الهرمونات مو بيدج
-امي شكتلي رفل مأذية فرح ومتخليها توصل صوب أسلام
واذا هو الطفل راح على فرح
تشحطه وتصعده فوك ويبقى يبجي
سألتها//يابه رفل ليش ما تقبلين فرح توصل لاسلام
تجاوبني// عربيه وما تعرف أداري
-هنا نهديت بيها //شوفي رفل لا تشوفين روحج زايد
وخليني ساكت ما اريد أجرح كرامتج
-وترى الكدامج عربي وأبن عربي،،
وفلاح ابن فلاح
بس طورت من نفسي وصرت دكتور
مو عيب الواحد يكون فقير او فلاح او عربي
هو ما أختار هذا الشي
اجه للدنيا ولكه نفسه عايش بهاي البيئة
-بس العيب على اللي عايش مثلج بالمدينة
وبيئة متحضرة بس تصرفاته همجية
-ولا تنسين انتي منين أصلج ،،
امج وابوج منين أجوي مو من قرى الحلة
يعني انتي عربيه حالج حال فرح
انتي علساس متحضرة بس تصرفاتج همجية
وهي عربيه بس تصرفاتها متحضرة
شفتي هسه الفرق لو اوضحلج أكثر
-من هذاك اليوم من حاجيتها بطلت
بعد تصيحلها العربيه ،،لو بالالقاب الباقية
-شغل البيت ما ادخل بي ،،
لان هي خطية حامل
وفرح ما تشكي بالعكس متونسة
وامي راضية عليهن أثنينهن
بيوم الصارت العزيمة بالايام الأخيرة من رمضان والنقيب صديق أركان شايف فرح بالصدفة،،صح ضجت وأنغثيت من كلامه
بس الصدفة الصارت مو صوجها ولا صوج الرجال
-صعدت فوك مغثوث حيييل
والغيرة عمت عيوني
خفت أبقى جوه وأتجاوز على فرح أكفخها لو أسمعها حجاية وبس تبجي أبجي كبلها ما أتحمل أشوف دموعها
-وأسمع أبويه عاط على رفل
صوته رج البيت
نزلت ركض واشوف الكل
مجموع بالحوالي
عادل/رررفل أكضبي السانج لا ودين محمد
أحشه الج من عركه ،،مو شايفه نفسج
وأستگويتي علينه
محمود /يابه شصار ،،واحد منكم يفهمني
عادل /مريتك هاي تطعن بشرفنا
-كمت ردت اطلع للتواليت وكفني كلامها ووكفت خلف الباب
وأسمعها خوش تخوط
رفل/عمي اني ما مجذبه ،،
لو حجي الصدك يوجع
محمود /تنجبين وتاكلين تبن ،،لا تراددين
أركان /رفل تجفي شري
وخليني ساكت ،،لا تخليني
هسه أكلب السحر على الساحر
رفل /اي الكل يدافع لهاي القزمة
واني خليتوني بالوسط
محمود/صووووتج راح أشك حلكج
رفل /لا ما أسكت ما دام كلكم مشجعيها على الغلط عيني عينك
محمود /كفختها راشدي مال حركة كلب
وهي تخبلت تعد وتصف وصوتها يجيب التايه
-گنگرت عليها أريد أهمدها فقدت أعصابي
وأمي نامت بركبتي وتصيح // لااا يمه حبلة لا طرحها
وأركان شكك فانيلتي عليه عود يفازع بيناتنا
-سامعين أحذر الحليم أذا غضب
شكد ماأطول خلك وأبقى هادئ
بس من أعصب أحرك الاخضر واليابس
// يمه وخري عني أختنكت
اركان شبيك كسرت ظلوعي بس أتركني
ما أسويلها شي هذا هو هديت
-أنتي هييييي أمشي من كدام خلقتي
ولا تبقين تعوين أدخلي لغرفتج
-وانتي الثانية المثقفة عندج طعن الشرف عادي ،، اليوم ما تبقين بالبيت
وروح أجدادي اذا بقيتي اليوم بالبيت أطلكج
