رواية اغفري لي الفصل الواحد والعشرون بقلم أوتار حزينة
ليلى
باوعت اله من طب جان طالع يخبل
لابس سيت كله اسود تارس على جسمه
انيق وجذاب كلش الكل وكف
يمه يبارك اله بس
هو عيونه تباوع عليه بنفس ذيج النظرات الي تلعب بروحي لعب نزلت راسي اريد
ابجي من فرحتي بي
تقدم وصار يمي وقريب اني منزله راسي ماحجه شي وطول رفعت
عيوني اله شفت بعيونه قصتي اني
ويا وشلون انتهت بهل اللحظه
مد ايده وشاالني
لفوك افتر بيه بهدواه مبتسم والفرح
بعيونه الهلاهل علكت
نزلني ولزم وجهي صافن بعيوني بوجه
احمر دم ردد بخنگه
«،،،،واخيرا صرتي حلالي
باسني من راسي وحظني لصدره بقوه
بجيت بحظنه اسمع دگات
گلبه ادك نفس دگات
گلبي
وخر بصعوبه مني بس ظال لازم خصري
عيونه دمعت ومسحها امه حظنته تبجي وتبوس
بي ماما هم اجت حظتني تمسح بدموعي وتردد
«،،،لاتبجين افرحي بي وخليني افرح بيكم
وهذا الصار هو طلع وعشت لحظات فرح
وي اهلنا ووي غاده الي نست
وضعها وعلكت الجو وي
صديقاتنا
رادني ارگص وياهن كمت شويه ورجعت لان خجلت كعدت فرحانه بي كلش ومو مصدگه
اني صرت اله وقصتنا انتهت
بعقد وهاي هسه حفلتي
اني ويا
اشوف الكل فرحان ويرگص واذكر شسوه
وشلون شالني وافتر بيه فرحان كلش واني هم جنت مثله وره مشوار
الحفله خلصت غاده اجت لابسه عبايه فوگ
فستانها بوستني وكالت
«،،،راح اروح
شفتها مو على بعضها سالت
«،،،بيج شي
ابتسمت بس انتبهت عيونها غوركت ردت
«،،،لا مابيه شي لازم اروح لان تاخرنا كلش
وجعفر واكف بره
«،،تمام حبي
بوستني مره اللخ بجت بس مبتسمه
«،،،،مبروك ياروحي والله ماتعرفين شكثر
فرحت الج لان اخذتي الي حبه
گلبج
عيوني غوركت وروحي انمردت عليها لان جنت
اعرفها تحب معتصم بس الگلب خذلها
وخلاها تروح لحمزة
«،،،يله اروح
حجت هيج كلت
«،،،،باي حب
ماما اجت عليه مبتسمه كالت
«،،،كومي وياي قائد يريدج
گلبي كام يدك سريع،،،ومن
تشوفه عيوني كلشي يختلف بي
مشيت وياها للاستقبال طبيت
خجلانه منه جان كاعد
وحده كام من
شافني وابتسم والنظرات صارت
بوكاحه ماما حجت
متاثره
«،،،مبروك ماما ويوم اشوف ولدكم بحظني
اجه باسها من راسها حظنته تبجي
عيوني غوركت وخرت منه تمسح بدموعها
رددت
«،،،مااريد ابجي اليوم اريد افرح بيك وبيها
«،،،اي لاتبجين خاله شوفي بنتج راح تبجي
ويسيح المكياج واني بعدها عيوني
ماشبعت منه
ماما جاوبته
«،،اي والله وحرامات يروح لان بعدنا مااخذنا
صور
باوع عليه وصفن ردد
«،،«ولو هي بدون مكياج ولاعبه بروحي لعب
النوب خلت احمر والعيون تگحلت يمكن راح
اتخربط يمج خاله ويركضون بيه اهلي
مثل ذيج المره
«،،،لا يمه اسم الله عليك لليكرهك
اريد ذيج النومه
«،،اامين
جاوبها وسكت كالت
«،،راح اشوف سعاد خطيه ماسكتت من فرحتها
بيكم
طلعت من يمنا باوعت الها سدت الباب
درت وجهي علي شفت نظراته
الي خلت حالي يتخربط بعد
اكثر كلت
«،،قائد اكعد راحه
تقدم رجعت ليوره رد
«،،كعدت خمس سنين وبعد ماعندي صبر
«،،حباب لاتخوفني منك
ضحك ورد
«،،اني مااخوف اني ارنبوج الاليف
«،،لاا والله هسه كاعد اشوفك اسد
مفترس
«،،ههههه
خرب ضحك وجان يگول
«،،هاا خاله
انداريت ماكو ،،،،،، بلحظه شالني
وحظني لصدره ردت ااحجي بس
ماخلاني باسني ولمني بقوه مثل
واحد يريد يخلي الي يحبه بين
ضلوعه،،،، ضعت ودخت
وحسيت بذيج المشاعر الي
جانت تجمعنا بذيج
الايام
وخر وره لحظه ولزم وجهي بايده باسني
من عيوني وخدي ورجع باسني
من الشفه وهم لمني
بقوه لحظنه
وخر وكال
عطبت ولج واشتعل جدي السابع عشر
افتهمت وسحبت روحي منه وكفت
مسافه خجلانه منه ومن نفسي
لان نسيت روحي ويا
رفعت عيوني اله مبتسم والوجه دم
والفرح بعيونه تقدم كلت
«،،،،قائد كافي تره والله راح اتخربط
وكف بس الخباثه بعيونه ردد
«،،،بذيج الليله شراح يصير بيج
سكتت تقدم رجعت وصحت بي
«،،،شلون يعني تريد توكف گلبي
«،،،ههههه يمه اسم الله على كلبج
ابتسمت من رد هيج اشر باصبعه
وتوسل
«،،،بس وحده اللخ واروح
«،،ابدا كافي وعيب لايجي احد
«،،،خلي يجي ابوج انتي صرتي حلالي منو
بعد يكدر يمنعني منج غير اخلي
طلقه براسه
«،،،،استقر عيني
جاوبته ورد بوكاحه
«،،استقر موو
«،،،اي
هد عليه الباب اندك وانفتح هو وكف
ضحك وكال
