رواية نارا حيدره الفصل العشرون بقلم نمارق رحيم
أنا لست أدري أي دربٍ أسلُكُ
كُل الدُروبِ إلى لقائِكَ تُهلِكُ
إن الذي بيسار صدري واحدٌ
خُذ واحدًا تدري بأنك تملكُ
مالي سواكَ فلا تُغادر عالمي
أتظنُ أني في هواكَ سأُشركُ ؟
لا والذي أجراك بين نسائمي
إني أُحبك ليتَ قلبكَ يُدرِكُ"..💔
⭐⭐⭐⭐⭐⭐⭐
حيدرة :- الحل نضرب عصفورين بحجر واحد لحتئ ناردين تتخلص من لؤي للابد ويتوب منها، ولحتئ امها تبطل تغصبها علئ شيء
وانت ترجع لأربيل لأشغلك وبالك مرتاح ومطمئن علئ اختك ،، سالار انا طالب ايد ناردين علئ سنه الله ورسوله ،تصير علئ ذمتي وبــيتي تصير مرت حيدرة بعد شحده اليفك حلكه بكلمه ويضايقها الا اترس حلكه رصاص ،،شنو تگول ؟ ..
اندهشت مصدومة من كلامة !!
سالار :- تدري بيه موافق وهذا احسن حل لو بيدي ازوجها الك اليوم قبل باجر ،
التفت وكال لي :- اخوج موافق ،وانتي ؟،
مانطقت كلمة من الصدمة ضاله اباوعلهم وساكته ،
جاوبه سالار :- ميحتاج تسئلها ،ضامن موافقتها
ابتسم وسكت ، دنگت راسي احس ماداتنفس رح يصير عندي هبوط من كلام الگاله عفتهم وگمت بسرعة واني لازمة گلبي وسالار اسمعه يضحك عليه ويگول ها شردت الخبلة..
دخلت للمطبخ فحطانه..
طيبة :- هاا شنوو صار ليش صاحولچ؟؟
-ولج حيدرا خطبني من سالار هسه !!
اجتي ركض حضنتني وهي تصيح من فرحتها وتهلهل..
سمعت صوت سالار يصيحلي رحتله كال :- بدلي يلا نرجع للبيت ،
-شنو ليش ؟؟
سالار :- شنو ليش حلالچ الجو ببيته هاا ؟
-لا لا اي هسه ألبس واجي
- اي يلا لا تتأخرين لان عندي شغل
- ماشي
رحت لغرفته وصعدت طيبة وياي طلعت ملابسي الي اجيت بيهن تنورة والقميص لبستهن علئ السريع ونزلت سلمت على طيبة بوستها وطلعت بره ..
حيدرة منتچي علئ سيارة سالار ويحچون شافني كال يلا امشي سلم عليه ورحنا
وصلنه لبيتنه قبل ماانزل كالي :- ناردين اتٲخر بس لاتنامين انتظريني
-ماشي
فتحت الباب ، وهو راح ،، فتت للبيت محد موجود صعدت للغرفة نبراس ونور وحده مگابله الثانية ويسولفن من شافني كمزن واجن اليه ركض حضنتهن مشتاقتلهن عبالك سنتين ماشايغتهن مو يومين
گالت نور وهي فحطانه بجي.. وينچ شلوون عفتينه لوحدنه ورحتييي..
نبراس :- همزين اجه سالار امس والله چان متنه خوف واحنة ويا امي راوتنه العذاب شبعتنه ضرب وغلط طلعت حركة گلبها بينه لان ماصار الي تريده ..