-يمه جمعي ملابسها وخلي أكشعها لبيت ألخلفها أريد أشوفه يقبل بنته المثقفة
عادي تطعن بالشرف
عادل/يابه صل على النبي واني أخذها وأعرف خوش أعاتب أخوي أبو علاء
رفل/عمي اني ما مجذبة
-اركان عود انت ليش ساكت
لان مستفاد منها وتتختل وياك بغرفتك
((هنا أنقلب السحر على الساحر ))
محمود/أنووووووب ردددديتي على أاااخويه
يووووول وخر عني
-تخبلت ،،كمت ما اشوف فقدت من الاعصاب
دفعت أركان وأبوي وسحلتها من شعرها
// من أنعل أبوج لابو تربيتج الجايفة
-هي تصرخ وتبجي
وامي ركضت جابتلها عباية شمرتها بالسيارة
-ركض اركان وصعد ويايه بالصدر
بس هو يفور كاعد على نار على يا ساعة ينفجر
-اريد أسوق السيارة بعد ما اشوف أنثولت
الكاع أفترت بيه ،طبكت على صفحة ونزلت بالشارع بدلت ويه اركان
هو يسوق واني صعدت بمكانه
-وصلنا لبيت الحجي ونزلتها سحل
واشوف ابوي لاحكنه بسيارته
أركان يهدي بيه الناس طلعوا على صياحها
-طلع أخوها خالد يركض وفتحلنا الباب
وطلع ابوها واجه اخوها علاء وامها
وجناينهم وجهالهم صارت هوسه بالحوش
-الحجي يريد يفتهم شنو الموضوع
-وامها كامت تحجي//ليش تضربها وهي حبلة
علاء دفعهن أثنينهن جوا للبيت
-ركض خالد وفتح باب الصالة من الداخل
بابها على الحوش ،،كلنا دخلنا جوه
-الحجي دايخ يريد يفتهم شنو الموضوع
جابو مي بارد
ابوي ما قبل يشرب رجعه بيد علاء
جابوا جاي هم رجعه بيد علاء
والحجي تخبل عرف زعلت أبويه ثكيلة
-ابويه راد يحجي ،،ونط أركان
أركان / أريد قران ،، جيبولي القران
سوالف الشرف مو هينة والنسوان تخوط بيها
واريد رفل وعمتي ام علاء كدام الكل
يجن ويكعدن كدامي
حجي نافع /يابه بس فهموني شنو السالفة
مو راح أتخبل ،،يابه اركان صدكني أذبح رفل جوه رجلين اخوي عادل ،،بابا خوتنا أقوى وأمتن من رفل وطلايبها
اركان/من رخصت ابويه وأبو شكرية
يابه أبو علاء أسمع مني الحجي
واني هسه كلشي اوضحلك
بس جيبولي القران والنسوان تكعد كدام الكل
حجي نافع/يابه خالد صيح امك واختك
وهذا القران بصفك
اركان/اجن رفل وام علاء ،،
وخالد يدفع برفل ما تقبل تجي
-محمود راح ينفجر من عصبيته
ويمكن صعد ضغطه من كثر الاعصاب
-عمه ،،وانتي رفل ،،أحلفجن كدام الكل أنتن ما خايطات بشرف فرح
ام علاء/وعليش نحلف أحنا لا جايبين سيرتها
ولا حاجين بشرفها
اركان/يابه أبو علاء أسمعني
بيوم طلعت من غرفتي
و ما متقصد بالصدفة صارت
وأذاني شركتني من سمعت الكلام
رفل تحجي ويه عمتي من تلفون البيت
-تعرف احنا ما عدنا سالفة نشتري للنسوان تلفون ،،عدنا تلفون عادي عند أمي هن النسوان يستعملنه خاف يخابرن على أهلهن
لو يخابرن علينا من يردن حاجة واحنا طالعين
-واسمع رفل تكول لعمتي//يمه فرح فد وحده ساقطة،،قبل شويه طلعت من غرفة أركان ويمكن جانت نايمة ويايه !!
