رواية عشك أل فراس الفصل الثاني والعشرون بقلم زينب نور
سَحر:هههههه والله الا احط التصوير بيد أبوج
علي: اكو جلب ينبح
قمر:استر علينا وخرر عني خل اروح
عافني وراح يمها
سَحر:والله اذا تتقدم عليه خطوة وحدها بعد الم الدنيا عليككك
كان لابس محبس بيدة بكف ايدة ضربها على حلكها يعني المحبس اجهه على شفتها ضربها حيل لدرجة انُ طلع دم
علي:قمر اطلعي من الباب الثاني مباشرةً لـ اهلج
سَحر:تمد ايدككك عليه علمود هاي الرخيصة والله اليوم افضحكم والله الا اخلي اسمج على كُل اللسان اني حذرتج وكتلج ابتعدي بس انتِ تجيبين المشاكل لنفسج وانتَ والله الا اخليك تتوسل توسل
علي: منو يتوسل توسل أنا !! لج مو اترس حلكج وحلك اليطلع وراج تبن
سَحر :تجي الايام
دفعها واخذ التيلفون من ايدها حطة بجية باوع عليه وكال
علي:يلا بوية خل نروح
قمر:نطلع سوا
علي:اي چا شني رجال ومرتة
سَحر:بسيطهه انييييي الكمممم
جسمي صار يرجف بشكل مو طبيعي حتى كلبي ضل يوجعني طلعت كدامه ورحت مباشرةً للبيت بس دخلت البيت طكيتها بجيهه
رنا :عزاا قمر شبيج
رياهم :قمر ليش تبجين
قمر:منو موجود هنا
رنا:محد بس اني ورياهم كلهم راحوا لبيت الشيخ
لطمت على وجهي صخام الصخم وجهييي
رنا:لججج شبيججج
كعدت بالكاع الهبطة شراح يصير يربي يأرب إستر حجيتلهن اللي صار
رياهم :لا تخافين ماادام هوَ عنده علم ختولي حجي فارغ
قمر:شلون حجي فارغ والتصوير
رنا:انتِ مو كلتي اخذ التيلفون
قمر: اي بس هي كالت افضحكم واخلي اسمج على كُل اللسان يعني حتلو بدون تصوير والناس تريد بس سالفة حتى تحجي بيها
رياهم :لا تخافين ماتسوي شي وكلها تعرفج انتِ شنو وهوَ شنو فـ تحجي وتنجب
رنا:هو ليش مايجي يخطبج ويفضها
رياهم:الولد عنده مشاكل هواي واغلب وقته دوام ولحد الان لا هو مبادر ولا هي تبادر
رنا:خلي هو يبادر ويعترف
رياهم :اكيد اطيح حضها اذا هانت كرامتها وراحت اعترفت
قبل المغرب رجعوا اهلي كنت خايفة ورنا كل ساعه وخازرتني لان الخوف ابين عليه مر على هاي السالفة سبوعين اني لا طلعت من البيت ولا شفت علي ولا راسلته وخايفة وادعي ليل ونهار اخلص من سَحر وشرها
خابرتني عسل كالت تعالي يمنا انتِ والبنات كلنا متجمعين حتى بنات عمج لمة بنات حاولت اطلع اعذار انُ ما اروح لكن ماقبلت رحنا اني ورياهم ورنا
دكينا الباب فتح الباب علي خرب بحظي المصخم سلمنا ودخلنا كانت الحجية كاعدة بالصالة كعدنا يمها شوية وبعدين صعدنا فوك ضحكنا وسولفنا وتقريبًا نسيت الموضوع رجعنا بليل للبيت ومرت الايام بكُل هدوء حياتنا ماشية طبيعية
من بدا الدوام اني رجعت دوامت سادس لان طلعت معدل بس ماعجبني فـ رجعت لسادس وبلشت اقرا من جديد وتعب نفس المدرسة رجعت ادرس بيها وكلبي يوجعني وبسرعه أتعب فـ رحت لدكتور صدمني من كال
بابا انتِ عندج فتحة بالقلب وجدًا متأخرة حتى عملية صعب تصيرلج!
