رواية قصة وجدان الفصل العشرون بقلم انين الليل
اجه عمي عاصف وهو تعبان ومهموم كان ابالي اكله اريدك تاخذني اشوف هشام
رحت للمطبخ حضرت العشا ويه عمه رجاء واحجي ويه نفسي
= وره ما يكمل العشا اجيبله الجاي واگله اقلها اخلي عده علم
وجبنا العشا للغرفه لان هو بقى كاعد يم بيبي خلينا گدامهم واني جيت گعدت يم بيبي وعمي عاصف بالجهه الثانيه
اني وفرح وعمه رجاء كعدنا بجهة بيبي وبهاء وعلووش بجهة عمو عاصف صرنا ناكل عمي عاصف اكله قليل
بالليل وحتى بيبي اكثر شي تشرب كوب حليب او لبن وتمر من كملنه عمه رجاء تشيل الصينيه واني اجيب الجاي
اصبه من اريد اروح للمطبخ
عاصف گال العلاوي
:: عمو رووح صيحلي ابراهيم كله عمي رايدك
من طلع علاوي صاح عليه :: وجدان وجدان
اجيت = بلي عمو
:: حضري نفسج باجر نروح البغداد
فتحت عيوني يعني راح ارجع البيتنا هو استردف :: باجر محاكمة هشام ويردونج شاهد
كلبي صار يدك يعني اخيرا راح اشوف هشام عمي عاصف ينفخ بالدخان كال الفرح :: انطي الاختج عباتج الاسلاميه
:: وانتي يمه هم اتحضري نغبش وره الصلاة
بيبي // ان شاالله عاد كون نلحك
- - ان شاالله نلحك رايدينه بالعشره
=. عمو علووش ناخذه ويانه
:: الاستدعاء اجه باسمج
= مي خالف عمو خلي ناخذه
بهاء اجه وكال // لا علاوي نخلي اهنا
درت سالته = ليش ؟
بهاء // هناك محكمه والطبيب كال يبتعد عن التوتر تتصورين من يشوف هشام شراح يصير بي
اتذكرت من يكلي اكرهه الهشام هزيت راسي لكن دموعي نزلن وانا خاله ايدي على خشمي عمي عاصف گال
:: لا تبجيين ان شاالله ماكو شي
اجه عمي مهدي ويا مرته وابراهيم //السلام عليكم
:: عليكم السلام
اشلونج يمه
طاب لونك هلا بيك
ابراهيم //. ها عمي يكلي علي رايدني
هز راسه :: اي بابا رايدك تدير بالك على علاوي تره هو اخوك وابن عمك وعضيدك
ابراهيم هز راسه // عمي داير بالي حتى انشده
:: وانت شويه خفف عرايك
عمي ما اتعارك منو كلك
نهاد //. علاوي اكيد
هز راسه :: لا غلطانه انا اعرفه ابراهيم نچر وانا اخاف علي هاك بابا
مد ايده بجيبه :: هاك هذا مصرف الك
اشكرك عمي
ياالله انت وعلاوي روحو العبو طوبه مو ترحون بعيد
مهدي باوعلي //. صبيلي جاي
رحت للمطبخ جبت استكانين جاي قدمته اله والمرته وهو يگول
وبيش الساعه لازم اتطلعون
عاصف جاوبه :... ليش انت ما تروح ويانه
هز راسه // شياخذني انت وامي وبهاء انا شسوي ارووح
بيبي //. چا وانت مو عمه
يمه البركه بيج وبعاصف ما احب اشوف محكمه وحكومه
بيبي هزت ايدها //. بكيفك
مهدي //. اگلك احتمال يعدمونه
بدون ما احس نشغت بصوت عالي وبيبي گالت //. اسم الله الرحمن
عاصف خزر مهدي :: انت شبيك
وانا شكلت غير استفسر
عمي عاصف صاح على فرح :: وينج فرح فرح
اجت //. ها بابا
:: وين جنتي
مو اجت ساره وكعدنا بالمطبخ
:: اخذي اختج وخلي تكدر الها عبايه اسلاميه
اي ان شاالله ياالله وجدان
وكفت ورحت وراها واسمع عمي عاصف يحجي :: مهدي انت تبقى ما تعرف شلون تذب حچايتك
مهدي // وانا شكلت
:: البنيه گاعده والولد الي تحجي علي اخوها
مهدي // وهسه هو جايب النه الهلا
:: لا ما...