-ششش عمري انتو معليچن بعد هاهيه انسو الي صار اخونه ويانه لا تخافن بعد ،امنه الله يسامحه حتى مانكدر ندعي عليها
كعدنه وتربعنه بعد مابدلت وسولفلي شنو صار
وحدة تشكي لثانية
سولفت الهن كلشي وچنت اكلهن كل كلمة كالها حيدرا اليوم الصبح ،وتالي :- خطبني
نبراس :- عزززززه فدووووه هذا حيدرة ماكو منه اثنين خرررب
- لا حيدرتي وبس
نبراس :- اعصابچ يلعاشقة الولهانة
نور :- يعني خطبچ وافقتي؟
- اي مواففة
نور :- يارب تنسعدين يمته خطوبتكم؟؟
-مدري ما كال بس اكيد رح يتفقون هو وسالار
نبراس :- زين الله يتممها علئ خير وامي ؟
-بعد ما اهتم لأحد وحتى امي بعد ما اخاف منها اذا ترجع للبيت
والله من كال اريد اخطبها علئ سنة الله ورسوله التنفس صفر ردت اوگع من طولي وداعتي
ضلينه نضحك ونسولف ومصطفئ كاعد ويانة ورا المغرب چنه لوحدنه بلبيت وسادين الباب تالي دخل سالار ،راح سبح وطلع صاحلي لغرفته رحتله واگف ينشف شعره
- هاا اجيت سوير
سالار :- اكعدي خل احچي وياچ
-ماشي
كعدت خلص تنشيف گابلني وگال الموضوع هو يخص حيدرة
-شبي حيدرررا ؟
-بس العافية، اقصد علئ الخطبة، خطوبتگم
سكتت ،گمل گلامة :- بعد ما وافقتي حددنه موعد الخطبة
-صدگ يمته ؟
-بعد يومين
تنهدت :- اه وامي تدري ؟
-معليچ بيها اني بأعتباري ابوچ وراح اصير الشاهد والوكيل وامچ ما مهمة
-لعد فدووه رحت لابوي
ابتسم :- اي وگال حيدرة انتي الچ القرار الخطبة ترديها قاعة لو بالبيت ؟
- الصراحة چنت اتمنى بالقاعة بس عادي اذا توفقنه للعرس يصير قاعة بس اريد هسه بالبيت افضل
-براحتچ مانچبرچ علئ شيء ،الي تحبي يصير يصير لعد خلص اتفقنه؟ عندج شروط؟
-لا ماعندي ومنو معزوم للخطوبتنه؟
-كم واحد من الاعرفهم واصدقائنه والعمام والخوال يعني الاقارب بس مو العشيرة كلها انسويها بيناتنه
-ماشي صار
-بعد شنو تردينه
-ماادري الگلته كلش كافي
-الصالون وهاي السوالف والبدلات حيدرة رح يحجز
-سلامتك يابعد هلي خلصت لعد معندي شيء اگوله
-تمام زين يلا اطلعي خل ابدل
بسته :-خاب شنو انت موش اخوو گيمر عرب ،كااهي
ضحك ،:-خبله
طلعت من غرفته ،الساعه ب10 ونبراس كاعدة تكنك نعست وتغطيت بالبطانية مغمضة عيوني واخطط للخطوبة وللحفلة
اتخيل روحي لابسة بدله وهو لابس القاط ويبتسم ونوگف ونرگص وايده تحاوطني..
...
حيدرة
دخلت وقفلت باب غرفتي نزعت قميصي وعلگته طفيت الگلوب تمددت علئ چربايتي الصارلي يومين مانايم عليها دنگت على المخدة اتگلب يمنه يسره ما اجالي نوم استشعرت شيء وشميت ريحه حلوة بالمخده ،بيها عطر حلو تذكرت ناردين نايمة عليها ابتسمت واني اتذكرها
حضنت المخده واني افكر بالقرار الاخذته ..والخطبة بعد يومين
جنت محتار افكر شلون رح تكمل وياي من تعرف بأبوي؟
ومن تعرفني انا منو ؟....
...
ناردين
ثاني يوم گعدت على صوت نبراس وهيه تگول گومي سالار يصيحلچ دگومي خرعتني واني نايمة
غسلت وجهي واتذكرت البارحة التخيلته تحلمت بي دائماً الاحلام هي انعكاس التفكير ، ياررب الرسمته وتحلمت بي يصير واقع !
الساعه 8 وسالار رحت يمه دا يتريگ..
گال :- صباح الخير ناردين تعالي حبيبتي
وكفت يمه وجاوبته ها عمري
سالار :- روحي بدلي حتى انروح نختار حلقات خطبوتكم وحيدرة هسه يجي وخلي نبراس ونور يرحن وياچ ما اخليهن وحدهن بلبيت ماترهم ..
- صااار تأمر أمر يبعد عمري
ضحك :-خبله روحي بدلي استعجلن لا تتأخرن
رحت طلقه ركض گلتلهن بدلن واني احتاريت شلبس؟
بعدنه ما نازعين الاسود على ابونا فلبست فستان اسود وبي حزام فضي يجي على الخصر وطويل شعري رفعته كعكه ونزلت كذلتين
وجهي جان باهت وذبلان طلعت الحمر الجابهن الي سالار ما اريد اخلي هواي خليت شويه لونها وردي فاتح وكحلت عيوني خفيف
خلصنه اني ونبراس مسوين نفس التسريحة ولبسنه نفس الفستان بحيث سالار من شافنة انصدم وتيهه بينه
سالار :- منو ناردين ومنو نبراس يبووو فااضل
ضحكنة طالعات تؤام كلش ، نور عكسنة ماتشبهنه لأن هي بيضة وطويلة وعيونها خضر
واحنا التؤام نختلف بشرتنا برونزية ونبراس اسمر مني ولون عيونها ثابتة عكس لون عيوني
اندگ الجرس راح فتحه..
