رواية ارحموني ولو رحمة مرة الفصل الواحد والعشرون بقلم فراقد حسن علي
- (( ومن هنا بدء منحى أخر للقصة ))
محمود /باجر أخذج العصر للمختبر سوي تحليل حمل
فرح/لا ماتوقع حامل ،، مو كتلك صايرة عندي خربطة
محمود/ لا ما أتوقع خربطة ،،
مشتهاتج للأكل ،، وسمن جسمج ،،
وبس بداية زواجنا أجتج الشهرية ولهسة ماكو ،، هاي كلها علامات الحمل
فرح /علواه كون صدك اطلع حبلة
ويصير عندي جاهل صغير أشبعه مدارات وهواي أعتني بي
محمود/هااا يا فارة النضد
واني منو يداريني
شو من هسه أنهملت
وبدينا نفكر بالطفل
فرح/انت الاول والاخير
والاهم والمهم بحياتي
-تعال أبوووس ،،،،،،
محمود/اي هاي الامور العدله
الترد الروح ،،شو تعاي خل أثردج
فرح / الحمد لله هذا مجرم روحي
شكثر ما أحبه هو بعد أكثر يحبني
-صبح علينا الصبح بسلامة
محمود مشى لدوامه واركان طلع وراه
ريكتهم ومشيتهم للدوام
-نفس جدولي اليومي ،، شغل وتنظيف
لازم أشتغل ما اعرف اكعد بدون شغل
أحس أصابع أيدي تكوم تكرص بيه
-كمت عجنت
بين ما غسلت الهدوم وكملتهن
وغسلت الحوش ،،
أختمر العجين خبزت
-شو أشتهيت خبزه أم السمسم وشكر سويت أربع كرص
-كملت الريوك وكعدت امي وأبويه
-وأسلام بيده مميته فارغة
تكول يسكر مو يشرب ممية
-ماعندي شغل شسوي ،،
مكينتي صخمتها النار ،،
لازم ابويه ياخذها للمصلح
-كمت مديت الصوندة من بوري الحمام
وسويت خبطة بجدر جبير تايت وزاهي
وجبت أسفنج مال مواعين
وبلشنا اني وامي تنظيف بحياطين الغرفة نجلفها ونرد نغسلها بالمي
الحمد لله شويه أحسن كشفت
بس بعدها زوعة ما يتباوع عليها
والاماكن العالية تركتها على كد علوة صعدت الكرسي نظفت
-وانوب طلعنا على الحوالي هم أخذنا بي كشة تنظيف
-دك تلفون أمي باوعت رقم اركان
-هاا شعندك داك يالزنبور الاصفر
مو عندك واجب
أركان/فارة النضد بس أوصل للبيت اني اعلمج
-اكول فروحة بعد أخيج ،،طلب صغير
فرح/كول ،،بس كلشي اسوي ب ٥ الاف
أركان/شنو حضرتج ٥٦ وماادري
-شوفي تعرفين جرجف الكعبه شيسمونه؟؟
فرح /لا مغااعرف ،،شنو أسمه
أركان /أني هم ما اعرف بس سمعت جندي يحلف بي
-من الفجر كاطع بلساني طعم (المووش )(تمن ماش ) حبابة سويلي على الغدة
بس سألي أمي عدنه دهن حر ،،
لو أجيب ويايه
فرح /اي عدنه دبة بالمجمدة
أركان/عفيه عليج ،،هذا الخبر الزين
شوفي اول ماأوصل ،،
بدون حتى مااسلم
من باب الشارع ،،
الكاج صابتلي (ألمووش ) بماعون جبير فافون
هاي التسوين بيهن ثريد
وسوي حفره بوسطه وذبي الخاثره وفوكاها دهن الحر
وخلي بس خاشوكه وحده ،،
مااريد واحد يمد أيده ويايه
فرح/ليش مااطبخلك جدر جبير مال توزيع
واجيبه الك هسه للواجب
شو على هذا مشتهاك
طلعت انت تتنسى مو رفل
أركان/طيح الله حظج يالغبره،،
على هذا الكلام السودتي بي وجهج
اوصل للبيت لو مااوصل
الفاره بيش يموتوها بشحاطه امي مووو
اني ألج بس أوصل عود تمسكني
وختلي بحظن أبويه
-روحي ولي أجتني خوش كيكة وكلاص جاي خلي اتهنى بيهن بدون ما أسمع هذا صوتج
صوت الفارة من تكرض بالفراش
فرح/غلق الخط بوجهي ،،شكد غثيث
صاير الزنبور الاصفر ،،
-باوعت الساعة ب ١٢ ونص الظهر
امي راحت تصلي
-صفنت على روحي عود اني ليش
ما أصلي ،،وليش دائما ابدي
اصلي وأنوب أكطعها ،،صدك أني خبله
-شو امي ،،وابويه ،،
ومحمود ،،واركان يصلون
-وحتى رفل أشوفها تصلي ،،