انصدمت صدمة عمري مجنت متوقعة هيج ابددد فوك تعبي تعبت اكثر استمريت على العلاج وتعب اكثر ورا فترة راجعت دكتور كلي عندج قلب وعندج التهاب رئوي !! يالله دخيلك كلها التمت عليه
صرت اتعب بسرعة واهلي حاروا شنو يسون يحاولون لا يضوجني ولا اتعب ولا ابچي وابتعد عن المشاكل
ورا كم يوم سمعنا واحد من اصدقائة علي استشهد حيللل انقهرت بعده ممتخطي ذولك اللي راحوا اجهه هذا هم الله يساعدة
سئلت ازل عنه كالت حيل تعبان وهذا صديقة المقرب كُلش تعبان حتى اكل مجاي ياكل لو نايم لو بالدوام
ورا فترة راسلتني ازل كالت خطوبتي الجمعة والجمعة اللي وراها عرس عسل اختي فـ بدينا نحضر
ازل صارت كلية مرحلة اولى تحليلات مريضة وعسل خلصت كلية اعلام
رحت لاسوك اشتريت فد مرة لخطوبة ازل وحنة وعرس عسل بيوم خطوبة ازل اريد اصعد للبنات طلع هوَ من غرفتة كان لابس اسود وحيلللل يعني حيلل متغير ضعفان وصاير اسمر وحتى جوا عيونة صاير سواد صفنت بيَ شكد متغير شصاير بيَ بدون وعي او بدون تفكير كتلة
قمر:هاي شصاير بيك
علي: شصاير
قمر:متغير حيل
سكت ماحجه شي دنك راسة وبعدين رجع باوع عليه ودار عيونة عني
قمر: الله يرحمة ويصبرك
علي:امين
اترخص ونزل رحت اني يم البنات بس ضل بالي يمه حتى خلصتها صفنات اجت ازل من الصالون اول ما كعدت كالت
ازل:شبيجن والله جوعانة جيبلي حتلو خبزة يابسة
قمر:هههه طاح حظج كومي للمطبخ اكلي
ازل:خاف عيب
قمر:كومي كومي ماكو عيب اكلي وارجعي قبل لا يجون
كامت اكلت كيك ورجعت كعدت لحد ما اجوا علكوها علك دخل جاسر كان لابس زي عربي مو رسمي والابتسامة على وجهه كعد يمها جابوا الذهب ماقبل
جاسر:شنو توني كعدت ما اطلع هسة اتأخروا أتأخروا
بالضبط ماقبل يلبسها الذهب ضل كاعد يمها وكل شوية يحجي وياها وازل وجها صار احمر
شهد:ولجنن اول مرة اشوف ازل تخجل
عسل:راح تموت باع شصار بيها
غزل:حتى نست شلون تخجل هههه
ضلينا نباوع عليها ونصنف وهيَ كل ما تباوع علينا تخزرنا لان تعرف نضحك عليها خلصت الحفلة وتعبت مبية حيل لا ابدل ولا امسح المكياج لبست عباية فوك ملابسي وغطيت وجهي بس عيوني طالعة وطلعت قبل الكُل لان تعبت
ماكو احد الشارع فارغ كلهم بالديوان كاعدين طلعت للبيت مباشرةً نمت حتى بالفستان وبالمكياج حيل تعبت كعدت اخذت علاجي وسبحت وغيرت ملابسي وانتهى الاسبوع واجة يوم عرس عسل وشاهين وصار تقريبًا احلى عرس من ناحية كُلشي
ورا فترة كاعدة بغرفتي ونزلت سمعت بابا يحجي ويَ اخواني وماما
ابو مهيب :البارحة ابو فهد خطب قمر لـ علي
ام مهيب:وانتَ شكتلة
ابو مهيب:رفضت
مهيب:ليش
ابو مهيب:الولد مابيَ شي ومابيَ قصور كامل والكامل الله بس قمر بعدهي تدرس وهم بعدها تعبانة مو مال ازوجها واخليها تتورط
مهيمن: بكيفك بعد
ام مهيب: الله كريم
سدوا الموضوع واني هم محجيت شي مرت الايام ودخلت وزاري وبلشت اقرا اللامتحانات فترة المراجعة ماكانت حيل حيل صعبة لان اني مضبطة المواد كانت اكو صعوبة بس مو كُلش راسل علي وجاوبتة ومن ذاك اليوم استمرينا انُ نحجي مع بعض كُل يوم
بيوم دزيلي بصمة سطرني بيها اللي منتظرتها من سنين وايام وليالي حتى ينطقها وأخيرًا نطق
علي:بكلشي تلكيني شاطر الا بسوالف الحب اتبربد شوفي يبنت الناس انا زلمة شاريج ورايدج على سنة الله ورسولة احبج وعاشكج من زمان اجي اتقدم لخطوبتج بس قبل كلشي اريد الموافقة منج وهسة"
من الصدمة ماعرفت شسوي شمرت التيلفون وضليت افتر بالغرفة اروح منا وارجع منا رحت للكروب احنه البنات كلنا
قمر:وينجنننن بسرعةةة تعالننن
اول وحدها اجت رسُل وراها ريم وازل والبقية
رسُل:شكووو
ريم:ولججج احجييي
دزيتلهن البصمة وذني ضلن وحدها تجر طول وحدها تجر عرض
ريم:واخيرررًا
ازل:اعترفييي اله بسرعة
ريم:اسحلج سحل ازل انتِ انجبي وسدي حلكج باعي كلبي لا ترددين اشلعي كلبه
ازل:باااع الحقارةةة
رسُل:اتفق ويَ ريم
مرح:باللهجة العامة بيعي ثكل يومين
وردة:عفية عوفي
ازل:والله حقيرات
ريم:ازل انجبي
بالضبط ضليت كم يوم اني مفلسة يراسل ما جاوب اخير شي طك صبرة دزليي
علي:ترا حجيت حتى تجاوبينن وتنطينن الموافقة مو تشرديننن مدري وييننن جااوببييي عاااد
جاوبته كتله اني هم وشمرت التيلفون والرسائل ضلت تركع رحت لرياهم ورنا حجيتلهن
رياهم:اهلهل اهلهل لو عيب
رنا :لا عيب هسه يكولون ماصدكوا خلصوا منها
رياهم :صح الله وقمر تعرس شو احسها صعبه
رنا:لا قمر كوليله ما اريدك وضلي يمنا
قمر: اكلجن انجبن
ورا يومين كلي راح التحق ومن انزل يصير خير
...............................