لان هو مصلخ بطرك الشورت
وهي طلعت خايفة وتركض
-شويه سكتت تسمع جواب أمها
وانوب ردت وكالتلها //لعد شتترجين من وحده ساقطة ومفتوحة من الصغر
تلكيها لعبت شاطي ،،باطي
وتبركست براس محمود
-انوب ردت جاويت تكول// هي ما كافها محمود دايره على أركان وبس تتختل وياه بحجة أخويه واداري
-الصراحة كمت أفور بس بقيت واكف أريد أسمع كل سوالف خباثتها
بس نهت الاتصال دخلت عليها للغرفة
وصلختها براشدي فريت رأسها على هذا كلامها لان عرضي وشرفي هواي أنخاط بي
كتلها//هسة تلبسين عبايتج وترحين ويايه لبيت لابوج ،،اريد أشوف الحجي يقبل بهاي سوالفج
-وهي هل كدامك ،،أتحداها تنكر السالفة
ودنكت على رجلي تريد تبوسها وبقت تبجي
تكول//أبويه يذبحني بس يسمع جايبه طاري فرح
-ما حجيت بالموضوع وبقيت سالفة سكتة لان سوالف الشرف من شرارة تكب حريجة ،،
-واني كلت أتعضت من كبستها وضربها ،،وكلت بعد ما تعيدها
رفل/يابه أني شفتها بهاي عيني طالعة من غرفته وهو مصلخ وهي طلعت خايفة
نافع/من أنعل أبوج لا بو الخلفوج
يا كلبة يا بنت الكلب
اني أعيد تربيتج من جديد
اركان /يولي وين مصلخ،،مو جاي من ضيم الدوام تعبان وذابحني الحر وصايم ولابس برموده
-وصحت على أخيتي مو مرت أخوي
كتلها تكويلي بدلتي العسكرية
وهي تشاقيني تكلي دمك ثكيل
ركعتها بكايت الجكاير طلعت تركض
محمود /يالله ااااالصبر ،،
-أسمع السوالف وأحس الدم قبط براسي ،واذاني كامت تصفر
أريد أكوم وأكطعها كدام أبوها وما يرتاح كلبي
-عمي الله بالخير عليك
رفل بعد ما تصلحلي مراه تعبت من مشاكلها،، ومن صوتها العالي ،، وخشمها اليابس ،،
مثل ما دخلنا بالمعروف نطلع بالمعروف وشوكت ما تولد أخذ أبني
رفل /مو بكيفك ،، تاخذ أبني من عندي بس اني صوجي لازم من البداية من سمعت سالفتها جان المفروض اروح وأخبر عمامها
يذبحوها حتى ارتاح منها
بس كلشي صوج علاء يكلي //أكسر رجلج بس تطلعين الباب
نافع/شو تعاي الظاهر ما عرفت أربيج
محمود/كام عليها أبوها تولاها كفخات طفر عليها أخوها وابويه يردون يفكوها من ايدين الحجي ما يكدرون
اني ولا أتحركت لان اذا أكوم اكطعها وياه
-يالله عليها صوت ،،صوت المدفعية مو مثله تصهل صوتها يلعلع
ام علاء/وانت عليش أطلكها
اول شي أعدل بيناتهن
وبعدين فكر بالطلاك
محمود/صدمتني بكلامها هذا ،،شنو أعدل
-ابويه خلاها وره ظهره ،،
رغم ماهو ضايج من عدها
-بس دقيقة رفل خاتون ،،بشنو ما عادل وياجن
-تاخذ مصرف وانتي ما تاخذين
أجيبلها علاكة وما أجيبلج
أشتريلها ملابس لو أحتياجات وما اجيبلج
اطلعها للسوك لو لغير مكان وما مطلعج
أبات يمها وما أبات يمج
رفل /لا ،،بس أنت متحبني
وحتى متريدني ومتتقربلي
ومن احنا كاعدين جوه تبقى بس تباوع عليها وما تباوع عليه
علاء/يووولي راح أكوم أكص ألسانج أحشمي الكاعدين لو أكوم أهينج
محمود /بس دقيقة علاء
-شفيتني حاظنها كدامج ،، لو مشاقيها لو مكعدها بصفي ،،
لو مسمعها كلمة حلوة
هذن السوالف أنتي كلهن تسويهن وبالخباثة ومتقصدة كدامها وهي تلف وجهها وتروح
-واذا الحجي صار ما بيه حشيمه عندج اني هم ما أحشم كرامتج