-وثول بقيت بس اني كافرة بهذا البيت
رحت سبحت وعليت جسمي ،،
طلعت نشفت شعري وتوضيت
ورحت صليت الظهر
اشوف امي أبتسمت
-الحمد لله كملت صلاتي
وكمت أسوي بالغده
رفل نزلت بس تكول//جسمي مكسر
وظلت بس مجطولة
امي جاستها تكول//مصخنة
أني مالي علاقة بيها،،لان صدك مبينة مريضة
-طبخت المووش وهدرته
وحمست بعد بتيتة صفرة ولحم مثروم
وطماطة حمس صايرة اعشقها
وعندي زلاطة وطرشي
-الحمد لله كلنا تجمعنا على الغده بخير وعافية
وأسلام أبويه يلكلگ اله مووش لكاليك صغيرة وينطي هو ياكل
-واني أبتليت كعدت يم الصوبة
كلساع وكالوا كسبي هاي الخبزة من يمج
يابه الخبز حار الصبح خبزت
لا الا تكسبين على الصوبة أطيب
-للعصر راد محمود ياخذني للمختبر
امي كالتله//أخذ رفل وياك للدكتورة
هي هم مريتك وحق واجبها عليك
-هو طنكر وقفل ميقبل ياخذها
عاد أبويه كال// اخذهن أني وامك
وانت ابقى غاضب ربك
لان ماتعدل بينهن
-بدلنا وطلعنا بسيارة أبويه
وصلنا لعيادة الدكتورة بالطابق الثاني والمختبر جوه
-امي تخاف من الحسد وصواب العين
تكول يكتلن بني أدم
-كالت للمراة التكتب اسماء يصيرن
بنات خواتي
وحتى من كعدنا بالعيادة وهي تسولف ويه النسوان تكول بنات خواتي
-دخلنا سوية للدكتورة
رفل كتبتلها تحاليل،،وصعدتها للسونار
حسبتلها كالتلها//الحمد لله قبطتي ٣ أشهر
والطفل صحته جيدة
واكثر شي من نشاطه ودكات كلبه ولد
بس أتاكدي بعد شهرين ،،
كالتلها رفل /بس ما احس بحركة
جوابتها /بعد فترة قليلة وتحسين بي شلون يتحرك
-أنوب أجتي تفتهم سالفتي
وشرحتلها عن كل الخربطة الصارت عندي
-كالت//صعدي للسونار لان متأكدة حامل
واذا ماكو حمل سوي تحليل دم
-صعدت وفحصتني بالسونار
جان تكول // ما شاء الله حامل
وجنين نبضاته وحجمه وكل أوضاعة زينة
والج هسة شهرين ونص
كل يوم ٢ بالشهر تدخلين بشهر جديد
-امي بقت تصلي على النبي وتسمي ،،
خافت لان اني ورفل أثنينه حوامل
وتقريبا نفس الفترة
-سوتلنا الدكتورة تحاليل تكول للمتابعة الصحية ولازم مراجعة دورية من أجل صحة الجنين
-رفل كتبتلها علاج للصخونة لان عدها نشلة
كالتلها//مو زين الصخونة على الطفل حاولي ادارين نفسج
-وأثنينا كتبتلنا مقويات وفيتامينات
-طلعنا وابويه عادل منتظرنه جوه
امي بشرته بينا ،، خطية هواي فرح
وبوسنا من روسنا اني و رفل
-رجعنا للبيت وامي بشرت محمود
طار من الفرح ،، يكول// لو ما عيب أهلهل
-امي صارت مفتي بروسنا
تكول/رفل أني متأكدة بيها ولد لان بطنها تاخذ بالطول ،، وروحها صغيرة وماتحمل الزفرة
-وانتي فريحة بيج بنية لان سمنتي
وهسة تسمنين بعد بالاكثر
وتبيضين ،، وخشمج ينفش
وبطنج تاخذ بالعرض و ما تبين
أركان يضحك يكول//لو تعرفون سر هذا التقسيم الله ينطي الزركة جان هسه أثنيهن عواجر
-ومحمود ضربه بجهاز التحكم مال الدش على راسه
هو كاعد بالكاع،،ومحمود كاعد على القنفة
-وهو يضحك من خاطره ،،
يكله /لا تخاف ما يعرفن شنو الزركه جان شرنك على الحبل
-ومحمود خنكه با أثنين أيده
وأثنينهم يضحكون
ويكله//أفضحني وشهرني بعد
-عاد امي كالت //وليش يشهرك مو عيب
مو هل أبوك مرات ياخذ حبوب مال معدة هاي الخضرة
وانت تاخذ حبوب هاي الزركة مال وجع سنون من لكيتها بنطرونك وسألتك عليهن
شو أركان تمدد بالكاع خرب من الضحك
وصوت ضحكته وكركرته يوصل لراس الشارع