واتلاشت اصواتهم وفرح لزمت ايدي بعد ما صاحت الساره الي بوستني وهي اتكلي
شنو هاي كل ما اشوفج تبچيين
فرح ردت // لاتبجيين ان شاالله يطلع براءه ابوي يگول المحامي مطمنه
سالتها =صدك
شبيج انا سمعت ابوي يسولف على جدتي
اتحسرت = ان شاالله
طلعتلي عبايات اثنين وكلتلي اختاري اني لبست اول وحده طلعت على كدي هزيت راسي هي حاچتني
هاي شبيج گدري الثانيه يجوز تعجبج
ابتسمت = لا هاي كافي
بكيفج
نزلت بايدي العبايه ودخلت للغرفه چانو كاعدين عاصف كال :: ياالله خلي نكوم باجر ورانه غبشا
مهدي باوع المرته //. نهوده صيحي السويره خلي نروح
طلعو. وانا فرشت فراشي وفراش علاوي واتمددت الليل كله ما نمت بس اتكلب وافكر شلون اشوفه الهشام وشنو
راح اكله اذا سالني على امي ياترى اكدر اباوع. الوجهه هذا الي كان السبب بكل الي صار النه
احس حتى بيبي ما نايمه.لان كل شويه اسمعها تستغفر الى ان كعدت الصلاة الليل واني كعدت وياها
باوعتلي وحچت // ادري بيج الليل كله ما نمتي وما ردت احاجيج
هي راحت اتوضت واني دخلت سبحت ومن رجعت حضرت ملابسي وبقيت متمدده على فراشي الى ان بيبي
كالت لي. اكعدي صلي
ورجعت اتوضييت وصلييت وبعدها سمعت صوت عمي. عاصف
:: يمه
كاعدين يابعد امك
فتح الباب وكال :: صباح الخير
هلا بهالصباح
:: ها جاهزات
اي يمه
:: ياالله
بقيت واكفه وعمي يباوعلي ويهز براسه يعني شكو اشرت الى اخوي = علاوي.
:: هاي عمتج نزلت يمه
شفت عمه رجاء نازله وكالت // صباح الخير
ردينه. انا وبيبي صباح النور
:: ياالله اذا جاهزات
بيبي //. ديري بالج ام بهاء
الله. وياكم
اتقربت منها وبستها بخدها = عمه ما اوصيج ديري بالج على علاوي
ابتسمت وهزت راسها
وطلعنه انا وبيبي ركبنا وره وبهاء يسوق وعمي بصفه حركت السياره والجو كان معتدل ولفحني الهوا ما حسيت
اله. على بيبي وهي تگلي // اكعدي جده وصلنه
فتحت عيوني. شفت نفسي امام باب المحكمه بعد ان خلو السياره ونزلنه دخلنه وتلاگينه بعد التفتيش بقينه واكفيين وعمي
ويه بهاء ما اعرف وين راحو الى ان اجوي وكالو ياالله رحنه وراهم وگفنا يم باب واجه المحامي وصار يسولف ويه عمي
بعدها گلي // انتي راح تشهدين بكل شي شفتي. وهذا المفتاح الي ينقذ اخوج
عمي جاوبه :: تمام
المحامي //. فهمتها
:: بدون. ما افهمها انا وياك نعرف شراح تكول لان هي الوحيده شاهده على الي صار
هز راسه ودخل للقاعه وعمي كلي :: امي وبهاء راح ايدخلون وانا وياج نبقى
=وين.
:: اهنا على ما يصيحون بااسمنا
بقينه واكفيين واجه جارنا ابو احسان من شفته ردت احضنه وهو سلم على عمي وعليه // اشلونج بابا
الحمد لله شلون خاله
زينه مشتاقتلج
واني هماتين ومنار
الحمد لله كلنه بخير دووم نسال عنج عمج
صاحو بااسم ابو احسان وبعد شويه صاحو باسم عمي عاصف الي خلا الجنسيه بايدي وگلي
:: راح ادخل وانتي شنو سولفتي الي احچي بالمحكمه
هزيت راسي = اي عمو
بعد فتره نادو بااسمي // وجدان سعدي غازي
اجه شرطي وكلي انتي وجدان
هزيت راسي = بلي
انطيني هويتج وتعالي
دخل قبلي الرواق وبعدها انفتح باب انطا الهويه باوع الها وباوعلي وكلي تعالي مشى قبلي انطى الهويه الموظف كاعد
اشر بايده //اوكفي اهنا
وكفت وره منصه امام القاضي الي كان يباوع الاوراق امامه اني گلبي صار يدك حييل سالني // اسمج
جاوبت بصوت ناصي = وجدان
حاجاني بنتر وكانما يزمخ عليه //. علي صوتج اسمج الثلاثي
بلعت ريگي = وجدان سعدي غازي
مواليدج
1994
وظيفتج
طالبه بس تركت السنه
خلي ايدج ع القرآن وكولي والله العظيم اقول الحق
خليت ايدي ورددت
احجيلي شلون هشام قتل رامي
هزيت راسي = لا مو هشام الي قتل رامي
القاضي //. لعد منو احچي
