رواية ارحموني ولو رحمة مرة الفصل الثاني والعشرون 22 بقلم فراقد حسن علي

أركان /اخذت سيارتي وطلعت الكربلاء وسعدون ابن ابو رامي جيرانه هو يسوق

الطريق كله عيوني وشلت من الدموع راسي أنفخ من القهر ،،ربي عفوك ورضاك 

-يمكن سعدون سوه الطريق اقل الساعتين

كلش سريع بالسياقة 

هسه لو يكلبنا ويسوي حادث 

ما اهتم الروحي لان كلبي مشعول نار على وليدي 

-بس وصلنا الكربلاء احس نفسي مو امشي ،،

لا أركض ركض ،،

-مارحت لا توضيت ولا ابد 

لان سبحت وطلعت من البيت

-وصلت الباب أبو الجود ،،

حلكي يابس من القهر ،،

وروحي عطشانة على شوفة ابني بخير 

-هلكثر بجيت ،،هلكثر صرخت 

امشي وأسولف وياه ،،

احس يباوع عليه ويشوف حالي ،،

وأتخيله يكلي 

((هذا اني موجود أسمعك شتحجي وشدكول ))

1 تعليق

-دعيت لوليدي ،،ودعيت دعوة من قلب 

أبو محروك كون يحفظ جميع الاطفال 

لأهلهم من كل سوء وكل شر 

-وصلت باب الضريح الجوه 

وصرخت صرخه أحس حنجرتي قفلت 

-هاااااا يالعبااااااس راااايد وكفتك اليوم 

أبني عفته بغداد مطروح 

هااااا يا أخو زينب ،،لا تردني خايب 

بقلب مجروح 

-الزوار يباوعون بوجهي 

كعدت باب الضريح على ركبي 

بس شلت جف ايدي ،،وسلمت على الامام 

بقيت كاعد بمكاني حتى ما بقت بعيوني دموع كلبي محروك ناااار وشاعله بي 

-((لسان حال أركان ،،بضريح أبي الفضل العباس(ع) ))

((جيتك ماد الايد.....أقسم عليك بحق زينب والعضيد

وبحق ضلع امك الزهراء وضلع الوحيد

أنا جايك انخاك ودموعي تهل

مالي مقصد غيرك ياكفيل

جايك بحق سكنه والطفل الرضيع

وبحق اللي قضى بأرض البقيع

جيتك وكلي امل بخذ الطلب

مالي غيرك ياعضيد))

6 تعليق

-ما اعرف شكد بقيت كاعد بس اشهك وابجي والزوار الرايح والراد يصير عليه 

هذا اليصيح الله يعينك 

وهذا اليكول الله يكوي حيلك 

وهذاك يرد الله يبرد كلبك 

-سعدون تفاجئ بيه من صليت 

وأكتشف اني من الطائفة السنية 

صارلنا شكثر ساكنين بهاي المنطقة يعرفون لقبنا الجبوري بس ما يعرفون من يا صوب وامي دائما تذكر اهل البيت وتوزع الخيرات 

الحمد لله عشيرتي كلها العراق 

نصها من السنة ونصها من الشيعة 

-هااا سعدون شو مصدوم شبيك

سعدون /الصدك تفاجأت بيك 

مو شغلة طائفي بس شفتك تزور من قبل بالكاظمية وهسة أجيت الكربلاء 

واحنا ندري بيكم أنتم جبور 

وخالتي ام محمود علوية 

عبالي يعني أنتم شيعة 

أركان/الف الحمد والشكر لله 

احنا عائلة مخبوطة 

امي علوية

وأبويه جبوري 

-شوف سعدون شكثر موجودين هسه شيعة بكربلاء ما يساوي حبهم جميعاً بدرجة حبي لابو فاضل وأهل بيت النبي 

-خلصت صلاتي ،،رحت زرت أبو عبد الله 

ورجعت لزياره ابو الفضل 

سلام الله عليهم جميعاً ال بيت الرحمة والنبوة 

-شويه واشوف محمود دخل علينا 

معصب نار يفور 

وهدومه كلها دم ويبجي 

فاطمه /يمه برد حضرينا يالزهرة ام الحسن 

محمود يمه لاتكول الولد مات 

محمود /من أبويه شاف أسلام شصاير بحاله فقد يصرخ ويبجي،،اريد بس أهدي//حجي كول يالله وداعتك ماعليه شي لان طفل وترف هيجي صارت اصابته قوية 