ومحمود كام يضحك ودموعه تصب حتى اختنك بضحكته
الحمد لله هذاك اليوم وهذيج الليلة كلشي بيهن حلو
-ثاني يوم أركان ومحمود جابوا سطولة مال صبغ و بويا ،، ويومية بليل يشتغلون بالصبغ
يشتغلون على مجالهم وعلى راحتهم
بلشوا من حياطين الغرفة
وطلعوا بره على الحوالي
انوب الصبغ اللي يوكع على الكاشي يلطش
ما يطلع يشلع الكلب بالتنظيف
أنطفي شكو نار مشعولة بالبيت
ونجلف الكاع بالبانزين
-الحمد لله بعد أيام من التعب بين الصبغ
وتنظيف الكاع ،، كلشي كعد تمام
-جابولي غرفة أخشاب جديدة بس مو بضخامة هذيج الغرفة الأحتركت يعني على كد الفلوس لان الجانن مجمعيهن صرفوهن على عرسنا
الحمد لله على كل الانعام من غرفتي رجعتلي
-أمي نطتني من نضدتهم فراش وبطانيات
ومخاد ،، وجراجف
كالت//هذا تسكام جديد هدية لغرفتج الجديدة
-ورفل نطتني نزلتين
وحده شتوية
وحده عادية خفيفة
امي كالت//بس على مود ملابسج
وغراض للغرفة أصبري عليه بين ما اجمع كم فلس وأشتريلج وان شاء الله ما أقصر وياج
-أشترتلي بس ملابس للبيت
وللطلعة عباية أسلامية
هذني يكفني الحمد لله
-محمود ما صدك غرفتنا رجعت
ويكول//جديدة لازم يومية نجدد حبنا بيها
واني ما أصدك أحصل على فرصة لحتى أجلب بي
-بهاي الأيام رفل رجعت تخبث ويايه
بالبسكوت بدون ما احد يسمعها شدكول أسمعني كلام يغثني
وصارت شوية شوية تسحب نفسها من شغل البيت
-وشنو حجتها تكول//أني تعبانة ونساوتني أثكل من نساوتج
اني نساوتي براسي
وانتي حتى ما تلعب نفسج
أنتي كاظيتها تعلجين علج مي وتاكلين الأخضر واليابس
واني حسرة أكل لكمة أرجعها
-كتلها /الحمد لله ما عايزة على شغلج ولا تبقين تغثين بالكلام
ومخلية عينج عليه
-احنا كل ما نروح لاهلنا نجيب حليب هوش
نجيبه ببطاله مال ببسي هاي الجبيرة ونجمده ابد ما يخرب
واطلعلي بطل أموعه وأفوره أسوي خاثرة
واطلع شويه من عنده أشربه الصبح
لازم يومية الصبح اشرب كلاص حليب
اذا ماكو حليب هوش اخبط مال جياسة طوز
-الصبح شربت حليب بقى تقريبا كلاص ثاني بقيته للعصر،،من أجمعنا العصر نشرب الجاي
فورته بالدلة وهي عود أجت تاخذ الاستكاين
جان تكول/ أووووع شلج بهل لعبان النفس
تشربين بي الصبح وهسه
لو ماهو جنه جراحة ويلعب الروح
-من صدك لعبت روحي من حجت هيجي استغفر الله ذبيت الحليب بالسنك
-الموقف ثاني
اسلام نفس طبع أركان
صدك لو كالوا الخلف على الخلفوه
نسويله ثريد بالجاي ويخلي عليه شكر
هواي يحب ياكل هيجي،،وبالذات العصر
-شفته ياكل دنت روحي على كلاصه أخذت بالخاشوكة اكلت،،واكلت مره ثانية
هو طفل كام يبجي عباله خلصته
-هي شافته يبجي جان تكول/شبيج ملهوكة لو ما هو أزواع بزازين شكو ذابحة روحج
على لكمة الطفل الاكل اللي بالبيت ما كفاج لحكتي على أكلاصه
-استغفر الله من وصفت النعمة هيجي لعبت روحي بعد منو يدليني الحمام وين
طلعت روحي شكو بمعدتي رجعته
-وهي تكول /شعجب رجعت الاكل
مو حتى نفسها ما تلعب
-اسمع امي كامت تحجي عليها
تكلها/ ترى مو كل النسوان تتقيئ بالحمل اكو بيهن بس يجطلن ،،
واكو بيهن يتنسن على شغلات غريبه
واكو بيهن لحد ما تجيب ما يركد شي بمعدتها
النسوان نسواتهن أصناف كل وحده وطبيعة جسمها
وفرح نفس طبع أمها تبقى بس تعلج فتره حملها كله
-شكيت لمحمود يابه هيجي وهيجي رفل تكلي وتلعب روحي بالاكل ،،
محمود/ميخالف عيوني تحمليها لخاطري