استرسلت بالكلام والقاضي كل شويه ايقاطعني بعدين كلي // يعني هشام مو هو الي جاب السچينه وطعن رامي
هزيت راسي // لا مو هو رامي الي راح جاب السچينه وراد يقتل هشام هشام دافع عن نفسه حاول يبعدها لكن
رامي لزمها ما قبل ينطيها وهشام هم لزمها يبعدها عنه
القاضي //. لعد اشلون قتله
بلعت ريكي = الي صار انو رامي عثر بالكرسي وكعو اثنينهم والسجينه اجتي بي
القاضي // محد حاول ايفكهم
هزيت راسي = محد موجود بس اني وماما وعلووش زغير وصرنا نعيط اني وماما الي صارت بيناتهم واجوي
الجوارين بس بعد ما رامي مات
- - عندج شي تگولينه
=عم اقصد استاذ اخويه هشام ماقتله الرامي رامي هو الي راد يقتل هشام
القاضي سال المحامي // عندك شي ويه الشاهده
- نعم سيادة القاضي
- اتفضل
اجه يمي المحامي // انتي بيا صف
= نجحت للثاني
وهسه اتداومين
هزيت راسي = لا
ليش
بقيت ساكته القاضي گلي // احچي بابا
= لان ما اريد اداوم
المحامي // ممكن اتكلينه ليش اتعارك هشام ويه رامي
= لان المدرسه دزو على ماما وراحت هي وهشام
ليش المدرسه دزت على امج
= رامي غايب اكثر من اسبوعين واصلا. ماخذ قصد المدرسه وصارفه
- - زين اريد اسالج هشام كان يضربج
هزيت راسي = لا ابد
بس هو يگول كان يضربج ويعنفج
= بالعكس عمو اصلا من اتوفى بابا هو هشام الي صار مسؤول على البيت وكان داير باله علينه كلياتنا
المحامي //. اهاا يعني ما كان ايضربج
= لا اصلا كان ايحبني ومدللني
- ورامي
= رامي ما كان يگعد يمنا كله بره ويه اصدقائه
- هم كان اياذيكم
=رامي ؟
- اي
= هو مدا يسمع الكلام وبس ماما او هشام يحجون ويا يصير ايعيط ويتعارك وياهم وبعدين شويه وكل شي ينتهي
المحامي // هو الي يبدي العرك
هزيت راسي = اي هو
- - وجدان هشام مصر انو هو الي قتل رامي وكان يريد يقتلكم
هزيت راسي = كذاب (صرت ابچي ) هشام يكذب بس هشام هو السبب بموت امي
باوعتله واشهك بالبجي واهز براسي = اي هشام انت ما قتلت رامي بس قتلت امي وامي ماتت بسببك
المحامي // اهدي بابا انتي وين هسه عايشه
اشرت بايدي على الموجودين = اني واخوي عد عمو
يعني ابيت عمج
= لا ابيت جدي ويه بيبي وعمو
مرتاحه ابيت عمج
هزيت راسي = اي كولش عمو وبيبي ايحبوني اني وعلي اخويه بس
وبرطمت المحامي سال // بس شنو
= اخويه هشام ما قتل رامي والله كان يدافع عن نفسه
المحامي // شكرا سيدي القاضي
القاضي = ارجعي المكانج
رجعت كعدت يم عمي عاصف وهو طلع كلنس ومسح دموعي القاضي گال
راح نتداول بالدعوه الي يريد يغادر يتفضل
عمو عاصف كال البهاء :: اخذ وجدان وامي زورهن الامام ومناك روحو البيت عمي
بهاء // صار
:: ياالله بابا
= عمو اريد ابقى احجي ويه هشام
:: ممنوع هسه محد يحچي ويا روحي انتي وبيبيتج تعبت خطيه اشوف المحامي يحصل النه مواجهه
= وانت ؟
:: انا اجي ويه عمج كريم
طلعت على مضض وانا ابجي ومن ركبت بالسياره بيبي كالت // كافي عيونج راح يعمن
= بيبي ليش ما خليتوني يم اخويه اريد اشوفه اريد احضنه مشتاقتله
بهاء // ما يقبلون منو يخليج توصليله
= اريد احجي ويا
بيبي // انا اخلي عمج ياخذج تشوفينه
= انتو تكذبون عليه هشام راح يعدمونه وانتو ما خليتوني اشوفه
بهاء وكف السياره // هذا شلون حچي
هزيت راسي = اني سمعت عمو مهدي ايحاجي بيبي وعاصف يگلهم. ايعدمونه
بهاء باستهزاء // اي مو مهدي فهيم شبيج بابا اصلا. ياخذ حكم مخفف ولو ما هو مصر على كلامه يمكن طلع براءه
بس هو يصيح انا كتلته
بيبي // لاتخاقيين جده يطلع ان شاالله وهسه نروح نزور الامام. وهناك ادعيله وان شاالله يبرد گلبج ويفرحج
وصلنه للامام وبهاء كلي // شوفي تاخذين جدتي وتدخلين من هذا الباب شوفي. اقري اسمه زين