بس ما يسمع مني يبوس بي ويصرخ ويبجي وما اشوف الا أبوي غاب عن الوعي و وكع بالكاع 

شصار بحالي تخبلت 

شكثر ما خايف على أسلام 

خوفي أكثر على أبوي 

انخبصت وبعد ما اعرف شسوي

-الحمد لله الأطباء ما قصروا وياه بالعناية الطبية والعلاج اللازم 

-هو مفتح عيونه بس شكله واحد خايف ومصدوم ولا عبالك هذاك أبويه اللي جنه حايط من يوكف على طوله ومن يمشي 

-الاطباء كالوا//ندخله اليوم يبات بالمستشفى تحت المراقبة ومنا الباجر الله كريم

وان شاء الله الصبح يصير أحسن ونخرجه

-بعد ما عدت الساعات وشفته ارتاح وشويه صار أحسن 

//يابه أني اروح البيت بس ابدل ملابسي واجيب فلوس والتلفون 

وأطمئن على امي واركان وارجعلك

-وصيت أصدقائي كتلهم//عيونكم على أبويه واسلام اروح للبيت شغلة ساعة وارجع 

-بين ما أبوي كعد على حيله وصحصح وشلت المغذي من عنده 

كال//بس اروح للتواليت ومن ارجع انت روح للبيت 

-أسلام صحى الف الحمد لله 

من قبل شوية هو يحوس 

الاطباء كالوا/من التخدير مال غرزات الخياط وقوة الضربة بقى نايم مو فاقد 

-عيوني وهو أستلمها بجي وروحه متفرفحه متوجع وراسه يوجعه 

وجسمه يصل عليه 

يبجي بس دموعه توكع على وجهه 

بس ماكو عيون طامسة من الورم 

-حرت شلون أشيله لو شلون اسكته

منين ما ألزمه يصيح أووواه 

-الممرضة كالت //اني أهتم بي 

حاولت تسكته وتهدي ماكو ،،فرفح من البحي

ميكدرون ينطونه ابر مهدئة 

يردون يشوفون استجابة دماغه 

ومدى وعيه وتركيزه

-انوب أبوي انت الرجال الجبير شجاك كام يشهك ويبجي وياه 

بجى كل المرضى النايمين بالردهة 

-وصيت الممرضة عليهم وطلعت 

-اخذت تكسي و رجعت للبيت 

ومن نزلت اخذت الكروة من دكان أبو رامي 

-من وصلت للباب انعاد براسي كل شريط الحادث،،طلعت كل خوف الصدمة بالبجي ومن دخلت كفختني زفرة الدم 