«،،،فلتي ولج
ماما طبت وامه
والبقيه سوه النا حفله صغيره
واخذنا صور
وراها تعشو يمنا من راح خابرني وعشنا
ذيج الايام الحلوه بس الفرق
اني هسه مرته
غاده
جعفر اخذنا لبيت ليلى اني ورانيه
وخواته بتول ورحمه طول الطريق مخنوكه
ومقهوره لان راح اروح لهناك ماجنت
اريد اشوف احد من اهلي
ولا من الجوارين
اعرف بعدهم محد نسى الصار بي وشلون
اهلي تخلوه عني حتى يخلصون
اخويه من الموت
بس جان لازم اروح لخاطر ليلى لان هي
ماتخلت عني ووكفت وياي بالحلوه
والمره وجان لازم اوكف وياها
بهل اليوم لان اعرف هي
ماعدها غيري مثل
مااني هم ماعندي
غيرها
رحنا للصالون رانيه وياي لان رادت
تخصل شعرها احمر هي وليلى سوالي واهس
وخصلت شعري ثلجي وسرحته
على طوله كلها كالت
طلع يخبل عليج لان اني بيض بنيه
خلتي مكياج ورسمت عيوني
هن كبار ومن كحلتهن
طلعن حلوات كلش
لبست فستان لونه احمر مقسم
بالمهر ماالتها شفت عيون الجوارين عليه
ماما كاعده هي وخواتي ومبين
عليهن الحزن طلبن
مني اروح اشوف بابا ومعاذ ماقبلت
ورفضت
بليل من خلصت الحفله
هم لحت عليه وكالت اخوج مو زين ضغطه
كاعد يصعد ويريد بس يشوفج
جاوبتها باستهزاء
«،،،هم بعدج تفكرين بي وما يهمج لا شعوري
ولا السواه بيه وانتو ويا
سكتت كملت بعصبيه
«،،،بعدكم تريدوني اني الي اتنازل لخاطر استاذ معاذ وانتو شفتو بعيونكم عيون الجيران شلون تباوع عليه بعدهم مانسوا السويتوو
بيه من وراه ولا اني راح
انسى
مريم حجت
«،،غاده تره معاذ تندم وعايش بالندم من وراج
«،،بعديش مريم بعد مادمر حياتي وهو
عاش حياته وي الي اختارها
وانطاني اليه اني اخته
حتى ياخذها
سكتت وكملت بخنگه
«،،هذا الموضوع بعد مااريدكم تحجو ويايه
ولاتخلوني اتعامل وياكم مثل
قبل
حجيت هيج ومشيت من يمهن طبيت
للمطبخ رانيه اجت كالت
«،،جعفر اجه ولازم نروح
«،،اي
رحت سلمت على ليلى وطلعنا من يمهم
رجعنا وي طول الطريق ساكته اسمع رانيه
وخواتها يحجون باعجاب على
الحفله والترتيب
وصدك قائد ماقصر ولا عمو فاروق وسوه
شي كلش حلوه وخلوه الناس تحجي
بي ماعدى المشايه الي
اجت ترست الفرع والشارع الرئيسي
تذكرت من اجوي وعقدولي على
حمزه هم هيج رادو رفعه
راس اليه بعد ماكسروها
من وره زهره
وصلنا نزلت هو ورانيه راحو يوصلون خواتها
رحت للمطبخ ماكو احد مشيت
لغرفتي طبيت وسديت الباب
ورايه ذبيت عباتي
ورحت وكفت كدام المرايه اباوع لروحي
شگلي متغير كلش وطالعه حلوه
بس ماعندي حظ
ذبيت حسره مشيت ااريد اخذ هدوم
وكفت من انفتح باب الحمام
وطلع هو ينشف بشعره
رفع راسه من شافني صفن والنظرات
تغيرت درت روحي بسرعه
حمزه
عگبت للديره لان صار شغل ولازم اوكف علي
وصلت بليل طبيت وره العشه حبوبه كاعده هي وعمتي بغرفتها سلمت ورحت الها كامت بوستني
وكالت بعتب
«،،ليش هالغيبه يمه مو تعرف بيه مااكدر
بلياك
«،،شغل يمه وجان لازم انه افضه
حجيت وسالت
«،،وين جعفر
«،،راح يجيب البنوات من حفله البنيه صديقه
غاده
عمتي سالت
«،،متعشي يمه
«،،،اي عمه متعشي
«،،تريد جاي
«،،لا اروحن اغسل واتمدد تعبت من الطريق
«،،،اي يمه روح اغسل وارتاح
حبوبه جاوبتني مشيت من يمها طبيت غرفه
غاده سديت الباب ورايه وصفنت
على كلشي بيها
رحت لعطورها اخذت شيشه صغيره
فتحتها وشميتها بنفس
طويل اذكر من حظنتها لصدري وشميت
ريحتها ،،،،ذبيت حسره ورجعته
لمكانه
رحت للكنتور اخذت ملابس اليه سديته
تمشيت للحمام طبيت غسلت
وطولت اريدن ابرد
راسي المشتعل من وره الافكار والقهر
الي ترس گلبي
طلعت من الحمام انشف بشعري رفعت راسي
صفنت من شفتها گبالي وبغير
خلقه دارت روحها
بسرعه وانطتني ظهرها گلبي مدري شصار
بي كام يدك بجنون اعاين للشعر
نازل لمتنها وصابغته والثوب
احمر دم ولايك
وي الابيض
تمالگت روحي بصعوبه سألت
«،،،جعفر اجه
اندارت والعذاب زاد من شفت العيون
شلون مكحله جاوبت
«،،،راح يودي خوات رانيه
فاتت من يمي تريد تروح للحمام سالت
اريد ابقيها چدام عيوني واشبع
من هالخلقه
«،،،الحفله جانت حلوه
«،،،اي
جهازها دك راحت طلعت من الجنطه مشيت
للميز وكفت اعاين الها بالمرايه
كالت
«،،،اي ليلو فوك خليتهن بالخانه القريبه من
الباب لگيتها يله لعد اروح بلي
حبي
سدت الخط تجنب تباوع عليه راحت