هزيت راسي هو رد كلي // مو تهدين ايد حبوبتي تره ما بيها. تمشي زوريها واقريلها الزياره وشكد ما تردن تبقن ابقن
ومن تخلصن ترجعن واهنا توگفين. اهنا افتهمتي
هزيت راسي = اي
عفيه بالشاطره ديري بالج على حبوبتي لا يشوفها واحد شاب وينعجب بيها ويخطفها منج
بيبي رفعت العصا مالتها // خاب ولي شو ما تعرف تحچي
ضحكً وراح واحنا دخلنا وانا لازمه بايد بيبي وزرنا ما تتصورون شكد دعيت وشكد بجيت اصلا فصلت عن الكل بقيت بس اني وصرت اسولف وابچي وادعي بعدها گعدت بيبي وصلينا وبيبي هماتين تدعي بصوت ناصي ودموعها ينزلن
بقينه كاعدات بالصحن الشريف تقريبا ساعه وبيبي گالت // خلي نروح تعبت ياجده
طلعنا وشفنا بهاء منتظرنا صار يمشي كدامنا الى ان وكف واشر بايده على مطعم وهو يگول // هذا يقدم اصناف تخبل
ما جاوبت لان ما اشتهي هو دخل قبلنه وبيبي باوعتلي وگالت // ياالله حبوبه كلبي انملخ
رحنه شفنا كاعد واني ويه بيبي گعدنا هو سالنه // شتطلبون
بيبي باوعتلي وسالتني // ها جده شتردين تاكلين
هزيت راسي. = ما اشتهي
- - هذا شلون حجي شني ما تشتهين بكيفج
بهاء // فرحه ما عليج انا راح اطلب على ذوقي
اجه النادل وصار يحچي ويا بهدوء بدون ما يسمع صوته يعني كانما يشاوره وبقينه گاعدات الى ان اجه الطلب كان عباره عن تمن وخبز حار ودجاج ومرك ومشاوي هو كال البيبي
التمن والدجاج الك ياحلو والمشاوي الوجد
بيبي بابتسامه // شني بس وجدان حتى انا اكل مشاوي
هز راسه // اي اكلي عوافي واخلي وجدان هم تاكل تمن ودجاج
بيبي // علوا تاكل ياالله سمي
صارت بيبي تاكل وتحثني اكل ورغم انو فعلا جوعانه وبنفس الوقت ما اشتهي بس اكلت مجامله الهم وبعدها طلب النه چاي
ومن شربنا سال بيبي // نروح
بيبي هزت راسها // اي من تطلع اريد اخذ شغلات للبنات
باوعلي وهو يبتسم // معناتهاانظل لليل
بيبي ردت علي بنتر // مالك شغل
جده انتي اتعبين
شني شايله كاره شو هذني البساطي يمي
وكف وكال // ياالله
بيبي لزمت باايدي وطلعنا كانن هواي موجوده بساطي وصارت بيبي تشتري شغلات وتمد ايدها على جيبها وتطلع الجزدان مالتها اشترت هواي شغلات مثل جزدانات كبار لونين واشترت شالات واشترت جواريب رجاليه وفوطه بيضه وجزدان ثالث خلته بعلاگه
ومحارم صلاة وتقسمهن بالعلاليك ومن كملت كالت البهاء //ياالله. خلي نمشي
وصلنه البيت بيبي ام كريم الي من شافتني صارت تبچي وشاركتها بيبي وصارن يحچن بكلام اهل الجنوب الي يجبر
الواحد حتى لو ما يعرف المصطلحات يبچي
بعدها بيبي ام كريم كالت // كافي خيه انتي تعبانه
وراحت عمه ام كرار وجابت جاي بعد ان بيبي حلفت انو احنه متغدين
وصارت بيبي هديه تسال ابيبيتي وين رحنه وانو ام كرار سوت غدا وانتظرتكم او وين ياالله اجه عاصف وكريم
بيبي ردت انو احنه رحنا للكاظميه زرنه وهناك غدانه بهاء
بيبي سالت // يمته اجه عاصف وكريم
ام كرار //كبل ساعه حتى ما اكلو شويه كالو تعبانيين
- وهسه همه وين
بيبي هديه //. بالديوان جاي يرتاحون
اجت ام كرار وسالتني / /. اشلونج وجدان
هزيت راسي جاوبت بهدوء =. زينه الحمد لله
ابتسمت وردت // الحمد لله مبينه منوره
بيبي ام عاصف جاوبتها //. الحمد لله وجدان حبابه بس بعدهي ما ماخذه علينه
بيبي هديه //. حگها خيه تتعلم اول وتالي
بيبي نزلت علاكه وياها طلعتها وكالت لام كرار //. هاج عمه هذني الج وبيهن سبحه وشيله لام كريم
بيبي هديه //. هي شني كل ما تجيين
يا شجايبتلجن شجازي
ام كرار //. شكرا خاله الله يطول عمرج
سمعت حمحمه وهو يگول ياالله
دخل عمو كريم ويا عمو عاصف وكريم ايكل البهاء // فووت عمي شنو انت غريب