قضت على حالي 

-تلكتني امي خايفة عبالها ياحافظ صاير شي

-يمه ماكو شي،،بس الصدمة شلت حالي وأبوي وكع عليه 

-فرح جيبي تلفوني ما اكدر على هاي المصيبة وحدي أبلغ عمامي يجوني 

فرح/اباوع عليه يمشي بالكوة 

ويشحط بروحه شحط 

كعد على القنفة ويسولف ويه امي

-سأل على اركان 

كناله //تخبل وطلع لكربلاء 

كال// احسن شي سواه

-النسوان من شافنه دخل للبيت 

تحمدن لعايلتنا بالسلامة وطلعن

-خابر على ابوية باسم وشرحله عن الحادث 

كاله//بلغ عمامي وتعالوا ترى ابويه مصدوم وتخربط عليه وراح ينجلط على الطفل

والطفل بعد وراه عملية 

وبعد ما عندي قوة وحيل اوكف على رجليه

اسلام اخذ حيلي من جهة ،، 

وابويه من جهة ،،

واركان ما اعرف شنو وضعه تخبل وطلع لكربلاء 

-أنوب كالي//طلعيلي ملابس نظيفة 

ركضت جهزت ملابسه وخليتهن بالحمام دخل هو يسبح 

-امي كالت//اركضي خدريله كلاص ورد ماوي يسحب الهبطة من عنده

واني اركض ألبس ثيابي حتى امشي وياه للمستشفى

-طلع من الحمام ،، انطيته كلاص الورد شربه هو واكف 

-صعدي جبيلياها من فوك 

فرح /بس صعدت بايتين من الدرج صاح عليه 

محمود /تعاي يمعودة ورايه طلعه للمستشفى 

لا تتعاركن ومابيه حيل افازع 

اني أصعد أجيبها

محمود /صعدت ودخلت للغرفة فارغة 

هاي المكموعة وين ولت 

-رحت للكنتور طلعت السترة 

وطلعت من الغرفة ،،

ردت أنزل وأسمع صوتها يجي من السطح

-اخذني الفضول مديت راسي 

شفتها تخابر ومطيتني ظهرها

تحجي وتبجي سمعتها تكول// يمه هي ساقطة مسوي نفسها شاطرة غسلت البيت والزوالي،،واني توسلت بيها اساعدها وهي ماقبلت !!!!وجنت اسوي غده وهو بقى يلعب يمها ومن خباثتها هملته وعمي سحكه !!!!

