رواية ارحموني ولو رحمة مرة الفصل الثالث والعشرون بقلم فراقد حسن علي
محمود/اريد بس أركز شنو يحجي وشنو يكول ،، بعدني طافي وما مصحصح زين
-عمي كول غيرها ،،شنو الطفل ميت !!!
الحجي /الدكتورة تكول الطفل ميت بسبب الضرب القوي ومفصول عن المشيمة وانت بويه ما مقصر جارم بحال البنية وهذا الحجي مو وكته هسه
خلي تكوم بنيتي بسلامة والنا حجي ثاني واحنا بمستشفى الولادة اذا تحب تجيفي أمان الله
الحجي /الدكتورة تكول الطفل ميت
بسبب الضرب القوي ومفصول عن المشيمة
وانت بويه ما مقصر جارم بحال البنية
وهذا الحجي مو وكته هسه
خلي تكوم بنيتي بسلامة والنا حجي ثاني
واحنا بمستشفى الولادة اذا تحب تجي
في أمان الله
محمود /بهذيج الساعة ما اعرف شلون افسر شعوري
أول شي أنقهرت على أبني الخسرته
وثاني شي ضجت من سرعة عصبيتي البسببها يطفى عند العقل والتفكير
وثالث شي ما تعوذت من ساعة الشيطان اللي فرغت بيها كل قهري برفل
واني متحمل عليها من دقيقة الحادث
ورابع شي تندمت على تسرعي وشلون كدرت رفل تستفزني وجرمت بحالها
وبتالي شنو الصار راح ابني ضحية خباثة وكذب و رعونة أمه ،، وضحية عصبيتي
ربي الصبر
-طلعت من غرفتي البيت أظلم
الكل نايمين
باوعت على باب الهول الضوه مشعول
دفعت الباب ودخلت
اباوع اركان مجطول على التخم وكاعد يكلب بتلفون أبويه
وخالتي سهام تسوي كمادات الفرح
-صباح الخير ،،
هااا خاله شبيها فرح
سهام/صباح النور يمه ،،هل شوفت عينك تنفض من صخونة وجسمها يوجعها
-يمه ما اريد أدخل بيناتكم
لو أسويلكم مشكلة
وداعتك هي ما شكت ولا سولفت شي
بس كالت// يمه صخنت لان أنهبطت على أسلام
ليش هيجي يايمه أملخها تملخ ومطوعن جسمها من دخلتها للحمام أغسللها تفاجأت بالضربات مليان جلدها طكع حمرة وزركة
اركان/خالة ما سامعه اللي يكول
لو أفطسك من البرود لو أخرب شيب أبوك
هاي حالة محمود لو يسكت دهر لو من يفقد ويعصب يقضي على الگباله
محمود/اركان جفيني شرك ،،
-وشعندك انت كاعد
أركان/يا محمد علي كلاي
ماكدرت أنام بالي يم أسلام
لا اله الا الله أنخمط كلبي اتخبل من أسمع بموضوع مراه تريد تجيب لو طارحة ،، أتخيلها راح تموت بالنزف
محمود/الحمد لله على كل حال
أستغفر الله اليوم شكد جان نحس
حادث أسلام
وطيحت أبويه
وعصبيتي على البنات
وهسه خسارة ابني
وهاي فريحة هل مطروحة كبالي
وما اعرف بعد شضاملي الوكت
سهام/يمه الخلف بالله
ربي يعوضك عن الولد بعشرة
ويكوملك مريتك بسلامة
محمود /الحمد لله على كل حال
شيجي من الله أنعم الله
بس لا جيات بني أدم الله يكفينا الشر
اركان/اتصلت على امي ،،
كالت /يمه وداعتك أسلام زين
وكلساع يجون هنا الدكاترة يچيكونه
يكولون// كل وضعه مستقر الف الحمد لله
-حاجيتها بهدوء عن حالة رفل وهي تخبلت
تصيح /يمه هاي صواب العين
يمه صابتنا عين نكسة ما صلت على النبي
عود شكلك الجناين أثنينهن حبلن سويه
-وهذا صديقك كالك أنت اصغر من عندي
وعندك ووليد ،،هل طاحت عينه بالولد
-ضحكتني بسوالفها هاي//يمه ضحكتيني واني مالي خلك ياعين ،،يا صواب
كولي يالله وهو خير الحافظين
محمود/كعدت بصف فرح مجمرة من الصخونة حبيبي شفايفها يابسة
مغمضة وتون من الالم
صعدت فوك لغرفة رفل دورت على علاجها الكتبته الها الدكتورة
لكيته بالكومدي باقي قليل منه
قريته يفيدها وينزل حرارتها