دخلو وام كرار وگفت وهي تهز ابراسها يعني اوگفي
اني هم وكفت اجه عمو كريم وهو ايگول //. السلام عليكم
ودنك على راس بيبي وباسها براسها وصل يمي //. اشلونج بابا
هزيت راسي = الحمد لله
دومج ان شاالله
بهاء اتقرب على بيبي هديه وباس راسها وهوايكول //. هذني العجايز بيهن وما يصيرن حلوات يمكن يرادلهن رجل
كريم وهو يضحك //. اي نزوجهن واحد ويصيرن شرايج
بيبي ام عاصف وهي تدفع ابهاء //. برد شرك ياچلب ياهي التريد اتعرس
بهاء بضحك /. انتن عمي ولا يبين بيجن كبر
بيبي هديه //. سور. سليمان علينه احنه ما نكبر مثل الذهب دومنا نبرك
كريم // عمي شني نكدر الجن
گعدو وكريم سال مرته //. صبيتي غدا
ام كرار /. ما قبلن ايكولن متغديات
بيبي هزت راسها //. چا شني نستحي هذا بيتنا
بيبي هديه //. اي خيه ام بدر بيتج وكل الهلا بيكم
دايم البيت واهله
باوعت العمي عاصف الي گاعد ويدخن //. ها يمه اشلونك
هز راسه :: الحمد لله زين
دومك ان شاالله
كسرت صمتي وسالت عمو عاصف =. عمو شصار بالمحكمه
نفخ الدخان واتنفس بعمق ورد :: اجلوها الشهر الجاي
بيبي //. هم اجلوها
عاصف //. يمه قابل بكيفنا غير بكيف القاضي
چا المحامي ما خصمها شني بس ياخذ فلوس
:: شسوي يمه غير ابن ابنج يصيح كله چذب وانا كتلته
ام كرار // الله يساعده انوب سمع باامه فحس بالذنب اكثر واكثر
كريم// لا ونوب مدعي انا مو بس كتلت رامي ردت اكتل اختي واخوي وامي حتى اخذ الورث كله
بيبي //. چذب هو شعدهم من ورث هذا اتسودن
نزلن دموعي وانا استذكر هشام داخل قفص الاتهام وهو يباوعلي ويبجي صرت مدنكه لكن شهگتي بالبجي وعبرتي خلت الكل يسكت صارت بيبي هديه تبجي وتنعي بصوت مسموع وكله تقصدني كلماتها كانت حزينه وسمعت بچيهم وبيبي هم صارت تبچي وبنعاويها تگول // يمه يا بدر يمه
ومره اتگول // عاصف يايمه حملك ثگيل
وسط هذا الكلام ورغم ابچي لكن بيبي ما تذكر اسم ابوي
بعدها عمو كريم گال //. يمه كافي صلو ع النبي
الكل گال اللهم صل على محمد وآل محمد
كريم سال زوجته // سويلنه عشا من وكت تره عاصف ما اتغدا
اي ان شاالله كله جاهز
بيبي //. عمه ام كرار لا اتعبين نفسج ع الموجود
يا عمه اني شمسويتلكم قابل
الله يخليج ما تقصرين
وبهاي الاثناء اجت هدى بت عمي كريم وسلمت عليه صايره كلش حلوه ولبسها فيكه سلمت على بيبي وعمي عاصف
وبعدها استاذنت لان عدها دراسه
صلينه وجابت ام كرار العشا كان صينية كباب بالفرن وصمون ومقبلات ومقالي ومسويه شوربه اتعشينا انا وبيبياتي
وام كرار وهدى. ومن كملنه العشا انتقلنه الغرفة بيبي الي لگيتها مفروشه دوشگين الي والبيبي خليت راسي واتمددت
نمت كعدت الفجر
صليت وسبحت ولبست ملابسي وشفت بيبياتي گعدن للصلاة وعمو كريم گال //اذا كملتن ياالله
رحت للسياره وبيبياتي هماتين وحتى عمه ام كرار وعمو كريم وهدى الظاهر يردون يجون ويانه
اني بقيت واگفه وشفت بيبياتي ركبن بسيارة عمي عاصف بقيت واگفه شفت بهاء راح ركب ويه عمي كريم بالصدر وام كرار وهدى وره عمي عاصف گلي ياالله تعالي اركبي
ركبت بالصدر وحركت السياره وبيبياتي يسورن ويدعن عمي عاصف الطريق كله وهو يدخن وحتى بيبي هماتين اتدخن
بس مو مثله وهنه يسولفن على اشياء ما اعرفها غفييت فتحت عيوني وبيبي تهزني
شو اكعدي طيحتي جتف عاصف
فتحت عيوني لكيت نفسي نايمه ومسنوده على عمو عاصف صدك خجلت كعدت وعدلت حجابي كل ظني وصلنه البيت جدي
صوت عاصف وهو يحجي :: انزلن للمطعم
هنه ما قبلن باوعلي :: ياالله بابا انزلي
اجه عمي كريم ويا زوجته وسال // شنو ما تردن اتنزلن
بيبي هديه // يمه ما بيه كل ساع منزليني
وانتي عمه
جا ما اعوف امك ابحدها
ام كرار // عمتي انا انزلها