-الصراحة من كثر العصبية فقدت ما أتذكر التفاصيل ،، بس اتذكر شمرت السترة بالكاع

وشحطتها من شعرها دخلتها لغرفتها 

شصار وراها ما اتذكر 

فرح/بس صعد محمود فوك يجيب سترته

وما نسمع غير أعياط رفل كسر الدنيا 

ركضت امي قبلي واني وراها 

دخلنا للغرفة وأشوف محمود متحول 

شيطان من العصبية مو بشر 

-يابه مخلها تملخ ،،عجنها عجن 

ما خلى لا دفرات ،،ولا بوكسيات 

ولا تمليش شعر ،،حتى هدومها شككهن عليها

واني امي نريد نخلصها من يده ما نكدر 

-من عصبيته رجع كتلني وياها 

لا اكدر ألزمه ولا اكدر أهدي شبعني كفخات 

كرفصت بالكاع وضميت بطني بين رجليه شلون الطفل بطن امه يصير هيجي كرفصت

-يضربني ويضربها ،،وشكد غلط 

وسب ،،وفشر ،،حتى تفال تفل علينا 

ويصيح// راح تجلطني راح تموتني 

وامي تسحب بي وهو ينفض ايديها بقوة 

وحتى دفعها لان ما واعي على روحه 

لحد ماهو تعب من الصياح والعايط والضرب

تركنا ونزل جوه 

-راسي بعد ما احس بي من كثر الكفخات 

جسمي يوجعني من الضرب،،والهبطة،،والبرد

-امي داخ راسها ما تعرف شتسوي

تشوفني لو تشوف رفل 

كتلها// عوفيني وروحي عليها 

مكطعها تكطع 

حتى شعرها شالع الخصل وشامرها بالكاع

-هي بقت تبجي تكلها//خالة وديني لاهلي

بعد ما ابقى عنده،،ما سويت شي وضربني كله من وره هاي الحية تعبي براسه عليه 

-امي أنربطت ما تعرف شلون تصرف

عاد كالتلها //وين التلفون خل أخابر 

على أهلج يجون ياخذوج 

-كالتلها/ يمكن وكع من ايدي بالسطح

خالة كلشي ما مسوية جنت اخابر امي واحجيلها عن حادث اسلام 

هو أجه وسحلني من شعري 

-طلعت امي وجابت التلفون بيدها

كعدت ورجعت البطارية والغلگ عليه لان واكع ومتفلش 

- خابرت على أهل رفل 

كالتلهم/ تعالوا أخذوها تلاغت ويه رجلها

ومحد باقي بالبيت طالعين للمستشفى 

-جاوبتها مرت خالد ،،كالتلها /خالة 

عمي وعمتي والولد هسه طلعوا للمستشفى

-امي داخت وبقت تفر براسها 

كالتلها /كومي لمي أهدومج اني اوصلج بطريقنا من نروح للمستشفى

-اباوع عليها ما بيها حيل تشيل روحها

وما تكدر تنهض نفسها تكوم لو تمشي 

وحالتها أصعب من حالتي بهواي

-امي ساعدتها بلم هدومها 

نزلنا جوه ،، بلكوة نزلت الدرج 

امي كالت// شلون تبقين وحدج 

كتلها// ما أخاف عادي قابل شكو 

وبعد شويه يوصلون أهلنا 

-محمود قفل ميقبل ياخذ رفل لاهلها

امي صعدتها بسيارة كوه وغصبا عليه 

لان كالتله// ازعل عليك وبعد ما احجي وياك 

-هو صفن كال //سيارة ابويه وين ؟؟

-امي كالتله//مو أخذتوا الولد بيها للمستشفى

واركان أخذ أبوك بسيارته ومن رجع طلع بيها لكربلاء 

وهاي سيارتك بقت مركونة 

محمود / نزلت رفل باب أهلها وطلعت للمستشفى لكيت كدامي الحجي وزوجته وعلاء وخالد

ام رفل تسكت وتهدي با أسلام 

وصوته واصل لبداية المستشفى 

-امي شافت حال أسلام وذاك البجي الزين

اخذته من ايدين بيبيته وبقت تسولف وياه 

وتحجي باذانه وتهدي بي

-شيجيب الساعة ب ٨ انوب الانتظار يملخ الكلب وهسة يادوب ب ٦ ونص 

-رحت على الجراح كتله//سويله هسه العملية فرفح من البجي علمود يكدرون بعدها ينطوا مهدئات

-أجه ويايه شافه جيگ أموره 

حوله لصالة العمليات

وتعال شوف البجي كلها تدعي وتبجي 

-أخذوا من بين ايدين أمي وهو فرفح 

ماد ايديه عليها ويصيح// أماه أووواه 

وهي كامت ادك وتلطم على راسها

-بهذاك اليوم تمنيت عندي بعد أخوان 

ويوكفون ويايه ويساندوني ،،

شكثر ما اوصف الحالة المرينا بيها ما اكدر اعبر عنها مو بس صعبة لا اعمق من معنى الصعوبة 

-اللهم يكفينا ويكفيكم شر التايهات ،،والمخفيات

-بعد أنتظار طويل 

وشوطة الكلب 

وبهذلت الروح 

وحالة ابوية الما تعجبني هسة انت مالك خلك أكعد بمكانك،،لا معاند واكف باب صالة العمليات

ولو الكل واكف ويدعي 

لا اللسان بطل عن الدعاء

ولا الأيدين وقفت عن التسبيح 

-طلعوا أسلام الحمد لله عمليته ناجحة 

وماكو اي شي يخوف لو يأثر على دماغه فقط الفطر الموجود بالجمجمة نكدر نسيطرعليه بالعلاج 

-الحمد لله فكه التخدير 

رجع يبجي كتلهم//حولوا للردهة النسائية حتى تبقى وياه أمي وام رفل 

ولو ما يسكت بس عند أمي 

طبيب التخدير أجه وأنطاه أبرة مهدئة 

كال//مو زين أكبس دماغه بالمهدئات لان مضروب وعملية ولازم مراقبة تامة 

فرح /نايمة وفزيت الباب أتكسرت من الدك اريد أكوم ما اكدر جسمي متكسر تكسر وأحس صارت عندي صخونة قوية 

بالكوة كمت للباب وفتحها 

وأشوف أبويه عمامي 

وأمي وخواتي كلهم بالباب 

-شكثر موقف أسلام يمرد الروح 

والدمعة شاطت بعيني ،،

-بس من شفت امي وابويه،،بجيت بجي غريب ولگى أهله 

-دخلتهم للهول شرحتلهم الحادث مختصر عمامي بقوا على وكفتهم وابويه وياهم راحوا للمستشفى 

-شكد بجيت بحظن امي

موقف أسلام ،، وطيحت أبويه بجفة وضرب محمود اليه بجفة 

هواي أنهضمت ليش يضربني اني شلي دخل

---------------

منى /السلام عليكم 

-أني منى أخت فرح أصغر منها بسنة 

-اني جنت صغيرة من شالوا بيت عمي عادل ما أتذكر هواي تفاصيل أو سبب الحادث أتذكر فقط شغلات بسيطة 