سالار:- اجا حيدرة يلا اطلعن
طلعنه من البيت ومصطفئ بالمدرسة.. گعد سالار بالصدر سلم عليه بالاول واحنه همات گعدنا
اني ونبراس سوا وعيني بالمرايا يحچي ويا سالار ويگله علئ المحل الحلقات..
تالي باوعلي بالمرايا احسه يباوع بتفاجئ من شكلي وصلنه للمحل نور لازمة بيد سالار واني ونبراس نمشي بصف حيدرا..
لابس بنطرون اسود وقمصله جلد وفاتح اول دكمتين من قميصه،وساعته بيده ،وحذائه يلمع
اباوعله بتدقيق وأركز بتفاصيله الصغيرة امشي وعيوني على الطريق وعليه!..
حيدرة :- انتبهي وعوفي عيوني..
صخام درت وجهي وهو بالگوه كتم ضحكتة واستمر يمشي.. دخلنا للمحل كعدنة على القنفات وراحو يحچون وياا الولد اجه وخلا يمي علبه بيها حلقات ومحابس حلوات..
حيدرة :- الي يعجبچ اخذي .
هزيت راسي واخواتي ينطن رأيهن ويگللي هذا حلو وهذا موحلو تالي عجبتني حلقة كلش حلوة
كال الي ابو المحل :- هذه الحلقة مميزة بتصميمها وحصرية بس عدنا
هزيت راسي بالقبول وكلتلهم اريدها انطيتها الحلقة وراح جاب علبه حلقات رجالية اختاريتله حلقة وانطيته اله وعجبته
قبل مانطلع كال :- فرد مره اخذي الذهب حتئ نخلص من الذهب ونروح..
جابلي قلايد واسوارات ما ردت اثقل عليه واشتري هواي ادري هذا المحل غالي..
اختاريت سوارين وقلادة ناعمة وحلوة.. گلتله هاهيه هذني كافي..
حيدرة:- مقتنعة بيهن اذا تردين نغير گولي..
-لا مقتنعة حلوات..
-اخذي بعد..
-لا شسالفه ما اريد..
-متأكدة؟ اذا بنفسچ شيء گولي لان هذا ذهب عرسچ..
-والله مقتنعة واصلاً ما احب البس هواي وهذني كافي عليه..
-ماشي بويه يلا اطلعوا..
دفع الحساب وطلعنا..
سالار :- وعلي فاتتني لو جايب نرجس ويانه تختارلهن ملابس بعد احنة وياهن اكيد يستحن
حيدرة :- خليها على باچر اخذ ناردين تختار بدلتها لان باچر ما عندي شيء ما مشغول
-هاهيه لعد باچر..
رجعنة للبيت الظهر ،نبراس سوت معكرونة كلش طيبة وصارت تعرف تتطبخ واني بعدني طگه ونص بالطبخ تغدينه ونمت المغرب كعدت ضلينه نخطط لعگب باچر وشلون نرتب المكان..
قررنه بالديوانيه لان چبيرة ونجيب كوشه جاهزة وكراسي وورد وبردات..
وصينه سالار وكتبنه اله قائمة احتياجاتنا راح ورجع جابهم وراح لغرفته هو ومصطفى
ضلينه للفجر نرتب بالديوانية طلعت فد شي صارت كأنو قاعة
خلينه القران بالنص ،،وشمع ريحته حلوه وحروف بيض N,H
نمنه متأخرة وكعدت نعسانة حيل وحيدرا گاعد جوا يم سالار منتظرني بدلت على السريع وميته نعاس نايمة بس كم ساعة قليلة
ركبت وياا بسيارته طول الطريق ماحچينه والسكوت سيد الموقف اول شيء نزل گدام صالون نسائي وحجز لباچر تالي رجع صعد
وصلنه للسوگ صف السيارة بالگراچ قبل ما ننزل گال الي ..ناردين شگد تعزيني..
-ليش هذا السؤال..
-اذا اطلب منج طلب تسوينه..
-حسب الطلب اذا اگدر اي اسوي..
- اريدج تنزعين الاسود
- لاا حيدرا لا شلون انزعه !