عاصف كل البيبي :: ياالله يمه
اخذ بايد بيبي نزلها وكال البهاء اخذها وجاي وراك باوعلي وكال :: روحي انتي وهدى
صرنا نميشي اني وهدى الي مبين عليها منعسه وصلنه وبهاء گلي // شوفي اذا جدتي اتريد تروح للحمام (. اشر بايده ) ذاك هو
هزيت راسي وبعدها اجت ام كرار واجه النادل وهو يسحب بالعربانه الي بيها كباب وتكه وكيمر وخبز حار وچاي
بيبي ام كريم // هو هذا المن ياهو اليشتهي
ام كرار // نشتهي عمه هسه كليته ناكله
عجبني الخبز لان حار اخذت نص خبزه ولفيت بيها شويه كباب وصرت اكل واشرب چاي ومن كملنه رحت للحمام غسلت
ساعدت بيبي الي كعدت وهي اتكلي //. الله يرضى عليج
عمو عاصف قبل ما يركب فتح الباب الورى وحجى ويه بيبي :: يمه ما تجيين يمي بالصدر
بيبي // چا وعمتك غير اگعد بصفها
:: ما شبعتن سوالف
بيبي // هو انا وين شايفتها
اجت بيبي هديه وسالت بيبي //. ها شيريد منج يحجي ويباوع عليه
بيبي تهز بايدها // لداله ما تجيين گلي اكعدي يمي ومن كتله لا اكعد سوا ويه عمتك ينبلي شني ما شبعتي سوالف
بيبي هديه //. يبووي على هاي لحگتنا
طبعا بيبي هديه ولا كأنه عايشه ابغداد بعدهي بلكنتها الجنوبيه رغم هي عايشه يمكن 40 سنه لكن بقت جنوبيه اصيله
من شفتهن كعدن اني فتحت باب السياره وركبت بالصدر لمن ما اجت ام كرار وبيدها علاكه وهي اتكلي مبتسمه //. هاج عمه
باوعت الها مستغربه = شنو هاي
عبايه راس
=المن ؟
شنو المن غير تلبسيها من نوصل للامام
= ياامام
ابتسمت //. عود صدك غير رايحين للنجف
رفعت حواجبي = صدوك ؟
لعد اكذب شنو ما قريتي اسم الطرق
هزيت راسي = لا ولا منتبهه
حبيبتي رايحين للنجف الاربعينية امج
ما عرفت شنو اگول من گد المفاجاه انعكد الساني
باوعت العمي عاصف الي اكتفى هز راسه وركبنا ما صدگت انو احنه رايحين للزياره واني اروح اشوف ماما ورامي
الطريق كله واني ساكته وبيبياتي يسولفن ومرات يشاركن عمي بالحديث ويكون جوابه الهن مقتضب بعدين سكتن
درت عليهن شفتهن نامن ابتسمت لا ارادي وبقى عمو يسوق الى ان وصلنه واني اشوف القبه الشريفه
بلحظتها صار وياي شي ما اعرف اوصفه
عمو نزل وانتظر عمو كريم يجي نزلنه وعمو عاصف كلي :: تلزمين بايد بيبيتج
الي كالت // يمه عاصف لا توصيها كاظه ايدي ولا تهدني
اما عمو كريم فوصى ام كرار على بيبي هديه واتفقنا نتلاكه اهنا بهاي النقطه وما نتاخر
دخلنه للضريح الشريف وهناك اني حجييت كل الي بكلبي كلامي همس ودموعي نازلات صرت ادعي الهشام الله ايفك سجنه ويطلع
صرت ابجي واستذكر الي صار وياي واطلب ان يكون معاي وياخذ بايدي بعد وفاة امي ورامي
صلينه ركعتين الزياره طلعنه واني عندي امل انو هشام ياخذ حكم مخفف او براءه ويرجع النه واحنه نرجع البيتنا
لكن كلمة نرجع البيتنا حسيت بيها بعيده وبعيده هواي
طلعنه من الزياره والسياره تمشي وبدت القبور وكانها مباني ترحب بالضيوف صارن بيبياتي يبچن وهنه يتناوبن
بالطور الجنوبي اما انا فطلعت عبره مني يمكن فطرت كلبي وهذا الشي زاد ابچي بيبياتي
بيبي ام عاصف تبجي على بدر ابنها الي ما شايفته ولا اعرف شي عنه بس اعرف كل حزنها وبجيها اله
وبيبي ام كريم تبجي على امي وشبابها والصار بيها
اما عمي عاصف فشفته اتنگب بالچفيه مالته وهو يسوق لمن ما سالته بيبي
تندل
جاوبها بصوت هادى :: شنو اول مره جاي
ادري بك يمه
ساد السكوت والاستغراب بس اني صوت بكائي متقطع واني. اشوف الصور بكل مكان وناس قليلين يمشون وبيهم بسيارات
وكف عمي امام بسطيه واخذ ماي ورد وبخور وعمي كريم هماتين اشترى وصلنه لان عمي وكف سيارته باوعلي وكال
:: ابقو شويه انا رايح كدامكم
نزل ابحده وصار يمشي درت على بيبياتي وابجي = وين راح