//خالة شو ساعديني أكعدها وأشربها هذا العلاج
شربتها بالكوة
//يابه شبيج لا دفعين خايف عليج
فرح /الصراحة هواي مقهورة من عنده
وحتى ما اريد قربه ولا يكعد بصفي
شربت العلاج بالكوة من ايده ،،
محمود /كومي ويايه خل أسبحج هيجي
ما تفكين والصخونة العالية تأذي الطفل
فرح/بس وخر عني ولا توصل يمي
هواي متوجعة ،، والصخونة ذابحتني
ونفسي قافلة عليك ما اريد شي منك
أركان/اي عفية بفارة النضد صيري سباعية
وشوفي نجوم الظهر ،،
-أكول تردين أجيبلج أحزام تجلدي
محمود /تعرف تكال تبن وتنلصم
هسه مو وكت شقاك
سهام /هههههه اكول يمه مو تصلح تصير طباب خير
أركان/افاااااا ،،أنا أبوك يا أسلام
هيجي خالة تبسمريني وانوب بسمارج اعوج ومزنجر
-كومي فارة النضد لا تتعززين كومي يلا بساع كدامي اسبحي بمي دافي مو بارد
مو زين على الجاهل،،وهم تنزل صخونتج
فرح/ترى ما تخوفني ،،
هو ألاجبش منك ما خفت من عنده !!
محمود/فرررح أحترمي نفسج
وصوني السانج
فرح/اسفه مو قصدي زلة ألسان
اركان/اكول مو اللسان شوية طولان
ويراد للفارة شحاطة أمي
فرح/اركان عوفني .....
كمت أشهك وابجي وضميت وجهي بين ايديه ادورلي حجة حتى ابجي لان مخنوكة من محمود وحيل ضايجة ومكسور خاطري منه
فرح/وخرت أيدي ومسحت دموعي بردن دشداشتي//اركان انت أخويه ما ازعل منك أبد بس شوية ضايجة على أسلام وأبويه
اركان/سالمة يالغالية لا يظل بالج
ولو اعرف شبيج بس ميخالف اثولها
-ابو شكرية كوم بدل خلي نمشي للمستشفى
طر ألفجر
محمود /اني أطلع بوجهي على رفل
ومناك أجيك للمستشفى
سهام /خاله لا تروح وحيدك ،،أخذ أمك وياك
روحتها تكسر شر النفوس ،،وعلمود اسلام
اني أبقى وياه
محمود/ما تقصرين خالة خوش فكرة
فرح /امي كعدت منى تسوي ريوك للولد
واني أدري بيها جذابة كاعدة بس لافه راسها جوه الغطه لان نومها خفيف فزت وبقت تحوس
-محمود واركان كاموا صلوا وبدلوا هدومهم
وبقوا كاعدين بالهول
وامي هم حضرت نفسها وبقت تسولف وياهم
-كمت دخلت للحمام ما سبحت
بس بردت روحي
طلعت توضيت ورحت صليت
-منى جابت الريوك وكعدنا كل احنا نتريك
وامي ندهت مريم وفاطمة يكعدن يساعدن منى
-لاحظت أركان كلساع يبوك الشوف على منى
شنو معقولة عاجبته !!
-طلعوا الولد
وامي صعدت ويه اركان
ومحمود لحكهم بسيارته
-كعد أبويه عادل ،،وأبويه باسم
وعمامي أحمد ومحمد
-منى كملت ريوكهم بين ما صلوا
وفاطمة ومريم لملمن الفراش
-ابويه عادل نفس كل يومية يضمني جوه جنحه ويبوسني على راسي،،
-يكول لابويه باسم //هي من البداية جان المفروض تسجل باسمي مو بسمك
-تخبل من شافني مصخنة
وظل يسب ويغلط على محمود لان ضربني
ويتوعدله اذا ضربني مره ثانية يكول اطرده من البيت لان من يفقد أعصابه يتخبل
-أبويه باسم ما حجه شي ولا عاتب ابويه عادل على ضرب محمود اليه ،،لان شافه شلون يحبني
-ما حجيت لابويه على موضوع رفل
لان ينكلب جن على محمود ويمكن يضربه چيلة ويسكط رجله ،، لان هواي مغثوث من عنده
-طلعوا ابويه وعمامي وراحوا للمستشفى
بقينا بس احنا البنات بالبيت
-اني أنجطلت على القنفة
ومنى والبنات گشن البيت
-منى تعاي أحاجيج
وانتن فاطمة ومريم ،،اطلعن أغسلن الحوش
وعوفن منى تكعد يمي
-منى انت عندج مشاعر تجاه أركان
منى /لا لا منين تجيبين هذا الحجي
فرح/هاا مو ردت أخذ رايج
هو حاجني عليج ...