- الحزن بالگلب مو بالملابس وبعد اسبوع على سنوية ابوچ صارلچ سنة لابسته مايصلح مايصير ناردين لابسة اسود وخطوبتچ
- ما ادري حيدرا ما اعرف
- لخاطر حيدرة ها ؟
جريت نفس وزفرته.. ماشي رح انزع وفستان الخطوبة رح اختارة مو اسود..
ابتسم وگال.. عفيه بويه فديت الي صايرة ما تعاند..
نزلنه وقبل ماندخل بالسوگ ..
گال :- "ناردين من هل لحضه الزمي ايدي قوي ولا اتركيها ،اذا اتركيها ثانية وحدة اضيعين"
صفنت على كلامة بتفاجئ حسيته يقصد غير شيء رغم هذا لزمت ايده ودخلنه نفتر بمحلات الفساتين طلعنه من اربع محلات وماكو شيء حلو لو على قياسي بالضبط
تالي دخلنه لمحل لمحت فستان يجنن مثل الي ابالي..
- باع هذا شكد حلووو؟
حيدرة :- لا تگولين باع
-اي ما اگول بس شوفه ..
سحبت الفستان من التعلاكة وخليته على جسمي ومدنگه واكول :- حلوو عليه شوفه
حيدرة :- انتي المحليه الفستان مو الفستان حلو
ابتسمت وگلتله..
-عاجبني حيدرا اريد اخذه
حيدرة :- من هالعيون يابه تأمرين روحي گدري حتى ناخذة
دخلت لغرفة التبديل چبيرة ودخل وياي نزلت البرده صارت حاجز بينه ورحت ابدل
بعدت البرده من لبسته واني لازمه الفستان من الصدر لان فتحتها ودلعتها چبيرة وغطيتها بأيدي
من شافني ضل صافن وگصني گص بعيونه ،
استحيت ، :- حيدرا شنۉ رأيك حلو موو
حيدرة :- ياحلو بويه غير انسطرت سطر ولحسين
-ها يعني انزعه هسه..
انتبه على ايدي وگال بهمس ذايب..
- ايدچ وين مخليتها شنو مغطية؟..
صارت عيوني على منطقة الصدر خدودي صارن جمر من الخجل ما جاوبته رحت ركض لمكاني ورجعت البردة واني اگله حيدرااااا..
مسح جبينه -عيونه لحيدرة ،امشي امشي نزعي خل نروح نولي
ضحكت على ردة فعله بدلت وخلو الفستان بالعلاگه اخذناه وطلعنه واشتريت فستانين لنبراس ونور.. تعبنه حيل ونوب باردة واحنه نفتر ،صار الظهر واحنه من محل لمحل
تالي گالي :- گملتي بعد ناقص شيء ؟،لان وعلي دختتت
-اي لااا لحظة حيدرا شسمه
-ها شسمه؟
-اريد مكياج..
-مو راح ترحين للصالون بعد شتسوين بي
-اي اليه
-بعيني ،امشي
دخلنه لكوزمتك ...اشتريت كم قطعه مكياج وعطور ...
-هاهيه بعد كلشي كملت
-صلواات علئ محمد
ضحكت ... ماخلاني الزم شيء هو لازم العلاليك كلها حسيته تعب
تالي كال :- ناردين جوعانه ؟
هزيت راسي لا ..
حيدرة :- اكول انه ماماكل شيء وطاح حظي
ضحكت علئ شكلة ،..فوتنه لمطعم علئ الشارع ..يبيع لفلات همبرگر ..
انطاني وحدة وكعد كبالي اكلنه وطلب عصير بطيخ تالي رجعنه والدنيا باردة نهايه شهر 12
واحنه نمشي خلئ العلاليك بالكاع ونزع قمصلته ولبسها الي ..لان شافني افرك بيديه من البرد
ورجعنه نمشي واني فرحتت من سوا هيچ يعني يخاف عليه لا ابرد واتمرض ..
صعدنه بالسيارة وبالطريق كال :- شلونچ هسه
-والله كلش زينه بس ليش تسئل..
حيدرة :- ماادري بس يكولون العلماء البنيه الشي اليسعدها بالدنيا هيه التسوق من ملابس ومكياج ف سئلتج شلونج حالياً
ضحكت وخليت ايدي علئ ايده وباوعتله وعيني بعينه همست :- خطأ ،الشيء اليسعدني بالدنيا هو قربك .
گلت هيچ واخذ بريك ليورا راد يصير حادث وكف السيارة وهو يهمس :- صبررك ياالله
واني ميته ضحك لزمت ايده حارة وخرها واني اضحك ..
- كافي تضحكين وعلئ شنو تضحكين بلا؟
- عليك
-يمج مهرج وتضحكين؟
-لاحشاك انت حيدرتي شلون اضحك عليها اضحك هيج على نفسي على نفسي
- اخ يا ناااردين
-عيونها لناردين
تنهد وابتسم ورجع يسوق ..