ترى نساوتها صعبة،،وهرموناتها متخربطة
والتسوي مو بيدها،،وماعدها وسيلة تطلع بيها حركت كلبها غير لسانها لان تشوفني بس
يمج وهاجرها
-اني شسوي من بعد هذا كلامه خليت وسكتت ،،
وكمت شكد ما أكدر أتجنبها
أركان /الهوسة السوتها رفل واتهامنا اني وفرح اختي استغفر الله عدنه شي
ماحرك شعرايه عندي ،،وهذا كله بجفة
ونگ النقيب ضرغام بجفة
-من يوم العزيمة اللي سويتها برمضان
ولليوم أكل راسي ،،
ضرغام /شوفلي مراه من جماعتكم
وكون هيج حلوة وصاحب شعر نفس أخيتي
زوجة الدكتور
أركان /خويه بناتنه ما يفدنك لان عرب
وانت ضابط وساكن حي أور هواي تختلف البيئة بيناتكم وما اتوقع تتوالمون ليش تحطم نفسك بهيجي اختيار اشوفه مو مناسب
لطش مذهب الحلو
-ضرغام /اني قابل اني ادور وحده عربيه
يصيرن حلوات وشاطرات وقنوعات ،
وماعدهن حيلة بنات المدينه
وحتى من حاجيت امي كالت شكو بيها
كلنه بشر ومن دين واحد ومن عراق واحد
-وكلش قوه علاقته بيه
مو تكول هو نقيب واني ملازم
لا صارت علاقتنا صداقو حلوة بدون رسميات
يوميه وكالي /بشقى او جديات
ضرعام /هااا وين المراه
يمعود اريد اتزوج مو انجبست
انت اصغر مني وعندك ولد
واني لهسه أحظن المخدة وانام
أركان /اليوم أرجع للبيت واحاجيلك امي
وهي تختارلك تعرف كل بناتنه
وتشوف ياهي تناسبك
ضرغام/كلها أهم شي اريدها صاحبة شعر
اريد وحده شعرها بطانية أدفى بي بليل
اركان/الله كريم اشوفلك امي
خل ادورلك وحده مواصفات
-خلص وكت دوامي ورجعت الظهر للبيت
واسمع عياط نسوان جاي صوتهن من داخل بيتنا وجيران واكفين باابواب بيوتهم يباوعون على بابنا والصوت واصل للركن
-حتى سيارتي ما قفلتها نسيتها
ونزلت ركض ودخلت جوه للبيت كلت امي صار بيها شي
-دخلت واشوف ثيران وتصارع بالهولَ والثياب أمزقة والملابس الداخلية طالعة والشعر منفوش ،، والوجوه مخرمشة
-كاااااااافي يا ساقطات صوتجن واصل للركن
والعالم واكفين يتفرجون علينا
-غير كون يصدن ،، لو يردن ،،
لااا ما يخافن ثيران ومهدوة بحلبة مصارعة
-هسه مذهب الحلو امي وين راحت
-انوب اثيابهن أمزقة شلون أفازعهن
أوخر رفل تجيب فرح وياها نايمة بشعرها
اوخر فرح تجيب رفل وياها خانكتها من بلعومها
محمود/وصلت لفرعنا واشوف الناس واكفين باب بيتنا وصوت صريخ مال ونسوان
كلبي وكف كلت امي صار بيها شي
لو وحده من المكموعات العندي صار بيها شي
-ركنت سيارة ونزلت مستعجل
وسلمت بسلام عليكم على الواكفين كلهم من الجوارين ودخلت بسرعة للبيت ،،
-واشوف المعرينات كدامي
واركان ما يكدر حتى يفازعهن لان مايكدر يلزمهن
-تخبلت عقلي شمرته وره الحياط
حتى لا اتندم وارجع اخلي براسي
-اتذكر بس نزعت الحزام وبلشت بيهن
أثنينهن وين اليوجع من هذا الجلد الزين
من انعل ابوجن لا ابو الرابطجن يمه
فاطمه/برد ،، برد ،،
لااا يمه حرام عليك حبل لا يطرحن
اركان أفزعلهن راح يموتهن
خرب بلشاشكم صرنه فرجة للوادم
اركان/دخل علينا محمود يفور
ومن نزع أحزامه وجلدهن يبووو فوخ نار كلبي بيهن لو مكسرهن جان ارتاحيت حتى نفسيتي
-اني بقيت واكف واتفرج
الصراحة جنت هواي اتمنى وأنتظر شوكت يوكفهن عد حدهن لان هواي أستكون وعركهن ما يخلص
امي جلبت بي وبقت ادفع بي عنهن وتفازعلهن
وهو بعد فقد من العصبية
ضرب وغلط ومسبه عليهن