-مو هي عروس ألها ٣ أيام عندي وتركتها وصعدت يمج ،،
-مو كل ما أشتهيج تنفريني وتلعب روحج لان حامل ومتغيرة هرموناتج ،،
واني أكلج ميخالف ولا تضوجين ولا تزعلين هذا الشي مو بيدج
رفل /روحي تلعب من جكاير مو منك ولان أشتم بيك ريحة جكاير ما اكدر اتقبلك
محمود /هسه اني مو خوش أدمي
واحد مسقط ودايح وهل سمعتوا مني ومنها علموني شلون اعدل بعد
خليني اتعلم من الكاعدين
نافع/يابه عداك العيب مابيك عيبه
بس الصوج بيه ما عرفت أربي صح
عادل/ابو علاء ،،
كل السالفة وهل الهوسة الصارت بجفة وتتهم فرح بشرفها بجفة
-اني لو أريد أضم موضوع فرح
ما ابلغك وابلغ الولد عليش محمود نهى على بنت عمه وما مر على زواجه عام من بتكم
لان ما ردت يصير بخاطركم
-وحجيتلكم بكل سالفة البت ،،
وكتلكم بريئة وطفلة من صار بيها الحادث ،،ومحمود تحمل نتيجة الخطأ وستر على بنت عمه
-أخذها من هي طفلة
ومن دخل عليها بعرسها ثبتت هي بنت مره ثانية
-وسولفتلك وكتلك باكر ونيشانها موجود لانك أخويه ومااضم عليك
-من تجي رفل وبالصاعدة وبالنازلة
وتكوللها الساقطة وملعوب بيج وره محمود وتبركستي براسه
وانوب تهمتها ويه أخوها
وانوب ردت تهمتها ويه صديق أخوها
هذا الطعن أريد أعرف شنو معناه عند رفل
-يابه علاء وانت خالد سالفة تهم الشرف والخوط بعرض الناس
عدكم عادي لو شنو الموضوع
الحجي/ياخوي ما اعرف وين أودي وجهي منك ،، هل بنت الجلب خجلتني وياكم
اني أربيها الك من جديد
-وسبق وكتلك عرضك هو عرضي
وشرفك هو شرفي،،
وأمسح الهوسه الصارت بلحيتي
والك وعد مني أعيد صياغيتها من جديد
محمود/عمي محشوم ،،واحترامك على راسي بس رفل تحرم عليه مثل ما حرمت عليه أمي
عادل/محمود كول يالله ،،كول يا الله يابه
محمود/ما اكدر بعد أحجي أبوي بعد لطمني على حلكي ونهى الموضوع ...
-ترخصنا من الحجي ،، والولد
ورجعنا للبيت بين الافرع نخاف من الامريكان لان صار وقت حضر التجوال
-دخلنه للبيت ،،امي كاعده بالهول تصلي وفرح ماكو يمها
-اركان صعد فوك لغرفته
ويكلي /صوجك المراه ما تنطي عين من البداية وأصكرها ،، ما جرت عدل اكومها بكفخة ، وأكعدها بكفخة تصيرلك أنعم من الحرير
-اني هذا مو طبعي ،،
ما أحب أجرح مراه لو أهينها
بس رفل اااخ طلعتني من طوري
-دخلت الغرفتي ،،واشوف فرح نايمة بس صوت شهكة البجي بصدرها ما كعدتها خطية تعبت اليوم
-كعدنه على السحور ،،واشوفها
تلوب ،،شبيج
فرح/كل الهوسة الصارت والصياح والعياط وأتهام رفل اليه بجفة ،،ومن تهمتني عندي شي ويه أركان بجفة
-من طلعوا شبعت بجي ،،من كثر ما بجيت نمت ولا حسيت على روحي
-بس فزيت لان عندي لويات خفيفة حيل
رحت للحمام ماكو شي
بس اللويات مزعجة تروح وترجع
مو حيل توجعني بس ما اكدر أنام
-محمود شو عندي لويات خفيفة
عادي لو شنو
محمود /اذا خفيفة اتوقع باجر تنزل عليج الشهرية ،،بس بعد ما تتوجعين خلصتي
فرح/تسحرنا ،،بس الكل ضايج
والوجوه مجفية ،،صلينا ورجعنا نمنه
-للضحى وكعت عليه قطرات دم صغيرة
-سألت أمي كالت /ميخالف تتخربط عندج
لان تزوجتي وتغير نظام جسمج
-بس اني وامي بالنهار نبقى بالبيت