منى /اي وشكالج
فرح /شبيج ملكوفة خل أكمل كلامي على هاي لكفتج ضامة شي بكلبج تجاهه
منى/لا قابل شضامة ،،
بس هيجي فضول ردت أعرف شكالج
فرح/حاجاني عليج يكول تقبل بصديقي
خوش شاب وضابط وهنا بيتهم بغداد
منى/حجيت بكلبي
//أمداني عبالي أهمه بشي طلع يريدني لصديقه
-تركتها وكمت للمطبخ شعوري متناقض
روحي متعرف روحي شتريد
ساعة أريد أصير مرته ،،
وساعة اكول اني وحده حقيرة وأنانية
دعيت على ألمرحومة وضميري ملخ روحي
ما اعرف شلون أخلص نفسي من هذا الذنب
محمود/طلعت للمستشفى قدمت اجازة
اطباء ألشفت الصباحي كلهم عرفوا بموضوع أسلام
-رحت اشوفه واطمئن عليه
عيوني كون الله ماخذهن ولا شايفه هيجي
وجهه مورم ،رجليه مورمة ،ايده مورمة
خالتي سهام أنصدمت بشوفته وأستلمتها دك ولطم ونحيب
-الجراح أفتر على المرضى التابعين اله
لان خلص وكت دوريته جيگ أموره
كال//الحمد لله كلش زين ما كو شي يخوف
يبقى بس علمود المراقبة فقط
-بدلوا اله ضمادات راسه وهو طفل ويخاف
صوته أنبح من الصريخ ،،
-انوب اركان خبله هو وابويه يبجون وياه
-دخلت اني وامي للمستشفى
امي صعدت فوك على رفل
واني بقيت يم الحجي وعلاء ووجوهم ثكيلة عليه
-يابه تسمحلي أبرر موقفي
لان زعلك جبير عندي وياكل بروحي
حجي نافع/مو وكت الحجي يابه
من نطلع للبيت بيك خير وتدلل
علاء/بس اسألك سؤال وجاوبني بصراحة
لكونك أنت طبيب وفاهم وعاقل
يصير مراه حامل بهشكل تنضرب
محمود/أسمع مني علاء انت أخويه
وانت يابه أرجوك أسمعني وأحكموا
-سولفتلهم كلشي من يوم دخلت فرح للبيت
وشلون رفل تعيرها
وشلون تكرها بالنعمة
وشلون مستغلتها بشعل البيت
وشلون تألف عليها الحجي ويه أمها
*ورفل صارلها ب ٣ سنوات ويايه ماديت ايدي عليها الا لمن طلعتني عن طوري وبدت تخوط بشرف فرح
*وشلون لكيتهن متعاركات وضربتهن أثنينهن
وفرح بعدها عروس وبسطتها وياها
*وحتى البارحة من ضربت رفل بسبب تلفيقها للحقيقة ضربت فرح وياها لان فقدت الوعي من العصبية
*يعني اني بكلشي ما مفرق بيناتهن
حتى بالضرب اثنينهن أنضربن سويه
-وفرح هل مطروحة ونايمة وما اعرف تسقط
لو تبقى شايله الطفل
الحجي /يا يابه كل هل حجي ما سمعت شي منه وصلني غير حجي ،،وشلت بكلبي عليك
محمود/هسه خليها تطلع بسلامة
واني كذاب ومو خوش ادمي
وشهودي امي وابويه واخوي وفرح
واقابل رفل وياهم
-خبلتني هاي البنية يعني هي بشدة وتجذب وتألف بالحجي شنو من قابلية عدها
-خرجوها للبيت بعد ما نزلوا الحمل
والجنين كان ولد
-سلمت عليها وبوستها على راسها
وتحمد الله على سلامتها
وتعذرت منها على عصبيتي وتندمت لان ضربتها
وهي بس تبجي ودفع بيه وتصيح// وخر من يمي
-اكول حقها والصار مو سهل عليها
بس هي الجابت التهلكة النفسها
-امي تبجي وتندب حظي المايل
وتكلهم /هذيج البنية هم مطروحة بالفراش
وبعد مانعرف مصيرها
-ردت عليها ام علاء تكلها //لا تخافين عليها هذيج كوية وعرمة ما يطكها عرج
تسوي هيجي حتى تطرد عيون
تخاف من حوبة رفل لا توكعها وأطرحها
-الحجي عاط بيها عيطة خورسها
وعلاء يكلهن //بسيطة نوصل البيت لو ما نوصل
-طلبت من الحجي أوصلهم
كال /أبد سيارتي موجودة اني أرجعهن للبيت