علي: ورا كم يوم رحنا لبيت ابو مهيب لان كان مريض وانا ما كاتلتني المحنة رحت حتى اشوفها
من كاعدين صار صوت عالي غياث ومرتة ما ادخلنا اعتبرنا مشاكل عائلية لكن اشتد النقاش وارتفع الصوت فـ كام جدي صاح على غياث وكاله تعال هنا اجهه غياث وحجة اللي صار وبنفس الوقت طلك مرتة
من طلعنا جدي كال لحد يحجي بالموضوع ولا تجيبون طاري جنه ماندري
علي:صاير الطلاك بفلس
شاهين : عمي هنه مجلوبات موزين بس طلكها وطلعت عايشة
انغلق موضوع غياث وانغلق موضوع صهُيب الاثنين طلكوا بنفس الاسبوع
فد يوم خابرني فؤاد
علي:منو
فؤاد:ابن خالك
علي: ها ابن الماما خير ولو انتَ اليشوفك يشوف الخير
فؤاد: احب اكلك سامي وعبد صاروا بالبصرة وجايين ياخذون ثارهم منك وراح يطلعون هديل والماضي راح ينعاد بس بطريقة اخرى
علي:عليك الله الله يبشرك بالنار لان انتَ مستحيل تشم ريحة الجنة المهم وين ينعاد الماضي كلي المكان بالتحديد حتى انا اروح ما اتعب احد
فؤاد:خليك بهذا الاستهزاء لحد ما تندم
علي: امشييي لككك انتَ وهمّ ونعالي حتى نعالي اغلى منكم ادبسززز يهددد
غلق التيلفون مباشرةً والله اجيتوا والله جابكم اتصلت على راهب ونمر كتلهم انتظروني بالبستان وانا جايكم بدلت ملابسي ونزلت
الجدة :خايب يمه نسيت علاجي
علي:عفية عاشت ايدج وين البنات عنج
الجدة :يايمة چا ابتلن بيه البنيات كل ساعة صايحة عليهن
علي:چا شني شغلهن كلنا خدام الج
جبتلها علاجها شربتة وكالت
الجدة :ريت الله يزوجك حبيبة الكلب
علي:امين بس ياهو كلج عندي حبيبة يمكن اريد تقليد
الجدة :وضحكتك من تشوفها
علي:هيج السالفة
الجدة :مفضوح تراك
ضحكت وطلعت رحت للبستان لكيتهم كاعدين
نمر :اي شرف هلال العيد صار ساعة كاعدين هنا
راهب:حتى العروس زفوها وحبلت وجابت وانتَ بعدك
نمر: زلم تالي وكت
سلمت وكعدت يمهم
علي:ومرض عندي سالفة وياكم
نمر:لا ادكول عندي سالفة كول عندي مصيبة اريدكم تسوها وياي انتَ ماتسولف بس تخطط وتسوي مصايب
علي:احسنت
راهب :احجي شكو
علي: سامي وعبد موجودين بالبصرة
نمر:اي يالله
علي:وجعا اكو شغلة براسي بس ما اتوقع تضبط
نمر: شنية
علي: ما اريد اسجنهم بسجون الدولة
راهب:تريد تخليهم عندك وتلعب بيهم براحتك
علي: اي
نمر: لا تورط نفسك سلمهم
علي: خلينا هسة اريد اسحب فؤاد اليوم الفجرية
راهب:فؤاد شكو
علي:لا تصير اثول فؤاد وياهم وهوَ الخابرني وكال بالبصرة
نمر:وشنو اليثبت كلامة صحيح
علي:هو اليوم الفجر اريد اسحبة واثبت كلامة صح او لا
نمر :شلون
علي: اخابرة واكله اريد اروحلهم
نمر :هو فؤاد صح نكس بس مو اثول هيج
علي:الفلوس تخلي يصير جلب جوا رجليك
نمر :يعني تنطي الفلوس
علي:اي وبلكي تضبط
راهب:واذا كلامة جذب
علي:احمسه حمس
راهب:مدري حسيت روحي كاعدين بفلم
نمر:اكشن وكذا
علي:بلا اكلان تبن زايد تجون وياي لو لا
نمر :عيب على شواربك تسئل احنه وياك للموت
علي:جيد.