شالت هدومها وكل نظره الها
هي عذاب اليه طبت
وسدت الباب
صفنت علي وكلت بحسره
«،،وبعد وبعد يبو جمره الا تشبع قهر وضيم
مادام حبيتها وعشگتها راح يعطب
افادك وتحترك بنار انت
تريدها وهي
لااا
ليش رجعت مو جنت مگبور هناك اجيت
حتى اشوف هالعذاب واتحسر
سكتت وكملت من رحت كعدت گضيت
گلبي يدك بجنون حاجيته
«،،كافي وارحم روحك وارحمني ولاتحب الي
مايحبك بنات حوة هوايه واكيد
راح توكع بحب وحده
تشوفك مثل
ماتريد
عاينت للباب كلت بقهر والم ووجع
««،بس والله مااريدن من بناتها غير غيده
واريدن عيونها تشوفني مثل
ماتشوفها عيوني
ابتسمت بالم وكلت
«،،تحلم يبو جمره تحبك او تشوفك بهل العيون
لان انت تعرف شسويت بيها
وشعملت
كمت ومشيت بثگل اخذت الجكاير
وجهازي والسويج وطلعت من يمها رحت لغرفتي
تمددت هناك وهم النوم جافاني لا
هناك شبعت نوم ولا راح
اشبع مادام تولع
گلبي بعشگها
ليلى
بهل الليله سهرت وي قائد نحجي على حفلتنا سأل
«،،،الحفله جانت حلوه موو
«،،اي انت ماقصرت بشي وبابا هم وسويتها
كلش حلوه
«،،،وانتي هم طلعتي تخبلين
«،،وانت هم طالع حلو وانيق كلش البنات
كالن عليك مبين معتني بروحه
ويلعب رياضه
«،،احم راح اصير مغرور واشوف نفسي عليج
«،،،استقر عيني لااطنگر عليك
«،،هههه عفيه طنگورة براس خشمج
«،،اي لان ضجت من كلامهن وغرت كلش
«،،بله صدك غرتي
«،،اي والله وخفت لاااتنحسد
«،،ههه بخريني بحرمل وملح
«،،كلت لماما هم هيج حجت كالت من يجي
ابخرج انتي ويا
«،،،بله صدك تحجين
«،،اي نعم
«،،،بخري عيني انتي واامج لان نسيبكم
حلو وعنده فلوس
«،،مااريد فلوسك اريدك بس الك
سكت بعدين سال
«،،تحبيني ياشريان گلبي
«،،،سؤال سخيف بس راح اجاوبك اي
احبك واموت عليك
«،،اوف كون يمج حتى ابوس هالشفه
الحلوه
سكتت ضحك وكال
«،،الو حب
«،،،هياني اكلك
«،،،كولي حب قلبي
«،،ذوله منو اي علگو الجو بالكراج وبره
من طلعتو
«،،اخوتي وحسين تعرفي صديقي القديم
ومهيب هم صديق قديم
وربعي وناسي
«،،هاا ابو علاوي ازوج
«،،اي ازوج ولا دكولين ابو علاوي اغار
«،،،صار ادلل
«،،،اي هيج صيري عاقله واسمعي الكلام لان صرت
رجلج رسميا يعني شاحجي
بعد بس ادكولين اي
وانتي ساكته
«،،استقر قائد لا احضرك
«،،هههه
ضحك بصوت ابتسمت سال
«،،،اكلج شخبار غاده
ذبيت حسره وحجيتله قصتها انقهر
وكال
«،،صدك تحجين
«،،اي تعرف قائد هي من رجعت لهنا ماعافتني
ولا لحظه ظلت وياي ايام طويله
تحجي وتحاول اطلعني
من الحاله الصارت
بيه
سكت بعدين سمعت طگه جداحه
سأل بصوت متغير
«،،،احجيلي الصار
«،،،لا عوفه خلي يولي مااريد احجي بالماضي
«،،،اني اريد اعرف
«،،راح تنقهر وتضوج
«،،ليلى احجيلي كلشي مااريد اي شي
يظل بگلبج طلعي يمي حتى ترتاحين
«،،،مو بهل اليوم قائد خلينا فرحانين بي
«،،،يولي كلما اسالج تتهربين منه واني
اريد اعرف شصار بيج وره ماهجيت اريد
اعرف كلشي طلعي من گلبج
حتى ترتاحين واني
هم ارتاح
ذبيت حسره وجاوبته واشوف
الصار بيه بذيج الايام
بين عيوني
«،،بعد الصار والسويته بروحي بابا ماظل هناك بس صرت زينه شويه رجعنا لبيتنا هذا رغم هو جان
مهدد بس مادار بال كال خلي اموت
بس بنتي مايصير بيها شي
وذيج الجماعه الي هددته ربك سلط
عليهم ناس اقوه منهم ولعبو بيهم
طوبه ومن الله ابتعدو
عنا
«،،،الحمد لله
رد بصوت مخنوك كتله
«،،،خلي نعوف هالسوالف
«،،،لا احجي اريد اعرف شصار
سكتت بعدين كلت
«،،،السنه الي صار بيها هالشي اني ماكدرت
اكملها لان حالتي صارت فد مره
واحتاجيت سنه كامله
يله كدرت اوكف على رجليه بعد تشجيع
من بابا وماما وهي الي تركت
سنه علمودي حتى نكمل
سوه
اخذت نفس وذبيته كملت
«،،اني ماطلعت معدل زين لان جنت بعدني
تعبانه من الصار وهي هم طلعت
معدل قليل دخلنا معهد
صيدله لان هي دخلت اله لان ماكدرت تروح
اهلي وظليت وياها،،،تخرجنا ورة سنتين
وبابا كدر بفلوس يخلينا
نتعين اني وياها وحياتي مشت بس جنت انت
ماكو بيها وهذا النقص والي
صار بيه جان مخلي عيوني
يوميا تبجي وتعتب
عليك
جاوب بصوت متغير
«،،،لو ميت لا مسوي بيج هالشي
«،،لااا لاتحجي هيج والله گلبي يگوم
يوجعني من اسمعك تدعي
على روحك بالموت
«،،اذيتج جثير ليلى وراح اعيش بذنب السويته