رفل صارت أحسن ،، انت أرجع لبيتك
اخوك وأبن أخوك بحاجة الك
-أخذت أمي ورجعنا على أسلام
لكيناه مفرفح من البجي يريد على امي ما متعلم على خالتي
-رجعت للبيت أطمئن على فرح
واجيب غده وجاي لامي وخالتي وارجعلهن
امي تتخبل من أكل البره ما تتقبله
-دخلت للبيت اشوفه نظيف عفية بنات ما تعرفن تكعدن لازم تشتغلن
-دخلت للهول ظلمة بس التلفزيون مشعول
على قناة الاطفال والبنات مخليات مخاد مجطولات ومتغطيات يتفرجن على الكارتون
-من دخلت ركضن عليه بوسني
ويسمني عمي
ياسمين تكول /احنا كل ما يجي ابويه من الشغل نبوسه
ونسرين تكول /بس اني أبوسة اكثر شي
-شكد احب سوالفهن
الهول دافي واظلم بس واحد يعجبه ينام
دخلت جوه وتنحنحت ،،وصلت للمطبخ
لكيت منى وفاطمة ومريم مكملات الغده
منى واكفة تخبز
وفاطمة تثرم زلاطة
ومريم تسفط الخبز على ايد منى
-سلمت عليهن
وكلت لمنى ترتب غده لامي ولامها أخذه للمستشفى ،، وتخدرلهن ترمز جاي
-رجعت ودخلت الغرفتي وفرح مجطولة
تقربت عليها صاحية بس راقدة بفراشها
نجطلت بصفها
تبتعد من عندي وتلف نفسها بالغطه
تقربت عليها وحظنتها من ظهرها
وخليت راسي على راسها
وقفلت عليها برجله
-اسف جددا أسف سامحيني يروحي
من أعصب أفقد الوعي وما اسيطر على روحي ،، لا تبجين من فدوة رحت لهل دموع
فرح/انت تجذب عليه ومتحبني
اليحب ميأذي حبيبه ويضربه
محمود/وداعت فروحة عندي
وداعت حبي الها الكبر وياي من الصغر أعشقج واموت عليج
بس ساعة شيطان وفقدت من العصبية
فرح/ترى ما ابقى يمك من يرحون اهلي اروح وياهم
محمود/هاي سهلة اني اهم اروح وياهم
بيت جدي وبيت عمي
فرح/ابد متوصل ولا تدخل البيتنا
فوك ما ضاربني ومطيح حظي تجي عدنا
أريد أحلفك ما ستحيت من أبويه وامي
من هيجي شافوني مكتولة ومليانة كدمات وحالتي حالة وهيجي مجنزة كدامهم
محمود / اني مستحي من روحي
وما أحجيلج شلون أبوي سوالي زفة معتبرة بالمستشفى
واركان الخبيث يشمت بيه ويضحك عليه
فرح/تستاهل لو خابزك ابويه جان ارتاح كلبي
ترى مو حلوة بحقك أنت رجل وجسمك مليان عضلات وتتقوى على نسوان حوامل وتكتلهن
محمود/هااا شو بدأ اللسان يطول
فرح/لا حشاك مو قصدي أقلل من احترامك
بس هاي الحقيقة ليش تزعل منها
محمود/الصراحة تنرفزت بس لزمت روحي وشفت كلامها هو عين الصح
-هسه شلون نبقى نتعاتب ،،
لو أروح يم رفل ؟؟
فرح/صدك نسيت أسالك عليها خطية شلون صارت ،، عوفك من غيرة الشرايج
بس اسأل عليها من جهة الانسانية
لان خطية هواي جانت فرحانة بالحمل
لو ما هذا ضربك الها جان جابت بسلامة
محمود/اااخ شكول ،، هواي متندم على هذيج ساعة الشيطان وفقدت أعصابي
صارت زينة الحمد لله طلعوها للبيت وطرحت الولد
فرح/حرامات جان جابت الولد وسموك ابو شاكر بدل ابو شكرية
محمود/ههههه هو لقب محمود أبو شكرية
شلون محمد أبو جاسم
وحسين أبو علي
وحسن أبو فلاح
مو قصة الواحد عنده ولد لو بنية هي سالفة
القاب ماشية بمجتمعنا
فرح/وخر عني ترى أختنكت
محمود/هااا صايرة تختنكين مني خوش
شوفي بعد منو يوصل لغرفتج ،،
اصعد انام بغرفة رفل
-ادري بيها جذابة وميتة عليه بس مقهورة من عندي