-واسلام حبيبي ملتهية وياه أسبح وابدل وأوكل ،،وحتى أنومه يمي بالنهار
بس بليل ينام يم أمي وابويه
-من الصبح أخلص كل شغل البيت
والفطور هل قاسمه الله انبلش بي العصر
حتى الواحد ما يشتهي ياكل
نخلصها بس شرابت ،،ولبن،،ومي بارد
من كثر العطش
-وره الفطور أكعد وأخيط
لو بالنهار من يصيرلي مجال
خيطت تلبيسات للقنفات مال الديوانية والهول شفتهن بمسلسل بالتلفزيون صح تعبت وبقيت اشتغل بيهن ٣ ايام
لان أقيس وارجع أخيط
وامي فاطمة تشتغل ويايه على الواهس
بس طلعت النتيجة كلش حلوة ومرتبة
-وانوب خيطت شلتات جديدة للمنادر والمخاد واخلي بيهن كشكش
وأطرزهن بالمكينة بيها خياط زكزاك
-وسويت وجه للنضدة
وبرده مرتبة وحلوة غطيت بيها جوه الدرج
-وبالسوك شفت خياط البردات
بس ماعندي مواد البردات واخيط
-اني خياطي كلش زين ودرجة أولى
مو أمدح بنفسي بس الخياط عندي هواية وفن وتخيلوا شلون أرتب بعد
واتفنن بخياط القماش
ومن صدك أتعب بالشغلة أطلعها حلوة
-وصيت محمود يجيبلي قطعة قماش دشداشة رجالي
محمود /حرامات تخربيها ،،
فرح /جيبها وشوف اني خيطت لابويه قبل
بس الفصال مال بغداد اكيد يختلف
محمود /اتحداج تخيطين دشداشة رجالي حلوة وكشخة ،، وحتى يصير التحدي حلو
نروح لخياط الدشاديش الرجالية
وندخل بحجة أشتري دشداشة
وشوفي التفصيل والتعجبني خيطي عليها
فرح /قبلت التحدي
رحنا العصر للسوك قبل الفطور بساعة
وصدك دخلنا على الخياط
وبقيت مركزة فقط على التفصال
-محمود أختار وحده عجبته ،،
واني عجبني فصال ثاني كلت أخيطه لابويه
أنوب دخلنا الغير محل علساس ماعجبنا شي منا
ومحمود أشتره قطعة لونها نيلي داكن
وأخذ دكمها وياها
-رجعنا للبيت وبعد الفطور بلشت علساس أخيطها اله ،،
بس أني قشمرت عليه
جبت دشداشة لابويه كعدت واخذت قياساتها
وبديت أشتغل بدقة وترتيب يومين لحد ما كملتها
-كاعدين الكل وره الفطور يتفرجون برامج رمضان
اخذتها وأنطيتها لابويه خيطة هو فرح بيها
و شجعني ،، عباله هيجي شلون ما جان مخيطتها ،، ما يدري خيطتها احسن
من خياطة ابو المحل ،، وكاويتها بعد
لبسها والكل تعجب على شغلي وخياطي
-ومحمود بقى ساكت لان قشمرته وخسر التحدي ويأشرلي أصبريلي
-اركان كال// خيطيلي دشداشة بيضة
وانطيج ١٠ الاف
كتله// ابد الا ٢٥ شنو ال ١٠ عندك تاكل وتشرب حتى ما تسوه التعب والكعدة
-ملبوس العافية طلعت على أبويه قالب
ثاني يوم طلع كاشخ بيها
شايفها الحجي وابويه مادح بيه كدامه مسويني نفاخة من المدح
-عاد من رجع
كال /تكدرين تخيطين وحده لعمج هدية
كتله//تدلل جيبلي قماش على ذوقك واني أخيطله على اليعجبك
وصدك خلصت دشداشة الحجي بعد تعب وشغل مرتب ودقيق
-وصبح علينا العيد
ياربي عيد الخير والعافية على الجميع
-ابويه راح يصبح ويعايد الحجي
يكول رفل ما تفرقنا
واخذ الدشداشة وياه
يكول هلكثر فرح بيها وبقى يدعيلي بالخير
-ثاني يوم رحنا كل احنا بيت أبويه عادل
للمحمودية ،،وبتنا هناك وخلصنا العيد
بين الاهل والعمام
-محمود حباب اريد تفاح صغار أخضر حامض
لو مشمش صغار حامض
محمود/ههههه شذكرج بالصغر
هسه اذا أكو بالاشجار أجيبلج بس ما اتوقع موجود