بيج طول عمري
«،،،لا مااريدك تعيش بالذنب اني سامحتك
قائد لان احبك كلش،واموت
عليك
«،،اوف ياربي اني شمسوي بدنياي حتى الله
ينطيني هيج ملاك ويحبني
ابتسمت وجاوبته اربد اغير الجو
«،،حظك جبير ابن سعاد
«،اي والله حظي،جبير وعندي بخت يم
الله تصدكين جنت ادحك لوجهي
بالمرايه اسال روحي
هالبنيه شافت مني حتى تحبني اشو
وجهي اسمر اجلح وجنت عود
يابس
اذكرت اول مره شفته من تعارك وياي جاوبته
«،،،تعرف اني عيبت عليك بالبدايه بس
بعدين ربك وكعني على وجهي
وخلاني احب استاذي
الحلو
«،،،تذكرين ليلى شلون جنت ادرسج
«،،،اي اذكر كلشي مو ناسيه واذكر شلون
جنت شالعه گلبك من وره فهمي
البطيئ
«،،،اي اذكر جنت اطلع من يمج اردد ام راس
الثكيل راح تشلعين گلبي وساعه
السوده من گلت اي
راح ادرسج
«،،صدددك بله هيج جنت تحجي
«،،الصراحه وبدون كذب ومجاملات اي
زعلت وكتله
«،،،قائد بطلت راح ادزلك الحلقه
«،،،لا بله مو هي لعبه اكعدي واسكتي،ولج
شتريدين هم يصعد ضغطي
خفت وجاوبته
«،،لا اسم الله عليك مااريد اشوف هاليوم
ابدا
«««اي استقري ام طنگورة لا اشوفج شي مو
شايفته تريد ادز الحلقه
واني هسه خليتها باصبعها ومو مصدك
هي صارت حلالي
كلت
«،،،قائد مااريد بعد نحجي بهل الموضوع
اريد ننساه اني،وانت ونعيش
حياتنا مثل ردنا
«،،،صعبه انسى السويته بيج لان تأذيتي
من ورايه
«،،،هو صح صعب بس لازم ننسى ونخلي حبنا
ينتصر يعني اني مااريد نذكر
الماضي اريد اعيش
وياك بالمستقبل
ونعيد ايامنا
الحلوه
«،،وراح نعيدها ليلى وتصير احلى بعد من
نصير اني وياج بيت وحد
صدك تعالي جاي اني مااعرف شلون
راح اكعد وي اهلج يعني اني اريد اخذ راحتي
وياج ويم اهلج راح اتقيد ومااكدر
كلشي اسوي
«،،اي عادي ذاك بابا وخالتك روح خابرهم
وكول الهم انت تراجعت بكلامك
«،،،ها لا شلون ارجع بكلامي وياهم عيب
انتي كولي الهم
«،،،اني اريد اكعد وياهم وماعندي مشكله
«،،ولج ماراح ناخذ راحتنا اريد العب بگيفي
وو
قاطعته
«،،،قائد راح احضرك
«،،هههه لا بداعه ابوج الحلو
ابتسمت كمل
«،،ياشريان گلبي اريدج بس الي اناني اني
بحبج ومااريد اي احد يشاركني
بيج
«،،،،اعرف بس ذوله اهلي وماعدهم غيري واعرف
هم مايتحملون فراگي وانت شفت
بابا خله هذا الشرط حتى
ابقى يمهم
«،،ابوج لعبها صح شافني شسويت وشلون
وكعت وجعان وكال خلي استغله
واني جنت مو مصدگ بسرعه
كلت اي
«،،هههه بابا تاجر ويعرف شلون يستغل الفرصه
«،،ااي كوو
عرفته شيريد يحجي صحت
«،،قاااائد
«،،احم خوش رجال وعلى راسي
«،،،لسانك هذا الزمه وبطل كلام سوقي
«،هههه والله مااكدر يله راح افشر بالالماني
«،،غير لو يستقر عيني عرفناك تحجي انكليزي
والمانيا
«،،وشويه فرنسي لان حبيت اللغه
«،،خاف حبيت بناتهم
«،،ههه لا هن حبني
«،،،قاائد راح اجي اذبحك والله
«،،اوي هاي شبيج صايره كلش اوفر وماتحبين
شقه
«،،،هيج شقه مااحبه
«،،تغارين
«،،،اي اغار واموت من الغيره ومااريدك
هيج تحجي لااشوفك زعلي الي
من صدك
«،،،لا يابه خلي يولي هالشقه كلشي ولا تزعلين
ياشريان گلبي غير اظل انسحل
واسحل روحي حتى بس
ترضين
ابتسمت وجاوبته
«،،،اي جر عدل
«،،جريت وغصبا من على شورابي بعد شتريدين
«،،اريدك الك
«،،اجي
«،،هههه مخبل
لاول مره عيوني تغفي واني مبتسمه لان
الي ردته صار زوجي وحبيبي
وماجنت اريد من
هاي الدنيا
بس هو
غاده
نمت مقهوره من ماما وخواتي لان لحن عليه
هوايه حتى اروح واحجي وي معاذ
وبابا ،،نفس الشي ماتغير
بعدهن يدورن راحه اخويه
ويريدني انسى شسوو
بيه
نمت دمعتي بعيوني
ثاني يوم الصبح جان ماعدي دوام صادفت
جمعه كعدت غسلت وطلعت
للمطبخ
الحجيه كاعده وعمه ورانيه تفتر وتحضر
بالريوك كلت
صباح الخير
ردن عليه
سالت رانيه
«،،،،نسوي بيض وبتيته
«،،،اي وطماطه هم لان جعفر يحبها
هو وحمزه
«،،تمام
بدينا نحضر بالريوك وجنت جوعانه من كمت
اخذ المقويات صارت عندي شهيه
وبديت اكل احسن من
قبل
كملنا كلشي وريحه الخبز مال التنور من
حمينا شگ خشمي جعفر اجه
من بره سلم وكال
«،،،اليوم الجو دافي
«،،،،اي كسر البرد
الحجيه جاوبته سال
«،،،حمزة ماكعد
«،،اي كعد راحت رقيه تصيحه
كعد يم رانيه واني كعدت يم الحجيه
عمه اجت وراها هو لابس تراك