واني أعرف شلون اكسبها
وهسة لازم أقشمر عليها لأحاول ارجع الأمور لمجراها عود سويت نفسي زعلت تركتها وطلعت من الغرفة بس لازم اطلع لحتى أخذ الغده واروح للمستشفى
-منى بشطارة فرح لكيتها مجهزة كلشي
اخذت العلاكة اللي بيها الاكل
وعلاكة ثانية بيها ترمز الجاي والغراض
ورجعت للمستشفى
-وبعدها رجعنا كل احنا الزلم للبيت
بقت امي وخاله سهام بالمستشفى
اركان/الحمد لله أطمئنيت على اسلام
ولو شوفته تكسر ظهري بس الحمد لله طيب ويشتم الهوى
-رجعت للبيت ميت من التعب ونعسان مقفل
اريد بس اكل لكمة وانام
-ما اجذب منى عاجبتني
من هذاك اليوم بقت صورتها بالي
بس هاي شخطة الخبال العدها وبس تبجي مضوجتني منها
-بقيت اراقب كل تحركاتها
وابوك النظر منها بعد فرصة من اجت لبيتنا
المشكلة هي بس تشوفي تنكرص وتشرد
-هي والبنات مدن السفرة وصبن الغده
بنفس ندارة وشطارة فرح
خفيفات بالحركة والشغل
-كعدن ويانه على السفرة
ومحمود مكنش خلقته
أبويه راح جاب فرح من غرفتها وكعدها بصفه
-الحمد لله تغدينا بالعافية ،،
-واني يا غريب أذكر المخدة
بس غسلت وصعدت بوجهي فوك
وهي النومة
-فزيت الدنيا ليل ،، باوعت الساعة ب ٧
بس أحلى نومة ظلمة،،ودافية،،وريحة مطر
والمخدة عشقي الابدي لو عليه اخذها ويايه للدوام
-نزلت جوه ماكو أحد بس البنات
شفت البنات التوم ٤ موجودات بالهول
ويتفرجن تلفزيون سألتهن
-وين ابويه وعمامي
نسرين /بدلوا وطلعوا اخذهم عمي محمود
لبيت الشريجة رفل وكال مناك نشوف اسلام
ونرجع للبيت
-يا محمود يا خويه الله يعينك على هاي الورطة وكعت بين أثنين نسوان همزين ما تتخبل
-رحت للمطبخ أريد أصبلي جاي
ولكيت منى وفرح كاعدات يجهزن كبة
اركان /ماروكو سويلي جاي
واذا اكو عدنا كليجة ،كيك ،كعك وياج
واذا ماكو كسبيلي خبزة
فرح/صدك تذكرت قبل لا أنسى
كول لهذا صديقك الضابط ،،بنت عمي
ماترضى بالغريب تكول اولاد عمي أولى بقسمتي
منى/فرررح هاي شبيج
فرح/اي مو زين تذكرت هسه وكتله لا نسى
وعيب الزلمه ينتظر
أركان/منو متقدملج من ولد عمنا
منى/ماكو أحد ،، بس بعد أشوف من قسمة منو أصير ،، اولاد عمي أحسن من الغريب كلشي ما اعرف عنه
اركان/هاي هي صار معلوم
-هسه بعتبار ماكو أحد موجود والحجي بيناتنا منو ترشحن اليه من البنات
بس كون بيها شوفة وشعرها طويل
منى/المن الك انت تريد تزوج
-يااا شجاني ونلكفت هسه شيكول عليه
بقيت أحجي بكلبي والوم بنفسي
وابتعدت من يمهم اخدرله الجاي
اركان/لا اني فكرة الزواج شلتها من راسي
بس لنفسه هذا صديقي النقيب
فرح/خو انت أبقى عنس هيج بدون زواج
لحد ما تصير شايب وتوكع سنونك
يلا تتندم وتكول زوجوني
اركان/يااا فارة النضد لو باقية مصخنة
جان شوية أفتكيت من هذا السانج
-يا المخبلة منو تقبل بيه
شو أرمل
وعندي ولد
والاقوى عسكري وشايل دمي بخاشوكة
على ياساعة أنكتل وأموت
منى/أسم الله شجاب طاري الموت بنصنا
هاي كيكة ما لكيت كليجة لو كعك
اركان /كلشي نعمة الله جيبيها تفيد
-اباوع عليها كل حركة منها تغريني
معقولة أنعجبت بيها لهاي الدرجة
لو لان طاكني الجفاف افكر بيها بهاي الطريقة
فرح/باليل كل عمامي موجودين