-من كبرت دأئما أسمع من أهلي 

عماتي ،امي ،،خالاتي ،،نسوان عمامي شلون محمود جان يهتم بفرح ،،

وشلون أركان هم جان يهتم بيه 

-ما جانت تسولفلي شنو تحس تجاة محمود يمكن بكل عايلة بيها خوات تعرف هذا الشي

احنا رويسيه صح ما نتعارك بس أكو بيناتنا غيرة وبعض المشاكل وبسبب هذا الشي أبتعدنا عن بعض 

ولهذا الشي فرح توجهت وصادقت كوثر وصارتلها أخت 

-من خلال كلام أهلي شلون اركان جان يداريني ويلاعبني لكيت نفسي أحبه وغركانة بحبه وما واعية على روحي

-الا بيوم اااخ يا هذاك اليوم 

-من كبرت ودخلت بمرحلة المراهقة 

واني اتخيل شكل اركان ،،

مره اتخيله على وصف اهلي

ومره اتخيله أكبر ويشبه شكله بصورة قديمة بيها كل احنا من جنا جهال مجموعين بالعيد ومصورينا ويه اجدادي 

-كمت ما أشوف اي شاب ويحلى بعيني غير اركان الشاب الي صورته رسمتها أبالي 

-لحد ما يوم زواج فرح الصبح 

دخلوا علينا بيت عمي عادل ،،

-محمود عرفته لان بشرته سمره ويشبه عمي عادل

-واركان ااااخ يا أركان عرفته من شگاره 

وصدك نفس شكله من جان صغير بس ملامحه صايرة اخشن والشوارب زايدة جمال 

-بهذاك اليوم من شفته هلكثر دك كلبي أحسه يريد يطير من صدري ،،

هنا اتاكدت أني احبه 

واموووت عليه بعد 

-من صارت هوسة فرح 

شو هو بلش بيه رزايل ويصيح ويعيط عليه واني أنثولت بس أباوع بوجهه اريد أحفظ ملامحه

-من راد قماش او كلينكس يمسح بي وجه فرح

حتى ياخذها للمستشفى 

-أنتبهت هو لابس حلقه زواج

يابه بجيت بجي تكطعت روحي 

-من حركت كلبي ما متقصدة ألاذية 

بس جنت صغيرة ومراهقة 

وحبي صافي بس اله

وحسيته راح من ايدي وبعد ما يصير اليه

دعيت على مرته تموت لو يطلكها حتى اني اتزوجه

-ليش ما بيوم جوي علينا وجاب زوجته وياه

هنا اصبر نفسي بالكوة 

وحبست العبرة بصدري

وهدي بروحي حتى لا أبجي وأفضح نفسي كدام أهلي 

وصبرت نفسي عن الدمعة والعبرة ذيج تدفع هاي 

-اول شوفة جان هواي عصبي ويخوف يرعد

وثاني شوفة من جاب زوجته جان شكد هادئ ويضحك ويشاقي 

اباوعله شلون يعامل زوجته بكل حنية ويخاف عليهاويكول لكوثر طلعيها وياج ضايجة 

-الصراحة بهذيج اللحظة كرهتها للبنية 

حسيتها أخذت شي مالتي خاص بيه 

من كثر أعصابي ما ادري شلون لزمت نفسي 

جنت بس اريد فرصة حتى أهجم عليها واكتلها 

كالي// صبيلي جاي 

واني هنا كل جسمي يرجف دافنة عصبيتي رديت عليه بالكوة رغم ما صايبني الثول لان صافنة بوجهه ،،اخذت الكلاص من ايده واني أنفض من الاعصاب

-سألني على فرح وراح كعد يمها 

بهذيج الساعة حتى فرح حسدتها لان كاعدة وتسولف وياه،،واني أخاف احجي وياه وأجفص بسالفة واكوله //ترى أني مخبلة بحبك وأفشل نفسي