شكد صارلي ما شايف محمود هيج تثور اعصابه يمكن هاي رابع مره أشوفه هيج عصبي
مره من جان صغير وخبز رافد من شمر هالة بساجية المي
ومره أتعاركنا ويه ولد الجيران
وهذاك اليوم من شحط رفل
واليوم بهاي عركتهن
-صدك عنده برود طبيب جراح
محمود/شكد ما ألزم نفسي وما اعصب عليهن واخذ سوالفهن بهدوء وسياسة
وشكد اسولف وياهن واكعد انصح واعلم بس ما يفيد
خو رفل طلع شعر على لساني
هلكثر ما أعلم وانصح بيها
-بس اليوم من شفتهن هيج متكافشات
وحده أمرعدة الثانية لا بعد وصلت حدها وياهن لازم يتأدبن
-فحطت من كتلهن دفعتني امي عنهن
كعدت على القنفة وتركتهن يلطمن
امي سترتهن
فرح/انكتلنا كتله من هاي التمام
يعني الحزام ينزل على الجلد يشلع وصله منه
ويطلع صوت وززززز من قوة الضربة
حبسنا محمود اثنيناتنا بزاوية الهول وجلدنا من هذا الجلد اليوجع
فرفحت روحي من الضرب
-وخلف الله على امي خلصتنا من عنده
وسترتنا ،، شمرت على رفل العباية
وشمرت عليه جادر الصلاة
لان دشاديشنا تمزقت من صدرها وكلشي طالع من فوك
اركان/بعدني كاعد على القنفة واتفرج على هاي المهزلة،،لو هذني نسواني الا أزينهن صفر واربطهن بالسطح لان هواي استكون وكامن ما يستحن
-وحده منجن تسولف شصار
لو هسه عدل وكبل لبيوت أهالجين
صار مو بيت ساكنينه مسلمين
لا بيت كاولية من وره صريخجن والعالم تتفرج علينا
فرح /كمنه نحجي اني ورفل سويه
هي تكول والله ،،واني اكول والله
محمود /اااااشششششش صوووووتجن ما اسمعه اكوم أشحطجن بالشارع
اركان/صوتجن نصنه وأحجن وحده وحده بهدوء جنجن صوت عتاوي مشبطه بشهر شباط
وحسره على الواحد ينام من وره صوتهن
-رفل انتي احجي بالاول حتى لا تكولين تفزعون لفرح وخليتوني بالوسط
رفل /اني ما سويتلها شي هي كمزت عليه وضربتني واني جلبت بشعرها وصارت العركة
اركان/هااا هيجي لحالها مخبلة وكمزت عليج
وانتي فريحة ليش كمزتي عليها
فرح/اني احجي الصدك لان اخاف من الله وما احلف بي جذب ،،
سويت أكل ((ما اذكر اسمه حتى لا تقرف نفسكم من النعمة)) جنت هواي مشتهيته كعدت اكل بي واعصر عليه نومي
جان تكول//اوووع صار جنه مخاطين
صدك لعبت روحي بعد ما اتحملها
لان هواي داست بطني حسرة اكل شي تكعد تعيب عليه وتكرهني بالنعمة كمت وضربتها وصارت العركة
اركان /هسه من أكوم وأدفر كل وحده منجن بهذا البسطال الابسه واكسرلجن ست أظلوع
اكو احد يلومني ويكول ياابن الجلب ليش ضربتهن
محمود /يالساقطات علمود شغلة تافهة شعلتن العركة وجمعتن الناس علينا لعد اخذنها مني حجاية بعد منا وهيجي اكومجن بكفخة واكعدجن بكفخة
-انتي هيييي رفيلة المثقفة ممنوع تعيبين بعد على النعمة
وممنوع تصجمين فرح علمود اللكمة
-وانتي فريحة ممنوع بعد تجاوزين على الاكبر منج عندج شي تجين تشكيلي
رفل /هي جذابة اني ما يمها
اركان/صوووووتج وسم الحسن اليكطع جبدج
-محمود اتربي نسوانك زين على زين ماكو اني ادز على الخلفوهن يجون يربوهن مو صرنا كاولية من تالي الوكت بعيون العالم من وراهن
-اكول يمه انتي وين جنتي
فاطمه/يااا يمه هسه طلعت اشترلي لاسلام من دكان ابو رامي
وجلبت بيه المراة أمهم ودخلت يمها بالمطبخ
تنشدني على جنة ام معتز خطية مريضة مايعرفون شنو علتها
وسمعت صريخ واجيت اركض
الله اكبر هي دقايق وتكافشن شمدريني
بيهن صغار وعقلهن عقل الصخول احسن منهن
اركان/ يمه الأكبر ما عليه