-وبفرحة العيد ولمة الاهل نسيت سالفة التفاح والمشمش الاخضر الحامض
ومحمود ألتهى يفترون يعايدون العمام والخوال
-رجعنا للبيت العصر
ولليل ولن رفل جايبيها أمها وابوها
واجوي يتعذرون
وهي عايدت الكل
وتبجي سامحوني وعذروني
اعصابي تعبانة من الحمل
-الصراحة هي بوستني
بس اني لا حاجيتها ولا بوستها
بس امها وابوها عادي عايدتهم
-من هذاك اليوم بعد رفل ابد ماندكت بيه
وتنزل تشارك بشغل البيت
وتكعد يم امي وتسولف مثل البشر بدون ما تبخ سم
وعادي اصير أوصل اسلام متدخل ولا تمنعني
وبطلت تتحشك بمحمود كدامي
صح جرت عدل ،،بس اني ما أحاجيها
-بنص شهر العاشر كسر الجو وبليل باردة
عاد فرشنا كل البيت زوالي ومدات
وبشهر ال ١١ حلت بوادر الشته
ولازم نشعل الصوبة
-واسلام حبيبي يوصل يمها
يسوي اووو ويرجع ينهزم
-اني مو أسوي نفسي نادرة وشاطرة بروسكم
لو أم بيت معدلة وماكو مثلي وحدة ثانية بس هاي شمرتي يعني من اني طفلة بالسادس ابتدائي بس بطلني ابويه من المدرسة أمي حملتني كل مسؤولية البيت
وبعد تعرفون أغلب بنات العرب هيج شمرتهن
اذا ما يشتغلن ويفترن يتكسرن من الكعدة
-أتذكرت الحلم من قبل لا تصير سالفتي
وينهى عليه محمود ،،وسولفته لامي
امي كالت/هاي المراه اللي شفتيها بالمنام
من ما كانت تكون ترى هي مراه خيرة ومنزلتها جبيرة عند الله وهل وكفتلج
وفكت ضيجتج بجاها عند الله
سويلها صينية شلون صينية حفلة الحنة
خلي بيها جكليت وشموع وحلويات
وسويلج كيكة وشربت وهاي النعمة وزعيها على الجيران لوجه الله ولروح هاي المراه الطاهرة
-صدك اخذت بكلام امي وسويت نفس ما كالتلي خبطت كيكة وكملتها
ودزيت قواطي ببسي وميرندا
وجكليت وحلويات وحلقوم وشموع
رتبت صينية جبيرة وخليتها بغرفتي
شعلت الصوبة علمود تدفى الغرفة
يومية بوكت المغرب أشعلها وأطفيها وره العشه
-يبوو روحي فرفحت على طماطة حمس وبيها بصل مثروم كبار
وبيتنجان مكلي شريح طويلة واخلي بطنه جبن سائل من هاي الكلاصات العند ابو المحل ،، وخبز حار
-هاي سالفة البيتنجان عشقي طعمها كلش طيب دائما أكلها
-كمت أرجف على الاكل
الواحد يكسب بيه أجر لو يسوي وينطيني
من كثر ما فرفحت روحي اني على الطباخ اقلي والف اللفات بسرعة واكل
الطماطة ما مستوية واغمس بيها
-شافني محمود هيج أخبط البيتنجان ويه الجبن واكل كنش وجهه
//ترى طيب،،هاك عض
اخذ عضة صغيرة من لفتي عجبه الطعم
//ترى اذا بارد بعد أطيب
بس هسة روحي فرفحت عليه وجاي أكله حار
محمود /فرح انتي حامل
فرح/ما اعرف شكلك شو صايرة عندي خربطة
محمود /الله كريم ،،بعدنا بالبداية
گلي بعد اليه وياج
فرح /سويت زايد خاف احد بعد يريد
ورفل كلت كبب ،،وسوت زلاطة
محمود من يوم الرجعت ابد ما يحاجيها
ولا يصعد يمها مقاطعها
-كعدنا نتعشه كل احنا
وابويه كلساع وكال/ هسة مال كباب
وامي تعيط / ضغطك يصعد يرجال
-غسلت مواعين العشه ،،وسويتلهم جاي
-وهل جم يوم المضت صايرة عندي سالفة غريبة حتى أني مستغربة من نفسي بس أستحي اسأل عنها يعني بس أحصل فرصة أشحط محمود لو بس بوسه أرتاح
وهو ما مصدك مستغلني أبشع استغلال