رجعت للبيت تعشيت وبعد ماطلعت بعد ما ناموا اهلي بـ 3 طلعت لكيت راهب ونمر كاعدين على الشارع الجو كان بداية شتاء
علي:صباح الخير
نمر. راهب :صباح الورد
راهب:ها شني شسويت
علي:هسه راح اخابر واشوف
راهب:يجوز مطمور
علي:مدري
اتصلت عليَ مرتين يلا جاوب
علي:تعال انا يم الشارع
فؤاد:شكو
علي: اريد اروح لـ سامي وعبد
فؤاد:كول والله
علي:انزل يلا انتظرك انا
سد التيلفون بدون جاوب باوعت على راهب ونمر
نمر :بس لا جذب
علي:اختفوا
راهب:شني ياهو كلك احنه جن خوية بشر احنه واحدنا جنه حايط وين نختفي
علي:اصعد بالسيارة وانجب يلا فضوني عاد
ورا نص ساعة اجه فؤاد توقعت مايجي
فؤاد: وين تعرف مكانهم
علي:غير تعرف مكانهم على دليلك ونروح
فؤاد: لا انا ما اروح
علي:ليش
فؤاد:ما اكدر اروح مريض كلش
علي:تاكل براسي حلاوة انتَ شنو مو انتَ خابرت كلت هنا بالبصرة اريد اروحلهم وغصبًا عليك تاخذني الهم
فؤاد:اجو ورجعوا
علي:شني ولك طفل كدامك
فؤاد: عوفني بحالي
علي:افهم من كلامك انتَ جذاب
فؤاد:انا ما اجذب وابتعد عني احسلك
علي:لا وتهددد
فؤاد:شتريد بالضبط
علي:سامي وعبد وين
فؤاد:اجو للبصرة ورجعوا
علي:ماشي
لزمتة من ياخة قميصة دفعتهه على الحايط عرضت كدام عيني ضحكتة ونضرات الشماتة من كان والدي يضربني ومن حط الشيش اللي للموت ما انسى ذاك اليوم وذيج الساعة وصرختي ودموعي والالم الشفتة عرضت كدامي من انطردت بذاك البرد وطلعت من البيت بعز البرد بسببهم
علي:تعرف شكد حاقد عليك تعرف شكد اكرهك لو اموتك بيدي ناري ماتبرد
فؤاد:شعور متبادل كرهك مايوصل كرهي كل ليلة وكل ساعه افكر شلون أذيك تعرف ليش ؟ لان ما تستاهل كل هذاا الخير ماتستاهل بشنو احسن مني من جنه صغار انا اكرهك حتلو اكبر منك بس اكرهك وراح ابقى اكرهك وراح يضل هذا الحقد يوصل حتى لـ حفادي
علي: الغيرة عامية على كلبك راح تضل هيج حقير ومنبوذ وراح اضل احسن منك بكلشي واتوفق عليك بأبسط الاشياء
دفعني ورجع هو لزمني الشارع كان فارغ وشارعنا ماعليَ بيوت بالبداية فـ محد بس صوت الكلاب
فؤاد:انتَ تخليني اكرهك
علي:وخر ايدك لا اكسرها الك
فؤاد: راح اضل وراك الى ان تموت
ضربتة على وجهه فؤاد قصير انا اطول منه واضخم منه
علي:اكسر ايدك اذا بعد ترفعها عليه كواد
راهب ونمر جانوا واكفين يشاهدون فقط طلعت ضيمي بفؤاد
راهب:لخاطر الله راح يموت
علي:عار كلشي ماعليه ولي يلا وحطها براسك الماضي انا راح اعيده بس بيكم مو بيه
فؤاد:نشوف
نمر:عاشت ايدك جنك مافيا
علي:انجب انتَ
نمر:بعد كلبي بخدمتك
رجعنا كعدنا بالسيارة قفلناها من الداخل نمر تمدد بالكشن الورا وراهب تمدد لـ كدام وعلك رجلي وانا مثله
نمر:اكلكم شباب
علي .راهب:كول
نمر:احبها
علي .راهب :ياهيَ
نمر :ريام
من كال هيج عدلنا كعدتنا والتفتنا عليَ
راهب: احلف تحبها حب حقيقي
نمر:اي والزهرة
علي:چا ما تخطبها
نمر:خطبت اربع مرات ورفضني ابوها
راهب:لان يدري بيك مسربت
نمر:دنجب محد يدري بسوالفي بس انتم
علي:انتَ شلون حبيتها
نمر:ايباااا
راهب:اعترفتلها
نمر:اي واعترفتلي وعايشين حياة حلوة
راهب :سولف شلون التقيتوا
نمر:دنجب شني ماتدري
راهب:لا منين ادري
علي:جذاب بس سولف وين نروح
نمر :اويلي اول مره شفتها اجت لـ اختي علمود يرحن للمدرسة وانا فتحتلها الباب وضلت براسي ضليت افكر بيها يعني انعجبت بيها بس تعرفون انا سرسري ياهيَ اشوفها أنعجب بيها كلت لا ابتعد عنها البنية بنت بيوت وابوها رجال معقد المهم وهمت نفسي انُ انا معجب فقط وفترة وينتهي هذا الاعجاب
علي:افتهمنا فضنا عاد ندري بيها هاي السالفة