-من بلغونا البنية جايبة ومخطرة بالمستشفى يابه بهذاك اليوم عذاب الضمير أكل روحي

اهمداني شجاني ودعيت عليها 

خطية ابنها شنو ذنبه

-وبيوم الكالوا ماتت،،لو ميتة أني بدالها أحسلي

-روحي تلوعت من كثر القهر والبجي حسيت نفسي اني سبب موتتها 

واني بداعائي عليها كون تموت هي ماتت حسيت نفس اني مجرمة اااي لان أني قتلتها بسبب دعوتي عليها بالموت

-ومن هذاك اليوم أحوالي تبهذلت ،،

أخلص أغلب يومي بس أبجي 

لا اكل مثل البشر 

ولا أشرب نفس خلق الله 

حتى من انام احلم اني اخنك بالمرحومة واموتها

-عذاب الضمير شل حالي ووقف عندي الحياة 

أتجهت لرب العباد بالدعاء ان يريح روحي شكثر صليت وقريت قران

وكله أهدي لروح ألمرحومة اريدها بس تسامحني ...

-وبعرس فرح ومحمود ،،

شكثر توسلت باأمي مااروح لبيت عمي 

بس هي ما قبلت الا اروح وياهم 

لان ما يبقى احد بالبيت

-من صعدتله العشى فوك ،،وقشمر عليه

علساس عمي أحمد وياه وطلع ماكو 

وطبك الباب ويكلي /شبيج تنكرصين من تشوفيني 

خفت من عنده شريد أكوله //اني دعيت على مرتك بالموت وماتت بسبب دعائي عليها 

-وانوب هو تعصب ويصيح اطلعي،ما اطلعي

واني خفت وانثولت اريد بس أحجي واكوله 

السبب ليش انهزم من أشوفه بس لساني انعكد بالكوة طلعت مني كلمة سامحني 

-واني ابد ما انزع الحجاب كدامه 

جنا كاعدين بغرفة خالتي فاطمة 

أنطتنه صوغات وكالت// شمري حجابج 

الولد ما يدخلون غرفتي 

-شو هو شافني وما اعرف شبي 

يريد ياكلني بعيونه 

لبست حجابي ونهزمت للهول 

-ومن هذاك اليوم خلصت يومي 

كله اقرأ قران 

واصلي واهدي لروح ألمرحومة 

لان دخلت غرفتها ،، وخليت عيني على رجلها

-اقرأ قران وابجي 

ومن اهدي للمرحومة ابقى ابجي واسولف وياها اكلها //سامحيني مو قصدي أذيتج بدعائي ما جنت اعرف رب العالمين راح يسمع كلامي ويموتج 

-من الاخير صرت شبه مخبلة 

بس ابجي ،، واقرأ قران وأصلي

-امي وابويه كاموا يودوني للشيوخ يرقوني كالوا //هاي خايفة بس هم ما يدرون بيه اني قاتلة ،، ومجرمة 

-بيوم خابر محمود على ابويه 

كالوا الطفل انسحك 

وعمي عادل متخربط لان هو ساحكه 

-هاي الحادثة جانت القاضية اليه 

اني بسبب دعائي على ام الطفل ماتت

لو عايشه جان الطفل ما صار بي هيجي 

-بسرعة امي واخواتي جمعن كم قطعة ملابس 

وكل واهلي وعمامي طلعوا لبغداد 

-طول الطريق ابجي على روحي 

وابجي على هذا الطفل المسكين الصار يتيم بسبب حقارتي وأنانيتي 

-وصلنا لبيت عمي كسرنه الباب 

وووين يلا طلعتنه فرح

بس شنو منتهية ومبين عليها مريضة 

ابويه وعمامي راحوا للمستشفى 

واحنا بقينا يمها

اباوع بيتهم نظيف يلمع 

بس الهول مابي فراش 

سألت فرح كالت //الزوالية موجودة بغرفة امي بس فرشيها ما لحكت خبصتني الحادثة 

-كمت اني وامي فرشنا الهول 

وشعلت الصوبة 

وامي لكت ملابس بالحمام غسلتهن 

-خطية غداهم بعده بجدورته ما مصبوب 

سألت فرح// شسوي عشه 

كالت//هو اكل الغده صبي 

ومن يجي أحد سوي بعد وياه تكلاه

فرح/بقيت بس مجطولة الصخونة كسرتني

انوب تلفون أمي فاطمة خلص رصيده 

وامي سهام والبنات ما عدهن تلفون لحتى

نتصل ونعرف شنو اخبار ابويه واسلام 

-امي ومنى كملن النقص من شغل البيت 

والبنات الصغار كاعدات بالهول ويلعبن بيناتهن محيبس بس يطلعن صوت امي تعيط بيهن // عيب صوتجن احنه مو بيتنا 