وأبويه لعب طوبة بمحمود ،،لان هيجي مكسر رفل من الضرب
-وانوب ردوا على اركان خلوا بالوسط
لازم تتزوج ولشوكت تبقى محمل مسؤولية أبنك لنسوان اخوك دورلك مراه بنت حلال تتحمل مسؤليتكم
-أثنيناتهم عقجوا وجوهم ،،لان ترزلوا
محمود/أخذت ابويه وعمامي ورحنا
لبيت الحجي ،، ابويه اخذ عمامي
كال//نقوي الروابط الأسرية بهاي روحتنا
-والحجي ما قصر مد النا عين غطة وعين فراش أنخبص بجيت أبويه وعمامي
-أبويه يتعذر من الحجي ويرجع ليوره
على قساوتي ويه رفل
-المصيبة الحجي هو كام يتعذر من ابويه
لان السوالف الواصلة كلها جذب وتلفيق وبالمكلوبي
ان رفل المظلومة
وفرح الموخوش أدمية
وهي التحش براسي على أذيتها
ورفل الشايلة البيت وفرح الكاعدة ومرتاحة
وحتى اسلام مالها دخل بي وتتنكس من عنده
-الحمد لله من ظهر الحق وكشف الباطل
وأهم شي عندي الحجي والولد يعرفون الحقيقة
-كتله خل أخذ رفل ويايه للبيت
كال الحجي /لا يابه اتركها ترتاح
يم امها ونسوان أخوانها واني أجيبها
فرح/الحمد لله طلع أسلام للبيت
يمه شفتة لو أنصدمت
حبيبي صاير عبارة عن مستطيل منفوخ
ماكو ملامح بوجه
بس هو شوية عيون مفتوحة ويشوف
انوب أسلام خاف
وصار بجي الجهال بفلس
-ركضت عليها اني وامي صارت خركه بيدينا
محمود قاس ضغطها ،، طلع هابط
رفعنا رجليها على المخاد
وسويتلها شربت وحليته
اركان/هاي البنية مخبلة ابددد مو صاحية
سألت خالة سهام شنو سالفتها
تكلي//خايفة ونوديها للشيوخ يقرون عليها قران ويرقوها
فرح/الحمد لله ورة شوية منى صارت احسن
وابويه راح جاب طلي وذبحه لوجه الله على طلعة اسلام بخير وسلامة
وعمي أحمد كصبه
وامي فاطمة كعدت وقسمت اللحم ووزعته على الشارع
-ثاني يوم أهلي وعمامي تحضروا يرجعون للديرة
-لميت ملابسي ارجع ويه أهلي
امي كامت تحجي عليه تكول/عيب شلون تتركين عيالج بهيجي موقف صعب
الصبي مريض ومتكسر
وفاطمة ما تكدر عليه وحدها
تكعد اداري ،، لو تحتار بالخطار اليجي
-شفت حجي امي صحيح ،،
لان تبقى بس امي فاطمة بالبيت وحدها
ما تكدر على شي
رجعت هدومي وكعدت شبعت بجي
لان هواي مقهورة ومهضومة من محمود
منى/البارحة من جابوا أسلام بقيت النهار كله جسمي يرعش من الخوف عليه
ومقهورة ومتندمة لان دعيت على أمه الله يرحمها
-الظهر الكل نام ،، وبعد ما بيها مجال
اريد أخلص نفسي من عذاب الضمير
صعدت فوك لغرفة اركان
هو تغده وصعد يغفى شوية
دكيت الباب مجاوبني ،، فتحتها ودخلت
لكيته نايم جفي على وجه
وملابس فانيلة نايم بس بالبجامة
ناديت عليه لحتى اصحي
رفع راسه عليه باوعلي بتك عين مطفي
اركان/ها ماروكو محتاجة شي
منى/حجيت بسرعة اخاف أتردد واترجع
حجيت بخوف وبجي وعذاب ضمير
-اركان فدوة سامحني
لان اني دعيت على رسل
كتله ربي لو تموتها لو يكطلها رجلها
الصدك غرت من عدها
وهي ماتت من وره دعائي عليها
ولو ما اني داعية عليها جان ما ماتت
ولا أسلام صار بي هذا الحادث لان تكون امه موجوده وداري
اركان/هووب يمعودة شبيج حولتي لسانج على الصلي احجي بهدوء
-شنو دعيتي عليها ،،شنو ماتت بسبب دعائج
وليش دعيتي عليها أصلا
منى/هسة شريد أكول لان أحبك دعيت عليها !!!