نمر:ترا بالعباس ما اسولف خلوني عايش الأجواء واحجي
راهب:علييي سد حلككك احجي خوية احجي
نمر :اي ورا فترة جنت راجع من الدوام وانا امشي سرعة فـ هيَ جانت تمشي عكست عليها صارت بين الحايط وبين السيارة وكعت
نمر:ماتشوفين
ريام :وثول حتى ثول انتَ متشوف بس مو صوجك صوج الحط بيدك سيارة
نمر:وغمة حتى غمة فوك شينها كوات عينها
ريام :غمة التغمك احترم نفسك ولاتغلط انتَ متشوف امشي على الرصيف اني بس كول ما اعرف اسوق
نمر:مثلج انا طاكني الثول امشي واصفن بالشارع دروحي يلا روحي
ريام :راحت روحك
نمر: وروحج وياي
ريام :امداك وأمده شواربك
غمتني وراحت وانا هم غميتها وانتم واكفين تشوفون صاحبكم يترزل وماتحجون
راهب:عركة نسوان شلنا دخل
نمر:شني شكلت
علي:ماكال شي كمل انتَ سد حلككك
نمر: اي يخوية بعد اختفت عن نضري اخيكم هنا راح دز امه علمود تخطبها واجاني الرفض كالوا البنية تريد تكمل دراسة
تركتها بعد بس ضلت بعقلي وبكلبي هيَ جانت ويَ اختي فـ ثنينهن كُلية صيدلة وجانت صديقة اختي المقربة
حاولت هواي احجي وياها ماجانت تنطيني مجال أبدًا لحدما لزمتها بالجامعة كدام الكُل
ريام :شتريد مني لا تشوهه سمعتي كدام الطلاب
نمر:انا مو ناقص غيرة حتى اشوهه سمعتج انا زلمة شروكي وغيرتي على اعراض الناس مثل غيرتي على عرضي بس انتِ جبرتيني اجيج لهنا حاولت وياج بكل الطرق انُ احجي وياج خليتني اجي لجامعتج
ريام :وانتَ منو حتى تحجي وياي شخص غريب عليه لذلك اتركني بحالي
نمر :مو بكيفج اتركج بحالج افتهمتي مو بكيفج انا من شفتج نسيت حتى روحي
ريام :شتريد بالضبط
نمر :كل هذا وما افتهمتي شريد
ريام : اتركني بحالي
نمر :لا تخليني اصيح كدام الطلاب وكدام امة محمد واضيع سمعتج وسمعتي وسمعت الجامعة بكبرها امشي وياج نكعد ونحجي
ريام :تحلم بأحلامك اكعد وياك جايهه ادرس واحققق حلمييي فقط ما جايةةة اكعد اسولف وياك
نمر:وانا عايف دوامي وجاي علمودج ولازم تسمعيني وتفهمين ترا خبل وكلشي اسوي
ريام:شتريد يلا شتريد
نمر:همَ كالت شتريد يالله هم كالت شتريد اريدج بويه اريدج
ريام :شتسوي بيه
نمر:صبرني يأخو زينب لج بويه احبج احبج احبج احبج انتِ ماتفهمين
ريام :وليش حتى تحبني اني بالذات
نمر:هاي الراح تخليني اشك هدومي كدام خلق الله شنوو ليششش هاي بعد كلبي حباج
ريام :الله يوفقك
نمر:كفيلج الله اسطرج براشدي اكوم سنونج بالكاع شنييي الله يوفقني
ريام:راح تبدي محاضرتي
نمر:والله لو مو محاضرتج لو ابوج يجي بشيبهه هم ما اخليج ترحين الا تلغين
ريام :اكلك شو انتَ ماعندك اسلوب
نمر:ماعليج بأسلوبي راح ادز امي تخطبج وتوافقين افتهمتي
ريام:الله يرزقك بنت الحلال
وتركتني وراحت رجعت لدوام وبعد ماكدرت اشوفها ابد
راهب: هاي ندري بيها سولفتها ستين الف مرة
نمر:وزغنبوت انتَ ليش تمذر
راهب:صارلك ساعة عايش بأجوائك وتمسلت على راسنا من الصبح واحنه ندري بهذا كله عبالي سالفة جديدة
نمر:اجاوزك بأخلاقي
راهب:منيلك الاخلاق انتَ
نمر:ومن بعد فترة طويلة رجعت شفتها من كالوا الشيخ توفة وسوينا الفاتحة شفتها وحجيت وياها بس بسرعة طفرت ومن بعدهي كدرت اجيب رقمها واستمرينا نحجي ويَ بعض وقبل فترة اعترفت بأحبها بعد ما ذلتني ذل
راهب:كل واحد عندة قصة حب
علي: متعبة وحلوة
نمر: بيها ايجابي وبيها سلبي
قاطع كلامنا دكت تيلفوني
راهب:ياهو
علي:يمكن ابوي
نمر:ما حافظ رقم ابوك
علي:عنده رقمين حافظ واحد انجب خل اجاوب
ابو فهد:انتَ وين
علي:شكو
ابو فهد : وين دايح من صباح الله لهسة ماكو
علي: بالملاهي
ابو فهد:لا يا طايح الحظ
علي:شتريد
ابو فهد :تعال للبيت
علي:اي من اكمل