محمود /الف الحمد لله ،،

رب العباد استجاب لدعوات الجميع 

واسلام ما ظهرت عنده اصابات ثانية 

-أمي يمكن حجيها صدك 

واتوقع هاي نظريتها صحيح

تكول/ الطفل اذا وكع لو تعرض لحادث

الملائكة تشكف عنه وتحمي وتخفف عنه الأذية ،، وكل طفل بسبب براءته رب العباد يوكل بحمايته ملائكة تحرسة وتحمي 

-اشوف الحجي وعلاء تلفوناتهم أنخبصت

والحجي يحجي بالتلفون ويباوع بوجهي

وابدد ما حجه ويايه بكلمة وحده 

شو شحط ام علاء من يم الطفل 

وكلهم سلموا وترخصوا وراحوا

-امي كالت /زعل الحجي لان كتلت رفل

-ابويه تخبل ليش تضربها 

سولفتله شنو الصار 

هو و امي شكثر لاموني 

بس من سمعوا ليش ضربتها سكتوا 

وابقى يهز براسه هزة أسف 

-عمامي دخلوا علينا ثلاثتهم

باسم ،،محمد ،،وأحمد ،،

هنا حسيت بعزوة و وكفة العمام وسندهم 

سلامهم وكلامهم ويصبرون بابويه 

ويكولون/ هاي كتبة الله

وهذا قدر مكتوب عليه وعليكم 

والحمد لله من الولد طيب وما عليه شي لان طفل يلتم عظمه بساع وعادي يطب ويرجع يهوس كدامكم ويلعب ،،

-شفت وضع ابويه بوجود أخوته 

وكلامهم الزين هدأت نفسيته

-طلعنا وبقينا كاعدين برة عيب كلنا واكفين جوه بردهة نساء

الحمد لله اسلام نايم 

وامي بقت يمه جوة 

-ويجينا اركان يركض خطية من شاف عمامي عباله الطفل مات 

اركان/من وصلت للمستشفى 

ونزلنا اني وسعدون ودخلنا 

وشفت ابويه وعمامي ومحمود مجمعين كلت يا حافظ اسلام مات 

ومنتظرين يكملون شهادة الوفاة

-يااابه ممنوع واحد منكم يكلي وليدك مات 

رحت لكربلاء ونخيت العباس بكلب عطشان وكلت لروحي ارجع والكاه سالم ما اتوقعت الكاه رايح من ايدي 

صرت اعيط وابجي وصوت صدى بالمستشفى يرجع وياي

محمود/طفرت عليه لا يوكف كلبه لو ينجلط 

-شبيك كول يالله هذاك جوه مابي شي نايم 

اركان/محمود بداعت امي وليدي مابي شي

محمود/اركااان شبيك كول ياااا الله مابي شي وداعت امي 

دخلوا للعملية والحمد لله نجحت 

وان شاء الله بعد ما عليه اي خطورة 

اركان/اركز بكل كلمه يكولها 

-سجدت بالكاع وحمدت الله وشكرته بجيت بسجود لحظه خشوع وأمتنان لرحمة الله التي وسعت كل شي

-عمامي سلموا عليه وتحمدولي على سلامته

- سلمت على ابويه وبجيت بحظنه 

ألبزر غالي على ألابو ويكسر الظهر فقدانه

-دخلت شفته لو أنصدمت بحالته 

وامي تهدي بي وتكولي // يمه الحمد لله بس طيب ويتنفس الهواء يرجع ويصير زين بس انت لا تخوفه 