-هاااا ما ادري ليش دعيت عليها
يمكن لان انقهرت على سالفة فرح
وهي ماتت من وره دعائي
اركان/هههههه اذا هيجي دعائج مستجاب
ما تدعيلي الله يخلصني من العقيد رعد وينقلوه المنطقه ساخنة
وداعت الإخوة مشوفنا نجوم الظهر
ينزل بينا بهل عقوبات وما ملحك
منى/يااا اركان ترى احجي الصدك شبيك
اني دعيت عليها وماتت ،،
ومن هذاك اليوم أنكلبت حياتي
بس ابجي وخايفة وضميري ملخني
حتى ما عايشة مثل البشر
وامي وابويه يودوني للشيوخ يقرون عليه
يكولون خايفة ،، بس هم ما يدرون اني مجرمة
اركان/ههههه لا صدك انتي مخبلة
يابه ليش هيج محطمة نفسج
بعد هذا قدرها وقدر مكتوب عليها
وهي أحسن مني ومنج لان محسوبة شهيدة عند الله...ولا تخلين هاي الصدفة تأثر عليج
وتحول حياتج لجحيم اكثر من هذا الجحيم العايشة بي
-اني مسامحج
وهي هم مسامحتج أني متأكد لان هي طيبة الله يرحمها وانتي ما تتقصدين أذيتها
ومن تذكريها أقريلها الفاتحة
-ومسحي هاي دموعج يالمخبلة عبالي شو شعندج
وانزلي سويلي جاي وكسبيلي خبزه
منى/اي وداعت اهلي اني ما متقصدة اذيتها
بس بعد صارت ودعيت عليها ،،
ودائما اقريلها قران وأهديلها صلاة
اركان/ عفية بالحبابة
يلا امشي أنزلي خليني أرجع أغفه شويه وانتي خدريل جاي بين ما اخذ قيلولة
ام نص ساعة
مروه/الصراحة من حجيت وياه واعترفلته بخطئ وذنبي حسيت نفسي صارت أحسن
والحمد لله رجعنا لبيتنا بخير وسلامة وشوية نفسيتي مرتاحة
فرح/أسلام حبيبي بس يبجي وبالذات بليل
كلنا نكعد وياه
محمود يكول جسمه يوجعه
نحير شلون نسكته ونراضي
نشيله من أيد لايد ونفتر بي
-وكعت أسلام بجهة ،، والخطار بجهة
ناس رايحين وناس جايين
اهل المنطقة والمعارف وأصدقاء الولد
-الاطباء اليعرفهم محمود كلهم أجوي
بس ميدفعون واجب زين
عكس جماعة اركان واجبهم ثكيل
-أكول لاركان// شكو واجب يجي اليه
يكول /وانتي شكو تاخذين الواجب ،،
عود من تجيبين أنطيج ٥ الاف حق فترة الحمل خطية تعبتي
-الحمد لله والشكر لله بهاي حالتنا
دخلنا بالسنة الجديدة
وأسلام صحته شويه أحسن
بس هواي يتململ
ويبجى ، وصاير نحس
خطية امي حتى ما تشبع نوم من وراه
تبقى شايلته وتفتر بي
-بالنهار يشبع نوم ،، وبليل نلزم عليه مناوبات كلساع واحد يشيله ويداري
-علاقتنا اني ومحمود رجعت مثل قبل
وبقى يتأسف ويعتذر مني
-الحمد لله دخلت بشهر الرابع من الحمل
وأحس بالجاهل من يتحرك بطني
ربي لاتحرم اي مراه من هذا الشعور
-صار عيد ميلاد أسلام ياربي عمر وعافية وعام خير وبركة عليك