بس احنا صوجنا انطيناهن عين
محمود/كوووومن كل وحده الغرفتها يلا
ممنوع وحده منجن تشوفني خلقتها الزفرة
فرح/كمنا وطلعنا من الهول
وكل وحده راحت على غرفتها
-ومن هذيج الساعة محمود بعد ما يحاجينا
وكام ينام بالهول ،،واسلام ينام يمه
-امي مره تكسر ومره تجبر
زعلت من عركتنا
وتكول /جان أستحيتن من حماجن معرينات كدامه
وهيجي تصرفت ويانه مره تنصح بينا ومره ترزل بينا
-ابويه كام يحجي علينا وتخبل من عرف الناس مجموعين باب بيتنا وحجي علينا حجي يوجع
-جنت كاعدة بالمطبخ أكمل العشه
اجه أركان يحجي ويايه
كال /عمي باسم ينطي للغريب
هذا صديقي النقيب يريد وحده من معارفي اني كلت احاجي عمي علمود اشوف
ينطي منى لو لا
فرح /ما اعرف اذا ابويه ينطي للغريب لو لا
بس ما اتوقع منى ترضى بي
اركان / ليش
فرح /هي ما ترضى تزوج لان شايلة مسؤولية بيت اهلي هاي صار كم مره يجون عليها الجيران وناس عرف من الديرة وما تقبل بالقسمة تكول//ما ازوج منو يشيل البيت ورايه من اطلع
من هذيج الساعة انغلق موضوع قسمة منى
-بشهر ال ١٢ الجو حيل بارد
واسلام مره كلب دولكة المي على الزولية مال هول ،، ومره كلاص جاي ،،
ومره بين ما رفل تبدل حفاظته برد وتبول
لعبت روحي لان صارت ريحة خمة قوية بالهول
-بيوم صادف جمعة
ومحمود لحد هسه ما يحجي ويانه
-سحبت الزولية وشمرتها بالحوش اغسلهاوامي بقت تحجي عليه باردة لا تتمرضين ومو زين عليج الثكل ،،بس ما سمعت كلامها
-مسحت البيت كله من الكلدور للمطبخ والهول مسحته اكثر من مره لان مطكع الكاشي من الجاي،،،والمي
كتلها/ رفل تعاي اجلفي ويايه الزولية
كالت /لاا ما اكدر بس ابرد اصخن ومو زين على الطفل
-عاد امي اتشلحت وساعدتني
ومحمود يذب حجي
بحجة أحاجيج يا بنتي وأسمعج يا جنتي
ادري بي يحبني وكلبه عليه
بس حقه العركة الصارت والصوت العالي وجمعو الناس عيب مو شويه
محمود /يمه عود اذا تمرضتي مالي دخل بيج وحتى ابويه مااخلي يوصل بيج لباب الشارع
وامي تكله/لا يمه ان شاء الله ما نتمرض احنه ناس دمنا حار ما نقبل على الوسخ
-غسلنه الزولية اني وامي وكملناها ولفيناها واركان ومحمود شالوها وخلوها تنشف على قناني الغاز خلوها قريب من المنهول علمود المي الناز ينزل بالمجرة وما يدمر الحوش
-اخير شي غسلت الحوش ورجعت مسحته
وانوب خذت هدوم ودخلت للحمام
ثوبي صار عصرة مال مي
وكتلني البرد
-واني بالحمام واسمع صرخه امي رجت البيت
اريد البس واطلع ماالحك كمت ارجف من الخوف
محمود/من كملت امي غسل الزولية ويه فرح
راحت دخلت للحمام
وفرح كملت شغلها وغسلت الحوش ومسحته
-اني كاعد اراقب رفل اشوفها بس كاعدة
وبحجة توكل اسلام بتيته تقلاه اصابع
-هو الله يسلمه بس يسمع صوت السيارة يطلع يركض
ابويه اجه من شغل كمت فتحتله الباب
دخل السيارة واسلام ركض يدعبل عليه
صحت عليها /رفل الزمي الجاهل
اجتي واخذته جوه
-ابويه دخل للبيت سلم ،،ودخل الغرفته
ماكو دقايق وطلع يركض
-يمه شكو شصار ،،
فاطمة /خابروا صديقهم الحجي ناهي متخربط ماخذي للمستشفى
يكول عمك ابو علاء لو نلحك عليه لو لا
-ابويه بعده بملابسه ما لحك يبدال
شغل السيارة وامي ركضت فتحتله الباب
رجع ابوي يركض للغرفة وامي تركض وراه
شلشها وياه لان قلق ومقهور على صاحبه
اخذ فلوس ورجع يركض
-وصعد سيارته بس رجعها
ونسمع صرخه اسلام !!!!!