-الساعة ب ١١ كالوا// اطلعوا فقط المراه تبقى وياه وهم حظر تجوال روحوا لبيوتكم

كلبي ما أنطاني أتركه عاندت وياهم 

محمود/شوف خويه ادري مو هين عليك 

بس وجودنا هنا ما بي معنى 

وباردة ماتكدر تباب بره

ومامسموح تبات داخل لان ردهة نساءنتوكل نرجع للبيت ونجي من الصبح واني وصيت اصدقائي اطباء الخفر 

والممرضات عليه ،، وامي بعد يمه 

وانت أترك تلفونك يمها 

كل شويه نتصل عليها ونطمئن 

وان شاء الله ما عليه شي 

-رجعنا للبيت 

وابويه كال//أختنك من المستشفى اطلع وياكم

أركان / يمه شوكت ما اتصل عليج تجاوبني 

اذا مارديتي لو بنص الليل اجي عليكم 

لا يخوفني حظر التجوال ولا يردعوني الامريكان 

محمود /رجعنا للبيت ولكيت خاله سهام 

والبنات موجودات

خطية صبن العشى ،،وقامن بواجب الكل 

-بس لاحظت فرح ماكو

اركان/اول ما وصلنا للبيت فتحت النا الباب خاله سهام من دخلت شفت الهول مفروش 

والبيت نظيف 

-شفت البنات الصغار يلعبن بالهول

والحلو يسلمن علينا ويسمني اني ومحمود عمي 

-صعدت الغرفتي بدلت ونزلت

سمعت خالة سهام تسولف بالمطبخ

دخلت واشوف منى موجودة 

وهم تبجي خررب حظج كل مااشوفج تبجين

-اني سلمت عليها ،،شلونج بنت عمي

منى/اني زينة ،، الولد شلونه بالي يمه

اركان/الحمد لله احسن 

شدة ورب الرحمة نجاه منها 

-هاي صدك مخبلة تحجي وتبجي

وخالتي تخزر بيها 

-شويه وصبوا العشه 

تعشينا كل أحنه الزلم بالهول 

وهن البنات كالن // تعشينا من أول ما وكع الليل 

محمود/يابه من رخصت الجميع تعبان ومتكسر اكوم انام 

مسيت على جميع 

ورحت لغرفة فرح

-شعلت الضوة وبدلت ملابسي

أجيت أنجطلت على الجرباية اريد انام راسي صاير طبل وتعبان لدرجة التكسير 

مديت ايدي عليها اريد أحظنها صار هواي مواصل يمها تفاجأت صايرة قطعة من جمر مصخنة وتنفض نفض 

-فررح ،،فررح ،،شو بس فتحي عيونج 

-خرب حظ الفكر هذا اليوم شكد منحوس استغفر الله ربي العظيم 

كعدتها بالكوة //شو كومي ويايه للحمام خل أغسلج

فرح/الصخونة كسرتني تكسر 

مادري لان بردت من غسلت الفراش 

لو لان أنهبطت على اسلام 

لو من ضرب محمود اليه بدون ذنب

-حسيت بي يكعدني واني شايلة بكلبي عليه 

نفضت ايده بقوة و وخرت من عنده

كمت بالكوة وطلعت من الغرفة 

رحت للهول على امي وخواتي نايمات 

وابويه وعمامي نايمين بالديوانية 

-كعدت أمي واخذتني للحمام وغسلتلي 

كالت//هاي الصخونة لان أنهبطتي 

حررتلي الورد وشربته

ورجعت نمت يمهن بالهول

محمود/ما تفاجأت من دفعتني 

بس الشي الصار مو بيدي لان فقدت اعصابي

وضربتهن أثنينهن 

عرفتها زعلانة ومتريد شوفتي 

انوب حتى النوم طار من عيني 

-يادوب غفيت لوجه الصبح دك تلفوني كعدت مرعوب بالي أسلام 

-أباوع هذا رقم الحجي 

رديت عليه مطفي وصوتي قافل من النوم 

حجي نافع/يابه بس ردت أبلغك

مريتك بالمستشفى وتنزف 

يكولون لازم يسولها عمليه ينزلون الطفل لان ميت بطنها ومفصول عن المشيمه ..........

-

-

-

-

-ألى متى يستمر ظلم أدم ......لحواء ؟؟؟؟

شكرا لزيارتكم عالم روايات سكيرهوم