ابو فهد:ولك شتكملل
علي:من الملاهي
سحب راهب التيلفون
راهب:طايح الحظ جذاب عمي والله جذاب يم الشارع احنه هسة شوية ونجي
ابو فهد:هاي هيَ بوية رحم الله والديك
راهب:والديك
سد التيلفون وشمرة عليه
نمر:انتَ مخبل تخبلت شبيك
علي: هسه مخبل لو تخبلت
راهب:انتَ تعرف ابوك شنو عود هذا العاقل
علي:نمر شكد تذب من تروح لهناك
راهب:اكل خرا وانجب
علي:شماله هذا ما اروح عمي ما اروح بس اريد اسئل
نمر:ما ارتاحلك من تسئل يلا رجعنا للبيت
وصلتهم لبيوتهم وطبكت السيارة بالباب ونزلت كانت الساعه بـ7 الصبح لكيتهم كاعدين يتريكون ازل وعسل وامير يرحون لجامعة وشهد تروح للمدرسة
علي:صباح الخير
الكُل:صباح النور
الجد:وين جنت بوية
باوعت على ابوي وكتله
علي:يم الشارع
الجدة:شعندك من صباح الله يم الشارع
علي: بليل ضجنا وطلعنا
اسد:تعال اتريك
علي:اريد اصلي وبعدين اكل
صعدت فوك صليت وسبحت ونزلت لكيتهم رايحين بس امي وابوي وردة وجدي وجدتي كاعدين البقية طالعين لدوام
وردة: بيض متاكل والجبن خلص تروح للأسواق تجيب
علي: لا ما اريد راح اسوي كهوة
ام فهد:يمه الكهوة موزينة اكل شي
علي: ما اشتهي شي
الجد: ابو فؤاد يكول علي طاك فؤاد
علي: سوالفة سوالف جهال اذا طاكه يجيني ياخذ ثاره مو يروح يبچي يم ابو
الجدة:وين يكدرلك
علي:چا يطبه مرض ومحد ينطك بدون سبب
ابو فهد :الله يهديكم
علي:الله يهدي هوَ مو انا
ابو فهد: واحد يكره الثاني
علي: هو يخلي الواحد يكره ومنبوذ
كعدت يمهم شوية وبعدهي كاموا وردة كامت تنظف وابوي وجدي طلعوا لديوان
الجدة:ماتعرس
علي:خل يعرسون الاكبر مني يلا انا
ام فهد:مو ضروري اسد وصهُيب نسوانهم موجودة بس همّ هسة مايردون انتَ هم مرتك موجودة وخطابتها هواي خل اخطبها الك
علي:مرتي منو
الجدة:كمره
ام فهد:البنية مابيها عيب خل احجي ويَ ابوك يخطبها الك
علي:عادي احجي
ام فهد:يعني موافق
علي:اي ماعندي مانع
صاحت وردة من الصالة
وردة: واخيرررًا راح تنفك الچبسة
علي: ماتساعدج بالبيت لا تفرحين
يومين واجاني انذار قبل لا التحق حجيت ويَّ امي لا تفتح الموضوع لحدما انزل التحقت
عمر:المنطقة هاي حتى الطفل ويّ داعش
علي: نغولة
رحنا يم واحد چبير بالعمر واكف يباوع علينا من رحنا عليَ سوا نفسة يباوع بالكاع هوَ داعشي
علي .عمر:السلام عليكم
"وعليكم السلام
علي: شلونة الوضع يمكم
"أمن وأمان
علي: هم يجونكم داعش يأذونكم
"لالا أبدًا القوات الامنية موجودة وداعش اذا دخل احنه راح نخبر مباشرةً
عمر:اذا احد دخل او تعرف احد ويّ داعش ياريت تساعدنا
"اكيد هذا الشيء اكيد بأذن الله
علي:وانتَ حجي شتسوي بهاي الهيمة
"جيت ارعى
عمر:بس ما جاي نشوف شي
"أبني اخذهم وراح وهسع رايح ورا
عمر:الله يقويك
انسحبنا احنه وهوَ اخذ طريقة وراح
عمر:هوَ مو
علي:اي بس مزين لحيتة خل يدخل ونروح ورا
عمر: المنطقة خطرة
علي: الله ويانه
دخل هوَ لبيت واحنه حاصرنا المنطقة بالكامل على هاي المنطقة صار انزال جوي وبري تحاصرت المنطقة بالكامل دخلنا ورا كان يخابر
علي:ولا حركة افجر راسك بس تتحرك
اخذت التيلفون من ايدة مكتوب على الرقم ابو هبة
علي:اخذوا وحددوا الموقع
شكو زلمة انسحل وضلوا واحد يخبر على الثاني نبصهم على الجهاز يطلع داعشي
عمر:سيدي مكانة الرمادي
اتخذوا بيهم الاجراءات الامنية الكاملة انطيت نداء على ابو هبة بليل كالوا تم القبض
خابرتني امي كالت عرس غزل وتبچي لان انتَ ماراح تحضر بيوم الحنه ماكدرت اروحلها لكن بيوم العرس هو يوم نزولي مريت على السوك اخذتلها هدية بسيطة ورحت وصلت العصر سلمت عليها وطلعت برا مالحكت ابدل لان وصلت متأخر واجت الزفة