-من كملت كلشي رحت الغرفتي اريد ابدل وامكيج
-بس فتحت الباب واشوف النار عالسة الزولية علس يااا اني شكد غبية
قبل شوية شمينا ريحة حرك
كتلهم //ماكو شي هاي مال شموع
ركضت بقصدي اطفيها
جريت النزلة من الجرباية شمرتها على مكان الحرك حتى أغمت النار ،،وخرتها بسرعة توقعت طفيتها
-اني دأئما اسوي هاي الحركة من تلكف عندي مشيالة الخبز أطبها بالكاع وتطفى بسرعة
-شو النزلة انوب لكفت وأشتعلت يمكن لان ستن وديباج لكفت بسرعة
خفت تحركني شمرتها صارت على الزاوية ماكو ثواني وكبن الملابس اللي بيها معلكة
-كمت أصرخ بصوت عالي اجوي الكل
بس شنو اسم الله ،،والله يكفيكم الشر
النار كامت تركض ركض بسرعه كبت الغراض
-شحطني محمود وطلعني بره
واني ابجي واصرخ على غراضي وغرفتي
كله من وره غبائي صار هيج
-هم خافوا على البيت لا يحترك
جيرانه باقي عنده رمل من البناء
ركضوا شكو جدر وشكو نجانة يشيلون بيها
-على الصوت والهوسه فزعوا شباب الشارع
واحد منهم جاب أطفائية حريق يدوية
صح البودرة البيضة شويه خففت من الحريق
بس أختنكنا من ريحتها
-واركان جاب الاطفائيات مال سيارات
كال //نسيتهن من الهوسة
وبهذيج الفزعة والهوسة طفوا الغرفة
الغراض والفراش والشغلات الناعمة ماعن
بس الكنتور والكومدي وتاج الجرباية
بقى خشبهن واكف بس اسود ومفحم محروك
غرفتي راحت واحتركت شكد بجيت تفرفحت عليها
انوب اختنكت بعد هوى ماكو
صدري قبط من القهر بالكوه كمت أتنفس
لكفني محمود وامي ولد جيرانهم يسوق
لان محمود تعب من نكل الرمل والهبطة
-وصلوني للمستشفى وخلولي أوكسجين
كالوا //هاي خنكة مال مغثة وقهرة
خلولي مغذي وبي أبره
ومحمود شرحلهم الصار
ضربوني بعد ابره وره شوية ارتاحيت
رجعنا للبيت بوكت متأخر
-ثاني يوم بلشنا حملة تنظيف
اذا باقي شي نظيف وما محروك
من هدوم او غراض نطلعهن للغسل
والباقي من الغرفة ابويه جاب تركتر وحملوا كل المحروك بيها
-شبعت بجي اباوع على الحياطين سودة ومصخمة غرفتي أحتركت من وره غبائي
والقهرني لا واحد يحجي عليه
ولا احد يرزلني
-يصيحون قضاء وقدر
والله قدر ولطف ،، ودفع ما كان أعظم
-امي كالت لابويه// جيب ذبيحة لوجه الله
دفعه بلاء وخل نوزعها للفقراء
-هلكثر بجيت
ما صدكت عيوني فتحت ابوابها للبجي
الدموع تنزل من وحدهن
انوب القهر اكل كلبي اكل
-امي وابويه يحجون عليه لان ابجي
كالوا //الحمد لله ما أحتركتي انتي
لو لهبت هدومج عليج من شرار النار
-اركان كال //أخذوا غرفتي
بين ما نعدل غرفتكم ونصبغها
ونجددلكم غرفة اخشاب
واني استقر بالهول ما عندي شي
-رفل ابد ما حجت ولا علقت ولا ادخلت
-كمنا أنام فوك بغرفة اركان
وهو نزل غراضه وحاجياته بغرفة امي
بس ينام بالهول
-كل ما انزل واشوف الباب محروكة
والغرفة سودة ومصخمة
والدخان مصخم الحوالي اشبع بجي
-بليل نايمين بس وين اكدر انام
صار البجي عندي تعويد
محمود /فرح شو سمنانة وصايرة طبقات
فرح/من القهر بس انقهر اروح اذب ضيمي وقهري بالثلاجة وشكو شي كدامي أسحكه
مستوي لو نيئ
محمود /هذا حجي يفيدج
باجر أخذج العصر للمختبر سوي تحليل حمل ......
شكرا لزيارتكم عالم روايات سكيرهوم