وهم خال على راسه
كبوس سلم وكعد
وريحه الجگاير فاحت جعفر ساله
«،،،شلون الولد بالبصره
«،،،زينين ويسلمون عليك
«،،،الله يسلمهم بس خوش روحه رحت
هالمره
«،،اي
جنت اكل ومندمجه بالاكل اكلت ماعوني
كله وطيرت كرصه كامله رانيه
سالت
«،،،اليوم شراح نسوي غده
«،،،نشوي سمج
من سمعت رد جعفر رفعت راسي وعقجت
خشمي شافني ضحك وكال
«،،،،صدك انتي ماتحبين لسمج
«،،،،لا سوو راح اسوي دولمه لان مشتهيتها
جاوبته باريحيه لان تعلمت علي وشفته
من صدك اخ اليه لان من راح حمزه
ماقصر وياي باي شي
عيوني راحت اله،،لان
جان كاعد بصفه ورانيه من الجهه الثانيه
صافن علي بنفس النظرات الي
ماعرفت افسرها
كام وكال
«،،،،اني رايح للغرفه من تكمل تعال يمي
«،،،تمام
مشى من يمنا وراح رانيه حجت بضحك
«،،ولج اول مره تخلصين ماعونج كله
«،،،ماادري كعدت جوعانه كلش
جعفر كالزمبتسم وعيونه عليها
«،،وانتي ماعونج هم خلصتي اكيد هم
جوعانه وفاحط افادج
غمز هي خجلت دفعته وكالت
«،،،كوم روح ليم ابو جمره مدري شيريد منك
«،،،هههه كايم بويه لادفعين شلون
نسوان ماتحب شقه
طلع من يمنا يضحك الحجيه كالت
«،،الله يسعدكم يايمه ويعوضج عن الراح
«،،،امين يارب
ردت وذبت حسره الحلو بيها مزاجها بسرعه
يتغير يعني ماظل حزينه على طول
ترجع تضحك وتحجي عادي
اخلاقها وطيبتها
وياي خلوني احبها وادعيلها تصير
حامل عن قريب لان سمعت منها هي كاعد
تراجع يم دكتوره بس ماجاي
يصير
جنا كاعدين من وكت كلت خلي اسوي
حمله على غرفتي جنت اريد انسى وماا اظل
افكر بكلام ماما وخواتي ،،،، نظفتها وعزلت
الكنتور جبت الطابوريه وصعدت
انزل البردات لان صارلهن فتره طويله
مو مغسولات الباب اندك طبت
رانيه شافتني شهكت
واجت بسرعه عليه
كالت
«،،وولج هااي شكاعد تسوين شلون تصعدين
واانتي
سكتت وبلعت السالفه من طبت عمه ماانتبهت
سالت
««،،ها يمه گملتي
«،،اي بس انزل البردات
«،،وخري انه انزلهن
رانيه حجت جاوبتها
«،،،لاا هيانها فگيتهن
نزلتهن كلت
«،،هسه اخليهن بالغساله واجي نسوي
الدولمه
«،،،خلي نسوي جدر صغير لان كالو الولد
نشوي سمج
عمه حجت
«،،اروحن احضر
الجن المواد واثرم الحشوه بين ماتجن
جاوبتي وطلعت رانيه تباوع الها بس
اندارت گرصتني من زندي لزمته
مگان الگرصه وكلت
«،،،ااخ هاي شبيج
«،،ولج شاسوي بيج هسه ماكتلج ديربالج
على ضناج شلون تصعدين على
الطابوريه شتريدين غاده
توكعين ويطيح
الجاهل
«،،لايروح بالج بعيد كتلج ماراح ااذي
هذا ابني قطعه مني قبل جنت اريد انزله
بي بعدين تراجعت من سمعت
كلامج انتي وليلى وهم
خفت من عقاب الله
لان هاي امانه
من عنده
فكت عيونها وسالت
«،،ليلى تدري
هزيت راسي باي وجاوبت
«،،اي بس هي وانتي تدرون
سكتت كلت
«،«اكلج اريد اسوي الدولمه حامضه عندنا نومي
موو
«،،اي عدنا
جاوبتني وابتسمت كالت
«،،بيج ولد
صفنت عليها من حجت هيج كملت
بس بحزن
«،،انه هيج جنت ادور حموضه بابني الي
طاح
ردت اسالها عمتها ليش اذتها وخلت ابنها
يروح منها بس ملامح الحزن والقهر
خلتني اسكت هي كملت
«،،يله كملي ومن تريدين تعليكهن خلي جعفر
يسويهن الج
«،،،،تمام
راحت من يمي اخذت البردات للحمام طلعت
الهدوم من الغساله خليتهن بالسله
وخليتهن بيها وشغلتها
اخذت السله وطلعت من المنور جان
اكو حبال وره البيت وكفت اشر بيهن اخر شي شلت دشادشه حمزة نفضتها وكعت
فلوس هوايه وورق
شريتها وشلتهن منكعات وبيهن مشگوكات
ملعوب بيهن طوبه لميتهن كلهن
رجعت لجوه جنت اعرفه بغرفته ماطلع
رحت ليم الباب ترددت ادگه
بس بعدين دگيته
سمعته كال
«،،،تفضل
فتحته وطبيت جان كاعد على الجربايه
گباله لابتوب باوع عليه
مديت ايدي بالفلوس
وكلت
«،،هاي فلوسك ماادري بيهن وانغسلن
وي الهدوم وبيهن مشكوكات
وتلفن من وره المي
هز راسه ورد
«،،،،فدوه الج جيبهن انه اصرف بيهن
مشيت ليمه مد ايده اخذهن وخلاهن على
الميز الي بصفه انداريت كال
«،،،اجيبلج شي من السوك تتغدين بي
باوعت اله جان منزل راسه يباوع
للشاشه جاوبت
«،،،لا راح اسوي دولمه
باوع عليه تردد بعدين سال
«،،من رحتي لبيت صديقتج خما اخد غثج
صفنت بعيونه من سأل هيج كمل
«،،احد من اهلج غثج ولح عليج بسالفه
اخوج
«،،لاااا