غضب:الحمدلله على سلامتك
علي:الله يسلمك عيني
دخل جدي وابوي واحنه وكفنا برا حط ايد غزل بيد غضب
الجد:هاي غزلنا وانا ابوك المدللة وجبيرة اخياتها واول حفيدة للعائلة تحطها بعيونك امانة الله ورسولة هاي لا تخليني اسمع بيوم مزعلها لو مبچيها وخلها براسك انا بناتي محد يثني عليهن
غضب: مايحتاج تصويني احطها بعيوني امانتكم بالحفظ والصون بعيوني وبكلبي
ابو فهد:الله يسعدكم يابويه ويوفقكم
راحت غزل لبيت زوجها ومرت ايامنا بهدوء ورا كم يوم شفت قمر بالبستان رحتلها كانت لابسة عباية وكاعدة وجها يضوي ضوي جنها كمير عرب
واكف احجي وياها وسمعت صوت اخت المنبوذ تهدد قمر خافت بشكل لدرجه جسمها ضل يرجف راحت هيَ لبيتهم وانا سحلت سَحر للحديقة الورا
علي:افتحييي التيلفون لا اقسم بالله اكسرة براسج
سَحر:افضحكم والله افضحكم
علي:اذا انتِ خوش مراة احجي واحمض ماعندج اطبخي
حطيت التيلفون بجيبي اكدر افتحة صاحت وراي بصوت عالي
سَحر:جيييبببب التيلفووووننن
علي: اذا صرختي بعد تعمين على نفسج والله اخليج تلطمين
ام فهد:شكو شكو شبيج عمة
سَحر:ابنجج اخذ تيلفوني
ام فهد:ليش يمه
علي:مو أدمية
سَحر:اني افتحة الك
علي:تؤ ردي الرمز وانا افتحة
فتحت التيلفون لكيت الفيديو رحت للواتساب لكيت رقمي دزيت الفيديو يلا حذفتهه
علي:يلا هاج ومرة ثانية لا تحطين نفسج بشغلات ماتخصج هالمره هيج المره الثانية استخدم وياج أسلوب أنت أنت وان لم تكن انت
ام فهد :لا حول ولا قوة الا بالله
ورا فترة التحقت للانبار وياي عمر وراهب ونمر صار التحاقنا سوا عمر بوقتها كان كُلش مريض والجو كان بارد
نمر:سودة عليه ياخوية
عمر:هههه اسم الله عليك مادري بيك هالكد حنون
نمر:بعد كلبي والله خوش ولد انا
علي:ليش ماطلبت اجازة
عمر:يمعود هو منو يباوع لحالنا
كعدت واجه هوَ حط راسة بحضني ضليت العب بشعرة ونسولف
عمر:علي
علي:عيني
عمر:احجيلي قصة
علي:ههههه شبيك وليدي
عمر:لا عليك الله كلشي الجان احب سوالفك
نمر طلع واجب وراهب رجع من واجب واحنه كاعدين لان واجبنا الصبح كاعدين استراحة
علي: بيوم من الايام بالموصل جان اكو خوات ثنين قمر وشمس جانن كلش جميلات قمر حبها أمير من الأمراء وتقدملها لكن هيّ رفضتة ضل يحاول وياها وهيَ ترفضة الى ان بيوم قرر انُ يخطفها وفعلًا خطف قمر واخذها من الموصل الى الحلة ومن وصلوا كالها خلاص انتِ هسه لازم تزوجيني لكن
هي رفضتة وكالت مستحيل اتزوجك شكد حاول وشكد راد لكن ما فاد فـ قرر. انُ يعاقبها ربطها بسلسلة من ركبتها وسجنها بيوم من الايام مر ساحر من شباك السجن فـ هيَ طلبت مساعدة الساحر الساحر وافق كلها ماشي أنا راح احولج الى حمامة بس انتِ من تطلعين من السجن لازم ترجعيلي حتى ارجعج انسانة وفعلًا حولها الى حمامة وطلعت من السجن السلسلة تحولت
الى طوق لكن هي من جمال روحها مارجعت لساحر راحت مباشرةً للموصل اختها من كد مابچت عليها عمت فـ هيَ من وصلت وكفت على الشباك وبما انُ هي حمامة ماتكدر تحجي فـ كالت
ياكوكوختي وذيج ادكلها وين انتِ هنا قمر تذكرت لازم ترجع لساحر ومن رجعت لكت الساحر رايح وضلت قمر حمامة الى هذا يومنا موجودة في كل مكان تمشي وتنوح على اختها وادكول كوكوختي وين اختي بالحله
عمر: حبيت اروح ادور قمر
علي: اكعد وانجب مو مريض انتَ
ثاني يوم طلعنا واجب كنت واكف على الساتر انا وياي ضابط وراهب ونمر وعمر واكفين ماكنت منتبهه عليهم جنا نحجي عن المنطقة والطرق المؤدية الها سمعت نمر صاح
نمر:لااا تررفع لااا ترررفع
من التفت انفجرت عبوة على عمر
علي:عمررررر