وسكت صوته
-واحدنه نشف الدم بعروكه
أني كاعد بالهول
واركان نزل يركض من فوك
-رررررفل وين الجاهل
رفل /هاااا هسه جان هنا
يمكن دخل لغرفة خالتي ما ادري
-امي صرخت صرخة هزت حياطين البيت طلعت اركض واشوف ابويه مصكوك بمكانه وباب سيارته مفتوح وامي وره السيارة وتصرخ
فرح/طلعت ركض لبست بس الدشداشة وشعري يزخ مي
-واشوف الكل واكف مصكوك بالحوش
وامي ورفل يصرخن ،،والناس اجت تركض
وباب الشارع مفتوح
-يماااااااا حبيبي سودة بوجهي
اسلام بحظن امي ميت ودمه تارس باب الشارع
اركان/مااريد اتذكر هذيج اللحظات يوكف كلبي
فرح/ابويه وكع وسند نفسه على الحايط صار اصفر
-وامي ورفل شلعن الدنيا بالصريخ
والولد ما يحرك لا ايد ولا رجل
-اركان كعد بصف امي على ركبه وكام يبجي ويلطم وياها
-محمود اشوفه يرجف مد ايده على ركبته
وصاح /ووووخرن انطنياه بعده عايش
-اخذه محمود من ايديهن
اباوع عليه كل جسمه يرجف
اخذه بسيارة ابويه ورامي ابن جيرانه
كاله// اني اسوق انت مصدوم لا تسوي حادث
اخذوا وراحو للمستشفى
-واركان صار مخبل بس يبجي ويعيط
ويصرخ /يمه وليدي مات
يمه كون الساح دمي مو دمه
يمه هو ضوه عيوني وفرح دنياي
-ابويه تخربط والجيران ركضوا عليه
هم اخذوه للمستشفى ،،سوده عليه يبجي
ويكول /اني ذبحت وليدي ،،اني السحكته
-النسوان دخلن امي ورفل جوه للهول
وأركان اني ركضت جبتله تشيرت التراك
اخذ ابويه للمستشفى ويه الجيران
بس هو فاقد يمشي بدون وعي وبس يصرخ
محمود /وصلته للمستشفى الاشتغل بيها
والاطباء اصدقائي التموا عليه
كتلهم ابني ،،
-اباوع راسه ورم
وجهه انفخ
وطوعن صار ازرك
كلساع بالطريق امد ايدي على ركبته اجس النبض اخاف الله اخذ امانته
اباوع شك براسه جبير
كمدته وضغطت عليه باكيت كلينكس كامل على سفطته بس ما فاد بي الدم كام يطلع من بين اصابعي
-اخذوا من عندي الاطباء وماقصروا بالعناية الطبية الطارئة
ااااخ يااا يمة راسه هلكبره راس طفل
وغرزوه ١٢ خياط
-حوله على أشعه لكل جسمه
ابويه راجع عليه (بالبك)خلف السيارة
وهو وجهه على الجنطة مالتها
لهذا السبب وكعته صارت ليوره على راسه
متكسرات أفخاذه أثنينهن
وجف ايده اليمنى
وهو لان طفل وترف وصدمته سيارة
صارت عنده هاي الإصابة الجبيرة
-شافه طبيب الكسور كال//ينجبر كسره لان طفل خطية انخليله بلاتين
تم تجبره من الحوض لحد الركب
الجبيرة صارت بشكل شورت عليه
وتم جبر كف ايده
-حولوه للرنين ...
اشوف اركان اجه يركض عليه
جنت منتظر باب الرنين الخارجية
اللي مراجع للمستشفى الله يجفيكم الشر
يندل مكان هذا الممر الموجود بي شعبة الرنين
اركان/محمود بروح خاجيه لا تكول وليدي مات
محمود/شكد ما جنت مقوي روحي
وممتص الصدمه ،،ومسيطر على نفسي
بس من شفت أخوي يصرخ ويبجي ويرجف
على اصواب أبنه ،، حظنته وكمت ابجي وياه
-كول يا الله شبيك قوي نفسك مابي شي وهذاك عايش طلع قوي على ابوه
هسه بس يكملون تقرير الرنين اطلعه للردهة
-طلعت نتيجة الرنين
وطلع عنده فطر بالجمجمة
وخثره دم صغيرة واصله للمخ
لازم يسوله عملية يشلوها تحت التخدير العام مو يفتحون راسه لا فقط فتحة صغيرة
ويسحبون الخثره بالناظور
-أخصائي الجملة العصبية كال// ما اسوي اله العملية الا يتعدى مرحلة الخطر
وبعد ست ساعات اذا استقر وضعه
وما طلع عنده بعد اصابات ثانية
يلا أكدر ابلش وياه بالعلمية
-كالي بالحرف الواحد //محمود انت طبيب وتعرف بهاي الشغلات مو انسان عادي ونجامل بعضنا
هسه ساعة ب ١ الظهر
اذا قاوم لل ٨ بليل ومرت عليه هاي ساعات بسلامة بعد لا تخاف عليه
-من كالي هيجي شكثر ما حيلي بايد