جاوبته ركز بنظراته بعيوني درت وجهي
كال
«،،،انتي ماتعرفين اجذبين لسانج يحجي شي
وعيونج ادكول غير شي
رجعت باوعت اله كمل
«،،انه ماردت اخليج تروحين لهناك عرفت راح
تنغثين لچن هاي صديقتج واعرفج حاسبتها
بحسبه اخت الج وكلت لازم توكفين
وياها بهل اليوم وماتقصرين
وياها بشي
جاوبته بصوت بخنگه
«،،محد غثني واذا صار هالشي اني عندي
لسان واكدر ارده
سكت بعدين رد
«،،،تعلميني بلسانج غاده من ينهد بالعايل عليج
اگبر راس بعد ماراح يكدر
يسكتج
جاوبته بتحدي
«،،وانت كلتها ينهد بلي يضوجني يعني
اقره الفاتحه على الي يخلي راسه براسي
ويبجي عيوني ابجي واقهر عيونه
واخذ حقي بنفس
اللحظه
ابتسم وهو منزل راسه بس حسيتها بهم
وقهر وهالشي مااعرف شسوه
بيه تذكرت كلامي ويا
وشلون جرحته
من وره شگله من جاوب
«،،،وانتي گادره بويه
مثل شي قوي وضرب گلبي بقوه وخلاني احس
بروحي اني وحده مااستحي وبلا
اخلاق صح هو اذاني كلش
بس جان المفروض
ماحجي على
شكله لان هالشي امر الله وحرام الجنت
اسوي بي ردت احجي شي
اكله اسفه لان هيج
حجيت عليك
بس لساني ماكدر يحجي هالشي
درت روحي وطلعت من يمه دمعتي بعيوني
رحت لغرفتي طبيت مخنوكه واريد
ابجي وبجيت لان ماتحملت
اني اذي احد بشي هو
ماله ايد بي
رحت للحمام غسلت لان صرت فد مره
باوعت لروحي بالمرايه حاجيت
روحي
«،،،بله لو اني الله ابتلاني بهل الشي شلون راح
احس
اجه بالي شلون ينزل راسه بين الناس
ويغطي وجهه بيشماغه كله خجل من نظراتهم
الي جانت ماترحمه لان جنت اشوفهم
شلون يباوعون عليه بتركيز
يضوج وباشمئزاز
«،،،،ااخ ياربي والله من قهري منه حجيت
على خلقته والله ماردت احجي
عليه اعيره بشي هو
ماله ذنب بي
صح هو اذاني ودمرني بس هو سوه هيج
لان فقد الادراك من وره زهره واخويه
ومن رجعله عقله عرف خطئه
اعتذر مني وحاول يعوضني
عن السواه بيه
صح ماراح اطيب ولا راح اكدر
انسى بس مااريد اظل شايله ذنب السويته بي
لان اني مو هيج
هم فقدت عقلي من الصار بيه واذيته بالكلام
مثل مااذاني جسديا ونفسيا
بي هسه كلشي اختلف
هو عرف غلطه
واني هم لازم اعرف غلطي واعتذر
منه
«،،غااده
سمعت صوت رانيه جاوبت
«،،اجيت
غسلت وجهي اكثر من مره احس براحه لان راح اسوي هالشي
طلعت من غرفتي باوعت لغرفته بابها مسدود
كلت العصر اعتذر منه مشيت للمطبخ
والتهيت بالشغل سوينا
دولمه وحضرنا كلشي للغده رجعت لغرفتي
غسلت وصليت وراها صبينا الغده
جان كاعد اگبالي وسمجه
گباله ملتهي ياكل
كال
«،،،جعفر حضر روحك العصر حتى نروح
بشغله
«،،،،اي بس شنو الشغله
«،،اكو واحد عارض ماطورات مستعمله اريدن
اشوفهن بلكي زينات حتى اشتريهن
ونستفاد منهن
«،،ها وين
«،،،بالحي الصناعي
«،،تمام بس يفتح اليوم تره جمعه
«،،اي كال راح افتح علمودك حتى تجي
تشوفهن
«،،چا خوش نروح اله ونشوفهن
هم يحجون واني ادك بالدولمه طيرت نص
الصينيه وهم اكلت كرصه كامله
كملت طاسه الطرشي مالتي
اشرت بعيوني لرانيه
على اليمها
ام نفس الدنيا سوت مااا
توسلت بعيوني
طاسه صارت كدامي جان هو كام وكال
«،،،الحمد لله
طلع من يمنا عمه سالته
«،،ابو جمره تريد جاي
«،،،اي يمه
جعفر كام وراه واني نفس وضعي مفجوعه
واكل كملت الصينيه وشلت خبزه
صغيره مسحت الصلصله
واكلتها
«،،الف عافيه يمه
الحجيه حجت جاوبت الك باللگمه
«،،،الله يعافيج بيبي
رحت اغسل فتت من يم غرفته الباب مفتوح
شويه كاعد وهم لابتوب يمه
ويباوع علي
غسلت ورجعت جلفت المواعين ورانيه
تعزل وياي كملنا هي تثاوب واني
هم كالت
«،،اروح انام ساعه وانتي هم روحي نامي
«،،،اي والله لان راسي ثگل يمكن ثگلت
بالدولمه
«،،ههه اي لان نسفتيها كلها
ولج ماادري شبيه مفجوعه هاي من
المقويات وصايره بليل هم اجوع
واطلع ادور اكل
«،،،هاي
سكتت من هو طب كالت
«،،،اروحن انام
طلعت من يمنا مشيت اشوفه راح صب
جاي مره اللخ ردت احجي بس
طلع لبره
رحت لغرفتي تمددت ووغفيت من اثر
اللبن والدولمه الدسمه
يمامه
من شفت هذا الضابط بنفس المكان عرفت
بعده يدور عليه گطعت رجلي منه
وبعد مارحت اله
كمت افتر بغير اماكن مرات احصل دخل زين
ومرات لا والكيبل ينتظرني من
ارجع بالقليل
كمت مااتاثر بالگتل جسمي مات شعوره بالالم
وصار مثل گلبي مايتأثر بس