بدون وعي وبدون تفكير ركضت على عمر اللي صار بنص الناررر انفجرت عليَ صار كدامي راهب لزمني
علي:عمررر لكككك عمررررر
راهب:تخبلتتتت وينننن راايح نارررر ولككك ناررر
الانفجار كان جدًا قوي عمر صار قطع واحترك
علي: كتلكككك لا تجيييي لاااا تجييييي
بعد مرور وقت كدرت اتقدم بس شتقدم وشسوي كل قطعة بمكان صاير الراس والجسم
علي:ولك خويه كلت ما اعوفك عمر كلت وياك دوم ولك عمر صاحب روحي خااايب خويةةة
المنضر ماكدرت استوعبة ولا كدرت اتقبل صرت الم أشلاء جسمة تركتة وكعدت مخلي ايدي على راسي مترب ومدمر من دم صاحبي
راح عمر وراحت روحي ويا كسرني فوك كسرتي تعبني فوك تعبي اختبرني ربي بعمر واختبار صعب عمر وياي من الصغر عمر صار روحي من الدنيا شلون بهل السهولة يروح عمر ارتقى شهيدًا
راهب:خوية كوم
علي: حيل ماضل بيه حتى اكوم
اخذنا جثة عمر وتوجهنا لناصرية حتى يودعونا اهله طول الطريق وحيلي مهدود واتمنى حلم واكعد منه وعمر مابيّ شي يرجع يكعد ويانة
راهب:يلا
خوية وصلنا
نزلت من السيارة نزلوا التابوت وعيني عليَ ااخخ ياكسرتي
اهله عدهم خبر نسوان بالباب يصرخن وابو واخوانة وعمامة كلش هواي ناس من وصلت وشفت التابوت انتهى حيلي كعدت بالكاع على رجلية بچيت وانهد حيلي اجه عليه ابن عمة حضني وضلينا نبچي ثنينا
كملوا كل مراسيم التشيع حطوا التابوت فوك السيارة صعدت نمت على التابوت
علي:ولك عمر كتلك نتمدد ثنين مو نريد نزفك مو تريد حبيبتك
سحبني راهب من السيارة وحضني حيل
راهب:كافي ولك كافي
علي:ولكك راح راح صويحبي رااح
راهب: شهيد ارتقى شهيد يم سيد الشهداء
علي:نار كلبيي ونار كلبي
راهب:اششش كافي
ماكدرت اروح ويا لنجف لان انتهيت للعصر خشمي نزف دم وملابسي كلها تراب اجه راهب جابلي دشداشة وشماغ
علي:المن ذني
راهب:بدل ملابسك شوف شصار بيك
بدلت ملابسي وطلعت شفت الشيخ سلمت ورحت ادور على نمر كاعد وحده وصافن حتى مايحجي احجي ويا مايحجي
انتهت الفاتحة رجعت للبيت حيلي مهدود دخلت ادور على امي رحتلها للغرفة كعدت وبچبت بحضنها
ام فهد:الله يرحمة يايمه
علي:حيلي انهد اخذ حيلي وراح تعبت يمه والله تعبت بعدني بعدني ابچي على ذولاك چملني عمر فوك كسري كسرني
ام فهد: يعين الله كلبك
علي: شضل بكلبي يمه شضل
مر عشر ايام على وفاة عمر وساعة اتقبل الخبر وساعة لا اطلع صورة ورسائل وذكرياتة البقت نزلت كعدت على الدرج شغلت قصيدة بأسم الكربلائي البيت كان هدوء كلهم طالعين ورثت جكارة وكعدت وصل لبيت من القصيدة كال
اخو مثلك بعد يحصل اجيب منين
اذا انتَ رحلت عني اروحن وين
يخي هونك يخي هونك
عمر مايسوا من دونك
يضي عيناي
دمع عيني خطف لونك
تريد تغمض عيونك
يضي عيناي
علي:جان ابالي ازفك موش اشيع بيك !
ورا الاربعين تزوجت عسل وتمت خطوبة ازل وابوي محاجي ابو قمر وانا مادري بيّ رافض من يمه
علي:وكت زواجي هسة
ام فهد:عمرك راح يوصل الثلاثين
علي:يمه رحمة للعباس ابو فاضل هذا الموضوع لا تفتحوا هسة
ومرت الايام وكثرت الخطابة لقمر زاد خوفي انُ تروح من ايدي
راهب:اعترفلها
علي:مدري
نمر:هو شني مدري لا تجلطني
يومين واعترفت بـ حبي الها اشو هاي اختفت ! حتى ما جاوبت اسبوع وهاي مختفية رجعت راسلتها يلا جاوبت بكلمتين اني هم ومن عدها عرفت تبادلني نفس المشاعر استمريت بعلاقتي وياها وجانت عليه صعبة ازوج وافرح وعمر بعد ما دايرة سنتة وهو كان منتظر هذا اليوم اكثر مني
رجعت التحقت بنفس المكان الاستشهد بيَ عمر صار علينا هجوم جدًا قوي من اربع جهات تحاصرنا من بين الاشتباكات اجت طلقة بصدري !!!
شكرا لزيارتكم عالم روايات سكيرهوم