بيبي هديه // هسه يمكن راح يندل الكبر
جاوبت بقلة صبر = ايي خلي ننزل
بيبي //. هسه تنزلين وكل شي ما تحصلين
بقيت اباوع اله واشوفه واگف اجه بهاء وكال :: ياالله انزلن
نزلت حتى ما انتظرت بيبي ورحت امشي بسرعه يم عاصف الي شفته جاي يقرا قرآن شفت اسم امي ويمها رامي
بدون وعي شمرت نفسي وحضنتها واصرخ بصوت عالي
= ماما ماما ليش سويتي بيه هالشكل
= ماما. اگعدي اني بحاجتج كافي اذيتوني
= ماما مشتاقتلج ليش ما فكرتي بيه
= ليش اني مو بتج اني وحد ما فكرتي بيه
= شفتي شنو صار شفتي انتي رحتي وهشام بالسجن واني اني ضعت
لازمه باديه بالقبر لكن من گلت ضعت ضربت راسي حييل وكع دم من كصتي مسحته بايدي وبقيت اعاتبها وصرت
احجي وياها بعتب = ليش ماما ليش اني مو مال حمل ثكيل مومال فراك الموت والسجن
= وعلاوي الزغير الي يسوي روحه متعايش بس هو ايكذب
= ماما ما ادري شگول بس اني تعبانه اخذيني يمج
بيبي هديه صارت تنعى على جمال وشباب امي وبيبي فرحه تتناوب وياها
ام كرار انتبهت للدم الي بايدي كالت شنو هذا الدم
سكتو عمي عاصف باوعلي والكل اتفاجأ واني حاضنه القبر عمي عاصف كال تعاي غسلي
لكن اني ولا يمهم لزمني من ايدي وحاجاني بعصبيه :: ترا الي جاي تسوينه غلط تعاي غسلي وجهج
صار ايصب علي ايدي الماي وانا اغسل لكن الدم ما انكطع فعمي نزع الچفيه وشد كصتي وصار بهاء يغسل بقبر امي
باوعت شفت قبر اخويه رامي گعدت يمه وصرت اعاتبه
= رامي ليش هالشكل
= رامي ضيعتنا وضيعت نفسك
= رامي اني زعلانه عليك لان الصار كله من جوه راسك
بيبي اجت يمي وصارت تعاتب بي وبنهاية كلامها تعطفه على بدر رجعت القبر امي
= ماما ارجعي ماما مشتاقتلج
بس هاي الكلمات صدقا نسيت كل العتب والاشتياق ما اتذكرت بس ذني وبعدها عافوني وراحو يم قبر عمي بدر
لان ادري بيبي اذا ما تروح يمه ما ترتاح بس اويلي بيبي عبالك اليوم ميت صارت تبجي وتلطم وصوت البجي
من الكل ينسمع هذا الي يكول
يابويه وهذا الي يكول ياخويه وهاي الي تگول ياشبابك
بقيت كاعده يم قبر ماما وهمه اهناك باوعت شفت صورة ابويه وصلت يمه اتصدگون محد غسله او قراله قرآن وكانهم
ما يعرفونه صرت اقرا الفاتحه واحجي ويا
=. بابا شفت شنو صار بينه
=. عفتنه بوقت الكل محتاجك بي هسه اني وعلووش لا اب ولا ام ولا اخ
=. ما اعرف شنو اگلك الله يرحمك
باوعت الدبة الماي الي يم قبر. امي بيها شويه رحت اخذتها وصرت ارش قبره ورجعت يم امي شفتهم وگفو شويه
يم قبر ابويه واعتبرته اسقاط واجب
وبالاخير كان لازم نغادر ونخليهم ابحدهم وفعلا عمو كزيم كال // ياالله
اجتني ام كرار ولزمتني من ايدي وهي اتكلي //. ياالله خاله بعد كل شي ما يفيد خلي نمشي
=. روحو انتو وعوفوني ايهنا يم امي
هدى. //. هو هذا شلون حجي ياالله حبيبتي كومي
بست قبر امي واكللها. =. ماما ادعيلي اني وعلاوي هواي محتاجين دعاىج
بيبي هديه. //. عفيه بتي
مشيت وصلت يم قبر بابا حاجيته بعتب والعبره اتكسر بكلامي =. دير بالك عليها هواااي تعبت وانت هوااي اذيتها وتعبتها
سمعت بيبي تبچي وتحچي ويا //. رايتك سوده سعدي شسويت
ركبنا بالسياره وعمو عاصف اتاخر واجه ركب والكل حزين ساق السياره واني بعدني ابجي وبيبي هديه تحجي
- - كافي كل شي ما تحصلين شجبتي وياج هاي انتي حسج راح وفشختي راسج والدم اخذج شحصلتي
هاي حبوبتج عمر الها تجي وترد جنازه كل شي ما حصلت انوب كل سبه ودفنت الها واحد
بيبي //. اي والله خيه كل شي ما محصله بس المرض والقهر
باوعلي عمي عاصف وسالني :: راسج يوجعج
هزيت راسي يعني لا
:: اذا يوجعج گولي اخذج للطبيب
= لا ما يوجعني
:: اكيد
هزيت راسي = اي عمو ما يوجعني بس