لهنا وبعد خلص كل حيل باقي عندي
-الاطباء يصيحون بيكم بخت وهيجي صارت وكعته لو واكع بجهة واحد من التايرات جان
ابويه مرده
اركان واكف يمي وسمع كلام الاخصائي
وهو تخبل يصرخ ويبجي
الناس كلها تباوع عليه
ويصيحون //الله يساعد كلبك ويكومه الك سالم
-كتله رامي اخذه رجعه للبيت لا يوكع عليه
احير بواحد لو باأثنين
-اجاني سمير يركض كال// ترى ابوكم يريد واحد منكم بهذيج الردهة نايم
وصار ساعة ادور عليكم
وعلى صوت اركان أجيتكم
كتلهم//بس اخذوا وصلوا للبيت ترى تخبل
راح يوكف كلبه من كثر القهر على ابنه
-اخذوا شحط سمير ورامي ورجعوا للبيت
اني احتاريت اروح لابويه ،،لو ابقى ويه اسلام
-نقلوا اسلام للردهة تحت المراقبة
وصيت الممرضة عليه بين ما اجيب ابويه من هذيج الردهة وادخله هنا
على الاقل عيوني عليهم أثنينهم
-رحت على ابوي شوفته كسرت ظهري
مخليله مغذي وضاربي ابره مهدئة
بس مغمض وعيونه تصب دموع
شافي وشاف ملابسي كلها دم
كام يبجي بصوت عالي
عادل /بويه لا تكلي وليدي مات
محمود/حجي كول يالله الحمد لله عايش ومابي شي ادعيله ،، كوم ويايه اخذك هناك
حتى عينك عليه بين ما اروح ابدل واجي
-تشكرت من الاطباء الموجودين بالردهة
واخذته يمشي بس مشية واحد مكسور ومصدوم
-هو شاف اسلام وشنو صاير بي
وجهه مابي ملامح منفوخ من الضربة ومطوعن
وراسه مورم
ومجبرين ايده وفخاذه
وكام يصرخ
-يااااابوووويه كون روحي تفداك يانظر عيني
-اريد بس اهدي// حجي كول يالله
صدكني ماعليه شي ترى لان طفل وترف هيجي صارت اصابته قوية
بس ما يسمع مني يبوس بي ويصرخ ويبجي
اركان/ما ادري شلون رجعت للبيت روحي طالعة ما اعرف شسوي
كلبي بقى معصور من شفت الحلم وبهذاك اليوم
-دخلت للبيت ومثل المخبل وما يعرف يتصرف بس اتذكرت كلت //فرح جيبلي ملابس جديدة كاملة ومحفظتي من فوك
فرح/من راحوا الولد واخذوا ابويه للمستشفى
-ام رامي صارت شاطرة
طشرت العالم وتشكرت منهم
كامت وتشلحت وغلست الحوش من الدم وكالت// تعاي رشي عليه ديتول لان الزفرة قوية صارت بالحوش
-امي فقدت بس تصرخ وتبجي
وتندب الله واهل البيت
وهدومها كلها دم
و رفل تبجي وياها
-اني شكد صرخت وعيطت وصيحت
بس ما بجيت الدمعة شاطت بعيني
بس جسمي كله يرجف
احس على يا ساعة اوكع
-ام رامي شحطت امي ودخلتها للحمام شطفت جسمها من الدم وغيرت هدومها وكذلك رفل غصبتهن جبر
كالتلهن/ البجي ما يسوي شي
ولا تفاولن ما يصلح على الجاهل
-دخل علينا اركان حالته تبجي الكافر مابي روح وجهه اصفر كركم
-نسأله شلونه اسلام ،، ابويه شلون صار
يكول /يم الله هو بعد بكيفه
غير هذا الحجي ما يكول
-نزلتله ملابس ومحفظته من فوك
شو دخل سبح ،،وراح اخذ من كنتور امي فلوس وطلع
-امي تخبلت كالت/ الولد مات ومايريد يكلي
-هو خطية كام يبجي ويشهك
اركان /يمه عايش بس حالته خطر
الدكتور يكول للساعة ب ٨ بليل اذا قاوم بعد ما عليه شي
-يمه اني رايح لكربلاء ومتوجه للعباس
وهاي اول مره اطلب منه حاجة
يمه ما رايد منه لا سلطة ولا مال
يمه اريده بجاهه عند الله
يكوملي وليدي من هاي الشدة
يمه بعدها لوعة رسل لهسة تجوي بكلبي
فرح /سوده عليه يحجي ويبجي
وام رامي وامي ورفل يبجن وياه
واني ما تطلع الدمعه من عيوني
روحي مفرفحه وذابحني القهر
بس ما ينزل الدمع ليش مااعرف
-ام رامي كالتله/ هسه خلي ابني سعدون
يسوق سيارتك انت لا تسوق تسوي حادث
-طلع اركان يزور الكربلاء
والنسوان كامت تجي تطمئن عن اخبار اسلام
-شويه واشوف محمود دخل معصب نار علينه
وهدومه كلها دم ويبجي .............
شكرا لزيارتكم عالم روايات سكيرهوم