-امي وابويه بهاي الأيام أكلوا راس أركان لازم تزوج وكافي نسوان أخوك متحملات مسؤوليتك ومسؤوليه أبنك
-هو كل ما يحاجوه بموضوع العرس يكب علينا يصيح ويعيط //سدوا الموضوع
-لحد ما ابويه كاله/ألك مهلة يومين تختارلك مراه اذا بقيت معاند امشي اني وامك نخطبلك ونعگلك باأختيارنا
-بقينا اني وأمي كلساع نكول فلانة
هو يكول//لا ويطلع بيها الف لوله
-عاد أمي كالتله /ليش ما نمشيلك على منى
هم بنت عمك وهم من ثوبنا
عاد هو كال /ما أتوقع تقبل بيه
لان اني أرمل
وعندي طفل
وشغلي خطر عسكري
شنو ليجبرها لحتى تقبل بيه
أمي كالت /لا اني متأكدة ترضى بيك
وهسه أثبتلك احنا نسوان ونفتهم على بعضنا
-عاد كالتلي /جيبي التلفون ودكي على رقم ابوج وبعدين كوليله اريد منى
نفذت شنو كالتلي،،وبعد ماسلمت على ابويه
كتله//اريد منى عندي موضوع وياها يخصني
-اوكفي خل ابشرج قبل لا أنسى هالة حامل ورافد طاير بيها ،البارحة راجعت يم الدكتورة
وكالتلها هستوج حامل
فرح/اي هاي البشارة الزينة
خطية شكثر دعيتلها
-امي تأشرلي واني أحجي
منى على طاري البشارة أجتج خوش قسمة
منى/منو هذا
فرح/هو خوش شاب،،وابن عائلة محترمة
وموظف بالدولة ،،وشكله مقبول مرتب
ومن أقارب امي فاطمة
منى /انتي مو تعرفين رأيي ما اتزوج غريب
منتظره اولاد عمي ،،اذا ما الي قسمة وياهم
الله كريم شوف منو قسمتي
فرح/يااا حرمات ترى خوش قسمة
امداج لو اني اقبل
منى /الصدك ما ادري شكول ،،
بيت عمي عادل يعرفون بالموضوع
فرح/ياا شلون مايعرفون
غير هو من طرف أمي فاطمة
منى /زين أولاد عمي شنو كالوا
محمود واركان شنو رأيهم بالولد
فرح/محمود يكول اني اعرفه خوش ولد
واتمنى منى تقبل بقسمتها من عنده
-واركان هم مدح بي ،،ويكول خوش قسمة
مروه/زين هو حلو لو لا ،،اقصد انتي
شايفته شكله مقبول
فرح/اي اني شايفته ينطي شبه لاركان
مروه/اااخ يا اركان ... جريت حسرة بقهر
ونسيت هي تحجي ويايه على الخط
//هاا فرح وياي يمكن راحت الشبكة ورجعت
فرح/لا سمعتج شبي أركان
أحاجيها وأضحك ،،
وامي تااشر لاركان اششش
منى/مابي شي الله يحفظ شبابه
اذا يشبه يعني حلو ،،حاجي ابويه
واذا قبل اني اقبل
اركان/منى تسمعيني اذا اني اتقدمتلج تقبلين بيه
فرح/يااا شوف المخبلة غلقت الخط
خرب ببليسك اركان خرعتها
فاطمة/ها شكال البهلول
يمه البنية عينها منك اني مراقبتها
بس أنت مطفي
اركان/يالله ،،هاي هي يمه مشيلي عليها
وانتي فارة النضد اريد وكفتج ويايه
فرح/كلللللللوووووووووش
فرحنه واليحبنه يفرح ويانه
كمت اطك أصبع وأهوس ،وهمه يضحكون عليه
شكرا لزيارتكم عالم روايات سكيرهوم