:: بس شنو
= لو مخليني بعد يم امي ( صرت ابچي )
هو وگف السياره ولزم الستيرن باثنين ادي وكلي
:: لا تبجيين كافي تعبتي هوااي
سكتت تلقائيا صارن بس دموعي هنه الي يحچن عني صار يسوق الى ان وصلنه الكربلاء قريب الظهر زرنا ع السريع بطلب من عاصف وبعدها اخذنا للمطعم نتغدا ومن طلعنه من المطعم عمو كريم وبيبي هديه وام كرار وهدى سلمو علينه لان همه رجعو البغداد واحنه نرجع للناصريه اتمنيت اروح وياهم لكن اتذكرت علووش الي بقى نايم واني ما عندي موبايل اسال عنه
بيبي كالت //. لو انبات الليله
بهاء. //. جده عدنا شغل غير مره نجي ونبات
بيبي //. چيفن اشوفكم تعبانين
بهاء //. هسه نوصل
صار يتناوب بالسياقه هو وعمي عاصف الى ان وصلنه. للقريه بالليل وشفت علووش گاعد منتظرني بغرفة بيبي
حضنته من شافني سالني
( ) شل وون ه هشش اام (شلونه هشام )
واني حاضنته جاوبته = زين ويسلم عليك
( ). عب االي رح تي وما تج يين لهنا بعد ( عبالي رحتي وما تجين لهنا بعد )
لزمته من اديناته وحجيت = واعوفك منو كلك ما اجي
(). غازي يك ولي اخت تك را حت وب ع د ما ت ججي ( غازي يكلي اختك راحت وبعد ما تجي )
= لا حبيبي معليك بي اني يمك وما اعوفك
اجت فرح ودنكت على بيبي باستها // ها جده شلونج
هلا بيج وين امج
هسه تجي اشلونك بابا
::هلا يابه فوتي صيحي عمج مهدي وغازي
اي بابا
بيبي // ها عاصف شتريد من مهدي
:: هيج اريد اشوفه
اجت عمه رجاء // اشلونج عمه الزياره مقبوله
اتقبل اعمالج شني اليوم مسيره
اي رحت يم بيت مهدي اشلونك عاصف
:: هلا يابه
اخليلكم اكل
لا ما اشتهي بس شوفي عاصف وبهاء
بهاء سالته كال ما اشتهي وانت ابو فرح
:: ما اريد شوفي وجدان
= عمه شبعانه
تستمر القصة أدناه
شبي راسج
بيبي //. شبي طكت راسها يم امها وطلع دم
خطيييه
حسيت بكلمتها استهزاء اجه عمي مهدي ويا عمه نهاد وابنهم غازي سلمو
السلام عليكم
:: هلا عليكم السلام
اشلونج يمه
هلا بيك
اشلونج عمه
الله يسلمج
اشلونك ابو فرح
:: الحمد لله تعال غازي
بيبي وكفت ولزمت غازي من اذانه قبل لا يوصل العمي عاصف // شلون تكل العلي بعد اختك عافتك وما ترجع مو عيب
ياهو الكايلك هيج تحجي
غازي بخوف //. اتشاقى حبوبه
—هذا مو شقى ابن عمك تدير بالك علي شكبرك تصير زمال
مهدي // يمه خاف ايتشاقى
— ايشاقى ويه واحد بعمره بس شنكول
اتقرب غازي من علي وباسه وهو يگله //. لا تزعل مني اتشاقه وياك
بقو كاعدين تقريبا ساعه وراحو بعد ما بيبي طلعت علاكه وانطتها العمه نهاد ومن طلعو عمي عاصف باوعلي وكال
:: وجدان اريدج تصيرين نمره مثل حبوبتج
باوعتله باستغراب لان ما فهمت كلامه :: يعني سباعيه نجره مثل حبوبتج شفتيها ما خلتني انا احچي على غازي
هي گامت بالواجب
بيبي //. وانعل والدي كل واحد يحجي زايد ناقص
ورغم ما فهمت كلامه بس الي عرفته يريدني اصير مثل بيبي هيج عندي شخصيه قويه وما اسكت على حقي
ما يدري بيه انو انا الوكت خلاني عجوز ما بيه اسوي اي شي عجوووز مريض وما عنده اي احد ايساعده
بس هذا ما يمنع انو اتقوى بالايام القادمه
وبقيت انتظر اي خبر عن هشام لكن بدون فائده لان اسمع بييبي تسال عمو عاصف والي يكون جوابه :: بعد يمه
اني وعلاوي عايشين ابيت جدي ونفس الروتين واني بيه وما ابتعد عن الكل ما اشاركهم بسوالفهم ولا اتدخل بشي
اكضي شغلي واجي الغرفة بيبي اكعد بيها ومر اسبوعين وبالليل اجه عمي عاصف وكلي
:: باجر تتحضرين نغبش الصبح
بيبي وهي تحرك ايدها // وين على خير
باوعلي :: موتردين تشوفين هشام
فتحت عيوني ع الاخير وانربط لساني وصرت ارجف مثل السعفه هو رد عليه
:: باجر نروح نواجهه هسه حضري ملابسج ونامي