باختي الي جانت
كاسره ظهري
بليل متمدده افكر بيها لان عذابها زاد بيت
سعيد وصار الگتل يوميا اتعارك
وياهم انگتل من ابويه
وقويدر
وهم ماجزت منها اكثر من مره اتعارك وي
سعيد ومديت ايدي علي بس بطلت
اسويها لان الگواد كام ينتقم
منها من يرجعوها اهلي
علي
باب الحوش انفتح بقوه عرفته قويدر
النگس صاح
«،،،،وولج يمامه نعال وينج
كمت وشلت سجينه وياي
وطلعت اله يترنح ومبين شارب
وصاير ثور كلت
«،،،هاا
«،،،افرشيلي
«،،،،مفروش روح نام
«،،،جيبي مي
،،،،خليت بطل يمك
سكت واجه عليه لزمت السجين بقوه
صار قريب انفاسه ضربت
بوجهي ولعبت نفسي
منه رجعت ليوره
لزمني من جتفي وكال مبتسم
«،،،ماتجين تفرگيلي رجليه
جنت اعرفه بس يروح يتمدد ينخمد بسرعه
جاوبته
«،،روح تمدد واني هسه اجي افرك رجليك
«،،،عفيه بالتسمع الكلام
راد يبوسني دفعته وصحت بي
«،،،روووح هسه اجي
«،،،هههههه
ضحك بصوت ومشى يتمايل ويغني طب
غرفته تمنيت اروح علي اذب بانزين
واشعله هو نايم كلت
جازه على سنوني
«،،،والله اسويها بيك وبابوك وبهاي
منيره ااگحبه ومايرفلي جفن ولا اخاف من
احد بس الي كاسره ظهري هي حنين
اعرف اذا اني رحت راح تضيع
وتستغلوها ابشع
استغلال
دمعتي ماجانت تنزل غير عليها محد كدر
يبجي عيوني غير ضيمها وقهرها
حتى من جانو يكتلوني
دمعتي ماتنزل
اظل اخزر بيهم بحقد وكره وهالشي،جانو
يخبلهم ويخليهم يأذوني بعد اكثر
سكت وعرفته انخمد بفراشه رجعت للمخزن
كعدت بفراشي افكر بيها وبروحي
لان اني هم جان اطلع منا
قبل لا ااسوي الي خايفه
منه
جنات
دوامت وي اسماء بالدائره الجديده وعرفنا
هذا المدير واحد صعب وجاد كلش بشغله مايحب التاخير ويتخبل من واحد يغلط بالحسابات
يسمعه كلام يوجع
اني جنت شاطره بشغلي ومااخطأ لان
اعرف اذا صفر زايد او ناقص راح يخربط كلشي
وياذي كل ،،،، الموظفين وهو جان
قليل الاحتگاك بينا يجي قبل
الكل ويطلع اخر واحد
ماجان عندي تواصل ويا مديره المكتبه
مالتنا هي الي تسلمه الاوراق يدققها
وويوقع
عرفت من سوالف الموظفات هو ارمل صارله
خمس سنوات ،،،وعنده
ولد وبنيه
مره،،،،تأخرت بالجرد السنويه طلعت
رحت للسياره شفت وراها سياره
موظف ويانا صعدت وانتظرته
يجي وويوخرها خابرت
دانيه اشوفها تجي
لان عزمتها تبات يمي وكالت اشوف
ابراهيم واردلج خبر من كالت
اجي فرحت لان هي
وجهالها يسون جو بالبيت ويخلوني
احس بالفرح
اني كاعده المدير طلع بزي رسمي يمشي
بخطوات واسعه ومايباوع لا
يمين ولا يسار
جانت سيارته بصف سيارتي وكف باوع
الها وبعدين على الورايه ماجان
بعدين لساعته ومبين
علي ضاج لان جان
لازم اني اتحرك يله يطلع هو
الموظف اجه شافه سرع خطواته مااعرف
شحجه ويا هز راسه بس
شفته صار عصبي
ذاك حرك وكدرت اطلع رحت للشارع هو
ورايه داس لسيارته وعبرني كلت
«،،،ادري شدعوه هيج عصبي وشايف روحك
هو انت مدير دائره صغيره لو خلوك
بوزاره شراح تسوي
تحجي بالوزن وي
الناس
بالي راح يم ولد دانيه وكلت خلي اخذلهم
حلويات وجبس وتعلوله حلوه
اخذت من يم اسواق ورجعت للبيت كريم
كالعاده مايجي على الغده وصارله
فتره هيج
اختي اجتي والتهيت وياها بالسوالف
وعرفت قائد خطب وعقد على
ليلى ذبيت حسره
وكلت
«،،شفتي دانيه ابوج واخوج واختج شحصلو
خربو عليهم وتالي هاج شوفي
صارت قسمتهم غصبا
ماعليهم
«،،،اي ربج راد هالشي وغصبا ما على
الكل صار
«،،،اي والحمد لله والشكر اخذها لان شفنا شكثر
جان يحبها وشلون وكع من طوله
وتخربط من سمعه راح
تروح من ايده
اختي هزت راسها وردت
«،،اسكتي جنات مقهوره كلش لان انعزلنا
عن الكل من ورة سوالف ابوج
الي صخمت وجهنا كدام
بيت عمو فاروق
ذبيت حسره وجاوبت
«،،اي والله اني هم مقهوره وتمنيت اوكف اله
بهل اليوم هو وليلى
«،،تدرين خالتي ندى عزمتني وكالت
جيبي وياج جنات بس ماكدرت
اروح واشوفها وجهي
«،،،،يگلبي شكد حنينه وتحبني اني وياج بس
والله لو حتى مخابرتني مااكدر اروح
من وره سواد وجه اهلج
«،،اي وياريت سكتو امج من سمعت تخبلت هي
وابوج ها سواها قائد وراح ياخذها
بفلوسها وهو مو بحالها
صلاوت على الرسول
رجع حال واحول
«،،،اكلج هو هناك شنو جان شغله
«،،والله سمعت من ابراهيم گايله مقداد هو اشتغل