وصلنه للبيت دخلت وهو دخل جاب العلاليك واني اخذهن من ايده و ادخل بيهن للاستقبال ،
قبل مايطلع كال :- يلاا رايح انه بالج علي نفسج
-ان شاءالله وانت هم
- صار يلا في أمان الله
-الله وياك
رح يصير العصر تقريبا طلعنه الغراض وبقن يكدرن الفساتين وفرحن بيهن طلعنه العطورات والمكياجات كلش متحمسه لباچر مامصدگه باچر يوم خطوبتي من حيدرا حسيت باچر رح يكون عوض إلي..
سالار :- يابه رايح انام وربچن اذا كعدتني الغي الخطوبة كلها
ضحكنه وهو راح ..
اجن عماتي واجت نرجس ،وبنات عمنه ..ويدرن بٲمي وساكتات ولليل نسوي شيرة اني واخواتي لكل جسمنا من خلصنه ضلينه نسولف للفجر
الصبح رحت للصالون بس اني والبقيه ضلو بالبيت يعدلون وراحت وياي نرجس باعتبار اختي الچبيرة وطيبة اجت قبل ما اروح للصالون وصلها حسن ..
كعدت ام الصالون تشتغل بحواجبي نضفتهن وسوتلي بشرتي وشعري ماصبغته على طبيعته كيرلي بني فاتح وسوتلي مكياج ناعم وحلو
رجعنه العصر بقيت كاعدة على الكرسي والصالة انترست نسوان والجهال وخالاتي اجن وترسوني بخور وشمروني بالجكليت ..
بس مع هذا اكو شي ناقص بفرحتي وجود ابوي وكذلك امي ! شگد حلووو من البنية بهذا اليوم امها بقربها وتهلهل إلها وتكون فرحانة اكثر من بتها !!
اتمنى لو امي مو هيج تعاملها واتمنى ما جان عندي ابن خال لؤي ..
مسحت دموعي من خدي مشتاقلة لامي رغم كلشي سوته بيه مشتاقة لدفو حضن الام حتى لو جانت تكرهني..
اجن خواتي يمي ..اقارب حيدرة محد اجه وما عازم شخص من طرفه لان سبق وگال قاطع علاقته بيهم نهائياً وما اعرف شنوو السبب !
حتى سالار ماكالي ليش رغم يدري بس يغلس ما يجاوبني تالي كالوا اجوو الشيخ وحيدرة الصالة فرغت الكل طلع بس نرجس بقت يمي وعمتي غطتني بالعبايه علمود الشيخ..
بده يقره الايات ويردد تالي سألني موافقة؟
نبضات گلبي تسارعت وجسمي كله يرجف نطقت بالموافقة وردتتهاا ثلاث مرات
هلهلن عماتي واني بقيت مبتسمة بفرح مفرط طلع الشيخ وهو دخل لزم ايدي وبعد العباية مني وكعدنه اثنينه على الكرسي
حسن وسالار فحطو من الرگص والدچ ..
سالار يهوس وينطي كولات بغداديه
وحسن يهوس ويحچي كولات بصراويه ..
اجواء تخبل جنت مفتقدتها من سنين وشعور يجنن اول مرة اشعر بي وقرب حيدرا الي غمرني بالسعادة..
لبسني الحلقات وصفكوا وخلوا امامنا كيك وكلته قبل ما يوكلني ودمرته بالكريمة وميته ضحك على شكله بالكريمة الككو ظل يضحك على تصرفي وي ضحكته بينت غمازاته..
چان لابس دشداشه نيليه وطالع احلى من الحلا ولايكه عليه الدشداشة كلش..
جان طول الوقت عيونه مركزة عليه حسيته مبهور مني وكل ما ألتفت عليه اشوفه يمسح كصته ويرجع يصفن بعيوني..
تالي گال.. شدعوه هالجمال كله؟ شدعوه هيج طالعة حلوة مثل الأميرة وگاعدة يمي؟ لعابة انتي لو بشر..
ابتسم وعصر ايدي دنگت راسي بخجل وظليت ساكتة..
من هذه الساعة حتكون بداية لحياتي الجديدة الي رح تكون بوجود (حيدرة)
ما ادري المستقبل شنو ضام إلي !
من صدمات ، ومفاجئات ، وتضحيات
يا ترى هل الخطبة رح اتم ونتزوج ؟؟
لو تنفسخ بسبب مشكلة وعاصفة قادمة ؟!