بمصنع جبير مال واحد الماني وعراقي وهو نفسه
شغل فلوسه هنا وخلاه
هو وابن اخوه
يلزمون شغله
«،،،هاا يعني اموره صارت زينة
،،،،اي كلش جنات وصلاوات على الرسول هو
هناك مسوي فلوس هوايه وخير من الله
وعلى اساس من رجع لهنا يكمل
المشروع ويرجع بس من
عرف بالصار بطل
وسمعت راح يستقر
«،،،احسنله الغربه صعبه
«،،،اي وهم لاتنسين من اخذ ليلى بعد مستحيل
عمو فاروق وخاله ندى يخلوها
تسافر وتعوفهم
«،،،هسه شكد فرحت بي وهو هم
«،،اي ولج خاله رباب كالت شالها كدام الكل
وافتر بيها فرحان ومو مصدك هي
صارت اله
عيوني غورگت وكلت
«،،،هسه لو ادعي على اهلج هم تزعلين
لو الله يزعل عليه
«،،هو الله بعد شسوي بيهم ماشفتي اخوج
شصار بي طلع مايخلف ويوميا
يسمع المعاره من مرته الحيه
وعايش بجحيم وابويه
بعد السواه محد كام يحترمه ولا
يسويله قدر وامج صارت مكروهه يم الكل
وهاي خواتج شفتي شلون الله
سلط عليهن رجال مو خوش
ويوميا مكتولات منهم وجايات زعلانات
على اهلي
حجت هيج وكملت
«،،،كلها حوبه قائد وليلى لان ظلموهم ظلم جبير
وحوبتهم بعد وبعد راح تطلع بيهم
ليش هو قليل السوه بيهم
خمس سنين راحت من عمرهم لو مزوجين
هسه جان عدهم طفلين ثلاثه
«،،،اي وجان اني هم عندي
جاوبتها بقهر هي سكتت بعدين كالت
«،،،الله كريم حبي ان شاء الله يصير عندج
بهل الشهر
غيرت الموضوع وكمنا نحجي على دراسه
ولدها
ثاني يوم راحت من الصبح لان جانت
عدها روحه لبيت عيالها
جنا متعودين اني وكريم نروح
لاهله كل جمعه بس صارله فتره مايروح ولا
يگلي امشي نروح عليهم
اشوفه مهموم و يصفن عليه اساله
شبيك يگلي مشاكل بالدوام
مضوجتني
على الريوك سالت
«،،اليوم نروح لاهلك
«،،لاا
«،،،بس يعني صارلنا شهر مانروح عليهم
وخاف عمه تزعل لان من خابرتها اسال على
صحتها هي وعمو حسيتها زعلانه
لان جانت تحجي بثگل
«،،،ماكو شي لايظل بالج اني كتلهم مااكدر
اجي تعبان من الشغل واريد
ارتاح
سكتت باوع للساعه وكال
«،،اروح بشغله ومناك اطلع للصلاه
«،،تمام اسوي مقلوبه
«،،سوي
راح بدل وطلع التهيت بشغل البيت
الصلاه خلصت وهو مااجه
خابرته مارد رجعت اتصلت
جاوب
«،،،ها جنات
«،،تاخرت على الغده
«،،،اكلي انتي اني مشغول وي ولد بشغله
«،،هاا يعني تتاخر
«،،اي العصر ارجع
«،،،،تمام
«،،،يله مع السلامه
«،،،الله وياك
صبيت الغده كعدت اكل بدون نفس لان وحدي
اكلت شويه وكمت رجعت باقي
الاكل بالجدر عزلت المطبخ
ورحت لغرفتي
كعدت، هناك اتصفح بجهازي قبل الاذان
مال العصر اجتني رساله من رقم
غريب فتحتها اريد اشوف
منو هذا فزيت وفكيت عيوني
من قريت
«،،،،انتي شوكت تفكين عيونج وتعرفين
رجلج مزوج عليج ومرته
حامل وراح تجيب
بعد كم شهر
ايدي كامت ترجف بس كتبت
«،،،انت منو
«،،،فاعل خير
اتصلت علي رفض،كتبت بايد ترجف
«،،اانت جذاب شنو مصلحتك بهل الشي
شتريد ابلغ عليك الشرطه
اجتني صور وحده وره الخ گلبي
راد يوگف من شفت كريم
ايده بايد واحد
ويعقدون
كمت لحيلي اهز براسي لاا مو معقوله
رساله اجت
«،،هذا الموقع روحي شوفي رجلج نايم
بالعسل وي وحده اصغر منج
وحامل منه وها الباب لونه
رصاصي طوخ
ويمه شجره
صرخت بوجع وقهر
«،،،،لاااا جذب كريم مستحيل يسوي هيج
اتصلت على الرقم يطلع مغلق عيوني صارت
على الموقع طلعته بالخارطه المنطقه عرفتها
بسرعه لبست عباتي واخذت السويج مشيت مرعوبهزمفجوعه بالصوره الي شفتها هو اي
هذا كريم شفته كاعد يعقد وايده
بأيد واحد جبير بالعمر
صعدت سيارتي مااعرف شلون حرگت
بس شفت روحي اسوق بشارع
وعيوني تبجي وجسمي
كله يرجف
ردت اوصل للمكان اشوف بعيوني
واردد
«،،،راح يطلع جذب ااي مستحيل كريم يزوج
عليه هذا كله يريدون يهجمون
بيتي ااي ويجوز الصور
ملعوب بيها
اي ماشفت اخويه شسوه هم لعب بالصور
مال ليلى وخبل قائد
جنت اردد هيج وعندي قناعه هاي لعبه
وصلت للمكان وخفت انزل لا
اوكع بفخ نفس ليلى
بس نزلت ردت اتاكد من الشافته عيوني
هذا الباب الرصاصي ويمه
شجره
فريت راسي على المكان اكو رجال
كاعد يرش باب بيته طمنته شويه رحت
دگيت الجرس گلبي يدك سريع
وكل جسمي كام يرجف
بقوه انفتح صارت
كدامي بنيه
ماشفت خلقتها شفت بطنها حامل
سمعت صوت
«،،،لميس،،،،منو اجه
شكرا لزيارتكم عالم روايات سكيرهوم
